मकवानपुर । कृषि उत्पादन तर्फ चासो नदिएको टिप्पणी खेप्दै आएको हेटौंडा उपमहानगरपालिकाले कृषि उत्पादनमा टेवा पुर्याउने उद्देश्यले हाते ट्याक्टर सहयोग गरेको छ ।
हेटौंडा उपमहानगरपालिकाले हेटौंडा–१८ को सहकारीलाई ट्रयाक्टर हस्तान्तरण गरेको छ । चालु आर्थिक बर्ष २०७८/७९ को यान्त्रीकरण अनुदान कार्यक्रम अन्तरगत उपमहानगरले ५० प्रतिशत अनुदानमा ट्रयाक्टर दिएको हो ।
हेटौंडा–१८ मा रहेको साना किसान कृषि सहकारी सस्था लिमिटेडमा आवद्ध किसानहरुलाई सहयोग पुर्याउने उद्देश्य सहित अनुदानमा ट्रयाक्टर हस्तान्तरण गरेको हेटौंडा उपमहनगरपालिका कार्यालय आर्थिक बिकास महाशाखाका प्रमुख गंगा कुमारी चौलागाईले बताइन् ।
महाशाखा अन्तरगतको कृषि शाखाले अनुदानमा दिएको ट्रयाक्टरको सांचो हेटौंडा उपमहानगरपालिका नगर प्रमुख मिनाकुमारी लामाले सहकारीका अध्यक्ष रेखा खतिवडालाई हस्तान्तरण गरेकी थिइन् । ट्रयाक्टरमा उपमहानगरले ६ लाख ५० हजार रुपियाँ अनुदान व्यहोरेको महाशाखा प्रमुख चौलागाईले जानकारी दिइन् ।
किसानको समृद्धिको लागि नगरपालिका सधै सकारात्मक रहेको लामाले बताइन् ।
मकवानपुर । हेटौंडा उपमहानगरपालिकाले १० परिवारलाई बिऊ बाख्रा बितरण गरेको छ । दिगो आर्यआर्जनमा टेवा पु¥याउने लक्ष्य सहित आदिवासी जनजाती महिलाहरुका लागि उपमहानगरपालिकाले बिऊ बाख्रा बितरण गरेको हाे ।
उपमहानगरका बिभिन्न वडामा रहेका बिपन्न समुदायका आदिवासी जनजाती महिलाहरुलाई प्रतिघर २ वटाका दरले १० परिवारलाई बिऊ बाख्रा बितरण गरिएकाे उपमहानगरपालिकाले जनाएकाे छ । हेटौंडा-८ का कमला गुरुङ र प्रमिला चौधरी, हेटौंडा ११ का माया थापा मगर र उर्मिला गुरुङ, हेटौंडा १३ का उजेली कुमाल र सुनिता मुक्तान, हेटौंडा-१५ का कुमरी तामाङ, हेटौंडा-१६ का बिष्णुमाया प्रजा चेपाङ, हेटौंडा-१७ का निर्मला भुजेल र सरिता राईलाई उपमहानगरका उप प्रमुख राजेश बानियाँले बिऊ बाख्रा हस्तातरण गरेका हुन् ।
उपमहानगरको समाजकल्याण शाखाले २ लाख १५ हजार १ सय रुपैयाँको लागतमा २० वटा बाख्रा खरिद गरी उनीहरुलाई वितरण गरेको हाे । कार्यक्रममा बिऊ बाख्रा हस्तान्तरण गर्दै उपप्रमुख बानियाँले सितैमा पाएको भनेर वेवास्ता नगरी दियो आय आर्जनमा जोडिन आग्रह गरे । उनले उपमहानगरपालिका कृषिको प्रवर्द्धन र विकासका लागि योजना बनाएरै काम गर्ने तयारीमा रहेका भन्दै पालिकाका हरेक वडामा पशु प्राविधिकको व्यवस्था गर्ने बताए ।
नेपाल आदिवासी जनजाती महासंघ जिल्ला समन्वय परिषल मकवानपुरका अध्यक्ष जंगबहादुर गुरुङको अध्यक्षतामा भएको कार्यक्रममा उपमहानगपालिका समाज कल्याण शाखाका अधिकृत भैरबबहादुर कुमालको सहभागिता रहेको थियो ।
मकवानपुर । हेटौंडा उपमहानगरपालिकाले कृषक र कृषिको बिकासलाई प्राथमिकता दिने नगर प्रमुख मिनाकुमारी लामाले बताएकी छिन् । १९ औं धान दिवसकाे अवसरमा हेटाैडाकाे १७ र ११ नम्बर वडामा आयाेजित धान राेपाईं कार्यक्रममा कृषक र कृषिको बिकासका लागि बजेटै छुट्याएर काम गर्ने उनले बताइन् ।
बुधबार मनाइएकाे धान दिवसमा हेटौंडा ११ को राप्ती सिंचाइ र हेटाैडा १७ को गुवाबारीमा आयोजित कार्यक्रममा कृषि क्षेत्रको बिकास र प्रवर्धनमा उपमहाननगरले कुनै कसर बाँकी नराख्ने लामाले बताइन् । लामाले कृषि, पशुपालन र अन्य खेतीका लागि बिषेश योजनै बनाएर काम गर्ने तयारीमा उपमहानगर रहेको जानकारी दिइन् । अहिले सम्म बास्तबिक किसारलाई सरकारले भेट्न नसकेको अवस्थामा हामी बास्तविक किसानकाे कार्यस्थलमै पुगेर काम गर्ने तयारीमा रहेको उनले बताइन् ।
‘उपमहानगरका हरेक वडामा कृषि प्राविधिकको व्यवस्था गरिने छ’ नगर प्रमुख लामाले भनिन्– ‘आगामी आर्थिक बर्षको बजेटमा कृषिका हरेका क्षेत्रलाई समेटेर काम गर्ने तयारीमा उपमहानगर रहेको छ । उनले कृषिको पकेट क्षेत्र, पशुपालनका योजना सहित आउन कृषक समुहहरुलाई आव्हान गरिन् ।
कार्यक्रममा उपमहानगरका उपप्रमुख राजेश बानियाँले मानो रोपेर मुरी उव्जाउने पेशामा रहेका सम्पुर्ण किसानलाई धान दिवसको शुभकामना दिएका थिए । उनले हामी उपमहानगरलाई सबै हिसाबले अव्बल बनाउने अभियानमा रहेकाले सबैको सहयोग आवश्यक रहेको बताए । कृषि कर्ममा रहेका सम्पुर्ण किसानलाई समेटेर आगामी आर्थिक वर्षबाट उल्लेखनीय काम गर्ने बानियाँले बताए ।
मकवानपुर । धान दिवसकाे अवसरमा बागमती प्रदेशका प्रदेश प्रमुखले शुभकामना दिएका छन् । प्रदेशका प्रदेश प्रमुख यादवचन्द्र शर्माले आज मनाइँदै गरिएको राष्ट्रिय धान दिवसका अवसरमा शुभकामना व्यक्त गरेका हुन् ।
नेपाललाई खाद्यान्नमा आत्मनिर्भर बनाउन यस दिवसबाट प्रेरणा प्राप्त होस् भन्दै उनले शुभकामना व्यक्त गरेका छन् । ‘मानो रोपेर मुरी उब्जाउने’ महिनाको मध्ये दिनका सन्दर्भमा शुभकामना व्यक्त गर्दै शर्माले १८ वर्षअघि नेपाल सरकारले राष्ट्रिय धान दिवस घोषणा गरी मनाउँन थालेयता यस दिवसलाई महत्व दिइएको जनाएका छन् ।
‘यो अवसरमा सम्पूर्ण देशवासीका साथै बागमती प्रदेशवासी कृषक दाजुभाइ तथा दिदीबहिनीहरुमा हार्दिक शुभकामना व्यक्त गर्दछु’ शर्माले सन्देशमा भनेका छन् । शर्माले नेपालमा पाइने लगभग २ हजार जातका धानमध्ये सयौं प्रजाति हराउनु, कतिपय लोप हुने अवस्थामा पुग्नु चिन्ताको विषय भएको बताए ।
हाम्रो मुख्य खाद्यान्न बाली धानको संरक्षण गर्दै कृषि क्षेत्रलाई आधुनिकीकरण गर्ने र निर्वाहमुखी कृषिलाई व्यावसायिकतातर्फ अगाडि बढाउने सवालमा राज्यका निकायहरुको ध्यान जानु अझ आवश्यक भएको शर्माको शुभकामना सन्देशमा उल्लेख छ । प्रदेशकाे विभिन्न स्थानमा धान दिवसकाे अवसरमा सामुहिक धान राेपाई कार्यक्रम हुँदैछ ।
सकियो महिला उद्यमी सम्मेलन
Tags: No Comments
मकवानपुर । हेटौंडा आयोजित २ दिने महिला उद्यमी सम्मेलन सकिएको छ ।
बागमती प्रदेशको राजधानी हेटौंडामा पहिलो पटक आयोजित प्रदेश स्तरीय महिला उद्यमी सम्मेलन तथा उपज प्रदर्शनी (मेला) समापन गर्दै बागमती प्रदेशको उद्योग वाणिज्य तथा आपूर्ति मन्त्री मिलनबाबु श्रेष्ठले यसले महिलाको आर्थिक सशक्तीकरणमा टेवा पुगेको दाबि गरे ।
प्रदेशको १३ जिल्लाका प्रतिनिधि महिला उद्यमहरूको सहभागिता रहेको सम्मेलनमा उद्यमी विजय बैद्यलगायतले व्यवसायीक सफलता तथा चुनौतीको बारेमा कार्यपत्र प्रस्तुत गरेको नेपाल घरेलु तथा साना उद्योग महासंघ बागमती प्रदेशका कार्यकारी निर्देशक शम्भुप्रसाद नेपालले बताए ।
मेलामा १३ जिल्लाका ३९ जना उद्यमीहरु उपज प्रदर्शनीमा सहभागी थिए । उनीहरुलाई उपज प्रदर्शनीको लागि नि:शुल्क स्टल उपलब्ध गराउनुका साथै बस्ने र खाने व्यवस्था समेत आयोजकले नै व्यहोरेको थियो ।
बागमती प्रदेश सरकार उद्योग वाणिज्य तथा उपभोक्ता हित संरक्षण निर्देशनालयको आयोजना तथा नेपाल घरेलु तथा साना उद्योग महासंघ बागमती प्रदेश समिति तथा प्रदेश महिला उद्यमी समितिको समन्वयमा सम्मेलन गरिएको हो । व्यापार भन्दा उद्यमीहरूलाई आफ्नो उद्यमबारे प्रचारप्रसारको लागि सम्मेलन प्रभावकारी भएको कार्यक्रम संयोजक तारानाथ चौलागाईंले बताए ।