दक्षिण एसियाको मानव निर्मित पहिलो सुरुङ मार्गमा प्रवेश खुला
Tags: No Comments
मकवानपुर । मकवानपुर र बारा जिल्लाको सिमानामा पर्ने दक्षिण एसियाकै पहिलो मानव निर्मित सुरुङमार्ग पुनर्निर्माण सकिएको १७ महिनापछि स्थानीय सरकारलाई हस्तान्तरण गर्दै सर्वसाधारणको लागि खुला गरिएको छ ।
बागमती प्रदेशको राजधानी हेटौंडा उपमहानगरपालिका वडा न १५ मा पर्ने चुरियामाई सुरुङमार्ग पुनर्निर्माण कार्य २०८० साउन २२ गते सकिएको थियो । सुरुङमार्ग पुनर्निर्माणको लागि २०७८ साउन १४ गते शिलान्यास गरिएको थियो । आइतबार प्रदेशको भौतिक पूर्वाधार मन्त्रालयले हेटौंडा उपमहानगरपालिकालाई हस्तान्तरण गरेको हो ।
राजधानी काठमाडौंलाई मकवानपुरको हेटौंडा हुँदै तराई जोड्न चन्द्र शम्मशेरको पालामा निर्माण गरिएको चुरियामाई सुरुङ मार्ग पुनर्निर्माणपछि अब सर्वसाधारणले तोकिएको शुल्क तिरेर वारपार गर्न पाउने छन् ।
प्रदेशको पहिलो मुख्यमन्त्री डोरमणी पौडेल, हालका मुख्यमन्त्री बहादुर सिंह लामाको उपस्थितीमा भौतिक पूर्वाधार मन्त्री अमन मास्केले हेटौंडा उपमहानगरपालिका प्रमुख मिना कुमारी लामालाई चावि हस्तान्तरण गरे । सुरुङ मार्गको भने प्रदेशको पहिलो मुख्यमन्त्री पौडेलले रिवन काटेर उद्घाटन गरेका थिए । यो ऐतिहासिक सुरुङ मार्गको एउटा खण्ड करिब ४० मिटर भत्किएको थियो । त्यसलाई मर्मत गरेर वारपार गर्न सक्ने बनाइएको हो ।
ऐतिहासिक यो यो सुरुङ मार्गमा २०२० सालसम्म सवारी नै आवतजात हुने गर्दथे । अहिले यसलाई पर्यटकीय स्थलको रुपमा विकास गर्न लागिएको पौडेलले बताए । “यो सुरुङमार्ग पर्यटकीय र अध्ययन थलो हो” पौडेलले भने “अवलोकन र पर्यटकीय केन्द्रको रुपमा विकास गर्ने योजना प्रदेश सरकारको थियो ।”
चुरियामाई सुरुङ विक्रम संवत १९७४ मै बनेको थियो । नेपालका प्रथम स्नातक इन्जिनियर भनिने ब्रिगेडियर जनरल डिल्लीजंग थापाले ५ सय मिटर लम्बाइको यो सुरुङ मार्ग डिजाइन गरेका थिए । चुरे पर्वतमा बनेको यो सुरुङ मार्ग साढे २ मिटर चौडाइ, ३ मिटर उचाइ र ५०० मिटर लम्बाइको छ । जसको एकापट्टिको भाग पुरिएपछि मार्गको करिब २ सय ८० मिटर मात्र बाँकी रहेको थियो ।
माटो, इँटा, चुना र सुर्की प्रयोग गरी निर्माण गरिएको यो सुरुङ मार्गबारे स्वीस भूगर्भविद टोनी हेगनले आफ्नो पुस्तक “दी हिमालयन किंडम अफ नेपाल”मा पनि चर्चा गरेका छन् ।
राणाकालमा रक्सौलबाट बाराको अमलेखगञ्जसम्म रेल चल्थ्यो, त्यहाँबाट मकवानपुरको भीमफेदीसम्म बनाइएको सडकमार्गमा चुरे पहाड छिचोल्दै हेटौंडा छिर्न समस्या थियो । चुरे पर्वत फोरेर घुमाउरो बाटो बनाउनुको विकल्पमा यो सुरुङमार्गबाट सीधा मार्ग खनेर गाडी चलाइएको थियो । यही सुरुङ मार्ग हुँदै चल्ने गाडीहरुले मकवानपुरको तत्कालिन सदरमुकाम भीमफेदीसम्म समान ल्याउँथे । काठमाडौंसम्म जोडिने सडक नभएकाले भीमफेँदीबाट भरिया लगाएर काठमाडौंसम्म सामान भित्राइन्थ्यो ।
प्रजातन्त्र पुनस्र्थापनापछि त्रिभुवन राजपथ बन्यो । त्यस बीचमै यो सुरुङ मार्गको बीच खण्डमा विष्फोट गराएर भत्काएर त्यसैमाथि सडक बनाइएको थियो । २०७२ सालको भुकम्पले यसका अझै बढी क्षति गराएपछि सुरुङमार्ग गुमानाम बन्दै आएको थियो । प्रदेश सरकारले त्रिभुवन राजपथको बक्स कटिङ रोडदेखि दक्षिणतिरको भागमा धसिएको स्थान मर्मत गरेर सुरुङ मार्ग खुलाइएको हो ।
पुरानो सुरुङ मार्गको २० मिटर जति भाग धसिएको अनुमान गरी मर्मतका लागि डीपीआर निर्माण गरिएको थियो । तर मर्मत सुरु गरेपछि ४० मिटर भाग धसिएको पाइएको थियो । यसैगरी सुरुमा १९८ मिटर लम्बाइमा पुनर्निर्माण गर्नुपर्ने पूर्वानुमान भए पनि मर्मत गर्दै जाँदा २२२ मिटर लम्बाइमा निर्माण गरिएको हो ।
३ करोड ३६ लाख १३ हजार रुपैयाँको लागतमा माउन्टेन इन्फ्रा कन्स्ट्रक्सनले २०७७ साल वैशाखमा सुरुङ मार्ग पुनर्निर्माणको ठेक्का पाएको थियो । सुरुमा एक वर्षभित्र निर्माण सम्पन्न गर्ने गरी सम्झौता भए पनि कोरोना महामारी, प्राविधिक कठिनाइ देखाउँदै दुई पटक म्याद थपेर काम गरिएको हो ।
हेटौंडा उपमहानगरपालिका र बारा जिल्लासम्म सीमा जोडिने चुरियामाई मन्दिरमा बनाइएको सुरुङ भग्नावशेष थियो । बागमतीका पूर्वमुख्यमन्त्री डोरमणि पौडेलको पालामा ऐतिहासिक चुरियामाई सुरुङको पुनर्निर्माण थालिएको थियो । २०७८ साउनमा थालिएको पुनर्निर्माण २०८० जेठमै वारपार गर्न मिल्ने बनाइएको थियो । १०६ वर्ष पुरानो सुरुङ पुनर्निर्माणसँगै एक अर्को इतिहास सुरु भएको प्रदेशका मुख्यमन्त्री बहादुरसी लामाले बताए ।
कार्यक्रममा जितपुर सिमरा उपमहानगरपालिकाका प्रमुख राजन पौडेलले भारतीय सिमानाको नजिकै रहेको सुरुङ मार्ग पर्यटकीय संभावना रहेको बताए । हस्तान्तरणपछि सुरुङलाई पर्यटकीय स्थलको रुपमा सञ्चालन गर्न उपमहानगरपालिकाले सहकार्य र समन्वय गर्ने पौडेलले बताए ।
अवलोकन शुल्क कति ?
उपमहानगरपालिकाले चुरियामाई सुरुङलाई पर्यटकीय स्थलका रुपमा सञ्चालन गर्न कार्यविधि निर्माण गरिसकेको छ । उक्त कार्यविधिमा सुरुङ अवलोकन गर्न आउने नेपालीलाई ५० रुपैयाँ र विदेशीलाई १२० रुपैयाँ शुल्क लाग्ने उल्लेख छ । विद्यार्थीहरुलाई २० रुपैयाँ प्रवेश शुल्क लाग्ने छ । पाँच वर्ष मुनिका बालबालिका, अपा· र जेष्ठ नागरिकले निःशुल्क अवलोकन गर्न पाउने छन् ।
चुरियामाई सुरुङ सञ्चालन कार्यविधि बनाएर उपमहानगरले पर्यटकीय स्थलको रुपमा विकसित गर्नेगरी अगाडि बढेको उपमहानगरपालिकाका प्रवक्ता तथा १ नम्बर वडा अध्यक्ष सविन न्यौपानेले जानकारी दिए । उपमहानगरपालिकालाई हस्तान्तरण भएपछि सम्बन्धित समितिलाई नै सञ्चालनका लागि हस्तान्तरण गर्न सक्ने कार्यविधि नगरपालिकाले बनाएको छ ।
राणा प्रधानमन्त्री श्री ३ चन्द्र शम्शेरको पालामा वि.सं. १९७४ सालमा नेपाली सेनाका इञ्जिनियर डिल्लीजंग थापाले सुरुङमार्ग निर्माण गरेका थिए । नेपाली प्रविधि प्रयोग गरेर थापाले सुरुङमार्ग निर्माण गराएका थिए । करिब ५ सय मिटर लामो सुरुङ हुँदै मकवानपुरतर्फबाट प्रवेश गरेर बारा पुगिन्थ्यो । त्यतिबेला भारतबाट भीमफेदी हुँदै काठमाडौं पु-याउने साना सवारीसाधन ल्याउन सुरुङ बनाइएको थियो ।
हेटौंडामा सहकारी उत्पादन सामग्री प्रदर्शनी हुने
Tags: No Comments
मकवानपुर । मकवानपुरको हेटौंडामा सहकारी र सहकारी संस्थाका सदस्यबाट उत्पादित सामग्रीको प्रदर्शनी तथा बिक्री मेला हुने भएको छ ।
‘उत्पादन, बजारीकरण तथा लगानीको आधार, उद्यम प्रवर्द्धन हाम्रो पूर्वाधार’ भन्ने नाराका साथ हेटौंडामा आगामी १६ पुसदेखि १८ पुससम्म हेटौंडामा प्रदर्शनी तथा बिक्री मेला हुने भएको हो । जिल्ला बचत तथा ऋण सहकारी संघ मकवानपुरको आयोजनामा हेटौंडा २ स्थित संघको आफ्नै भवन परिसरमा सामाग्री प्रदर्शनी तथा बिक्री मेला हुनेछ ।
सहकारी मार्फत उद्यम गर्ने सदस्यलाई प्रोत्साहन गर्ने तथा सहकारीका व्यवसायी सदस्यको व्यवसाय प्रवर्द्धन गर्ने उद्देश्यका साथ प्रदर्शनी मेला आयोजना गरिएको संघले आइतबार पत्रकार भेटघाट आयोजना गरी जानकारी दिएको छ । मेलाले उत्पादक र उपभोक्ता बीच पुलको रुपमा काम गर्ने र सहकारीका सदस्यको उत्पादनको बजार प्रवर्द्धन गर्ने विश्वास लिइएको संघकी अध्यक्ष कल्पना श्रेष्ठले बताइन् ।
मेलामा कृषि सहकारीका साथै बहुउद्देश्यीय कृषि सहकारीहरुले समेत उत्पादन गरेका हस्तकला सामग्री, खाद्य सामाग्री, मसला सामग्री, डेरी परिकारसहित करिब ४० वटा स्टल रहने बताइएको छ । तीन दिनसम्म सञ्चालन हुने प्रदर्शनीमा करिब १० हजार जनाले अवलोकन गर्ने अनुमान गरिएको छ ।
सहकारीले बचत र ऋणकाे काराेवार मात्र गरिरहेकाे नभै सहकारी मार्फत उद्यममा पनि कार्य गरिरहेकाे छ भन्ने सन्देश दिनका लागि मेला आयाेजना गर्न लागेको उनले बताईन । मेलामा सरिखेतको खाेरियामा छरेकाे मासकाे दाल, काेगटेको सिस्नोकाे पिठाे, मार्खुको मकैकाे खाेस्टाबाट बनेकाे चकटी लगायतका स्थानीय उत्पादनको प्रदर्शनी रहने छन् ।
संघकाे २० ओै स्थापना दिवसकाे अवसरमा हुने प्रदर्शनी तथा मेलामा विविध कार्यक्रम समेत हुनेछ । १६ गते हाजिर जवाफ प्रतियाेगिता, १७ गते सहकारी शिर्षकमा वक्तृत्वकला तथा +२ स्तरीय सहकारी निबन्ध प्रतियाेगिता र १८ गते नवनिर्मित भवनकाे उद्घाटन तथा मेलाकाे समापन गरिने श्रेष्ठले जानकारी दिइन ।
संघको आफ्नै भवन
जिल्ला बचत तथा ऋण सहकारी संघको २ तले भवन निर्माण गरिएको छ ।
१८ पुसमा संघकाे स्थापना दिवसकाे दिन नवनिर्मित भवनकाे बागमती प्रदेशका पहिलो मुख्यमन्त्री डाेरमणि पाैडेलले उद्घाटन गर्ने भएका छन् । संघले १ कठ्ठा १४ धुर जग्गामा दुई तले भवन निर्माणकाे लागि २ करोड ५ लाख खर्च भएको जनाएको छ ।
उक्त भवन निर्माणको लागि बागमती प्रदेश सरकारले ३३ लाख, बकैया गाउँपालिकाले ७ लाख, मनहरी गाउँपालिकाले ५ लाख, इन्द्रसराेवर गाउँपालिकाले २ लाख र थाहा नगरपालिकाले २ लाख रुपैया सहयाेग गरेको अध्यक्ष श्रेष्ठले बताइन् ।
मकवानपुर । मकवानपुरकाे हेटौंडा उपमहानगरपालिका वडा नम्बर ५ माछा प्लान नजिकै सवारी दुर्घटानमा हुँदा ५ जना घाइते भएका छन् । घाइते मध्ये १ जनाको अवस्था गम्भीर रहेकाे मकवानपुर प्रहरीले जनाएकाे छ ।
शनिबार बेलुका माछा प्लानस्थित कान्तिलोकपथ सडक खण्डमा चौघडा तर्फबाट हेटौडा बजार तर्फ आउदै गरेको प्र.३-०२-०० ८ प २६२८ नम्बरको मोटरसाईकल र हेटौडा बजारबाट चौघडा बजार तर्फ जादै गरेको बा.प्र.०३-००५ प ५१६९ नम्बरको स्कुटर एक आपसमा ठक्कर खाई दुर्घटना हुँदा ५ जना घाइते भएकाे जिल्ला प्रहरी कार्यालय मकवानपुरले जनाएकाे छ ।
जिल्ला प्रहरी कार्यालय मकवानपुरका अनुसार दुर्घटनामा स्कुटर चालक मकवानपुर हेटौडा १७ हटिया बस्ने ३४ वर्षीय रोहित तामाङ गम्भीर घाइते भएका छन् । उनकाे टाउको र दाहिने खुट्टामा चोट लागेकाे छ । उनलाई थप उपचारको लागी सीएमसी नयाँ मेडिकल कलेज भरतपुर रिफर गरिएकाे प्रहरीले जनाएकाे छ । यसैगरी स्कटर पछाडी सवार रोहीतकी श्रीमति २८ वर्षीय रमिला तामाङको दाहिने खुट्टामा चोट लागि घाइते भएकी छिन् भने निजहरुकाे छोरा ८ वर्षीय रोजन तामाङ मुख र दाहिने खुट्टामा चोट लागेकाे छ । दुवै जनाकाे अवस्था मध्यम रहेकाे प्रहरीले जनाएकाे छ ।
यस्तै मोटर साइकल चालक हेटौडा ३ बसामाडी बस्ने ३५ वर्षीय गोपी तामाङको टाउको र आँखाको भागमा चोट लागि घाइते भएका छन् । प्रहरीका अनुसार उनकाे अवस्था मध्यम रहेकाे छ । मोटर साइकल पछाडी सवार हेटौडा १९ नेवारपानी बस्ने ३० वर्षीय बिष्णु प्रजा घाइते भएका छन् । उनकाे बाँया आँखाको निधार, मुख र दाहिने हातमा चोट लागेकाे छ भने अवस्था मध्यम रहेकाे प्रहरीले जनाएकाे छ । घाइतेहरुकाे हेटौंडा अस्पतालमा उपचार भइरहेकाे बताइएकाे छ ।
२६२८ नम्बरको मोटरसाईकल र ५१६९ नम्बरको स्कुटर ठक्कर खाई दुर्घटना भएकाे समयमा चौघडा तर्फबाट हेटौडा बजार तर्फ आउदै गरेको ना ७ ख ४२९५ नम्बरको ट्रकको (ट्रेलर खालको) बम्परको भाग मुनी २६२८ नम्बरको मोटरसाईकल परेकाे थियाे । मोटर साइकल, स्कुटर र ट्रक तथा ट्रक चालक हेटौंडा १३ पदम पोखरी बस्ने अन्दाजी २९/३० वर्षीय सुकराम घलान जिल्ला प्रहरी कार्यालय मकवानपुरको नियन्त्रणमा रहेको छ ।
काठमाडौं । बागमती प्रदेशका प्रदेश प्रमुख दीपक प्रसाद देवकाेटाले देशकै पुरानो र मौलिक संस्कृति भजन तथा चुड्का भएकाे बताएका छन् । राष्ट्रिय लोक भजन चुड्का संरक्षण प्रतिष्ठान नेपालकाे केन्द्रीय बार्षिक साधारणसभा तथा बागमती प्रदेश कमिटीको प्रथम अधिवेशनमा उनले यस्तो बताएका हुन् ।
देशको पुरानो र मौलिक संस्कृतिको रूपमा रहेको भजन तथा चुड्काको जगेर्नामा अहोरात्र खटिने मौलिक संस्कृति उथ्थानको पहरेदार संस्थाको कार्यक्रममा उपस्थिति हुन पाउँदा गौरवको महसुस भएको प्रदेश प्रमुखले बताए । ‘२०६७ सालदेखि तपाईंहरू अनवरतरूपमा मौलिक एबम् लोपोन्मुख बाजागाजासङ्गै भजन संस्कृतिको संरक्षणमा लागिरहनुभएको छ’ उनले भने ‘माटाे र संस्कृति एक सिक्काको दुई पाटासरह हुन् । त्यसैले तपाईंहरुको कामको प्रसंशा जति गरेपनि कम हुन्छ, देशको असली राष्ट्रप्रेमी लोक भजन चुड्का संरक्षण प्रतिष्ठान रहेकाे छ ।’
‘भनिन्छ कुनै देशलाई ध्वस्त पार्नुछ भने उसको संस्कृतिबाट धावा बोल्न शुरु गरे हुन्छ’ उनले भने । ‘आफ्नो मौलिक पहिचान गुमाउँदै गर्दा हामी न घरको न घाटको बन्न पुग्छौं देवकाेटाले भने ‘आयातित सस्कृतिको अन्धनक्कलले हाम्रो मौलिक पहिचानलाई कुहिरोमा रुमल्ल्याएको छ ।’ हामीले यसबाट आफूलाई र युवा पुस्तालाई जोगाउनु पर्ने उनकाे भनाई थियाे । ‘विश्वब्यापीकरणको अर्थ आफ्नो मौलिक पहिचानलाई तिलान्जली दिनु कदापि होइन । हामीले बिबिधताको सम्मान गर्दै आफ्नो मन , मस्तिष्क र मुटुमा आफ्नो मौलिक पहिचानलाई सजाउनुपर्छ’ उनले भने । आखिर यो मन त नेपाली नै हो , होइन र ? भन्दैं उने प्रश्न गरे ।
हाम्रा सत्तल , पाटी, पूजापाठ, चाडपर्व, धार्मिक सास्कृतिक कार्यक्रम शंख, मुजुरा, खैजडीजस्ता थुप्रै बाद्ययन्त्रको ध्वनिसहित् भजन चुड्का गुन्जायमान हुँदा माहोल रमाइलो हुने उनले बताए । ‘भजन चुड्कामा यस्तो जीबन्तता छ जसले हामीलाई शान्त, उत्प्रेरित, संस्कारी, सभ्य र सकारात्मक बनाउँछ’ उनले भने ‘यसमा सन्देश छ, अनुशासन छ, मेलमिलाप छ, कर्तव्य छ र सौन्दर्यता छ । सङ्गीतले मान्छेलाई जोड्छ र सुखी जिवनको आधार तयार पार्दछ ।’
प्रदेश प्रमुख देवकाेटाले हामीले आफूद्वारा आफैंलाई जोगाउनुपर्ने बताए । भजन चुड्कामा रहेको बिशिष्टतालाई जीवनयापनको साथी बनाउनु पर्ने उनले बताए । ‘सुख र दुःखको साथी हाम्रो भजन चुड्का लगायत मौलिक संस्कृतिको संरक्षणमा राज्यका निकायहरू, संस्थाहरू, नागरिक समाज तथा हरेक तह र तप्काका ब्यक्तिहरू एकजुट भएर लाग्नुपर्छ’ उनले भने । धार्मिक तथा जुनसुकै सास्कृतिक कार्यक्रमहरूमा भजन, चुड्कालाई अनिबार्य समावेश गरिनु पर्ने तथा यसको व्यापक प्रचारप्रसार गर्नु पर्ने उनले बताए । ‘धार्मिक होस् वा अन्य अवसरमा मौलिक बाजासहित सुरिलो स्वरमा भजन चुड्काको प्रस्तुतिले वरपरको बाताबरणनै रौनकताले गुन्जिन्छ’ उनले भने ‘हाम्रा भजन, चुड्काहरू रोगनाशक औषधिसरह हाम्रो शरीर र मनलाई आरोग्य प्रदान गर्छन् ।’
प्रदेश प्रमुखले राष्ट्रिय लोक भजन चुड्का संरक्षण प्रतिष्ठानका अध्यक्ष नारायण प्रसाद खनाल “लेकाली ” लगायतकाे समूहलाई मौलिक सस्कृती जगेर्नाको अभियानमा गरिएका उत्कृष्ट कार्यकाे बधाई दिदै अभियान निरन्तरताको शुभकामना दिएका छन् । यो महाअभियानमा आफ्नाे पूर्ण साथ र सहयोग रहने प्रतिबद्धता समेत उनले व्यक्त गरे ।
कार्यक्रममा उत्कृष्ट भजन चुड्का र बाद्यबाजनको बेजोड प्रस्तुति रहेको थियो भने इन्द्रेणी कार्यक्रमका कृष्ण कंडेललगायतलाई सम्मान समेत गरिएको प्रतिष्ठानाका अध्यक्ष नारायण प्रसाद खनाल ‘लेकाली’ ले जानकारी दिए ।
खुला कविता प्रतियोगितामा कास्कीका संजोग प्रथम
Tags: No Comments
मकवानपुर। राष्ट्रिय युवा कविता उत्सव–२०८१ अन्तरगत भएकाे खुला कविता प्रतियोगितामा संजोग बस्याल कास्की प्रथम भएकाे छ । मकवानपुरकाे हेटौंडामा शनिबार भएकाे खुला कविता प्रतियोगितामा बस्यालकाे ‘सावधान’ शिर्षककाे कविताले प्रथम स्थान हासिल गरेकाे हाे ।
प्रदेश युवा परिषद् बागमती प्रदेशको आयोजना तथा साहित्य सङ्गम मकवानपुरको सहकार्यमा आयोजित प्रतियोगितामा प्रथम भएका बस्यालले ४० हजार रुपैंयाकाे पुरस्कार प्राप्त गरे । यसैगरी प्रतियोगितामा कास्कीका कवि सुदर्शन पौडेलकाे कविता घर नफर्किएको छोराको सम्झनामाले द्वितीय भएकाे छ । पौडेलले ३० हजार रुपैंया हात पारे । उदयपुरकी सुमी पोखरेलकाे समयदर्शक यन्त्रको पर्दा नियाल्दा तृतीय भयो । कवि पोखरेल तृतीय हुँदै २० हजार रुपैंया हात पारिन् । प्रतियोगितामा कवि महेश कठायतले सान्त्वना पुरस्कार प्राप्त गरे । बझाङका कवि कठायतकाे देश शिर्षककाे कविता सान्त्वना हुदै १० हजार रुपैंया प्राप्त गरे ।
खुला कविता प्रतियोगिताकाे लागि देशभरबाट २ सय २३ कविता प्राप्त भएका थिए । प्राप्त कविता मध्ये मूल्याङ्कन समितिले उत्कृष्ट २० कविता छनोट गरि नामावली सार्वजनिक गरेकाे थियाे । प्रदेश युवा परिषद् बागमती प्रदेशको आयोजना तथा साहित्य सङ्गम मकवानपुरको सहकार्यमा आयोजित राष्ट्रिय युवा कविता उत्सव २०८१ मा उत्कृष्ट २० वटा कविता स्वयं कवि उपस्थित भई वाचन गरिएकाे थियाे ।
उत्कृष्ट २० मा पर्न सफल कविता र कविहरूको नामावली वर्णानुक्रमानुसार प्रकाशन गरिएको थियाे । प्रतियोगितामा विजेता कवि तथा कविताका अलावाका उत्कृष्ट २० मा अग्रिमा शिवाकोटी मकवानपुरकाे रित्तिदैछ ‘देश’, अभिषेक ओझा बाराकाे ‘विसंवाद’, कुष्मा लौडारी मकवानपुरकाे ‘डिजिटल संसारको मायाजाल’, तारानाथ पराजुली पर्वतकाे ‘पागल प्रकृतिप्रेमीको बयान’, दीपिन सिंजापति दैलेखकाे ‘आकाङ्क्षा’, प्रदीप कोइराला तनहुँकाे ‘म’, बाबुराम श्रेष्ठ यात्री सिन्धुलीकाे ‘आमा, देश र माटो’, भरत थापा धनकुटाकाे ‘हर्कमाया दर्जी र झन्डाको व्यापार’, भीमप्रसाद खतिवडा अनुराग दोलखाकाे ‘जीवन एक पाठशाला’ शिर्षककाे कविता छानिएकाे थियाे ।
यसैगरी रञ्जिता अधिकारी धादिङकाे ‘परिवर्तन लेख्ने हातहरु’, राजु झल्लु प्रसाद धादिङकाे ‘खिया’, रुपा ढुङ्गेल मकवानपुरकाे ‘म शिक्षा मन्त्री भए’, सिजन श्रेष्ठ संखुवासभाकाे ‘उर्वशी’, सुन्दर शिरिष सिन्धुपाल्चोककाे ‘जहाज चढ्न मन छैन आमा’, सुबास सजल मकवानपुरकाे ‘डरलाग्दो अन्त्य मानव सभ्यताको’,सुमित्रा सुमी नुवाकाेटकाे ‘बुद्ध आऊ’ शिर्षकका कविता छनोटमा परेकाे थियाे ।
युवालाई उद्यम व्यवसाय गर्न प्रोत्साहित गर्नुपर्छः मन्त्री महर्जन
बागमती प्रदेशका युवा तथा खेलकुद मन्त्री मीनकृष्ण महर्जनले युवालाई उद्यम व्यवसाय सञ्चालन गर्न प्रोत्साहित गर्नुपर्ने बताएका छन् । प्रदेश युवा परिषद्ले हेटौंडामा आयोजना गरेको ‘राष्ट्रिय युवा कविता उत्सव २०८१’ को उद्घाटन गर्दै मन्त्री महर्जनले यस्तो बताएका हुन् ।
युवा जनशक्तिलाई विदेश पलायन हुनबाट रोक्न प्राविधिक तथा व्यावसायिक शिक्षा र सीप उपलब्ध गराउनेतर्फ सरकारको ध्यान केन्द्रित हुनुपर्ने उनले बताए । ‘आफू खेलकुद क्षेत्रबाट आएकोले युवाहरुको भावना र मर्म बुझ्छु, विषयगत ज्ञान पनि छ तर, म मन्त्री नियुक्त हुँदा बजेट बनिसकेको थियो जुन युवाका लागि पर्याप्त छैन’ उनले भने । हामीले युवाहरुको क्षेत्रमा उल्लेख्य काम गर्न सकिरहेका छैनौँ । फलस्वरुप युवाहरुलाई स्वदेशमा टिकाउनै मुस्किल भएकाे उनले जानकारी दिए ।
त्यसैगरी परिषद्का कार्यकारी उपाध्यक्ष सन्तोष चौलागाईंले युवाहरुलाई नेतृत्व, व्यक्तित्व विकाससँगै रचनात्मक, सिपमुलक तालिमसँग जोड्न सहयोग समन्वय गरिने बताए । उनले भने ‘सकारात्मक सोचसँगै कार्यसँग जनसंख्याकाे ४३ प्रतिशत युवा जनशक्तिलाई जोड्न सके विद्यमानमा रहेका धेरै समस्या समाधान हुनेछ ।’
कवि मोमिलाका एकल कविता वाचन
‘राष्ट्रिय युवा कविता उत्सव २०८१’ मा साहित्यकार मोमिला जोशीका कविता सुनिए । कवि मोमिलाले आफ्ना १० वटा कविता प्रस्तुत गरेकी थिइन् । कविले भाव समर्पण, प्रेम, पीडा, प्यास र पानी, सूर्य समय, एउटा लालीगुराँस हराएको बेला, मात्र एउटा हाँगा काटिने, दोभन प्रहारबाट, नगरबधुको वक्तव्य, हिउँदको प्रथम वर्षात्, उकालोमा मेरो तस्बिर, तिमी र म, भीमसेन थापाको सुसाइड नोट शिर्षकको कविता सुनाएकी थिइन् ।
राष्ट्रिय युवा कविता उत्सवका अवसरमा पुस्तक प्रदर्शनी समेत गरिएको थियाे । किताबघर हेटौंडाले पुस्तक प्रदर्शनीकाे व्यवस्थापन गरेकाे थियाे ।