मकवानपुर । आगामी १३ गतेबाट सुरु हुने दादुरा रुबेला खोप अभियानमा बागमती प्रदेशको ८ लाख ४८ हजार ३२५ जना बालबालिकाहरुलाई खोप लगाइने भएको छ ।
प्रदेशको काठमाडौं, भक्तपुर, ललितपुर र चितवनमा ९ महिना देखि १५ बर्षसम्मका बालबालिकालाइ खोप लगाइने छ । यि जिल्लाहरुमा विद्यालय र समूदाय स्तरदेखि खोप केन्द्र रहने छन् । प्रदेशको अन्य ९ वटा जिल्लामा ९ महिनादेखि ५ बर्षसम्मका बालबालिकालाई खोप लगाइने छ । यि जिल्लाहरुमा समुदायस्तरमा खोप केन्द्रहरु रहने छन् ।
खोप अभियानको आगामी १३ गतेदेखि राष्ट्रिय दादुरा रुवेला खोप अभियान चितवन जिल्लाको ईच्छामनकामना गाउँपालिकाको सर्व शान्ति मावि कुरिनटारबाट बागमती प्रदेशका स्वास्थ्य मन्त्रि उत्तम जोशीबाट उद्घाटन गर्ने छन् ।
नेपाल मुलुकमा ४ प्रतिशत र बागमती प्रदेशमा ९ प्रतिशत बालबालिकाहरुले एक पटक पनि खोप नलगाएको स्वास्थ्य मन्त्रालय बागमती प्रदेशले जनाएको छ । यस पटकको खोप कार्यक्रममा दादुरा रुवेलासँगै डीपीटी, हेप–बी–हिप चार प्रकारको खोप समावेश गरिएको बागमती प्रदेश स्वास्थ्य निर्देशक दिपक तिवारीले बताए ।
अभियानमा लगाइने खोपमा ग्रामिणभन्दा शहरी क्षेत्रका बालबालिका छुट्ने गरेकोले सूचना सञ्चारलाई प्रभावकारी बनाउन तिवारीले आग्रह गरे । “ग्रामिण व्यक्तिहरु खोप कार्यक्रमलाई प्राथमिकताका रुपमा लिने गरेका छन् तर खोप केन्द्र पहुँच भएको शहरी क्षेत्रमा अन्य आवश्यकता प्राथमिकतामा पर्ने र खोप छुट्ने गरेको पाईएको छ” उनले भने ।
बागमती प्रदेश सरकार स्वास्थ्य मन्त्रालय स्वास्थ्य निर्देशनालय हेटौडाको आयोजनामा दादुरा–रूबेला खोप अभियान सम्बन्धी सञ्चारकर्मीहरुसंगको अभिमूखीकरण तथा अन्तरक्रियात्मक गोष्ठीमा यस्तो जानकारी गराइएको हो ।
कार्यक्रममा स्वास्थ्य मन्त्रालय सचिव बद्रीबहादुर खड्काले खोप अभियानलाई सफल पार्नको लागि स्थानीय स्तरदेखि मन्त्रालयतहसम्म समन्वय र सहकार्य हुँदै सबै तयारी सकिएको बताए ।
खोप छुटको कारण पहिल्याइ पुर्ण खोप शतप्रतिशत बनाउने लक्ष्य रहेको खड्काले बताए । अभियानमा लगाइने खोपबाट रोग तथा महामारी नियन्त्रण गर्न, अपाड्डता र मृत्युदरलाई कम गर्न, रोगहरुको निवारण र उन्मुलनको लक्ष्य हासिल गर्न सकिने र दिगोपन कायम राख्न सकिने भएकोले सबैको सहकार्य आवश्यक भएको उनले बताए ।
नेपालले सन् २०२६ सम्ममा पोलियो रोग उन्मूलन गर्ने लक्ष्य लिएको छ । खोप कार्यक्रमको चुनौति धेरै भएको निर्देशनालयका फोकल पर्सन उत्तम राज प्याकुरेलले बताए । अपेक्षित प्रगति ९५ प्रतिशत रहेको र सबै तहमा एकरुपता नभएको, राष्ट्रिय स्तरको तुलनामा प्रादेशिक, प्रदेशको तुलनामा जिल्लाहरुको र जिल्लाको तुलनामा स्थानिय तहको प्रगतिमा एकरुपता नभएको, शून्य खोप तथा ड्रप आउटको सख्या बढ्दै जानुले पनि चुनौती रहेको उनले बताए ।
नेपालमा सन् २०२६ सम्ममा दादुरा, रुबेला रोग निवारण गर्न नेपाल सरकारको प्रतिवद्धता गरेको भए पनि नियमित दादुरा–रुबेला खोपको कभरेज ९५ प्रतिशतभन्दा कम भएकोले अझै लक्ष्य हासिल गर्न चुनौती रहेको उनले बताए । दादुरा–रूबेला खोप अभियान २०७६÷७७ पछि गरिएको सर्भेक्षणअनुसार दादुरा–रुवेला खोपको कभरेज ८८ प्रतिशत मात्र रहेको छ ।
यसपटकको खोप अभियानमा दादुरा रुबेलासँगै डि.पि.टी.–हेप बी–हिव खोपको पनि समाबेश गरिएको छ । १५ वर्ष मुनिका १४ प्रतिशत बालबालिकाको मृत्युको कारण न्यूमोनिया रहेको र विगत तीन वर्षमा पि.सि.भी. खोपको कभरेज कम रहेकोले अभियानमा यो समाबेश गरिएको हो ।
सर्वसाधारणमा खोपमा पहुँच विस्तारको लागि शहरका घना बस्ती, सुकुम्बासी वस्ती, उद्योग, कारखाना, बाल मन्दिर, अनाथ आश्रम, इटा भट्टा, अन्तरदेशीय सिमा, बसपार्क जस्ता ठाउँमा पनि खोप केन्द्र राख्ने सकिने व्यवस्था सरकारले गरेको छ ।
गाउँपालिकाको प्रत्येक वडामा एउटा खोप केन्द्र, नगरपालिकाको प्रत्येक वडामा दुईटा खोप केन्द्र, उमहानगरपालिकाको प्रत्येक वडामा तीनवटा खोप केन्द्र र महान निकाको प्रत्येक वडामा चारवटा खोप केन्द्र थप गरिएको छ ।
कार्यक्रममा स्वास्थ्य कार्यालय मकवानपुर प्रमुख कृष्णबहादुर मिजार, युनिसेफका तापक्रम विशेषज्ञ हेमराज जोशी, विश्व स्वास्थ्य संगठनका सर्भिलेन्स मेडिकल अफिसर डा सस्मृता बास्तोलालगायतले खोप अभियानको तयारीबारे जानकारी गराएका थिए ।
५३ किलो गाँजासहित ३ जना नियन्त्रणमा
Tags: No Comments
मकवानपुर । मकवानपुरको हेटौंडा उपमहानगरपालिका–११ थानाभर्याङबाट लागूऔषध गाँजा सहित ३ जनालाई प्रहरीले नियन्त्रणमा लिएकाे छ ।
जिल्ला ट्राफिक प्रहरी कार्यालय मकवानपुर र अस्थायी प्रहरी पोष्ट थानाभर्याङबाट खटिएको प्रहरीले ५३ किलो ५ सय ९० ग्राम लागुऔषध गाँजा सहित उनीहरुलाई नियन्त्रणमा लिएकाे हाे । उक्त परिमाणकाे गाँजासहित मनहरी गाउँपालिका–२ बस्ने २७ वर्षीय राजकुमार स्याङ्बो, २४ वर्षीय पलगु राजकुमार स्याङ्बो र २३ वर्षीय राम कुमार स्याङ्बोलाई नियन्त्रणमा लिइएकाे जिल्ला प्रहरी कार्यालय मकवानपुरले जनाएकाे छ ।
मनहरी तर्फबाट हेटौडा तर्फ आउँदै गरेको ग.२३ प ६४३८ नम्बरको मोटरसाइकललाई पूर्व पश्चिम राजमार्ग अन्तरगत थानाभर्याङकाे राप्ति पुल नजिकै जाँच गर्ने क्रममा मोटरसाइकलमा सवार राजकुमार र पलगुको साथबाट करिब ३५ किलो ८ सय ग्राम र बा.प्र.०३००५ प ८९८४ नम्बरको मोटरसाइकलमा सवार राम कुमारको साथबाट करिब १७ किलो ७ सय ९० ग्राम गाँजा बरामद गरिएको प्रहरीले जनाएको छ ।
गाँजा सहित तीनै जनालाई नियन्त्रण लिइ मकवानपुर जिल्ला अदालतबाट १२ दिनको म्याद अनुमति लिएर थप अनुसन्धान कार्य भईरहेको जिल्ला प्रहरी कार्यालय मकवानपुरले जनाएको छ ।
मकवानपुर । मकवानपुरको बागमती गाउँपालिकामा जारी छैठौं संकरणको बागमती गोल्डकप फुटबल प्रतियोगिताको फाइनल खेल विहीबार हुनेछ । फाइनलमा स्थान बनाएका मच्छिन्द्र र सशस्त्र प्रहरी बलको एपीएफले उपाधी जित्ने आ–आफ्नै दाबी गरेका छन् ।
प्रतियाेगिता अन्तरगत बुधबार प्रि म्याच कन्फ्रेन्समा मच्छिन्द्रका प्रशिक्षक सन्तोष न्यौपानेले प्रतियोगिताको उपाधी जित्नका लागि तयारी गरिएकाे बताए । खेलाडीहरु शारीरिक रुपमा ठिक भएकाले निर्धारित ९० मिनेटभित्र गोल गर्ने र उपाधी जित्ने तयारी गरेको न्यौपानेले दाबी गरे । यस्तै, एपीएफका म्यानेजर सुशील अधिकारीले आफ्नाे टिमले उपाधी जित्नेमा विश्वस्त रहेकाे बताए । जित्नका लागि नै प्रतियोगितामा सहभागिता जनाउने भएकाेले आफूहरु पनि जित्नकै लागि फाइनलसम्म आएको बताए ।
एपीएफले केही समय अघि मात्रै एपीएफले छैठौ संस्करणकाे मकवानपुर गोल्डकप हात पारेकाे थियाे । यसैगरी मच्छिन्द्रका कप्तान उत्सव राईले यो पटक उपाधी जित्ने लक्ष्य रहेको बताए । मच्छिन्द्रले यो सिजनमा तीन वटा मोफसलका प्रतियोगितामा हार ब्यहाेरेकाे थियाे । यो पटककाे बागमती गोल्डकपकाे उपाधी भने हात पार्ने उनले बताए । यस्तै, एपीएफका कप्तान सुशील अधिकारीले मकवानपुर गोल्डकप जितेर आत्मबल बढेकाले बागमती गोल्डकप समेत जित्ने दाबी गरे । दुवै टोली पहिलो पटक बागमती गोल्डकपको फाइनलमा प्रवेश गरेको हो ।
यस्तै, बागमती खेलकुद विकास समितीका सल्लाहकार एवम् पुर्व खेलकुद विकास समितीका अध्यक्ष अरुण बलले सहरकेन्द्रीत मात्रै फुटबल प्रतियोगिता भइरहेको अवस्थामा गाउँ–गाउँबाट नै खेलाडी उत्पादन गर्नुपर्छ भन्ने उद्देश्यले प्रतियोगिता आयोजना गर्दै आइरहेको बताए । उनले खेलाडी उत्पादनका लागि फुटबल प्रतियोगिता गरिरहनु पर्ने बताए ।
बागमती खेलकुद विकास समितीका उपाध्यक्ष मुक्ति लामाको सभाध्यक्षतामा भएको प्रि म्याच कन्फ्रेन्समा बागमती–४ का वडाध्यक्ष दन्तलाल माझी र मकवानपुर जिल्ला फुटबल संघका सदस्य आषिश थापा लगायतको उपस्थिति रहेको थियो । प्रतियोगिताको विजेता टिमले १० लाख रुपैयाँ र उपविजेता टिमले ५ लाख रुपैयाँ प्राप्त गर्नेछन् । यस्तै सर्वोत्कृष्ट खेलाडीले १ लाख १ हजार रुपैयाँ र अन्य विधागत उत्कृष्टहरुले २५–२५ हजार रुपैयाँ प्राप्त गर्नेछन् ।
बागमती गोल्डकपको पहिलाे संस्करणकाे उपाधि हरिहरपुरगढी सिन्धुलीले हात पारेकाे थियाे । दोस्रो संस्करणकाे उपाधि सरस्वती युवा क्लब काठमाडौंले जितेकाे थियो भने तेस्रो गोल्डकपको उपाधि जावलाखेल युवा क्लब ललितपुरले प्राप्त गरेको थियो । प्रतियोगिताको चौथो संस्करण उपाधि थ्री स्टार क्लबले हात पार्दा पाचौं संस्करणको उपाधीकाे विजेता भुट्निज युथ स्पोर्ट्स क्लव अमेरिका भएकाे थियो । यस संस्करणमा भने उक्त क्लबले सहभागिता जनाएको छैन ।
मकवानपुर । मकवानपुर जिल्लाको हेटौंडा उपमहानगरपालिका वडा १८ मा रहेको मुर्ति पार्क अझै हराभरा र आकर्षक हुने भएको छ । यसै आर्थिक वर्षमा सवा करोड बजेटको निर्माण थपिने भएकाे छ ।
मुर्तिहरुको बगैंचाको रुपमा अझै विकास गर्नको लागि स्थानीय तहको वडा सरकार लागिपरेको छ । पिकनिक स्टलबाहेक मुर्ति पार्क घुम्नको लागि अहिले प्रवेश निःशुल्क छ । यसै आर्थिक वर्षमा यो पार्कमा कम्पाउण्ड घेराबारा, बगैंचाको व्यवस्थापन, प्रवेशद्वारमा सेल्फि स्थल बनाउन लागिएको वडा अध्यक्ष अनिल बानियाँले बताए ।
यसै आर्थिक वर्षमा बागमती प्रदेश सरकार र उपमहानगरपालिकाको बजेटबाट गुप्तेश्वर मन्दिर निर्माण, पार्कको प्रवेशद्वारमा सेल्फि बगैंचा स्थापना, कम्पाउण्ड घेरावारालगायतको क्रममा सवा करोडको काम हुने वडा अध्यक्ष बानियाँले बताए । “अहिले पार्कको प्रवेशद्वार दायाँबायाँ पुष्प बगैंचाको निर्माण गरी सेल्फि पोइन्ट बनाउने योजना छ” बानियाँले भने “कम्पाउण्डभित्र रहेको कैलाश पर्वत नजिकै आकर्षक बगैंचा निर्माणाधिन छ ।”
यो क्षेत्रमा अहिले धमाधम काम भइरहेको उनले बताए । पहिलो पानीको समस्याको कारण पुष्प बगैंचाको व्यवस्थापन गर्न समस्या रहेकोमा अब पानी पर्याप्त छ । यस आर्थिक वर्षमै मन्दिर निर्माण, कम्पाउण्ड निर्माण पुष्प बगैचा निर्माण, सेल्फि पोइन्ट निर्माण गर्न लागिएको हो । यसले पार्कको लुक्स अझै बढाउने अपेक्षा गरीएको छ । पार्कमा फुटपाथ निर्माणपछि पार्क झनै आकर्षक बनेको छ ।

निर्माण कार्यकाे अनुगमनकाे क्रममा वडा अध्यक्ष अनिल बानियाँ
झण्डै ४० लाख खर्चेर ललितकला अनुसन्धान स्थलको रुपमा विकास गर्ने उद्देश्यले निर्माण गरिएको मूर्तिपार्कमा २३ वटा मुर्तिहरु छन् । नेपालमै पहिलो पटक मकवानपुर जिल्लाको हर्नामाडी गुम्बा डाँडामा अन्तराष्ट्रिय मूर्तिकला महोत्सव आयोजना गरी यि मुर्तिहरु कोरीएका थिए । नेपाल सहित विभिन्न ६ राष्ट्रका २३ जना कलाकारहरुले ढुङ्गामा कुदेका हुन् ।
मुर्तिहरु मार्फत प्रकृतिका अनेकन रुपहरु र मानवीय शक्ति देखाउने जमर्को गरीएको छ । इटालीका मुर्तिकार बेटीनो फ्रान्सीनीले विश्वको पहिलो आमाको परिकल्पना गरी ढुङ्गाको मुर्ति बनाएका छन् । जसलाई मुर्तिपार्कको मध्यभागमा राखिएको छ । यसैगरी दक्षिण कोरियाका मुर्तिकार शीम जूम् शूले औद्योगिक वातावरणको परिकल्पना गरि एउटै ढुङ्गामा कलाको प्रस्तुति गरेका छन् ।
जापानका मुर्तिकार सूगीमोतो जुन यूचीरोले प्रकृतिमा पुष्ट छिप्पिएको भटमासको कोसा बनाएका छन् । यसैगरी मकवानपुरका स्थानीय कलाकारहरु लक्ष्मण भुजेलले उत्सुकताको मुर्ति र अर्का स्थानीय कलाकार ओमभक्त भण्डारीले भगवान गणेश एवम् कछुवाको स्वरुपको मुर्ति बनाएका छन् । यसैगरी रुपन्देही जिल्लाका बुद्ध थारुले ढुङ्गाको आकारलाई कुदेर “बुद्धको अर्थ आकार एवम् अष्टमंगल” बनाएका छन् ।
यसै आर्थिक वर्षभित्र पार्कमा उपमहानगरपालिकाको आफ्नै बजेटबाट फूलबारीको लागि ८ लाख लगानी हुँदैछ । यसैगरी बागमती प्रदेश सरकारको ३० लाख लगानीबाट दुप्चेश्वर मन्दिर निर्माण हुँदै छ । यसैगरी प्रदेश सरकारकै १५ लाख लगानीमा कम्पाउण्ड बन्ने छ भने ६५ लाख बजेटमा ललितकला आर्टको संरक्षणार्थ आधुनिक संरचनायुक्त भवन बन्नेछ । यसको लागि डिपीआर सकिएको अध्यक्ष बानियाँले बताए ।
११ विगाहा जमिनमा फैलिएको पार्कमा बुद्ध मुर्तिको स्थापनापछि पर्यटकको चाप झनै बढेको वडा सचिव दिपेन्द्र ढकालले बताए । पिकनिक स्टलको कारण बिदाको दिन आन्तरीक पर्यटकहरुको चाप लाग्ने गरेको सचिव ढकालले बताए ।
कस्तो बन्दैछ मुर्ति पार्क ? वडा अध्यक्ष अनिल बाँनियासँगको कुराकानी
मकवानपुर । स्थानीय तहको कार्य सम्पादन मूल्याङ्कनको आधारमा मकवानपुरकाे हेटौडा उपमहानगरपालिका प्रथम भएकाे छ । मकवानपुरका १० वटा स्थानीय तहमध्ये हेटौडा ३७.११ अंकसहित प्रथम भएकाे हाे ।
राष्ट्रिय प्राकृतिक स्रोत तथा वित्त आयोगले स्थानीय तहसहित प्रदेश सरकारले प्राप्त गरेको अंक समेत फागुन ८ गते मंगलबार सार्वजनिक गरेको हो । कार्यसम्पादन मूल्याङकनको सूचकका आधारमा स्थानीय तहमा वित्तिय समानीकरण अनुदानको अंक निर्धारण हुने गर्दछ । सार्वजनिक कार्यसम्पादन मूल्याङ्कनमा थाहा नगरपालिका दोस्रो स्थानमा रहेको छ । थाहाले ३६.६६ अंक प्राप्त गरेको छ ।
मकवानपुरका स्थानीय तहमा कार्यसम्पादनमा सबैभन्दा कमजोर बागमती गाउँपालिकाकाे अंक रहेकाे छ । बागमतीले कार्यसम्पादन मुल्याङ्कनमा १६.२२ अंक मात्र प्राप्त गरेको छ । आयोगले १७ मध्ये १४ वटा सूचकमा मात्र स्थानीय तहको मूल्याङ्कन गरेको जनाएको छ । कार्यसम्पादन मूल्याङ्कन अनुसार इन्द्रसरोवर गाउँपालिकाले २५.५२ अंक पाएको छ । १४ सूचक मध्ये इन्द्रसरोवरले ८ वटा सूचकमा शुन्य अंक प्राप्त गरेकाे हाे । कैलाशले ५ सूचकमा शुन्यसहित ३२.५२, महनरीले ८ सूचकमा शुन्य अंकसहित २९.८४, भीमफेदीले ६ सूचकमा शुन्य अंकसहित ३१.९१ अंक प्राप्त गरेकाे छ ।
त्यसैगरी मकवानपुरगढीले ६ वटा सूचकमा शुन्यसहित ३१.९७, बकैयाले १० सूचकमा शुन्यसहित २४.८४ अंक र राक्सिराङले ८ सूचकमा शुन्यसहित २४.२४ अंक प्राप्त गरेको छ । सबैभन्दा कमजोर बागमती गाउँपालिकाले ९ वटा सूचकमा अंक शुन्य पाएको छ । जिल्लाकै उत्कृष्ट हेटौंडा उपमहानगरपालिकाले ५ वटा सूचकमा शुन्य अंक प्राप्त गर्दा दोस्रो थाहा नगरपालिकाले ३ वटा सूचकमा मात्र शुन्य अंक प्राप्त गरेको हो ।
यसैबीच ७ प्रदेश मध्ये कोशी प्रदेश कार्यसम्पादन मूल्याङ्कनमा ३० अंकसहित प्रथम स्थानमा रहेको छ । मधेस प्रदेशले २२.३१, बागमती प्रदेशले २७.२९ अंक पाएको छ । त्यस्तै गण्डकीले २३.०७, लुम्बिनीले १६.९९, कणालीले २०.९८ र सुदुरपश्चिम प्रदेशले २१.०८ अंक प्राप्त गरेकाे छ ।
प्रदेश तथा स्थानीय तहको कार्य सम्पादन मूल्याङ्कन कार्यविधि, २०७८ को दफा ७ को अधिनमा रही प्रदेश र स्थानीय तहका लागि निर्धारण गरिएको ले जनाएको छ । नतिजामा चित्त नबुझे ७ दिनभित्र आवश्यक आधार र प्रमाणसहित पुनरावलोकनका लागि आयोगमा निवेदन दिन सकिनेछ ।
