मकवानपुर । महाकवि लक्ष्मीप्रसाद देवकोटा स्मृति साहित्य सम्मान–२०८१ माधव पोख्रेललाई प्रदान गरिएकाे छ । १० हजार रुपैया राशीकाे उक्त सम्मान बिहीबार मकवानपरे साहित्यकार पोखरेललाई प्रदान गरिएकाे हाे ।
साहित्य संगम मकवानपुर र युगप्रकाश क्लबले संयुक्त रुपमा प्रदान गरिदै आएकाे उक्त सम्मान महाकवि लक्ष्मीप्रसाद देवकोटाको जन्मजयन्तीका अवसरमा हेटौंडा उपमहानगरपालिका वडा नम्वर ११ की वडाध्यक्ष जुना दाहालले पोख्रेललाई प्रदान गरिन् । हेटौँडा–४ निवासी पोख्रेल मातृभूमि साहित्य समाजका पूर्वअध्यक्ष हुन् । उनकाे नाटक ‘आकांक्षाको चिता’ (२०६९), कविता संग्रह ‘रित्तिएको गाउँ’ (२०७०) र नाटक ‘ऐनाभित्रको आकाश’ (२०७९) प्रकाशित छन् ।
नेपाली साहित्यको उन्नयन र श्रीवृद्धिमा उल्लेखनीय योगदान पुर्याउने स्रष्टालाई महाकवि लक्ष्मीप्रसाद देवकोटा स्मृति साहित्य सम्मान प्रदान गर्दै आएको संगम अध्यक्ष डीबी बर्तौलाले जानकारी दिए । बिहीबार हेटौडा ११ नवलपुरमा प्रभातफेरी, माल्यार्पण, कविता प्रतियाेगिता र स्रष्टा सम्मान कार्यक्रम गरी महाकवी देवकाेटाकाे ११६ औं जन्मजयन्ती मनाइएकाे हाे । साेही अवसरमा वडा अध्यक्ष जुना दाहाल लगायतले देवकाेटाकाे प्रतिमामा माल्यार्पण गरेका थिए ।
यसैगरी महाकवि लक्ष्मीप्रसाद देवकोटाको जन्मजयन्तीकै अवसरमा आयोजिता मकवानपुर जिल्ला स्तरीय कविता प्रतियोगितामा उत्कृष्ट भएका सरोजप्रसाद शाह, कृष्णचन्द्र काफ्ले र कृष्मा लौडारीलाई जनही नगद ३ हजार रुपैयाँ र विप्लव आचार्यलाई नगद १ हजार प्रोत्साहन पुरस्कार प्रदान गरिएको थियो ।

मकवानपुर । नेपालीहरुकाे दोस्राे ठुलाे पर्व तिहार मंगलबार सुरु भएकाे छ । आज कात्तिक कृष्ण त्रयोदशीका दिन काग तिहार परेकाे छ । कागको पूजा गरी यो पर्व मनाइँदै छ ।
सूर्योदयकालमा त्रयोदशी भएको दिन काग तिहार मनाउनुपर्ने शास्त्रीय मान्यता रहेकाेले बुधबार काग तिहार मनाइदैं छ । यमराजको दूतका रुपमा पुजिने कागलाई आज बिहान मनपर्ने खानेकुरा खान दिएर काग तिहार मनाउने चलन छ । कागले यमराजसमक्ष राम्रो खबर लगिदियोस् भनेर आजका दिन कागलाई पूजा आराधनासहित मीठो–मीठो खान दिई खुसी पार्ने चलन छ ।
काग घर वरपर आई कराएमा उसले केही खबर लिएर आएको विश्वास समेत गर्ने गरिन्छ । त्यसैले पनि काग घर वरिपरी आइ कराएमा ‘शुभ बोल, शुभ बोल’ भन्ने गरिन्छ । आजको दिन कागलाई दही–भात खुवाएमा यमराजसमक्ष राम्रो सन्देश लगिदिने विश्वास समेत रहिआएको छ ।
काग तिहारकाे दिन कागप्रति श्रद्धा प्रकट गर्दै पूजन गरेमा पितृले सोझै पाउँछन् भनिन्छ । अन्य दिन पनि कागलाई भोजन गराउँदा पितृ खुशी हुन्छन् भन्ने मान्यता छ । यमराज काग तिहारदेखि मर्त्यलोकमा पाँचदिनसम्म विचरण गर्न आएका हुन्छन् भन्ने जनविश्वासमा यो पाँचदिनलाई यमपञ्चक भन्ने गरिन्छ ।
कागलाई चतुर पन्छीका रुपमा लिइन्छ । फोहर कसिङ्गर र सिनुसमेत खाने भएकाले वातावरण स्वच्छ राख्न कागले महत्वपूर्ण भूमिका खेलेको हुन्छ । तिहार हिन्दुहहरुको एक विशेष चाड कात्तिक शुक्ल पक्षको द्धितीया तिथिको भाइटिकासम्म पाँच दिन मनाइन्छ । यो पर्व पाँच दिन सम्म मनाइने भएकोले यस चाडलाई विशेष रुपमा हेरिन्छ ।
काग तिहारकाे दिन काठमाडौंकाे कागेश्वरी मनोहरा नगरपालिका–१ स्थित कागेश्वरी महादेव मन्दिरमा विशेष पूजा आराधना हुने गर्छ । यसैगरी हनुमानढोकास्थित कागेश्वरी मन्दिरमा पनि कागको विशेष पूजा आराधना गरिन्छ ।
यस वर्ष तिथिको घटबढका कारण मंगलबार कार्तिक कृष्ण त्रयोदशी तिथि परेकाेले यमपञ्चक मङ्गलबार बेलुकीदेखि नै सुरु भएको छ । लक्ष्मी स्थिर राख्नका लागि गरगहना एवं तामाका भाँडाकुँडा किन्ने धन्वन्तरी पर्व पनि मङ्गलबार नै मनाइएको छ ।
यसरी सुरु भयो तिहार मनाउँने प्रचलन
पौराणिक कथा अनुसार सुर्यको छोरा यमराजले आफ्नी बहिनी यमुनाको निम्तो स्विकार गरी बहिनीको घरमा गई रमाइलो गरेको हुनाले यी पाँच दिनलाई यमपञ्चक भनिएको हो । यसरी यमुनाको घरमा बस्दा यमराजले बहिनी यमुनालाई ‘जे मन लाग्छ वर माग’ भनेपछि उनले ‘हरेक वर्ष आजकै दिन मलाई भेट्न आउनुपर्ने, साथै दिदी–भाई दाजु–बहिनीको प्रेम सदा अटल रहोस् र दाजु भाईको आयु, कीर्ति सदा बृद्धि होस्’ भन्ने वरदान मागेकी थिइन् ।
यमराजले पनि ‘तथास्तु’ भन्दै मनसा, वाचा, कर्मणा र शुद्धचित्तले पुजा गर्ने गराउनेहरुको सधै उन्नती हुने तथा कीर्ति पनि फिँजिने वर दिई बहिनीसँग बिदा भई गएका थिए । त्यस समयबाट यो पर्व मानिदै आएको छ । तिहारले पशुपक्षी तथा मानवबीचको प्रगाढ सम्बन्धको चित्रित गर्छ भने अर्कोतिर दाजुभाई तथा दिदी बहिनीबीचको आत्मीय र पवित्र स्नेर्ह वं सम्बन्धलाई पनि उजागर गर्छ ।
तिहारकाे पाँच दिनमा साँझमा घरको मुलढोकामा यमराजलाई दीपदान गर्नाले मृत्युदेव प्रसन्न भई आरोग्यता तथा दीर्घजीवन प्रदान गर्छन् भन्ने विश्वासले घर–घरमा बत्ती बालेर दिपावली गर्ने गर्छन् ।जुन घरमा यसरी दिपावली हुन्छ त्यसघरमा कहिल्यै अपमृत्यु र अल्पमृत्यु हुँदैन भन्ने मान्यता चलिआएको छ । यमपञ्चकमा काग, कुकुर, गाई, लक्ष्मी, गोवर्धन र भाई पुजा गरिन्छ । तिहार पिङ खेलेर, देउसीभैलो खेलेर र दीपावली गरी मिष्ठान्न भोजन गरेर रमाइलो गरी मनाइन्छ ।
मकवानपुर । मकवानपुर जिल्लामा रातिको ९ बजेपछि देउसी भैलो खेल्न नपाइने भएको छ । जिल्ला प्रशासन कार्यालय मकवानपुरले एक सूचना जारी गर्दै तिहारमा राति ९ बजेपछि देउसी भैलो नखेल्न आग्रह गरेको छ ।
राती ९ बजे पश्चात् देउसी-भैलोलगायत सांस्कृतिक तथा मनोरञ्जनात्मक कार्यक्रम नगरी चार्ड पर्वलाई शान्तिपूर्ण र सौहार्दपूर्ण वातावरणमा मनाउन जिल्ला सुरक्षा समिति बैठकले निर्णय गरेकाे प्रमुख जिल्ला अधिकारी तिर्थराज चिलुवालले जानकारी दिए ।
यसैगरी सूचनामा प्लाष्टिकजन्य फूलगुच्छाको उत्पादन, आयात, विक्री वितरण वा भण्डारण गर्न पूर्णरूपमा रोक लगाएकोले विक्री वितरण गरेको पाइएमा प्रचलित कानून कानून बमोजिम कारबाही हुने उल्लेख छ ।
प्रमुख जिल्ला अधिकारी तिर्थ चिलुवालका अनुसार तिहार तथा छठ पर्वलाई सौहार्द्पूर्ण वातावरणमा मनाउन र शान्ति सुरक्षालाई प्रभावकारी बनाउन जिल्ला सुरक्षा समितिको शुक्रबारकाे बैठकले निर्णय गरेको बताए ।
जिल्ला सुरक्षा समितिको बैठकको निर्णय अनुसार चाडपर्व लक्षित सुरक्षाकर्मी परिचालन गरी गस्ती समेत बढाइएको छ । चाडवाड मनाउने नाममा व्यक्ति, छिमेकी, टोल, समुदाय र सार्वजनिक जीवनमा असर नपार्न आग्रह गरिएको छ ।
जिल्ला प्रशासन कार्यालय मकवानपुरले दिपावली, नेपाल सम्वत् ११४५, छठ लगायतका राष्ट्रिय पर्वको शुभकामनासहित पर्वहरु शान्तिपूर्ण एवं सौहार्दपूर्ण वातावरणमा मनाउन अनुरोध गरेको छ ।
मकवानपुर । मकवानपुर प्रहरीले बसमा नगद चोरी गरेकाे आरोपमा ३ जनालाई पक्राउ गरेकाे छ । बस चढेका व्यक्तिको ५१ हजार नगद चोरी गरेकाे आरोपमा उनीहरुलाई पक्राउ गरिएकाे हाे ।
सोमबार राती मकवानपुर मनहरी गाउँपालिका वडा नंबर–६ बस्ने ४९ वर्षिय भरत गौतम हेटौडाबाट ना ५ ख ८१०१ नम्बरको बस चढि लोथर जाने क्रममा निजको साथमा रहेको नगद ५१ हजार पाकेट मारी चोरी भएकाे थियाे ।
चोरीकाे सूचनाकाे आधारमा प्रहरीले सिन्धुपाल्चोक लिसंखु पाखर गाउँपालिका वडा नंबर ६ बस्ने ३२ वर्षिय लाक्पा तामाङ, जिल्ला उदयपुर त्रियुगा नगरपालिका वडा नंबर–१० बस्ने ४२ वर्षिय प्रेम दोर्जे शेर्पा र धनकुटा छथर गाउँपालिकावडा नंबर– ३ बस्ने ३७ वर्षिय हेमराज श्रेष्ठलाई पक्राउ गरेकाे जिल्ला प्रहरी कार्यालय मकवानपुरले जनाएकाे छ ।
इलाका प्रहरी कार्यालय मनहरीबाट खटिएको टोलीले तामाङ, शेर्पा र श्रेष्ठलाई शंका लागि खानतलासी गर्दा निजहरुको साथबाट चोरी भएको रकम फेला परेकोले पक्राउ गरिएको मकवानपुर प्रहरीकाे भनाई रहेकाे छ ।
मकवानपुर । मकवानपुर प्रहरीले लागुऔषध खैरो हेरोइनसहित २ जना र अवैध चाँदीसहित १ जना गरी ३ जनालाई पक्राउ गरेकाे छ । आइतबार २ सय २२ ग्राम २६ मिलिग्राम लागुऔषध खैरो हेरोइनसहित २ जना र ३२ थान चाँदीको मूर्तिसहित १ जनालाई हेटौडा १५ बाट पक्राउ गरिएकाे जिल्ला प्रहरी कार्यालय मकवानपुरले जानकारी दिएकाे छ ।
प्रहरी चौकी रातोमाटेबाट खटिएको प्रहरी टोलीले हेटौंडा–१५, रातोमाटे चेकपोष्टबाट सुनसरी जिल्लाको बराहक्षेत्र नगरपालिका–७ का ४१ वर्षीय दामोदर लुईटेल र १८ वर्षीय सन्देश राज धामीलाई २ सय २२ ग्राम २६ मिलिग्राम लागुऔषध खैरो हेरोइनसहित पक्राउ गरिएको हाे ।
काकडभिट्टाबाट हेटौंडा हुदैं काठमाडौंतर्फ जाँदै गरेको बागमती प्रदेश ०१ ००६ ख ७४४३ नम्बरको यात्रुबाहक बसलाई रोकेर जाँच गर्दा लागुऔषधसहित लुइटेल र धामीलाई पक्राउ गरिएको प्रहरीले जाएकाे छ । प्रहरीका अनुसार मकवानपुर जिल्ला अदालतबाट १५ दिनको म्याद अनुमति लिई लुइटेल र धामीलाई हिरासतमै राखेर अनुसन्धान सुरु गरिएको छ ।
यसैगरी पूर्व–पश्चिम राजमार्ग अन्तर्गत हेटौंडा–१५, रातोमाटे चेकपोष्टबाट अवैध चाँदीसहित १ जना भारतीय नागरिकलाई पक्राउ गरेको छ । पक्राउ पर्नेमा भारत बिहार राज्यका ४८ वर्षीय मनोज कुमार झा रहेकाे मकवानपुर प्रहरीले जनाएकाे छ ।
प्रहरी चौकी रातोमाटेकाे प्रहरी टोलीले पथलैयातर्फबाट हेटौंडातर्फ आउँदै गरेको ना ६ ख ७२६२ नम्बरको बसलाई रोकी जाँच गर्दा झाको साथबाट अवैध चाँदी बरामद गरिएकाे हाे । झाले शरीरको छातीमा फल्स बटम बनाई ल्याएको ३२ थान चाँदीको मूर्तिहरु (२ किलो १९६ ग्राम) बरामद गरेको प्रहरीले जानकारी दिएकाे छ ।
उक्त चाँदीकाे मुर्तिहरु सोमबारको बजार मुल्य अनुसार ३ लाख ६६ हजार ५ सय ४९ रुपैयाँ बराबर रहेकाे बताइएकाे छ । चाँदीको मूर्तिहरुसहित झालाई अनुसन्धान तथा कारबाहीका लागि राजश्व अनुसन्धान कार्यालय पथलैया पठाइएको मकवानपुर प्रहरीले जनाएकाे छ ।