मकवानपुर । देशको पूर्वी र मध्य भागमा दक्षिण–पश्चिम बंगलादेश आसपासको क्षेत्रमा बनेको न्यूनचापीय प्रणालीको आंशिक प्रभाव रहेको छ ।
जसको प्रभावले अहिले कोशी प्रदेश र बागमती प्रदेशका थोरै स्थानहरूमा मेघ गर्जन/चट्याङसहित हल्कादेखि मध्यम वर्षा भइरहेको जल तथा मौसम विज्ञान विभाग, मौसम पूर्वानुमान महाशाखाले जानकारी दिएको छ।
यसैगरी देशभर मनसुनी वायुको प्रभाव रहेकोले कोशी र बागमती प्रदेशमा आंशिकदेखि साधारणतया बदली रही बाँकी भू–भागमा आंशिक बदलीदेखि मौसम मुख्यतया सफा रहेको महाशाखाले जनाएको छ।
शुक्रबार दिउँसो बागमतीसहित कोशी, मधेस र गण्डकी प्रदेशका पहाडी भू–भागमा आंशिकदेखि साधारणतया बदली रही बाँकी स्थानमा आंशिक बदलदेखि मौसम मुख्यतया सफा रहने छ। कोशी, बागमती र गण्डकी प्रदेशका थोरै स्थानहरूमा तथा बाँकी प्रदेशका एक–दुई स्थानमा मेघ गर्जन/चट्याङसहित हल्कादेखि मध्यम वर्षाको सम्भावना रहेको छ। कोशी प्रदेशका एक– दुई स्थानमा भारी वर्षाको पनि सम्भावना रहेको छ।
यसैगरी राति देशभर आंशिकदेखि साधारणतया बदली रहने छ। कोशी, बागमती र गण्डकी प्रदेशका थोरै स्थानहरूमा तथा बाँकी प्रदेशका एक–दुई स्थानमा मेघ गर्जन/चट्याङसहित हल्कादेखि मध्यम वर्षाको सम्भावना रहेको महाशाखाले जानकारी दिएको छ ।
वर्षाका कारण उक्त क्षेत्रमा हुन सक्ने गेग्रान बहाव, बाढी, पहिरो, भूक्षय जस्ता प्रकोपको जोखिम तथा क्षतिबाट बच्न आवश्यक सतर्कता अपनाउन महाशाखाले अनुरोध गरेको छ।
यसैगरी पछिल्लो २४ घन्टामा विभिन्न कोशी बगमती र गण्डकीमा उल्लेख्य वर्षा भएको छ । मकवानपुरको हात्तीसुँढेमा ७०, मकवानपुरको गढीमा ६१.२, इलामको टी इस्टेटमा ६५.८, विराटनरमा ४९.६, सुनसरीको तरहरामा ४४.२, भोजपुरमा ४२.४, नवलपरासीको दुम्कौलीमा ४७.६, कास्कीका ६५, लुम्लेमा ५३.६ मिलिमिटर पानी परेको छ।
मकवानपुर । मकवानपुरको हेटौंडामा भएको शुभकामना खुला दौड प्रतियोगितामा सन्तोष गौतम प्रथम भएका छन् । हेटौंडा २ मनकामना चोकदेखि मनकामना मन्दिर मकवानपुरगढी सम्म २.५ किमिको दौड प्रतियोगिता बकैया गाउँपालिका वडा–७, हात्तीखोलाका गौमतले १४ मिनेट ५८ सेकेण्डमा पूरा गर्दै प्रथम भएका हुन् ।
यस्तै हेटौंडा–१४ का सञ्जिव मिजारले १५ मिनेट ५२ सेकेण्डमा निर्धारित दुरि पार गर्दै द्वितीय भए । यसैगरी हेटौंडा–४, कमलडाँडाका सुवास योञ्जनले १६ मिनेट २३ सेकेण्डमा दौड पूरा गर्दै तृतीय भए । प्रतियोगितामा प्रथम, द्वितीय र तृतीय हुनेलाई क्रमशः १० हजार, ६ हजार र ४ हजार रुपैयाँसहित मेडल र प्रमाणपत्र प्रदान गरियो ।
विजयादशमीकाे अवसरमा दि रिभाइभल युथ क्लब हेटौंडा २ को आयोजन तथा हेटौंडा उपमहानगरपालिका २ नम्बर वडा कार्यालयको सहयोगमा बिहीबार भएको शुभकामना दौड प्रतियोगितामा ४६ जनाको सहभागिता रहेको थियो । मनकामना मन्दिरको पर्यटन प्रबर्धनका साथै र मन्दिरलाई धार्मिक आकर्षणको केन्द्र बनाउने उद्देश्यले फरक ढंगबाट प्रतियोगिताको आयोजना गरेको बताइएको छ ।
यस वर्षको पहिलो प्रतियोगितामा उल्लेखनीय उपस्थिति रहेकोले यसलाई निरन्तरता दिने प्रयास गरिने क्लब अध्यक्ष चन्द्र शाही बताउँछ्न ।प्रतियोगितामा नेपाल एथ्लेटिक्स संघका राष्ट्रिय निर्णायक राजाराम पोखरेल, जिल्ला एथ्लेटिक्स संघका अध्यक्ष प्रभाकर पाण्डेले निर्णायकको भूमिकाबाट सहयोग गरेका थिए । मनकामनाचोकमा उद्घाटन गरिएकाे प्रतियाेगिताकाे पुरस्कार वितरण कार्यक्रम मनकामना मन्दिर परिसरमा गरिएकाे थियाे ।
दि रिभाइबल युथ क्लबका अध्यक्ष शाहीको सभाध्यक्षमा तथा २ नम्बर वडाध्यक्ष विष्णुगोपाल महजर्नको प्रमुख आतिथ्यमा प्रतियोगिताको शुभारम्भ तथा पुरस्कार वितरण कार्यक्रम भएको हो ।
मकवानपुर । बागमती प्रदेश संस्कृत पर्यटन तथा सहकारी मन्त्री बिमल ठकुरीले सहकारीको कारण सर्वसाधारणलाई सानोतिनो गर्जो टार्न सहज भएको बताएका छन् । युवा बचत तथा ऋण सहकारी संघको १८ औं बार्षिक साधारण सभामा मन्त्री ठकुरीले यस्तो बताए हुन् ।
सर्वसाधारणको सुख दुखको साथी सहकारीहरू नियम संगत चल्नुपर्नेमा सधै सचेत हुनुपर्ने उनले बताए । “सहकारीले मानिसको भविष्य्य सुनिश्चित गरी सुनौलो बनाउँछ” उनले भने ।
“सहकार्य गरौ सुनौलो भविष्य बनाऔं” भन्ने मुल नाराका साथ स्थापित युवा साकोस स्थापनाको १८ बर्षमा मकवानपुर जिल्लामा रहेका सहकारीहरुमध्ये बचत तथा ऋणको कारोबार गर्ने संस्थाहरुमा मकवानपुर जिल्ला भरी कार्यक्षेत्र भएको एकमात्र पहिलो अब्बल दर्जाको सहकारीको रुपमा स्थापित भएको छ ।
सहकारीले आर्थिक वर्ष २०७९/०८० मा शेयर सदस्य संख्या २ हजार ५९२ बाट वृद्धिगरी २ हजार ६८७ पुऱ्याईएको छ । संस्थाको बचत हाल २१ करोड ३१ लाख ३९ हजार ६९७ रहेको छ । यसैगरी शेयर पूँजी रकम २ करोड ५० लाख ९४ हजार ३०० रहेको अध्यक्ष राजु गौतमले बताए । संस्थाले हाल कर्जामा २० करोड ३१ लाख ४१३ लगानी गरेको छ ।
साधारण सभाले अध्यक्ष राजु गौतम सचिव सुरेश रेग्मी, कोषाध्यक्ष प्रकाश लम्साल, ऋण उपसमिति संयोजक सुर्यप्रसाद घिमिरे, लेखा संयोजक सन्तोष घिमिरेको प्रतिवेदन पास गरेको छ ।
साधारणसभामा जिल्ला सहकारी संघ/ जिल्ला दुग्ध संघको अध्यक्ष हरी प्रसाद कंडेल, हेटौंडा उपमहानगरपालिका सहकारी शाखा प्रमुख हिमप्रसाद पौडेल, जिल्ला बचत संघ अध्यक्ष कल्पना श्रेष्ठ, राष्ट्रिय सहकारी बैंकका रामेश्वर अर्याल, कृषि विकास बैंक प्रबन्धक नुर प्रसाद गौतमलगायतको उपस्थिति रहेको थियोे ।
मकवानपुर । प्रत्येक वर्ष आश्विन शुक्ल प्रतिपदादेखि सुरु हुने यस वर्षको बडादसैँ आजदेखि सुरु भएको छ । यो पर्व आश्विन शुक्ल पूर्णिमासम्म १५ दिन धुमधामसँग मनाउने गरिन्छ ।
बडादसैँको पहिलो दिन आज घरघरमा विधिपूर्वक दियो, कलश र गणेश स्थापनासहित घटस्थापना गरिन्छ । पूजाकोठा वा दसैँघरमा वैदिक विधिपूर्वक शक्तिकी अधिष्ठात्री देवी दुर्गाको आह्वान गरी पूजा आरम्भ हुन्छ । आज बिहानै नित्य कर्म समाप्त गरी नजिकको नदी वा चोखो स्थलबाट बालुवा वा माटो ल्याई गाईको गोबरले लिपपोत गरिएको पूजाकोठा अथवा दसैँघरमा विधिपूर्वक राखेर त्यसमाथि यव अर्थात् जौँ रोप्ने गरिन्छ । यस कार्यलाई जमरा राख्ने पनि भनिन्छ । यव अङ्कुर दुर्गादेवीको प्रिय वस्तु भएकाले आज यव रोपण गरी दुर्गालाई चढाएर विजयादशमीको दिन टीका प्रसादसँगै समृद्धिको प्रतीक पहेँलो जमरा पनि ग्रहण गरिन्छ ।
आजैको दिन विधिपूर्वक घट अर्थात् घडा स्थापना गरी त्यही घडामाथि शक्तिस्वरुपा दुर्गाको पूजाआराधना गरिने भएकाले आजको दिनलाई घटस्थापना पनि भन्ने गरिएको हो । आज स्थापना गरिएको पूर्ण कलशको जलले अभिषेक गरी विजयादशमीका दिन दुर्गादेवीको प्रसाद ग्रहण गर्ने गरिन्छ ।
आज घटस्थापनाको साइत बिहान ९ः१६ बजे रहेको पन्चाङ्ग निर्णायक समितिले जनाएको छ । यो शुभ मुहूर्तमा स्थापना गरिएको कलशमा सम्पूर्ण ब्रह्माण्डका देवी देवताहरूको आवाहन गरी नवरात्र भरी माता दुर्गाजीको भिन्न–भिन्न स्वरूपको पूजा अर्चना गर्ने गरिन्छ, घटस्थापनाको दिन शुभ साईत बिहानै भएपनि श्रद्धा एवं भक्तिले दिन भरिनै आफ्नो कुलाचार र परम्परा अनुसार घटस्थापना गरी जमरा राख्न सकिने भएकाेले त्यही अनुसार घटस्थापना गरी जमरा रखिएकाे छ ।
दुर्गादेवीका तीनवटा रूप महाकाली, महालक्ष्मी र महासरस्वतीको नवरात्रभर विधिपूर्वक पूजाआराधना गरिन्छ । महाकाली शक्तिको प्रतीक, महालक्ष्मी धनधान्य र ऐश्वर्यको प्रतीक तथा महासरस्वतीलाई विद्या र बुद्धिको प्रतीकको रूपमा पूजाआराधना गर्ने वैदिककालदेखिको परम्परा छ ।
दुर्गाले आसुरी प्रवृत्तिको प्रतीकका रूपमा रहेका चण्ड, मुण्ड, शुम्भ, निशुम्भ र रक्तबीजलगायतका राक्षसलाई वध गर्न लिएका नौवटा रूपको दुर्गा पक्षका अवसरमा विशेष पूजाआजा र आराधना गर्ने गरिन्छ । आश्विन शुक्ल प्रतिपदादेखि पूर्णिमासम्मको १५ दिनलाई दुर्गापक्ष पनि भनिन्छ ।
देवी भागवत महापुराणमा अनुसार मर्यादा पुरुषोत्तम श्रीरामचन्द्रले नवरात्रको व्रत विधिपूर्वक सम्पन्न गरी दशमीका दिन विजय यात्रा गरेर रावण माथि विजय प्राप्त गरेको वर्णन आउँछ । आश्विन शुक्लपक्षको नौ अहोरात्रलाई नवरात्रव्रत भनी प्रतिपादन गरिएको छ । यस व्रतको दिनहरूमा निश्चित तिथिमूलक देवी-देवताहरूको अनुष्ठान समेत हुने भएकाले नवरात्रका दिनहरूलाई छोट्याउन वा बढाउन न मिल्ने हुन्छ । प्रतिपदाको दिनलाई घटस्थापना भनिन्छ । यसै दिनदेखि नवरात्रि आरम्भ हुन्छ । क्रमशः दशमीका दिन प्रातः काल मात्र यस व्रत समापन हुन्छ । यसै दिन जमरा राखिन्छ ।
घटस्थापनाकाे दिन घट कलशको स्थापना गरी देवी-देवतालाई आवाहन गरिन्छ । माता भगवतीलाई मन पर्ने वनस्पतिमा जमरा पनि एक भएकोले भगवतीलाई खुसी पार्नको लागि जमरा उमार्ने गरिएको हो । पूजाकोठाको नजिकै माटोको विशुद्ध जलपूर्ण घडा (कलश)को वरिपरि नौ वटा देवीको स्वरूपको प्रतिमूर्ति मानी गाईको गोबरले नौवटा देवीको वेदी बनाई लेपन गरिन्छ र घडाको वरिपरि जौ पनि गाडिन्छ । अनि जलपूर्ण कलशमा पञ्चपल्लवको पात चढाई अनन्त शक्तिस्वरूपा महाकाली (संहार), महालक्ष्मी (सुरक्षा) र महासरस्वती (सृष्टि)को पञ्चोपचारले पूजा-आजा गरिन्छ।
ब्रह्मवैवर्त पुराण अनुसार दिशा अनुसार प्रकति-पूर्व, चण्डिका-आग्नेय, भद्रकाली-दक्षिण, सर्वमङ्गला-वायव्य, वैष्णवी- उत्तर, शिवप्रिया-ईशान, जगदम्बिका- जल, थल र आकाश मानिन्छ। पहिलो दिन शैलपुत्रीदेवीकाे पुजा आराधाना गरी क्रमशः ब्रह्चारिणी, चन्द्रघन्टा, कुस्मान्डा, स्कन्दमाता, कात्यायनी, कालरात्री, महागौरी तथा सिद्धिदात्री यी नौ रूपको पूजा गरिन्छ । षष्ठी तिथिमा बेलको हाँगामा तेल, हर्दी लेपन गरी देवीबोधन गरिन्छ । सप्तमीका दिन दसैं घरमा नवपत्रिका प्रवेश गराई भद्रकाली, सरस्वतीको पूजा गरिन्छ । अष्टमीमा कालरात्रीको विधिवत् पूजा गरी भगवतीको वाहन बाघको पनि पूजा गरिन्छ ।
यसै गरी महानवमीमा नवदुर्गा स्वरूप नौ जना कन्याको र दशमीका दिन विहान अपराजिता देवीको पूजा गरिन्छ । हाम्रो धर्म, संस्कृति अनुसार घट कलशमै सम्पूर्ण देवी-देवता सप्तसागर, सप्तद्वीप, सम्पूर्ण नदी एवं तीर्थहरू निहित रहेका छन् । उक्त कुरा कालीका पुराण ग्रन्थमा उल्लेख भएको पाइन्छ। यसका अतिरिक्त घटकलश अष्टमङ्गलका शुभ चिन्हहरूद्वारा समाहित गरिएको पाइन्छ। घट कलश स्थापना गरी त्यसमै सम्पूर्ण देवी देवता, तीर्थ, पावनतम नदी नाला, सप्त सागर, सप्त द्वीप आदि सबैलाई समाहित गरी दसैँ पूजाको थालनी गरिएको हो। गहुँ तथा जौको नवअंकुर लगाउनाले सुख, शान्ति, समृद्धि र स्वास्थ्य लाभ हुने शास्त्रीय मान्यता छ । नौ रात्रिसम्म पूजा गरेर दशौँ दिन विहान टीका-प्रसाद ग्रहण गरे पछि बचेका अंकुरित जमराको रस बनाएर खानाले असाध्य रोगहरू पनि निको हुने कुरा औषधिविज्ञ बताउँछन् । जौका जमरालाई महौषधि भनिएको छ ।
निधारमा विजयादेवीको प्रसादस्वरूप टीका लगाएर जमरा शिरमा राख्यो भने शिरको पीडा, मानसिक अशान्तिबाट बच्न सकिन्छ । जमराबाट शीतलता प्राप्त हुन्छ । विभिन्न रोग व्याधि र कष्टहरू मेटिएर जान्छन् । अंकुरित अन्नबाट भिटामिन, प्रोटिन, क्याल्सियम आदि प्राप्त हुन्छ । स्वास्थ्यको लागि अति उत्तम मानिन्छ । यसै दिनदेखि नवमीसम्म प्रत्येक नेपालीहरूका घरघरमा र देवीका मन्दिरहरूमा पहिलो दिनकै बमोजिम भगवती दुर्गाको पूजा,आराधना र प्रार्थना गरिन्छ । शङ्ख, डमरू, घण्टी आदि बजाइ दुर्गासप्तशती -चण्डी, स्त्रोत्र रत्नावली, कालीका स्तोत्र, दुर्गा कवच, श्रीमद्देवीभागवत् आदि पाठ पनि पढिन्छ। पूजा गरिसकिएपछि प्रत्येक दिन बलि चाहिँ अनिवार्य दिनुपर्ने कुरा शास्त्रीय विधानमा उल्लेख गरिएको छ। पूजक अनुसार वलि दुई प्रकारको हुन्छ | श्रौतयज्ञानुसारको पशु वलि र साकाहारीहरूले प्रदान गर्ने नरिवल ऊखु कुभिण्डो आदि स्मार्तवलि |वलि प्रदान गरिसकेपछि यस दिनको कार्य समापन गरिन्छ।
आजैको दिन विधिपूर्वक घट अर्थात् घडा स्थापना गरी त्यही घडामाथि शक्तिस्वरुपा दुर्गाको पूजा आराधना गरिने भएकाले आजको दिनलाई घटस्थापना भन्ने गरिएको हो ।
मकवानपुर । मकवानपुरको हेटौंडामा खुल्ला दौड प्रतियोगिता २०८१ हुने भएको छ । विजयी दशमीको अवसरमा १७ असोज घटस्थापनाको दिन पहिलो खुल्ला दौड प्रतियोगिता हुने भएको हो ।
दि रिभाइबल युथ क्लब हेटौंडा २ को आयोजना तथा हेटौंडा उपमहानगरपालिका २ नम्बर वडा कार्यालयको आर्थिक सहयोगमा हुने दौड प्रतियोगिताको जानकारी मंगलबार दिइएको हो ।
हेटौंडा २ स्थित मनकामनाचोक देखि मकवानपुर गढी गाउँपालिका ४ स्थित मनकामना मन्दिरसम्म करिब ३ किमिको रन प्रतियोगिता हुने २ नम्बर वडाका अध्यक्ष विष्णु गोपाल महर्जनले जानकारी दिए ।
शुभकामना दौडको रुपमा लिइएको प्रतियोगिताले पर्यटन प्रबर्द्धनमा टेवा पुग्ने उनले बताए । प्रतियोगितामा प्रथम, द्वितीय र तृतीय हुनेले क्रमश: १० हजार ६ हजार र ४ हजार मेडल र प्रमाणपत्र प्राप्त गर्ने छन् ।
प्रतियोगिता खुल्ला भए पनि विभागीय टोलीमा सहभागी भएकाले भाग लिन नपाउने एथ्लेटिक्सका राष्ट्रिय निर्णायक राजाराम पोखरेलले बताए । एथलेटिक्सको नियम अनुसार हुने प्रतियोगितामा करिव ५० हजार रुपैयाँ खर्च हुने बताइएको छ । प्रतियोगितालाई अर्को वर्षबाट निरन्तरता दिइने अध्यक्ष महर्जनले जानकारी दिए ।
सहभागीले मनकामनाचोकबाट मनकामना मन्दिर जाने स्लाब रोड हुदै दौडिनु पर्ने क्लब अध्यक्ष चन्द्र शाहीले बताए । स्लाब रोड बाहेक अन्य छोटो बाटोबाट कोही दौडिए उस्को सहभगिता रद्द हुने उनले जानकारी दिए । रोडको ब्लक बिन्दुमा स्वयंसेवक राखी त्यसको निरीक्षण गरिने समेत उनले बताए ।
वडाका जनप्रतिनिधि प्रतिनिधि, क्लबका प्रतिनिथी लगायतको उपस्थितमा प्रतियोगिताको जानकारी गराइएको हो । प्रतियोगितामा सहभागी हुनेले वडा कार्यालय, रिभाइवल क्लबको कार्यालयमा नाम दर्ता गराउन सक्ने आयोजकले जनाएको छ ।