१९ नम्बर वडामा ४४ वटा सूचक सतप्रतिशत
Tags: No Comments
मकवानपुर । मकवानपुरकाे हेटौंडा उपमहानगरपालिकाकाे वडा नम्बर १९ वडाले ४४ वटा सुचक सतप्रतिशत पुरा गर्दै बालमैत्री स्थानीय शासनयुक्त वडा घोषणा हुने भएकाे छ । मंगलबार हेटौंडा १९ वस्तिपुर स्थित वडा कार्यालयमा पत्रकार भेटघाट गरी वडालाई १४ मंसिरमा निकृष्ट बालश्रम मुक्त, वालविवाह मुक्त तथा बालमैत्री स्थानीय शासनयुक्त वडा घाेषणा गरिने जनाकारी दिइएकाे हाे ।
वड़ा अध्यक्ष एवम् बालमैत्री स्थानीय शासनयुक्त वडा घोषणा मुल समारोह समिति संयोजक नरनाथ सुवेदीले “बालबालिकामा लगानी, सुनिश्चित भविष्यको थालनी” भन्ने मुल नाराका साथ आगामी शुक्रबार १४ मंसिरमा वडालाई निकृष्ट बालश्रम मुक्त, बाल विवाह मुक्त तथा बालमैत्री स्थानीय शासनयुक्त वडा घोषणा गरिने जानकारी दिए ।
पत्रकार भेटघाटमा वडा अध्यक्ष सेवेदीले पूर्ण खोपयुक्त, पूर्व साक्षर, खुल्ला दिसामुक्त वडा घोषणा भई सकेको १९ नम्बर वडालाई बालमैत्री स्थानीय शासन घोषणा गर्न आवश्यक ५१ वटा सूचक पुरा भएकाे बताए । ५१ वटा सूचकहरुमध्ये ४४ वटा सूचकहरु १०० प्रतिशत, १ वटा सूचक ९८ प्रतिशत्, ३ वटा सूचक ९५ प्रतिशत र १ वटा सूचक ९० प्रतिशत, १ वटा सूचक ८५ प्रतिशत, १ वटा सूचक ८० प्रतिशतसम्म नतिजा हासिल भएकाेले बालमैत्री स्थानीय शासनयुक्त वडा घोषणा गर्न लागिएकाे अध्यक्ष सुवेदीले जानकारी दिए ।
अधिकांश भागहरु ग्रामिणस्तरका रहेकाे वडामा घरधुरी तथ्याङ्ग संकलन सर्वेक्षण, २०७९ अनुसार १८ वर्ष मुनिका बालबालिकाको जनसंख्या ३,३५० रहेको बताइएकाे छ । बालबालिकाकाे संख्या मध्ये १ हजार ७२७ बालक र १ हजार ६२३ बालिका रहेकाेमा ४८.४४ प्रतिशत बालिका र ५१.५५ प्रतिशत बालक रहेका अध्यक्ष सुवेदीले जानकारी दिए । वडामा सामुदायिक र संस्थागत गरी बाल विकास केन्द्र सहितका १० वटा विद्यालयहरु संचालनमा रहेकाे बताइएकाे छ ।
यसैगरी १८ वटा बालसमूह र एउटा वडा बाल सञ्जालमा ४५० जना बालबालिकाहरु आवद्ध छन् भने विभिन्न संरचनागत समितिहरुमा समेत गरी जम्मा ४९१ जना बालबालिकाहरुको प्रत्यक्ष सहभागिता रहेको उनले बताए । आजका बालबालिका भोलिका कर्णधार हुन् भन्ने भनाईलाई मनन् गर्दै २१ औं शताब्दीका बालबालिकालाई उक्त भनाईमाथि नै परिमार्जित गर्दै बालबालिकालाई आजैका साझेदार बनाउन सोही अनुसारका कामहरुमा सक्रिय बनाउने प्रयास रहेने उनले बताए ।
‘भोलिका कर्णाधार हुन भन्दै गर्दा हामीले उनीहरुलाई सही बाटो देखाएनौ, उचित वातावरण र असल संस्कारयुक्त शिक्षा दिन सकेनौ भने जीवन उपयोगी शिक्षा सहितको सिप सिकाईमा उनीहरुलाई सहभागी गराएनौ भने उनीहरु कसरी भोलिका कर्णाधार बन्न सक्लान? त्यसैले आजका बालबालिकालाई हामी अभिभावक, शिक्षक र जनप्रतिनिधिले उनीहरुलाई नैतिक तथा असल संस्कारयुक्त शिक्षा आर्जन गर्न सक्ने वातावरण बनाई उनीहरुलाई सामाजिक कार्यमा पनि सहभागिता गराउन जरुरी देखिन्छ’ उनले भने । ‘बालबालिकाको सवल भविष्य निर्माणमा घरपरिवारको साथै वडाको ठूलो जिम्मेवारी र दायित्व हुन्छ’ अध्यक्ष सुवेदीले भने ‘भविष्यमा वडा सञ्चालनको महत्वपूर्ण हिस्सा ओगटेको आजको बालबालिकाको क्षेत्रमा वडाले आवश्यक लगानी गर्नै पर्छ ।’
बालबालिकाको बाच्न पाउने अधिकार, संरक्षणको अधिकार, विकासको अधिकार र सहभागिताको अधिकारको विषयमा सबै सरोकारवाला निकाय जिम्मेवार बन्दै गर्दा बालबालिकाले अधिकारको माग सँगै उनीहरुलाई कर्तव्यबोध पनि गराउनु समेत अभिभाकीय दायित्व भएकाे उनले बताए ।अध्यक्ष सुवेदीले १६ मंसिर २०७१ काे निर्णयबाट हेटौडा नगरपालिकालाई उपमहानगरपालिका बनाइएकाे तथा बागमती प्रदेशको राजधानी समेत रहेको उपमहानगरपालिकाको वडा १९ साविकको बसामाडी गाविसको वडा नम्बर १,२,४,६ र ७ मिलेर बनेको जानकारी दिए । ४७,०४ वर्ग किलोमिटर क्षेत्रफलमा फैलिएको वडा क्षेत्रफलको आधारमा सबै भन्दा ठूलो वडाको पूर्व सिमानामा हेटौडाकाे वडा नम्बर १ र ३, पश्चिममा मनहरी गाउँपालिका र राक्सिराङ गाउँपालिका, उत्तरमा कैलाश गाउँपालिका र भिमफेदी गाउँपालिका र दक्षिणमा मनहरी गाउँपालिका रहेकाे उनले बताए ।
कार्यक्रममा सहायक महिला विकास निरिक्षक मिना देवकाेटाले वडाकाे प्रगति विवरण प्रस्तुत गर्दै २०७९ साल भाद्र महिनादेखि बालबालिका सम्बन्धि कार्य गर्दै ५१ वटा सुचक पूरा गरिसकेकाेले बालमैत्री वडा घोषणा गर्न लागिएकाे जानकारी दिए । ‘बालमैत्री वडा घोषणा कार्यक्रम समारोह तथा सम्पूर्ण अभियानमा ऐक्यबद्धता जनाई दिनुहुन सम्पूर्ण वडाबासी, सरोकारवाला निकायलगायतमा वडा कार्यालय हार्दिक अपिल गर्दछौं’ वडाले प्रकाशन गरेकाे विज्ञप्तिमा उल्लेख छ । १९ वडामा बालमैत्री स्थानीय शासन वडा समिति, वडा बालअधिकार समिति, बालसमूहरु, बालसमूह संजाल, टोल विकास संस्थाहरु, युवा क्लब, आमा समूह, वन समिति लगायतका विभिन्न सामुदायिक संस्थाहरु क्रियाशील छन् ।
मंगलबार नै वडा कार्यालयले सार्वजनिक सुनुवाई कार्यक्रम समेत गरेकाे छ । सार्वजनिक सुनुवाई तथा पत्रकार भेटघाट कार्यक्रम वडा अध्यक्ष नरनाथ सुवेदीकाे सभाध्यक्षतामा भएकाे थियाे । कार्यक्रममा वडा सचिव दिपेन्द्र ढकाल, बालमैत्री नगर सहजकर्ता सपना ढुङ्गाना, वडा सदस्य तथा स्थानीय शासनयुक्त वडा घाेषणा कार्यक्रम सम्पर्क व्यक्ति रमा गाेले महिला तथा बालबालिका शाखाका अधिकृत मन्दिरा थापालगायतकाे उपस्थिति रहेकाे थियाे ।
मकवानपुर । मकवानपुर प्रहरीले हेटौंडाबाट ७१ किलो लागुऔषध गाँजासहित २ जनालाई नियन्त्रणमा लिएकाे छ । हेटौडा उपमहानगरपालिका वडा नम्बर १९ तिनताप्के स्थित पुर्व पश्चिम राजमार्ग सडकखण्डमा प्रहरीले उक्त परिमाणको लागूऔषध बरामद गरेको हो ।
मनहरीबाट हेटौडातर्फ जादै गरेको प्रदेश ३–०१–०२४ च ३०५९ नम्बरकाे पिकअप गाडीलाई जाँच गर्दा मकवानपुर राक्सीराङ गाउँपालिका वडा नम्बर ९ बस्ने २० वर्षीय मिलन घलान र २६ वर्षीय दावा थिङलाई गाँजा ७१ किलाे गाँजासहित नियन्त्रणमा लिइएकाे जिल्ला प्रहरी कार्यालय मकवानपुरले जनाएकाे छ ।
उनीहरुले चालक बस्ने सिट मुनी लुकाई ल्याईएको अवस्थामा ७१ किलो ७ सय ग्राम लागूऔषध गाँजा फेला परेकोले पिकअप गाडीसहित घलान र थिङलाई गाँजासहित नियन्त्रणमा लिई अनुसन्धान भईरहेको प्रहरीले जनाएकाे छ ।
मकवानपुर । पछिल्लो समय तिनपाँग्रे सवारी साधनका कारण ट्राफिक व्यवस्था अस्तव्यस्त भएकाे मकवानपुरकाे हेटौडा उपमहानगरपालिकामा व्यवस्थापन केन्द्र सञ्चालनमा आएकाे छ । तिनपाँग्रे सवारी व्यवस्थापनका लागि हेटौंडा उपमहानगरपालिकाले छुट्टै सेवा केन्द्र सञ्चालनमा ल्याएको हाे ।
उपमहनगरले सञ्चालनमा ल्याएको सेवा केन्द्रको हेटौंडा उपमहानगरपालिकाका नगर प्रमुख मीनाकुमारी लामाले उद्घाटन गरिन् । हेटौंडा उपमहानगरपालिका वडा नम्बर ११ थानाभर्याङमा रहेको तौलपुलबाट सोमबारदेखी उपमहानगरपालिकाले तिनपाँग्रे सवारी व्यवस्थापनको काम सुरु गरेको हो । सेवा केन्द्र उद्घाटनका क्रममा नगर प्रमुख लामाले केहि सवारीका लागि स्टिकर हस्तान्तरण गरेकी थिइन् ।
सेवा केन्द्रले हेटौंडा उपमहानगर भित्र बाह्य क्षेत्रबाट सञ्चालन अनुमति बिना आएका सवारी नियन्त्रणका लागि आवश्यक समन्वय गर्दै नगर क्षेत्र भित्रका लागि स्टपपर्मिटको व्यवस्था, स्टिकर टाँसको काम गर्ने बताइएको छ । बाह्य जिल्लाबाट आएका सवारीका कारण यहाँका तिनपाँग्रे सवारी चालक मारमा परेको गुनासो पछि उपमहानगले स्टिकर टाँस गरी स्थानीय सवारी व्यवस्थापनको काम गरेको तिनपाँग्रे सवारी व्यवस्थापन समितिका संयोजक सबिन न्यौपानेले बताए ।
२०७६ पुष ७ भन्दा अघि हेटौंडा र मकवानपुर चल्ने अनुमति पाएका तिनपाँग्रे सवारीलाई अहिले सेतो स्टिकर टाँस गरिने छ । यस अघि पहिलो चरणमा हरीयो, दोश्रो चरणमा पहेलो टाँस गरीएको थियो । अहिले उपमहानगरले थालेको काम पछि अब स्टिकर टाँस नभएका सवारीलाई कडाइका साथ नियन्त्रण गरिने बताइएको छ । उपमहानगरले पहिलो चरणमा हरियो स्टिकर १ हजार ६ सय ७६ वटा सवारीलाई वितरण गरेको थियो ।
एक महिनासम्म स्टिकर टाँसको समय दिइको छ अब पनि अटेर गरेमा ट्राफिक र नगर प्रहरीको समन्वयमा कडाइका साथ अनुगमन र नियन्त्रण गरीने उपमहानगरले जनाएको छ । स्टिकरटाँस सँगै केहि समयमा उपमहानगर क्षेत्र भित्र तिनपाँग्रे सवारीको रुट अध्ययन पश्चात बैज्ञानिक भाडादर निर्धारण गर्ने योजना उपमहानगरले बनाएको छ । सोमबार आफ्नो सवारीमा स्टिकर प्राप्त गरेपछि हेटौंडा–४ का टिकाबहादुर थापाले उपमहानगरले गरेको काम राम्रो भएको बताए । उनले बाहिरबाट आएका अटो मयुरीले बजारमा निकै समस्या बनाएका थिए अब यो नीतिले राम्रो गर्ने उनले बताए ।
मकवानपुर । हामी सबैको प्रतिबद्धता, लैङ्गिक हिंसा अन्त्यका लागि ऐक्यबद्धता भन्ने नाराका साथ साेमबारबाट सुरु भएकाे ३३ औं अन्तर्राष्ट्रिय लैङ्गिक हिंसा विरुद्धको १६ दिने अभियान – २०२४ पहिलाे दिन साँझ हेटाैंडाकाे बुद्ध चाेकमा दीप प्रज्वलन गरिएकाे छ ।
हरेक वर्ष २५ नाेभेम्बरदेखि १० डिसेम्बरसम्म मनाइने अन्तर्राष्ट्रिय लैङ्गिक हिंसा विरुद्धको १६ दिने अवसरमा दीपावली गरिएकाे हाे । मानव अधिकार संरक्षण तथा मानव बेचविखन विरुद्धकाे जिल्ला सञ्जालकाे नेतृत्वमा आयाेजित दीपावलीमा अभियानकर्मीहरुकाे उपस्थिति रहेकाे थियाे । जिल्ला प्रहरी कार्यालयका डिएसपी श्यामु अर्यालले दीपालवी गरेर कार्यक्रम उद्घाटन गरेका थिए ।
लैङ्गिक हिंसा पीडितलाई न्यायमा साथ दिने प्रहरीकाे प्रतिवद्धता
Tags: No Comments
मकवानपुर । ३३ औं अन्तर्राष्ट्रिय लैङ्गिक हिंसा विरुद्धको १६ दिने अभियान – २०२४ साेमबारबाट सुरु भएकाे छ । २५ नाेभेम्बरदेखि १० डिसेम्बरसम्म मनाइने अन्तर्राष्ट्रिय लैङ्गिक हिंसा विरुद्धको १६ दिने अभियानकाे पहिलाे दिन मानव अधिकार संरक्षण तथा मानव बेचविखन विरुद्धकाे जिल्ला सञ्जालकाे नेतृत्वमा प्रहरीलाई ध्यानाकर्षण तथा अपिल पत्र बुझाइएकाे छ ।
हामी सबैको प्रतिबद्धता, लैङ्गिक हिंसा अन्त्यका लागि ऐक्यबद्धता भन्ने नाराका साथ पहिलो दिन सेतो रिवन अभियान समेत सुरु गरिएकाे सञ्जालकाे सह संयाेजक तथा माइती नेपाल मकवानपुर प्रमुख माया तामाङले बताइन् । सञ्जालले मकवानपुर प्रहरी प्रमुख विश्वराज खड्कालाई अनौपचारिक क्षेत्रका महिला श्रमिकहरूको अधिकार, सम्मानपूर्ण र हिंसामुक्त वातावरणको लागी संयुक्त अपिल–पत्र हस्तान्तरण गरिएकाे थियाे । ध्यानाकर्षण पत्र ग्रहण गर्दै प्रहरी प्रमुख खड्काले हिंसा पीडित प्रभावितलाई न्यायमा पहुंचको लागि सधै समर्थन हुने प्रतिबद्धता व्यक्त गरे ।
संजाल सदस्य मकवानपुर महिला समुहको कार्यक्रम अधिकृत निशा लामाले ध्यानाकर्षण पत्र वाचन गरेर सुनाएकी थिइन् । डिएसपी श्यामु अर्याल समेतको उपस्थिति रहेको कार्यक्रममा गैसस अध्यक्ष रमिला सापकोटा, कोशिश मकवानपुरको पैरवी अधिकृत सुनिरा लामा, माइती नेपाल फिल्ड सुपरभाइजर मन लामा,हिमराट्स मकवानपुर प्रमुख कुमारी वाइबालगायत सन्जालका सदस्यहरूको उपस्थिति रहेको सचिव तथा सेलर्डको कार्यक्रम संयोजक जगन्नाथ सुबेदीले जानकारी दिए ।