मकवानपुर । हेटौंडा उपमहानगरपालिकाको चालु आर्थिक वर्षको बजेटको आकार बढेको छ । शनिबार भएकाे १४औं नगरसभामा उपमहानगरपालिकाकाे आर्थिक वर्ष २०८०/०८१ को बजेट आकारमा २२ करोड २ लाख ५५ हजार रुपैयाँ बढाएर नगर उपप्रमुख राजेश बानियाँले प्रस्तुत गरेका हुन् ।
गत असार २ गतेकाे १३ औं नगरसभाकाे अधिवेशनमा उपमहानगरपालिकाले प्रस्तुत गरेको आर्थिक वर्ष २०८०/०८१ काे बजेट संशोधन गर्दै आकार बढाइएको हो । उपमहानगरपालिकाले १३ औं नगरसभामा २ अर्ब ६८ करोड ६० लाख १० हजार रुपैयाँको बजेट प्रस्तुत गरिएकाे थियाे । गत असार १६ गते पारित उक्त बजेटमा संशोधन गरी २ अर्ब ९० करोड ६२ लाख ६५ हजार रुपैयाँकाे सिमामा पुर्याइएकाे हाे ।
आन्तरिक राजश्व संकलनमा देखिएको प्रगतिको आधारमा चालु आर्थिक बर्षको संसोधित बजेटमा २२ करोड २ लाख ८० हजार बजेट थप भएकाे हाे । चालु आर्थिक बर्षको ६ महिनाको राजश्व संकलनमा लक्ष्य अनुसारको आधा पुरा भैसकेको बजेट प्रस्तुतिका क्रममा उपप्रमुख बानियाँले बताए । चालु आर्थिक वर्षको लागि कुल ३० करोड ९४ लाख राजस्व लक्ष्य राखेकोमा पौष १५ गतेसम्म १५ करोड ४५ लाख रुपियाँ रकम संकलन भएको प्रतिवेदनमा उल्लेख छ । अहिलेसम्म ५० प्रतिशत राजश्व संकलन भएको र गत आर्थिक वर्षको यसै अवधिको तुलनामा चालू आर्थिक वर्ष ८ प्रतिशतले राजस्व संकलन वृद्धि भएको हाे ।
आय व्यय अनुमानमा सशर्त बजेट,अघिल्लो वर्षको मौज्दात र रकमान्तर समेत थप भई २ अर्ब ७५ करोड ७६ लाख ६५ हजार रुपैयाँ वास्तविक आय कायम भएको हेटौँडा उपमहानगरपालिकाका उपमेयर राजेश बानियाँले जानकारी दिए । गत वर्ष सम्झौता भई ३१ करोड रुपैयाँ भन्दा बढी जिम्मेवारी सरेका आयोजनाहरूको रकम भुक्तानीका लागि चालु आर्थिक वर्षको बजेटमा १० करोड ७० लाख रुपैयाँ बजेट विनियोजन भएकोमा अधिकांशको भुक्तानीका लागि रकम अभावका कारण भुक्तानी रोकिएकोले समेत बजेट आकार बढाइएकाे बानियाँले प्रस्तुत गरेको संशोधित बजेटमा उल्लेख छ।
प्रस्तुत संशाेधित अनुमानमा पूर्वाधार क्षेत्र तर्फ नगरस्तरीय ६२ आयोजना र वडास्तरीय ९ सय ५६ आयोजना गरी जम्मा १ हजार १ सय १८ योजना रहेकोमा हालसम्म नगरस्तरीय १५ वटा आयोजना र वडा स्तरीय २ सय १७ वटा योजना सम्झौता भैसकेको उल्लेख छ । सम्झौता भएका योजना मध्ये ३२ वटा सम्पन्न भएको र अन्य ९ सय ८६ वटा आयोजना कार्यान्वयनको चरणमा रहेको बताइएको छ ।
गत आर्थिक वर्षको जिम्मेवारी सरी आएका योजनाहरु मध्ये १ सय १० वटा योजनाहरु सम्पन्न भई सकेका छन् भने ६१ वटा सम्पन्न हुने क्रममा रहेका उल्लेख छ । पूर्वाधार विकास कार्यक्रमको भौतिक प्रगति तर्फ प्रथम चौमासिकमा कंक्रिट सडक २ किलोमिटर, कालोपत्रे ३५५ मीटर, शैक्षिक पूर्वाधार तर्फ १ वटा, सांस्कृतिक जगेर्ना तर्फ गुम्बा निर्माण तर्फ २ वटा, मन्दिर निर्माण तर्फ ५ वटा, मदरसा १ वटा र यात्रु प्रतिक्षालय १ वटा निर्माण भैसकेको उल्लेख छ ।
नगर प्रमुख मीनाकुमारी लामाको अध्यक्षतामा भएको १४ औं नगरसभाले स्थानीय समुदायको आर्थिक अवस्था सुधार ल्याउन लघु उद्यमिले उत्पादन गरेका गुन्द्रुक, मस्यौरा लगाएका खाद्य पदार्थलाई ब्राण्डिंग गरी बजारीकरण गर्ने र स्थानिय स्तरमा उत्पादन हुने मौलिक तथा रैथाने कृषि उपजलाई प्रवद्र्धन गर्न होटल एशोसिएशनसँग समन्वय गरी नगरका सबै होटलका खाना सुचिमा समावेश गराउने प्रस्ताब पास गरेको छ ।
सभाले उपमहानगरमा आयआर्जन र समृद्धि कार्याक्रम सञ्चालन गरी बेरोजगार रहेका युवाहरुलाई सिपमार्फत प्रत्यक्ष रोजगारीमा जोड्ने कार्यक्रम सञ्चालन गर्न अध्ययन गर्ने प्रस्ताब पास गरेको छ । उपमहानगरक्षेत्रमा प्रर्यटकको आगमन बढाउँनका लागि बाह्य जिल्ला र भारतको पटना लगाएत बिहारका अन्य शहरसँग सस्थागत रुपमा प्रर्यटन प्रवद्धनका लागि आवश्यक सम्वाद र छलफल अघि बढाउने प्रस्तिाब सर्वसम्मत स्विकृत गरको छ । सभाले संसोधित नीति, कार्यक्रम तथा बजेट एवम् बिभिन्न ऐनहरु सर्वसम्मत पारित गरेको छ ।
पहिलाे पटक नगरसभा बजार क्षेत्र बाहिर
हेटौडा उपमहानगरपालिकाकाे १४ औं नगरसभा हेटौडा १८ स्थित गुम्बा डाँडामा गरिएकाे छ । पहिलाे पटक उपमहानगरपालिकाकाे नगरसभा बजार क्षेत्र बाहिर गरिएकाे हाे ।

मकवानपुर । बागमती प्रदेशका मुख्यमन्त्री शालिकराम जम्कट्टेलले प्रदेश सरकारले कृषि क्षेत्रमा काम र उत्पादनमुलक सीप मात्र दिन सक्ने बताएका छन् । मकवानपुर उद्योग वाणिज्य संघको ५७ औ बार्षिक साधारण सभालाई सम्बाेधन गर्दै जम्कट्टेलले प्रदेश सरकारको अधिकारको क्षेत्र सानाे भएकाेले उद्योग वाणिज्यकाे क्षेत्रमा धेरै काम गर्न सक्ने बताएका हुन् ।
अहिले सबैतिर निराशै निराशा र असन्तुष्टि बाहेक केही छैन भनिरहेका छौ तर प्रधानमन्त्रीको सोचअनुसार नै नेपालमा विकास सम्भव रहेकाे उनले बताए । ‘सरकारले ल्याउने मौद्रिक नीतिमा व्यवसायीक व्यक्तिहरुले सहयाेग गर्दा उद्योग वाणिज्यकाे क्षेत्रमा पर्याप्त वातावरण बन्छ’ उनले भने ’ठुला औद्योगिक क्षेत्रको दायरा प्रदेश सरकारसँग नभएकाेले हस्तकला र घरेलु उद्योगलाई अगाडि बढाउन सक्छौ ।’ प्रदेशमा उद्योगग्राम,कोशेली घर निर्माणको चरणमा रहेकाे उनले बताए ।
‘संसारका धेरै मुलुकहरुले नीति बनाउनु र लगानी गर्नु अघि आन्तरिक र वाह्य उत्पादन र निर्यातको आंकलन गरेरमा मात्र उद्योग सुरु गर्छन्’ मुख्यमन्त्री जम्कट्टेलले भने ‘नेपालमा त्यस्तो अवस्था छैन, चामल मिल चाहिँ खोल्ने तर धान अन्तवाट ल्याउने भने जस्तै परिपाटी छ ।’ हचुवाको भरमा उद्योगहरु खुलेको कारण व्यवसाय धरासायी भयको उनले बताए । ‘नेपाल कृषि प्रधान मुलुक भएपनि वैदेशिक भेटवार्ता भने राजनैतिक र व्यवसायीक भएको छ’ उनले भने । उद्यमशीलता भनेको स्थानीय उत्पादनको उपज गर्नु हो तर नेपालमा निर्यातमुखि व्यवसाय तथा उधोग मात्र रहेको उनले बताए ।
‘प्रदेशकाे ८५ वटा पालिकालाई उत्पादनको पकेट क्षेत्र तोकिने योजना छ’ उनले भने ‘प्रदेशलाई खाधान्नमा आत्मनिर्भर बनाउने लक्ष्य रहेको छ ।’, व्यवसायीक ढंगले हेर्ने हो भने बिचौलिया पनि खराब नभएकाेले उद्योग वाणिज्य संघ र प्रदेश सरकार उत्पादनको सवालमा सम्झौता गरेर अघि वढ्नुपर्ने उनले बताए । एउटा घर बनाउनु पर्यो भने मधेश प्रदेशबाट ढुङ्गा गिट्टि बालुवा ल्याउनुपर्ने अवस्थाकाे सृर्जना हुन नदिन ढुङ्गा गिटि वालुवा निकाल्न पाउनु पर्ने उनकाे भनाइ छ । सडकमा लगानी बढेको भएपनि सडक निर्माण सम्पन्न हुन नसकेकाे बताउदै उनले भने ‘केही ठुलो कार्यक्रम गर्नुपर्यो भने राम्रो होटलकाे व्यवस्था समेत छैन ।’ कृषकलाई उद्योग वाणिज्य संघले समेट्न नसकेकाे मात्रै नभई आफ्नो सदस्यको रुपमा मान्दैन कृषकलाई उनले भने ।
हेटौडाकाे सडक विस्तारकाे सवालमा उनले आफ्नाे क्षेत्राधिकार नभएपनि व्यक्तिगत रुपमा सडक विस्तार गर्नु पर्ने बताए । सधै सडकको नाममा राजनीति भएकाे पाएकाे छु, विस्तार गर्ने वा विकल्प खोज्ने हो भने उद्योग वाणिज्य संघले निर्णय गरी सरकारमा पेश गर्नुपर्ने उनले बताए । ‘विकास पूर्वाधारमा मुख्य साधन सडक भएकाेले निर्णय गरेर जानुहाेस’ उनले भने ‘धर्ना बस्नुस, एउटा निर्णय लिएर आउनुस तर सधैभरि सडकको नाममा राजनिति गर्ने छुट छैन।’
त्यसैगरि राष्ट्रिय सभा सदस्य रामचन्द्र राईले उत्पादन गरेको सागको मुठा शहरमा बस्ने छोराले थोरै लगानी गरेर किन्न सक्ने वातावरण बन्नु पर्ने बताए । ‘उत्पादकले १० रुपैमा विक्रि गर्ने तरकारी उपभोक्ता सम्म पुग्दा ४० रुपैया हुन्छ, विचको लगानी कहाँ पुग्छ? उनले प्रश्न गर्दै भने उद्योग वाणिज्य संघले उपभोक्ता र उत्पादकको विचको पुल बनेर काम गर्नुपर्छ ।’ वस्तु र सेवा सरकारी निकायको नियन्त्रणमा आम नागरिकले सुलभ ढंगले प्रयोग गर्न पाउनुपर्छ त्याे वातावरण उद्योग वाणिज्य संघले बनाउन भूमिका खेल्नु पर्ने उनले बताए ।
मकवानपुर उधोग बाणिज्य संघको ५७ औ बार्षिक साधारण सभा संघ अध्यक्ष कृष्ण गुप्ताको अध्यक्षतामा तथा बागमती प्रदेश मुख्यमन्त्री शालिकराम जमकट्टेलको प्रमुख आतिथ्यतामा भएकाे हाे । साधारण सभामा प्रतिनिधि सभा सदस्य दिपक बहादुर सिह, महेश बर्तौला, राष्ट्रिय सभा सदस्य रामचन्द्र राईको बागमती प्रदेश सदस्य एकालाल श्रेष्ठ, लक्ष्मी श्रेष्ठ, उद्योग बाणिज्य महासंघ सदस्य मणिराज घिमिरे, कृष्ण कटुवाल, जिसस प्रमुख ललित घलान, प्रमुख जिल्ला अधिकारी सुर्य सेढाई, रास्वपा सह सम्योजक प्रकाश गौतम, नेपाली काङ्ग्रेस जिल्ला सचिव भिमसेन महत, नेकपा माओवादी जिल्ला सचिव भिम पाख्रिन, प्रहरी उपरीक्षक सिताराम रिजाल स्थानीय तहका प्रमुख, उपप्रमुखलगायतकाे उपस्थिति रहेकाे थियाे ।
मकवानपुर । जनता समाजवादी पार्टी (जसपा) मकवानपुर संस्थापन पक्ष नेपाल कम्युनिष्ट पार्टी (माओवादी केन्द्र) मकवानपुरमा समायोजित भएको छ । शुक्रबार हेटौंडामा नेकपा माओवादी केन्द्रले समायोजन कार्यक्रम आयोजना गर्दै जनता समाजवादी पार्टीको संस्थापन पक्षका एक सय २९ जना नेता तथा कार्यकर्तालाई पार्टीमा समायोजन गरेको हो ।
जनता समाजवादी पार्टी बागमती प्रदेशका पूर्व परिषद अध्यक्ष एवं अनुशासन समिति संयोजक शुभरत्न गोले तामाङको नेतृत्वमा एक सय २९ जना नेता, कार्यकर्तालाई नेकपा माओवादी केन्द्रका नेताहरुले पार्टीमा स्वागत गरेका हुन् । कार्यक्रमकी प्रमुख अतिथी तथा नेकपा माओवादी केन्द्रकी केन्द्रीय सदस्य एवं प्रदेशकी सामाजिक विकास मन्त्री कुमारी मोक्तानले रगतसँग साटेर ल्याएको गणतन्त्र जोगाउन एकजुट हुनुको विकल्प नभएको बताईन् ।
‘गणतन्त्र जोगाउने र संस्थागत गर्ने मुख्य जिम्मेवारी माओवादीको हो,’ उनले भनिन्, ‘गणतन्त्र विरुद्ध आवाज उठ्दा जनताको मन दुःखेको छ, सबै शक्ति एकजुट भएर गणतन्त्र जोगाउनुपर्ने बेला आएको छ ।’ प्रदेशको आवश्यक्ता बागमती प्रदेश सरकारले मुख्य रुपमा पुष्टि गरेको भन्दै उनले तामाङ र नेवारको भाषालाई प्रदेशको भाषाको रुपमा राखेर नयाँ आयाम थपेको दाबी गरिन् । पद भन्दा पनि जिम्मेवारी महत्वपूर्ण रहेको जिकिर गर्दै उनले संघीय लोकतान्त्रिक गणतन्त्रको संस्थागत विकास एकढिक्का भएर गर्नुपर्नेमा जोड दिईन् । विचारको हिसावले सबैभन्दा अग्रगामी विचार र कार्यदिशा भएको पार्टी माओवादी भएकाले देशमै एक नम्बरको जिल्ला कमिटी बनाउनुपर्नेमा जोड दिईन् । हामीले यही देशमा उज्वल भविष्य देख्नुपर्ने भन्दै उनले जिल्लामा एक नम्बरको पार्टी निर्माणमा लाग्न नेता, कार्यकर्तालाई आग्रह गरिन् ।
कार्यक्रमका विशेष अतिथि तथा नेकपा माओवादी केन्द्रका बागमती प्रदेश उपाध्यक्ष एवं बागमती प्रदेश सांसद प्रेम बहादुर पुलामीले समाजवाद हुँदै साम्यवाद ल्याउन सबै राष्ट्रबादी एकजुट हुन मकवानपुरबाट राम्रो सन्देश गएको बताए । परिवर्तनको शुरुवात सानो झिल्कोबाट हुने भन्दै उनले मकवानपुरले देशभर सकारात्मक र एकजुट हुन पहल गरेको दाबी गरे । जनता समाजवादी पार्टी बागमती प्रदेशका पूर्व परिषद अध्यक्ष एवं अनुशासन समिति संयोजक शुभरत्न गोले तामाङले समाजवादको अन्तिम यात्रा तय गर्न माओवादी केन्द्र मात्र विकल्प रहेकाले आफूहरु मातृसंस्था माओवादी केन्द्रमा गोलबन्द भएको बताए । उत्पीडित जाती, वर्गको उत्थानका लागि जसपामा लागेर काम गरेको स्मरण गर्दै विदेशी दलालहरुले नेकपा माओवादी केन्द्रलाई घेराबन्दीमा पारिरहेकाले सिद्धान्त र गन्तव्य एउटै भएकाले समायोजन भएको दाबी गरे ।
नेकपा माओवादी केन्द्र बागमती प्रदेश सचिवालय सदस्य एवं जिल्ला समन्वय समिति मकवानपुरका प्रमुख ललित घलान, पार्टीका बागमती प्रदेश सदस्य प्रेम भुजेलले मन्तव्य व्यक्त गरेको कार्यक्रम नेकपा माओवादी केन्द्र मकवानपुरका संयोजक सर्केश घलानको अध्यक्षतामा सम्पन्न भएको थियो ।
थाहानगरको पर्यटन प्रवर्द्धनका लागि हेटौडामा फोटो प्रदर्शनी (तस्विरसहित)
Tags: No Comments
मकवानपुर । मकवानपुरको थाहा नगर तथा उत्तरी क्षेत्रको पर्यटन प्रवर्द्धन गर्नका लागि शुक्रबारबाट फोटो प्रदर्शनी गरिएृकाे छ । हेटौंडाको बुद्धचोकमा शुक्रबारदेखि सुरु फोटो प्रदर्शनी शनिबारसम्म हुनेछ ।
फाेटो प्रदर्शनीमा ६० वटा फोटो राखिएको हो । शु्क्रबार हेटौंडा उपमहानगरपालिका नगर प्रमुख मिना कुमारी लामाले फोटो प्रदर्शनीको उद्घाटन गरेकी छिन् । उद्द्घाटन गर्दै मेयर लामाले मकवानपुरलाई अन्तर्राष्ट्रिय स्तरमा प्रचारप्रसार गर्ने विषयमा जनप्रतिनिधिहरुबिच छलफल भइरहेको बताईन् ।
थाहानगरका फाेटाेग्राफरहरु गणेश विष्ट, सुरजकुमार भुजेल, विज्ञान विष्ट, रामकुमार कार्की, कृष्ण अधिकारी, रुपेश गाेपाल, श्रीकृष्ण श्रेष्ठ, प्रेम बलामी र शम्भु अधिकारीले खिचेको फोटोहरू प्रदर्शनीमा राखिएका छन् । थाहा नगरको पर्यटकीय क्षेत्र, प्राकृतिक, धार्मिक स्थल, सभ्यता, संस्कृति र जीवनशैली समेटिएका फोटो प्रदर्शनीमा राखिएको छ ।
काठमाडौँबाट नजिक रहेको थाहामा पर्यटनको प्रचुर सम्भावना रहेको उत्तरी मकवानपुरको सम्पदा, सभ्यता र जीवनशैलीलाईसमेटेर फोटाे प्रदर्शनी गरिएकाे फरक सोचका संयोजक यादवजंग रायमाझीले बताए । थाहा नगरसँगै इन्द्रसरोवर गाउँपालिका आसपासका क्षेत्र आन्तरिक एवम् बाह्य पर्यटकको रोजाइमा परिरहेको सन्दर्भमा आयोजना गरिएको फोटो प्रदर्शनीले मकवानपुरकाे उत्तरी क्षेत्रकाे पर्यटन क्षेत्रको विकासमा थप मद्दत पुग्ने आयोजकले बताएकाे छ ।
थाहा नगरपालिकाको आयोजना एवम् हेटौँडा उपमहानगरपालिका, नेपाल पत्रकार महासङ्घ मकवानपुर शाखा र फोटो पत्रकार सङ्घ मकवानपुरको सहयोगमा तथा फरक सोच र शिखर क्लबको व्यवस्थापनमा भइरहेको प्रदर्शनी शनिबारसम्म हुनेछ ।








अंगारेश्वर धार्मिक तथा पर्यटन स्थल दर्ता
Tags: No Comments
मकवानपुर । मकवानपुरकाे हटियमा रहेकाे अंगारेश्वर मन्दिर क्षेत्र समेटिएर अंगारेश्वर धार्मिक तथा पर्यटन स्थल दर्ता गरिएकाे छ । हेटौडा उपमहानगरपालिका वडा नम्बर १७ (साविक हटिया गाविस ३) मा रहेकाे अंगारेश्वर मन्दिर ३ सय वर्ष भन्दा बढी इतिहास भएकाे धार्मिक क्षेत्र भएकाेले संरक्षणकाे लागि दर्ता गरिएकाे हाे ।
विहीबार जिल्ला प्रशासन कार्यालय मकवानपुरमा विधिवत दर्ता भएकाे अंगारेश्वर धार्मिक तथा पर्यटन स्थलकाे अध्यक्षमा कृष्णदेव भण्डारी,
उपाध्यक्ष श्याम बहादुर घर्ती, सचिव सन्दिप थापा, कोषाध्यक्ष सेती कुमारी गोङ्बा, सहसचिव शारदा अधिकारी छन् । यस्तै सदस्यहरू प्रदिप कुमार विष्ट बिना दाहाल, मैया कठायत, थिर बहादुर बजू, नवराज माझी र ओमप्रसाद अधिकारी रहेका छन् ।
संस्थाको उद्देश्य अनुसार सनातन हिन्दू धर्मको महत्त्व भक्तजन तथा अनुयायीहरूलाई बुझाउंदै प्रचारप्रसार र विकासमा लागि पर्ने अध्यक्ष भण्डारीले बताए । धार्मिक अनुष्ठान र नियमित पुजापाठलाई कर्मकाण्डी भन्दा पनि धर्मको मर्मअनुसार अवचेतन मनको प्रयोग गर्दै व्यक्तिको मानसिक र शारीरिक स्वास्थ्य तथा मनको शान्तिको लागि आयोजना गर्नुपर्ने विषयलाई व्यबहारमा उतार्ने र अनुयायीहरूको लागि सचेतना कार्यक्रम अभियानको रूपमा संचालन गर्ने उनले जानकारी दिए ।
३०० वर्षभन्दा पुरानो इतिहास भएको “अंगारेश्वर धार्मिक तथा पर्यटन स्थल” दर्ता गर्न सहयोग पुर्याउने हटिया, हर्नामाडीका सम्पूर्ण भक्तजनहरू, सल्लाहकारहरू, पूर्व अध्यक्षज्यूहरू, कार्यसमितिका पदाधिकारी तथा सदस्यज्यूहरूलाई अध्यक्ष भण्डारीले धन्यवाद समेत ज्ञापन गरेका छन् ।
हेटौडा उपमहानगरपालिकाकाे पूर्वीमा रहेकाे हर्नामाडी र हटिया क्षेत्रका अंगारेश्वर मन्दिर वरपर राजदेवी, चन्दनदेवी गुफाथान, गाेरक्षेश्वर,सेतीदेवी, कमलादेवी, कालेदेवी, सिद्धेश्वर, जुरेथुम गुम्बाडाँडालगायतका धार्मिक तथा पर्यटकीय क्षेत्र रहेकाेले धार्मिक पर्यटन तथा पर्या पर्यटनमा समेत टेवा पुग्ने बताइएकाे छ ।
