मकवानपुर । दरबारभित्र घटेको हत्याकाण्डको सम्झनामा सोमबार हेटौंडामा दीप प्रज्वलन गरिएको छ। १९ जेठ २०५८ मा राजा वीरेन्द्र शाह, रानी ऐश्वर्य, राजकुमार दीपेन्द्रसहित राजपरिवारका नौ सदस्यको हत्या भएको थियो।
दरबार हत्याकाण्डकाे २४ वर्ष भएकाे छ । २४ औं स्मृतिमा हेटौंडा उपमहानगरपालिका–१० स्थित बुद्ध चोकमा श्रद्धाञ्जली कार्यक्रमको आयोजना गरिएको हो। कार्यक्रममा सहभागीहरूले बत्ती बालेर दिवंगत राजपरिवारप्रति श्रद्धा प्रकट गरेका थिए । हातमा दीप बोकेर मौन प्रार्थना समेत गरिएकाे थियो ।
दिप प्रज्वलन कार्यक्रममा राप्रपा बागमती प्रदेश संसदीय दलका नेता उद्धव थापाले दरबार हत्याकाण्ड सम्बन्धी सरकारी प्रतिवेदनले जनताको जिज्ञासा नमेटाएको बताए । ‘दरबार हत्याकाण्डकाे सत्यतथ्य बाहिर आउनु पर्छ’ उनले भने । राष्ट्रिय प्रजातान्त्रिक युवा मोर्चाका अध्यक्ष विवेक विक्रम शाहीले राजा वीरेन्द्र राष्ट्रप्रेमी राजा भएकाे बताउँदै राजपरिवारलाई हामीले बिर्सन नहुने बताए ।
दिप प्रज्वलनमा सहभागीहरुले दरबार हत्याकाण्ड अझै रहस्यमय रहेको भन्दै घटनाको निष्पक्ष छानबिनको माग समेत गरेका छन्। कार्यक्रममा बागमती प्रदेश सभा सदस्य कुमारी स्याङतान, नुरल बज्राचार्य, गिरिबहादुर तामाङ, डम्बर तामाङ राप्रपा केन्द्रीय सदस्य राम थोक्कर, रामहरी न्यौपाने, राष्ट्रिय प्रजातान्त्रिक युवक संगठन मकवानपुर जिल्ला अध्यक्ष किशोर केसी लगायतकाे उपस्थिति रहेको थियो।
मकवानपुर । मकवानपुरकाे हेटौंडामा ‘एक तिहाई महिला सहभागिता अधिकार, उपलब्धि र चुनाौति माथि बहस भएकाे छ । छैठौं राष्ट्रिय महिला अधिकार दिवस २०८२ को अवसरमा उक्त विषयमा बहस कार्यक्रम भएको हाे ।
कार्यक्रममा बागमती प्रदेश सरकारकी उद्योग, वाणिज्य, भूमी तथा प्रशासन मन्त्री शुक माया तामाङले महिला आन्दोलनकै कारण महिलाहरूले अधिकार हासिल गर्न सफल भएको बताइन् । ‘महिलाले प्राप्त अधिकारलाई व्यवहारमा रूपान्तरण गर्न धेरै काम गर्न बाँकी रहेको छ’ उनले भनिन् ‘आर्थिक सशक्तिकरणको नारा उठे पनि व्यवहारमा प्रभावकारी कार्यान्वयन नहुँदा चुनौती कायम रहेको छ ।’
मन्त्री तामाङले आफू मन्त्री बनेपछि महिलाको उद्यमशीलता प्रोत्साहनका लागि उद्योग दर्तामा ५० प्रतिशत छुट र शुल्क ७ हजारबाट घटाएर ३५ सयमा ल्याएकाे जानकारी दिइन् । महिला तथा युवालक्षित कोष स्थापना गर्ने तयारी भइरहेकाे उनले बताइन् । नेकपा एमाले मकवानपुरका ईन्चार्ज रामेश्वर रानाले एमाले सधैं महिलाको हक–अधिकारका पक्षमा खटिएको दाबी गर्दै महिला अधिकार सुनिश्चिततामा पार्टीको भूमिका महत्वपूर्ण रहेकाे बताए ।
बहस कार्यक्रममा गैर नेकपा एमालेका केन्द्रीय सदस्य जुनेली श्रेष्ठ, प्रदेश कमिटी सदस्य रघुनाथ खलाल, इन्द्रमान तामाङ, एमाले मकवानपुरकी सचिव सिता विष्ट, उप–सचिव आरती पाठक, गैरसरकारी संस्था मकवानपुरी अध्यक्ष रमिला सापकोटालगायत विभिन्न संघ–संस्थाका महिला प्रतिनिधिहरूले महिला सहभागिता, अधिकार कार्यान्वयनका चुनौती र आगामी दिनमा लैङ्गिक समानताको दिशामा आवश्यक रणनीति तथा नीति निर्माणका विषयमा छलफल भएको थियो ।
महिला अधिकारका सवालमा राजनीतिक दल, सरकारी निकाय तथा नागरिक समाजका प्रतिनिधिहरूको सहभागिता रहेकाे कार्यक्रम अखिल नेपाल महिला संघ मकवानपुर जिल्ला कमिटी अध्यक्ष सुमित्रा काफ्लेको सभाध्यक्षतामा भएको थियाे ।
मकवानपुर । मकवानपुरलगायत बागमती प्रदेशभरीका जिल्लाका किसानले भोग्नु परेको समस्यामा आफूहरुले सहयाेग गर्ने संसदहरुले बताएका छन् । बागमती प्रदेशको उद्योग, पर्यटन, वन तथा वातावरण समितिका सभापति आनन्द कुमार श्रेष्ठले किसानले आफ्ना खेतबारीमा धान, मकैलगायतका अन्नबाली रोप्दा मल नपाउने समस्या, दूधको भुक्तानी बेलैमा नपाउने समस्या निकै बढेको बताउनुभयो ।
मकवानपुरगढी गाउँपालिका वडा नम्बर–३ मक्रान्चुलीमा सार्वजनिक सुनुवाइमा उहाँले यस्तो बताउनु भएको हाे । जनपत्र मिडिया प्रालिको आयोजना तथा संसद सहयोग परियोजना संयुक्त राष्ट्रसंघीय विकास कार्यक्रम युएनडीपीको सहकार्यमा कृषकका समसामयिक समस्याहरुको समाधानमा सांसदहरुको भूमिका सम्बन्धमा सार्वजनिक सुनुवाइ कार्यक्रम गरिएको हो ।
बागमती प्रदेशका पूर्व मन्त्री तथा प्रदेश सभा सदस्य एकालाल श्रेष्ठ, प्रदेशसभाका सदस्यहरु प्रेमबहादुर पुलामी, शुस्मा भुजेल न्यौपाने, बालकुमारी विस्वकर्मालगायतकाले किसानहरुको सहमस्या समाधानमा सधै हातेमालो गरेर अगाडी बड्ने बताउनुभयो । कार्यक्रममा मकवानपुरगढी गाउँपालिकाका अध्यक्ष दोर्जे लामा स्याङतान, गढी गाउँपालिका वडा नम्बर–३ का वडा अध्यक्ष भागवत घिमिरे, जिल्ला दुग्ध उत्पादक सहकारी संस्था लिमिटेड मकवानपुरका अध्यक्ष हरि प्रसाद कडेंललगायतकाले पनि किसानलाई सहयोग गर्ने बताउनु भयाे ।
गाइ, भैसी, कुखुरालाई महगो मुल्यमा दाना विक्री गर्नुपर्ने तर, आफ्नो उत्पादन भने सस्तो मुल्यमा विक्री गर्नुपर्ने बाध्यतामा किसानहरु रहेका छन् । यो समस्या भोग्ने किसानहरु बागमती प्रदेशमा धेरै रहेका छन् । मकवानपुरका किसानका समस्या झनै कहाली लाग्दो छ । यहाँका किसानले उत्पादन गरेको दूधको भुक्तानी नपाउँदा निकै समस्या भोग्दै आएको सार्वजनिक सुनुवाइका क्रममा बताएका छन् । यहाँका किसानले दूग्ध सहकारीमा विक्री गरेको दूध सरकारी स्वामित्वमा रहेको हेटौंडा दूग्ध वितरण आयोजना र निजी लगानीका डेरीहरुले खरिरद गर्दै आएका छन् । तर, दूधको भुक्तानी समयमा नै नदिदा किसानहरु चिन्तित बनेका छन् ।
जिल्ला दुग्ध उत्पादक सहकारी संस्था लिमिटेडका लागि सरकारी र निजी डेरी गरेर १८ वटा उद्योगले बितेको बैशाख मसान्त सम्ममा २२ करोड ५ लाख ३७ हजार १७५ रुपैयाँ भुक्तानी रकम किसानलाई दिन बाँकी छ ।
बितेको आर्थिक वर्षमा मात्र १८ वटा डेरी उद्योगले २९ करोड ६८ लाख ४६ हजार ८८६ रुपैयाँ मकवानपुरका किसानलाई भुक्तानी गर्न बाँकी रहेको छ । किसानको दूधको भुक्तानी नदिनेमा सबैभन्दा अगाडी सरकारी स्वामित्वमा रहेको हेटौंडा दुग्ध वितरण आयोजना रहेको छ । हेटौंडा दुग्ध वितरण आयोजनाले मात्र बैशाख मसान्तसम्ममा १ करोड २२ लाख ८८ हजार भुक्तानी गर्न बाँकी रहेको छ ।
मकवानपुरका किसानहरुको दूध खरिद गरेर नियमित रुपमा रकम भुक्तानी गर्ने निजी डेरीहरु पनि २६ वटा रहेका छन् । उनीहरुले दूध खरिद गरेवापत नियमित रुपमा दूधको भुक्तानी रकम जिल्ला दुग्ध उत्पादक सहकारी संघलाई दिने गरेका छन् । तर, १८ वटा अरु उद्योगहरुले किसानको दूध खरिद गर्ने तर, भुक्तानी रकम दिनका लागि सधै आलटाल गर्नेगरेका छन् ।
जिल्ला दुग्ध उत्पादक सहकारी संघले दैनिक रुपमा ५३ हजार लिटर दूध खरिद गरेर बिक्री गर्दै आएको छ । यसैगरी मकवानपुरको मनहरी र बकैया गाउँपालिकाको सहकार्यमा ती दुइ पालिकाले सिधै निजी डेरीहरुलाई दूध बिक्री गर्दै आएका छन् । त्यस दुइ पालिकाको र खुल्ला रुपमा किसान आफैले समेत गरेर बिक्री गरिने दूध हरेक दिन एक लाख लिटर बिक्री हुँदै आएको छ ।
आँचलद्वारा पुरस्कार वितरण तथा विभिन्न कार्यक्रम
Tags: No Comments
मकवानपुर । आँचल साहित्य कला पुञ्ज मकवानपुर मकवानपुरले कविता प्रतियोगीता सहित विभिन्न विधामा पुरस्कार वितरण गर्ने भएको छ । आँचलले पत्रकार भेटघाटमा यस्तो जानकारी गराएको हो ।
आँचलले यसवर्ष मंगलादेवि श्रेष्ठ बाल प्रतिभा पुरस्कार सम्मान २०८१, मुक्ति-तारा नवप्रतिभा सम्मान-२०८१, सुन्तलीमाया श्रेष्ठ युवा प्रतिभा सम्मान- २०८१ र आँचल सम्मान २०८१ प्रदान गर्ने भएको हो ।
शिक्षासेवी देवप्रसाद श्रेष्ठले स्थापना गर्नु भएको मंगलादेवि श्रेष्ठ बाल प्रतिभा पुरस्कार–२०८१ तुलसी मेहर मेमोरियल मा. वि. मा अध्ययनरत् अनुश्रुया खनाललाई प्रदान गर्ने निर्णय गरिएको छ । नगद ३५ हजार सहित सम्मानपत्रबाट सम्मानित गरिने यो सम्मान २०७६ सालबाट प्रदान गर्न थालिएकाे हो ।
यसैगरी साहित्यसेवी मुक्तिगोविन्द वैद्य तथा उहाँकी धर्मपत्नी तारा वैद्यले २०७७ मा स्थापना गर्नु भएको मुक्ति–तारा नवप्रतिभा सम्मान–२०८१ मकवानपुरे नवप्रतिभा स्वस्तिका दाहाललाई प्रदान गर्ने निर्णय भएको आँचल अध्यक्ष भावना सापकोटाले बताउनु भयो । २०७७ सालबाट प्रदान गर्न लागिएको यो सम्मान ५ हजार १ राशिसहित सम्मानपत्र रहेको छ ।
समाजसेवी चन्द्र किरण श्रेष्ठ र उहाँकी धर्म पत्नी मेनुका शर्माले आफ्ना आमाको स्मृतिमा २०७७ मा स्थापना गर्नुभएको सुन्तलीमाया श्रेष्ठ युवा प्रतिभा सम्मान– २०८१ कवि पुरुषोत्तम आचार्यलाई प्रदान गरिने आँचलले जनाएको छ । २०७७ सालबाट प्रदान गर्न लागिएको यो सम्मानमा १० हजार १ राशिसहित सम्मानपत्र रहेको छ ।
आँचल साहित्य कला पुञ्जले प्रदान गर्ने गरेको आँचल सम्मान २०८१ यस पटक अक्षयकोष स्थापना गरेर आँचललाई संस्थागत गर्न सघाउ पुर्याए वापत प्रकाश लम्साललाई प्रदान गरिने भएको छ । आँचलको स्थापनाको समयदेखि नै मकवानपुरमा रहेर विभिन्न विद्यामा कृयाशिल व्यक्तिहरूलाई प्रदान गर्ने गरिएको भएता पनि २०७९ देखि यता यस सम्मान आँचलमा अक्षयकोष स्थापना गरेर आँचललाई संस्थागत गर्न सघाउनु हुने व्यक्तिहरूलाई प्रदान गरिएको छ ।
यो पुरस्कार यसअघि २०७९ मा साहित्यसेवी मुक्ति गोविन्ध वैद्य, २०८० मा हरिवशं भेटवाललाई प्रदान गरिएको थियो । संस्थाको अक्षयकोक्ष स्थापनामा सहयोग गर्नुका साथै आफूलेसमेत अक्षयकोष स्थापना गरेर आँचललाई संस्थागत गर्न सघाउ पुर्याउनु भएकाले लम्सालप्रति कदर भावका साथ यो सम्मान गर्न लागिएको सापकोटाले बताइन् ।
आँचल साहित्य कला पुञ्ज मकवानपुरको आयोजना तथा हेटौँडा उपमहानगरपालिकाको सहकार्यमा वृहत् साहित्यिक तथा सांस्कृतिक कार्यक्रम आगामी १७ जेठमा हुनेछ ।कार्यक्रममा बालबालिका, अभिभावक र आजको समाज विषयक मनोपरामर्श कार्यक्रम र डिजिटल स्क्रिनको प्रभाव विषयक बहस समेत हुने छ ।
यसैगरी विद्यालय (८–१२) तहस्तरीय कविता प्रतियोगिताका लागि १४ जेठसम्म प्राप्त कविताहरुमध्येबाट १० उत्कृष्ट कविता छनोट गरि १० कविहरूको रचना वाचन गर्ने र उनीहरूबाट प्रथम, द्वितीय, तृतीय र सान्त्वना कवितालाई पुरस्कृत गर्ने कार्यक्रम रहेको छ ।
मानव बेचबिखन तथा ओसारपसार विरुद्ध अन्तरक्रिया
Tags: No Comments
मकवानपुर । मानव बेचबिखन तथा ओसारपसार विरुद्ध यातायत व्यवसायि तथा होटल व्यवसायीसँग अन्तरक्रिया कायक्रम हेटौडामा गरिएको छ ।
माइती नेपाल मकवानपुरको आयोजनामा सो कार्यक्रम गरिएको हो ।
कार्यक्रममा माइती नेपाल मकवानपुर कार्यक्रम संयोजक माया तामाङले मानव बेचबिखन तथा ओसारपसार नियन्त्रणको सवालमा विद्यमान अवस्था बारे प्रशिक्षण दिनु भएको थियो ।
समय र प्रविधिको परिवर्तन भए पनि बेचविखनको अवस्था अझै पनि डरलाग्दो भएको तामाङले बताउनु भयो । अहिले पनि यौन व्यवसाय, घरेलु कामदार, श्रम शोषण, उत्तेजक नाच, होटल रेष्टुरेन्ट, मसाज पार्लर सर्कश मानव अंग खरिद विक्रिको लागि बेच विखन हुने गरेकोले सबै सरोकारवालाहरु एक जुट भएर मात्रै नियमन संभव भएको उनले बताइन् ।
बेचविखनमा परेकाहरुलाई उद्धारको क्रममा अझै पनि धेरै हण्डर खेप्नु परेको उहाँले बताउनु भयो । कोठीमा पीडितलाई भेट्न उद्दारकर्मी पटक पटक जानु पर्ने हुँदा खर्च धेरै लाग्ने, उद्दारकर्मीको पहिचान भएमा उदारकर्मीको ज्यानको जोखिम हुने, उद्दार गर्न लागेको कुरा समन्वय सहकार्य गर्नेबाट चुहावट हुन सक्ने र उद्दार गर्न जाँदा पीडितलाई अन्यत्र सार्न सक्ने, घटना घटेको देशमा झन्झटिलो कानुनी प्रकृया हुने, संरक्षण गृहमा पीडितलाई मनोसामाजिक परामर्शको अभाव हुने जस्ता समस्याले उद्धारमै कठिन हुने गरेको उहाँको भनाइ थियो ।
कार्यक्रममा सामुदायिक सेवा प्रहरी प्रमुख प्रदीप कंडेल, हेटौडा १० वडा सदस्य गोमा सुनार विभिन्न सामाजिक संस्थाहरुको प्रमुख तथा प्रतिनिधिहरुको सहभागीता रहेको थियो । माइती नेपालले आफ्नो वार्षिक कार्यक्रम अन्तरगत यस्ता सचेतनामूलक तालिक तथा विभिन्न गतिविधिहरु गर्दै आएको छ ।