
सरास्वती तिवारी
१.
चाडबाड आयो हर्ष खुशि उमङ्ग छायो देशमा
तिज गयो, तिहार आउदैछ दशैं आयो देशमा
बाटोहेर्दै आँखा पाटिए प्रदेशी कहिले आउछ ?
नआउने खबरले बा आमालाई रुवायो देशमा ।
२.
दिनभरी गर्थी कमाई बेलुकी खान पुग्दैन नआउ दशैं
टीकाथाप्न गाडी भाडा महंगो जान पुग्दैन नआउ दशैं
बजार महंगाईले डाडो काट्यो पहुँच बाहिर सबै कुरा,
अलिकति फलफुल पाउर लैजान पुग्दैन नआउ दशै ।
बासा, नवलपरासी

सतीश पण्डित
दशैँ आयो तिहार नि आउँदै छ
गाउँघर जाउँ झै नि लाउँदै छ
चाडबाडको रमैलो यही नै हो
हुँदा सँगै परिवार रमैलो छाउँदै छ।
भानु ६ चुँदी तनहुँ, हाल मातातीर्थ काठमाडाैं

खुसी ‘कला’
दसैँ, तिहार, गाउँघर सम्झी परदेशी रूँदैछ
दुख र पीडा मनको घाउ चोट आँसुले धुँदैछ
ती बुढी आमा छोराको बाटो हेर्दै टोलाइ बस्दि हुन,
स्वास लामो फेर्छ साहुको ऋण केही जम्मा हुँदैछ।
लेखनाथ पाेखरा हाल जर्मनी

प्रकाश ‘निश्चल’
धनिका लागि दसैं तिहार शुभ दिन हुन्छ
गरिबको टाउकोमा साहुको ऋण हुन्छ
आउन आयौ रमझम गर्दै झुपडीमा पनि
परिबर्तन लिएर आउ पठाउन कठिन हुन्छ ।
जाजरकोट

नानु राना थापा
मालश्री धून रोटेपिङ रमणीय वातावरण दशैं आगमनको
कति छन् कति अविस्मरणीय क्षण आनन्दित मनको
त्यो खुशी आज कहाँ गयो जीन्दगीले कोल्टे फेर्दा
पूनारावृति भईदिन्छ मानसपटलमा त्यो बालापनको !
स्याङ्जा, हाल बेलायत

गणेश तिमल्सिना
याे दसैं कसैलाई मासु त कसैलाई आँसु नहाेस् ।
कसैका जवान छाेरा कसैका बुढी सासू नहाेस् ।
हे माँ ! सबैका आँखामा खुसी छर्दै पेट भरियाेस् ।
काेही मेस्तर काेही सुब्बा साहेब नासु नहाेस् ।
गाेदार, धनुषा

भावना बिष्ट
जान पाइन के गर्ने हो दशैमा घर यसपाली
कहिल्ये भाग्य सात दिदैन कहिल्ये घरको माली
सात बर्ष भो भाई बहिनीको टिका नलागेको,
हरेक बर्ष हुन थाल्यो अभागीको निधार खाली ।
अछाम

सुधिर थापा
रोक्नै सकिएन आँसुको सागरलाई
काम्मा नै लगाएँ ती थुप्रै जाँगरलाई
ठूलो माग त का’ हो र यो महान चाड्मा
ल्याउ नै सकिएन सानीको घाँगरलाई ।
काठमाडाैं

सुविद्या सिग्देल
यस पटक त चुहिनी छाना छाउनु छ
आमाको हातको टीकाजमरा लाउनु छ
बुद्धि बोकेर विदेश आइयो हण्डर खाइयो ,
अब परिश्रम गर्न मातृभूमि मै आउनु छ ।
काठमाडाै

अन्जिता राउत क्षेत्री
किन आउँछ बेकार यो दशैं तिहार
सारा पर्देशीलाई रुवाउन बारम्बार
आफ्नै गाउँघर बाबा आमा सम्झेर
रुँदैरुँदै बस्नुपर्छ यहाँ खाली निधार।।
सोलुखुम्बु

