६२ लाख रुपैयाँ बराबरकाे विदेशी मुद्रासहित ३ जना पक्राउ
Tags: No Comments
मकवानपुर । मकवानपुर प्रहरीले विदेशी मुद्रा अमेरिकी डलर र युरो सहित ३ जना भारतीय नागरिकलाई पक्राउ गरेको छ । आइतबार मकवानपुरकाे हेटौंडा उपमहानगरपालिका वडा नम्बर १, चौकीटोलबाट प्रहरीले ६२ लाख रुपैयाँ बराबरकाे उक्त विदेशी मुद्रा बरामद गरेको जिल्ला प्रहरी कार्यालय मकवानपुरले जनाएको छ ।
सोमबार बिहान जिल्ला प्रहरी कार्यालय मकवानपुरमा पत्रकार सम्मेलन गरी बरामद भएको रकम र पक्राउ परेकाहरुलाई सार्वजनिक गरेको छ । हेटौंडा–१, चौकीटोलस्थित प्रहरी चेकपोष्टमा काठमाडौंबाट हेटौंडातर्फ आउँदै गरेको बा प्र ०३–००१ ज ०७६५ नम्बरको इभी गाडीलाई जाँच गर्दा भारतको उत्तर प्रदेश जालौन बस्ने ४० वर्षीय विजय सिंह कुशवाह, उत्तर प्रदेशकै गोरखपुर बस्ने २६ वर्षीय प्रशान्त पाठक र भारतको राजस्थान चितोरगढ बस्ने ३२ वर्षीय राहुल कुमार माण्डावतलाई प्रहरीले पक्राउ गरेको हो ।
उनीहरुलाई शरीर तथा झोलाको तलासी गर्ने क्रममा विदेशी मुद्रा बरामद भएको प्रहरी उपरीक्षक खड्काले बताए । उनीहरुलाई चेकपोइन्टमा रोकी झोला खानतलासी गर्दा अमेरिकी डलर केही थान फेला परेको उनले बताए । खड्काका अनुसार कार्यालयमा ल्याएर शरीर खानतलासी गर्दा उनीहरुले लगाएकाे अन्डरवेयर भित्र अमेरिकी डलर र युरो बरामद भएकाे हाे । कुशवाहाको साथबाट १२ हजार अमेरिकी डलर, पाठकको साथबाट १४ हजार युरो र माण्डावतको साथबाट २० हजार अमेरिकी डलर बरामद भएको हाे ।
बरामद भएको अमेरिकी डलरको नेपाली बजार मुल्य ४३ लाख २० हजार ५१५ रुपैयाँ र युरोको १९ लाख ६९ हजार ५१५ रुपैयाँ गरी जम्मा कुल ६२ लाख ९० हजार ३५ रुपैयाँ हुने प्रहरीले जानकारी दिएकाे छ । पक्राउ परेकाहरुले काठमाडौंमा क्यसिनोमा खेलेर फर्किएको प्रारम्भिक बयान दिएकाे खड्काले बताए । पक्राउ गरिएकाहरु माथि थप अनुसन्धानका लागि राजश्व अनुसन्धान कार्यालय काठमाडौं पठाउने तयारी भइरहेको मकवानपुर प्रहरीले जनाएकाे छ ।
मह स्वास्थ्यको अमृत समान हाे । यसको सेवनले धेरै प्रकारका स्वास्थ्य समस्या निको हुन्छ । आयुर्वेदमा पनि यसको महत्व उल्लेख गरिएको छ । महको सेवनले सम्पूर्ण शरीरलाई फाइदा हुन्छ ।
आयुर्वेदमा मह
महलाई आयुर्वेदमा योगवाहि पनि भनिन्छ, जसले गहिरो तन्तुहरूमा प्रवेश गर्न सक्छ। यसमा धेरै प्रकारका औषधीय गुण पाइन्छ । जुन शरीरका लागि निकै फाइदाजनक हुन्छ ।
आयुर्वेदिक ऋषि चरकले पाँच हजार वर्षअघि महको गुणबारे चर्चा गरेका थिए । यसको प्रयोगबारे विस्तृतमा उनले लेखेका छन् । महलाई स्वास्थ्यका लागि धेरै तरिकाले अमृत मानिएको छ ।
मह प्रयोग नगर्ने तरिका
महलाई तातो खाना वा पानीमा मिसाएर कहिल्यै पनि सेवन गर्नु हुँदैन।
तातो वातावरणमा काम गर्ने मानिसहरूले मह खानु हुँदैन।
घ्यूमा वा तातो, मसलादार खानामा मह मिसाउनु हुँदैन।
महलाई ह्विस्की, रम, ब्रान्डी वा तोरीमा मिसाएर कहिले पनि सेवन गर्नु हुँदैन।
महलाई तातो पानीमा मिसाएर कहिल्यै पनि सेवन गर्नु हुँदैन। यसले धेरै गम्भीर परिणामहरू निम्त्याउन सक्छ।
मह खाने सही तरिका
तौल घटाउन चाहनुहुन्छ भने एक गिलास मनतातो पानीमा एक चम्चा मह मिसाएर सेवन गर्नुपर्छ।
चिसो, खोकी, साइनसाइटिस वा रोग प्रतिरोधात्मक क्षमता बढाउन मह, बेसार र कालो मिर्च एक/एक चम्चा मिसाएर सेवन गर्नुपर्छ।
काठमाडौं । साहित्यकार मीना चौलागाईंको मुक्तक सङ्ग्रह “मनोकाङ्क्षा” विमोचन भएको छ । शनिबार नेपाल प्रज्ञा-प्रतिष्ठान काठमाडौंमा प्रतिष्ठानका कुलपति भुपाल राईलगायतले चौलागाईंको दोस्रो मुक्तकसंग्रह ‘मनोकाङ्क्षा’ विमोचन गरेका हुन् ।
पुस्तक विमोचन गर्दै कुलपति राईले अहिले मुक्तकको लोकप्रियता बढेको बताउँदै छोटो, मिठो र चोटिलो विधा मुक्तकमा सबैको आकर्षण रहेकाे जानकारी दिए । ‘चौलागाईंको मुक्तकसंग्रह पठनीय रहेकाे छ ।’ उनले भने । ‘मुक्तकले घटनाप्रधान र विषयवस्तुको प्रभावजन्य झट्का उत्पन्न गर्न सक्ने हुनु पर्छ’ उनले भने ‘दर्शनढुङ्गा र चकमक ठोस्दा निस्किने झिल्को जस्तै मुक्तक बन्न सक्नु पर्छ ।’ मुक्तककार चौलागाईंका मुक्तक भावोत्पादक र सामयिक मूल्यबोध गर्न समक्ष रहेको उनले बताए ।
प्राज्ञ डा. कौशिला रिसालले चौलागाईंकाे ‘मनोकाङ्क्षा’ को समीक्षा गर्दै मुक्तक सङ्ग्रहमा प्रेम तथा शृङ्गारिक मनोभावना व्याप्त रहेको बताइन् । ‘मनोकाङ्क्षाले सुखदुःख, यथार्थ अनुभूति, मातृप्रेम, मानवीय संवेदना र आरोहअवरोह चित्रण गर्न सक्षम भएको छ’ रिसालले भनिन् । कार्यक्रममा वरिष्ठ मुक्तककार ज्ञानुवकर पौडेल, नियात्राकार प्रतीक ढकाल, कवि- कलाकार रमेश पौडेल, मुक्तककार सुनिल अधिकारी, कृतिकारकी गुरु कोमल ढुङ्गेल कृतिकारकी सुपुत्री आयुश्री चौलागाईंले कृति र कृतिकारको चर्चा गर्दै कृतिगत सफलताकाे शुभकामना दिएका थिए ।
लोकार्पित मुक्तकसङ्ग्रहबाट पार्वती भट्ट, कार्मु चौलागाईं, प्रकाश बस्नेत गफाडी र निलाञ्जला भारद्वाजले तीन/तीनवटा मुक्तक वाचन गरेका थिए ।मुक्तककार चौलागाईंले मनोकाङ्क्षा’ मुक्तक संग्रहको विमोचन हुनु अत्यन्त गर्व र विशेष क्षण भएकाे बताइन्। मुक्तक लेखनका लागि सरल भाषा तर गहिरो अभिव्यक्ति हुनुपर्ने उनकाे भनाई थियाे । आफू पहिलेदेखि नै मुक्तक विधामा प्रतिबद्ध भएर लागेको र यो दोस्रो कृतिबाट थप जिम्मेवारी महसुस भएको लेखक चौलागाईंको भनाई छ। मनोकाङ्क्षामा विभिन्न भाव र विषयका ३१२ वटा मुक्तक समेटिएका छन् ।
रामेछाप जिल्लाकाे लखनपुरमा जन्मेर कर्मथलाे काभ्रेपलाञ्चाेक जिल्लाकाे पाँचखाल नगरपालिकामा बनाउँदै आएकी चौलागाईकाे २०७८ सालमा मुक्तक संग्रह ‘मुक्तक मिनार’ सार्वजनिक भएकाे छ । मुक्तकसागर त्रैमासिक साहित्यिक मुक्तक पत्रिकाद्वारा चौलागाईकाे पहिलाे मुक्तक संग्रह सार्वजनिक गरेकाे थियाे । साहित्य विधाकाे मुक्तकसँगै गजल, गीत, कोपिला, कविता, हाइकु लेखन कलम चलाउने चौलागाईं स्कूलमा नेपाली बिषय पढाउने गुरुको प्रेरणाले नै साहित्यमा लागेकाे बताउँछिन । चाैलागाईं विगत ८–९ बर्षदेखि साहित्यमा निरन्तर कलम चलाउदै आएकाे बताउँछिन् ।
नेपाल मुक्तक प्रतिष्ठानका अध्यक्ष रामकाजी कोनेको अध्यक्षता तथा प्रज्ञा प्रतिष्ठानका कुलपति भुपाल राईले प्रमुख आतिथ्यता भएकाे कार्यक्रममा महासचिव यादव भट्टराईले सहजिकरण गरेका थिए ।
र यो पनि…
चौलागाईको मुक्तक संग्रह ‘मुक्तक मिनार’ सार्वजनिक
‘समाज विकसित भए साहित्यकाे विकास हुन्छ’
मकवानपुर । बागमती प्रदेश सरकारले उद्योग दिवसको अवसरमा १४ उद्यमीलाई सम्मान गरेको छ । प्रदेशका १३ जिल्लाका १/१ वटा उत्कृष्ट र प्रदेशबाट एक सर्वोत्कृष्ट घरेलु तथा साना उद्यमीलाई नगद सहित सम्मान गरेको हो ।
१० औँ उद्योग दिवसको अवसरमा हेटौँडामा उद्यमीहरूलाई सम्मान गरिएको हो । प्रदेशको उद्योग वाणिज्य भूमि तथा प्रशासन मन्त्रालयले प्रदेशका १३ जिल्लाबाट उच्च अङ्क प्राप्त गर्ने उत्कृष्ट एक/एक उद्यमी र प्रदेशबाट सबैभन्दा बढी अङ्क प्राप्त गर्ने एक सर्वोत्कृष्ट उद्यमीलाई सम्मान गरिएको हो । उत्कृष्ट उद्यमीहरूलाई नगद ४० हजार रुपैयाँ सहित सम्मान गरिएको थियो ।
त्यस्तै मकवानपुरकाे हेटौडा उपमहानगरपालिका १३ काे कोम्हेन्दो एकीकृत कृषि फार्मसहित प्रदेश १३ उद्योग उत्कृष्ट उद्यमी घोषित भइ पुरस्कृत भएका छन् । धादिङकाे युनिक पशुपन्छी तथा कृषि फर्म, नीलकण्ठ–८, रसुवाकाे एस. एस. टेलर्स एन्ड स्यानिटरी प्याड तथा माक्स, उत्तरगया–५, सिन्धुलीकाे बरपिपल दुना टपरी उद्योग, दुधौली–४, काठमाडौंकाे ओम फुड प्रोडक्ट, चन्द्रागिरी– ११ उत्कृष्ट उद्यमी घोषित भएका हुन् ।
त्यसैगरी ललितपुरको सृजनशील कृषि फर्म बागमती–१, दोलखाको सुरी मैरी पालन तथा घार उद्योग गौरीशङ्कर–५, नुवाकोटको नव युवा कृषि फर्म सुर्यगढी–५, भक्तपुरको लक्ष्मी चिउरा उद्योग भक्तपुर–५, चितवनको एसियन नेपाली कागज उद्योग, भरतपुर–२८, रामेछापको मन्थली डिलक्स एग्रो फरेस्ट्री मन्थली–१, सिन्धुपाल्चोकको कफी सहकारी उद्योग चौतारा साँगाचोक गढी–१० र काभ्रेको बि.जे.एस ह्याण्डीक्राफ्ट एन्ड पनौती सेभिनियर हाउस, पनौती–७ उत्कृष्ट उद्यमी घोषित भएका थिए ।
यस्तै प्रदेशकाे सर्वोत्कृष्ट उद्यमी काभ्रेको झ्याम्भल कृषि फर्म उद्योग प्रालि भएको छ । उक्त उद्योगलाई नगद १ लाख रुपैयाँसहित सम्मान गरिएको हाे । उद्योगले स्थानीय स्तरमा उत्पादित कच्चा पदार्थको प्रयोग गरेर अचार, विभिन्न प्रकारका क्याण्डीहरु उत्पादन गरेर बजारमा बिक्री गर्दै आएको मन्त्रालयले जनाएकाे छ ।
यसैबोच बागमती प्रदेशका मुख्यमन्त्री बहादुर सिंह लामाले नेपालमा उद्योग संचालनको उपयुक्त वातावरण नरहेको बताएका छन् । १० औं उद्योग दिवसको अवसरमा हेटौँडामा आयोजित नवप्रवर्तन उद्यमी सम्मान कार्यक्रमलाई सम्बोधन गर्दै मुख्यमन्त्री लामाले उक्त कुरा बताएका हुन् ।
‘उद्यमीले लगानीका लागि राज्य तथा समुदायस्तरबाट समस्या छ’ उनले भने ‘उद्योग संचालनका लागि नागरिकस्तरबाटै सहयोग गरी उपयुक्त वातावरण तयार गरिनु पर्छ ।’ बागमती प्रदेश सरकारले उद्योग क्षेत्रलाई प्रोत्साहनका लागि नीति तयार गर्ने उनले बताए । ‘प्रदेशमा उद्योगमैत्री वातावरण तयार पार्न प्रदेश सरकार प्रतिवद्ध रहेको छ’ लामाले भने । उद्योग क्षेत्र युवा पलायन रोक्न र रोजगारी सृजनाको प्रमुख आधार रहेकाे लामाले बताए ।
मकवानपुर । मकवानपुरकाे हेटौडा र चितवनकाे नारायणगढमा पत्रकार तथा लेखक सुधीर शर्माका २ वटा कृतिमाथि विमर्श गरिएको छ । शर्माका भिक्षु,व्यापार र विद्रोह र हिमालपारिको हुरी कृतिमाथि शुक्रबार हेटौडामा र शनिबार नारायणगढमा विमर्श गरिएको हो ।
घिमिरेले हेटौडामा लेखक शर्मासँग अन्तरक्रिया समेत गरेका हुन् । विमर्शमा मकवानपुर बहुमुखी क्याम्पसका उपप्राध्यापक घनश्याम घिमिरेले शर्माका दुबै कृतिको समीक्षात्मक प्रस्तुति राखेका थिए । नारायणगढमा भएकाे संवाद र विमर्श कार्यक्रममा लेखक शर्मासँग पत्रकार सूर्यप्रकाश कँडेलले संवाद गरेका छन् ।
‘भिक्षु, व्यापार र विद्रोह’ मा शर्माले मल्लकाल, लिच्छवीकाल, नेवार समुदायले तिब्बतमा पुगेर गरेको व्यापारको इतिहास, नेपाल र चीनबीचको व्यापारिक सम्बन्ध र भारत,चीनमा माओत्सेतुङले गरेको साँस्कृतिक क्रान्तिको विषयमा समावेश गरिएकाे उपप्राध्यापक घिमिरेले जानकारी गराए । यसैगरी ‘हिमालपारिको हुरी’ मा शर्माले सन् २००८ पछि चीनले विश्वसामु व्यावसायीक खुलापनकाे रुपमा आफूलाई प्रस्तुत गर्न सुरु गरेको उनले बताए ।
किताब पब्लिसर्स र सम्पूर्ण किताबले संयुक्तरुपमा आयोजना गरेको कार्यक्रममा लेखक शर्मासँग पत्रकार कँडेलले पुस्तकको विषयवस्तु, रचना गर्भ र पुस्तकले समेटेका क्षेत्रबारे विस्तृत कुराकानी गरे । लेखक शर्माले सात वर्ष लगाएर दुई पुस्तक ‘भिक्षु, व्यापार र विद्रोह’ एवं ‘हिमालपारिको हुरी’ लेखिएको बताए ।
राजतन्त्र रहुन्जेल कुटनीतिक सम्बन्धमा मात्रै रही सकेकाे सहयाेग गर्दै आएकाे चीनले राजतन्त्रकाे समाप्ती पछि सरकारमा पुग्ने दलका नेतालाई आफ्नाे अनुकुलकाे मित्रता बढाउन खाेजेकाे हिमालपारीकाे हुरीमा रहेकाे छ । यता भिक्षु, व्यापार र विद्रोहमा लेखक शर्माले २ सय वर्ष पहिलेकाे इतिहासदेखि नेपाल र चीनबीचको व्यापार सम्बन्धको प्रसंग समावेश गरिएको छ । पत्रकारले सतहीरुपमा लेख्छन्, अध्ययन, अनुसन्धान गर्दैनन् भन्ने समाजको बुझाई रहेकाे भाष्यलाई पत्रकारिताकाे माध्यम हुँदै लेखक बनेका शर्मा मुलुकको इतिहासलाई दस्तावेजीकरण गर्ने काम पुस्तक मार्फत गरेका छन् । शर्माका दुई कृति महत्वपूर्ण सावित हुने हेटौडा र नारायणगढकाे विमर्शमा बताइएकाे छ ।
शर्माका उक्त कृति माथि हेटौडा विमर्शमा राजनीतिज्ञ, प्राध्यापक, साहित्यकार, विद्यार्थीलगायतले जिज्ञासा राखेका थिए । नारायण संवाद विमर्शमा शिक्षाविद् चोलेन्द्र पण्डित, प्रेम रिमाल, कवि विपिन पाठक, पत्रकार गोविन्द न्यौपानेलगायतले लेखकसँग जिज्ञासा राखेका थिए । पाठकका जिज्ञासामाथि बोल्दै लेखक शर्माले नेपाल र चीनबिचको आर्थिक, साँस्कृतिक र राजनीतिक सम्बन्धका आयाम र यसले पार्ने प्रभाव बताए । उनले आफ्ना दुवैकृति विद्यार्थीकालागि इतिहास बुझ्ने माध्यम हुने साथै अनुसन्धानमूलक कृतिको रुपमा रहेकाे बताए ।
शैलीगत रुपमा आख्यानकाे रुपमा साहित्यकारले लिन सक्ने पुस्तक अनुसन्धानकर्ताको रुपमा अध्ययन, अनुसन्धानमा आधारित र थप अध्ययन अनुसन्धानका लागि कतिपय सन्दर्भ समेत उजागर गरिएको उनले बताए । दुई छिमेकी भारत र चीनमध्ये चीनलाई बुझ्न भाषाका साथै सामाजिक सास्कृतिक र भौगोलिक अवस्था लगायतका विविध कारणले गाह्रो भएको शर्माले जानकारी दिए । दुई ठूला देशबीचको नेपालले चीनसम्बन्धमा बुझ्ने, विश्लेषण गर्ने र रणनीतिक हिसाबले काम गर्न विज्ञ व्यक्तिहरु आवश्यक रहेको बताए । चीन भारतसँग नभई अमेरिकासँगको प्रतिस्पर्धामा रहेको तथा विश्वकै पहिलो शक्ति राष्ट्र बन्ने लक्ष्यमा अगाडि बढिरहेको उनले जानकारी दिए ।