शनिबारबाट मकवानपुर लिग क्वालिफाइ फुटबल प्रतियोगिता
Tags: No Comments
मकवानपुर । शनिबारबाट हेटौडामा मकवानपुर लिग क्वालिफाइ फुटबल प्रतियोगिता हुने भएकाे छ । मकवानपुर जिल्ला फुटबल संघको आयोजनामा नयाँ क्लबबीचको एन्फा मकवानपुर लिग क्वालिफाइ नक आउट फुटबल प्रतियाेगिता हुन लागेकाे हाे ।
संघले बुधबार प्रतियोगितामा सहभागी भएका क्लबका पदाधिकारीहरुको उपस्थितिमा खेलतालिका सार्वजनिक गरिसकेकाे छ भने शुक्रबार पत्रकार भेटघाट गरी प्रतियाेगिताकाे तयारी सम्बन्धमा जानकारी गराएकाे छ । शनिबारदेखि सुरु हुने प्रतियोगिताको पहिलो खेल बिहान हेटौंडा–१८ स्थित कमलादेवी युवा क्लब र हेटौंडा–१२ पदमपोखरीस्थित पञ्चशील युवा क्लबबीच हुनेछ । प्रतियाेगिताकाे दोस्रो खेलकाे प्रतिष्पर्धा शनिबार नै हुने भएकाे छ । शनिबार दिउँसो हेटौंडा–१९ को जनहित युवा क्लब र हेटौंडा–१३ को पदमपोखरी एकेडेमीबीच प्रतिष्पर्धा हुनेछ ।
हेटौंडा उपमहानगरपालिका–५ को पिप्ले–क्याम्पा रंगशालामा हुने प्रतियोगिताको फाइनल खेल मंसिर ३० गते हुने आयोजकले जानकारी दिएकाे छ । प्रतियोगिताको उपाधि विजेता र उपविजेताले शिल्ड, मेडल र ट्रफी प्राप्त गर्नेछन् । यस्तै, प्रत्येक खेलको म्यान अफ द म्याच र विधागत उत्कृष्ट खेलाडीहरुका लागि पनि पुरस्कारको व्यवस्था गरिएको प्रतियाेगितामा सहकार्य गरेकाे नारायणी कलेजका प्रिन्सिपल रघुनाथ खरालले जानकारी दिए । जिल्लास्तरीय क्लबको मान्यता दिँदै जिल्ला लिग खेल्न पाउने २ वटा क्लब छनोट गर्न प्रतियोगिता आयोजना गर्न लागेको जिल्ला फुटबल संघले जनाएकाे छ ।
प्रतियोगितामा १२ वटा टिमको सहभागिता जनाउने भएका छन् । प्रतियोगितामा प्रथम र द्वितीय हुने दुई टिम जिल्लास्तरीय टिमको रुपमा छनोट भई जिल्ला लिगमा सहभागी हुनेछन् । आगामी लिगमा दुई वटा टिम घटुवामा पर्ने समेत बताइएको छ । करिब ४ लाख ८५ हजार लागत अनुमान गरिएकाे प्रतियाेगितामा बागमती प्रदेश खेलकुद परिषद् र नारायणी कलेज हेटौडाले सहयाेग रहेकाे छ ।
२०७६ सालपछि एन्फा रेलिगेटेड लिग गर्नुपर्ने नियम लागू भएपछि मकवानपुरले लिग सुरु गरेको हाे । शुक्रबारकाे पत्रकार भेटघाटमा प्रतियाेगिताकाे तयारी पुरा भएकाे बताइएकाे छ भने एन्फा मकवानपुर लिग क्वालिफाइ नक आउट फुटबल प्रतियोगिता २०८० प्रतियोगिताकाे नियमावली समेत सार्वजनिक गरिएकाे छ । नियमावली अनुसार प्रतियोगितामा सहभागी हुन मकवानपुर जिल्ला भित्रका आधिकारिक स्थायी बसोबास गर्ने खेलाडी तथा क्लबहरुले मात्र पाउने छन् ।
फिफा नियम अनुसार सन्चालन हुने प्रतियोगिताको फाइनलमा पुगेका दुई टिमका खेलाडिहरुले मकवानपुरको पहिलो रेलिगेटेड जिल्ला लिग फुटबल प्रतियोगितामा सहभागी हुन नपाउने मकवानपुर जिल्ला फुटबल संघका सदस्य तथा प्रतियाेगिता संयाेजक आलोक स्याङ्तानले बताए । उनका अनुसार प्रतियोगितामा गत सिजन नेपालको हाल राष्ट्रिय टिममा रहेका सिनियर खेलाडि र ए डिभिजन लिग खेलेका खेलाडीहरुले सहभागी जनाउन पाउने छैन तर विभिन्न उमेर समुहमा खेलेका मकवानपुरे खेलाडि भने सहभागी हुन पाउने छन् ।
प्रतियाेगितामा १२ टिमले सहभागिता जनाउने भएका छन् । स्याङ्तानका अनुसार हेटौंडा–१२, पदमपोखरीको पञ्चशील युवा क्लब, बकैया गाउँपालिकाको बकैया युथ क्लब, हेटौंडा–१८ को कमलादेवी युवा क्लब र हेटौंडा–१३ को पदमपोखरी एकेडेमी, हेटौंडा–१९ को जनहित युवा क्लब, हेटौंडा–२ को द रिभाइबल युवा क्लब, हेटौंडा–८ को कमाने फुटबल एकेडेमी र हेटौंडा–१६ को अग्रसर युवा क्लब, हेटौंडा–१६ को ज्ञानज्योति युवा क्लब, हेटौंडा–५ को जनप्रवाह युवा क्लब, हेटौंडा–१५ को सहयोगी युवा क्लब र हेटौंडा–१४ को समाज कल्याण युवा क्लबले सहभागिता जनाएका छन् ।

मकवानपुर । कुनै पनि प्रकारको हिंसा गर्नेलाई आफूले राजनीतिक संरक्षण नदिने बागमती प्रदेश सभा सदस्य एकालाल श्रेष्ठले बताएका छन् ।
लिङ्गको आधारमा हुने हिंसाले सामाजिक परिवेशलाई उदाङ्गो पारेको उनले बताएका छन् । हिंसामा परेकाको उद्वार गर्ने, हिंसा न्यूनीकरण गर्न कानुनी संशोधन, संघसंस्थाको पारदर्शिता र ग्रामीण भेगमा सचेतनामा ध्यान दिनुपर्ने श्रेष्ठले बताए । उपलब्धि हासिल गर्नको लागि अझै कानुन निर्माणदेखि अन्य सहकार्यको लागि आफू तयार रहेको श्रेष्ठले बताएका छन् ।
लैङ्गिक हिंसा अन्त्यको सुनिश्चितताः महिला र बालवालिकामा लगानीको ऐक्यबद्धताू भन्ने नाराका साथ मकवानपुर महिला समूहको आयोजनामा भएको लैङ्गिक हिंसा विरुद्धको १६ दिने अभियान अन्तर्गत प्रेषण प्रणाली सुदृढिकरणू र लैङ्गिक समानता तथा सामाजिक समावेशीकरण रणनीति सुदृढिकरणू सम्बन्धि कार्यक्रममा उनले यस्तो बताएका हुन् ।
कतिपय अवस्थामा महिलाको कारण पुरुष समेत पीडित हुने गरेको उनले बताए । समाजमा जुनसुकै बर्गमाथीको हिंसा अन्त्य गर्न लागिपर्नु पर्छू उनले भने । न्याय दिंदा पिडकलाई संरक्षण गर्नै नहुने र आफू र आफ्नो पार्टीले पीडकलाई संरक्षण नगरेको उनले बताए ।
शुक्रबार सुरु भएको कार्यशाला शनिबारसम्म चल्नेछ । एक्सन एड नेपालको सहयोगमा मकवानपुर महिला समूहको आयोजनामा । प्रेषण प्रणाली व्यवस्थित भएपछि कानुनी सहायता पुर्याउन सजिलो हुने हेटौंडा उपमहानगरपालिका प्रबन्धक बिष्णुकुमारी लामीछानेले बताइन् । पीडितलाई सहयोग गर्दा झनै पीडा थपिने भएकोले विशेष ध्यान दिनुपर्ने लामिछानेले बताइन् । प्रेषण प्रणालीका लागि स्थानीय तहको भूमिका लैगिक विभेदमा आधारित हिसाबाट पीडित प्रभावित महिलालाई कहाँ र कसरी पाउने भन्नेमा प्रष्टता सहितको प्रेषण प्रणाली आवश्यक हुने उनले आफ्नो प्रस्तुतिमार्फत बताएकी थिइन् । आवश्यकतामा केन्द्रित भएर स्थानीय तहहरूले प्रेषण प्रणाली मार्गदर्शन तय गरी लागू गर्नुपर्ने उनले बताइन् ।
कार्यक्रममा जिल्ला बार एशोसियसन अध्यक्ष अप्सरा बस्नेत,मानव अधिकार संरक्षण तथा मानव बेचबिखन विरुद्ध जिल्ला संजाल अध्यक्ष आरति पाठक, सेलर्डका जगन्नाथ सुवेदीलगायत हिंसाको क्रममा पहिले मेलमिलाप संभव नभएमा अदालत जाने बाटो रहेकोले सरकारी संयत्रबाट पहल आवश्यक भएको बताए ।
कार्यक्रममा माइती नेपाल मकवानपुर प्रमुख माया लामा,मन लामा, हिमराइट्स मकवानपुर प्रमुख कुमारी वाईबा, शान्ति फाउन्डेसन मकवानपुर जिल्ला अधिकृत सीता गुरुङ, साना हातहरू नेपालका दिपक रुम्बा, जिल्ला सेवा केन्द्रको बिन्दा बर्तौला, सिविन बाल हेल्प लाइन मकवानपुर सम्झना अधिकारी, कोशिश मकवानपुर प्रमुख सुनिरा लामा, जिल्ला प्रहरी तथा सामूदायिक प्रहरी सेवा केन्द्रका प्रतिनिधिहरू, ओसिएमसीको प्रतिनिधिहरू राजनीति दबाबको कारण पीडितलाई न्यायमा सहायता गर्न समस्या भएको बताए ।
मकवानपुर महिला समूहको अध्यक्ष कमला सुबेदीको अध्यक्षतामा भएको कार्यक्रममा मकवानपुर जिल्लाको मनहरी गाउँपालिका, हेटौंडा उपमहानगरपालिकाका जनप्रतिनिधि तथा कर्मचारीको उपस्थिति रहेको कार्यक्रम संयोजक निशा लामाले बताइन् ।
मकवानपुर । नेपाल चलचित्र संघले बागमती प्रदेश सरकारलाई ज्ञापनपत्र बुझाएकाे छ । संघले बागमती प्रदेश सरकारलाई मनोरञ्जन कर समायोजनलगायतका विषयमा ज्ञापनपत्र बुझाएकाे हाे ।
शुक्रबार आन्तरिक मामिला तथा कानून मन्त्री गंगा नारायण श्रेष्ठलाई संघका महासचिव नरेन्द्र महर्जन, निर्माता तथा कलाकार दीपकराज गिरी, नेपाल चलचित्र प्राविधिक संघका अध्यक्ष पुष्कर लामा लगायत चलचित्रकर्मीहरुले मन्त्रालयमै ज्ञापनपत्र बुझाए हुन् । ज्ञापनपत्र बुझाउँदै महासचिव महर्जनले चलचित्र क्षेत्रले संघीय सरकारलाई १५ प्रतिशत चलचित्र विकास शुल्क, प्रदेश सरकारलाई ५ प्रतिशत मनोरञ्जन कर र त्यसपछि १३ प्रतिशत मुल्य अभिवृद्धि कर गरी ३३ प्रतिशत भन्दा बढी करहरु बुझाउनुपर्ने बाध्यता रहेको बताए ।
ज्ञापनपत्र बुझ्दै मन्त्री श्रेष्ठले प्रदेश सरकारसँग त्यति धेरै अधिकार नभएपनि अधिकारभित्र रहेका विषयलाई आवश्यक सम्बोधन गरिने संघका पदाधिकारीलाई जानकारी गराएका थिए । ‘चलचित्र सम्बन्धी कानून तयार गरी कार्यान्वयनमा ल्याउने तयारी भइरहेकाे छ’ मन्त्री श्रेष्ठले भने ‘आगामी आर्थिक वर्ष विधेयक पारित गरी कार्यान्वयनमा ल्याउने छाैं । उनले हल सञ्चालन, नियमन र अनुगमनको क्षेत्राधिकार पनि हामीलाई नै रहेकाले विधेयक निर्माण पछि सहजता हुने बताए । करको समस्या समाधानकाे विषय संसदमा पेश गरी अगाडी बढाउने प्रतिवद्धता उनले व्यक्त गरे ।
कोशी प्रदेशमा पनि प्रदेशको ५ प्रतिशत करमा समायोजन गरी नेपाली चलचित्रको १.५ प्रतिशत र विदेशी चलचित्रको ३ प्रतिशत कायम गरेको कलाकार संघकाे टाेली मन्त्री श्रेष्ठलाई अवगत गराएकाे थियाे । ‘कला संस्कृति जर्गेना गर्ने माध्यम रहेको चलचित्र उद्योगलाई तीनतहकै सरकारको साथ सहयोग आवश्यक रहेको छ’ कलाकार दिपकराज गिरी भने ‘सरकारले चलचित्र उद्योगलाई हेर्ने दृष्टिकोण अन्य उद्याेगलाई भन्दा फरक पाएका छाैं ।
शुक्रबार नै चलचित्रकर्मीकाे टाेलीले बागमती प्रदेश मुख्यमन्त्री तथा मन्त्रिपरिषद् कार्यालयका प्रमुख सचिव घनश्याम उपाध्यायलाई समेत ज्ञापनपत्र बुझाएका छन् । ज्ञापनपत्र बुझ्दै प्रमुख सचिव उपाध्यायले चलचित्र प्रवर्द्धन र समग्र विकासमा प्रदेश सरकारको साथ रहने प्रतिवद्धता व्यक्त गरे ।
ज्ञापनपत्र बुझाउने समूहमा नेपाल चलचित्र संघ महर्जन, कलाकार गिरी, कलाकार एंव निर्देशक दीपाश्री निरौला, प्रदेश सञ्चार रजिष्ट्रार रेवतीप्रसाद सापकोटा, नेपाल चलचित्र प्राविधिक संघ अध्यक्ष पुष्कर लामा, कलाकार निर्मल शर्मा ‘गैंडा’, राज कटुवाल, सुमन गिरी, ध्रुव न्यौपाने, सुशान्त कुमार श्रेष्ठ लगायतको सहभागिता रहेकाे थियो ।
मकवानपुर । मकवानपुरकाे हेटौडामा बसले माेटरसाइकललाई ठक्कर दिंदा १ जनाकाे मृत्यु भएकाे छ । मृत्यु हुनेमा बारा जितपुर सिमरा उपमहानगरपालिका १२ बस्ने ३२ वर्षीय निशा कुमारी रहेकाे मकवानपुर प्रहरीले जनाएकाे छ ।
शुक्रबार बिहान हेटौडा उपमहानगरपालिका वडा नम्बर १५ रातोमाटे स्थित पूर्व पश्चिम सडकखण्डमा पथलैयाबाट भरतपुर तर्फ जान आउदै गरेको ना ४ ख ९५२० नम्बरको बसले सोही दिशा तर्फ आउदै गरेको ना ५३ प ८५२७ नम्बरकाे मोटरसाइकललाई ठक्कर दिई दुर्घटना भएकाे हाे ।
दुर्घटनामा मोटरसाइकल चालक बारा जितपुर सिमरा १२ बस्ने ४३ वर्षीय रोशन कुमार राय तथा रायकी श्रीमति निशा कुमारी घाइते भएका थिए । उनीहरुलाई उपचारकाे लागि हेटौडा अस्पताल ल्याइएकाेमा शुक्रबार बिहान डाक्टरले निशा कुमारीकाे मृत्यु भएकाे घोषणा गरेको जिल्ला प्रहरी कार्यालय मकवानपुरले जनाएकाे छ ।
घाइते रायकाे अवस्था सामान्य रहेकाे तथा दुर्घटना भएकाे मोटरसाइकल बस तथा बस चालक प्रहरी चौकी रातोमाटेको नियन्त्रणमा रहेकाे छ ।
मकवानपुर । ट्रकहरुले मालसामान ढुवानी गर्दा सवारी धनीले नै मूल्य अभिवृद्धि करकाे विजक जारी गरेर मात्रै ढुवानी गर्न पाउनु पर्ने माग गरिएकाे छ । नारायणी यातायात व्यबसायी कम्पनी प्रालिले शुक्रबार पत्रकार भेटघाट गर्दै उक्त माग गरेका हुन् ।
कम्पनी आवद्ध सवारी साधन ट्रकहरुले लामो समय देखी मालसामान ढुवानी गरीरहेको सन्दर्भमा आर्थिक वर्ष २०८०/०८१ देखि आन्तरीक राजस्व कार्यालयमा दर्ता गरी मूल्य अभिबृद्धि करको विजक जारी पश्चात ढुवानी गर्दै आएका थिए । सुरुवाती समयमा मूल्य अभिबृद्धि करको विजक सवारी धनीकाे तर्फबाट जारी भइ सामान ढुवानी भइरहेकाेमा अवस्थामा केहि समयदेखि उद्योगी एवं ब्यापारीहरुले बिजक गाडि धनिको तर्फबाट काट्न नमानेकाे पत्रकार भेटघाटमा कम्पनी अध्यक्ष गाेकर्ण प्रसाद पराजुलीले बताए ।
हाल सवारी साधनले मूल्य अभिवृद्धि कर विना मालसामान लोड गरे मात्र ढुवानी गर्न पाउने नत्र मालसामान लोड गर्न नपाउने अबस्था उद्याेगी व्यपारीले श्रृजना गरेकाे भन्दै कम्पनीले त्यसकाे विराेध गरेकाे हाे । यस्ताे अवस्थगाले मूल्य अभिवृद्धि करमा दर्ता भएका सावरी साधन सचालनमा अवराेध भएकाेले सवारी धनीकाे तर्फबाट पूर्ण रुपमा मूल्य अभिवृद्धि कर विजक जारी गर्दै ढुवानी व्यवस्था लागू गर्ने वातावरण तयार गरिदिन समेत सम्बन्धित निकायमा अनुराेध गरिएकाे छ ।
सम्बन्धित निकायबाट मूअकरको विजक शतप्रतिशत लागु गराउने व्यवस्था नगरिए सवारी धनीले आन्तरीक राजश्व कार्यालयमा दर्ता गराएका मूअकर प्रमाणपत्रहरु खारेज गर्ने ब्यवस्था हुनु पर्ने भन्दै पराजुलीले ध्यानाकर्षण समेत गराएका छन् । पराजुलीले जारी गर्नु भएकाे बिज्ञप्तीमा सम्पूर्ण सवारी धनी धनिहरुलाई मूअकरको विजक जारी गरी मात्र मालसामान ढुवानी गर्न समेत अनुरोध गरिएकाे छ ।
