मकवानपुर । मकवानपुरकाे हेटौडा उपमहानगरपालिकाकाे छुट्टाछुट्टै स्थानमा २ जनाकाे मृत्यु भएकाे छ । मकवानपुरको हेटौंडा उपमहानगर ४ स्थित कमलडाँडामा घाइते अवस्थामा फेला परेका १ पुरुषको मृत्यु भएको हाे भने हेटौंडा उपमहानगरपालिका वडा नम्बर ५ मा एक पुरुषको शव फेला परेको मकवानपुर प्रहरीले जनाएकाे छ ।
शुक्रबार स्थानीय उत्तम उप्रेतीको घर नजिकै टाउकोमा चोट लागेको अवस्थामा फेला परेका नामथर वतन नखुलेका अन्दाजी ३० वर्षीय पुरुषको हेटौंडा अस्पतालमा उपचारको क्रममा मृत्यु भएको जिल्ला प्रहरी कार्यालय मकवानपुरका प्रहरी प्रवक्ता टेकबहादुर कार्कीले जानकारी दिए । कार्कीका अनुसार घाइते फेला परेका पुरुषको शनिबार बिहान उपचारको क्रममा मृत्यु भएको हाे ।
यसैगरी हेटौंडा उपमहानगरपालिका वडा नम्बर ५ मा सन्त बहादुर भोलनकाे मृत्यु भएकाे हाे । शनिबार विहान हेटौंडा-५ राईटोलबाट मकवानपुर गढी गाउँपालिका ४ स्थित मनकामना मन्दिर जाने बाटोको जंगलमा परिचय नखुलेको अन्दाजी ३५ वर्षीय पुरुषको शव फेला परेको प्रहरीले जनाएकाे थियाे । शनिबार बिहान स्थानीयले शव देखेपछि प्रहरीलाई खबर गरेका थिए ।
उक्त शव भिमफेदी गाउँपलिका ६ देउरालीका अन्दाजी ३७ वर्षिय सन्त बहादुर भोलनकाे भएकाे निजको बुबाले सनाखत गरेकाे मकवानपुर प्रहरीले जनाएकाे छ । मृतकको शव हेटौडा अस्पतालमानै रहेको तथा घटनाको अनुसन्धान भइरहको जिल्ला प्रहरी कायालय मकवानपुरले जनाएको छ ।
मकवानपुर । हेटौंडामा भएको खुला पुरुष भलिबल प्रतियोगिता २०८० को उपाधि सशस्त्र प्रहरीको एपीएफ क्लबकाे पाेल्टामा परेकाे छ । शनिबार हेटौंडा–४, हुप्रचौरस्थित भलिबल कोर्टमा भएको फाइनल खेलमा विभागीय टोली त्रिभुवन आर्मीलाई हराउँदै एपीएफले उपाधी हात पारेकाे हे ।
एपीएफले आर्मीलाई पहिलाे सेट २५–२० ले हराउँदा दाेस्राे सेट १७–२५ ले गुमाएकाे थियाे । यसैगरी बाँकी दुई सेट लगायता २५–१७ र २९–२७ ले एपीएफलेले जीतेकाे हो । प्रतियाेगिताकाे उपाधीसँगै एपीएफले २ लाख रुपैयाँ प्राप्त गरेको छ भने उपविजेता आर्मीले १ लाख रुपैयाँमा हाल पारेकाे छ । प्रतियोगिताको सर्बोत्कृष्ट खेलाडी एपीएफका विजयी थापा घोषित भए । थापाले नगद १५ हजार रुपैयाँ प्राप्त गरे ।
प्रतियोगिताको उत्कृष्ट सेटर एपीएफका सुबास कुँवर, उत्कृष्ट स्पाइकर आर्मीका शरण सामरी, उत्कृष्ट डिफेन्डर आर्मीका इश्वर थापा, उत्कृष्ट ब्लकर आर्मीका सञ्जय चौधरी र उत्कृष्ट प्रशिक्षक एपीएफका पुष्पराज मल्ल घोषित भए । विधागत उत्कृष्टले नगद ५–५ हजार रुपैयाँ प्राप्त गरेका छन् ।
शुक्रबार भएको सेमीफाइनल खेलमा गण्डकी प्रदेशलाई पराजित गर्दै एपीएफ फाइनल प्रवेश गरेको थियो भने आर्मीले नेपाल पुलिसलाई पराजित गर्दै फाइनल प्रवेश गरेको थियो । सान्त्वना पुरस्कार पुलिस र गण्डकीले ५०–५० हजार रुपैयाँ प्राप्त गरेको छ । स्वर्गीय केशवलाल श्रेष्ठ स्मृति केन्द्रीय प्रतिष्ठान र मकवानपुर जिल्ला भलिबल संघको संयुक्त आयोजनामा गत जेठ १६ गतेबाट संचालन भएकाे प्रतियोगिता राष्ट्रिय र माेफसलका गरी १० टिमले सहभागिता जनाएका थिए ।
मकवानपुर । विश्व वातावरण दिवसको अवसरमा हेटौडामा सम्मान तथा साइकल र्याली कार्यक्रम गरिएकाे छ । टोल विकास संस्था नगर समन्वय समिति, हेटौंडा उपमहानगरपालिकाको आयोजनामा शनिबार वातावरणीय सचेतना मुलक साईकल र्यालि तथा सम्मान कार्यक्रम सम्पन्न भएको हाे ।
कार्यक्रममा हेटौंडाको पर्यटन, स्वास्थ्य र साईकल अभियानमा महत्वपूर्ण भूमिका निर्वाह गर्नुहुने दिपेन्द्र चन्द ठकुरी, संगित श्रेष्ठ, शैलेस मानन्धर, मरणोपरान्त नरेश लाल श्रेष्ठलाई सम्मान गरिएको छ ।
अभियन्तालाई सम्मानअघि शनिबार बिहान वातावरणीय सचेतनामूलक साईकल र्यालीको आयोजना गरिएको थियो । हेटौँडा उपमहानगरपालिका हेटौडा २ कार्यालय परिसरबाट सुरु भएको साइकल र्याली कान्तिराजपथ, नागस्वती, कमाने, हुप्रचौर हुँदै पुनः हेटौँडा उपमहानगरपालिकाको कार्यालय परिसरमै पुगेर समापन भएको थियो । र्यालीमा ६५ जना साइकलयात्रीको सहभागिता रहेको थियो ।
टोल विकास संस्था नगर समन्वय समिति हेटौडाका अध्यक्ष ध्रुव अधिकारीको अध्यक्षता तथा हेटौँडा उपमहानगरपालिकाको वातावरण समिति प्रमुख एवम् वडा नम्बर १० का वडा अध्यक्ष फुर्वा दोर्जे लामाको प्रमुख आतिथ्यमा कार्यक्रम भएको हो । कार्यक्रममा १४ नम्बर वडा अध्यक्ष दीपक खड्काको पनि उपस्थिति रहेको थियो ।

यसैगरी विश्व वातावरण दिवसकै अवसरमा सामुदायिक विकास तथा सचेतना नेपाल र बालजागृति इंग्लिस सेकेण्डरी स्कुलको आयोजनामा मेरो फोहोर मेरो जिम्मेवारी अभियानको सुरुवात गरिएको छ । कार्यक्रममा विद्यालयको तर्फबाट सचेतना मुलक नाटक र गीत प्रस्तुत गरिएको थियो ।
टोल विकास संस्था नगर समन्वय समितिको समन्वयमा भएकाे अभियानमा विद्यालयका प्रधानाध्यापक विनोद सुवेदीको अध्यक्षता हेटौंडा उपमहानगरपालिका वातवारण तथा विपद् व्यवस्थापन समितिका संयोजक १० नम्बर वडाका अध्यक्ष फुर्वा लामा, सामाजिक विकास महाशाखा प्रमुख भिम प्रसाद तिमल्सीना, टोविसंन समन्वय समिति अध्यक्ष ध्रुव प्रसाद अधिकारी र विद्यालयका सहायक प्रधानाध्यापक अमुल श्रेष्ठ, लगायतको सहभागिता रहेकाे थियो ।
हेटौंडाको तापक्रम ३७ डिग्री, बिद्यालयहरू बन्द गरिदै
Tags: No Comments
मकवानपुर । एक्कासि तापक्रम बढेपछि मकवानपुरमा सामुदायिक तथा संस्थागत बिद्यालयहरू बन्द गर्न थालिएको छ ।
पछिल्लो साता तापक्रम बढेसंगै मकवानपुरको बकैया गाउँपालिकाले एक साताको लागि बिद्यालय बन्द गर्ने सूचना जारी गरेको छ । यसैगरी हेटौंडा उपमहानगरपालिकाको वडा ५ ले आफ्नो क्षेत्रमा रहेको बिद्यालय बन्द गरेको छ ।
अत्यधिक गर्मिका कारण हेटौंडा उपमहानगरपालिका वडा नम्बर–५ का सामुदायिक तथा निजी बिद्यालयहरु बन्द गरिने हेटौंडा–५ वडा कमिटीको बैठकले निर्णय गरेको हो । जेठ २१, २२ र २३ गते बिद्यालय बन्द गरिने निर्णय गरिएको वडा सदस्य ज्ञानबहादुर थापाले बताए ।
निकै गर्मिका कारण बिद्यार्थीहरुमा पढ्न समस्या हुन थालेपछी बिद्यालय बन्द गर्ने निर्णय गरिएको थापाले बताए । हेटौंडा उपमहानगरपालिकाले गर्मि हुने वडाहरुको आवश्याकताको आधारमा बिद्यालय बन्द गर्ने वा सन्चालन गर्ने बारे निर्णय गर्ने अधिकार वडा तहलाई दिएको छ ।
मकवानपुरको बकैया गाउँपालिकाले उच्च गर्मीका कारण एक साताका लागि विद्यालयमा विदा दिने निर्णय गरेको छ । शुक्रबार गाउँ शिक्षा समितिको बैठकले एक साताका लागि पालिकाका सवै विद्यालय विदा गर्ने निर्णय गरेको सूचना प्रकाशित गरेको छ ।
जेठ २१ गतेदेखि २७ गतेसम्म एक साताका लागि विद्यालय विदा दिने निर्णय भएको सूचनामा उल्लेख छ । अत्यधिक गर्मीका कारण विद्यार्थीको स्वास्थ्यमा समस्या सिर्जना भई विद्यालयको पठनपाठनमा नकारात्मक असर परिरहेको अवस्थालाई मध्य नजर गरी विदा दिने निर्णय गरिएको पालिकाले जनाएको छ ।
यसैगरी हेटौंडा उपमहानगरपालिका वडा २ मा पनि बिद्यालयहरू बन्द गर्ने वा सन्चालन गर्ने भन्नेबारे आइतबार बिहान बिद्यालय व्यवस्थापन समितीसंग बैठक बोलाइएको वडा अध्यक्ष बिष्णुगोपाल श्रेष्ठले बताए । अहिले मकवानपुरको हेटौंडामा अधिकतम तापक्रम ३७ डिग्री सेल्सियस रहेको छ ।
गर्मीबाट हुनसक्ने लु बाट बच्नको लागि स्वास्थकर्मीहरूले सुझाव दिएका छन् । पटक पटक पानी पिउने, खाली पेट नबस्ने, प्याजको रस खाने, बाहिर निस्कदा टाउको, कान र गर्दन ढाक्ने तौलिया ओड्ने, मध्यान्हको चर्को गर्मीमा घर बाहिर ननिस्कने, पच्ने खानेकुरा मात्र खाने, नरम, मुलायम सूतीको कपडा लगाउने,चिसो फल, खानेकुरा सेवन गर्ने गर्न स्वास्थकर्मीको सुझाव छ ।
मकवानपुर । हेटौँडामा जारी खुला राष्ट्रिय पुरुष भलिबल प्रतियोगिताको फाइनल प्रतिस्पर्धा विभागीय टोली नेपाल आर्मी र सशस्त्र प्रहरी (एपीएफ) क्लबबीच हुने भएकाे छ । केशवलाल श्रेष्ठ स्मृति प्रतिष्ठान हेटौंडा र मकवानपुर जिल्ला भलिबल संघ हेटौंडाको आयोजनामा भएकाे प्रतियाेगिता अन्तरगत शुक्रबारकाे सेमीफाइनल खेलबाट नेपाल आर्मी र एपीएफ फाइनल प्रवेश गरेका हुन् ।
सेमिफाइनलमा नेपाल आर्मीले नेपाल पुलिस र एपीएफले गण्डकी प्रदेशलाई पराजित गरेको हो । हेटौँडा–४, हुप्रचौरस्थित भलिबल कोर्टमा भएको पहिलो सेमीफाइनल खेलमा नेपाल आर्मीले नेपाल पुलिस क्लबलाई ३–१ को सेटमा पराजित गरेको हाे । आर्मीले २५–१९ ले पहिलाे सेट जित्दा दोस्रो सेट २५–२३ ले पुलिसले जितेकाे थियाे । तेस्रो र चौथो सेट आर्मीले सहजै आफ्नो पक्षमा पार्दै फाइनल यात्रा तय गरेको हो । खेलकाे म्यान अफ द म्याच आर्मीका सनोज चौधरी घोषित भएका थिए ।
यसैगरी शुक्रबारकाे दाेस्राे सेमिफाइनलमा एपीएफले गण्डकीलाई हराउँदै फाइनल यात्रा तय गरेकाे हाे । पहिलो दुई सेटमा हार व्यहाेरेकाे एपीएफले बाँकी ३ सेट लगातार जितेकाे थियाे । खेलको म्यान अफ द म्याच एपीएफका सुवास कुँवर घोषित भए ।शनिबार विहान प्रतियाेगिताकाे फाइनल खेल हुने आयाेजक मकवानपुर जिल्ला भलिबल संघ अध्यक्ष बसन्तकुमार सिटौलाले जानकारी दिए ।
प्रतियोगिताको उपाधि विजेताले नगद २ लाख रुपैयाँसहित सिल्ड, मेडल र प्रमाणपत्र प्राप्त गर्नेछ भने उपविजेताले नगद १ लाख रुपैयाँसहित सिल्ड, मेडल र प्रमाणपत्र प्राप्त गर्नेछ । प्रतियोगिता स्वर्गीय केशवलाल श्रेष्ठ स्मृति केन्द्रीय प्रतिष्ठान र मकवानपुर जिल्ला भलिबलको संयुक्त आयोजनामा भएको हो । प्रतियोगिताको मुख्य सहयोग हेटौंडा उपमहानगरपालिका तथा बागमती प्रदेश खेलकुद बिकास परिषद, हेटौंडा उपमहानगरपालिका ३ नम्बर वडा कार्यालय र १९ नम्बर वडा कार्यालय सहयोग रहेको सिटौलाले बताए ।
प्रतियोगिता सह–आयोजक हेटौंडा उपमहानगरपालिका भलिबल संघ, थाहा नगरपालिका भलिबल संघ, भिमफेदी गाउँपालिका भलिबल संघ र मकवानपुर गढी गाउँपालिका भलिबल संघ रहेका छन् । मकवानपुर जिल्ला खेलकुद समिति र नगर खेलकुद बिकास समितिको समन्वयमा प्रतियोगिता संचालन भएको उनले जानकारी दिए ।
