- सन्देश घिमिरे
खालि छ मुटु प्रिय दरबार चाहिँदैन
युगयुग बाँच्छ प्रेम घरबार चाहिँदैन ।
तिम्रो मेराे नामका अफवाह कतिकति
यसै बन्छन् समाचार अखबार चाहिँदैन ।
मेटिएर मेटिदैनन बैरीका प्रयासले
एक नजर काफी छ तरबार चाहिँदैन ।
विपक्षीका अनेकन षड्यन्त्रका ज्वारभाटाले
भयो अब अस्थिर यहाँ सरकार चाहिँदैन ।
जोडि हाम्रो सलामतको कामना धेरै आए
पुग्यो अब कसैको सरोकार चाहिँदैन ।
नेप्सेमा मायाले रेकर्ड ब्रेक गरे पछि
थोरबहुत खुद्रा को कारोबार चाहिँदैन ।
तिम्रो त्यो जादुगरी ले पाक्छन् यहाँ अनेकथरी
साथमा छौ तिमी अरु परिकार चाहिँदैन ।

