मकवानपुरले जित्यो क्रिकेटको उपाधी
Tags: No Comments
मकवानपुर । मकवानपुरको हेटौंडामा भएको प्रधानमन्त्री कप क्रिकेट टिम छनौट प्रतियोगिताको उपाधी मकवानपुर क्रिकेट क्लबले जितेको छ ।
मकवानपुर जिल्ला क्रिकेट संघको आयोजनामा बृहत खेलकुद तथा व्यापार महोत्सव अन्तर्गत भएको प्रधानमन्त्री कप क्रिकेट टिम छनौट प्रतियोगिताको उपाधी मकवानपुर क्रिकेट क्लबले जितेको हो।
विहीबार भएको फाइनल खेलमा ओमनगर क्रिकेट क्लवलाई ३९ रनले पराजित गर्दै मकवानपुर क्रिकेट क्लबले उपाधी हात पारेको हो । सुरुमा ब्याटिङ गर्न मैदान उत्रेको मकवानपुर क्रिकेट क्लवले निर्धारित ४० ओभर खेल्दै ९ विकेटको क्षतिमा सम्मानजनक २ सय २३ रन बनाएको थियो ।
मकवानपुरका लागि सुमन सुनारले ७५ रन र रिजन ढकालले ५२ रन बनाए । ओमनगरको तर्फबाट रोहित ठाकुर र पियुष शर्माले समान २/२ विकेट लिए । २ सय २४ रनको लक्ष्य पाएको ओमनगर ३८ ओभरमा अलआउट हुँदै १ सय ८४ रनमै सिमित बन्दा मकवानपुर बिजयी भएको हो । ओमनगरको लागि गौरभ खड्काले ८७ रन र शुभ कंसाकारले ४२ रन बनाउन सफल भए । मकवानपुरको तर्फबाट समिर चौलागाईले ३ विकेट हात पार्न सफल भए ।
प्रतियोगिताको फाइनल खेलको म्यान अफ द म्याच रिजन ढकाल घोषित भए भने बेष्ट ब्याट्स म्यान गौरभ खडका, बेष्ट बलर समिर चौलागाई र प्रतियोगिताको प्लेयर अफ द सिरिलज तक्षक सिम्खडा घोषित भए । प्रतियोगितामा सहभागी भएका प्रतियोगीको खेल प्रदर्शनीका आधारमा मकवानपुरबाट १८ जना खेलाडीहरुलाई दोस्रो चरणको छनोट प्रतियोगितामा प्रदेश पठाउने प्रदेश क्रिकेट संघका उपाध्यक्ष प्रेम क्षेत्रीले जानकारी दिए । गत वर्षको प्रतियोगितमा मकवानपुरबाट रामनरेश गिरी, गौरव खड्का, रिजन ढकाल र शुभ कंसाकार छनोट भएका थिए । छनौट प्रतियोगितामा ५ वटा टिमले सहभागिता जनाएका थिए ।
मकवानपुर क्रिकेट संघका अध्यक्ष करण महत्रा क्षेत्रीको अध्यक्षतामा भएको कार्यक्रममा बागमती प्रदेशका आर्थिक मामिला तथा योजना मन्त्री बहादुर सिंह लामा, मकवानपुर जिल्ला खेलकुद विकास समितिका अध्यक्ष बेष खड्की लगायतले पुरस्कार वितरण गरेका हुन् ।
मकवानपुर । मकवानपुरकाे हेटाैडामा प्रदेश सरकार र स्थानीय तहका अधिकारका विषयमा छलफल सुरु भएकाे छ । छलफल कार्यक्रम प्रदेश सरकारकाे लागि उपलब्धिपूर्ण हुने बागमती प्रदेशको मुख्यमन्त्री शालिकराम जमकट्टेलले बताए । सघीयताकाे अभ्यासकाे क्रममा आफूहरुले पाएकाे सिमित अधिकारबाट धेरै काम गरेकाे जमकट्टेलले बताए ।
‘याे सम्मेलन उपलब्धिपुर्ण हुने अपेक्षा छ कार्यविस्तृतिकरण परिमार्जन समितीले गत ६ महिनादेखि विभिन्न क्षेत्रमा अध्ययन गरी कार्यपत्र प्रस्तुत गर्ने र सोही अनुरूप छलफल गरी अघि बढ्ने तालिका छ’ उनले भने ।
संघीयता मोडलहरु देश अनुरूप फरक फरक रहेको र देश काल परिस्थिति अनुसारको मोडल स्थापन गर्नुपर्ने जमकट्टेलले बताए । ” यसमा आतिनु पर्ने अवस्थाको छैन जुन मोडल हामी अनुकुल छ, त्यै अनुसार अघि बढ्नुपर्छ, सुरुवातलाई नराम्रो भन्न मिल्दैन” उनके भने । संघीयतालाई सुदृढिकरण गर्ने र संविधानलाई अक्षरश पालना गर्ने कुरामा सरकारले पनि जिम्मेवारी बहन गर्ने उनले बताए । कार्यक्रममा संघीयता र तहगत व्यवस्था बारे बिज्ञहरूको प्रस्तुती रहने छ ।
बागमती प्रदेशको मुख्यमन्त्री तथा मन्त्रिपरिषद्को कार्यालय, नेपाल नगरपालिका संघ, गाउँपालिका राष्ट्रिय महासंघको संयुक्त आयोजनामा भएको कार्यक्रममा प्रदेश र स्थानीय तहका अधिकारका बिषयमा छलफल भएको छ ।
संघीय सरकारले अधिकार खोसेका कारण आफूहरु कामै गर्न नसक्ने अफ्ठ्याराेमा आफूहरु नरहेकाे उनले बताए । संघ सरकार र प्रदेश सरकारका बिचमा तिक्तता पनि नभएको उनले बताए । आफूहरुले पाएको अधिकारबाट धेरै काम गरेर देखाएको जमकट्टेलको दावि छ । अहिलेको अवस्थामा छिटो परिणाम खोज्ने परिपाटीका कारण थप समस्या सृजना भएको उनले बताए ।
कार्यक्रममा नेपाल नगरपालिकासंघका अध्यक्ष भिमप्रसाद ढुंगानाले संघीयतालाई कार्यान्वयन गर्न नसकेमा समस्या हुने बताए । संघ र प्रदेशलाई गुनासो गर्ने भन्दा पनि अब काम गरेर देखाउन उनले आग्रह गरे । संबिधानमा लेखिएका एकल अधिकार र संयुक्त अधिकारका कुरा कार्यान्वयन गर्नुपर्ने उनले बताए ।
गाउँपालिका राष्ट्रिय महासंघका अध्यक्ष लक्ष्मी देवि पाण्डेले बजेट थोरै स्थानीय तह र प्रदेशलाई दिएर अरु बजेट धेरै संघीय सरकारले राख्दा काम गर्नका लागि समस्या भएको बताए । ऐन बनाउने नाममा संघ र प्रदेशले स्थानीय तहको अधिकारमा समस्या उत्पन्न भएको उनले बताए । कार्यक्रममा बागमती प्रदेशका मन्त्रीहरु, प्रदेशका प्रमुख सचिब, मन्त्रालयका सचिबहरु, स्थानीय तहका प्रमुखहरु लगायतकाको सहभागिता रहेको छ ।
मकवानपुर । हेटौंडामा जारी बृहत् खेलकुद तथा व्यापार महोत्सवमा लोक गायक बद्री पंगेनीसंगै दर्शक झुमेका छन् । पंगेनीले आफ्नो सांगीतिक प्रस्तुतीमा दर्शकलाई भीड लगाएका थिए ।
उनले आफ्ना चर्चित र लोकप्रिय गीतमार्फत मकवानपुरेलाई नचाएका थिए । महोत्सवमा उपस्थित दर्शकहरुले नाचेर साथ दिएका थिए । महोत्सवमा बुधबार पंगेनीसंगै गायक हेमन्त शर्मा, मीना गिरी, सम्झना लामिछाने, डोरबहादुर खपाङ्गी, राजेन्द्र गुन्द्रुके लगायतले आफ्नो प्रश्तुती दिएका थिए । विहीबार चर्चित गायिका आस्था राउत, दुर्गा सापकोटा, गायक मदन विष्ट, सरोज लामिछाने, रविकुमार रिमाल र हाँस्य कलाकार दिनेश काफ्लेको प्रस्तुती रहने आयोजकले जानकारी दिएको छ ।
१७ गतेसम्म सञ्चालन हुने महोत्सवमा राष्ट्रिय, प्रदेश तथा जिल्लास्तरीय गरी १३ वटा विधामा खेल सञ्चालन भैरहेको छ । महोत्सव आयोजक समितिका संयोजक मकवानपुर जिल्ला खेलकुद विकास समितिका अध्यक्ष बेष खड्कीले महोत्सव सोचे अनुरुप सञ्चालन भैरहेको जानकारी दिए । खेलकुद क्षेत्रको विकासका लागि आयोजित महोत्सवमा सबैको साथ, सहयोग प्राप्त भैरहेको बताए ।
महोत्सवमा करिब २६० वटा स्टल रहेको छ । कृषि, पर्यटन, हस्तकला, अटो मोबाइलका साथै बाल उद्दान महोत्सवमा रहेको छ । महोत्सवबाट खेलकुद विकास समितिलाई प्राप्त हुने करिब २५ लाख रुपैयाँ रकमबाट वर्षभर खेलकुद प्रतियोगिता आयोजना गर्ने आयोजकले लक्ष्य राखेको छ ।
मकवानपुर । प्रहरीले मकवानपुरबाट लागु औषध गाँजा ९८ किलाेसहित ४ जनालाई नियन्त्रणमा लिएकाे छ । मकवानपुरकाे २ छुट्टाछुट्टै स्थानबाट उनीहरुलाई नियन्त्रणमा लिएकाे प्रहरीले जनाएकाे छ ।
हेटौडा उपमहानगरपालिका १५ राताेमाटेबाट ८८ किलाे ३ सय ९० ग्राम गाँजासहित १ जना र मनहरी ९ रमनटारबाट १० किलाे गाँजासहित ३ जनालाई प्रहरीले नियन्त्रणमा लिएकाे बागमती प्रदेश प्रहरी कार्यालय हेटौडाले जनाएकाे छ । हेटौडा १५ राताेमाटेबाट उक्त परिणामकाे गाँजासहित थाहा नगरपालिका ५ बज्रबाराहीका सविन कुमार गुरुङलाई नियन्त्रणमा लिएकाे प्रहरीले जनाएकाे छ ।
हेटौडा १५ रातोमाटे प्रहरी चौकीबाट खटिएको टोलीले चितवन तर्फबाट सर्लाही तर्फ जादै गरेको ना.८ ख ७५०४ नम्बरको डिब्बा ट्रकलाई रोकी जाँच गर्ने क्रममा उक्त ट्रकमा सात वटा पोकामा ८८ किलाे ३ सय ९० ग्राम लागु औषध गाँजा फेला परेकाे थियाे । प्रहरीले ट्रक चालक २५ वर्षीय सविन कुमार गुरुङलाई ट्रकसहित नियन्त्रणमा लिएकाे जनाएकाे छ ।
यसैगरी पूर्वपश्चिम राजमार्ग अन्तर्गत मकवानपुरको महनरी गाउँपालिका–९ रमनटारमा भएको दुर्घटनामा घाइते उद्धारका लागि पुगेको प्रहरीले १० किलाे लागुऔषध गाँजा बरामद गरेको छ । उक्त घटनामा ३ जनालाई नियन्त्रणमा लिएको प्रदेश प्रहरी कार्यालयले जानकारी दिएकाे छ । सोमबार रमनटारस्थित सडक किनारमा रोकिराखेको ना ४ ख ९४३३ नम्बरको ट्याङ्करमा बा ४० प ८२७३ नम्बरको मोटरसाइकलले ठक्कर दिँदा दुर्घटना भएको थियो ।
उद्धार गर्न घटनास्थलमा पुगेको प्रहरीले दुर्घटनामा परेको मोटरसाइकल र घाइते फेला नपरेपछि घटनास्थल नजिकै झाडीबाट २ वटा झोलामा ५/५ किलाे लागुऔषध गाँजा फेला परेको बागमती प्रदेश प्रहरी कार्यालय हेटौंडाले जनाएको छ । घटनास्थलमा घाइते फेला नपर्नु तर लागुऔषध गाँजा फेला परेपछि प्रहरीले गरेकाे अनुसन्धानबाट माटरसाइकल चालक कैलाश गाउँपालिका वडा नं.७ शर्सि बस्ने २५ वर्षीय हरी प्रजा, माेटरसाइकल पछाडि सवार सोही स्थान बस्ने १८ वर्षीय प्रस्थान प्रजालाई मनहरीमै आफन्तको घरबाट घाइते अवस्थमा नियन्त्रणमा लिइएकाे हाे ।
मोटरसाइकल चालक हरीलाई प्राथमिक स्वास्थ्य केन्द्र मनहरीमा सामान्य उपचार पश्चात थप उपचारर्थ भरतपुर अस्पताल चितवन पठाईएको छ भने प्रस्थान र टयाङकर चालकलाई अनुसन्धानका लागि नियन्त्रणमा लिइएकाे प्रहरीले जनाएको छ ।
मकवानपुर । मकवानपुरकाे हेटौडामा नेवार समुदायले यःमरि(मनपर्ने रोटी) पुन्हि पर्व मनाएका छन् । नयाँ धान भित्र्याएको खुसीयालीमा मनाईने यःमरि पुन्हि पर्व हेटौंडामा मनाईएको हाे ।
नेवार समुदायको दुई संस्थाले मंगलबार हेटौंडा बजारको बुद्धचोकमा निःशुल्क यःमरि र अचार वितरण गरि पर्व मनाएका छन् । नेवाः देय् दबु र नेवाः साँस्कृतिक पुचः मकवानपुरले छुट्टा छुट्टै यःमरि र अचार पकाएर वितरण गरेका थिए । कार्यक्रम नेवारी महिलाहरुले मौलिक पोशाक हाकुपटासीमा सजिएर यःमरी बनाएका थिए ।
नेवाः देय् दबुले आयोजना गरेको कार्यक्रम दबुका जिल्ला अध्यक्ष विष्णुलाल श्रेष्ठको अध्यक्षतामा भएको थियो । दबुले ४० किलो मैदाबाट करिव एक हजार चार सय वटा यःमरि र गोलभेडाको अचार निःशुल्क वितरण गरेको जनाएको छ । कार्यक्रममा नेपाल आदिवासी जनजाति महासंघ मकवानपुरका अध्यक्ष जंगबहादुर गुरुङ, नेपाल आदिवासी जनजाति पत्रकार महासंघ (फोनिज)का केन्द्रीय प्रतिनिधी सुरेश श्रेष्ठ, नेवाः देय् दबुका जिल्ला सचिव देवकुमार श्रेष्ठ, जिल्ला सदस्य यज्ञबहादुर श्रेष्ठ, हेटौंडा उपमहानगर अध्यक्ष प्रतिमा श्रेष्ठ, नेवाः गुठी खलः मकवानपुरका अध्यक्ष अनिल खड्गे लगायतको उपस्थिती रहेको थियो ।
नेवाः देय् दबुले मकवानपुर जिल्ला कार्यसमिति र हेटौंडा नगर कार्यसमितीबाट मात्र आर्थिक सहयोग संकलन गरी संस्कृती जगेर्ना गर्न यःमरि पुन्हि मनाएको अध्यक्ष श्रेष्ठले बताए । कार्यक्रममा नेवाः अगुवाहरु शर्मिला श्रेष्ठ, सुना श्रेष्ठ, कान्छी श्रेष्ठ, शिव श्रेष्ठ, रमा श्रेष्ठ, राजु श्रेष्ठ, श्यामकृष्ण श्रेष्ठ, विश्व श्रेष्ठ लगायतले यःमरि पुन्हि बनाउँन र वितरण सहयोग गरेका थिए ।
नेवाः साँस्कृतिक पुचः मकवानपुरले आयोजना गरेको यःमरि पुन्हि कार्यक्रम नेवाः साँस्कृतिक पुचः मकवानपुरका अध्यक्ष सुनकुमार मानन्धरको अध्यक्षतामा भएको थियो । करिब ५ सय जनालाई प्रति व्यक्ति २ वटा यमुरी र आलु चोखा वितरण गरिएको पुचःका जिल्ला महासचिव नारायण राजथलाले जानकारी दिए ।
हेटौंडा उपमहानगरपालिका मेयर मिना कुमारी लामाले उद्घाटन गरेकाे दुवै कार्यक्रममा हेटौंडा उपमहानगरपालिकाका सामाजिक विकास महाशाखा प्रमुख भिमप्रसाद तिमल्सिना, शाखा अधिकृत गंगाकुमारी चौलागाई, भैरव कुमाल लगायतको आतिथ्यता रहेको थियो ।
