खुशी ‘कला’
किन हुन्छ दुख,किन आधार पत्ता लाग्दैन।
यो शहरमा खुशीको बजार पत्ता लाग्दैन।
हत्याहिंसा बढ्यो कहाँ हराउन थाले चेलीबेटी,
छोरी चेली सुरक्षित रहने घरबार पत्ता लाग्दैन।
छाम्दा भेटिदैन मनको घाउ तर चस्किरहन्छ
धामी डाक्टर सबै धाएँ उपचार पत्ता लाग्दैन
निद्रा विहान सम्म,यात्रा चिहान सम्म त हो,
मान्छे किन दौडिरहन्छ हतार पत्ता लाग्दैन।
गरिबी पढेको छु महँगीको कथा पढेको छु,
देश लथालिङ्ग छ भ्रष्टाचार पत्ता लाग्दैन ।
अधिकारको प्रयोग गर्न पनि सक्नुपर्छ महोदय
अधिकार भनि हिड्दैमा अधिकार पत्ता लाग्दैन।
लेखनाथ पाेखरा, हाल जर्मनी

