मकवानपुर । बागमती प्रदेशका मुख्यमन्त्री बहादुर सिंह लामाले विभागीय मन्त्रीहरुसँग सम्पादन करार सम्झौता गरेका छन् । बुधबार मुख्यमन्त्री लामाले ११ जना विभागीय मन्त्रीसँग कार्य सम्पादन करार गरेका हुन् ।
मुख्यमन्त्री लामाले कृषि तथा पशुपन्छी विकास मन्त्री प्रकाश श्रेष्ठ, आर्थिक मामिला तथा योजना मन्त्री कुन्दनराज काफ्ले, आन्तरिक मामिला तथा कानूनमन्त्री सुरजचन्द्र लामिछाने, सामाजिक विकासमन्त्री हरिप्रभा खड्गी, भौतिक पूर्वाधार विकासमन्त्री अमन मास्के, उद्योग, वाणिज्य, भूमि तथा प्रशासन मन्त्री शुकमाया तामाङ, संस्कृति, पर्यटन तथा सहकारी मन्त्री विमल ठकुरी, स्वास्थ्य मन्त्री किरण थापा, खानेपानी, ऊर्जा तथा सिँचाइ मन्त्री श्याम बहादुर खड्का, श्रम, रोजगार तथा यातायात मन्त्री प्रेमभक्त महर्जन, र वन तथा वातावरण मन्त्री कृष्णप्रसाद सिलवालबिच कार्यसम्पादन सम्झौता गरेका हुन् ।
हेटौडामा आयोजित कार्यक्रममा मुख्यमन्त्री लामाले चालु आर्थिक वर्ष २०८१/०८२ का लागि मन्त्रीहरूसँग सम्पादन गर्ने कार्यहरू र जिम्मेवारी सम्बन्धी करार सम्झौता गरेका हुन् । कार्यसम्पादन करार सम्झौतामा मन्त्रीहरूले चालु आवमा गर्नुपर्ने कामहरू,कार्ययोजना,समयसीमा,प्रक्रिया तथा कानूनी विषयहरू लगायत उल्लेख गरिएको छ ।
प्रदेशमा मुख्यमन्त्रीसहित १४ मन्त्रीमध्ये रहेका छन् । कार्यसम्पादन सम्झौता हुँदा एक जना मन्त्री अनुपस्थित रहे भने अर्का मन्त्रीले विभागीय जिम्मेवारी नपाएकाले करार सम्झौता हुन नसकेकाे प्रदेशका प्रमुख सचिव गोविन्द बहादुर कार्कीले बताए । युवा तथा खेलकुद मन्त्री मीनकृष्ण महर्जन र विना विभागीय मन्त्री मदुकुमार श्रेष्ठसँग सम्झौता हुन बाँकी रहेको छ ।
प्रमुख सचिव कार्कीका अनुसार मुख्यमन्त्री र मन्त्रीबिचको कार्यसम्पादन सम्झौताले प्रदेश सरकारका कार्यक्रम र योजनाको प्रगतिको अनुगमन गर्न सहज हुनेछ । कार्यसम्पादन सम्झौतापछि प्रदेश सरकारका कामलाई व्यवस्थित गर्न सहयोग पुग्ने बताइएकाे छ ।
मुख्यमन्त्री लामाले प्रमुख सचिव कार्कीसँग समेत कार्य सम्पादन सम्झौता गरेका छन् । चालु आर्थिक वर्षको कार्यक्रम र बजेट कार्यान्वयनमा मन्त्रीहरूले विभागीय मन्त्रालयका सचिवसँग तथा सचिवले मातहतका महाशाखा प्रमुखसँग करार सम्झौता गर्नुपर्ने हुन्छ ।
मकवानपुर । बागमती प्रदेशकी उद्योग, वाणिज्य भूमि तथा प्रशासन मन्त्रालयले प्रविधिमैत्री सेवा विस्तार गर्ने भएकाे छ । मन्त्री सुकमाया तामाङले मन्त्रालयकाे पहिलो वार्षिकोत्सवको अवसरमा सबै सेवाहरु प्रविधिमैत्री बनाउँने कार्यको सुरुवात गरेकी छिन् ।
बुधबार मन्त्रालयको सेवासम्बन्धी जानकारीमूलक डिजिटल डिस्प्ले उद्घाटन गर्दै मन्त्री तामाङले गत वर्षदेखि हालसम्मको वार्षिक बुलेटिन अनावरण समेत गरिन् । उनले मन्त्रालयको कार्य जिम्मेवारीअनुरुप सम्पादन गर्नुपर्ने कार्यहरुलाई आर्थिक अनुशासन कायम गर्दै सर्वसाधारणले पाउनुपर्ने सेवासुबिधा छिटो, छरितो एवम् प्रभावकारी र कुशलतापूर्वक सञ्चालन गर्न उत्साहजनक सहभागिता र सहयोगका लागि उनले कर्मचारीको प्रशंसा गरिन् ।
‘व्यापार र उद्योगको क्षेत्रमा, व्यापार सम्बन्धी नीति, कार्यक्रम, कानून, मापदण्ड, योजना तर्जुमा र कार्यान्वयनका लागि प्रचलित ऐन नियमको परिधिमा रही मन्त्रालय र अन्तरगत कार्यालयहरुमा कार्यरत जनशक्तिबाट कार्य भएकाे छ’ उनले भनिन् ‘विकास र वातावरणीय सन्तुलन कायम राखी प्रविधिमैत्री प्रदेश निर्माण गर्न उत्पादन र उत्पादकत्व बढाउन साना, मझौला, घरेलु, र लघु उद्योग स्थापना गर्न उद्यमीलाई उत्साहित गर्दै उद्यमशीलताबाट स्वरोजगार तथा रोजगारी सिर्जना गरिने छ ।’
उद्यमीहरुको क्षमता अभिवृद्धि गर्न उद्यम तालिम, उद्योग प्रवर्द्धनार्थ औद्योगिक बस्तुको निर्यात र औद्योगिक प्रदर्शनीहरु, उद्यमीलाई प्रविधि हस्तान्तरण गर्ने जस्ता कार्यक्रम सफलतापूर्वक अघि बढिरहेका छन्’ उनले भनिन् । खनिज र भौगोलिक अध्ययन, खानी र खनिज पदार्थको अन्वेषण र व्यवस्थापनमा प्रादेशिक नीति, कानुन र मापदण्ड तर्जुमा र कार्यान्वयनमा सुरु गरेका कार्यहरुले सकारात्मक दिशा लिएको उनले दाबी समेत गरिन् ।
भौगोलिक अध्ययन, नक्सा व्यवस्थापन र भौगोलिक सूचना प्रणालीको समन्वयले मन्त्रालयका कामहरुलाई अझ प्रभावकारी बनाउने आशा गरेकी उनले उपभोक्ता संरक्षणका क्षेत्रमा पनि मूल्य र कालोबजारी नियन्त्रण, उपभोक्ता हकअधिकार संरक्षण, स्वदेशी उत्पादनमैत्री कार्यालय र उपभोक्ता अदालत गठन जस्ता पहलहरुलाई प्राथमिकता दिइएको बताइन् । ‘यी प्रयासहरुले उपभोक्ताको सन्तुष्टि र सुरक्षा सुनिश्चित गर्न हामी सफल हुनेछौं भन्ने विश्वास छ,’ उनले भनिन् ।
भूमि व्यवस्थापन क्षेत्रमा, भूमि प्रशासन, नापजाँच, भूमिसुधार, नदीउकास जमिन संरक्षण गरी व्यावसायिक प्रयोजनार्थ भूमिको निर्माण गर्नेर भूउपयोग नीति तथा मापदण्ड तर्जुमा र कार्यान्वयनलाई तीव्ररुपमा कार्यहरू अघि बढाएको जानकारी दिएकी उनले भूमि अभिलेख व्यवस्थापन, जग्गादर्ता, र स्वामित्व हस्तान्तरण प्रक्रियामा सुधार ल्याउने प्रयासलाई कर्मचारीको सक्रियता र सहयोगले सफल बनाएको बताइन् । ‘भूमिहीन वर्गको बसोबास र पुनर्स्थापनाका कार्यक्रममा पनि हामीले ठोस कदम उठाउन सफल भएका छौं’ उनले भनिन् ।
पुस्तिकाले विगतका वर्षहरुका कार्यहरुको अभिलेखिकरण गर्नुका साथै मन्त्रालयका सबल पक्षलाई बढाउँदै कमीकमजोरी सुधार गरी आगामी दिनहरुमा अझ परिणाममुखी बनाइने उद्योग गरौं, उद्यमी बनौ र समृद्ध नेपाल बनाऔं’ भन्ने मूल नारालाई मूर्तरुप दिलाउन सकिने आशा उनले लिएकी छन् ।
मकवानपुर । मकवानपुरकाे हेटौडामा मंगलबार गाईजात्रा पर्व मनाईएको छ । विशेष गरी नेवारी समुदायले मनाउने गाइजात्रा सामूहिक रुपमा निकालिएको हाे ।
नेवा सांस्कृतिक पुचः हेटौंडाले आयोजना गरेकाे समूहिक गाईजात्रा लाखे नाचसहित हेटौंडाको कृष्ण मन्दिरबाट निकालिएको थियो । हेटौंडाका ३६ र मकवानपुरका अन्य स्थानबाट ६ गरी ४२ परिवारले सामूहिक रुपमा गाईजात्रा निकालेका थिए ।
वर्षभरीमा दिवंगत भएकाहरुको सम्झनामा मानिसलाई गाईका रूपमा सिंगारी नगर परिक्रममा गर्ने गरिन्छ । यसरी नगरपरिक्रमा गर्नाले वर्षभरि दिंवगत भएका व्यक्तिहरू गाईको पुच्छर समाई वैतरणी पार हुन्छन् भन्ने धार्मिक विश्वास छ ।
हरेक वर्ष भाद्र कृष्ण प्रतिपदाका दिन गाईजात्रा पर्व मनाइने गरिन्छ । त्यसपछिकाे अष्टमीसम्म परम्परागत सांस्कृतिक पर्वका अन्य जात्रा मनाउने गरिदै आएकाे पाइन्छ ।
गाईजात्रा पर्वका अवसरमा नेपाल सरकारले काठमाडौं उपत्यकामा हरेक वर्ष सार्वजनिक विदा दिदै आएकाे छ । यस वर्ष बागमती प्रदेश सरकारले पहिलो पटक प्रदेश भर गाइजात्रामा सार्वजनिक बिदा दिइएको छ ।
राजा प्रताप मल्लले पुत्रशोकले विह्वल भएकी रानीलाई दुनियाँ पनि यस्तै शोकमा रहन्छन् भन्ने देखाउन ‘जनतालाई आ-आफ्नो घरका मरेका व्यक्तिका नाममा गाईजात्रा निकाली शहर परिक्रमा गराउनु’ भनी आदेशा दिएकाेले यो पर्व शुरु भएको इतिहास पाइन्छ ।
गाइजात्रा मात्रैले पनि रानी शोकबाट मुक्त हुन नसकेपछि विभिन्न प्रकारका व्यंग्यात्मक कार्यक्रम समेत गराउन आदेश दिएपछि हास्यव्यंग्यको चलन शुरु भएको भनाई रहेकाे छ ।

मकवानपुर । मकवानपुरको बकैया गाउँपालिकामा लगाइएको ताला खुलेको छ । गाउँपालिका र ताला लगाउने दलहरु बिच १० बुँदे सहमतिपछि ताला खुलेको हो ।
मंगलबार भएको छलफलपछि पालिकामा आइतबारदेखि लागेको ताला खोल्ने लगायतका १० बुदें सहमति भएको छ । शिक्षा, स्वास्थ्यसम्बन्धी निर्णय गर्दा शिक्षा समिति, सामाजिक विकास समितिबाट भएका निर्णयलाई कार्यपालिकाबाट कार्यान्वयन गराउने, कारवाही स्वरूप प्रअको लिइएको राजिनामा फिर्ता हुने र शिक्षा प्रमुखसँग स्पष्ट लिने, सवारी साधन र इन्धनको आवश्यकता अनुसार मात्र प्रयोग गर्न गराउने सहमति भएकाे छ ।
यसैगरी बिमा र निः शुल्क प्राप्त हुने औषधी सम्पूर्ण स्वास्थ्य संस्थाको हकमा यथाशीघ्र उपलब्ध हुने गरी व्यवस्था मिलाउने, स्वास्थ्यमा देखिएको कर्मचारीको समस्या कार्यपालिकाबाट निर्णय गराई कार्यन्वयन गराउने, वन तथा वातावरण समितिलाई क्रियाशील गराउने, कर्मचारी नियुक्ति गर्दा नियम अनुसार गर्ने, गाउँपालिकाभित्र पर्ने फास्ट ट्रयाक र गिटी बालुवाको कडाइका साथ अनुगमन गर्ने, पालिकाबाट भएका निर्णयप्रति आएको जनगुनासोलाई सम्बन्धित पक्षसँग छलफल गरी समाधान गर्दै जाने सहमति भएको छ ।
छलफलमा गाउँपालिका अध्यक्ष धर्मराज लामिछाने, उपाध्यक्ष भक्तबहादुर खत्री, राजनीतिक दलको तर्फबाट नेकपा एमालेका नारायणप्रसाद तिमल्सिना र गोपाल दाहाल, नेकपा माओवादी केन्द्रका जीवन गोले र बिमल नेपाल, रास्वपाबाट अमर दंगाल र छोटेलाल जिम्बा, एकिकृत समाजवादीबाट प्रकाश बस्नेत र नेकपा (बहुमत) प्रल्हाद गौतम लगायतको सहभागिता थियो ।
२ भदोमा ५ राजनीतिक दलले गाउँपालिका अध्यक्ष लामिछाने मनोमानी ढङ्गले चलेको भन्दै तालाबन्दी गरेका थिए ।
र यो पनि
बकैया गाउँपालिका कार्यालयमा तालाबन्दी
मकवानपुर । नेपाल निर्माण उद्योग परिषद् मकवानपुरको अध्यक्षमा नरेन्द्र भण्डारी चयन भएका छन् । नेकपा एमाले निकट व्यवसायी संगठन उद्योग परिषदकाे मंगलबार हेटौडामा भएकाे पहिलो अधिवेशनले भण्डारीलाई सर्वसम्मत अध्यक्षमा चयन गरेको हो ।
हेटौंडा सिमेन्ट उद्योग सञ्चालक समितिका अध्यक्षसमेत रहेका भण्डारीको अध्यक्षता ९ सदस्यीय जिल्ला समिति चयन भएको छ । समिति उपाध्यक्षमा सजित कार्की, सचिवमा चेत बहादुर थापा र कोषाध्यक्षमा देवकृष्ण विक चयन भएका छन् ।
यस्तै सदस्यहरुमा धुर्व सिंह पाख्रिन, सुरज कार्की, सुनित आचार्य, रमेश आचार्य र विष्णु सिलवाल चयन भए । गठित कार्यसमितिको कार्यकाल दुई वर्षको हुनेछ ।
अधिवेशनमा नेकपा एमालेका केन्द्रीय सदस्य एवम् मकवानपुर इन्चार्ज रामेश्वर राना, प्रदेश सदस्यहरु रघु खुलाल, एकालाल श्रेष्ठ र जिल्ला अध्यक्ष श्रीधर पोखरेल, उपाध्यक्ष हिदम लामा र सचिव सीता विष्ट लगायतको आतिथ्यता रहेको थियो ।