मकवानपुर । बागमती प्रदेश सरकारले प्रदेश प्रहरी कार्यालय हेटौंडालाई ३० थान मोटरसाइकल हस्तान्तरण गरेको छ।
बिहीबार बागमती प्रदेशका मुख्यमन्त्री इन्द्रबहादुर बानियाँले प्रदेश प्रहरी कार्यालय हेटौंडाका प्रमुख प्रहरी नायब महानिरीक्षक अरुण पौडेललाई मोटरसाइकलको साँचो हस्तान्तरण गरेका हुन् । प्रदेश प्रहरीको कार्यक्षमता अभिवृद्धि गर्ने उद्देश्यले हस्तान्तरण गरिएको ३० थान मोटरसाइकल प्रदेश अन्तर्गतका १० जिल्लाका प्रहरी कार्यालय तथा ट्राफिक कार्यालयहरूलाई प्रदान गरिने बताइएको छ ।
आन्तरिक मामिला तथा कानून मन्त्रालयको ९७ लाख २० हजार रुपैयाँ बजेटबाट खरिद गरिएका १६० सीसीका ३० वटा मोटरसाइकल गत भदौ २३ र २४ गते भएको जेनजी आन्दोलनका क्रममा क्षतिग्रस्त सवारी साधनको विकल्पका रूपमा उपलब्ध गराइएको हो ।
मोटरसाइकल हस्तान्तरण कार्यक्रममा मुख्यमन्त्री बानियाँले प्रहरीको मनोबल उच्च बनाउनका लागि प्रदेश सरकार प्रतिबद्ध रहेको बताए । ‘समन्वय, सहकार्य र सहअस्तित्वको भावनाका साथ शान्ति सुरक्षा कायम गर्न सरकार र प्रहरीबीच सहकार्य आवश्यक रहेको छ’ उनले भने । आर्थिक मामिला तथा योजना मन्त्री प्रभात तामाङले जनताको सुरक्षामा खटिने सुरक्षाकर्मीलाई प्रदेश सरकारले निरन्तर सहयोग गर्दै आएको बताए ।उनले भने ‘जेनजी आन्दोलनका क्रममा क्षति पुगेका प्रहरी कार्यालयहरूको मर्मतसम्भारका लागि समेत सरकारले बजेट विनियोजन गरेको छ ।’
प्रदेश प्रहरी प्रमुख डिआइजी अरुण पौडेलले प्रदेश सरकारको सहयोगमा १ अर्ब रुपैयाँभन्दा बढी लागतमा ७२ वटा प्रहरी कार्यालय भवन निर्माण भइसकेको र केही अझै निर्माणाधीन अवस्थामा रहेको बताए ।
‘आन्दोलनका क्रममा सवारी साधन क्षति हुँदा कार्यसम्पादनमा असर परेको छ’ उनले भने ‘प्रहरीलाई चारपाङ्ग्रे सवारी साधनको आवश्यकता छ ।’ ‘उक्त सवारी साधनले दैनिक शान्ति सुरक्षा, निर्वाचन लक्षित सुरक्षा योजना तथा अपराध रोकथाममा प्रभावकारी भूमिका रहन्छ’ उनले भने ।
चितवन । थारु कला संस्कृति संरक्षण गर्न चितवनको खैरहनीमा ११ औं खिचरा महोत्सव–२०८२’ सुरु भएको छ ।
बागमती प्रदेशका कृषि तथा पशुपन्छी विकास मन्त्री मधुसूदन पौडेलले थारु समुदायको महत्वपूर्ण चाड माघी ‘खिचरा’ पर्वको संरक्षण गर्न महोत्सव नै आयोजना गर्नु सकरात्मक कदम भएको बताएका छन् । खैरहनी–५ गौचरनमा सुरु भएको खिचरा महोत्सवको मंगलबार उद्घाटन गर्दै उनले कृषिसँग घनिष्ठ सम्बन्ध रहेको थारु समुदायको उत्थानका लागि प्रदेश सरकार सदैव तयार रहेको बताए ।
“आफ्नो संस्कृति नयाँ पुस्तालाई सिकाउनु आवश्यक छ । कृषि मन्त्रालयको तर्फबाट थारु समुदायको कृषि पद्धतिलाई अझ राम्रो र आधुनिक बनाउन सकिन्छ, त्यसका लागि बागमती प्रदेश सरकारले सहयोग गर्नेछ” मन्त्री पौडेलले भने । मन्त्री पौडेलले भदौ २३ को आन्दोलनलाई युवा विद्रोहको रूपमा व्याख्या गरेका छन् । तर, सोही आन्दोलनलाई दुरुपयोग गरेर २४ गते देश जलाउने काम भएको भन्दै उनले आक्रोश व्यक्त गरे । “युवा विद्रोहलाई दुरुपयोग गरेर हिंसा मच्चाउने र देश जलाउने तत्वहरूलाई जनताले चिन्न जरुरी छ,” उनले थपे ।
थारु कल्याणकारिणी सभा चितवन क्षेत्र नं.७ ले आयोजना गरेको महोत्सव माघ १० गतेसम्म चल्ने छ । महोत्सव समुद्घाटन अघि झाकी सहितको शोभा यात्रा निकालिएको थियो । चितवनका थारु समुदायले खिचरा पर्वलाई नयाँ वर्षको रुपमा मनाउने गरेका छन् । थारू समुदायको सांस्कृतिक, वेशभूषा, भाषा–साहित्य, कला–संस्कृति एवं थारू खानाका परिकारको संरक्षण तथा प्रवर्द्धन गर्ने उद्देश्यले महोत्सव आयोजना गरिएको महोत्सव मूल समारोह समितिका संयोजक कृष्णलाल चौधरीले जानकारी दिए।
‘राष्ट्रिय एकता र विविधता हाम्रो शान, बहुजाति, भाषा, संस्कृति नेपालको पहिचान’ भन्ने मूल नाराका साथ आयोजना गरिएको महोत्सवमा एक सय ५० स्टल रहेका छन् । महोत्सवमा उद्योग, व्यापार, कृषि तथा पर्यटनको प्रवर्द्धन, स्थानीय कला संस्कृतिको प्रवर्द्धन, स्थानीय स्तरमा उत्पादित वस्तुको प्रवर्द्धन एवं शैक्षिक, वित्तीय संस्था र विभिन्न संघसंस्थाका स्टल रहेको छ । यस्तै महोत्सव परिसरमा थारु कलासंस्कृति झल्किने आर्ट ग्यालरी समेत निर्माण गरिएको छ ।
मकवानपुर । एघाराैँ राष्ट्रिय योग दिवसको अवसरमा आयोजित अन्तर विद्यालयस्तरीय योग खेलकुद प्रतियाेगितामा छात्रा तर्फ कमाने एकेडेमीकी सृष्टि चाैधरी र छात्र तर्फ ज्ञानाेदय बालबाटिकाका युनेश अधिकारीले प्रथम स्थान हासिल गरेका छन ।
त्यसैगरि द्वितिय स्थानमा लक्ष्मि आधारभुत विद्यालयकी छात्रा फारना खातुन, ब्रम्हद्विक एकेडेमीका छात्र दिपान्सु चाैधरी र तृतियम छात्रा तर्फ सिद्धार्थ शिशु सदनकी मानवी त्रिपाठी छात्र तर्फ कमाने एकेडेमीका आर्यन शाह भएका छन ।
आधुनिक राष्ट्रिय मावि, भुटनदेवी मावि, लक्ष्मि आधारभूत विद्यालय, कमाने एकेडेमी, रोज एकेडेमी, सिद्दार्थ शिशु सदन, ब्रम्हादिक एकेडेमी, ज्ञानाेदय बालवाटिका लगायतका विद्यालयका २० जना छात्र छात्राहरुले प्रतियाेगितामा सहभागिता जनाएका थिए ।
स्वस्थ समाज, समृद्ध नेपाल र विश्व शान्तिका लागि योग भन्ने नाराका साथ पतञ्जलि योग जिल्ला समिति मकवानपुरले ११ औं राष्ट्रिय योग दिवस सप्ताहव्यापी रूपमा भव्य कार्यक्रमसहित मनाउने निर्णय अनुरुप हेटौंडा उपमनपा-४ चिल्ड्रेन पार्कमा पतन्जली याेग जिल्ला समिति मकवानपुर र मकवानपुर जिल्ला याेग खेलकुद समितिकाे संयुक्त आयाेजनामा अन्तर विधालय याेग खेलकुद प्रतियाेगिता मकवानपुर जिल्ला खेलकुद विकास समितिका अध्यक्ष राजकुमार माेक्तानकाे प्रमुख आतिथ्यता तथा पतन्जली याेग जिल्ला समितिका अध्यक्ष रामकृष्ण थापाकाे सभाध्यक्षता, मकवानपुर याेग खेलकुद संघका सल्लाहकार भरत भण्डारी, व्रम्हकुमार बासु भण्डारी, मकवानपुर जिल्ला याेग खेलकुद संघा अध्यक्ष रामशरण दहाल, पतन्जली युवा समिति अध्यक्ष जयराम पुलामी लगायतकाे उपस्थितिरहेकाे थियाे ।
मकवानपुर याेग खेलकुद संघकि उपाध्यक्ष शकुन्तला सिंह बुढाथाेकिले संचालन गर्नुभएकाे प्रतियाेगितामा पहिलाे दाेस्राे र तेस्राेलाई याेगा म्याट र स्टेसनरी सामान वितरण गरिएकाे थियाे । साथै अन्य सहभागी वालबालिकालाइ म्याट वितरण गरिएकाे थियाे ।
मकवानपुर । ऐतिहासिक, पुरातात्वक र सामरिक दृष्टिले महत्त्वपूर्ण छ मकवानपुरकाे मकवानपुर गढी दरबार । मकवानपुर गढीको आफ्नै छुट्टै इतिहास छ । आधुनिक नेपालको स्थापना हुनुपूर्व सेन वंशीय शासनको ऐतिहासिक विरासतको जीवन्त इतिहास मकवानपुर गढीले बोकेको छ ।
मकवानपुर गढी परिसरमा वंश गोपाल मन्दिर र भगवान् कृष्णकाे मुर्ती रहेकाे छ । उक्त मुर्तीलाई पहिले फलामे साङ्लोले बाँधेर राखिएको हुन्थ्यो । मन्दिरको केही तल रहेकाे गुफाबाट भगवान् कृष्ण ओहोरदोहोर गर्थे भन्ने जनविश्वास रहेकाे छ । भगवान कृष्ण चितवन लगाइएकाे तोरी खेतीमा खेल्न जाने गरेकाे समेत बताइन्छ । भगवान कृष्ण राति बाहिर जाने र बिहान मात्रै फर्कने गर्दा अनिष्ट आइपर्न सक्ने भएकाेले गाउँलेले बाँधेर राख्ने गरेकाे किम्वदन्ती छ ।
सेन वंशका राजाहरूले १३औं शताब्दीको सुरुतिर यहाँ शासन गरेको इतिहास पाइन्छ । सेन वंशका प्रतापी राजा मुकुन्द सेन कै नामबाट मुकुन्दपुर, माकन्दपुर, मुकुनपुरको अपभ्रंश हुँदै मकवानपुर नामकरण भएको हो भन्ने जनविश्वास छ । सेन वंशका लोहाङ्गसेनदेखि अन्तिम राजा दिग्बन्धन सेनसम्मका राजाहरूले करिब तीन सय वर्षसम्म मकवानपुर गढीलाई राजधानी बनाई राज्य गरेका थिए ।
मकवानपुर गढी राजा तुला सेनको राज्य कालमा निर्माण गरिएको विश्वास गरिन्छ । गढीको तीन वटा भाग रहेका छन्, ठूलो गढी, सानो गढी र डुङ्गेगढी । ठूलोगढीमा दुई–दुई वटा दरबार, मन्दिर तथा पानी ट्याङ्कीहरू रहेका छन् भने ठूलो गढीको दक्षिण–पश्चिममा करिब तीन सय मिटरको दूरीमा सानो गढी र करिब २ किमि उत्तर पूर्वमा ढुङ्गे गढी छन् ।
परम्परागत तर उन्नत वास्तुकलाको प्रतिरूप मकवानपुर गढीले तत्कालीन समयको सामरिक महत्त्व तथा राज्यको सुरक्षात्मक उपाय झल्काएको छ । हेटौंडा उपमहानगरपालिकाकाे बुद्ध चोकबाट करिब १६ किलोमिटर पूर्व कान्ति राजपथ सडक हुँदै पुगिने गढी समुद्री सतहदेखि १०१७ मिटर उचाइमा पहाडी थुम्कोमा अवस्थित छ ।
मकवानपुर । मकवानपुरको मनहरी ज्यामिरेमा सवारी दुर्घटना हुँदा १ जनाको मृत्यु भएको छ ।
आइतबार दिउँसो मनहरी ९ ज्यामिरे स्थित पुर्व पश्चिम सडकखण्डमा हेटौडा बाट चितवनतर्फ जादै गरेको ना ४ ख ८९२१ नम्बरको ट्रक र मनहरीबाट ज्यामिरे तर्फ जादै गरेको ना ४६ प ६०२८ नम्बरको मोटरसाइकल ठोकिएर भएको दुर्घटनामा मोटरसाइकल चालक सुर्य बहादुर मोक्तानको मृत्यु भएको हो ।
उक्त दुर्घटनामा मोटरसाइकल चालक मनहरी ७ बस्ने ४० वर्षीय मोक्तान घाइते भएकोमा पुरानो मेडिकल कलेज भरतपुर चितवनमा उपचारको क्रममा मृत्यु भएको जिल्ला प्रहरी कार्यालय मकवानपुरले जनाएको छ । घाइते मोक्तानलाई मनहरी अस्पतालमा सामान्य उपचार पश्चात थप उपचारको लागि भरतपुर रिफर गरिएको थियो ।
दुर्घटना भएको स्थानमा बाटो अवरोध नभएको तथा मोटरसाइकल ट्रक र ट्रक चालक हेटौडा ११ थानाभर्याङ बस्ने ५४ वर्षीय बुद्धि बहादुर स्याङतानलाई इलाका प्रहरी कार्यालय मनहरीले नियन्त्रणमा लिएको बताइएको छ ।