मकवानपुर । हेटौंडा उपमहानगरपालिकाले आगामी आर्थिक वर्षका लागि २ अर्व ६० करोड ६५ लाख ४० हजार ८ सय रुपैयाँ बजेट विनियोजन गरिएको छ ।
उपमहानगरपालिकाले शनिबार १३ औ नगर सभामा
आगामी आर्थिक वर्षका बजेट सार्वजनिक गरेको हो ।
नगर विकासको लागि सार्वजनिक गरिएको नीति तथा कार्यक्रमहरु कार्यान्वयन गर्न अनुमान गरिएको खर्च व्यहोर्ने स्रोतमध्ये आन्तरिक स्रोतबाट ८३ करोड ६६ लाख ६२ हजार ७० रूपैयाँ, राजस्व बाँडफाँटबाट ५९ करोड १४ लाख १० हजार ७३० बेहोर्ने छ ।
यसैगरी प्रदेश सरकारको विभिन्न अनुदानबाट ३ करोड ३४ लाख ६८ हजार, सङ्घीय सरकारको अनुदानबाट १ अर्व १४ करोड ५० लाख बाट व्यहोरिने छ ।
यस उपमहानगरपालिकालाई नगरसभा पश्चात सङ्घीय तथा प्रदेश सरकारबाट अख्तियारी प्राप्त हुने अन्य कार्यक्रमहरुको एकल खाता कोष प्रणाली मार्फत भुक्तानी हुने भएकाले प्रस्तुत बजेटमा उक्त कार्यक्रमहरुको स्रोत समावेश नगरिएको उपमेयर राजेश बानियाँले बताए ।
तस्बिर सहयोग पत्रकार प्रतीक्षा न्यौपाने
मकवानपुरबाट बिदा भयो प्लान, फेरी घरदैलोमा आउन माग
Tags: No Comments
मकवानपुर । बालकेन्द्रित सामुदायिक विकास परियोजना सञ्चालन गर्दै आएको प्लान इन्टरनेशनल मकवानपुरबाट बिदा भएको छ । प्लानको बालकेन्द्रित सामुदायिक विकास परियोजना दोस्रो चरण समापन कार्यक्रममा लाभग्राहीहरुले प्लान बिदा नभएर अर्को पाटोको कार्यक्रम लिएर घरदैलोमा आउन माग गरेका छन् ।
प्लानले मकवानपुरको सबै स्थानीय तहहरुमा बालकेन्द्रित सामुदायिक विकासमा टेवा दिंदै आएको थियो । संस्थाले मकवानपुरको गाउँपालिकाहरुमा विद्यालयहरूमा प्राथमिक कक्षाका लागि नमुना कक्षाहरू नमुना कक्षाकोठाको रूपमा विकास गरि भौतिक सुविधाहरू र शैक्षिक सामग्रीहरूको व्यवस्थापन गरेको थियो ।

यसक्रममा २५ वटाभन्दाबढी विद्यालय कक्षा कोठा मर्मत र २२४ वटा भन्दा बढी नमुना कक्षा विकासमा प्रत्यक्ष सहयोग गरेको थियो । शिक्षक, समिति, र छात्रहरूका लागि सकारात्मक आचरणको प्रोत्साहन गर्न र भेदभाव हटाउन, समावेशी विद्यालय वातावरण सिर्जना गर्ने तालिम कार्यक्रमहरू संचालन गरेको थियो । विद्यालय भवन, शौचालय, घेराबारा निर्माण, विज्ञान प्रयोगशाला स्थापना, पुराना भवनहरू मर्मत, र किशोरीको महिनावारीलाई केन्द्रित गर्दै आवश्यक उपकरणहरू सहित विश्राम कोठाको विकास गरेको थियो । बाल मैत्री वडा तथा स्थानीय तह घोषणामा सहयोग, हिंसा प्रभावित बालबालिकाको परिवारलाई सहयोग गरेको थियो ।
यसैगरी विद्यालयमा बाल संरक्षण नीतिको निर्माणमा सहयोग, विभिन्न स्थानीय तहहरुमा दर्जनौ खानेपाली योजना निर्माण र उपभोक्ता समितिलाइ तालिम दिएको थियो । पानीको उपलब्धतामा समस्या रहेको स्थानमा वैकल्पिक खानेपानीकोलागि वर्षदको पानी संकलन (घैटा) निर्माणमा समेत सहयोग गरेको इन्द्रसरोवर गाउँपालिका अध्यक्ष देबकृष्ण पुडासैनीले बताए ।
यसैगरी बर्थिङ सेन्टरको जीर्णोद्धार र निर्माण र प्रसुती केन्द्रमा उपकरण सहयोग, पूर्ण खोप घोषणा प्रक्रियामा सहयोग गरेको भिमफेदी गाउँपालिका अध्यक्ष हिदम लामाले बताए ।

“प्लानले शिक्षा खानेपानी तथा सरसफाइमा गरेको योगदान धेरै राम्रो छ” मनहारी गाउँपालिका अध्यक्ष रञ्जन कालाखेतीले भने “कोभिडको समयमा मनहरी गाउँपालिकामा मात्रै १४० विद्यालय छात्रालाइ सरसफाइ तथा स्वच्छता किट सहयोग र ९८ परिवारलाइ खानेपनी शुद्धिकरण फिल्टर सहयोग गरेको थियो ।” अपाङ्गता भएका बालबालिकालाई सहयोगी उपकरण सहयोगमा समेत प्लानको भूमिका महत्वपूर्ण रहेको उनले बताए ।
व्यवसायिक मौरी पालन, रेश्म खेती, बाख्रा पालनमा समेत सहयोग गरेर आत्मनिर्भरताको लागि योगदान गरेको राक्सिराङ गाउँपालिका अध्यक्ष राजकुमार मल्लले बताए ।
प्लान इन्टरनेशनलको राष्ट्रिय निर्देशक राम किसनको सभाध्यक्षतामा भएको परियोजना समापन कार्यक्रममा जिल्ला समन्वय समिति मकवानपुरमा सभापति ललित घलानले आफैं पनि प्लानको उत्पादन भएको स्मरण गर्दैै व्यक्तिको व्यक्तित्व विकास देखि शिक्षा स्वास्थ्यको सवालमा अत महत्वपूर्ण काम गरेको बताए । कार्यक्रममा हेटौंडा नगर प्रमुख मिना कुमारी लामा, बकैया गाउंपालिका अध्यक्ष धर्मराज लामिछानेलगायतले कार्यक्रमको प्रभावकारीता बारे चर्चा गरेका थिए ।
प्लानले शिक्षा नेतृत्व र निर्णय, बालबालिकाको संरक्षण,प्रारम्भिक बाल विकास,स्वास्थ्य खानेपानी तथा सरसफाई, जस्ता क्षेत्रमा काम गरेको राष्ट्रिय निर्देशक राम किसनले बताए । संस्थाको काम र प्रत्यक्ष सहभागीता नहुने भएपनि संभावनाका ढोकाहरु र अवसरहरु सधैं रहनेमा सकारात्मक हुन उनले आग्रह गरे ।
मकवानपुर । जलबायु परिवर्तनबारे किशोर किशोरीहरूले चित्र मार्फत सन्देश दिने प्रयास गरेका छन् ।
मानवीय कारण कसरी जलबायु प्रदुषण हुन सक्छ र यसबाट मानवीय जीवनमा पर्ने असर बारे किशोरकिशोरीले बनाएका जलवायु परिवर्तनसम्बन्धी चित्र हेटौंडामा प्रदर्शन गरिएको थियो । जसमा सरिस्मा राई प्रथम भएकी छिन । यसैगरी मेलिना राई द्धितिय, साया राई तृतीय र सुस्मा राई सान्वना भइन । उनीहरू सबै मकवानपुर मनहरी गाउँपालिकाका थिए ।
उक्त कार्यक्रम गरेको थियो मकवानपुर महिला समूहले । हेटौडामा विश्व वातावरण दिवसको अवसरमा जलवायु परिवर्तनले समाजमा पारेका असर तथा चुनौतीको सवालमा प्रतियोगितासंगै छलफल कार्यक्रम गरिएको हो ।
जलवायुमा अनेपेक्षीत रुपमा परिवर्तन आइरहनुको मुख्य कारण पृथ्वीको तापमान वृद्धि र जलवायु परिवर्तन रहेको जिसस सभापति घलानले बताए । जलवायु परिवर्तनको प्रभाव दैनिक जीवनमा भोगीरहेको उनले बताए ।
विश्वमा जलवायु परिवर्तनको कारणले समाजमा विभिन्न रोगहरु देखा पर्ने, विशेष गरी महिला तथा बालबालिकाहरुमा बढी मात्रामा असर पर्ने हुँदा चुनौती पनि निकै बढिरहेको बताएका थिए ।
मकवानपुर महिला समूहकी उपाध्यक्ष सोममाया घलानको सभाध्यक्षता एवम् जिल्ला समन्वय समितिका प्रमुख ललितबहादुर घलानको प्रमुख आतिथ्यतामा कार्यक्रम भएको थियो ।
यसैगरी हेटौंडा उपमहानगरकाकी प्रमुख मीना कुमारी लामा, मनहरी गाउँपालिका अध्यक्ष रञ्जन कालाखेती समेतको उपस्थिती थियो ।
कार्यक्रममा मनहरी–३ का अध्यक्ष अनन्त प्रसाद अर्याल, मनहरी–४ का अध्यक्ष प्रकाश थापा, सामूदायिक वन उपभोक्ता महासंघ केन्द्रका प्रतिनिधि सुजन खनाल, जिल्ला प्रहरी कार्यालयको महिला तथा बालबालिका शाखा प्रमुख हेमा थोकर लगायतले मन्तव्य व्यक्त गरेका थिए ।
मकवानपुर । हेटौंडामा आगामी असार ३० गते ‘कोरा’ साइकलयात्रा हुने भएकाे छ । हिमालयन राइडर्स सोसाइटी मकवानपुरको आयोजनामा ‘कोरा’ साइकलयात्रा हुने भएकाे हो ।
साइकलयात्रामा २ सय जना साइकलयात्रीले सहभागिता जनाउने हिमालयन राइडर्स सोसाइटी मकवानपुरले जनाएकाे छ । सोसाइटीका अध्यक्ष रामकुमार श्रेष्ठले हेटौंडा कोरा च्यालेन्ज २०२३ मा सहयात्रा गर्न इच्छुक साइकलयात्रीलाई सहभागी हुन आग्रह गरेका छन् ।
यो वर्षको कोरा साइकलयात्रा हुप्राचौरको पशुपतिनाथ मन्दिरबाट सुरु भई कुष्माण्ड सरोबर (त्रिवेणीधाम), जलेश्वर, मुक्तिनाथ, बिन्द्यवासिनी, बनस्खण्डी, दक्षिणकाली, रुद्रेश्वर, भुटनदेवी मन्दिर परिक्रमा गरी करिब २१ किमिको हुने सोसाइटीका उपाध्यक्ष राजु थापा मगरले बताए ।
‘कोरा’ साइकलयात्रा विश्वभरीका साइकलयात्रीहरुले स्थानीय मठ मन्दिरहरुको परिक्रमा गरी धार्मिक महोत्सवको रुपमा मनाउँदै आएका छन् । साेही अनुसार हेटौंडामा ‘कोरा’ साइकलयात्रा मनाइने भएको हाे।
मकवानपुर । चुनावकाे अगाडि अर्काे पार्टीकाे पक्षमा मत माग्ने कुरा राजनीतिक रूपमा घातक हुनसक्ने विश्लेषण पार्टीले गरेको नेपाली कांग्रेसका महामन्त्री गगन थापाले बताएका छन् ।
“प्रकारान्तरमा त्यसले पार्टीप्रतिकाे विश्वास डगमगाउने र घात हुनसक्ने अवस्था बन्दाे रहेछ” उनले भने “अब यसो नगर्ने निधोमा नेपाली काँग्रेस पुगेको छ ।”
आगामी भदाैमा कांग्रेसले नीति अधिवेशन गर्न लागेको र नीति अधिवेशनबाट यस्तो सवालमा संकल्प गर्नुपर्ने उनले बताए । “अब कांग्रेसकाे जीनमा बरु ५ पटक चुनाव हारे हारिन्छ, वडादेखि केन्द्रसम्म, राष्ट्रपतिदेखि प्रधानमन्त्रीकाे चुनावमा जस्ताेसुकै अफ्ठ्यारो परे पनि, नेपालकाे तमाम् पार्टी मिलेर एउटै पार्टी बनाए पनि कांग्रेसले तालमेल गर्दैन” उनले भने ।
नेपाली कांग्रेस क्षेत्र नम्बर २ र २ ‘ख’ काे साेमबार हेटाैंडा-१९ बस्तीपुरमा भएकाे भेलालाई सम्बाेधन गर्दै महामन्त्री थापाले यस्तो बताएका हुन् ।
आगामी निर्वाचनमा कांग्रसले कुनै पनि पार्टी वा शक्तिसँग तालमेल नगर्ने नीति लिने स्पष्ट पारेका हुन् । नेपाली कांग्रेस विचार प्रधान पार्टी भएकाले सत्ताका लागि कसैसँग सम्झाैता नगर्ने उनले बताए ।
तालमेल मात्र नभई कांग्रेसले सत्ताका लागि विचारसँग सम्झाैता नगर्ने उनले स्पष्ट पारे । बरु सरकार छाेड्नुपरे छाेड्ने तर, कांग्रेसकाे लागि विचार र सिद्धान्त सबैभन्दा महत्वपूर्ण कुरा भएकाे भन्दै त्यसलाई स्थापित गरिनुपर्नेमा थापाकाे जाेड थियाे ।
चुनावअघि नै गठबन्धन गर्दा पार्टीप्रति गलत धारणा बनेकाे भन्दै उनले बरु कांग्रेस चुनाव हार्न र सत्ता बाहिरै बस्न तयार रहने स्पष्ट पारे ।
‘हाम्राे इमेज कस्ताे बन्याे कि सरकारमा पुग्नका लागि चुनावअघि एउटासँग घाँटी जाेड्न पनि पुग्छ, त्याे सरकारमा पुगेन भन्ने रिसमा चुनावपछि अर्काेसँग घाँटी जाेड्न पनि पुग्छ । सत्ताका लागि जस्ताेसुकै सम्झाैता गर्छ भन्ने छवि बन्न पुग्याे, गल्ती जहाँबाट भएकाे छ, त्यहिँबाट सच्याउनुपर्छ ।’ थापाले भने ।
आम नागरिकमा राजनीतिप्रति वितृष्णा जागेकाे र आत्मविश्वास र आशा गुमाइरहेकाे भन्दै कांग्रेसले जनताकाे निराशालाई चिर्ने थापाले प्रतिवद्धता जनाए । ‘हामी निराश हुनुहुँदैन, कांग्रेस आफू जित्न आएकाे पार्टी हाेइन, कांग्रेस देशलाई जिताउन आएकाे पार्टी हाे ।’ थापाले भने । नेपाली कांग्रेस प्रगतिशील समाजकाे कल्पना गरी कार्यान्वयन गराउने पार्टी भएकाे भन्दै थापाले जनभावनालाई निरन्तर सुन्ने प्रतिवद्धता जनाए । ‘कांग्रेस उत्तेजित शक्ति पनि हाेइन, कांग्रेस यथास्थितिवादि पनि हाेइन । कांग्रेस त प्रगतिशिल शक्ति हाे, कांग्रेस प्रश्न हाेइन, उत्तर हाे ।’ थापाले थपे ।
चुनावकाे बेला उम्मेद्वार छान्ने कुरा सबैभन्दा जटिल बनेकाे भन्दै थापाले वडाकाे टिकट चुनावकाे ६ महिनाअघि त्यसै वडा तथा पालिका वा क्षेत्रका कार्यकर्ताले सर्वसम्मत वा निर्वाचनमार्फत छान्ने गरी नीति बनाउनुपर्ने धारणा राखे ।
कांग्रेस सक्किएर हाेइन सच्चिएर र परिवर्तन भएर अघि बढ्नुपर्ने भन्दै उनले भने -‘कमजाेर कांग्रेसकाे महामन्त्री हुनुभन्दा बलियाे कांग्रेसकाे साधारण सदस्य मञ्जुर छ तर, कांग्रेस सच्चिएर जान जरुरी छ ।
कार्यक्रममा बाेल्दै नेपाली कांग्रेस बागमती प्रदेश सभापति ईन्द्रबहादुर बानियाँले कांग्रेस एकजुट भएर जनताकाे हितमा लाग्नुकाे विकल्प नभएकाे बताए । नागरिकमा छाएकाे निराशा चिर्न काम गरेर देखाउनुपर्ने उनकाे भनाइ थियाे ।
कार्यक्रममा नेपाली कांग्रेस मकवानपुरका सभापति बुद्ध लामा, पूर्व सभापतिहरु माइकल रामचन्द्र अर्याल, रघुरमण न्याैपाने, पार्टी जिल्ला उपसभापति आनन्द कठायत, सचिव ईश्वर पाठक, सहसचिव इन्दिरा न्याैपाने प्रतिनिधि सभा क्षेत्र नम्बर १ का सभापति दामाेदर खनाल, चितवन क्षेत्र नम्बर १ का सभापति किरण वली, महासमिति सदस्य राजकुमार मल्ल, राजेश भेटवमल, मकवानपुर १ (क) का सभापति सुशान्त श्रेष्ठ, मकवानपुर २(ख) का सभापति रन्जन कालाखेती, थाहा नगर सभापति प्रमाेद जाेशी, मनहरी ८ का सभापति भिमसेन लामालगायतले मन्तव्य व्यक्त गरेका थिए ।
मकवानपुर क्षेत्र नम्बर २ का सभापति लाेक मुक्तानकाे सभाध्यक्षतामा कार्यक्रम भएकाे हाे ।