मकवानपुर । मातृभूमि साहित्य समाज मकवानपुरले ९ जना स्रष्टा तथा व्यक्तित्वलाई हेटौंडामा सम्मानित गरेकाे छ । समाजकाे २६ औं वार्षीक साधारण सभाकाे अवसरमा शनिबार हेटौंडामा एकै मञ्चमा ७ विधामा ९ जनालाई सम्मान गरेकाे हाे ।
समाजले नित्यानगोविन्द स्मृति मातृभूमि सङ्गीत पुरस्कार,२०८० द्वारा गीतकार सुभाषचन्द्र ढुङ्गेल सम्मानित गरेकाे छ । २० हजार रुपैयाँ राशीको उक्त पुरस्कार समाजसेवी मुक्ति गोविन्द वैद्यले पिता नित्य गोविन्द वैद्य स्मृतिमा स्थापना गरेका हुन् । यस्तै श्याम श्रेष्ठ स्मृति मातृभूमि पुरस्कार,२०८० अनुवादक/ साहित्यकार डा. विष्णु भण्डारी (आसाम, भारत ) लाई प्रदान गरिने भएको छ । १५ हजार रुपैयाँ राशीकाे उक्क पुरस्कार समाजसेवी/शिक्षासेवी आशिष श्रेष्ठले पिता श्याम श्रेष्ठको स्मृतिमा स्थापना गरेको हुन् ।
यसैगरी शेखर शर्मा रिजाल स्मृति मातृभूमि शैक्षिक पुरस्कार,२०८० बाट असल पाख्रिन, बेबी मर्जिना खातुन, परीक्षा खतिवडा सम्मानित भएका छन् । समाजसेवी अर्चना शर्मा रिजालले शेखर शर्मा रिजालको स्मृतिमा स्थापना गरेका हुन् । पाख्रिनलाई १५ हजार रुपैंया तथा खातुन र खतिवडालाई जनही ७ हजार ५०० हजार रुपैयाँ प्रदान गरिएकाे हाे । पुरस्कार प्रत्येक वर्ष मकवानपुर जिल्लामा सामुदायिक विद्यालयतर्फ प्रवेशिका परीक्षामा सर्वोत्कृष्ट अङ्क ल्याउने छात्र र छात्रालाई प्रदान गरिन्छ ।
यस्तै साहित्यकार नरेन्द्र राज पौडेल (काठमाडौं) ईश्वरी स्मृति मातृभूमि सम्मान, २०८० बाट सम्मानित भएका छन् । १५ हजार रुपैयाँ राशी रहेकाे उक्त सम्मान मातृभूमि साहित्य समाज मकवानपुरका अध्यक्ष कृष्णप्रसाद दाहालले आफ्ना पिताको स्मृतिमा स्थापना गरेकाे हुन् । यो सम्मान विविध क्षेत्रमा उत्कृष्ट योगदान दिने व्यक्तित्वलाई २०७० सालदेखि प्रदान गरिदै आएकाे समाजका सचिव किशन पौडेलले जानकारी दिए ।
१० हजार रुपैयाँ राशिकाे हातेमालो-मातृभूमि युवा सृजनशील सम्मान, २०८० बाट मकवानपुरे साहित्यकार दीपक गौतम सम्मानित भएका छन् । समाजले २०६५ सालमा स्थापना गरेको यो सम्मान २०७२ सालदेखि मकवानपुरकै ‘हातेमालो बचत तथा ऋण सहकारी संस्था’ ले प्रायोजन गर्दै आएको बताइएकाे छ ।
यसैगरी मकवानपुरका गृष्मा गहतराज मङ्गलादेवी स्मृति मातृभूमि बाल पुरस्कार, २०८० बाट सम्मानित हुने भएकी छिन् । शिक्षासेवी देव प्रसाद श्रेष्ठले आमा मङ्गलादेवी श्रेष्ठको स्मृतिमा २०७७ सालमा स्थापना गरेकाे उक्त पुरस्कारकाे राशि ७ हजार ५०० रहेकाे छ । प्रतिभाशाली बालबालिकाहरूलाई यो पुरस्कार प्रदान गरिदै आइएकाे सचिव पौडेलले जानकारी दिए ।
शारदा उप्रेती स्मृति मातृभूमि सम्मान, २०८० बाट कलाकार ज्ञान रत्न लामा सम्मानित भएका छन् । अधिवक्त चूडाराज उप्रेतीले स्थापना गरेकाे उक्त पुरस्कारकाे राशि १० हजार रुपैया रहेकाे छ । यो पुरस्कार २०८० सालमा स्थापना गरिएकाे तथा पहिलाे पटक प्रदान गरिएकाे समाजले जनाएकाे छ ।
मातृभूमि साहित्य समाज, मकवानपुर भाषा, साहित्य, कला, सङ्गीत र संस्कृतिको संरक्षण/संवर्द्धन गर्ने उद्देश्यले २०५६ सालमा स्थापित संस्था हो। समाजले विभिन्न क्षेत्रमा योजदान पुर्याउने व्यक्तित्वहरुलाई हरेक वर्ष सम्मान गर्दै आएकाे अध्यक्ष कृष्ण प्रसाद दाहाले जानकारी दिए ।
उक्त अवसरमा लेखन विधामा सृजनात्मक सौन्दर्य परिचर्चा कार्यक्रम आयोजना गरिएको थियाे । संस्थाका पूर्व अध्यक्ष प्रा.राजबाबु पहाडीले परिचर्चा गरेका थिए । संस्थाका संरक्षक हयग्रीव आचार्य संस्थाको गतिविधि माथि चर्चा गर्दै अभिमुखीकरण समेत गरे । सचिव किशन पौडेलले संस्थाको वार्षिक प्रगति प्रतिवेदन एवम् आर्थिक वर्षको गतिविधिहरू प्रस्तुत गरेकाे थिए । पुरस्कृत व्यक्तित्वको परिचय समाजका उपाध्यक्ष हेमन्त ढुङ्गेलले गरेका थिए भने कार्यक्रममा सहजिकरण सदस्य सानु खनालले गरेका थिए ।
समाजका अध्यक्ष कृष्ण प्रसाद दाहालको अध्यक्षता तथा बागमती प्रदेश आर्थिक मामला तथा योजना मन्त्री कुन्दनराज काफ्लेकाे प्रमुख आतिथ्ययतामा भएकाे कार्यक्रममा हेटौंडा उपमहानगरपालिका १० नम्बर वडाध्यक्ष फुर्वा दाेर्जे तामाङकाे विशिष्ट आतिथ्यता रहेकाे थियाे ।
समाजले गत असोजमा ३ विधाका पुरस्कार प्रदान गरिसकेकाे छ । महालक्ष्मी साहित्य पुरस्कार, २०८० महाकाव्यकार मुना अर्याललाई प्रदान गरिएकाे छ । ५१ हजार रुपैंया राशिकाे उक्त पुरस्कार मातृभूमि साहित्य समाज मकवानपुर र महालक्ष्मी विकास बैंकले संयुक्त रुपमा २०५९ सालबाट प्रदान गर्दै आएकाे छ । त्यस्तै, समाजसेवी ईश्वर मैनालीले बुबाको स्मृतिमा स्थापित १० हजार राशिकाे केशवलाल स्मृति मातृभूमि पत्रकारिता पुरस्कार २०८० पत्रकार माधवप्रसाद न्यौपानेलाई प्रदान गरेकाे थियाे । मकवानपुर श्री सम्मानबाट मकवानपुरका अग्रज शिक्षाप्रेमी बद्रीनाथ शर्मालाई सम्मानित गरिएकाे थियाे ।
मकवानपुर । नेपालमा सकारात्मक कानूनी व्यवस्था हुँदाहुँदै पनि कतिपय अवस्थामा पितृसत्तात्मक सोचका कारण समाजमा महिलामाथि विभिन्न हिंसा, अन्याय हुनु निन्दनीय भएको बागमती प्रदेश प्रमुख दीपक प्रसाद देवकोटाले बताउनु भएको छ ।
११५ औं श्रमिक महिला दिवसको अवसरमा शुभकामना सन्देश जारी गर्नु हुँदै उहाँले यस्तो उल्लेख गर्नु भएकाे हो । “सबै महिला तथा बालिकाको लागि : अधिकार, समानता र सशक्तीकरण” भन्ने राष्ट्रिय तथा अन्तराष्ट्रिय नाराका साथ आज मार्च ८ का दिन विश्वभर मनाइँदै छ ।
महिलामाथी हुने असामान्य व्यवहारकाे अन्त्य गर्नमा आ-आफ्नो क्षत्रबाट सबैलाग्नु पर्ने उहाँले उल्लेख गर्नु भएको छ ।
दिवसको अवसरमा प्रदेश प्रमुख देवकोटाद्वारा प्रकाशित शुभकामना सन्देशमा भनिएको छ ‘बागमती प्रदेश, देश तथा विदेशमा रहनुहुने सम्पूर्ण नेपाली नारीहरुमा सुख, शान्ति एवं समृद्धिको हार्दिक शुभकामना व्यक्त गर्दछु ।’
महिलाको हक अधिकारको सवाललाई नेपालको संविधानमा मौलिक हकका रूपमा व्यवस्था गरिएको छ । संवैधानिक व्यवस्था बमोजिम महिलाका अधिकार राज्यका विभिन्न निकायहरुमा अहिले कार्यान्वयन भइरहेका छन् ।
संघीय लोकतान्त्रिक गणतन्त्रात्मक शासन व्यवस्थाभित्र अधिकार सम्पन्न भएका महिलाहरु आफ्नो अधिकार स्वतन्त्रतापूर्वक उपभोग गरिरहेका छन् । यि सवाल संघीय राज्य व्यवस्थामा प्राप्त गरिएको महत्वपूर्ण उपलब्धी भएको उहाँले बताउनु भएको छ ।
‘देशवासी सम्पुर्ण नारीहरुको आर्थिक, सामाजिक, शैक्षिक, राजनीतिकलगायत समग्र विकासको आयाममा प्रगतिका लागि सम्पूर्णको समान सहभागिता तथा योगदान आवश्यक छ’ उहाँले भन्नु भएको छ । ‘दिवसले हामी सबैलाई नारी हकहितका पक्षमा लाग्दै उनीहरुको सशक्तीकरणमा दीगो, प्रभावकारी पहल तथा सहकार्यको लागि दरिलो पाइला अगाडी बढाइ राख्न प्रेरणा प्राप्त होस्’ उहाँले सन्देशमा भन्नु भएको छ ।
मकवानपुर । मकवानपुरकाे हेटौंडामा जारी दशौं राष्ट्रिय हेटौंडा भेट्रान्स कप एट ए साइड रनिङ शिल्ड फुटबल प्रतियोगिता अन्तर्गत शुक्रवारका खेलबाट नागस्वती, फ्रिडम फाईटर, बगरभाई र किङकम क्वाटर फाइनल प्रवेश गरेका छन् ।
हेटौंडा उपमहानगरपालिका वडा नम्बर ४ स्थित हुप्राचौर खेलमैदानमा जारी प्रतियोगिता अन्तर्गत शुक्रवारको पहिलो खेलमा फ्रिडम फाइटर भेट्रान्स ठमेल विजयी भएको छ । फ्रिडमले चितवन भेट्रान्सलाई २-० गोल अन्तरले पराजित गर्यो । फ्रिडमकाे जितमा दोस्रो हाफको ४२ औ मिनेटमा राजकुमार केसी तथा ४९ औं मिनेटमा कृष्ण मालाकारले गोल गरे । खेलको म्यान अफ द म्याच फ्रिडम फाइटरका खेलाडी राजकुमार केसी घोषित भए ।
शुक्रबारकाे दोस्रो खेलमा नागस्वती भेट्रान्स हेटौंडा विजयी हुदै क्वाटरफाइनल प्रवेश गरेकाे छ । नागस्वतीले सिमरा भेट्रान्सलाई ३-० गोल अन्तरले हराउँदै क्वाटर फाइनल प्रवेश गरेकाे हाे । नागस्वतीको जीतमा खेल पहिलो हाफकाे छैटौं निमा लामाले गोल गरे । यस्तै १० औं मिनेटमा प्रकाश राना मगरले एक गोल गरे । १९ औं मिनेटमा निमा लामाले टिमकाे लागि दोस्राे गोल गर्दै फराकिलाे अन्तर बनाए । खेलको म्यान अफ द म्याच नागस्वती भेट्रान्सका निमा घोषित भए ।
यस्तै तेस्रो खेलमा बगर भाईखलक पोखराले ट्राईब्रेकरमा एनजेजे भिसी भेट्रान्सलाई हराउँदै क्वाटरफाइन प्रवेश गर्यो । पहिलाे हाफकाे दशौं मिनेटमा बागरभाइको तर्फबाट राजकुमार तामाङले गोल गर्दै अग्रता लिएका थिए । यसैगरी एनजेजे भिसी भेट्रान्सको तर्फबाट खेलको २९ औं मिनेटमा दिलकुमार कार्कीले जवाफी गोल फर्काए । निर्धारित समयमा दुवै समुहबाट एक/एक गोल भएपछि खेल ट्राईब्रेकरमा धकेलिएकाे थियो । ट्राईब्रेकरमा बगरभाईले ४-३ गोल अन्तरले एनजेजे भिसी पराजित गर्यो । खेलको म्यान अफ द म्याच बगरका हिमाल थापा घोषित भए ।
यस्तै आजको चौथो खेल किङकम भेट्रान्स काठमाडौं र बुटवल भेट्रान्स बिच हुने तालिका रहेकाे थियाे । तर बुटवल भेट्रान्स खेलमा अनुपस्थित भएपछि किङकम भेट्रान्स विजयी भयो ।
प्रतियोगिता अन्तरगत शनिवारबाट क्वाटर फाइनलका खेलहरू हुनेछन् । शनिवारकाे पहिलो खेल दिउँसो १ बजे बानेश्वर भेट्रान्स र एबीसी भेट्रान्स बिच हुनेछ भने दोस्रो खेल बगर भाईखलक पोखरा र किङकम भेट्रान्स बिच दिउँसो २ बजे हुनेछ । यस्तै तेस्रो क्वाटर फाइनल खेल फ्रिडम फाइटर र नागस्वती भेट्रान्स बिच दिउँसो ३ बजे हुनेछ । यसै गरी चौथो खेल आयोजक हेटौडा भेट्रान्स र बौद्ध भेट्रान्स बिच हुने तालिका रहेको छ ।
हेटौंडा भेट्रान्स क्लबकाे आयोजनामा जारी प्रतियोगितामा पहिलो हुने टिमले एक लाख ५० हजार ५ सय ५५ र दोस्रो हुने टोलीले ७५ हजार ५ सय ५५ प्राप्त गर्नेछन् । यस्तै विधागत खेलाडीहरू सर्वश्रेष्ठ कोच,उत्कृष्ट फरवार्ड,उत्कृष्ट गोलकिपर,उत्कृष्ट डिफेन्स,उत्कृष्ट मिड फिल्डरलाई जनही ५ हजार र म्यान अफ द सिरिज हुने खेलाडीलाई १० हजार पुरस्कार प्राप्त गर्नेछन् ।
मकवानपुर । बागमती प्रदेशका ५ वटा सहकारी समस्याग्रस्त घाेषणा गरिएकाे छ । यसैगरी ७५ वटा सहकारीमाथि छानविनकाे लागि प्रहरीमा पठाइएकाे छ ।
सहकारी तथा गरिबी निवारणमन्त्री मदुकुमार श्रेष्ठले शुक्रबार सय दिनको उपलब्धि सार्वजनिक कार्यक्रममा गत आव समेतकाे गरी उक्त तथ्याङ्क प्रस्तुत गरेका हुन् ।
९ साउन २०८१ मा प्रदेशका मुख्यमन्त्री बहादुर सिंह लामाले नियुक्त गरेका मन्त्री श्रेष्ठले ७ मंसिर २०८१ मा मात्र जिम्मेवारी पाएका थिए । जिम्मेवारी प्राप्त गरेको १०० दिने अवधिमा मन्त्री श्रेष्ठले उपलब्धि सार्वजनिक कार्यक्रम गरेका हुन् । मन्त्री श्रेष्ठकाे हालसम्मकाे कार्यअवधीमा चालु आवमा ३ वटा सहकारीलाई समस्याग्रस्त घोषणालाई मुख्य उपलब्धीको रूपमा लिइएको छ ।
मन्त्री श्रेष्ठले २८ पुस २०८१ मा निर्णय गर्दै नेशनल नमोबुद्ध बचत तथा ऋण सहकारी संस्था लिमिटेड काठमाडौं, लालीगुराँस बचत तथा ऋण सहकारी संस्था लिमिटेड काठमाडौं र सुमेरु सेभिङ एण्ड क्रेडिट को–अपरेटिभ लिमिटेड ललितपुरलाई समस्याग्रस्त सहकारी घोषणा गरेको बताए । यसअघि दर्शन बचत तथा ऋण सहकारी संस्था लिमिटेड काठमाडौं र सिभिल बचत तथा ऋण सहकारी संस्था लिमिटेड काठमाडौं समस्याग्रस्त सहकारी घोषणा भइ व्यवस्थापनको काम भइरहेको उपलब्धी सार्वजनिक कार्यक्रममा उनले जानकारी दिए ।
२८ पुसकाे मन्त्रीस्तरीय निर्णय अनुसार थप ८ वटा सहकारी संस्थालाई कारबाहीकाे लागि प्रहरीकाेमा पठाएको छ। मन्त्री श्रेष्ठकाे अवधी तथा गत वर्ष समेत गरी हालसम्म नेपाल प्रहरी र सीआईबीमा अनुसन्धान तथा कारवाहीमा पठाएको सहकारी संस्था ७५ वटा पुगेको छ । ‘निक्षेप/बचत रकम फिर्ता नगरेको सम्बन्धमा सहकारी विभाग, जिल्ला प्रशासन कार्यालय, स्थानीय निकाय र सहकारी महाशाखा हेटौडामा उजुरी प्राप्त हुने गरेकाे छ’ उनले भने उजुरीका सम्बन्धमा निक्षेप/बचत फिर्ता गरिदिन हुन, बचत फिर्ताको कार्ययोजना पेश गर्न र बचत फिर्ता नगर्नुको कारण सहित स्पष्टिकरण पेश गर्न पटक पटक पत्राचार गरिएकाे छ ।’
उल्लेखित कार्य गर्न पत्राचार गरिएकाेमा कार्यालय समेत बन्द भइ पत्र फिर्ता आएको, सञ्चालकहरुलाई मोबाइलमा सम्पर्क गर्दा सम्पर्क हुन नसकेको लगायतका कारण हालसम्म ७५ वटा सहकारी संस्थाहरुलाई प्रहरी कारबाहीमा पठाएको उनले जनाकारी दिए । चालु आर्थिक वर्षमा प्रहरी कारवाहीमा पठाइएकाे सहकारीमा नवजिवन बहुउद्देश्यीय सहकारी संस्था लि कौशलटार, भक्तपुर, फलफूल बजार बहुउद्देश्यीय सहकारी, कुलेश्वर काठमाडौं, मुकुल बचत तथा ऋण सहकारी संस्था, बनेपा काभ्रे, डिलाइट बहुउद्देश्यीय सहकारी संस्था, जावलाखेल ललितपुर, मञ्जुश्री बचत तथा ऋण सहकारी संस्था गोकर्णेश्वर काठमाडौं, पशुपति बचत तथा ऋण सहकारी संस्था, बनेपा काभ्रे, ललितपुर सिटी बचत तथा ऋण सहकारी संस्था, कुमारीपाटी, झिंगु समाज बचत तथा ऋण सहकारी संस्था, मध्यपुर ठिमि भक्तपुर रहेका छन् ।
सहकारीहरूमा देखिएका वित्तीय तथा व्यवस्थापकीय संकट समाधानका लागि मन्त्रालयले सञ्चालक तथा पदाधिकारीहरूसँग निरन्तर छलफल गरिरहेको र समस्या देखिएका सहकारीबाट बचतकर्ताको बचत फिर्ता, व्यवस्थापन लगायतका विषयमा ठोस कार्ययोजना निर्माण गरी पेस गर्न निर्देशन गरिएको मन्त्री श्रेष्ठको भनाई छ ।
सहकारी महाशाखा हेटौंडामा प्राप्त उजुरीको आधारमा ११ वटा सहकारी संस्थाका सञ्चालकहरूलाई बचत रकम फिर्ता गर्ने प्रक्रिया अघि बढाइएको मन्त्री श्रेष्ठले बताए । उनका अनुसार भवन तथा पूर्वाधारको व्यवस्थापन, सहकारी अभिलेख तथा कागजहरूको व्यवस्थापन, डिजिटाइलेशनको कार्य प्रारम्भ गरिएको छ ।
यस्तै नियमित रूपमा सहकारी संस्थाहरूको सुपरिवेक्षण तथा नियमनसहित सहकारी बचत पीडितहरूको रकम फिर्ता गराउन पहल गरिएको सार्वजनिक उपलब्धीमा उल्लेख छ । मन्त्रालयले सहकारी व्यवस्थापन तथा सेवा प्रवाहलाई सहज र प्रभावकारी बनाउन सफ्टवेयरको निर्माणको तयारी भइरहेको उनले बताए ।
सहकारी बचत पीडितहरुका रकम फिर्ता नगरेको जनगुनासो तथा सहकारी विभाग, स्थानीय निकाय र सहकारी तथा गरिवी निवारण महाशाखा हेटौडामा प्राप्त उजुरीको आधारमा १२ वटा सहकारी संस्थाका संचालकहरुलाई मन्त्रालयमै बोलाई सहकारी पीडितहरुको रकम फिर्ता गर्ने प्रक्रिया र आधार पेश गर्न निर्देशन गरिएको समेत मन्त्री श्रेष्ठले जानकारी दिए ।
बागमती प्रदेशको नियमन क्षेत्राधिकार भित्र रहेका बचत तथा ऋणको मुख्य कारोबार गर्ने समस्या उन्मुख सहकारी संस्थाको हालको अवस्थाकाे अध्ययन गरी प्रतिवेदन पेश गर्न मन्त्रालयबाट प्रतिनिधि तोकि पठाईएका कर्मचारीबाट काभ्रेपलान्चोक जिल्लाका नागरिक विकास बचत तथा ऋण सहकारी संस्था लि. र ललितपुर जिल्लास्थित गतिशील बचत तथा ऋण सहकारी संस्था लि. को स्थलगत सघन अनुगमन गरी भूमि व्यवस्था, सहकारी तथा गरिबी निवारण मन्त्रालयमा प्रतिवेदन पेश गरिएको उपलब्धीमा उल्लेख छ।
हाल बागमती प्रदेशको नियमन क्षेत्राधिकार भित्र रहेका दर्ता सहकारी संस्था ३ हजार २२३ वटा रहेका छन् । सहकारी संस्थाहरुले तोकिएको समयमा विवरणहरु पेश गर्नुपर्ने प्रदेश सहकारी ऐन, २०७६ मा व्यवस्था भए पनि हालसम्म ८९५ वटा सहकारी संस्थाहरुले विवरण बुझाएका छन् । विवरण तथा प्रतिवेदन ढिलो गरी बुझाएका सहकारीहरुबाट दस्तुरबापत १२ लाख ९७ हजार ५०० रुपैया संकलन भएकाे बताइएकाे छ ।
सय दिने उपलब्ध सार्वजनिक कार्यक्रममा चालु आर्थिक वर्ष २०८१/८२ को लागि ‘पहिचान भएका गरिव परिवारका लागि आयआर्जन कार्यक्रम कार्यान्वयन कार्यविधि, २०८१’ तयार हुने क्रममा रहेको जानकारी दिइएकाे छ । गरिबी निवारणका लागि चेपाङ्, दलित र वञ्चितीकरणमा परेका समुदायको आयआर्जन तथा जीविकोपार्जन सुधार कार्यक्रम सम्बन्धी विशेष अनुदानको लागि मन्त्रालयले कार्यक्रम सञ्चालन प्रस्ताव तयार गरी पेश गरिएको बताइएकाे छ ।
स्थानीय श्रम, सीप र पूँजीलाई अधिकतम रुपमा परिचालन गर्ने गरी सहकारीलाई अर्थतन्त्रको सवल स्तम्भको रुपमा विकसित गर्दै आर्थिक तथा सामाजिक विकासमा योगदान पुर्याउन तथा हाल देखिएका वर्तमान समस्या तथा चुनौतीलाई सम्बोधन गर्न ‘प्रदेश सहकारी नीति’ तर्जुमा गर्ने क्रममा रहेकाे समेत मन्त्री श्रेष्ठले जानकारी दिए ।
मकवानपुर । मकवानपुरकाे हेटौंडामा सुरु दशौं राष्ट्रिय हेटौंडा भेट्रान्स कप ८ ए साइड रनिङ शिल्ड फुटबल प्रतियोगितामा बानेश्वर फ्रेण्डसीप भेट्रान्स र बौद्ध भेट्रान्सले विजयी सुरुवात गरेका छन् ।
हेटौंडा भेट्रान्स क्लबकाे आयोजनामा बिहीबारबाट सुरु प्रतियाेगिताकाे उद्घाटन खेलमा बानेश्वर भेट्रान्सले वीरगंज सिटी भेट्रान्सलाई १–० गोल अन्तरले हराउँदै विजयी सुरुवात गरेकाे हाे । बानेश्वरको तर्फबाट हरिहर थापाले गरेको १ मात्रै गोल निर्णायक बन्यो । उनले खेलकाे अन्तिम समयमा गोल गरेका थिए । खेलको म्यान अफ द म्याच थापा घोषित भएका थिए ।
यसैगरी बिहीबार नै भएकाे दोस्रो खेलमा बौद्ध भेट्रान्सले वीरगन्ज युथलाई २–० गोल अन्तरले पराजीत गर्यो । बौद्धको तर्फबाट उमन मोक्तान र राजु कोइरालाले समान १/१ गोल गरे । खेलमा कोइराला म्यान अफ द म्याच घोषित भए । यस्तै आजै भएको तेस्रो खेलमा एबीसी भेट्रान्स पोखरा र भुटनदेवी भेट्रान्स भएकाे खेलकाे निर्धारित समय गोल रहित बराबरी भएकाे थियाे । समय अभावका कारण आज विजयीकाे छिनाेफानाे हुन सकेन । उक्त २ टिमबिच शुक्रबार विहान ट्राईब्रेकर मार्फत विजयीकाे घाेषणा हुनेछ ।
यसैगरी प्रतियोगिता अन्तरगत शुक्रबार ४ खेल खेलाइने छ । पहिलो खेल फ्रिडम फाइटर र चितवन भेट्रान्स बिच दिउँसो १ बजे हुने छ भने दोस्रो खेल सिमरा भेट्रान्स र नागस्वती भेट्रान्स हेटौंडा बिच दिउँसो २ बजे हुने तालिका रहेको छ । यस्तै तेस्रो खेल बगर भाईखलक पोखर र एन.जे.जे.भीसी सिमरा बिच दिउँसो ३ बजे तथा चौथो खेल अपराह्न ४ बजे किङकम भेट्रान्स र बुटवल भेट्रान्स बिच हुने आयोजकले जनाएकाे छ ।
प्रतियोगितामा पहिलो हुने समूहले एक लाख ५० हजार ५ सय ५५ र दोस्रो हुने समूहले ७५ हजार ५ सय ५५ प्राप्त गर्नेछन् । प्रतियोगितामा विभिन्न विधागत पुरस्कारकाे समेत व्यवस्था छ । सर्वश्रेष्ठ कोच, उत्कृष्ट फरवार्ड, उत्कृष्ट गोलकिपर, उत्कृष्ट डिफेन्स, उत्कृष्ट मिडफिल्डर विधामा पुरस्कार प्रदान गरिने कार्यक्रम संयोजक मणिराज गौतमले जानकारी दिए । उनका अनुसार विधागत उत्कृष्ठ हुनेलाई जनही ५ हजार रुपैंया नगद प्रदान गरिने छ । यस्तै प्रतियाेगिताकाे म्यान अफ द सिरिजले १० हजार रुपैंया प्राप्त गर्ने छन् ।
प्रतियोगितामा मुख्य प्रायोजकका रूपमा हेटौंडा उपमहानगरपालिका रहेको छ भने सह प्रायोजकका रूपमा हेटौंडा स्कुल अफ म्यानेजमेन्ट रहेको आयोजक क्लब अध्यक्ष रमेश उप्रेतीले बताए । प्रतियोगितामा हेटौंडाकाे २ वटासहित १४ वटा भेट्रान्स क्लबकाे सहभागिता रहेकाे छ । २०७२ सालबाट रोटरी क्लव अफ मकवानपुरसँगको सहकार्यबाट सुरु गरिएको प्रतियोगिता २०७४ साल देखि हेटौंडा भेट्रान्स क्लब आयोजक भई हेटौंडा भेट्रान्स कप ८ ए साईड राष्ट्रिय फुटबल प्रतियोगीता संचालन हुँदै आएकाे संयोजक गौतमले जानकारी दिए ।
पछिल्लो समय फुटबल खेल क्षेत्रमा भेट्रान्स खेलाडीहरुको सक्रियता उत्साहजनक भईरहेको, देशैभर ४० वर्ष माथि उमेर समूहका पूर्व राष्ट्रिय खेलाडीहरु भेट्रान्स खेलमा आकर्षण बढ्दो रुपमा रहेकाे, ४० वर्ष माथि उमेर समूहको भेट्रान्स फुटबल प्रतियोगिताले देशैभर रौनकता थप्दै आएको अवस्थामा भेट्रान्स प्रतियोगिताले पूर्व खेलाडीहरुको सम्बन्ध विस्तार र भाइचाराको सम्बन्ध प्रगाढ बनाउने उदेश्यले यो प्रतियाेगिता आयोजना गरिएकाे उप्रतीले जानकारी दिए ।
यसैबीच हेटौंडा उपमहानगरपालिकाका नगर प्रमुख मिना कुमारी लामाले भेट्रान्स प्रतियोगिताले पूर्व खेलाडीहरूको सम्बन्ध विस्तार र भाइचाराको सम्बन्ध प्रगाढ बनाउने बताएकी छिन् । प्रतियाेगिताकाे उद्घाटन गर्दै उनले युवा खेलाडी उत्पादनमा यस्ता प्रतियोगिताले प्रोत्साहन थप्ने बताइन् ।
बिहान तथा बेलुकाको समय व्यवस्थापन गर्दै खेलमा लगउान सके स्वस्थ्य बन्न सकिने उनले बताइन् । भेट्रान्स खेलले फुटबल खेलको विकासमा योगदान पुर्याउदै आएकाे बत्ताउदै उनले भनिन् ‘खेलाडीहरू बिच सुमधुर सम्बन्ध प्रगाढ बनाउँदै पुरानो सम्बन्धलाई नवीकरण गर्दै आएकाे छ ।’ हेटौडा भेट्रान्सले मकवानपुर जिल्लालाई खेल क्षेत्रबाट चिनाउन भूमिका खेलेको उनले बताइन् ।
प्रतियाेगिता उद्घाटनमा शिक्षाविद् पूरण बहादुर जोशी, एन्फाका केन्द्रीय सदस्य टिका लामा, हेटौडा उपमहानगरपालिकाका वडा नम्बर ४ अध्यक्ष नवीन सिग्देललगायतका अन्य वडाका अध्यक्षहरु, जिल्ला खेलकुद विकास समिति मकवानपुरका पूर्व अध्यक्षहरू बागमती प्रदेश फुटबल संगका महासचिव लवराज ठकुरी, निबर्तामान अध्यक्ष राजेन्द्र श्रेष्ठ लगायतकाे उपस्थिति रहेकाे थियाे ।