मकवानपुर । मकवानपुरकाे हेटौडामा निर्माण व्यवसायीहरुका लागि दुई दिने व्यवस्थापन तालिम आयोजना गरिएको छ । नेपाल निर्माण व्यवसायी महासंघको आयोजनामा तथा निर्माण व्यवसायी संघ मकवानपुरको संयोजनमा विहीबारबाट सुरुभएको तालिममा निर्माणसम्बन्धी व्यवस्थापनका विषयमा प्रशिक्षण दिइने भएको छ ।
तालिमको शुभारम्भमा निर्माण व्यवसायी संघ मकवानपुरका अध्यक्ष बाल गोपाल कंडेलले निर्माण व्यवस्थापनसम्बन्धी अनुभवको अभावमा निर्माण व्यवसायमा विभिन्न समस्या आउने गरेका बताए । निर्माण व्यवसायमा आउने समस्या समाधानकाे लागि निर्माण व्यवसायीमा व्यवस्थापनसम्बन्धी ज्ञान आवश्यक भएको बताए । कंडेलले कुनै पनि योजना निर्माणका विभिन्न चरणमा व्यवस्थापकीय पक्ष महत्वपूर्ण हुने भएकोले तालिमको आयोजना गरिएको भन्दै निर्माण व्यवसायीलाई आफूले लिएको काम समयमा गुणस्तरीय रुपमा सम्पन्न गर्न आग्रह समेत गरे ।
तालिममा बिमा, निर्माणको कामको प्रगति, भुक्तानीलगायतका निर्माण व्यवस्थापनका बारेमा ईन्जिनियर घनश्याम गौतमले प्रशिक्षण दिएका छन् । तालिममा करिब ६० जना निर्माण व्यवसायीको सहभागिता रहेको निर्माण व्यवसायी संघ मकवानपुरका महासचिव राजेन्द्रप्रसाद चौलागाईले जानकारी दिए ।
मकवानपुर । मुक्तक मञ्च मकवानपुरले मुक्तक वाचनकाे १३ औं श्रृङ्खला आयाेजना गरेकाे छ । विहीबार मञ्च मकवानपुरले मुक्तक वाचन शृङ्खला आयोजना गरी मुक्तक दिवस मनाएकाे हाे ।
हरेक वर्ष माघ १८ गते मुक्तक दिवस मनाउने मुक्तक मञ्च केन्द्रीय समितिले निर्णय गरे बमाेजिम विहीबार पहिलाे मुक्तक दिवस मनाइएकाे हाे । हेटौडामा आयोजित कार्यक्रममा मसान उपासक, अजिता ओझा, सानु खनाल,किसन पौडेल, विष्णु गौतम, वैकुण्ठ लामिछाने, मिथिला अधिकारी,मनाेज पाेखरेल, सुभाष सजललगायत एक दर्शनभन्दा बढीले मुक्तक वाचन गरेका थिए । कार्यक्रममा मुना अर्याल, मुक्तिगाेविन्द वैद्य, राजकुमार लामिछाने मधु ढुंगानालगायतकाे उपस्थिति रहेकाे थियाे ।
यसैगरी माघ २७ गते मुक्तक मञ्च मकवानपुरको दोस्रो वार्षिक उत्सव तथा पहिलो अधिवेशन कार्यक्रम हुने मञ्च अध्यक्ष डीबी बर्तौलाले जानकारी दिए । उक्त दिन पोखराका मुक्तककार दीपक समीप,रौतहटका हरिकृष्ण काफ्ले र मकवानपुरका बिर्खे अन्जान सम्मानित गर्ने कार्यक्रम रहेको उनले बताए ।
मञ्च मकवानपुरका अध्यक्ष डीबी बर्तौलाको अध्यक्षतामा भएको कार्यक्रममा मुक्तक मञ्च मकवानपुरका सल्लाहकार ह्याग्रीव आचार्यको प्रमुख आतिथ्यता रहेको थियो ।

राष्ट्रिय मुक्तक पुरस्कार उषा शेरचनलाई
यसैगरी यस वर्षको राष्ट्रिय मुक्तक पुरस्कार उषा शेरचनलाई प्रदान गरिने भएकाे छ । नेपाली मुक्तक क्षेत्रमा अतुलनीय योगदान पुर्याउनुभएकी कवि, गीतकार तथा मुक्तककार शेरचरलाई उक्त पुरस्कारबाट सम्मानित गरिने भएकाे हाे ।
मुक्तक दिवसको अवसरमा शुक्रवार पोखरामा आयोजित समारोहमा मुक्तक मञ्च पोखराले शेरचनलाई ३३ हजार ३ सय ३३ नगद राशीकाे पुरस्कार प्रदान गर्ने घोषणा गरेको हो।
![]()
मकवानपुर । बागमती प्रदेशका आर्थिक मामिला तथा योजना मन्त्री बहादुर सिंह लामाले विद्यालयको अनुगमन गरेका छन् । मन्त्री लामाले मकवानपुरकाे हेटौंडा उपमहनागरपालिका –१४ मा रहेको भृकुटी माध्यमिक विद्यालयमा अनुगमन गरेका हुन् ।
विद्यालयको शैक्षिक अवस्थाबारे जानकारी लिन मन्त्री लामाले विद्यालयको प्रत्येक कक्षाकोठामै पुगेर अनुगमन गरेका थिए । उनलाई विद्यालयका प्रधानाध्यापक अच्युतकृष्ण रिजाल र विद्यालय व्यवस्थापन समितिका अध्यक्ष कुमार मोक्तानले विद्यालयकाे अवस्थाकाे जानकारी गराएका थिए ।
अनुगमनका क्रममा मन्त्री लामाले भविष्यका कर्णधार बनाउने जिम्मेवारी शिक्षकको काँधमा रहेको भन्दै गम्भीर भएर लाग्न निर्देशन दिए । उनले शिक्षक, तथा विद्यार्थीहरुले थप परिश्रम गरि नमूना विद्यालयको रुपमा स्थापित गराउन आग्रह गर्दै मन्त्रालयले आवश्यक सहयोग गर्ने प्रतिबद्धता व्यक्त गरे । सार्वजनिक शिक्षा सुधार गर्ने प्रदेश सरकारको लक्ष्य रहेको भन्दै उनले विद्यालयका शिक्षक, विद्यार्थीकाे भूमिका शैक्षिक क्षेत्र सुधारमा नमूना हुने विश्वास व्यक्त गरे ।
२०७२ को भुकम्पपछि युएसएडको सहयोगमा एनआरएस परियोजना अन्तर्गत बनेको भवन एनआरएस परियोजना प्रमुख रामजी थापाले विद्यालयलाई हस्तान्तरण गरेका हुन् । १८ करोड लगानीमा निर्माण भएको विद्यालयकाे २२ कोठा रहेकाे छ । विद्यालय भवनलगायतका संरचना अपाङमैत्री रहेकाे थापाले बताए ।
यसैगरी विद्यालय भवन वातावरणमैत्री समेत रहेकाे छ । घाम कक्षाकोठामा नलाग्ने र गर्मी मौसममा गर्मी नहुने साथै चिसोमा चिसो नहुने गरी विद्यालयको भौतिक संरचना निर्माण भएको विद्यालयका प्रअ रिजालले बताए । हाल विद्यालयमा ३ सय ५० विद्यार्थी अध्ययनरत रहेका छन् । विद्यालयमा २५ वटा कम्युटर सहित ल्यावको समेत व्यबस्था रहेको प्रअ रिजालले जानकारी दिए ।
मकवानपुर । समाजवादी आन्दोलनमा नेतृत्व गर्ने कम्युनिष्ट नेताहरुले विवाह, ब्रतबन्ध जस्ता कार्यक्रमको सन्दर्भमा ठुलो रकम खर्च गर्ने गरेको आरोप बेला बेलामा लाग्ने गरेको छ । पछिल्लो समय प्रधानमन्त्री पुष्पकमल दाहाल प्रचण्डकै सवालमा पनि सामाजिक सञ्जालमा विभिन्न टीका टिप्पणी आए ।
विवाह लगायतको सामाजिक कार्यक्रम गर्दा सहभागी हुन संङख्या र खर्चको दायरा तोकिए पनि यसलाई नीति निर्माताहरुले नै अनुसरण गर्ने गरेको पाइदैन । तर मकवानपुरका एक सञ्चारकर्मीले आफ्नो छोराको विवाह भोजको खर्च काटेर धार्मिक पर्यटकीय स्थलमा बुद्धको मुर्ति स्थापना गरेका छन् ।
मकवानपुरको हेटौंडा उपमहानगरपालिका ४, कमलडाँडा नीवासी पत्रकार प्रताप विष्टले छोरा डा. घोषणा विष्ट र बुहारी सुजता कार्कीको विवाहको खर्च कटौति गरेर हेटौंडा–९ स्थित कुष्माण्ड सरोबर त्रिवेणीधाममा गौतम बुद्धको अष्टधातुको मूर्ति स्थापना गरेका हुन् ।
धार्मिक पर्यटनको गन्तव्यको रुपमा विकास गरिएको त्रिवेणी धाममा उनीहरुले ५ फिट अग्लो, २ सय ६० केजी तामा र पित्तल मिसिएको मूर्ति स्थापना गरेको हुन् । करिब १२ लाख रुपैयाँ खर्चमा निर्माण गरिएको मूर्तिको हेटौंडा उपमहानगरपालिकाका प्रमुख मीनाकुमारी लामा तथा उपप्रमुख राजेश बानियाँ अनावरण गरे ।
सामाजसेवी तथा बुद्धिजीवी देव श्रेष्ठले फजुल खर्च गरी विवाह गर्ने परम्परा बढिरहेको समयमा यस जोडीले उदाहरणीय काम गरेको बताए । “यस्ता कार्यले समाजको नेतृत्वकर्तालाई थप जिम्मेवार बन्न प्रेरणा दिन्छ” वृद्ध श्रेष्ठले भने “बाटो देखाउनेहरुले गर्ने यस्तै काम हो ।”

घोषणा विष्ट सञ्चारकर्मी प्रताप विष्टका कान्छा छोरा हुन् । विष्टले २०७४ सालमा आफ्नो ज्येष्ठ छोराको विवाह खर्च कटाएर मानव सेवा आश्रमलाई ५ लाख ११ हजार १११ सय रुपैयाँ तथा नेपाल पत्रकार महासंघ मकवानपुर शाखामा एकलाख रुपैयाँ पुस्तकालय स्थापनाका लागि प्रदान गरेका थिए । “दुबै सन्तानको विवाहमा मैले सकेको सामाजिक काम गरे, परिवारको पनि साथ रह्यो” विष्टले भने “भोज खुवायो, एक दिनको लागि, त्यसमा पनि सबैको मन बुझाउन सकिदैन ।”
धार्मिक पर्यटकीय स्थलमा राखिएको बुद्धको मुर्तिले समावेशी पार्क निर्माणका टेवा पुगेको त्रिवेणी धाम विकास समिति अध्यक्ष इश्वरी न्यौपानेले बताए । त्रिवेणी थाममा १०८ गौमुखि धारा, शिश महल, हेडम्ब देबीको मुर्ति लगायतको दर्शनीय स्थलहरु छन् । यहाँ माघ महिना भरी कुष्माण्ड मेला लाग्छ । हेटौंडाको नामाकरण कसरी भयो भन्ने ऐतिहासिक कथा यहाँबाट बुझ्न सकिने न्यौपानेले बताए ।
बुद्धुमर्तिको अनावरण कार्यक्रममा प्रमुख जिल्ला अधिकारी सूर्य सेडाइलगायत जिल्लाका प्रमुख सरकारी कार्यालयका प्रमुखहरु, दलका प्रमुखहरु, सामाजिक अभियन्ताहरु तथा सञ्चारकर्मीहरुको उपस्थिती रहेको थियो ।
मानव वेचविखन तथा ओसारपसार बिरुद्ध प्रदेशस्तरीय संरक्षण नीति बारे अभिमुखीकरण
Tags: No Comments