मकवानपुर । आन्तरिक राजस्व कार्यालय मकवानपुरले सबैभन्दा बढी कर तिर्ने विभिन्न क्षेत्रका करदातालाई सम्मान गरेको छ । ‘कर प्रणालीको सार, लगानीको आधार’ भन्ने मूल नारा रहेको १३औं राष्ट्रिय कर दिवस तथा कर सप्ताह कार्यक्रमको समापनका अवसरमा करदातालाई सम्मान गरेकाे हाे ।
कार्यालयले सबैभन्दा बढी आयकर दाखिला गर्ने करदातामा समग्र क्षेत्रतर्फ निक–लुम्बिनी विद्युत् जेभी, उद्योग क्षेत्रतर्फ यती पेन्ट्स नेपाल प्रालि, व्यापार क्षेत्रतर्फ न्यु ब्रदर हार्डवेयर, शैक्षिक क्षेत्रतर्फ हेटौंडा स्कुल अफ म्यानेजमेन्ट एण्ड सोसियल साइन्सेस एजुकेसन प्रालिलाई सम्मान गरेको हो ।
यसैगरी बैंक तथा वित्तीय संस्थातर्फ पालुङ बहुद्देश्यीय सहकारी संस्था लिमिटेड,अन्तःशुल्कतर्फ गोरखा लहरी प्रालिका संचालक/प्रतिनिधिलाई सम्मान गरिएको थियो । कार्यक्रममा मकवानपुर उद्योग वाणिज्य संघ, उद्योग संघ मकवानपुर र चेम्बर अफ कमर्श मकवानपुरलाई कर सहभागितामा पुर्याएको योगदानका लागि सम्मान गरिएको थियो । यस्तै नेपाल रेडक्रस सोसाइटी मकवानपुरलाई समेत सम्मान गरिएको छ ।
यसैगरी कर सप्ताहको तेस्रो दिन आयोजना गरिएको खुला निबन्ध लेखन प्रतियोगिताका विजेता हेटौंडा स्कुल अफ म्यानेजमेन्टकी छात्रा प्रतिभा भट्टराई प्रथम, सलिना धिताल द्वितीय र स्नेहा उप्रेती तृतीय भएका छन् ।
‘कर प्रणालीको सार: लगानीको आधार’ विषयको निबन्ध लेखनमाप्रथम,द्वितीय र तृतीय हुने भट्टराई, धिताल र उप्रेतीलाई प्रमुख जिल्ला अधिकारी तीर्थराज चिलुवाल र कर कार्यालयका प्रमुख युक्त सुवेदीले नगदसहित सम्मान गरेका थिए ।
मकवानपुर । हेटौडामा रहेकाे जनसेवक कर्मचारी उपभोक्ता सहकारी संस्था लिमिटेडकाे १६ औं साधारण सभा शनिबार भएकाे छ । सहकारी अध्यक्ष वसन्तराज गौतमकाे अध्यक्षता तथा बागमती प्रदेश सभा सदस्य कुमारी मुक्तानकाे प्रमुख आतिथ्यतामा साधारण सभा भएकाे हाे ।
सदस्य संख्या ७८१ जना रहेकाे सहकारीकाे शेयर पुँजी एक करोड १३ लाख ४३ हजार ५०० रुपैंया रहेकाे छ । उक्त सदस्यहरुबाट हालसम्म ४ करोड २६ लाख ३१ हजार रुपैंया बचत रहेकाे साधारण सभामा अध्यक्ष गौतमले जानकारी दिए । सहकारीकाे जगेडाकाेषमा ३५ लाख ५ हजार र अन्य काेष १० लाख २५ हजार ३ सय रहेकाे बताइएकाे छ । वित्तिय तथा व्यवसायीक सेवा प्रदान गर्दै आएकाे सहकारीले सहकारी शिक्षा सहकारी अध्ययन भ्रमण तथा सम्मान कार्यक्रम गर्दै आएकाे गौतमले बताए ।
२०६६ सालमा तत्कालित डिभिजन सहकारी कार्यालय हेटौंडामा दर्ता भई संचालनमा आएकाे सहकारीले २०८० अषाढ मसान्तसम्म कुल ऋण लगानी ४ करोड ५७ लाख ७१ हजार ६ सय गरेकाे थियाे । आर्थिक वर्ष २०८०/०८१ मा ऋण लगानी २ करोड ८० लाख ४९ लाख रुपैंया गरेकाे सहकारीले उक्त अवधीमा २ करोड ३३ लाख ५८ हजार ५ सय रुपैंया ऋण असुली गरेको अध्यक्ष गौतमले जानकारी दिए । संस्थाकाे २०८१ आषाढ मसान्तसम्म ऋण लगानी ५ करोड ४ लाख ६२ हजार १ सय रहेकाे छ ।
गत आर्थिक वर्षमा ३७ लाख ७९ हजार ३ सय आम्दानी गरेकाे सहकारीले २१ लाख १० हजार ४ सय खर्च गरेकाे थियाे । उक्त आवमा संस्थाले संचालन मुनाफा १६ लाख ६८ हजार ८ सय भएकाे जनाएकाे छ । सहकारीले जोखिम व्यहाेर्ने काेषमा २ लाख ८० हजार खर्च गरी संस्थाले १३ लाख ८८ हजार ८ सय खुद बचत गरेकाे गौतमले जानकारी दिए ।
संस्थाले उपभोक्ताकाे माग अनुसार हेटौंडा, शिवम्, ऋद्धिसिद्धी र सिजी सिमेण्ट उपलब्ध गराउँदै आएकाे छ । एसइई उच्च शिक्षा र विश्वविद्यालयका परीक्षामा विशिष्ट श्रेणीमा उतिर्ण हुने शेयर सदस्यका छोराछोरी तथा संस्थाका असल वचतकर्ता र असल ऋणीलाई साधारण सभामा सम्मान गरिएकाे छ । यसैगरी संस्थाकाे स्थापना दिवसका दिन २० साउन २०८० मा हेटौडा १५ स्थित दिव्य सेवा निकेतानमा आश्रित जेष्ठ नागरिकलाई लत्ताकपडा र फलफूल वितरण गरेकाे थियो ।
आर्थिक वर्ष २०८०/०८१ मा सहकारी जिल्लाका सहकारी मध्ये उत्कृष्ट भई सम्मानित भएकाे समेत अध्यक्ष गौतमले साधारण सभामा जानकारी गराएकाे थिए । संस्थाले आर्थिक वर्ष २०८१/०८२ मा शेयर सदस्य संख्या ७८१ बाट ९०० पुर्याउने लक्ष्य लिएकाे जनाएकाे छ । यसैगरी शेयर पुँजी बृद्धिगरी १ करोड २३ लाख रुपैया तथा बचत संकलन बृद्धि गरी ४ करोड ९० लाख पुर्याइने लक्ष्य लिएकाे । यस्तै ऋण लगानी ५ करोड ८० लाख पुर्याइने लक्ष्य लिएकाे सहकारीले सिमेन्ट विक्री ३३ हजार ७९० बाट ४० हजार बाेरा पुर्याइने लक्ष्य लिएकाे बताइएकाे छ ।
आर्थिक कारोबारकाे सूचना प्रवाह एसएमएसबाट गराउँदै आएकाे सहकारीले प्रविधिलाई आत्मसात गर्दै शेयर, बचत तथा ऋण रकम भुक्तानी मोवाईल बैकिङ प्रविधिद्वारf गर्ने व्यवस्था गरिने संस्थाले जनाएकाे छ । कार्यक्रममा संस्थाको वार्षिक प्रगति प्रतिवेदन सहकारीका अध्यक्ष बसन्तराज गौतमले प्रस्तुत गरेका थिए, सचिवको प्रतिवेदन दीर्घ नारायण भट्टराईले र कोषाध्यक्ष जयराम घितालले आर्थिक प्रतिवेदन प्रस्तुत गरेका थिए ।
कार्यक्रममा जेष्ठ शेयर सदस्य जगन्नाथ ढकाल, असल बचतकर्ता तर्फ राजकुमारी गुप्ता, असल ऋणी अम्बर बहादुर पाख्रिन, उत्कृष्ट बाल बचतकर्तामा निर्भाणा कार्की र उत्कृष्ट अङ्क हासिल गर्ने शेयर सदस्यका सन्तानलाई पुरस्कृत गरेको थियो ।
मकवानपुर । बागमती प्रदेश उद्योग, पर्यटन तथा वातावरण समिति सभापति आनन्द कुमार श्रेष्ठले प्रदेश हस्तकला ग्राम स्थापना तथा संचालनको सम्बन्धमा ब्यवस्था गर्न बनेको बिधेयक २०८१ को कार्यान्यनका लागि आफूहरुले जोड दिइरहेको बताएका छन् ।
जनपत्र मिडिया प्रालि हेटौंडाले आयोजनामा प्रदेश हस्तकला ग्राम स्थापना तथा संचालनको सम्बन्धमा ब्यवस्था गर्न बनेको बिधेयक २०८१, प्रदेश राजपत्रमा प्रकाशित भएपछी यसले सरोकारवाला पक्षलाई पार्ने प्रभावकारी कार्यान्वयनका विषयमा गरेकाे पत्रकार भेटघाटमा सभापति श्रेष्टले उक्त कुरा बताएका हुन् । उक्त कानून पाइलट प्रोजेक्टका रुपमा कार्यान्यन गर्न लागिएकाे समेत उनले जानकारी दिए ।
संसद सहयोग परियोजना संयुक्त राष्ट्रसंघीय विकास कार्यक्रम (युएनडीपी) को सहकार्यमा भएकाे कार्यक्रममा मकवानपुर हस्तकला संघका संस्थापक अध्यक्ष ज्ञानभक्त लामाले हस्तकलाको क्षेत्रमा धेरै काम भएको र यसलाई फराकिलो रुपमा बुझ्नका लागि प्रदेश सरकार र सांसदहरुलाई आग्रह गरे । हस्तकलाको क्षेत्रमा आफूले बिगत ५० वर्षदेखि काम गर्दै आएको तर राज्यले कुरा नबुझ्दा यस क्षेत्रमा थप समस्या भएको लामाले बताए ।
हस्ताकला संघका सल्लाहकार तथा नेपाल उद्योग बाणिज्य संघका पूर्व केन्द्रीय सदस्य सर्मिला डंगोलले हस्तकलाका कारण नेपाललाई बिदेशमा चिनाउन सकिएकोले यस क्षेत्रमा सरकारले विशेष ध्यान दिन जरुरी रहेको बताइन् । ‘हस्तकलाको क्षेत्रमा थोरै लगानीबाट धेरै कामदार राखेर काम गर्दा थप रोजगारीको समेत सृजना भएकाे छ’ डंगोलले भनिन् ‘यसक्षेत्रकाे लागि कानून मात्र होइन काम गरिरहेकाहरुलाई प्रोत्साहनका कार्यक्रम पनि सरकारले ल्याउनुपर्छ ।’
जनपत्र मिडियाले संसद सहयोग परियोजना संयुक्त राष्ट्रसंघीय विकास कार्यक्रमको सहयोगमा बिधेयक समितिमा छलफलमै रहेका बेला सरोकारवाहरुको सुझाब लिने कार्य गरेकाे मिडियाका अध्यक्ष हरि हुमागाईंले जानकारी दिए । उक्त कार्यक्रमबाट आएका सुझावहरुलाई समेटेर तीन महले लिखित समितिलाई बुझाइएको उनले बताए । त्यसपछी समिति हुँदै प्रदेश सभाबाट विधेयक पारित भई प्रदेश राजपत्रमा प्रकाशित भएको छ ।
मकवानपुर । नेपाल आयल निगमले पेट्रोलियम पदार्थको मूल्य घटाएको छ ।
निगम सञ्चालक समितिको बिहीबारको निर्णयले डिजेल र मट्टितेलको साविकको खुद्रा बिक्री मूल्यमा प्रतिलिटर एक रुपैयाँका दरले घटाइएको हाे । हवाई इन्धन र एलपी ग्यासको मूल्य भने यथावत् राखिएको छ ।
इन्डियन आयल कर्पोरेसनले आज जारी गरेको नयाँ खरिद मूल्यअनुसार प्रतिलिटर पेट्रोलमा ०.२५ रुपैयाँ र डिजेलमा प्रतिलिटर १.०४ रुपैयाँ घटेर आएको थियो । यस्तै मट्टितेलमा २.२४ रुपैयाँ, हवाई इन्धनमा ३.२३ र एलपी ग्यासमा प्रतिसिलिन्डर ५५.७० रुपैयाँ बढेर आएको छ ।
मूल्य समायोजनसँगै पहिलो वर्ग चारआली, विराटनगर, जनकपुर, अमलेखगञ्ज, भलबारी, नेपालगञ्ज, धनगढी र वीरगञ्जको लागि डिजेल प्रतिलिटर १४७ रुपैयाँ ५० पैसा, दोस्रो वर्ग सुर्खेत र दाङका लागि १४९ रुपैयाँ र तेस्रो वर्ग काठमाडौं, पोखरा र दिपायलका डिपोको लागि प्रतिलिटर १५० रुपैयाँ कायम भएको छ ।
परिवर्तन गरिएको नयाँ मूल्य शुक्रबार बिहानदेखि लागु हुने निगमले जनाएको छ ।
मकवानपुर । नेपाल आयल निगमले पेट्रोलियम पदार्थको मूल्य बढाएको छ ।
निगमले मंगलबार राति १२ बजेदेखि लागू हुनेगरी प्रतिलिटर पेट्रोलको मूल्य एक रुपैयाँ, र डिजेल तथा मट्टितेलको मूल्य चार रुपैयाँको दरले बढाएको हो ।
योसँगै तेस्रो वर्ग अन्तर्गत काठमाडौँ, पोखरा र दीपायलमा पेट्रोलको मूल्य १५९ रुपैयाँ, दोस्रो वर्ग अन्तर्गतका सुर्खेत र दाङमा १५८ रुपैयाँ र पहिलो वर्ग अन्तर्गतका बाँकी क्षेत्रमा १५६.५० रुपैयाँ कायम भएको निगमले जनाएको छ ।
त्यस्तै, डिजेलको मूल्य तेस्रो वर्ग अन्तर्गतका क्षेत्रमा १५१ रुपैयाँ, दोस्रो वर्ग अन्तर्गतका क्षेत्रमा १५० रुपैयाँ र पहिलो वर्ग अन्तर्गतका क्षेत्रमा १४८.५० रुपैयाँ कायम भएको छ ।
निगमले हवाई इन्धन र एलपी ग्यासको मूल्य भने यथावत रहेको जनाएको छ ।