मकवानपुर । बागमती प्रदेशका मुख्यमन्त्री राजेन्द्र पाण्डेले नव निर्वाचित जनप्रतिनिधिलाई जनताको दुख बुझेर काम गर्न निर्देशन दिएका छन् ।
स्थानीय तहको आवश्यकता अनुसार बनेका कानुन आँफैले कति कार्यान्वयन गरियो भनेर समिक्षा गर्न उनले आग्रह गरे । “पुरानाले के गर्नु भयो, अब तपाईंहरूले कानुन बनाउनु अघि घनिभुत छलफल गर्नुस् अनि बनेको कानुन अक्षरस कार्यान्वयन गर्नुस्” उनले भने । कानुन नबनाई शासन गर्छु भन्नु छाडा हुनु भएको उल्लेख्य गर्दै मुख्यमन्त्री पाण्डेले भने “कानुन बनाउनुस र पुरापुर कार्यान्वयन गर्नुस् ।”
“संघ सुन्ने सरकार हो, प्रदेश नजिक छ भन्ने सरकार हो, स्थानीय सरकार जनताले काखमा टाउको राखेर रूने सरकार हो, जनमुखी हुनुपर्छ । चुनावमा जे पनि गर्छु भन्ने,अनि ब्याक हुने काम नगर्नुहोस्” उनले भने “केन्द्रले नदेखेको कुरा तपाईंले देख्नु पर्छ ।”
बागमती प्रदेशका १ सय १९ वटै स्थानीय तहमा निर्वाचित प्रमुख र उपप्रमुखका लागि आयोजना गरिएको अभिमुखीकरण कार्यक्रममा उनले यस्तो बताएका हुन । भौतिक पुर्वाधारको विकासमा मात्रै ध्यान केन्द्रित नगरि सामाजिक विकासमा पनि लागिपर्न उनले आग्रह गरे । “मानवीय विकास भयो कि भएन, व्यवस्था बदलियो कि छैन त्यो हेर्नुस्” उनले भने ” हिजो बनेको कानुन जनताको पक्षमा छ भने जसले बनाको भएपनि कार्यान्वयन गर्नुस् ।”
संविधानको मर्म अनुसार काम गर्न उनले आग्रह गरे । “डोजरे विकासबाट बाहिर आएर एकल महिला, लोपोन्मुख, सीमान्तकृत जातिको लागि के गर्नु भयो, के गर्दै हुनुहुन्छ ध्यान दिनुस्, अब आउने बजेट मै यो कुरा ध्यान दिनुस् । बागमती प्रदेश स्थानीय सरकारसंगसंगै हिड्न चाहन्छ ” उनले भने ।
प्रदेशको ११२१ वडामा प्रदेश सरकारले वडा समाजवादी कार्यक्रम ल्याउँन लागेको बताउँदै मुख्यमन्त्री पाण्डेले जातीय, धार्मिक विभेदको अन्त्य गर्ने नीति तथा कार्यक्रम र बजेट ल्याउन आग्रह गरे ।
शहरको फोहोरको बैज्ञानिक व्यवस्थापन गर्नमा दीर्घकालीन कार्यक्रम बनाउन उनले आग्रह गरे । जनचेतनाको सवालमा पनि चासो र चिन्तन राख्न उनले आग्रह गरे ।
मकवानपुर । नवनिर्वाचित जनप्रतिनिधिलाई पारदर्शी हुन बागमती प्रदेशको प्रदेश सचिब सुरेश अधिकारीले आग्रह गरेका छन् ।
बागमती प्रदेश सचिब अधिकारीले सुशासन, पारदर्शिता,आर्थिक विकास, खरिद प्रणाली, वातावरणीय सवालको बारेमा जानकारी गराइने उद्देश्यले आयोजित अभिमुखिकरण कार्यक्रममा निर्वाचित जनप्रतिनिधिले भ्रष्टाचारको अन्त्यको लागि लड्नुपर्ने र यसमा चनाखो हुन उनले आग्रह गरेका हुन् ।
जनप्रतिनिधिलाई आफ्नो क्षेत्रमा काम गर्दा आईपर्ने अफ्ठ्याराहरूमा सघाउन यो कार्यक्रम फलदायी हुने अधिकारले बताए ।
राजनीतिलगायत बिबिध अन्तरसम्बन्धलाई परिभाषित गर्दै सक्षमता अभिबृद्वि गर्दै काम गर्नु पर्ने उनले बताए । स्थानीय तहमा हस्तान्तरण हुनुपर्ने तर हालसम्म संघको कब्जामा रहेको अधिकार बारे पनि कार्यक्रम छलफल हुने उनले बताए ।
बागमती प्रदेशका १ सय १९ वटै स्थानीय तहमा निर्वाचित प्रमुख र उपप्रमुखका लागि आयोजना गरिएको अभिमुखीकरण कार्यक्रममा प्रदेश राजधानी हेटौंडामा सुरू भएको छ । कार्यक्रम बागमती प्रदेशका मुख्यमन्त्री राजेन्द्र पाण्डेले उद्घाटन गरेका छन् ।
कार्यक्रममाराष्ट्रिय सभा सदस्य खिमलाल देवकोटाले स्थानीय शासन संघीयता अन्तर तह समन्वय बजेट तर्जुमा र असल अभ्यास बारे कार्यपत्र प्रस्तुत गरेका छन् । योजना तर्जुमा, कर राजस्व संकलन तथा बांडफाड, क्षमता विकास र अवसरहरू बांडफांड, संगठन संरचना निर्माण, केन्द्रिकृत सोच र मानसिकताका कारण संबिधानले तोकेजस्तो र अपेक्षा गरेजस्तो उपलब्धि हासिल गर्न चुनौती भएको राष्ट्रिय सभा सदस्य देवकोटाले बताए ।
कार्यक्रममा जनप्रतिनिधिहरूलाई समन्वय सहकार्य बलियो बनाउन, स्थानीय तहको बार्षिक नीति योजनाको लागि सहकार्य गर्न, स्थानीय तहबिचको समस्या चुनौती तथा अवसरलाई छलफल गरिने बागमती प्रदेश मुख्य मन्त्री तथा मन्त्री परिषद् कार्यालय सचिब स्किम श्रेष्ठले बताइन् ।
कार्यक्रममा प्रदेश नीति तथा योजना आयोगका प्रतिनिधिहरू, मन्त्रालय मन्त्रीहरू, मन्त्रालयका सचिबहरू, मकवानपुर जिल्लाका प्रमुख जिल्ला अधिकारीलगायत महानगरपालिका, उपमहानगरपालिका, नगरपालिक र गाउँपालिकाका प्रमुख उपप्रमुखको उपस्थिति रहेको छ । कार्यक्रम भोलिसम्म चल्नेछ ।
मकवानपुर । हेटौंडामा भइरहेकाे चौथो संस्करणको स्थानीय तह सहिद स्मृति मकवानपुर गोल्डकप प्रतियोगिताको फाइनल खेल जेठ ३० गते साेमबार हुँदैछ । प्रतियोगिताको उपाधी लागि घरेलु टोली विजय युथ क्लब हेटाैडा र विभागीय टाेली नेपाल आर्मी क्लब भिड्दै छन् ।
यस अघिको तेस्रो संस्करणको मकवानपुर गोल्डकपमा पनि आर्मी र विजय युथ बीच नै फाइनल भिडन्त भएको थियो । फाइनलमा आर्मी विजेता बनेको थियो भने विजय युथ उपविजेता बनेको थियो । हेटौंडा–५ स्थित पिप्ले क्याम्पा रंगशालामा हुने दुई टोली बीचको खेल दिउँसो ३ बजेर ३० मिनेटमा हुनेछ । विजय युथ क्लब समुह ‘ए’ को टोली विजेता बन्दै फाइनल प्रवेश गरेको हो । आर्मी समुह ‘बी’ को टोली विजेता बन्दै फाइनल प्रवेश गरेको छ। विजय युथले नव जनजागृती युवा क्लब सिमरा र नेपाल पुलिस क्लबलाई पराजित गरेको थियो । यस्तै आर्मीले नेपाल एपिएफ र क्यामरुनी टोली एभिनियर एफसीलाई पराजित गर्दै फाइनल प्रवेश गरेको हो ।
प्रतियोगितामा प्रथम हुने टिमले नगद १५ लाख रुपैयाँसहित शिल्ड, मेडल र प्रमाणपत्र प्राप्त गर्नेछ भने उपविजेताले नगद १० लाख रुपैयाँ प्राप्त गर्नेछन् । यस्तै विधागत उत्कृष्ट खेलाडीले नगद २५–२५ हजार रुपैयाँ प्राप्त गर्नेछन् भने सर्बोकृष्ट खेलाडीले रोयल इनफिल्ड बाइक प्राप्त गर्नेछ ।
आइतबार जेठ २९ गते भएकाे प्री म्याच कन्फ्रेन्समा प्रतियोगिताको उपाधी हात पार्ने योजनासहित आफ्नो टिम मैदान उत्रने नेपाल आर्मीका प्रशिक्षक नवीन न्यौपानेले दाबी गरेका छन् । ‘घरेलु टोलीसँग खेल्न पाउँदा धेरै खुशी लागेको छ’ न्याैपानेले भने ‘घरेलु टोलीको दर्शकको मन जितेर उपाधी हात पार्छाै ।’ उनले फाइनल खेलमा आफ्नो टिममा नयाँ खेलाडी थप नहुने जानकारी दिए ।
आर्मीका कप्तान भरत खवासले फाइनलसम्म पुग्दा खुशी लागेको र फाइनल खेलका लागि पुरा तयारी रहेको बताए । घरेलु टोलीसँग खेल्दा केही असहज हुने र घरेलु टोलीलाई नै सर्मथन, हौसला मिल्ने उनको भनाई छ । कप्तान खवासले घरेलु दर्शकलाई मैदान आएर मनपर्ने टिमलाई हौसला प्रदान गरेर माया गरिदिन आग्रह समेत गरेका छन् ।
यस्तै विजय युथ क्लबका कप्तान अशोक बरालले उपाधी जित्ने गरी खेल्ने बताए । आफुहरु भन्दा सिनियर टिमले भरिएको आर्मीसँग खेल्न भने केही असहज हुने उनले बताए । राम्रै मिहेनत गरेर फाइनल पुगेको र फाइनलसम्म पुग्नु पनि ठुलो उपलब्धी हाे तर पनि फाइनल खेल जित्ने लक्ष्यका साथ मैदानमा उत्रन्छाैं बराल भने ।
चौथौं मकवानपुर गोल्डकपको संयोजक प्रताब विष्टको सभाध्यक्षतामा भएको प्री म्याच कन्प्रेन्समा जिल्ला खेलकुद विकास समितिका कार्यालय प्रमुख राजन दाहाल लगायत जिल्ला फुटबल संघका पदाधिकारीहरुको आतिथ्यता रहेको थियो ।
मकवानपुर । मकवानपुर प्रहरीले लागुऔषध नाईट्रोभेट र गाँजासहित ३ जनालाई पक्राउ गरेको छ । लागुऔषध नाईट्रोभेटसहित २ र गाँजासहित १ जनालाई मकवानपुरको दुई छुट्टाछुट्टै स्थानबाट पक्राउ गरिएको जिल्ला प्रहरी कार्यालयले जनाएको छ ।
लागुऔषध नाईट्राभेटसहित पक्राउ पर्नेमा देवघाट गाउँपालिका ४ बस्ने २१ वर्षका सरोज भुजेल र धुलिखेल नगरपालिका ९ बस्ने २३ बर्षिय जग बहादुर तामाङ रहेका छन् । यसैगरी लागु औषध गाँजासहित पक्राउ पर्नेमा राक्सिराङ गाँउपालिका १ स्थायी ठेगाना भई बकैया गाउँपालिका ५ कर्मचुली बस्ने फुलमाया भुलुन रहेको जिल्ला प्रहरी कार्यालय मकवानपुरका प्रवक्ता प्रहरी निरीक्षक रामचन्द्र घिमिरेले जानकारी दिए ।
जेठ २८ गते ईलाका प्रहरी कार्यालय भिमफेदी मकवानपुरबाट खटिएको प्रहरी टोलीले भिमफेदी गाउँपालिका ६ स्थित सडकमा बिरगंजबाट काठमाडौं जाँदै गरेको ना १ ज ३५५३ नं. को यात्रुबाहक सुमो चेकजाँच गर्दा सुमोमा सवार भुजेल र तामाङको साथबाट लागु औषध नाईट्राभेट ५ सय ३८ ट्याबलेट फेला परेको थियो । भुजेल र तामाङलाई उक्त लागु औषध सहित नियन्त्रणमा लिई थप अनुसन्धान भईरहेको घिमिरेले बताए ।
यसैगरी जेठ २८ गते विशेष सूचनाको आधारमा प्रहरी चौकी हात्तीसुडे मकवानपुरबाट खटिएको प्रहरी टोलीले भुलुनको घरमा चेकजाँच गर्दा घर भित्र लुकाई छिपाई राखेको अबस्थामा लागु औषध गाँजा १ किलो ४ सय ग्राम फेला परेको प्रहरीले जानकारी दिएको छ । भुलुनलाई उक्त लागु औषध सहित नियन्त्रणमा लिई थप अनुसन्धान भईरहेको प्रवक्ता घिमिरेले जानकारी दिए ।
मकवानपुर । वर्षौदेखि सुकुम्बासीको रुपमा मकवानपुरको मनहरी गाउँपालिका–४ ट्वाङ्ग्रामा बसोबास गर्दै आएका लोपोन्मुख वनकरीयाहरु मन्त्रीकाे आश्वासन पाएर ढुक्कले गृह जिल्ला फर्केका छन् । जग्गाको माग गर्दै मन्त्री गुहार्न सिंहदरबार पुगेका उनीहरु मन्त्री शशी श्रेष्ठकाे आश्वासनपछि ढुक्क भएकाे सन्तमाया वनकरीयाले बताइन् ।
सरकारले भूमीहिनलाई जग्गा वितरण गरिरहदा आफूहरुले पनि जग्गा पाउनु पर्ने माग गर्दै वनकरीया समूदायका प्रतिनिधि वडा अध्यक्षको साथ लागेर भूमि व्यवस्था, सहकारी तथा गरिवी निवारण मन्त्रालय काठमाडौं सिंहदरबार पुगेका हुन् । उनीहरुले मन्त्री शशी श्रेष्ठलाई भेटेर आफूहरुको गुनासो सुनाएका छन् । “धेरै कुरा हाम्रै वडाबाट हुने रहेछ, तै पनि हामीले मन्त्री भेटेर फर्कियौं, उहाँले हाम्रो कुरा राम्ररी सुन्नु भयो” समुदायकी अगुवा सन्तमाया वनकरीयाले भनिन् ।
यस वडामा रहेका वनकरीयालाई सामुहिक पूर्जा उपलब्ध गराउनु पर्ने मागमा आफूले समन्वय गरेको मकवानपुर मनहरी गाउँपालिका वडा ४ का अध्यक्ष प्रकाश थापाले बताए । सामुहिक जग्गाधनी पूर्जा भनेको विक्री वितरण गर्न नपाइने तर आफ्नो स्वामित्वमा रहने गरी जग्गा प्रदान गर्नु हो । यसै अनुसार जग्गा उपलब्ध गराउन वडा कार्यालयले पनि माग गरेको अध्यक्ष थापाले बताए ।

पर्सा वन्यजन्तु आरक्षको संरक्षित क्षेत्र भएको आरक्ष पीडित रहेको उनीहरुले आफ्नो स्थायी बसोबासको लागि वर्षौदेखि जग्गा माग गर्दै आएका छन् । आरक्ष २०४२ सालमा स्थापना भएको र आपूmहरु त्यस अघिबाटै यहाँ बसोबास गर्दै आएकोले वनकरीलाई उचित व्यवस्थापन गर्नुपर्ने उनीहरुको माग छ । वनकरीयाहरु यस स्थानमा २०१८ सालदेखि बस्दै आएको वडा अध्यक्ष थापाले बताए । “वनकरीयाहरु यहाँको आदिवासी हुन, २०६२ सालबाट यहाँको कबुलियती वनमा नेपाल सरकारले नै बस्न दिएको र यही बसोबास गरेकै स्थानमा सामुहिक लालपूर्जा माग्न गएका हौं” थापाले भने ।
७ जना वनकरीलाई साथ लिएर मन्त्रालय पुगेका वडाध्यक्ष थापाले मन्त्री शशी श्रेष्ठसँग भेटेर पर्सा वन्यजन्तु आरक्षको समस्या समेत बिसाएका छन् । वनकरिया समूदायलाई नियमसंगत लालपुर्जा वितरण गर्न थापाले मन्त्री श्रेष्ठ समक्ष माग राखेका थिए । भेटमा मन्त्री श्रेष्ठले स्थानीय सरकारलाई नै लालपुर्जा वितरण गर्ने अधिकार प्राप्त भइसकेकोले त्यहीँ पहल गर्न सुझाव दिएकी थिइन् ।
तर, राष्ट्रिय निकुञ्जको बफर जोनमा बस्दै आएका वनकरिया समूदायलाई निकुञ्जले समस्या पारेको जानकारी दिँदै थापाले मन्त्री स्तरबाटै यसको समाधान गराउन आग्रह गरे । मन्त्री श्रेष्ठले स्थानीय स्तरबाट लालपुर्जा उपलब्ध गराउन समस्या भए मन्त्री स्तरबाटै समस्याको गाँठो फुकाउने प्रतिबद्धता व्यक्त गरेको अध्यक्ष थापाले बताए ।
मन्त्रीको आश्वासनले विश्वस्त थापासहितको टोली केही समयभित्रै वनकरिया समुदायले सामुहिक लालपुर्जा पाउनेमा ढुक्क भएर फर्किएका छन् । अध्यक्ष थापाले कार्यकाल सुरु भएको केही दिनमै लालपुर्जाको पहल गरेको भन्दै वनकरीया समुदायकी अगुवा सन्तमायाले खुसी व्यक्त गरिन् । चुनावी अभियानको क्रममा आफुले लालपुर्जाको लागि पहल गर्ने वचन दिएको र कुनै पनि हालतमा वनकरिया समुदायलाई लालपुर्जा उपलब्ध गराउन आफु निरन्तर लाग्ने थापाले बताए । उनीहरु २७ जेठमा मन्त्री भेटेर फर्किएका छन् ।
यसक्षेत्रमा १९ घर वनकरीयाको बसोबास रहदै आएको छ । आर्थिक रुपमा विपन्न उनीहरु पर्सा वन्यजन्तु आरक्ष भित्र निहुरो खोजेर बेच्ने तथा ज्याला मजदुरी गरेर गुजारा चलाउँदै आएका छन् । सरकारले उपलब्ध गराउने सामाजिक सुरक्षा भत्ताले जीविका चलाउन केही सहयोग भए पनि यो समूदायमा स्वास्थ्य, शिक्षालागयत आधारभूत आवश्यकता पुरिपुर्ति हुन नसकेको सन्तोषी वनकरीयाले बताइन् ।
