मकवानपुर । बागमती प्रदेश सभाकाे बैठक प्रतिपक्ष दलले अवरोध गरेका छन् । बागमती प्रदेशसभाकाे आजकाे बैठकमा आर्थिक वर्ष २०८१/०८२ बजेट माथिको छलफल सुरु गरिएको थियाे ।
बजेट पुनः लेखनलगायतकाे माग गर्दै प्रतिपक्ष दल नेपाली काङ्ग्रेस तथा राप्रपाले वैठक अवरोध गरेपछि बैठक स्थगित गरिएकाे छ । प्रदेश सरकारको आगामी आर्थिक वर्षको बजेट सन्तुलित नभएको सिद्धान्त र प्राथमिकतामा दिएको सुझावहरुलाई समावेश नगरिएको, प्रदेशको आर्थिक बृद्दिदर न्यून भएको, अर्थ मन्त्रालयको अर्थ विविध खर्चलाई चालु खर्चमा राखिएको, प्रदेशको एकल अधिकारको रुपमा रहेको प्रदेश अस्पतालमा बजेटको ब्यबस्था नगरिएको, हिसाब किताबको सिलिङ नमिलेको र आय व्ययको विवरण नै नमिलेको भन्दै बिहीबार कांग्रेस र राप्रपाका सांसदहरूले विरोध गरेका हुन् ।
यसैगरी बैठकमा प्रतिपक्ष दलका सांसदहरूले बजेट सिस्टमलाई नै उलङ्घन गरेर बजेट कार्यक्रम परक पर्ने गरी पुस्तिका ल्याएको भन्दै विरोध गरेका थिए । उनीहरूले संसद् बैठकमा नाराबाजी समेत गरेका छन् । सांसदहरूले ‘बजेट पुनःलेखन गर, बजेट सन्तुलित बजेट गर, बजेटलाई समावेशी गर, बजेटमा आर्थिक अराजकता गर्न पाइँदैन’ जस्ता नारा लगाएका थिए । आजकाे लागि बाेलाइएकाे प्रदेशसभा बैठक निर्धारित समयभन्दा २ घण्टा ढिला गरी सुरु भएको थियाे ।
प्रदेश सरकारको आगामी आर्थिक वर्षको बजेट माथि छलफलका लागि बिहान ११ बजे आह्वान गरिएको बैठक १ बजे सुरु भएको थियाे । प्रतिपक्ष दलका सांसदहरूको विरोध पश्चात् सभामुख भुवनकुमार पाठकले दिउँसो ३ बजेसम्मका लागि बैठक स्थगित गरेका छन् ।
मकवानपुर । बागमती प्रदेश सभाको बैठक आज बिहीबार बिहानकाे लागि बाेलाइएकाे छ । बैठक बिहीबार बिहान ११ बजे बस्ने प्रदेश सभा सचिवालयले जनाएको छ ।
बैठकमा प्रदेश सरकारको आगामी आर्थिक वर्ष २०८१।०८२ को विनियोजित बजेटमाथि छलफल प्रारम्भ हुने भएको प्रदेश सभा सचिवालयका प्रमुख सचिव कृष्णहरि खड्काले जानकारी दिए । बैठकमा प्रदेशको आर्थिक तथा मामिला तथा योजना मन्त्री जगन्नाथ थपलियाले गत असार १ गते प्रस्तुत गरेको बजेट वक्तव्य र विभिन्न मन्त्रालयको बजेट शिर्षकमा छलफल प्रारम्भ हुने उनले जानकारी दिए ।
सरकारको विनियोजित बजेटमाथि असार ८ गते भित्रै छलफल सम्पन्न गरि पारित गर्ने कार्यसूची रहेको प्रदेश सभा सचिवालयले जनाएकाे छ । प्रदेश सरकारका आर्थिक मामिला मन्त्री थपलियाले आर्थिक वर्ष २०८१/०८२ का लागि ६४ अर्ब ५४ करोडकाे बजेट प्रदेश सभमा असार १ गते प्रस्तुत गरेका थिए ।
कुल बजेटमध्ये चालूतर्फ २६ अर्ब १० करोड १६ लाख रुपैयाँ, पुँजीगत तर्फ ३६ अर्ब ९३ करोड ८७ लाख रुपैयाँ र वित्तीय व्यवस्थापनतर्फ १ अर्ब ५० करोड रुपैयाँ विनियोजन गरिएकाे छ । चालु आर्थिक वर्षकाे लागि ६२ अर्ब ७० करोड रुपैयाँको बजेट ल्याएकाे प्रदेश सरकारले आगामी आवकाे लागि मन्त्रीले चाल् आवकाे भन्दा १ अर्ब ८४ करोड रुपैयाँ बढीको बजेट प्रस्तुत गरेका थिए ।
मकवानपुर । मकवानपुरकाे हेटौडामा प्रदेश युवा नमूना संसद अभ्यास कार्यक्रम सुरु भएकाे छ । बागमती प्रदेश युवा परिषद्को आयोजनामा ४ दिने प्रदेश युवा नमुना संसद अभ्यास कार्यक्रम सुरु भएको छ ।
कार्यक्रमकाे उद्घाटन् गर्दै बागमती प्रदेशका आर्थिक मामिला तथा योजना मन्त्री जगन्नाथ थपलियाले सिक्न र सिकाउन मानिसलाई उमेरले नछेक्ने बताए । उनले ज्ञान र विज्ञानले संसारलाई चुनौति दिइरहेकाे छ भन्दै सिक्न र सिकाउन उमेर कहिल्यै नजाने बताए । ‘मानिस जन्मनु मर्नु स्वभाविक हो । तर सफल नागरिकको रुपमा स्थापित हुन महत्वपुर्ण हुन्छ।’ युवा नमुना संसद अभ्यास तालिमबाट युवाहरुले वढि भन्दा बढि ज्ञान प्राप्त गर्नुपर्ने र जिवनमा लागू गर्नुपर्ने उनले बताए । प्रदेश सरकारको प्रारम्भ हुँदादेखि नै ग्रामीण युवाहरुलाई समेटेर अघि बढेर जाने कार्ययोजना तयार पारेको र सोहि अनुरुप नै काम भइरहेको पनि उनले जानकारी दिए ।
कार्यक्रम प्रदेश युवा परिषदका कार्यकारी उपाध्यक्ष सन्तोष चौलागाइले युवालाइ सशक्तीकरण गर्ने, नेतृत्व गर्न सक्ने क्षमता विकास गर्ने, नेतृत्व भुमिकामा पुग्नुपर्छ भन्ने मान्यताका आधारमा कार्यक्रम तय गरेको जानकारी दिए । ‘युवाहरुले नेतृत्व गर्न सक्छन भन्ने विश्वासका साथ युवा नेतृत्वको परिकल्पना सहित कार्यक्रमको आयोजना गरिएकाे हाे’ चौलागाईले भने ‘यस्का लागि युवामा निरन्तर पैरवी,अनुशसन,धैर्यता र निरन्तरता आवश्यक छ ।’
उनले यो मुलुकमा केही छैन, मुलुकमा केही गर्ने वातावरण नै छैन, यहाँ बसेर केही काम छैन भन्ने भाष्यलाई परिवर्तन गरि यहि मुलुकमा केही छ र हामीलै नै गर्ने हो भन्ने भाव जागृत गर्ने बताए । ‘युवा लक्षित कार्यक्रमहरु के छन सो खोज्नुस,आवाज उठाउनुस,यहि बर्ष भित्र प्रदेश युवा परिषदको १० हजार युवाहरुलाइ सीप सिकाउने योजना रहेको छ उनले भने ।
मकवानपुर । नेकपा एमाले मकवानपुरका अध्यक्ष श्रीधर पोखरेलले राजनीतीमा लागेर समाजमा सकारात्मक परिवर्तन गर्नेहरुका योगदानलाई समाजले सदैब सम्झीरहने बताएका छन् ।
मीनबहादुर थपलिया स्मृती प्रतिष्ठानको १९ औँ स्मृति सभालाई सम्बोधन गर्दै अध्यक्ष पोखरेलले समाजको विकास र समृद्धिका लागि योगदान गर्नेहरु नै समाजमा अमर रहने बताएका हुन् । चुरियामाई गाविसका पुर्व उपाध्यक्ष मिन बहादुर थपलियाको स्मृतिमा गठन गरिएको मीनबहादुर थपलिया स्मृती प्रतिष्ठानले सामाजिक क्षेत्रमा योगदान पुर्याएका ८० बर्ष उमेर माथिका ५ जना बृद्धलाई सम्मान गरेको छ ।
१४ नम्बर वडाको विकासमा योगदान पुर्याएका ऋषिराम घिसीङ, डोलानाथ दुवाडी, प्रेम मोक्तान, देवन्द्रराज उपाध्याय र मान बहादुर लामालाई सम्मान गरिएको हो । कार्यक्रममा एमाले मकवानपुरका अध्यक्ष श्रीधर पोखरेल, १४ नम्बर वडाका अध्यक्ष दिपक खड्का हेटौँडा सिमेन्ट उद्योगका अध्यक्ष नरेन्द्र भण्डारीलगायत १४ नम्बर वडाका राजनीतिक दलका प्रतिनिधी र संघसंस्थाका प्रतिनिधीहरुको सहभागिता थियो ।
पूर्व गाविस उपाध्यक्ष थपलियालाई १९ वर्ष अघि शसस्त्र युद्धका बेला उनको घरमै गोलीहानी हत्या गरिएको प्रतिष्ठानका अध्यक्ष बालकृष्ण अधिकारीले बताए । उनको हत्याको जिम्मेवारी राज्य वा विद्रोही पक्ष कसैले लिएको छैन । थपलियालाई राज्यले सहीद घोषणा गरेको छ ।
मकवानपुर । मकवानपुरको मनहरी गाउँपालिकाले गाँजा खेती प्रवर्ध्दन गर्ने भएको छ । कृषकलाई संघीय कानून बमोजिम औषधीजन्य प्रयोजनकोलागि गाँजा खेती प्रवर्ध्दनमा सहयोग गरिने नीति गाउँपालिकाले लिएको हो ।
मनहरी गाउँपालिकाले आगामी आर्थिक वर्ष २०८१/२०८२ को लागि नीति तथा कार्यक्रम प्रस्तुत गरेको छ । जसमा गाँजा प्रवर्ध्दन गरिने नीति समेत लिएको हो । मकवानपुरको मनहरी, राक्सिराङ्, कैलाश, इन्द्रसरोवर लगायतको गाउँलिपालिकामा किसानहरुले व्यावसायीक गाँजा खेतीगर्ने गरेका छन् । कानूनी बैधता प्राप्त नभएकोले प्रहरी प्रशासनले हरेक वर्ष गाँजा खेती नष्ट गर्न लाखौ खर्च गर्दै आएको छ ।
गाउँपालिकाले कृषि उत्पादन वृद्धिमा प्रोत्साहन गर्न उत्पादनमा अनुदान दिने भएको छ । उत्पादनमा आधारित प्रोत्साहन कार्यक्रम अन्तर्गत गाउँपालिका भित्रका किसानद्वारा उत्पादित आलु, प्याजलगायत तरकारी तथा अन्नवालिमा समेत संभाव्यता अध्यन गरि मूल्य अनुदान प्रदान गरिने नीति लिएको गाउँपालिका अध्यक्ष रञ्जन कालाखेतीले बताए ।
उत्पादन पछि हुने क्षति न्यूनीकरणको लागि गाउँपालिकाले कोल्ड स्टोरेजको व्यवस्था गर्न आवश्यक समन्वय गरी विशेष अनुदान दिइनेछ। खेतीयोग्य बाँझो जमिनको यथार्थ तथ्याङक संकलन गरी बाँझो जग्गा उपयोगमा ल्याउन प्रोत्साहन गरिने नीति लिएको छ ।
कृषि सेवा केन्द्रमा माटो परिक्षण प्रयोगशाला स्थापना गरी निःशुल्क माटो परिक्षण सेवा प्रदान गरिने, परिक्षणको आधारमा चुन तथा सुक्ष्म तत्वहरु ५० प्रतिशत अनुदानमा वितरण गरिनेछ। सम्भाव्यताका आधारमा तुलनात्मक लाभ भएका वस्तुहरुको पहिचान गरी पकेट क्षेत्र, सामुहिक खेति, करार खेति तथा चक्लाबन्दी खेतिलाई प्रोत्साहन गरिने नीति पालिकाले लिएको अध्यक्ष कालाखेतिले बताए ।
कृषि बिमा कार्यक्रमलाई प्रभावकारी र पहुँचयोग्य बनाई बिमा प्रिमियममा लाग्ने शुल्क पालिकाको आर्थिक क्षमता विश्लेषण गरि विपन्न कृषकको लागि पूर्ण निशुल्क सहित सबै कृषकको तोकिएको प्रतिशत गाउँपालिकाले व्यहोर्ने व्यवस्था गर्ने भएको छ । कृषि बालि विमा तथा पशु विमा योजना कार्यान्वयन गर्न विमा कर्मचारीको व्यबस्था मिलाईने भएको छ। पशुपालनलाई प्रबद्र्धन गर्ने गरी साविकमा सञ्चालनमा रहेको गाई भैंसीको कृत्रिम गर्भाधान कार्यलाई निशुल्कः रुपमा निरन्तरता दिइने, दुग्ध उत्पादनमा प्रोत्साहन गर्न दुग्ध संकलन केन्द्र डेरीमा दुग्ध बिक्री गर्ने किसानलाई प्रति लिटरका दरले उपलब्ध गराउदै आएको नगद प्रोत्साहन कार्यक्रमलाई प्रदेश सरकारसंग समन्वय गरि निरन्तरता दिईने भएको छ ।
गाउँपालिका क्षेत्र भित्रका कम्तिमा एक हजार लैना पशुहरुको बीमा गर्न आवश्यक बीमा प्रिमियम रकममा ५० प्रतिशत अनुदान दिने भएको छ। यसैगरी पशुपालनलाई प्रोत्साहन गर्न पोषणयुक्त घाँसेवालिको विकास गर्नुपर्ने हुँदा सो को लागि संघीय सरकारसँगको सहकार्यमा हरियो घाँस विस्तार कार्याक्रम सञ्चालन गरिने, उन्नत बाखा पकेट क्षेत्र कार्यक्रम लागु गरिने, प्रदेश सरकारसँगको साझेदारीमा बाखा प्रवर्ध्दन कार्यक्रम सञ्चालन गरिनेछ ।
कृषि एवं पशुपन्छीजन्य व्यवसायमा युवा जनशक्तिलाई आकर्षित गरी स्टार्टअप नवप्रवद्र्धन कार्यक्रमका लागि बिशेष व्यबस्था गरिने कालाखेतिले बताए । दुग्ध जन्य पदार्थको उत्पादनलाई प्रवर्ध्दन गर्न प्रदेश सरकारसंगको सहकार्यमा उन्नत जातको भैंसी पालन गर्ने कार्यक्रममा सहयोग गरिने उनले बताए ।
एक वर्षको यस्ता उपलब्धी
मनहरी गाउँपालिकाले चालु आर्थिक वर्षमो ११ महिनामा ११ हजार ८५५ मिटर स्लाब बाटो निर्माण गरेको छ । यसैगरी ६ हजार ९७२ मिटर ग्राभेल बाटो निर्माण गरेको छ, भने २४ हजार मिटर नयाँ ट्रयाक निर्माण गरेको छ । गाउँपालिकाले रिटेनिंग वाल ४ हजार ३२१ मिटर, पक्कि नाला २ हजार ८४३ मिटर, ग्याविन ड्याम २४८६ मिटर निर्माण गरेको छ ।
यसैगरी २ हजार ४८६ मिटर खानेपानी पाइपलाईन विस्तार, ८५ वटा ट्युबेल धारा निर्माण गरेको छ । कालोपत्रे सडक निर्माण २ हजार १५७ मिटर गरेको छ भने ३२ वटा सार्वजानिक भवन निर्माण तथा मर्मत सम्भार गरेको छ । ८ कलभर्ट तथा पुल निर्माण १७ वटा कम्पाउड तारजालि, काडेतार ३ हजार ४०१ मिटर निर्माण गरेको छ ।
६ वटा सामुदायीक स्वास्थ्य ईकाइ भवन निर्माण सम्पन्न गरेको छ मनहरी अस्पताल भवन निर्माण कार्य २१ प्रतिशत कार्य प्रगती भएको पालिका सूचना अधिकारी विकल्प चौलागाईले बताए ।