मकवानपुर / स्थानीय तहको निर्वाचन अब ४१ दिन मात्रै बाँकी छ । आगामी ३० वैशाखमा हुने निर्वाचनको लागि मकवानपुरलगायत देशै भर सत्तारुढ ५ दलीय गठबन्धन भएको समाचार बाहिरीएसँगै अर्को चिन्ताको विषय पनि चर्चामा आएको छ । त्यो हो महिला नेतृत्वको ।
राजनीतिमा महिला नेतृत्वलाई कानुनले अनिवार्य गरेको भएपनि गठबन्धनको कारण यो व्यवहारमा नदेखिने पक्का जस्तै भएको छ । यसअघि सबैजसो पार्टीले वडास्तरदेखि नै स्थानीय तहको प्रमुख उपप्रमुख पदसम्म नेतृत्व लगभग फाइनल गरेका थिए । तर तोकिएको मितिको निर्वाचनको लागी ४२ दिन बाँकी हुदा जुटेको गठबन्धनले महिला पछाडि पारीने देखिएको छ ।
निर्वाचनमा सत्ता गठबन्धन दलहरुले तालमेल गरेर जाने निर्णय भएसँगै यसको असर स्थानीय पालिकामा महिलाहरुको प्रतिनिधित्वमा पर्ने महिला अधिकारकर्मीहरुले आशंका गर्न थालेका छन् ।
दलहरुले छुट्टा–छुट्टै निर्वाचनमा जाँदा स्थानीय तह प्रमुख वा उपप्रमुखमध्ये एक पदमा अनिवार्य रुपमा महिला उम्मेदवार बनाउनुपर्ने हुन्छ। तर, गठबन्धन गर्दा उक्त व्यवस्था अनिवार्य छैन । यो अनिवार्यताको व्यवस्था आकर्षित नहुने भएकाले फरक–फरक दलबाट दुबै पदमा पुरुष नै उम्मेदवार बन्ने र जित्ने सम्भावना बढी देखिन्छ।
नेपाली कांग्रेस मकवानपुर जिल्ला सहसचिव इन्दीरा न्यौपानलेले गठबन्धनको बैठक सकिएलगतै सामाजिक सञ्जालमार्फत नै यो चिन्ता प्रकट गरेकी छिन् ।
“देशै भरि चुनावी तालमेल आवश्यकता र औचित्यको आधारमा गर्ने निर्णय गरिएको छ, निर्णय जे होला त्यो समयले बताउला तर, साँच्चै गठबन्धनको नाममा फेरि पनि देशै भरिको महिलाको सहभागिता सुन्य हुने त हैन ? उनले भनेकी छिन् “राज्यले दिएको स्थानीय तहको ५० प्रतिशत महिला सहभागिताको ग्यारेन्टी गरिएकोमा फेरि पनि गठबन्धनको नाममा महिलाको सहभागिता त शुन्य हुदैछ ।”
राज्यले दिएको अधिकारको हनन गरिएमा महिला मतदाताले भोट नै नहाल्ने स्थिति नआवस् भन्दै उनले सचेत पारेकी छिन् । “गठबन्धन हुँदा हामीले अघिल्लो स्थानीय चुनावमा यि सब पीडा भोगिसकेका छौ, त्यसैले अब फेरि पनि गलत निर्णय नहोस्” उनले भनिन् ।
गठबन्धनपछि महिलाको विजयी हैन उम्मेदवारी नै नहुने संभावना बढेको छ । नेकपा एमालेबाट टुक्रेको नेकपा एकिकृत समाजवादीमा पनि यही चिन्ता छ । एमालेबाट गत निर्वाचनमा प्रदेशको एक मात्रै उपमहानगरपालिका हेटौंडा उपमहानगरपालिकाको उपप्रमुख जितेकी मिना लामालाई यस पटक गठबन्धनले टिकट दिनेमा शंका छ ।
“गठबन्धनले केही आशंका चाही जन्माएको छ, तर हामीले निर्वाचन आयोग र आ–आफ्नो दललाई खबरदारी गर्नेछौ” नेकपा एकिकृत समाजवादी केन्द्रीय सदस्य तथा बागमती प्रदेश सभा सदस्य मुनु सिग्देलले भनिन् ।
गठबन्धन गर्दा पनि महिलालाई जित्ने स्थान दिन र लैड्डिक समानता कायम राख्नको लागि आफूहरुले पहल जारी राख्ने केन्द्रीय सदस्य सिग्देलले बताइन् ।
स्थानीय तहको प्रमुखमा महिलालाई प्राथमिकता दिने बहस भइरहेको बेला दलगत गठबन्धनको कारण उपप्रमुखमा पनि महिला नहुने हो कि भन्ने खतरा हो । “हाम्रो सरोकार प्रमुख पदमै उपस्थिति बढाउने हो, तर चुनौती उपप्रमुख पदमै अन्यथा हुने हो कि भन्ने आयो” सिग्देलले भनिन् ।
दलहरु ‘कमजोर’ बनेकाले पालिकामा महिलाको प्रतिनिधित्व कम हुने सम्भावना बढेको हो । दलहरुले आफूहरु कमजोर भएको आभाष गरेर आपसमा मिलेर लड्न खोज्नु दलको लागि फाइदा होला तर यसले महिलाको प्रतिनिधित्वको अधिकार ओझेलमा पर्छ । गठबन्धनले दुबै पदमा पुरुष हुने सम्भावना बढी हुन्छ । संविधानले तोके बमोजिमको लैंगिक प्रतिनिधित्व भत्किने संभावना प्रवल छ ।
अघिल्लो निर्वाचनमा मकवानपुरको थाहा नगरपालिकामा यस्तै गठबन्धनको कारण प्रमुख उपप्रमुख दुबै पदमा पुरुष विजयी भएको उदाहरण छ । हेटौंडा उपमहानगरपालिकामा पनि गठबन्धन तर्फको धेरै मत बदर भएपछि गठबन्धन पछाडी पर्दा दुबै पदमा एमालेका उम्मेदवारले जितेका थिए । जसले गर्दा लैड्डिक समानता कायम भएको थियो ।
यसपटक पनि गठबन्धन हुदा हेटौंडा उपमहानगरपालिकामा मेयर काँग्रेसले र उपमेयर नेकपा समाजवादीले पाउने तयारी भएको बुझिएको छ । गठबन्धन स्रोतका अनुसार गठबन्धनबाट काँग्रेसका उम्मेदरवार आनन्द पराजुलीले मेयरको टिकट पाउने छन् । यसैगरी उपमेयरमा समाजवादीबाट पनि पुरुषले टिकट पाउने चर्चा रहेको छ । समाजवादीले मेयर पदमा लड्न पाउने हो भने हाल बाहालवाला उपमेयर मिना लामाले मेयरमा टिकट पाउने पार्टी केन्द्रीय सदस्य सिग्देलले बताइन् ।
मकवानपुर/नजिकीदै गरेको स्थानीय तहको निर्वाचनमा मकवानपुरमा सत्तारुढ दलबीच वडास्तरबाटै गठबन्धन गर्ने सहमति भएको छ ।
आज नेपाली कांग्रेस मकवानपुरको पार्टी कार्यालयमा बसेको सत्तारुढ गठबन्धनको बैठकले ३० वैशाखमा हुने स्थानीय तह निर्वाचनमा वडा तहबाटै गठबन्धन गर्ने सहमित गरेको हो । अब आगामी निर्वाचनमा जिल्लाको १०२ वटै वडा र दशवटा स्थानीय तहमा गठबन्धन कांग्रेस मकवानपुर सभापति बुद्ध लामाले बैठक पश्चात् आयोजित पत्रकार सम्मेलनमा बताए ।
केन्द्रको निर्देशन अनुसार जिल्ला, स्थानीय तह र वडा तहमै गठबन्धनको संयन्त्र तयार गरिने सभापति लामाले बताए ।“गठबन्धनको सहमति जुटेको भएपनि कुन पार्टीले उम्मेदवार को उठाउने भन्ने बारेमा टुंगो लागेको छैन” लामाले भने “प्रारम्भिक छलफल भएको हो, केन्द्रीय निर्देशन अनुसार हामी अगाडि बढ्नेछौं।”
गठकन्धनले निर्वाचनको लागि कांग्रेसको जिल्ला सभापति बुद्ध लामाको संयोजकत्वमा पाँच सदस्यीय सचिवालय बनाउने समेत निर्णय गरेको छ । जिल्लाको सचिवालयमा नेकपा माओवादी केन्द्रका सर्केश घलान, नेकपा (एकीकृत समाजवादी) का जिल्ला अध्यक्ष श्रीधर पाखरेल, जनता समाजवादी पार्टीका सोनामसिं स्याङ्तान र राष्ट्रिय जनमोर्चाका प्रतिनिधि सहभागी रहनेछन् ।
निर्वाचन लक्ष्यित सचिवालय स्थानीय तह र वडासम्मै नै यही संरचनामा निर्माण हुनेछ । बैठकले स्थानीय तह र वडासम्मै गठबन्धनको संयन्त्र निर्माण गर्न आवश्यक थप छलफल र बैठक बस्न समेत पार्टीको तल्लो संरचनालाई निर्देशन दिएको छ ।
हामी एक्लै काफि छौः एमाले अध्यक्ष श्रेष्ठ
गठबन्धनलाई पराजित गर्ने सार्मथ्य नेकपा एमाले एक्लैसंग भएको पार्टीका जिल्ला अध्यक्ष एकालाल श्रेष्ठले बताएका छन् ।
नेकपा एमाले मकवानपुरका अध्यक्ष श्रेष्ठले पाँच दलीय गठबन्धनलाई पराजित गर्ने सार्मथ्य नेकपा एमालेसँग रहेको दाबी गरेका हुन् ।

पार्टीको निर्वाचन लक्ष्यित कार्यक्रमलाई सम्बोधन गर्दै नेता श्रेष्ठले गठबन्धनका बिरुद्ध एमाले कार्यकर्ता एक हुनेबेला आएकोले कार्यकर्ता जनताको घरदैलोमा पुग्नुपर्ने बताए । सत्तारुढ गठबन्धन एउटै कित्तामा उभिएसँगै एक्लिएको एमालेले मकवानपुरमा राप्रपासँग तालमेल गर्ने तयारी गरेको छ यद्यपि राप्रपा पनि हालै मात्रै फुटेको कारण राप्रपाबाट एमालेलाई कति बल पुग्ला विचारणीय छ । “हामी विरुद्ध पहिला पनि गठबन्धन भएको हो, हामीलाई केही फरक पर्दैन” श्रेष्ठले भने ।
बागमती गाउँपालिकामा गठबन्धन भत्कीन्छः राष्ट्रिय सभा सदस्य राई
नेकपा एमाले बागमती प्रदेश कमिटि सदस्य तथा राष्ट्रिय सभाको सदस्य रामचन्द्र राईले सत्तागठबन्धनको अप्राकृतिक गठबन्धनलाई बागमती गाउँपालिकाका जनताले भत्काईदिने दाबि गरेका छन् ।
नेकपा एमाले बागमती गाउँपालिकाले आयोजना गरेको निर्वाचन लक्षित प्रशिक्षण कार्यक्रमलाई सम्बोधन गर्दै राइले गठबन्धन जनताको इच्छा विपरीत भएकोले त्यो जनताले नमान्ने बताए । पार्टीको जिल्ला सहईन्चार्ज समेत रहेका राईले निर्वाचनमा उम्मेदवार तय गर्नेदेखि सर्वसाधारण माझ पार्टीको एजेन्डा लैजाने विषयमा एमाले अगाडि रहेको बताए ।
मकवानपुरे जनता एमालेको पक्षमा ः पूर्व मुख्यमन्त्री पौडेल
बागमती प्रदेशका प्रथम मुख्यमन्त्री डोरमणि पौडेलले स्थानीय तहको निर्वाचनमा मकवानपुरे जनताले एमालेको पक्षमा मतदान गर्ने दाबि गरेका छन् ।

एमालेको नेतृत्वमै हेटौँडा प्रदेशको राजधानी बनेको विषय मकवानपुरे जनताले बुझेको उनले स्मरण गराए । हेटौँडा उपमहानगरपालिकाका नेतृत्व लिएको एमालेले नगरमा गरेका विकास निर्माणको काम देखेर यो पटक पनि यहाँका सर्वसाधारणले एमालेकै पक्षमा मतदान गर्ने उनले बताए । कार्यक्रममा पार्टीको केन्द्रीय निर्वाचन आयोगका सदस्य अनन्त पौडेलले सत्ता गठबन्धन अत्तालिएको भन्दै एमालेको पक्षमा जनलहर देखिएको दाबी गरे ।
एमाले एक्लै मैदानमा जाने
गत निर्वाचनको मतपरिणाम अनुसार नेकपा एमाले मकवानपुरको सबैभन्दा ठूलो दल हो । तर निर्वाचनको केही महिना मात्रै अघि पार्टी विभाजनको पीडा भोगेको एमाले अब एक्लै मैदानमा ओर्लदै छ ।
नेकपा एमाले स्थानीय तह निर्वाचनको आन्तरिक तयारीमा जुटीरहेको बेला सत्तापक्षको गठबन्धनले एमालेलाई धक्का पुग्ने विश्लेषकहरुको भनाई छ । एमालेविरुद्ध जिल्लाका सत्तारुढ गठबन्धन एक भएर निर्वाचनमा होमिने भएपछि एमालेले तयारीलाई अझै चुस्त बनाउनु पर्ने चुनौती देखिएको छ ।
अघिल्लो स्थानीय तह निर्वाचनमा एमालेले मकवानपुरमा ६ वटा स्थानीय तह तथा नेपाली कांग्रेस र माओवादीले २ /२ वटा स्थानीय तह जितेका थिए । एमालेले आमरुपमा पार्टी विभाजनको असर नपरेको दावी गरे पनि नेकपा (एकीकृत समाजवादी) को वडा तहैसम्म संरचना निर्माण भएको छ । एमालेबाट विभाजन भएको निर्माण भएको नेकपा (एस), नेपाली कांग्रेस, माओवादी केन्द्र, जनता समाजवादी र राष्ट्रिय जनमोर्चाले एक भएर वडा तहबाटै गठबन्धन गर्ने सहमति गरेसँगै मकवानपुरे राजनीतिमा एमाले एक्लो भएको छ ।
मकवानपुर । नेकपा एमालेले मकवानपुरका १० वटै स्थानीय तहमा निर्वाचन प्रशिक्षण कार्यक्रम गर्ने भएकाे छ । चैत १८ गते शुक्रबार निर्वाचन लक्षित पार्टी प्रशिक्षण कार्यक्रम हुने भएको हाे ।
पार्टी प्रदेश र केन्द्रीय कमिटिबाट खटिएका प्रशिक्षकले प्रशिक्षण दिने कार्यक्रम तय भएको एमाले मकवानपुर अध्यक्ष एकालाल श्रेष्ठले बताए । मकवानपुरका सबै पालिकामा कम्तिमा २ सय पार्टी कार्यकर्ता प्रशिक्षण कार्यक्रममा सहभागी हुने तयारी गरिएको छ ।
निर्वाचनमा मतदातालाई मतदान गर्न सिकाउने, पार्टीको जनपरिचालन अभियानका बारेमा कार्यकर्तालाई प्रशिक्षित गर्ने र चुनावी एजेन्डा तय गर्ने लगायतका प्रशिक्षणका विषय राखिएको एमाले मकवानपुरले जनाएकाे छ ।
मकवानपुर । राप्रपा नेपाल मकवानपुर अध्यक्षमा गुरुप्रसाद सापकोटा चयन भएका छन् ।
विहीबार कमल थापा नेतृत्वकाे राप्रपा नेपाल मकवानपुरको हेटौंडामा भएको घोषणा सभामा वर्तमान अध्यक्ष अर्जुन ढुङ्गनाले सापकोटाको नाम जिल्ला अध्यक्षमा घोषणा गरेका हुन् । सभामै राप्रपा नेपालका केन्द्रीय अध्यक्ष थापाले सर्वसम्मत चयन भएका सापकोटालाई पार्टीको माईनेट र झण्डा हस्तान्त्रण गरेका थिए ।
यसअघि, सापकोटा राजेन्द्र लिङ्देन नेतृत्वको राष्ट्रिय प्रजातन्त्र पार्टी मकवानपुरका जिल्ला अध्यक्ष थिए । उनले केहिदिन अघि मात्रै राप्रपा भित्र सैद्धान्तिक विचलन देखिएको भन्दै साधारण सदस्य समेत नरहने गरि राप्रपा परित्याग गरेको घोषणा गरेका थिए ।
यसैगरी कमल थापाले राप्रपा नेपालको केन्द्रीय सदस्यमा मकवानपुरका बालकृष्ण कार्की र अम्बिका खतिवडा चयन गरेका छन् । उनीहरुलाई राप्रपाका केन्द्रीय अध्यक्ष कमल थापाले केन्द्रीय सदस्य पदको जिम्मेवारी पत्र प्रदान गरेका थिए ।
घाेषणा सभामा केन्द्रीय अध्यक्ष कमल थापाले आफुलाई राजनीतिमा कमजोर बनाउन चाहनेहरु पछिल्लो समय सकृय भएको बताए । उनले केही साथीहरू अलमलिनु भएको तर छिटै नै वास्तविकता बुझेर संगै हिड्न आउने बताए । ‘राप्रपाको बहुमत केन्द्रिय सदस्य आफ्नो पक्षमा रहेको र कानुन बमोजिम नै पार्टी फुटाउन सक्ने भए पनि आफू एक्लै पार्टीबाट बाहिरिएकाे हुँ’ थापाले भने– ‘अझै हजारौं सङ्ख्या लोकतन्त्र, हिन्दुराष्ट्र, सुशासनमा बिश्वास गर्ने समुह रहेकोले आफूले त्यसैको नेतृत्व गरेको छु ।’
गत मंशिरमा काठमाडाैमा भएकाे राप्रपाकाे महाधिवेशनमा पूर्व राजाको सचिव तथा सहयोगीले प्रतिनिधिलाई फकाउने र आफूलाई हराउने काम गरेकाे समेत सभामा थापाले बताए । अबको चुनाव सकेसम्म नेकपा एमाले सङ्ग मिलेर चुनाव लड्ने पक्षमा आफूहरु रहेकाे उनले जनाकारी दिए ।
मकवानपुर । नेपाल कम्युनिष्ट पार्टी (एकीकृत समाजवादी) हेटौंडा उपहानगरपालिका कमिटिले स्थानीय तह निर्वाचन अभियान थालनी गर्ने भएकाे छ ।
नगर कमिटिको मंगलबार बसेको चौथो पूर्ण बैठकले निर्वाचन केन्द्रित कार्ययोजना पारित गरेकाे छ । कार्ययाेजना पारित गरेसँगै नेकपा एसले चुनाव केन्द्रित अभियानकाे थालनी गर्ने भएकाे हाे । बैठकले हेटौंडा उपमहानगरपालिकाको हरेक वडामा यही चैत १९, २०,२१ र २२ गतेभित्र भेला, घरदैलो, सदस्यता वितरण, चुनावका लागि स्वयंसेवक समूह गठन गर्ने लगायतका कार्ययोजना पारित गरेको हो ।
बैठकमा एकीकृत समाजवादीका केन्द्रीय सदस्य एवं राष्ट्रियसभा सदस्य गोमा तिमल्सिनाले कार्ययोजना सफलताकाे शुभकामना दिदैं एकीकृत समाजवादी पार्टी कम्युनिष्ट जोगाउने आन्दोलनमा रहेकाे बताइन् । यस्तै, एकीकृत समाजवादी मकवानपुरका अध्यक्ष श्रीधर पाख्रेलले एकीकृत समाजवादीमा लाग्नेहरु पद र पैसाका लागि नलागेकाे बताए । कम्युनिष्ट आन्दोलन जोगाउँनैका लागि पार्टी निर्वाचनमा होमिएको पाख्रेल बताए ।
बैठकले पार्टीको हेटौंडा उपमहानगरपालिका कमिटीको प्रचार प्रसार संयोजकमा भुपेन्द्र पराजुलीलाई जिम्मेवारी प्रदान गरेको छ । बैठक पार्टी हेटौंडा उपमहानगरपालिका कमिटीका अध्यक्ष ध्रुव बहादुर भुजेलको अध्यक्षतामा तथा जिल्ला कमिटीका उपाध्यक्ष एवं हेटौंडा उपमहानगरपालिकाका उप प्रमुख मीनाकुमारी लामाको विशीष्ट आतिथ्यता भएकाे थियाे ।