मकवानपुर । मकवानपुरकाे हेटौडामा जारी जिल्ला लिग फुटबल प्रतियोगितामा हाडीखोला युथ क्लब र शहीद स्मृति क्लब सेमिफाइनल प्रवेश गरेकाे छ । योसँगै जिल्ला लिगमा सेमिफाइनल समिकरण पुरा भएको छ ।
साविक विजेता न्यू डाँफे क्लबलाई हराउँदै मनहरी गाउँपालिकाको हाँडीखाेला युथ सेमिफाइनलमा स्थान बनाएकाे हाे । मकवानपुर जिल्ला फुटबल संघको आयोजनामा जारी प्रतियोगिता अन्तर्गत मंगलबार भएको क्वाटरफाइनलमा न्यू डाँफेलाई ३–१ गोल अन्तरले हाँडीखोला विजयी भएकाे हाे ।
न्यू डाँफेका लागि ४० औं मिनेटमा सुशान्त तामाङले गोल गर्दै टिमलाई अग्रता दिलाएका थिए । तर दोस्रो हाफमा हाँडीखोलाले ३ गोल गर्दै खेलको निर्णय आफ्नो पक्षमा पार्न सफल भयो । खेलको म्यान अफ द म्याच हाँडीखोलाका उत्सव खड्का घोषित भए । हाँडीखोला समूह ‘घ’ को विजेता र न्यू डाँफे समूह ‘ख’ को उपविजेताको रुपमा क्वाटरफाइनल पुगेका थिए ।
मंगलबार नै भएको अन्तिम क्वाटरफाइनल खेलमा जित निकाल्दै बामगती गाउँपालिकाको शहिद स्मृति क्लब सेमिफाइनल पुगेको छ । उसले गोर्खा ब्वाइज क्लवलाई २–० गोल अन्तरले हराएकाे हाे । खेलमा गोर्खा ब्वाइजले केही मौका पाएपनि सदुपयोग गर्न नसक्दा हार व्यहोर्न बाध्य भयो । खेलको म्यान अफ द म्याच बागमतीका मेसक राई घोषित भए । गोर्खा ब्वाइज समूह ‘ख’ को विजेता र सहिद स्मृति समूह ‘घ’ को उपविजेताको रुपमा नकआउट चरणमा प्रवेश गरेको थियो ।
सोमबार भएको क्वार्टरफाइनल खेलमा विजयी हुँदै एफसी पोताला र पदमपोखरी युथ क्लब सेमिफाइनलमा प्रवेश गरेका छन् । न्यू कम्बाइन क्लबलाई २–१ गोलले हराउँदै एफसी पोताला सेमिफाइनलमा प्रवेश गरेको छ । यस्तै, सक्षम युवा क्लबलाई टाइब्रेकरमा हराउँदै पदमपोखरी युथ क्लब सेमिफाइनलमा प्रवेश गरेको छ ।
सेमिफाइनल खेल बिहीबार हुने आयोजकले जनाएको छ । १४ भदौबाट सुरु लिगको प्रतियोगिताको फाइनल खेल १२ असोजमा हुनेछ । लिग विजेताले नगद १ लाख रुपैयाँ प्राप्त गर्ने छन् भने प्रदेशस्तरीय लिगमा सहभागिता जनाउने छन् । उपविजेता टिमले ५० हजार रुपैयाँ र विधागत उत्कृष्ट खेलाडीहरुले नगद पुरस्कार प्राप्त गर्ने छन् ।
धुलिखेल (काभ्रे) । काभ्रेको धुलिखेलमा बागमती प्रदेशका पत्रकार लक्षित पाँच दिने श्रव्यदृश्य सम्पादन कार्यशाला सोमबारदेखि सुरु भएको छ। बागमती प्रदेश संचार रजिस्ट्रार कार्यालयको आयोजनामा सुरु कार्यशालामा प्रदेशका विभिन्न जिल्लाका २० जना पत्रकारहरुले सहभागिता जनाएका छन् ।
कार्यशालामा मकवानपुरबाट ५ जना, ललितपुर, काठमाडौं, काभ्रेपलाञ्चोक र भक्तपुरबाट ३/३ जना, रामेछाप,नुवाकोट र सिन्धुलीबाट १/१ जना र सिन्धुपाल्चोकबाट २ जना रहेका छन्। कार्यशालामा मुख्यतया भिडियो सम्पादन गर्ने तरिका सिकाइने जनाईएको छ । तालिमलाई प्रशिक्षकद्वय नसना बज्राचार्य र शिव पुरीले सहजीकरण गर्नेछन् ।
बागमती प्रदेशका पत्रकारहरुलाई प्रविधिमैत्री बनाउने लक्ष्यका साथ तालिम आयोजना गरिएको संचार रजिष्ट्रार रेवती सापकोटाले बताए। “दृश्यले धेरै कुरा बताउनु पर्छ । हामीले भिडियोमा काम गर्दा भिडियोलाई कसरी बढी भन्दा बढी अर्थपूर्ण बनाउने भन्ने कुरा यस कार्यशालामा सिकाइने छ” सापकोटाले भने । विशेष गरी श्रव्यदृश्य सम्पादन कार्यशालाले पत्रकारहरुलाई गुणस्तरीय भिडियो सामग्री तयार पार्न सक्षम बनाउने सापकोटाले बताए ।
यस अघि कार्यालयले गत साउन १५ गते सूचना प्रकाशित गरी इच्छुक पत्रकारहरुलाई आवेदनका लागि आह्वान गरेको थियो। श्रव्यदृश्य सम्पादन कार्यशालाका साथै अन्य विभिन्न विषयहरुमा पनि तालिमहरु संचालन गर्ने योजना कार्यालयको रहेको छ । तालिमहरुमा अनलाइन पत्रकारिता, तथ्यांक आधारित पत्रकारिता, मोबाइल पत्रकारिता, समाचार लेखन तथा सम्पादन कार्यशाला, रेडियो प्राविधिक कार्यशाला र मिडिया संचालकहरुका लागि विज्ञापन कला सम्बन्धी कार्यशाला समावेश छन्।
कार्यालयले प्रदान गर्ने उक्त तालिमहरुले बागमती प्रदेशका पत्रकारहरुको क्षमता अभिवृद्धि गर्नुका साथै आधुनिक प्रविधिसँग परिचित गराउने लक्ष्य रहेको रजिष्ट्रार सापकोटाले बताए । कार्यशालामा सहभागीहरुले यस प्रकारको तालिमबाट आफूहरुले धेरै कुरा सिक्न पाउने र यसले आफ्नो पेशागत दक्षता बढाउन मद्दत गर्ने आशा व्यक्त गरेका छन् ।
मकवानपुर । मकवानपुर जिल्लामा डेंगु र स्क्रब टाइफसका बिरामी बढ्दै गएकाे छ । जिल्लामा मंगलबारसम्म डेंगु संक्रमितको संख्या ६३६ जना पुगेको छ । यसैगरी स्क्रब टाइफसका बिरामी २३९ जना पुगेको छ ।
डेंगु संक्रमितको कुल संख्या मध्ये ३३५ पुरुष र ३०१ महिला रहेका छन् । स्क्रब टाइफसका बिरामी ८० पुरुष र १५९ महिला रहेका छन् । उक्त तथ्याङ्क साउन २०८१ देखि मंगलबारसम्मको हो ।
यसैगरी मकवानपुरमा पछिल्लो २४ घण्टामा २४ जना डेंगु संक्रमित र ३ जना स्क्रब टाइफसका बिरामी भेटिएका छन् । जनस्वास्थ्य कार्यालय मकवानपुरका अनुसार, सो अवधिमा जिल्लाको हेटौंडा उपमहानगरपालिकाका २० जना, मकवानपुरगढी गाउँपालिकाका एक जना, मनहरी गाउँपालिकाका एक जना र अन्य जिल्लाका दुई जना गरी २४ जना डेंगु संक्रमण पुष्टि भएको हो ।
यसैगरी, सोही अवधिमा हेटौंडा उपमहानगरपालिकाका एक जना र मकवानपुरगढी गाउँपालिकाका दुई जना गरी ३ जनाम स्क्रब टाइफसका बिरामी भेटिएको स्वास्थ्य कार्यालय जनाएको छ ।
मंगलबार थपिएसँगै हेटौंडा उपमहानगरपालिकामा २५७ पुरुष र २४४ महिला गरी ५०१ जना, थाहा नगरपालिकामा एक पुरुष र एक महिला गरी २ जना, मकवानपुरगढी गाउँपालिकामा १५ पुरुष र ९ महिला गरी २४ जना, बागमती गाउँपालिकामा एक जना पुरुष, कैलाश गाउँपालिकामा ४ पुरुष, मनहरी गाउँपालिकामा २० पुरुष र १४ महिला गरी ३४ जना, बकैया गाउँपालिकामा ६ पुरुष र ५ महिला गरी ११ जना,भीमफेदी गाउँपालिकामा ४ पुरुष र ८ जना महिला गरी १२ जना, राक्सिराङ गाउँपालिकामा एक पुरुष
हाल ठेगाना नखुलेका १२ पुरुष र १४ महिला गरी २६ जना,अन्य जिल्लाका १३ पुरुष र ५ महिला १८ जनामा डेंगु संक्रमण पुष्टि भएको छ ।
यसैगरी मंगलबार थपिएसँगै हेटौंडा उपमहानगरपालिकामा ९१ महिला र ५० पुरुष गरी १४१ जना, मकवानपुरगढी गाउँपालिकामा २६ महिला र १० पुरुष गरी ३६ जना, बागमती गाउँपालिकामा दुई पुरुष, कैलाश गाउँपालिकामा एक महिला र एक पुरुष गरी २ जना, मनहरी गाउँपालिकामा ६ पुरुष र १२ जना महिला गरी १८ जना, इन्द्रसरोवर गाउँपालिकामा एक महिला, भीमफेदी गाउँपालिकामा दुई पुरुष र १४ जना महिला गरी १६ जना, बकैया गाउँपालिकामा ८ पुरुष र ९ महिला गरी १७ जना, राक्सिराङ गाउँपालिकामा एक जना महिला र अन्य जिल्लाका एक पुरुष र तीन महिला गरी ४ जना स्क्रब टाइफसका विरामी रहेका छन् ।
थाहा नगरपालिकामा भने हालसम्म स्क्रब टाइफसको बिरामी फेला नपरेको स्वास्थ्य कार्यालय मकवानपुरले जनाएको छ ।
मकवानपुर । बागमती प्रदेश सभाले प्रदेश हस्तकलाग्राम स्थापना तथा संचालन सम्बन्धमा व्यवस्था गर्न बनेको विधेयक सर्व सम्मत पारित गरेको छ । सोमवारकाे प्रदेश सभाको बैठकले उक्त विधेयक सर्वसम्मत पारित गरेकाे हाे ।
विधेयक सभामा दर्ता भएकाे करिब एक वर्षपछि पारित भएकाे हाे । तत्कालिन उद्योग , वाणिज्य , भुमि तथा प्रशासन मन्त्री रामकृष्ण चित्रकारले २५ असोज २०८० मा उक्त विद्येयक दर्ता गरेका थिए । प्रदेशकी उद्योग, वाणिज्य, भूमि तथा प्रशासनमन्त्री सुकमाया तामाङले उक्त विधेयक पारित गरियोस् भन्ने प्रस्ताव पेश गरेकी थिइन् । सभामुख भुवनकुमार पाठकले निर्णयार्थ सभामा पेस गरेकाे उक्त विधेयक प्रदेश सभाबाट सर्वसम्मत स्वीकृत भएकाे थियाे ।
आईतवार उद्योग, पर्यटन तथा वातावरण समितिका सभापति आनन्दकुमार श्रेष्ठले प्रदेश हस्तकलाग्राम स्थापना तथा संचालन सम्बन्धमा व्यवस्था गर्न बनेको विधेयकमाथि समितिले गरेको निर्णयको प्रतिवेदन पेश गरेका थिए । विद्येयक पारित भएसँगै हस्तकलालाई बागमती प्रदेशको अर्थतन्त्रको प्रमुख क्षेत्रको रुपमा विकसित गरिने मन्त्री तामाङले बताइन् । विधेयक पारित भएसँगै स्वदेशी पुँजी, स्थानीय सीप तथा कला र स्रोतको अधिकतम परिचालन गराई स्वदेशमा निर्मित हस्तकलाका वस्तुहरुको पहिचानलाई विश्व बजारमा स्थापित गर्न मद्दत पुग्ने मन्त्री तामाङले जानकारी दिइन् ।
स्वदेशमा समेत हस्तकला सामग्रीहरुको प्रयोगमा वृद्धि गर्न र छरिएर रहेका लघु तथा घरेलु हस्तकला उद्योगहरुलाई एकीकृत गरी उत्पादन र हस्तकला उद्योगहरुको उत्पादकत्व अभिवृद्धि गर्न बागमती प्रदेशभित्र हस्तकलाग्राम स्थापना र सञ्चालनकाे कानुनी व्यवस्था गर्न विधेयक प्रभावकारी हुने उनले बताइन् ।
प्रदेश हस्तकलाग्राम स्थापना तथा संचालन सम्बन्धमा व्यवस्था गर्न बनेको विधेयक पारित भएसँगै तीन गुणाले उत्पादन र निर्यात बढाउन सकिने बाटो खुलेको हस्तकलाग्राम महासंघका केन्द्रिय अध्यक्ष प्रचण्ड शाक्यले बताए । शाक्यका अनुसार ८० प्रतिशत हस्तकला बागमती प्रदेशबाट निर्यात भईरहेको छ । देशभर १९ वटा जिल्लाका हस्कलाग्राम संघहरु आवद्ध छन् ।
हस्तकलाग्रामभित्र १३ वटा बस्तुगत संघ आवद्ध छन् । जसमध्ये पश्मीना, फेल्ट, धातुका सामान, काठका सामान, प्राकृतिक रेशाजन्य सामग्री र मिथिला पेन्टिङ हस्तकलाग्राम भित्र पर्दछन् । कपडाबाट बनेका सामानहरूमा खास गरेर पश्मीना, सुती, फलाटिन, रेशम, अल्लो र ढाकाबाट उत्पादित सामानहरू पर्दछन् । यसैगरी ऊनबाट बनेका सामग्रीहरू, सिल्भर, काठ, विभिन्न किसिमका पत्थर, छाला, बेतबाँस, थाङ्कालगायत भाँडाहरूमध्ये खास गरेर गमला, घ्याम्पो, घैँटो, हाँडी, खुत्रुके आदि हस्तकलाग्राम भित्र पर्दछन् ।
मकवानपुर । बागमती प्रदेशसभाबाट ३ वटा विधेयक पारित भएकाे छ । प्रदेशसभाको सोमबारको बैठकले संसदीय समितिले संसदमा पेस गरेको विधेयक पारित गरेको हो ।
प्रदेशसभाबाट प्रदेश हस्तकला ग्राम स्थापना तथा सञ्चालन सम्बन्धमा व्यवस्था गरेको विधेयक, प्रदेश कृषि विकास सम्बन्धमा व्यवस्था गर्न बनेको विधेयक र प्रदेश स्वास्थ्य ऐन २०७५ लाई संशोधन गर्न बनेको विधेयक सर्वसम्मत पारित भएकाे हो ।
प्रदेशकी उद्योग , वाणिज्य , भूमि तथा प्रशासनमन्त्री सुकमाया तामाङले प्रदेश हस्तकला ग्राम स्थापना तथा सञ्चालन सम्बन्धमा व्यवस्था गरेको विधेयककाे प्रस्ताव पेस गरेका थिए । यसैगरी प्रदेश कृषि तथा पशुपन्छी विकास मन्त्री प्रकाश श्रेष्ठले प्रदेश कृषि विकास सम्बन्धमा व्यवस्था गर्न बनेको विधेयककाे प्रस्ताव पेश गरेका थिए । यस्तै प्रदेश स्वास्थ्य मन्त्री किरण थापा मगरले प्रदेश स्वास्थ्य ऐन २०७५ लाई संशोधन गर्न बनेको विधेयक प्रस्ताव पेश गरेका थिए ।
सभामुख भुवनकुमार पाठकले उक्त विधेयकहरु छलफलका प्रस्ताव पछि निर्णयार्थ प्रदेश सभामा पेस गरेका थिए । सभामुख पाठकले पेस गरेको उक्त विधेयकलाई सांसदहरूले सर्वसम्मत पारित गरेका हुन् ।
आइतबारकाे बैठकमा उद्योग पर्यटन तथा वातावरण समितिका सभापति आनन्दकुमार श्रेष्ठले प्रदेश हस्तकला ग्राम स्थापना तथा सञ्चालन सम्बन्धमा व्यवस्था गर्न बनेको विधेयकको निर्णयको प्रतिवेदन पेस गरेका थिए । शिक्षा स्वास्थ्य तथा कृषि समितिका सभापति ठाकुर ढकालले समितिले दफावार छलफल गरेर तयार पारेको प्रदेश स्वास्थ्य ऐन २०७५ लाई व्यवस्था गर्न बनेको विधेयकको निर्णयको प्रतिवेदन र प्रदेश कृषि विकास सम्बन्धमा व्यवस्था गर्न बनेको विधेयकको निर्णयको प्रतिवेदन पेस गरेका हुन् ।
यसैगरी प्रदेश सभाकाे विभिन्न बैठकका विशेष समयमा प्रदेश सदस्यहरुले उठाएका समसामयीक तथा प्रदेशका कार्यक्षेत्र भित्रका विषयका सम्बन्धमा मुख्यमन्त्रीले जवाफ दिएका थिए । प्रदेश सभाकाे सोमबारकाे बैठकमा शुन्य तथा विशेष समय निर्धारण गरिएन् । सभामुख पाठकले प्रदेश सभाकाे अर्काे बैठक सूचना जारी नभएसम्मकाे लागि स्थगित गरे ।