मकवानपुरगढीमा ट्रिपर दुर्घटना, चालकको मृत्यु
Tags: No Comments
मकवानपुर । मकवानपुर जिल्लाको मकवानपुरगढी गाउँपालिकामा ट्रिपर दुर्घटना हुँदा चालकको मृत्यु भएको छ ।
मृत्यु हुनेमा ट्रिपर चालक हेटौंडा उपमहानगरपालिका वडा नम्बर १५ रातोमाटेका २२ वर्षीय सुकदेव पाख्रिन रहेको जिल्ला प्रहरी कार्यलय मकवानपुरले जानकारी दिएको छ ।
पुस २६ गते राती जिल्ला मकवानपुरगढी १ बादरखोल्सीस्थित भित्रि सडकखण्डमा लेनडांडाबाट बादरखोल्सी तर्फ जादै गरेको बा.प्र-०३-००१ख१४८९ नम्बरको ट्रिपर आफै अनियन्त्रित भई रोडबाट १ सय ५० मिटर तल खस्दा चालक घाइते भएका थिए ।
उनलाई तत्काल उद्दार गरी उपचारको लागि हेटौडा अस्पताल ल्याइएकोमा डाक्टरले मृत्यु घोषणा गरेको प्रहरीले जनाएको छ । प्रहरीका अनुसार दुर्घटनाको समयमा चालकको पहिचान नभएकोमा अस्पतालमा उनका दाइले सनाखत गरेका थिए ।
मकवानपुर । बागमती प्रदेश सरकारका आन्तरिक मामिला तथा कानूनमन्त्री गंगानारायण श्रेष्ठले भ्रष्टाचारीलाई सामाजिक रूपमै बहिष्कार गर्नु पर्ने बताएका छन् । विहीबार अख्तियार दुरुपयोग अनुसन्धान आयोगको कार्यालय हेटौंडाद्वारा आयोजित भ्रष्टाचार नियन्त्रण तथा सुशासन प्रवर्द्धन विषयक अन्तरक्रियामा उनले उक्त कुरा बताएका हुन् ।
सरकारका प्रवक्ता समेत उनले भ्रष्टाचार राजनीतिक नेतृत्व र कर्मचारीतन्त्रलगायत सबैतिर फैलिएको बताए । भष्ट्राचार नियन्त्रण विना देशकाे विकास नहुने भएकाेले भ्रष्टाचार नियन्त्रण र सुशासन कायम गर्न उच्च नेतृत्वले जीवन व्यवहारमा परिवर्तन गर्दै नैतिकता कायम राख्नु पर्ने उनले बताए । ‘देश र जनताको सेवा नै पवित्र कर्म मान्दै काम गर्नुपर्छ मन्त्री श्रेष्ठले भने ‘भ्रष्टाचारलाई अपराध सरहकै कर्मको रुपमा लिनु पर्छ ।’ पदलाई शक्तिको स्रोत ठान्ने मान्यता बदल्न सके गलत काम कम हुने उनकाे भनाई थियाे ।
अख्तियार दुरुपयोग अनुसन्धान आयोगको कार्यालय हेटौंडा प्रमुख उमाकान्त आचार्यले कार्यपत्र प्रस्तुत गर्दै कार्यालयमा प्रतिदिन १ सय वटा उजुरी प्राप्त हुने गरेकाे जानकारी दिए । स्थानीय तहसँग सम्बवन्धित सार्वजनिक निर्माणका कार्य सम्बन्धी उजुरी प्राप्त हुने गरेकाे बताउँदै आचार्यले सार्वजनिक खरिद ऐनले तोकेका काम उपभोक्ता समितिलाई दिइने गरेकाे बताए । उपभोक्ताले गर्न नसक्ने प्राविधिक प्रकृतिका र हेभि इक्विपमेण्ट चाहिने काम, तोकिएको सीमाभन्दा बढी रकमको आयोजना उपभाेक्ता समिति मार्फत गरिएकाे पाइएकाे उनले जनाकारी दिए ।
यसैगरी कुनै सरकारी पदमा रहेको व्यक्तिलाई उपभोक्ता समितिमा राखिएको, जनप्रतिनिधिले श्रीमान/श्रीमतीलाई उपभोक्ता समितिको अध्यक्ष बनाएको, उपभोक्ता समितिले जिम्मा लिएको काम निर्माण व्यवसायीबाट गराउने गरेकाे उजुरी प्राप्त हुने गरेकाे प्रमुख आचार्यले बताए । अख्तियार हेटौडा कार्यालयमा विद्यालयहरु र सामुदायिक वन उपभोक्ता समूहहरुवाट सार्वजनिक खरिदको सामान्य प्रक्रिया पनि पुरा नगरी भवन लगायतका संरचना निर्माण कार्य हुने गरेकाे सम्बन्धी उजुरी समेत प्राप्त हुने गरेकाे छ ।
यस्तै प्राविधिक र निर्माण व्यवसायीको मिलेमतोमा पहिले गरिसकेको काम वा कुनै निकायले गरेका काम समेतलाई नाप जाँच गरी दोहोरो भुक्तानी दिएको, स्वीकृत आयोजनाको कुनै काम नगरी सम्पूर्ण रकम नक्कली कागजात बनाई मिलेमतोमा बजेट हिनामिना गरेको, फर्जी बिल भर्पाई पेश गरी भ्रष्टाचारजन्य कार्य गरेको लगायतकाे उजुरी समेत प्राप्त हुने गरेकाे उनले प्रस्तुत गरेकाे कार्यपत्रमा उल्लेख छ । ठेक्कमा दिनुपर्ने कामलाई टुका पारी कोटेसनमा काम गराइएको, आयोजना सम्पन्न नगरी सम्झौता विपरीत अधुरो काम छोडेर अलपत्र पारिएको समेत उजुरी प्राप्त भएका छन् ।
नियम विपरीत हुने गरी करार सम्झौता गरी कर्मचारी राखिएकाे, कर्मचारी भर्ना गर्न लिइएको जाँच पारदर्शी नभएको, आफ्ना मान्छेलाई जागिर दिने उद्देश्यले स्वीकृत दरवन्दी भन्दा बढी कर्मचारी करारमा राखी बजेटको दुरुपयोग गरेकोलगायतका उजुरी समेत प्राप्त हुने गरेकाे प्रमुख आचार्यले बताए । कर्मचारी नियुक्ति गर्दा जालझेल गरी अपूर्ण प्रतिस्पर्धा गराइएकाे, नियमानुसार नियुक्ति पाउनेलाई बहाना गरी पन्छाएर त्यस पछिको लाई नियुक्ति दिएको, दरबन्दी विपरीत घुस लिएर मान्छे राखिएको समेत उजुरी प्राप्त हुने गरेकाे उनले जनाकारी दिए ।
अन्तरक्रियामा प्रदेश मन्त्रीहरु मसिना खड्का र लक्ष्मण लम्साल, जिसस मकवानपुर प्रमुख ललित बहादुर घलान, प्रदेश मुख्य सचिब घनश्याम उपाध्याय,अख्तियार दुरुपयोग कार्यालय टंगालका सह न्यायधिवक्ता कृष्ण मोहन कोइराला, प्रदेश सांसद प्रेमबहादुर पुलामी, प्रमुख जिल्ला आधिकारी सुर्यप्रसाद सेडाई, नागरिक निगरानी संस्था अध्यक्ष केदार चौलागाईंलगायतकाे उपस्थिति रहेकाे थियाे ।
मकवानपुर । बागमती प्रदेश सरकारले आफ्नो एकवर्षे कार्य प्रगति बुधबार पत्रकारसम्मेलन गरी सार्वजनिक गरेको छ । गत २५ पुस २०७९ मा कार्यभार सुरु गरेको प्रदेश सरकारले एक वर्ष पुगेको उपलक्षमा प्रगती विवरण सार्वजनिक गरेको हो ।
मुख्यमन्त्री शालिकराम जम्कट्टेल नेतृत्वको सरकारले गरेको कामको प्रगति सार्वजनिक गरिरहँदा अघिल्लो कार्यकालयमा भएका कार्यलाई पनि प्रगतिकै रुपमा राखिएकाे देखिएकाे छ। कतिपय भौतिक प्रगति निराशाजनक भएको अवस्था देखिएका कामलाईसमेत प्रगति रिपोर्टमा समेटिएका छन् । तामझामका साथ आयोजिक प्रगति सार्वजनिक कार्यक्रममा प्रदेशका मुख्य सचिब घनश्याम उपाध्ययले सरकारको काम राम्रो रहेको प्रशांसा गरे । तर उपाध्याय मञ्चमा बोलिरहदाँ कर्मचारी वृत्तबाटै निराशाको लय गाइगुइ हलमै सुनिन्थ्यो ।
प्रदेश सरकारले एक वर्ष बिताउँदा जम्मा २४ पटक मात्रै मन्त्रिपरिषद् बैठक बसेकाे छ । जुन प्रायःजसो विवदीत नै बन्यो । यो बिचमा १ सय ३८ वटा निर्णय भएको मुख्य सचिव उपाध्यायले बताए । यो बिचमा प्रदेश सरकारले प्रदेश सभामा पेश गरेको ७ वटा ऐन जारी भएको छ भने ५ वटा नियमावली राजपत्रमा प्रकाशित भएको छ । प्रदेश सरकारको कार्य सरलीकरण तथा प्रभावकारी बनाउन निर्देशिका, कार्यविधि र मापदण्ड स्वीकृत भएको उपाध्यायले बताए ।
कुन कुन नीति, ऐन नियमावलीहरू जारी भए
यस अवधिमा प्रदेश श्रम तथा रोजगार नीति, २०८०, प्रदेश बालबालिकासम्बन्धी नीति, २०८०, मानव बेचबिखन ओसारपसार विरूद्धका संरक्षण नीति, २०८०, प्रदेश निजामति सेवा ऐन, २०७९, स्थानीय सेवा (गठन तथा सञ्चालन) ऐन, २०७९, प्रदेश सरकारी कामकाजको भाषा ऐन, २०८०, मदन भण्डारी स्वास्थ्य विज्ञान प्रतिष्ठान ऐन, २०७६ (संशोधन), सालबसाली विनियोजन तथा आर्थिक ऐनहरू, प्रदेश सञ्चार माध्यम व्यवस्थापन ऐन, २०७५ (संशोधन), प्रदेश मन्त्रालयहरूको कार्य विभाजनको परिमार्जनसहित प्रदेश सरकारको कार्य विभाजन नियमावली, २०८०, प्रदेश उच्च शिक्षा नियमावली, २०७९, प्रदेश प्राविधिक तथा व्यावसायिक शिक्षा एवम् तालिम परिषद् नियमावली, २०८० जारी भएका छन् ।
यसैगरी अन्य नीतिगत सुधारका कार्य पनि भएको मुख्यमन्त्री जमकट्टेलले जानकारी गराए । जसमा प्रदेश नीति तथा योजना आयोगद्वारा विषयगत विज्ञलगायत सरोकारवालासँग परामर्श गरी बागमती प्रदेशको दोस्रो आवधिक योजनाको अवधारणा पत्र तर्जुमा भएको, प्रदेश नीति तथा योजना आयोगद्वारा बागमती प्रदेशमा विश्वविद्यालय स्थापना अध्ययन प्रतिवेदन र कृषि क्षेत्रको नीतिगत, कानूनी र अवस्थासहितको विस्तृत प्रतिवेदन तयार भएको, बागमती प्रदेशको दिगो विकास लक्ष्यसम्बन्धी प्रदेशगत सार्वजनिक खर्चको खोजीनीति सर्वेक्षण, २०७९ तयार भएको छ ।
बागमती प्रदेशको विपद् पूर्वतयारी तथा प्रतिकार्य योजना, २०८० तयार पारिएको छ । कृषि, पशुपन्छी तथा मत्स्यको रूपान्तरणका लागि ४४ बुँदे प्रतिबद्धता सार्वजनिक गरिएको छ। कृषि विकासको सोचसहितको अध्ययन प्रतिवेदनले सिफारिस गरेका नीतिगत विषयहरू कार्यान्वयनका लागि कृषि तथा पशुपन्छी विकास कार्ययोजना तयार गरिएको जमकट्टेलले बताए ।
यस अवधिमा केही निर्देशिका, कार्यविधि, र मापदण्डहरू पनि स्वीस्कृत भएका छन् । सवारी चालक अनुमति पत्र परीक्षा सञ्चालन कार्यविधि, २०७७ (संशोधन) गरिएको छ । प्रदेशस्तरीय संयुक्त बजार व्यवस्थापन अनुगमन निर्देशिका, २०८० (संशोधन), सडक मर्मत सम्भार निर्देशिका, २०८०, मेला, महोत्सव, प्रदर्शनी सञ्चालन तथा व्यवस्थापन कार्यविधि, २०८०, प्रदेश गोदामघर व्यवस्थापन कार्यविधि, २०७९, सीपमूलक तालिम कार्यक्रम सञ्चालन कार्यविधि, २०७९, खरको छानामुक्त बागमती प्रदेश कार्यक्रम संचालन कार्यविधि, २०८० जारी गरिएको छ ।
यसैगरी चेपाङ, बनकरिया, माझी, बोटे एकीकृत बस्ती तथा आवास कार्यक्रम चितवन र धादिङ जिल्लालाई लक्ष्यित गरी कार्यविधि, २०८० बनाइएको छ । ज्यान जोखिममा परेका गर्भवती तथा सुत्केरी महिलाहरूका लागि निःशूल्क हवाई उद्धारसम्बन्धी कार्यविधि, २०८०, पर्यटन पूर्वाधार सञ्चालन तथा व्यवस्थापन कार्यविधि, २०८०, बागमती प्रदेश आयोजनाको बहुबर्षीय ठेक्कासम्बन्धी मापदण्ड, २०८०, हेभी इक्युपमेन्ट (निर्माण उपकरण) चालक अनुमतिपत्र जारी गर्नकालागि लिइने प्रयोगात्मक परीक्षा तथा अन्तरवार्ता परीक्षासम्बन्धी मापदण्ड, २०७९, प्रदेश विपद् कोष परिचालन कार्यविधि, २०८० ल्याइएको छ ।
प्रदेश सरकारले जनचेतनामूलक प्रचार सामग्री निर्माण, प्रसारण तथा वितरण कार्यविधि, २०८०, द्वन्द्वपीडितका लागि सवलीकरण कार्यक्रम कार्यान्वयन कार्यविधि, २०८०, यूवा सचेतना कार्यक्रम कार्यविधि, २०८० मौलिक चलचित्र निर्माण तथा प्रवर्द्धनमा सहयोग कार्यक्रम सञ्चालनसम्बन्धी कार्यविधि, २०८०, एक वडा एक कृषि, पशुपन्छी तथा मत्स्यजन्य उत्पादन कार्यक्रम कार्यान्वयन कार्यविधि, २०८० दुर्गम क्षेत्र विशेषज्ञ चिकित्सक प्रोत्साहन तथा विस्तारित अस्पताल सेवा सञ्चालनसम्बन्धी कार्यविधि, २०८० ल्याएको छ ।
वित्ततर्फको प्रगती
प्रदेश सरकारले गत एक वर्षमा वित्त तर्फ आर्थिक वर्ष २०७९/८० मा स्थानीय तहलाई कूल ४ अर्ब ६३ करोड रूपैयाँ बित्तीय हस्तान्तरण निकासा गरेको छ । २०८० साउनदेखि २०८० मसिरसम्म बाँडफाँटबाट प्राप्त हने राजस्व तर्फ ६ अर्थ ६० करोड, संघीय सरकारबाट प्राप्त अनुदानतर्फ ७ अर्ब ५६ करोड, प्रदेशको आफ्नो स्रोतबाट १ अर्ब ३७ करोड तथा बेरुजु र नगद मौज्दात गरी ६५ करोड ३३ लाख राजस्व संकलन भएको मुख्यमन्त्री जमकट्टेलले बताए ।
प्रदेश सरकारले बागमती सभ्यता शूल्क र नारायणी सभ्यता शूल्क खारेज गरेको छ । साथै केबुलकार, आकाशे सिसाको पुल र भ्युटावरमा मनोरञ्जन कर लाग्ने व्यवस्था गरिएको छ । सामुदायिक वन उपभोक्ता समितिले समिति बाहिर काठ तथा काठजन्य सामग्रीको बिक्रीबाट संकलन गर्ने राजस्वको बीस प्रतिशत प्रदेश सञ्चित कोषमा जम्मा गर्नुपर्ने व्यवस्था गरिएको छ ।
के भए पूर्वाधार तर्फ ?
बागमती प्रदेश सरकारले गत एक वर्षको अवधिमा २७२ किलोमिटरको पक्की तथा १५९ किलोमिटर ग्रावेलस्तरको सडक निर्माण तथा स्तरोन्नति गरेको दाबि गरेको छ । यसैगरी २६ वटा सडक पुल तथा ६ वटा झोलुंगे पुल निर्माण सम्पन्न भएको बताइएको छ ।
यसैगरी पर्यटकीय तथा ऐतिहासिक महत्व रहेको दक्षिण एसियाको पहिलो सुरूङ मार्गको रूपमा परिचित मकवानपुरको चुरियामाई सुरुङमार्ग मर्मत कार्य सम्पन्न भएको प्रदेश सरकारले जनाएको छ । यसैगरी २ वटा सरकारी, १७६ वटा सामुदायिक तथा अन्य भवन निर्माण, ६ वटा पार्क निर्माण सम्पन्न भएको छ । जनता आवास कार्यक्रमअन्तर्गत २५५ वटा व्यक्तिगत आवास निर्माण सम्पन्न भएको छ ।
३६४ किमि सडकको नियमित तथा ३७० किमि सडकको आवधिक तथा पटके मर्मत सम्भार भएको छ । बागमती प्रदेश सरकारको प्रशासनिक भवन निर्माणका लागि वातावरणीय अध्ययनको प्रक्रिया अघि बढेको छ ।
हेर्नुहाेस भिडियाे
चितवन । तनहुँ जिल्लाकाे देवघाटधाममा `मकर-काव्य-यामिनी´शृङ्खलाकाे कार्यक्रम हुने भएको छ । पवित्र धार्मिकस्थल,आध्यात्मिक क्षेत्र देवघाटधाममा अवस्थित ‘महेश-संस्कृत-गुरुकुलम्’को आयोजनामा पुस २९ गते आइतबार `मकर-काव्य-यामिनी´को २१ औँ शृङ्खला हुने भएको हाे ।
२०६० सालबाट निरन्तर सञ्चालन भइरहेको मकर-काव्य-यामिनी राष्ट्रियस्तरको काव्यिक महोत्सव हो । विभिन्न राष्ट्रियस्तरका कवि, साहित्यकार तथा विशिष्ट विद्वान्हरूको उपस्थिति रहँदै आएको कार्यक्रम पौष महिनाको अन्तिम साँझबाट माघ महिना पहिलो बिहानसम्म सञ्चालन हुने गरेको । मकर संक्रान्तिको पूर्व सन्ध्यामा सञ्चालन हुने भएकाले यस कार्यक्रमको नाम मकर-काव्य-यामिनी राखिएको आयोजक संस्थाले जनाएको छ । कार्यक्रममा विशिष्ट स्रष्टा एवं सम्पूर्ण काव्यप्रेमी साहित्यानुरागी दर्शक श्रोतालाई समेत निमन्त्रणा गरिएको छ ।
“देवघाट महाकाव्य ” “म र मेरा” र “महापुरुष” का स्रष्टा निराजन पन्त, छन्दकवि सुदेश सत्याल, कवि नगाधिराज लगायतका कवि तथा गजलकार स्रष्टा मकर काव्य यामिनीका उत्पादन भएकाे आयोजकले जनाएकाे छ । माघ १ गते देवघाटमा माघेसङ्क्रान्ति मेलामा तीर्थस्नान गर्नुपूर्व अघिल्लो रात काव्यपान गर्न पाउनुलाई सुवअवसरका रुपमा लिने गरिएको छ । देवघाट धार्मिक, आध्यात्मिक र शैक्षिक क्षेत्रका साथसाथै साहित्यिक क्षेत्रको उर्वर भूमिकाे रूपमा परिचित गराउन मकर-काव्य-यामिनी सफल भएको बताइन्छ ।
भवगाम्भीर्यले पूर्ण अलङ्कारसुवासिनी।
रसमाधुर्य बोकेर आउँछिन् काव्य-यामिनी ।।
मकवानपुर । मकवानपुरकाे हेटौंडामा नेपाली चलचित्र काँडेतारको विशेष प्रदर्शन हुने भएको छ । हेटौडामा मंगलबार पत्रकार भेटघाट गर्दै आगामी पुस २७ गते काँडेतारकाे विशेष प्रदर्शन हुने जानकारी गराइएकाे हाे ।
सामाना फिल्मस् प्रालिले खुला सीमाका कारण झडपमा परि मृत्यु भएका परिवार तथा घाइतेहरुको लागि सहयोगार्थ च्यारिटी शो गर्न लागेकाे चलचित्रका निर्देशक नवल खड्काले जानकारी दिए । नेपाल भारतको सीमा विवाद, सीमामा हुने झैझगडा, खुल्ला सीमानाका कारण नेपाल र नेपालीमा परेकाे समस्या चलचित्रको कथासार रहेको निर्देशक खड्काले बताए । उनका अनुसार देशभर ६० भन्दा बढी विशेष प्रदर्शन गरिसकेको र आगामी फागुन २७ गते चलचित्र देशभर प्रदर्शन हुनेछ ।
काँडेतार आगामी पुस २७ गते दिउँसाेकाे साेमा नारायणी मल अवस्थित एनएस सिनेमा हलमा प्रदर्शन गरिने छ । सत्यकला राई, मकिको राई र अञ्जु केसीले निर्माण गरेकाे काँडेतारमा नवल खड्का, गौरव पहारी, सुरविना कार्की, रेविका गुरुङ, मुलरीधर, प्रशान्त यादव, प्रेम सुब्बा लगायतको कलाकारहरुको अभिनय रहेको छ । निर्देशक खड्काकै कथा रहेकाे चलचित्रमा कविराज गहतराजको नृत्य निर्देशन, श्री श्रेष्ठको द्वन्द्व, तारा थापा (किम्भे) र बन्दे प्रसादको सम्पादन रहेकाे छ भने र सौरव लामाले खिचेका हुन् ।
चलचित्र पत्रकार संघ नेपाल मकवानपुरका अध्यक्ष कपील खड्काको अध्यक्षतामा भएको पत्रकार सम्मेलनमा चलचित्रका कलाकार प्रशान्त यादव, नेपाल पत्रकार महासंघ मकवानपुरका अध्यक्ष मणिराज गौतम, कलाकार सुशान्त कुमार श्रेष्ठ लगायतकाे उपस्थिति रहेकाे थियाे ।
