मकवानपुर । मकवानपुर जिल्लाको ऎतिहासिक मकवानपुरगढीबाट गोरखा जिल्लाको गोरखा दरबारसम्म बिहीबार साइकल यात्रा हुने भएको छ ।
२५६७ औं बुद्धजयन्तीको अवसरमा हिमलयन राइडर्स सोसाइटी मकवानपुरको आयोजनामा दुईदिने साइकलयात्रा गरिएकाे हाे । मकवानपुरगढी गाउँपालिका–२ को समन्वयमा आन्तरिक पर्यटन प्रवर्धनकोलागि मकवानपुरगढीदेखि गोरखा दरबारसम्म २ जिल्लाको ऎतिहासिक स्थानलाई जोड्न साइकलयात्रा गर्न लागिएको हो ।
साइकल यात्रामा १२ जनाले सहभागिता रहेकाे सोसाइटीका अध्यक्ष रामकुमार श्रेष्ठले बताए । साइकलयात्रामा ६० वर्ष उमेर पार गरेका ४ जना, ५० वर्ष उमेर पार गरेका ४ जना, ४० वर्ष र ३० वर्ष उमेर पार गरेका २/२ जनाले सहभागिता रहेकाे छ । बिहीबार (आज) बुद्धजयन्तीको दिने मकवानपुरगढीबाट सुरु हुने साइकलयात्रा शुक्रबार साँझ गोरखा दरबार पुगेर समापन गरिने उनले जानकारी दिए ।
साइकलयात्रामा सोसाइटीका संस्थापक अध्यक्ष चेतनाथ आचार्य, कोषाध्यक्ष लक्ष्मीचरन श्रेष्ठ, सदस्यहरु बुद्धिबहादुर आलेमगर, अशोक जोशी, बरुण खतिवडा, सुरज लिम्बु, राजु थापा मगर, दुर्गाप्रसाद लामिछाने, कीर्तम मानन्धर, प्रदीप थापा क्षेत्री, लेखनाथ ढकाल, नवराज नेपालकाे सहभागिता रहेकाे छ । फरक क्षमता भएका सुरज लिम्बुले एकै हातले साइकल यात्रा गर्दैछन् ।
मकवानवुर । बागमती प्रदेश सभा सदस्य सुष्मा भुजेलले नागरिकको सुझाव सरकारले सुन्नेमात्रै हैन कार्यान्वयमा ल्याउनु पर्ने बताएकी छिन् ।
विविधतायुक्त नागरिकहरुको अनुभवबाट कानुन नै फेर्न सकिने व्यवस्था भएकोले सरकारले नागरिकसंग जोडिने गरि नीति निर्माण गर्नुपर्ने उनले बताइन् ।
सरकार अपाङ्गतामैत्री सवाललाई विशेष संवेदनशील हुनुपर्ने उनले बताइन् । हेटौंडामा भएको अपाङता मैत्री पर्यटन प्रवद्र्धन सम्बन्धी अभिमुखिकरण कार्यक्रम सांसद भुजेलले यस्तो बताएकी हुन् । राष्ट्रिय अपांग महासंघको आयोजना र संस्कृति पर्यटन तथा सहकारी मन्त्रालयको सहकार्यमा सांसद भुजेलले अब बन्ने नीति बिधिमा अपाङ्गताको क्षेत्रबाट प्राप्त सुझावलाई समेट्ने प्रतिवद्धता व्यक्त गरिन् ।
अपाङताको सवालमा अभिभावकहरुलाई समेत परामर्श कार्यक्रम आवश्यक भएको उनले बताइन् ।
पर्यटकीय क्षेत्र अपाङमैत्री भए नभएको अनुगमनपछि आवश्यक सुझावको लागि कार्यक्रम गरिएको राष्ट्रिय अपाङग महासंघ बागमती प्रदेश अध्यक्ष अश्विन लम्सालले बताए । “हरेका क्षेत्र अपाङ्गमैत्री हुनु आवश्यक छ, पर्यटकीय क्षेत्रमा पनि सहजै पहुँच राख्न पाउने हाम्रो पनि अधिकार हो” अध्यक्ष लम्सालले भने ।
प्रदेशको विभिन्न जिल्लाका सरोकारवालाहरुको उपस्थिती रहेको कार्यक्रममा पर्यटकीय क्षेत्रमा अपाङ्ता र पहुँचयुक्तता, पहुँचयुक्त पर्यटन पुर्वाधार विकास, पर्यटकीय क्षेत्र हेटौंडा शहिद स्मारकको हालको अवस्था, सुधार गर्नुपर्ने पक्षहरु, अपाङ्गता मैत्री, पहुँचयुक्त पर्यटन प्रवर्धनको सम्भावना, चुनौती र फाइदाहरु, पहुँचयुक्त पर्यटन प्रवर्धनमा अपाङता भएका व्यक्तिहरुको आवश्यकतालगायतको सवालमा प्रस्तुती तथा छलफल गरिएको महासंघ प्रदेश व्यवस्थापक सिता मल्ल ठकुरीले बताइन् ।

कार्यक्रमको उद्घाटन चरणमा बागमती प्रदेश सहकारी विकास बोर्डका उपाध्यक्ष नारायण देवकोटा, मानव अधिकार आयोग बागमती प्रदेश प्रमुख रेवा रेग्मी, राष्ट्रिय अपाङग महासंघका महासचिव सुगम भट्टराई, जिल्ला समन्वय समिति मकवानपुरका प्रमुख ललित घलानलगायतको उपस्थिती रहेको थियो ।
मकवानपुर । नेपाल सरकारका उपप्रधानमन्त्री तथा गृहमन्त्री रवि लामिछानेले स्थानीय प्रशासनको उपस्थितिले पीडितका लागि भर र पिडकका लागि डर सिर्जना गर्न हुनुपर्ने बताएका छन् ।
प्रदेश भित्रको शान्ति सुरक्षा र अपराध नियन्त्रणलाई मजबुत बनाउन र सरकारका प्रयासहरुलाई नागरिक सरोकारका विषयमा केन्द्रित गर्न निर्देशन दिँदै उनले यस्ताे बताएका हुन् ।
दुर्गम क्षेत्रका नागरिक सेवा प्रवाहलाई थप सहज बनाउन उनले निर्देशन दिएका हुन् । नेपाल सरकार, गृह मन्त्रालय र प्रदेश, आन्तरिक मामिला तथा कानून मन्त्रालयद्वारा संयुक्त रुपमा आयोजित दुई दिवशीय प्रदेश स्तरीय सुरक्षा गोष्ठीको समापन गर्दै उनले यस्तो बताएका हुन् । गोष्ठि नागरिक सेवाको लागि महत्वपूर्ण कोशेढुड्डा हुने विश्वास उनले व्यक्त गरे ।
प्रहरी समायोजन सम्बन्धी कार्य सम्पन्न गर्न कानुन तर्जुमालगायत कार्यमा गृह मन्त्रालयले सक्रियतापूर्वक कार्य गरिरहेको बताउदै उनले राजनीतिक आवरणमा गैर संवैधानिक र गैर कानुनी गतिविधि हुन नदिन, नागरिकहरुले आफूमाथि शोषण दमन र उत्पीडन भएको र आर्थिक, सामाजिक, साँस्कृतिक रुपमा ठगिएको महसुश नगर्ने गरी कार्य गर्न, विकास निर्माण र सेवा प्रवाहका काममा ढिला सुस्ती र अनियमितता हुन नदिन, धार्मिक, सामाजिक र साँस्कृतिक सद्भाव विथोलिन नदिन सबै प्रमुख जिल्ला अधिकारी र जिल्ला सुरक्षा समितिलाई निर्देशन दिएका छन् ।
“नागरिका सबै प्रकारका गुनासाहरुलाई स्थानीय स्तरमै सुनुवाई गर्ने र समाधान गरी नागरिक सन्तुष्टि अभिवृद्धि गर्नुस्” उनले भने “उच्च समर्पण सहित योजनाबद्ध रुपमा कार्य गर्ने गर्नुस् ।”
उनले आफूले कार्यभार सम्हालेको पछिल्लो २ महिनामा राजश्व चुहावट नियन्त्रणमा २० प्रतिशतले सुधार भएको र करीब ७०० विगाह अतिक्रमित जमिन साविककै अवस्थामा फर्काइएको तथ्यले मेहनत गर्दा सुधार सम्भव छ भन्ने पुष्ट भएको दाबी गरे ।
कार्यक्रममा बागमती प्रदेश सरकारका मुख्यमन्त्री शालिकराम जम्कट्टेलज्यूले नागरिकको हित अभिवृद्धि र सहज सेवा प्रवाहका लागि सबै तहका सरकारहरुले समन्वय तथा सहकार्य गर्नुपर्ने धारणा राख्दै यसका लागि जिल्ला प्रशासन कार्यालय र नेपाल प्रहरी लगायत सुरक्षा निकायहरुको क्षमता अभिवृद्धिमा लागि प्रदेश सरकारले आवश्यक सहयोग गर्ने बताए।
संघीयता कार्यान्वयन र यसको स्थायित्वका लागि यथाशीघ्र प्रहरी समायोजन गर्नुपर्ने मुख्यमन्त्री जमकट्टेलले बताए । उनले सुरक्षाका राजनीतिक, आर्थिक, सामाजिक, साँस्कृतिक गरी विभिन्न आयामहरुमा ध्यान दिई नागरिकलाई शान्ति सुरक्षा र अमनचयन प्रदान गर्न निर्देशन दिए ।
बागमती प्रदेश सरकारका आन्तरिक मामिला तथा कानून मन्त्रीज्यूले शान्ति सुरक्षा र सेवा प्रवाहलाई बढीभन्दा बढी नागरिकमैत्री र प्रविधिमैत्री बनाउन आवश्यक रहेको बताउदै यसका लागि आवश्यक बजेट तथा दक्ष जनशक्तिको व्यवस्था गर्नुपर्ने र सोहि अनुसारको भौतिक पूर्वाधारको ब्यवस्था गर्नुपर्ने बताए । उनले सुरक्षा निकायहरुलाई व्यावसायिक र राजनीतिक हस्तक्षेपबाट मुक्त बनाउनुपर्ने बताए ।
साइबर अपराध नियन्त्रणका लागि प्रभावकारी कानून बनाई कार्यान्वयन गर्नुपर्ने र आगलागी, डढेलोलगायतका विपद्बाट नागरिकहरुलाई सुरक्षित राख्न संघीय सरकार र प्रदेश सरकारबीच सहकार्य गर्नु पर्ने उनले बताए ।
कार्यक्रममा गृह सचिव एकनारायण अर्यालले जिल्लागत रुपमा भएका असल अभ्यासहरुलाई अन्य जिल्लाहरुले अवलम्बन गर्न निर्देशन दिए । गोष्ठीले गृह मन्त्रालय, आन्तरिक मामिला तथा कानून मन्त्रालय र प्रदेश भित्रका तेह्र वटै जिल्लाको शान्ति सुरक्षा र अपराध नियन्त्रण एकिकृत योजना बनाएर अघि बढन सहयोग पुगेको र आगामी दिनमा शान्ति सुरक्षाको व्यवस्था, अपराध नियन्त्रण, विपद् व्यवस्थापन, सेवा प्रवाह, सुशासन र विकास सहजीकरणका लागि सञ्जाल शासनको आधार तयार गरेको बताए ।
यसले शान्ति सुरक्षा र अपराध नियन्त्रणका लागि संघ र प्रदेशबीचको सञ्जाल, गृह मन्त्रालय, रक्षा मन्त्रालय, आन्तरिक मामिला तथा कानून मन्त्रालय, जिल्ला प्रशासन कार्यालय, नेपाल प्रहरी, सशस्त्र प्रहरी बल नेपाल, राष्ट्रिय अनुसन्धान विभागकाबीचमा कार्यसम्पादन नेटवर्क बनाउने बताए । बागमती प्रदेश भित्रका तेह्र जिल्लाका सबै गतिविधिहरुलाई सञ्चालन गर्न थप सहज हुने उनले बताए ।
लागु औषध ओसारपसार, प्राकृतिक स्रोतको अवैध दोहन, क्रिप्टो करेन्सीको प्रयोग, हुण्डी कारोबार, राजश्व चुहावटलगायतका अपराधमा संलग्न पेशेवर व्यक्तिको सूची तयार गर्न र प्राप्त प्रमाणका आधारमा कानूनी कारबाही गर्न निर्देशन दिए । हतियारहरुको गैर कानुनी प्रयोग हुन नदिन र नतिजामूखी कार्यका लागि अहोरात्र क्रियाशिल हुन आग्रह गरे ।
कार्यक्रममा बागमती प्रदेश आन्तरीक मामिला तथा कानुन मन्त्री, प्रदेश सरकारका कायममुकायम प्रमुख सचिव, नेपाली सेनाका रथी अशोकराज सिग्देल क्षत्री, नेपाल प्रहरी तथा सशस्त्र प्रहरी बल नेपालका प्रहरी महानिरीक्षक, राष्ट्रिय अनुसन्धान विभागका मुख्य अनुसन्धान निर्देशकले आ–आफ्ना जिल्लास्थित प्रमुखहरुलाई निर्देशनात्मक मन्तव्य दिएका थिए ।
गोष्ठीमा बागमती प्रदेश भित्रका जिल्लाहरुमा देखा परेका सुरक्षा चुनौती, अपराध नियन्त्रण, सेवा प्रवाह, विकास सहजीकरण, विपद् व्यवस्थापन पूर्वतयारी र प्रतिकार्य, राजश्व चुहावट नियन्त्रण, प्राकृतिक स्रोतको कानूनसम्मत उपयोग, सार्वजनिक र सरकारी जग्गाको संरक्षण, नेपाल सरकार, प्रदेश सरकार मातहतका निकायहरुको समन्वय र सहकार्य लगायतका विषयमा प्रस्तुतीकरण र छलफल भएको छ ।
जिल्लाबाट उठाइएका विभिन्न विषयमा मन्त्रालयको धारणा राख्दै गृह मन्त्रालयका सुरक्षा समन्वय महाशाखा, नीति, योजना अनुगमन तथा मूल्याङ्न महाशाखा, विपद् व्यवस्थापन महाशाखा प्रमुखले प्रस्तीकरण गरेका थिए ।
साथै बागमती प्रदेश सरकार आन्तरिक मामिला तथा कानून मन्त्रालयका सचिवले समेत संश्लेषणात्मक प्रस्तुतीकरण गरेको थियो ।
मकवानपुर । संघीय सरकारका उपप्रधान तथा गृहमन्त्री रवि लामिछाने बागमती प्रदेशकाे प्रदेशस्तरीय सुरक्षा समितिकाे गाेष्ठीमा सम्बाेधन गर्न हेटाैडा आएका छन् ।
गृह मन्त्रालय र बागमती प्रदेश आन्तरिक मामिला तथा कानून मन्त्रालयद्वारा संयुक्त रुपमा आयोजित प्रदेशस्तरीय सुरक्षा गोष्ठीमा उनले सुरक्षा सम्बन्धि निर्देशन दिने बताइएकाे छ । कार्यक्रममा गृह सचिव एकनारायण अर्याल, बागमतीका मुख्यमन्त्री शालिकराम जम्कट्टेल, आन्तरिक मामिला तथा कानून मन्त्री गंगानारायण श्रेष्ठ बागमती प्रदेश मुख्यमन्त्री तथा मन्त्रीपरिषदको कार्यालय सचिव गोबिन्द बहादुर कार्की, प्रहरी महानिरीक्षक बसन्त कुँवरलगायतकाे उपस्थिति रहेकाे छ ।
यसैगरी सशस्त्र प्रहरी महानिरीक्षक, अनुसन्धान निर्देशक,नेपालो सेना, आन्तरिक मामिला तथा कानून मन्त्रालयका सचिव, गृह मन्त्रालयका सचिवहरु, विपद प्राधिकरण कार्यकारी प्रमुखहरुकाे प्रस्तुतिकरण रहने छ । प्रदेशकाे १३ जिल्लाकाे जिल्लागतपछी गृहमन्त्रालयको बिषयगत प्रस्तुतीकरण हुनेछ तालिका रहेकाे छ ।
त्यसपछि मन्त्रि लामिछानेले विशेष निर्देशन दिने बताइएकाे छ । गोष्ठिमा बागमती प्रदेशभरीका प्रमुख जिल्ला अधिकारीहरु, नेपाल प्रहरी, नेपाली सेना, सशस्त्र प्रहरी र राष्ट्रिय अनुसन्धान विभागका प्रमुखसहित प्रदेश अन्तर्गत १३ वटै जिल्लाका सुरक्षा समितिका पदाधिकारी सहभागी भएका छन् । जिल्ला सुरक्षा समितिमा प्रमुख जिल्ला अधिकारी, प्रहरी, आर्मी, सशस्त्र, अनुसन्धानका प्रमुख एवं सहायक प्रमुख जिल्ला अधिकारी पदाधिकारी रहने व्यवस्था रहेको छ । प्रदेश समन्वय समितिको बैठक यसअघि ६ वटा प्रदेशमा सम्पन्न भइसकेको छ ।
बैठकमा विशेष गरी प्रदेशभरको शान्ति सुरक्षा, सेवा प्रवाहको अवस्था, विपद् नियन्त्रणका विषयमा छलफल हुने जनाइएको छ । ‘शान्ति सुरक्षा कायम गर्न समाजमा गरिएको नवीन कार्य, सुरक्षा थ्रेडको अवस्थालगायत विषयमा वैठकमा छलफल हुनेछ ।
विभिन्न केसमा चर्चामा रहेका मन्त्री लामिछाने मंगलबार कान्तिपुर मिडिया ग्रुपका अध्यक्ष कैलाश सिराेहियालाई पक्राउ परेपछि अझै चर्चामा छन् । हिजाेबाट सुरु भएकाे गोष्ठि आजसाँझसम्म चल्नेछ ।
मकवानपुर । बागमती प्रदेशको राजधानी हेटौंडामा मंगलबारबाट प्रदेशस्तरीय दुई दिने सुरक्षा गोष्ठी सुरु भएको छ । बागमती प्रदेशस्तरीय उक्त गोष्ठी संघीय सरकारको गृह मन्त्रालय र बागमती प्रदेश, आन्तरिक मामिला तथा कानून मन्त्रालयले संयुक्त रुपमा आयोजना गरेको हो ।
बुधबारसम्म संचालन हुने उक्त गोष्ठीको प्रदेशका मुख्यमन्त्री शालिकराम जम्कट्टेलले उद्घाटन गरेका हुन् । गोष्ठीमा बागमती प्रदेशका १३ जिल्लाका प्रमुख जिल्ला अधिकारी, प्रहरी प्रमुख उपरीक्षक, राष्ट्रिय अनुसन्धान विभागको अधिकृत, सशस्त्र प्रहरीको उच्च अधिकृत र नेपाली सेनाका उच्च अधिकृतहरुले सहभागिता जनाएका छन् ।
प्रदेश र संघीय सरकारबीच समन्वय गरेर सुरक्षा चुनौतिलाई विश्लेषण गरी जिल्लामा जनताको लागि सेवा प्रवाह गर्ने कार्यमा समिक्षा गरी सुरक्षाको नयाँ अवधारण तयार गर्ने उद्देश्यले उक्त गोष्ठीको आयोजना गरेको प्रदेशको आन्तरिक मामिला तथा कानून मन्त्रालयका सचिव पूर्णबहादुर दर्जीेले जानकारी दिए ।
बैठकमा विशेष गरी प्रदेशको शान्ति सुरक्षाकाे अवस्था, विपद् नियन्त्रणका विषयमा छलफल हुने जनाइएको छ । यसैगरी शान्ति सुरक्षा कायम गर्न समाजमा गरिएको नवीन कार्य, सुरक्षा थ्रेडको अवस्थालगायत विषयमा समेत बैठकमा छलफल हुनेछ । बुधबार समापन हुने गोष्ठीमा सहभागी हुन गृहमन्त्री रवि लामिछाने हेटौडा आउने कार्यक्रम रहेको बताइएकाे छ ।
गृह मन्त्रालयका सचिव एकनारायाण अर्यालको सभाध्यक्षमा तथा प्रदेशको आन्तरिक मामिला तथा कानून मन्त्री गंगानारायण श्रेष्ठको विशेष आतिथ्यतामा भएको कार्यक्रममा नेपाली सेनाका रथी अशोकराज सिग्देल, नेपाल प्रहरीका महानिरीक्षक बसन्तराज कुँवर, सशस्त्र प्रहरीका महानिरीक्षक राजु अर्याल तथा राष्ट्रिय अनुसन्धान विभागका प्रमुख निर्देशक हुतराज थापा, बागमती प्रदेशका कामू प्रमुख सचिव गोविन्दबहादुर कार्कीलगायतको आतिथ्यता रहेको थियो ।