भरतपुर । बागमती प्रदेशका मुख्यमन्त्री इन्द्रबहादुर बानियाँले साहित्यलाई मानव जीवनको यथार्थ चित्रण गर्ने माध्यम रहेकाे बताउनु भएकाे छ । बागमती प्रदेशको सांस्कृतिक तथा साहित्यिक गौरवलाई थप उचाइमा पुर्याउने उद्देश्यसहित चितवनको भरतपुरमा शनिबारबाट सुरु भएकाे ‘दोस्रो बागमती साहित्य महोत्सव–२०८३’ काे उद्घाटन गर्दै उहाँले यस्तो बताउनु भएकाे हाे ।
‘जन्मदेखि मृत्युसम्मका अनुभूति र जीवनका विविध पक्षलाई जीवन्त ढंगले साहित्यले अभिव्यक्त गर्छ’ मुख्यमन्त्री बानियाँले भन्नुभयो ‘साहित्यबाट प्राप्त ज्ञानले विज्ञान र समाजको विकासमा समेत महत्त्वपूर्ण योगदान पुर्याउँछ ।’ मुख्यमन्त्री बानियाँले बागमती प्रदेशभित्रका कला, संस्कृति, भाषा, लिपि र संस्कारको संरक्षण तथा प्रवर्द्धन गर्दै ती सम्पदालाई नयाँ पुस्तासम्म हस्तान्तरण गर्न प्रदेश सरकार प्रतिबद्ध रहेको बताउनु भयो ।
बागमती प्रदेशका संस्कृति तथा पर्यटनमन्त्री सुरेश श्रेष्ठले चितवनको पर्यटन र साहित्यलाई एकआपसमा जोड्न आवश्यक रहेको बताउनुभयो । ‘चितवनका मौलिक संस्कृति, परम्परा र सम्पदालाई साहित्यिक गतिविधिमार्फत राष्ट्रिय तथा अन्तर्राष्ट्रिय स्तरमा परिचित गराउन सकिन्छ’ उहाँले भन्नुभयो । त्यसैगरी सहकारी तथा गरिबी निवारणमन्त्री विनु रायमाझी पौडेलले कला र साहित्यलाई राष्ट्रको आत्माको संज्ञा दिँदै समाज रूपान्तरणमा यसको भूमिका अतुलनीय रहने बताउनुभयो ।
भरतपुर महानगरपालिकाका कार्यवाहक प्रमुख चित्रसेन अधिकारीले भौतिक पूर्वाधारको विकाससँगै ज्ञान, चेतना, कला र संस्कृतिको विकासलाई पनि समान प्राथमिकतामा राख्नुपर्ने आवश्यकता औँल्याउनुभयो । ‘भरतपुरमा प्रदेशस्तरीय साहित्यिक महोत्सव आयोजना हुनु गौरवको विषय हाे’ उहाँले भन्नुभयो ‘लोपोन्मुख सांस्कृतिक मूल्य–मान्यताको संरक्षणमा साहित्यकारहरूको योगदान प्रशंसनीय रहेको छ ।’
बागमती प्रदेशको सांस्कृतिक विविधता, भाषा–साहित्य र मौलिक सम्पदाको संरक्षण तथा प्रवर्द्धन गर्दै नयाँ पुस्तामा साहित्य र संस्कृतिप्रति आकर्षण बढाउने उद्देश्यले महोत्सव आयोजना गरिएको डिभिजन वन कार्यालय भरतपुर चितवनका प्रमुख एवं महोत्सवका योजनाकार विष्णुप्रसाद आचार्य बताउँछन् ।
‘साहित्य, कला र संस्कृतिको प्रवर्द्धन, बागमती सभ्यताको संवर्द्धन’ भन्ने मूल नारासहित बागमती प्रदेश सरकारको संस्कृति तथा पर्यटन मन्त्रालयको आयोजना तथा भरतपुर महानगर प्रज्ञा–प्रतिष्ठानको संयोजनमा आयोजित महोत्सवले साहित्यका माध्यमबाट समाजलाई सचेत, सिर्जनशील र जागरूक बनाउने बताइएकाे छ ।
महोत्सवमा साहित्यका विविध विधा, समसामयिक विषय र सांस्कृतिक आयामहरूमा केन्द्रित बहस, छलफल तथा अन्तरक्रियात्मक कार्यक्रमहरू आयोजना गरिने छन् । यसअघि धादिङमा सम्पन्न प्रदेशस्तरीय साहित्यिक भेलाको निरन्तरताका रूपमा लिइएको महोत्सव आइतबार विभिन्न साहित्यिक गतिविधिसहित सम्पन्न हुने बताइएकाे छ ।
उद्घाटन सत्रमा बागमती प्रदेशसभा सदस्य गीता गुरुङ, डा. लक्ष्मणप्रसाद गौतम, रामबाबु घिमिरे तथा नारायणप्रसाद अधिकारीलगायतले महोत्सवमा शुभकामना व्यक्त गर्नुभएको थियो । प्रतिष्ठानका अध्यक्ष नारायणप्रसाद खनालको सभाध्यक्षतामा भएकाे कार्यक्रममा संस्कृति तथा पर्यटन मन्त्रालयका सचिव दीपेन्द्र सुवेदीले स्वागत गर्नु भएकाे थियो । कार्यक्रमलाई प्रतिष्ठानका सचिव बालकृष्ण थपलियाले सहजिकरण गर्नुभएको थियो ।
मकवानपुर । मकवानपुरकाे हेटौंडामा एकै मञ्चमा ४ जना स्रष्टा सम्मानित हुनु भएकाे छ । मकवानपुरको साहित्यिक संस्था मातृभूमि साहित्य समाजले शनिबार हेटौंडामा ‘मातृभूमि साहित्य उत्सव–२०८३’ कार्यक्रम आयोजना गरी ४ जनालाई सम्मान गरिएको हाे ।
सम्मानित हुनेमा प्रदिप रोदन (गोरखा), राजकुमार लामिछाने (मकवानपुर), बासुदेव पाण्डेय ‘प्रभाकर’ (सुर्खेत) र स्वस्तिका बानियाँ (मकवानपुर) हुनुहुन्छ । उक्त कार्यक्रममा गजलकार रोदनलाई १५ हजार रुपैंया राशीकाे ‘राजकुमार स्मृति मातृभूमि सम्मान–२०८२’ बाट सम्मानित गरिएकाे हाे । यस्तै हास्यव्यङ्गयकार लामिछानेलाई १५ हजार रुपैंया राशीकाे ‘क्षेत्रबहादुर स्मृति मातृभूमि सम्मान–२०८२’ बाट सम्मानित गरिएकाे समाजका सचिव किशन पौडेलले बताउनु भयो ।
यस्तै छन्द कवि ‘प्रभाकर’ लाई १५ हजार राशीकाे ‘होमनाथ बलदेवी छन्द साहित्य सम्मान–२०८२’ बाट सम्मानित गरिएकाे उनले जानकारी दिनुभयो । उनका अनुसार बानियाँलाई ७ हजार ५ सय राशीकाे ‘मंगलादेवी स्मृति मातृभूमि सम्मान–२०८२’ बाट सम्मानित गरिएकाे हाे ।
‘मातृभूमि साहित्य उत्सव–२०८३’ मा प्राज्ञिक विमर्श अन्तर्गत दुई वटा कार्यपत्रहरू प्रस्तुत गरिएका थिए । ‘साहित्यमा कृत्रिम बौद्धिकता’सम्बन्धी डा. घनश्याम घिमिरेले प्रस्तुत गर्नु भएकाे कार्यपत्र माथि साहित्यकार डीबी बर्तौला टिप्पणी गर्नु भयो । यसैगरी ‘साहित्यमा अध्यात्म दर्शन’ विषयमा डा. ज्ञानु अधिकारीले प्रस्तुत गर्नु भएकाे कार्यपत्रमा साहित्यकार अनिता कोइरालाले टिप्पणी गर्नु भयो ।
यस्तै ‘नारी स्रष्टाको साहित्य सिर्जनामा पुरुष अभिव्यक्ति’ शिर्षकमा भएकाे अन्तर संवादमा समालोचक चेतना शर्मा (काठमाडौं) समालोचक अनिता कोइराला (काठमाडौं) उपन्यासकार कल्पना खरेल (नेपालगंज) ले बहस गर्नु भएकाे थियाे । यस सत्रकाे सहजिकरण साहित्यकार डा. निमेष निखिल (हेटौंडा) ले गर्नु भएकाे थियाे ।
समाजका अध्यक्ष कृष्ण प्रसाद दाहालको सभाध्यक्ष, साहित्यकार धनराज गिरीकाे प्रमुख आथित्यतामा भएकाे कार्यक्रमको सहजीकरण समाजका उपाध्यक्ष हेमन्त ढुङ्गेलले गर्नुभएको थियो ।
नेपाली भाषा, साहित्य तथा कलाको संरक्षण, संवर्द्धन र प्रवर्द्धन गर्ने उद्देश्यले वि.सं.२०५६ सालमा स्थापना भएको समाजले स्थापना कालदेखि नै विविध साहित्यिक तथा सांस्कृतिक गतिविधिहरूलाई निरन्तरता दिँदै आइरहेको बताइएकाे छ। साहित्य समाजले स्थापित तथा नवोदित प्रतिभाहरूलाई साहित्य, कला, सङ्गीत एवं सामाजिक सेवाका विभिन्न क्षेत्रमा योगदान पुर्याएवापत पुरस्कार तथा सम्मान गर्दै आएको छ।
मकवानपुर । मकवानपुर हेटौंडामा ४ जना स्रष्टा सम्मानित हुने भएका छन् । मकवानपुरको साहित्यिक संस्था मातृभूमि साहित्य समाजले स्रष्टाहरु प्रदिप रोदन (गोरखा), राजकुमार लामिछाने (मकवानपुर), बासुदेव पाण्डेय ‘प्रभाकर’ (सुर्खेत) र स्वस्तिका बानियाँ (मकवानपुर) लाई सम्मान गर्न लागेकाे हाे ।
आगामी जेठ ९ गते शनिबार समाजले हेटौंडामा आयोजना गर्ने ‘मातृभूमि साहित्य उत्सव–२०८३’ मा गजलकार प्रदीप रोदनलाई ‘राजकुमार स्मृति मातृभूमि सम्मान–२०८२’, साहित्यकार राजकुमार लामिछानेलाई ‘क्षेत्रबहादुर स्मृति मातृभूमि सम्मान–२०८२’, छन्द कवि बासुदेव पाण्डेय ‘प्रभाकर’ लाई ‘होमनाथ बलदेवी छन्द साहित्य सम्मान–२०८२’ र स्वस्तिका बानियाँलाई ‘मंगलादेवी स्मृति मातृभूमि सम्मान–२०८२’ बाट सम्मानित गरिने सचिवकिशन पौडेलले बताउनु भयो ।
हेटौंडा उपमहानगरपालिकासँगको सहकार्यमा शनिबार हुने ‘मातृभूमि साहित्य उत्सव–२०८३’ मा सम्मानसहित अन्तरसंवाद र कार्यपत्र प्रस्तुतिसमेत रहने सचिव पौडेलले जानकारी दिनुभयो । उनका अनुसार उत्सवमा ‘नारी स्रष्टाको साहित्य सिर्जनामा पुरुष अभिव्यक्ति’ विषयक विशेष अन्तरसंवाद हुनेछ । बहसकर्ताहरू समालोचक चेतना शर्मा, अनिता कोईराला र उपन्यासकार कल्पना खरेल रहने अन्तरसंवादमा मकवानपुरका साहित्यकार डा. निमेष निखिलले सहजकर्ताको भूमिका निर्वाह गर्नुहुनेछ ।
यसैगरी उत्सवमा दुईवटा महत्वपूर्ण कार्यपत्रहरू पनि प्रस्तुत गरिने । समालोचक डा. ज्ञानु अधिकारीले ‘साहित्यमा आध्यात्म दर्शन’ विषयमा प्रस्तुत गर्नुहुने कार्यपत्रमा अनिता कोईरालाले टिप्पणी गर्नुहुने कार्यक्रम रहेकाे पौडेलले जानकारी दिनुभयो । उनका अनुसार समालोचक घनश्याम घिमिरेले ‘साहित्यमा कृत्रिम बौद्धिकता’ विषयमा कार्यपत्र प्रस्तुत गर्नुहुनेछ भने मकवानपुरका साहित्यकार डीबी बर्तौलाले टिप्पणी गर्नुहुनेछ ।
नेपाली भाषा, साहित्य तथा कलाको संरक्षण, संवर्द्धन र प्रवर्द्धन गर्ने उद्देश्यले वि.सं.२०५६ सालमा स्थापना भएको समाजले स्थापना कालदेखि नै विविध साहित्यिक तथा सांस्कृतिक गतिविधिहरूलाई निरन्तरता दिँदै आइरहेको बताइएकाे छ। साहित्य समाजले स्थापित तथा नवोदित प्रतिभाहरूलाई साहित्य, कला, सङ्गीत एवं सामाजिक सेवाका विभिन्न क्षेत्रमा योगदान पुर्याएवापत पुरस्कार तथा सम्मान अर्पण गर्दै आएको छ।
वाचा कसम टुटी जान्छन् प्रेमकाे सुगन्ध रहिरहन्छ
कयौं साथ छुटी जान्छन् प्रेमकाे सुगन्ध रहिरहन्छ
कहिले काहीँ नसोचेकाे भइदिन्छ हाम्रो जिन्दगीमा
आफ्नैहरुले लुटी जान्छन् प्रेमकाे सुगन्ध रहिरहन्छ
नेपालकाे नवलपरासी जिल्लामा रहेर साहित्य कर्ममा रमाउँदै आउनु भएका व्यक्ति निर्दोष जीवन । उहाँसंग व्यक्तिगत रुपमा मेरो चिनजान सामान्य छ । सामान्य यस अर्थमा कि खासै लामो समय संगत छैन । एक पटक बागमती प्रदेशको राजधानी हेटौंडामा चितवनका गजलकार अविरत सुमनसँग एक दिनको दिउँसो १५-२० मिनेटको चिया गफ भएको छ भने चितवनको सम्पूर्ण किताब नारायणगढमा एक विहानको त्यस्तै १०-१५ मिनेट गफ भएका छन् ।
सामाजिक संजालमा जोडिएको केही समयपछि यी दुई भेट अप्रत्याशीत भएका हुन् । त्यो बाहेक हाम्रो सशरीर भेट तथा औपचारिक अनौपचारिक कुराकानी हुन पाएको छैन । उहाँले उक्त मुक्तक सङ्ग्रहको विमोचन हुने समय निमन्त्रणा दिएर पनि पुग्न नसकेको म पुस्तक प्राप्त हुँदा उतै भएको अनुभूति गरिरहे ।
साहित्यलाई माया गर्ने मैले पुस्तक पढेपछि केही न केही लेख्छु । समिक्षाको पाटो अलग हो, एउटा पाठकको रुपमा पुस्तक पढ्दा विधागत रुपमा जे जे पाए सरसर्ती लेख्ने जमर्को रहन्छ । मेराे लागि माया गरेर प्रेमकाे सुगन्ध पठाइ दिनु भएकाे थियाे सम्पूर्ण किताबका लेखराम सापकाेटा र सुमन घिमेरेकाे साथमा । त्यही मायाले प्राप्त गरेकाे प्रेमकाे सुगन्ध अध्ययन गर्दा केही लेख्न मन लाग्याे । पुस्तक प्राप्तीकाे केही समय पछी पाठककाे आँखाबाट पढ्दा जस्ताे बुझियाे त्यसैकाे आधारमा साहित्यलाई माया गर्ने साहित्यप्रेमी भएकाे नाताले आफ्नाे विचार व्यक्त मात्र गर्न खाेजेकाे छु ।
कुनै समय शम्भु गिरी ‘अभागी’ नामले चितवनबाट साहित्यमा पढिएको र सुनिएको नाम निर्दोष जीवन भएको भन्ने थाहा पाउन उहाँको प्रेमको सुगन्धको दोस्रो सस्करण हात पार्नु परेको छ । गीत गायन र संगीत प्रति पनि आवद्ध जीवनकाे प्रेमकाे सुगन्ध दशौं कृति हाे जुन संग्रहमा पनि आएकाे छ ।
प्रेमकाे सुगन्धमा जम्मा एक सय पृष्ठ छ । भूमिका समेत अन्य गरे केही थपिएका छन् पृष्ठ । एक सय पृष्ठभित्र दुई सय मुक्तक सजिएका छन् । गजल मञ्च चितवनले प्रकाशन गरेकाे तथा सम्पूर्ण किताब नारायणगढ वितरक रहेकाे संग्रहका भूमिकाले यसकाे वजन बढाएको छ ।
मुक्तक साहित्यको एउटा अत्यन्तै लोकप्रिय र मर्मस्पर्शी विधा हो।
’मुक्तक’ शब्द संस्कृतको ‘मुक्त’ धातुबाट बनेको हो, जसको अर्थ ‘स्वतन्त्र’ भन्ने हुन्छ। साहित्यको विधाहरु मध्ये मुक्तक कविताको उप विधा हो । मुक्त छोटो रुपमा आफ्नै संरचनामा रचना गरिन्छ जुन आफैमा पूर्ण हुन्छ ।
नेपाली साहित्यमा लेखिने मुक्तकहरू चार हरफमा लेखिन्छ
* पहिलो र दोस्रो हरफ: विषयवस्तुको उठान र पृष्ठभूमि तयार गर्छन्। यी दुई हरफमा ‘अन्त्यानुप्रास’ मिलेको हुन्छ।
* तेस्रो हरफ: यो हरफ स्वतन्त्र हुन्छ र यसले चौथो हरफमा आउने मुख्य प्रहारका लागि आधार तयार गर्छ।
* चौथो हरफ: यो सबैभन्दा शक्तिशाली हरफ हो, जसले सिङ्गो मुक्तकको अर्थ वा सन्देशलाई झट्का दिने गरी प्रस्ट पार्छ। यसमा पनि पहिलो र दोस्रो हरफकै अनुप्रास दोहोरिन्छ।
* आकारमा सानो: थोरै शब्दमा धेरै कुरा भनिएको हुन्छ।
* स्वतन्त्रता: एउटा मुक्तकले एउटा पूर्ण विचार व्यक्त गर्छ।
* तीक्ष्ण प्रहार: यसले पाठकको मनमा सिधै र गहिरो प्रभाव पार्छ।
* गेयात्मकता: मुक्तकमा लय मिलाएर गाउन वा वाचन गर्न सकिने गेयात्मकता हुन्छ
नेपाली साहित्यमा मोतीराम भट्टलाई आधुनिक मुक्तकका प्रवर्तक मानिन्छ। अचेल सामाजिक सञ्जाल र साहित्यिक कार्यक्रमहरूमा मुक्तक निकै रुचाइने विधा बनेको छ।
नेपाली मुक्तक साहित्यमा ‘निर्दोष जीवन’ एक परिचित नाम हो। उहाँको पछिल्लो कृति ‘प्रेमको सुगन्ध’ ले पाठकको मनमा एउटा छुट्टै छाप छोड्न सफल देखिन्छ। प्रकाशन भएकाे एक महिना भित्रै दोस्राे संस्करण प्रकाशन हुनुले समेत यसलाई पुष्टी गरेकाे छ । नामजस्तै पुस्तकभित्रका प्रत्येक मुक्तकले प्रेमको एउटा नयाँ र पवित्र सुगन्ध छरेका छन्।
यस सङ्ग्रहमा प्रेमलाई अतिरञ्जित नगरी निकै स्वाभाविक रूपमा प्रस्तुत गरिएको छ। प्रेममा हुने मिलनको खुसी, बिछोडको पीडा र समर्पणको भावलाई लेखकले चार लाइनको कसिलो घेराभित्र जीवन्त पारेका छन्। केवल रोमान्टिक प्रेम मात्र नभएर, जीवनका भोगाइ र सानातिना खुसीलाई पनि मुक्तकको विषय बनाइनु यस पुस्तकको सबल पक्ष हो। संग्रहमा प्रेम मात्रै अटाएका छैन विकृति विसंगती देश प्रेम लगायत पनि समेटिएका छन् ।
विदेशभन्दा प्यारो लाग्छ आफ्नै सुन्दर देश
झनै प्यारो लाग्छ मलाई आफ्नै भाषा भेष
विदेशीकाे संस्कृति त भो भो चाहिँदैन
नेपालीकाे संस्कृति नै लाग्छ मलाई बेस
मुक्तक विधामा ‘मार’ को ठुलो महत्त्व हुन्छ। ‘प्रेमको सुगन्ध’ का अधिकांश मुक्तकहरूमा चौथो हरफमा पुग्दा पाठकले एउटा मीठो झट्का वा गहिरो अर्थ प्राप्त गर्छन्। अनुप्रास र लय विधानमा लेखकको पकड राम्रो देखिन्छ, जसले गर्दा यी मुक्तकहरू वाचन योग्य र कर्णप्रिय बनेका छन्। तर केही मुक्तक लेख्न सिक्दा सिक्दै गरेकाे अवस्थाकाे जस्तो समेत पाइन्छ । प्रेमका सुरुका अवस्था र अन्त्य अवस्था सम्मका मुक्तकले प्रेममय भएकाे छ संग्रह ।
आवाज विहिन प्रेमकाे गहिराई नाप्न सकिदैन् । त्यसकाे अनुभूति गर्न सकिन्छ । प्रेम भोगाई सँगै समर्पण पीडा स्मृतिकाे मौन स्वीकृत समेत भएकाे संग्रहकाे अध्ययनबाट प्राप्त गर्न सकिन्छ । त्यसैले प्रेमकाे सुगन्ध कृति मात्रै हाेइन अनुभूति पनि हाे । सरल भाषा र सहज बुझाइ तथा गहन भाव समेटिएकाे ‘प्रेमको सुगन्ध’ प्रेमको खोजीमा रहेका र जीवनलाई सूक्ष्म रूपले बुझ्न चाहने पाठकका लागि एउटा उत्कृष्ट सङ्ग्रह हो। कतिपय ठाउँमा भावहरू दोहोरिए जस्तो लागे पनि यसको सरलता र इमानदारीले ती कमजोरीहरूलाई ओझेलमा पारिदिन्छ।
सङ्ग्रहमा प्रेमिल मुक्तकहरू यथेष्ट छन् । सामाजिक विषयवस्तुका मुक्तक पनि छन् । जीवनले आफ्नो पुस्तकमा प्रेमको विषयमा खुलेर लेखेका छन् । प्रेमलाई हृदयदेखि मनन गर्न र जीवनमा लागू गर्न सकियो भने साँच्चै जीवनमा प्रेमको सुगन्ध रहिरहने छ । ‘प्रेम सहनशील हुन्छ र दयालु हुन्छ । प्रेमले डाह गर्दैन, न शेखी गर्छ । प्रेम हठी हुँदैन, न ढीट हुन्छ । प्रेमले आफ्नै कुरामा जिद्दी गर्दैन, झर्को मान्दैन, खराबीको हिसाब राख्दैन प्रेम खराबीमा प्रसन्न हुँदैन, तर ठीक कुरामा रमाउँछ । प्रेमले सबै कुरा सहन्छ, सबै कुराको पत्यार गर्छ, सबै कुरामा आशा राख्छ, सबै कुरामा स्थिर रहन्छ । प्रेमको कहिल्यै अन्त्य हुँदैन ।’
अन्त कतै यति सुन्दर जून पाइँदैन
खबरदार उनकाे नजिक हुन पाँइदैन
ए दुनियाँ आँखा तरि कति मरिहत्ते गर्छस्
दाग लाग्छ अप्सरालाई छुन् पाइदैन्
साहित्य लेखनसँगसँगै गायन र संगीतमा रुचि राख्ने निर्दोषले गीत र मुक्तकबाट साहित्य लेखन सुरु गरेका हुन् । उहाँकाे ‘आशीर्वाद’ (गजल, मुक्तक र हाइकूसङ्ग्रह) पहिलो कृति हो । ‘नयाँ जीवन’ ‘प्रार्थना’ ‘मैयाँ’ ‘कोर्राको चोट’ ‘फस्ट लभ’ ‘प्रिय साथी’ ‘मेरो गीत’ र ‘नोष्टाल्जिया’ गरी ९ वटा कृति प्रकाशित भैसकेका छन् भने नेपाली मुक्तक साहित्यलाई अगाडि बढाउन यो कृतिले महत्वपूर्ण भूमिका खेल्नेछ भन्ने विश्वास लिएकाे छु।
अन्त्यमा गीत गजल मुक्तक हाइकु कथा उपन्यास लगातयकाे विधामा कलम दौडाउँदै आउनु भएका लेखकलाई कृतिगत सफलताका साथै निरन्तर साहित्यिक सृजनाकाे शुभकामना ।
मकवानपुर । सिस्नुपानी नेपाल मकवानपुरले विद्यार्थीबिच हास्यव्यङ्ग्य प्रतियोगिता गरेकाे छ । शनिबार हेटौंडामा सिस्नुपानीकाे स्थापना दिवसमा आयोजित प्रतियोगितामा नवोदय शिशु सदन प्रथम भएकाे छ ।
मकवानपुर जिल्लाभित्रका कक्षा १२ सम्मका विद्यार्थीहरूबिचको हास्यव्यङ्ग्य प्रहसन प्रतियोगितामा नवोदय शिशु सदन प्रथम भएको हो । नवोदयले प्रथम हुँदै १५ हजार रुपैयाँ राशी पुरस्कार प्राप्त गर्यो । प्रतियोगितामा जनप्रिय मावि दोस्रो हुँदा १० हजार राशीकाे पुरस्कार प्राप्त गरेकाे हाे । यस्तै ७ हजार राशिसहित बुद्ध माविले तृतीय पुरस्कार तथा ४ हजार राशिसहित शारदा माविले प्रोत्साहन पुरस्कार प्राप्त गरेको छ ।
हास्यव्यङ्ग्यका विविध प्रस्तुति र प्रतियोगिता गर्दै आएको सिस्नुपानीले नवपुस्ताको कलाकार पहिचान गर्दै आगामी कार्यक्रमहरूमा नवपुस्तालाई समावेश गर्ने र हास्यव्यङ्ग्य कलाकारिताप्रति रूची जगाउने उद्देश्यका लागि सो कार्यक्रम आयोजना गरिएको अध्यक्ष संप्रस पौडेलले बताए ।
सिस्रुपानी नेपाल मकवानपुरको आयोजना र हेटौंडा उपमहानगरपालिकाको प्रवर्धनमा आयोजित प्रतियोगितामा मकवानपुर जिल्लाभित्र अध्ययनरत कक्षा १२ सम्मका विद्यार्थीहरू सहभागी भएका थिए । सहभागी विद्यार्थीहरूलाई २ चरणमा छनोट गरिएको, अङ्क निर्धारण गर्दा विषयवस्तु, हास्य र व्यङ्ग्यका विधि तथा शैली, अभिनय, समय व्यवस्थापनजस्ता क्षेत्रमा विशेष ध्यान दिइएको निर्णायक मण्डलका संयोजक उज्ज्वल शर्मा भण्डारीले बताए ।
प्रतियोगितामा सामाजिक, राजनीतिक, आर्थिक तथा प्रशासनिक वेथितिलगायतका समसामयिक विषयहरूमाथि विद्यार्थीहरूले हास्यव्यङ्ग्य प्रस्तुति दिएका थिए ।
हास्यव्यङ्ग्य स्रष्टा लुइटेल र न्यौपाने सम्मानित
कार्यक्रममा सिस्नुपानी नेपालका संस्थापक उपाध्यक्ष तथा फित्कौली अनलाइनका प्रधान सम्पादक नरनाथ लुइँटेललाई २५ हजार रूपैयाँ राशीको गणेश पौडेल हास्यव्यङ्ग्य सम्मान २०८२ बाट सम्मान गरिएको छ ।
युवा हास्यव्यङ्ग्यकार सीता न्यौपानेलाई संस्थाले २० हजार राशिको आरसी रिजाल हास्यव्यङ्ग्य सम्मान २०८२ बाट सम्मान गरेको छ । उनले महिला सशक्तिकरणका साथसाथै युवाहरूमा अध्ययनको आवश्यकता रहेको विषयवस्तु राख्दै हास्यव्यङ्ग्य प्रस्तुत गरेकी थिइन् ।