सम्झना थापा मगर
१.
तिम्रो माया यो मनको भित्र रहेको छ
मुटुको हर प्रहरमा त्यै चित्र रहेको छ
दुरिले टाढा भएर आखिर के भो त
सम्बन्ध नङ मासु झै पबित्र रहेको छ ।
२.
तिखो बचन लगाएर मुटुमा छुने गर्दछ्न्
मुखले ठिक्क पारिकन हात धुने गर्दछ्न्
कस्तो बुझ्न नसकिने बानी रहेछ नि हजुर
आखिर पानी माथीको ओभानो हुने गर्दछ्न् ।
३.
गरिबीले मानिसलाई जिउन सिकाउँछ
मेहनती बनी रसपान पिउन सिकाउँछ
जीवनलाई अझ मजबुत बनाउँदै
फाटेको हरेक टालो सिउन सिकाउँछ ।
४.
नेताहरुले कुर्सीमा तानातान किन गरेका होलान्
सत्तामा पुग्न भनेर हानाहान किन गरेका होलान्
आफ्नो स्वार्थका निमित्त मात्र लडिरहेका छन् यहाँ
देशविकासका कार्यमा आनाकान किन गरेका होलान् ।
स्याङ्जा

