खेलकुद तथा व्यापार महोत्सवः प्रमोदले नचाए हेटौंडेली दर्शक
Tags: No Comments
मकवानपुर । मकवानपुरकाे हेटौंडामा सञ्चालन भैरहेको खेलकुद तथा व्यापार महोत्सवमा सोमबार गायक प्रमोद खरेलले हेटौडेलीलाई नचाएका छन् । खरेलकाे सांगीतिक प्रस्तुति सुन्न हेटौडामा दर्शकहरुको भीड लागेको थियो ।
युवा पुस्ताले निकै रुचाएका गायक खरेलले महाेत्सवकाे आफ्ना करिब एक दर्जन गीत गाएका थिए । महोत्सवका दर्शकहरुले नाच्दै र गाउँदै उनलाई साथ दिएका थिए । सोमबार खरेलसंगै गायिका सहिमा श्रेष्ठ, गायक असिमकुमार कटुवाल र जादुगर बलराम सरकारको प्रश्तुती रहेको थियो । महोत्सवमा मंगलबार लोक गायक पशुपति शर्मा, लोक गायिका ज्योति मगरसहित मनोज गोर्खाली, ध्रुव विस्को, केको सिङ लगायतको प्रश्तुती रहने आयोजकले जनाएको छ ।
प्रत्येक दिन राष्ट्रिय तथा स्थानीय कलाकारहरुको प्रस्तुति रहँदै आएको महोत्सवमा दैनिक दर्शकको उपस्थिति बढ्दै गएकाे आयोजकले जनाएकाे छ । पुस १७ गतेसम्म सञ्चालन हुने महोत्सवमा २६० वटा विभिन्न स्टल रहेको छ । महोत्सवमा कृषि, पर्यटन, हस्तकला, अटो मोबाइलका साथै बाल उद्यान लगायत राखिएको छ । महोत्सवबाट खेलकुद विकास समितिलाई प्राप्त हुने रकमबाट वर्षभर खेलकुद प्रतियोगिता आयोजना गर्ने आयोजकले लक्ष्य राखेको छ । महोत्सवबाट मकवानपुर जिल्ला खेलकुद विकास समितिले करिब २५ लाख रुपैयाँ प्राप्त गर्ने बताइएकाे छ ।
मकवानपुर । साहित्यकार, मुक्तककार प्रीति आत्रेय ज्ञवाली मुक्तक सङ्ग्रह’चुटुक्क’ शनिबार सार्वजनिक भएको छ । शनिवार राजधानीको सोह्रखुट्टेस्थित लेखनाथ साहित्य सदनमा आयोजित एक कार्यक्रमकाबीच उक्त मुक्तक संग्रहको लोकार्पण गरिएको हो ।
नेपाली शिक्षा परिषद् (लेखनाथ साहित्य सदन) सोह्रखुट्टे, काठमाडौंमा शनिबार डा. रेणुका सोलु, ममता मृदुल, ज्ञवालीकी आमा मुक्तककार ज्ञवाली लगायतले मुक्तक संग्रहको विमोचन गरेका हुन् । नेपाल वेद विद्याश्रमका पाँच वटुकहरूको स्वस्ति वाचनबाट शुरू भएको कार्यक्रममा कल्पना काफ्लेले ‘चुटुक्क’ बारे समीक्षा गरेकी थिइन् ।
हामी र हाम्रो कृति समूहका अध्यक्ष मदन प्रसाद नेपालले समूह सार्वजनिक कृति बारे जानकारी गराएका थिए । साहित्यिक संघ संस्थाका प्रतिनिधिसहित सम्मिलित कार्यक्रमको सञ्चालन साहित्यकार भुवन सिवाकाेटी चौघरेले गरेका थिए । सर्जकलाई कृतिगत शुभकामना सहित साहित्यिक सर्जकहरुले विमोचित कृति चुटुक्कबाट केही मुक्तक वाचन गरेका थिए ।
ज्ञवालीको यस अघी गत साल भाद्र ११ गते कविता संग्रह “अनुभूतिको इन्द्रेनी” सार्वजनिक भएको थियाे । उनका गीतहरू “आफ्नो त मन छ माइतीघरतिरै (तीज गीत २०७५) ” र “तिमी मेरो पूजा (प्रणय गीत २०७७)” युट्युबमार्फत प्रसारित छन् । उनका बिबिसि, साहित्यपोस्ट, हिमालय टाइम्स, कान्तिपुर, नेपाल समाचारपत्र, नेपालनाम्चा, सहीखबर, संसारन्यूज, वैजयन्ती साहित्यिक पत्रिका, हाम्रो पुरुषार्थ, नारी, कल्पतरु, दायित्व आदि विभिन्न पत्रपत्रिका तथा अनलाइनहरूमा विभिन्न समसामयिक विषयसित सम्बन्धित लेख रचनाहरू प्रकाशित भएका र हुँदै गरेका छन् ।
कम्बोडियालाई कर्मभूमि बनाएकी आत्रेय प्रवासमा रहेर साहित्यसँगै ज्योतिष फलादेशको माध्यमबाट पनि समाजसेवा क्रियाशील छिन् । उनी नेपालकै पहिलो नारी राशिफल लेखिका पनि हुन् । हामी र हाम्रो कृति समूहकी आजीवन सदस्य रहेकी उनको पछिल्लो कृति ‘चुटुक्क’ समूहको नवौं कृतिका रूपमा सार्वजनिक भएको हो ।
युद्ध प्रसाद स्मृति सम्मानबाट आचार्य सम्मानित
Tags: No Comments
आचार्यकाे पाँचौं कृति ‘जुनेली’ खण्डकाव्यको गृह विमोचन

पुरूषोत्तम आचार्यकाे पाँचौं कृति ‘जुनेली’ खण्डकाव्यको गृह विमोचन गरिएको छ । शनिबार हेटौडामा आयोजित एक कार्यक्रमबीच आचार्यकाे जुनेली गृह विमाेचन गरिएकाे हाे ।
प्रगतिशील लेखक नवराज शर्मा. साहित्यकार निमेष निखिल प्राध्यापक निरा शर्मा, बागमती गाउँपालिका अध्यक्ष सर्केश घलान, हेटौडा उपमहानगरपालिका ४ नं वडा अध्यक्ष नविन सिग्देल,प्रलेस मकवानपुर अध्यक्ष श्रीराम अधिकारी लेखक पुरुषोत्तम आचार्यलगायतले जुनेलीकाे गृह विमोचन गरेका हुन् । जुनेलीकाे गृह विमाेचनसँगै कृतिमाथि टिप्पणी गरिएकाे छ । सर्जक सञ्जाल मकवानपुरका संयोजक निमेष निखिल, प्राध्यापक निरा शर्मा, कमला बराइली र राजनीतिकर्मी प्रदीप वालाचनले आचार्यको कृतिमाथि टिप्पणी गरेका थिए ।
जुनेलीमाथि टिप्पणी गर्दै निमेष निखिलले लेखन र व्यवहारमा उस्तै रहेका कवि आचार्यको पुस्तकले जनयुद्धकाे चित्रण गरेकाे बताए । समाजमा रहेका शोषित र पीडित वर्गले भोग्नुपरेको अन्यायको पक्षमा बोलेको पुस्तकलाई जनयुद्धकाे ऐनाकाे रुपमा लिन सकिने उनले बताए । ‘जनयुद्ध समाप्त भई शान्तिप्रक्रिया पछिको समाजको अवस्थाबारे आचार्यले अर्काे पुस्तक प्रकाशन गरी चित्रण गर्नु पर्छ अनी मात्र पूर्णता पाउने छ’ उनले भने ।
प्राध्यापक निरा शर्माले साहित्यकाे एउटा विधा खण्डकाव्य रहेकाे तथा लोक लयमा आधारित जुनेली कृति द्वन्द्वात्मक भौतिकवादमा आधारित रही लेखिएको बताइन् । जुनेली शाेषक र शासितकाे कथा समेत भएकाेले हरेक व्यक्तिलाई नेपाली समाजको चरित्र चित्रण गरिएकाे उनले बताइन् । ‘समाजमा वर्गका आधारमा रहेका शोषित र शोषक रहेका छन् । उनीहरुकाे कथालाई जुनेलीले बाेलेकाे छ’ उनले भनिन् ।
यसैगरी अर्का टिप्पणीकर्ता कमला बराइलीले कृतिले दलितहरुकाे अवस्था चित्रण गरेकाे बताइन् । उनले भनिन् समाजका हरेक तहमा दासत्वकाे अवशेष रहेकाेले अव त्यस्ताे स्वीकार गर्न नसकिने बताइन् । निवर्तमान बागमती प्रदेश सभा सदस्य प्रदीप वालाचनले जुनेलीका पात्रका चरित्रहरूमा आफैंलाई पाउने बताए। ‘जनयुद्धकाे समयकाे सामाजिक विषयवस्तुलाई लेखकले यसरी उल्लेख गर्दा गर्व लाग्छ’ उनले भने ‘नारीहरूको दिनचर्या, बेहोर्नुपरेका हिंसा, गोठाले जीवनको चर्चा पुस्तकमा रहेकाेले आफ्नै जीवन तथा घरको कथा जुनेलीले बाेलेकाे छ ।’
कार्यक्रममा साहित्यकार आचार्यले जुनेलीका केही काव्य वाचन गरेका थिए । जुनेलीकाे कथामा रहेर कलाकारहरु आईपी आचार्य नमस्ने दिवाकर पराजुली र इलिसा पराजुलीले नाटक समेत प्रस्तुत गरेका थिए ।
प्रलेस मकवानपुरका अध्यक्ष श्रीराम अधिकारीको सभाध्यक्षता तथा प्रगतिवादी लेखक नवराज शर्माको प्रमुख आतिथ्यता भएकाे कार्यक्रममा प्रदेशसभा सदस्य माननीय प्रेमबहादुर पुलामी, जिल्ला समन्वय समिति मकवानपुरका प्रमुख ललितबहादुर घलानलगायतकाकाे आतिथ्यता रहेको थियो ।
मकवानपुर । नेपाल चलचित्र संघले बागमती प्रदेश सरकारलाई ज्ञापनपत्र बुझाएकाे छ । संघले बागमती प्रदेश सरकारलाई मनोरञ्जन कर समायोजनलगायतका विषयमा ज्ञापनपत्र बुझाएकाे हाे ।
शुक्रबार आन्तरिक मामिला तथा कानून मन्त्री गंगा नारायण श्रेष्ठलाई संघका महासचिव नरेन्द्र महर्जन, निर्माता तथा कलाकार दीपकराज गिरी, नेपाल चलचित्र प्राविधिक संघका अध्यक्ष पुष्कर लामा लगायत चलचित्रकर्मीहरुले मन्त्रालयमै ज्ञापनपत्र बुझाए हुन् । ज्ञापनपत्र बुझाउँदै महासचिव महर्जनले चलचित्र क्षेत्रले संघीय सरकारलाई १५ प्रतिशत चलचित्र विकास शुल्क, प्रदेश सरकारलाई ५ प्रतिशत मनोरञ्जन कर र त्यसपछि १३ प्रतिशत मुल्य अभिवृद्धि कर गरी ३३ प्रतिशत भन्दा बढी करहरु बुझाउनुपर्ने बाध्यता रहेको बताए ।
ज्ञापनपत्र बुझ्दै मन्त्री श्रेष्ठले प्रदेश सरकारसँग त्यति धेरै अधिकार नभएपनि अधिकारभित्र रहेका विषयलाई आवश्यक सम्बोधन गरिने संघका पदाधिकारीलाई जानकारी गराएका थिए । ‘चलचित्र सम्बन्धी कानून तयार गरी कार्यान्वयनमा ल्याउने तयारी भइरहेकाे छ’ मन्त्री श्रेष्ठले भने ‘आगामी आर्थिक वर्ष विधेयक पारित गरी कार्यान्वयनमा ल्याउने छाैं । उनले हल सञ्चालन, नियमन र अनुगमनको क्षेत्राधिकार पनि हामीलाई नै रहेकाले विधेयक निर्माण पछि सहजता हुने बताए । करको समस्या समाधानकाे विषय संसदमा पेश गरी अगाडी बढाउने प्रतिवद्धता उनले व्यक्त गरे ।
कोशी प्रदेशमा पनि प्रदेशको ५ प्रतिशत करमा समायोजन गरी नेपाली चलचित्रको १.५ प्रतिशत र विदेशी चलचित्रको ३ प्रतिशत कायम गरेको कलाकार संघकाे टाेली मन्त्री श्रेष्ठलाई अवगत गराएकाे थियाे । ‘कला संस्कृति जर्गेना गर्ने माध्यम रहेको चलचित्र उद्योगलाई तीनतहकै सरकारको साथ सहयोग आवश्यक रहेको छ’ कलाकार दिपकराज गिरी भने ‘सरकारले चलचित्र उद्योगलाई हेर्ने दृष्टिकोण अन्य उद्याेगलाई भन्दा फरक पाएका छाैं ।
शुक्रबार नै चलचित्रकर्मीकाे टाेलीले बागमती प्रदेश मुख्यमन्त्री तथा मन्त्रिपरिषद् कार्यालयका प्रमुख सचिव घनश्याम उपाध्यायलाई समेत ज्ञापनपत्र बुझाएका छन् । ज्ञापनपत्र बुझ्दै प्रमुख सचिव उपाध्यायले चलचित्र प्रवर्द्धन र समग्र विकासमा प्रदेश सरकारको साथ रहने प्रतिवद्धता व्यक्त गरे ।
ज्ञापनपत्र बुझाउने समूहमा नेपाल चलचित्र संघ महर्जन, कलाकार गिरी, कलाकार एंव निर्देशक दीपाश्री निरौला, प्रदेश सञ्चार रजिष्ट्रार रेवतीप्रसाद सापकोटा, नेपाल चलचित्र प्राविधिक संघ अध्यक्ष पुष्कर लामा, कलाकार निर्मल शर्मा ‘गैंडा’, राज कटुवाल, सुमन गिरी, ध्रुव न्यौपाने, सुशान्त कुमार श्रेष्ठ लगायतको सहभागिता रहेकाे थियो ।
वसन्त हरियाली
म कहाँ छु भनेर
कहिल्यै पनि सोचेको थिइनँ
म कस्तो छु भनेर
कहिल्यै पनि सोचेको थिइनँ
मैले त बस् मेरो पछाडि दुनियाँ छ
दुनियाँको अगाडि म छु सोचेको थिएँ
लाग्यो
मलाई सुनिरहेको छ दुनियाँले
लाग्यो
मलाई देखिरहेको छ दुनियाँले
लाग्यो
म प्यारो पात्र भइसकेँ दुनियाँको
बिस्तारै मेरो वरिपरि
मेरै चर्चाहरू भुनभुनाउन थाले
म घेरिएँ एउटा ठुलो भीडले
भीडले हात समाउन खोज्यो
चुँडिए औँलाहरू
च्यातिए बाहुलाहरू
भीडले अंगालो हाल्न खोज्यो
टुक्रा टुक्रामा च्यातिएर सकियो कोट
भीडले पाउ छुन खोज्यो
तन्किए खुट्टाहरू
मेटिए बुट्टाहरू
फुस्कियो पाइन्ट
म जमीनमा पछारिएँ बेस्सरी
तैपनि
लाज ढाक्नको लागि
म भीडको पाइतालामुनि
शीर झुकाएर हिँडिरहेँ
पलपलमा दुखिरह्यो जीवन
सहदै गएँ पीडाहरू
बहदै गएँ भीडको बिचैबिचबाट
एकदिन समयले मलाई
किनार लगाइ दिएछ
अहिले म भीड भन्दा पर छु
अहिले म भन्दा भीड पर छ
भीडसँग कुनै दुस्मनी छैन मेरो
भीडसँग कुनै मित्रता छैन मेरो
आऊ तिमी पनि
दुनियाँले नाङ्गेझार पार्नु पहिल्यै
दुनियाँले तिमीलाई ज्यूँदै मार्नु पहिल्यै
त्यो रमितेहरूको भीड छिचोलेर
त्यो अशान्तिको भीड छिचोलेर
क्षितिज पारीको मेरो
शान्त बस्तीमा आऊ
यहाँ भीड छैन
यहाँ प्रेम छ
केवल प्रेम छ
कैलाली
हाल दक्षिण कोरिया