चितवन । बागमती प्रदेशका प्रदेश प्रमुख दीपक प्रसाद देवकाेटाले संस्कार बिनाको शिक्षा बिंड बिनाको खुर्पा जस्तै हुने बताउनु भएकाे छ । शनिबार चितवनकाे भरतपुरमा रहेकाे नयाँकिरण कमलकुसुम माध्यमिक बिद्यालयको ५८ औं बार्षिकोत्सब तथा अभिभावक दिवस समारोहलाई सम्बाेधन गर्दै उहाँले यस्तो बताउनु भएकाे हाे ।
बिद्यार्थी लक्षित सम्बाेधन गर्दै प्रदेश प्रमुख देवकाेटाले भन्नुभयो ‘तपाइँहरू जिबनको उर्जाशील उमेरमा हुनुहुन्छ । मेहनतभन्दा अर्को बिकल्प छैन । सन्सार मेहनतीहरूको हो । तपाइहरूसङ्ग सपना हुनुपर्छ अनि त्यो सपनाले बिपनामा मेहनतको मार्गमा डाेर्याउनुपर्छ । यति पढ्नुस् कि अभिभावकले अबत सुत भो नानीबाबू भन्नुपरोस् । तपाई जहाँ भएपनी सस्कारी बन्नुस ।’
‘हरेक आमाबाबुले आफ्नो भन्दा सुखद जीवन छोराछोरीको होस् भन्ने चाहन्छन् र त्यसका लागि आफ्ना रहरहरूको तिलान्जली दिएर आफ्ना सन्तानको लागि दिनरात नभनी मेहनत गर्छन्’ उहाँले भन्नुभयो । ‘अभिभाबकको सपना तुहाउने छुट तपाइँ बिद्यार्थीलाई छैन । मेहनत गर्दागर्दै कहिलेकाही असफल हुनु नौलो होइन’ उहाँले भन्नुभयो ‘ मेहनत नगरी सफलता खोज्नु धान रोपेर मकै फल्छ भन्ने सोच्नुजस्तै हो । तपाईं नानीबाबुहरू कर्मशील हुनुहुन्छ र लक्ष्य हासिल गर्न सक्नु हुनेछ ।’
यसैगरी प्रदेश प्रमुख देवकाेटाले शिक्षक लक्षित सम्बाेधनमा तपाइँहरू यस्तो पेशामा हुनुहुन्छ जुन सबै पेशाहरूको जननी हो भन्नुभयो । ‘खरिदार वा नायब सुब्बा वा अधिकृत भएको भए नागरिकता वा अन्य केही बनाउनुहुन्थ्यो होला । शिक्षक भएर नागरिक बनाउनुहुन्छ’ उहाँले भन्नुभयो । शिक्षण पेशा आफ्नो जिवनको पहिलो पेशा भएकाे बताउँनु हुँदै उहाँले शिक्षकहरुले पेशाप्रती गर्व गर्नुपर्ने बताउनु भयो । उहाँले भन्नुभयो ‘शिक्षण पेशालाई म अत्यन्तै सम्मान गर्दछु। सम्पूर्ण समाज र रास्ट्रले यो पेशालाई उच्च मूल्यांकन गर्नुपर्दछ ।’
घर बालबालिकाको पहिलो पाठशाला भएकाे बताउँनु हुँदै प्रदेश प्रमुख देवकाेटाले अहिलेका नानीबाबुहरू भिन्न समयमा जन्मेका छन् । हाम्रा थुप्रै अनुभबहरू उनीहरूलाई अर्थ नलाग्ने बताउनु भयो। ‘अहिलेको समय तीब्ररूपमा परिवर्तनकारी छ र जीवन, पेशा, रोजगारी लगायतका क्षेत्रमा आमूल परिवर्तन आएको छ’ उहाँले भन्नुभयो ‘अभिभावकले संस्कार र श्रमको मूल्य नानिबाबुलाई बुझाउनुपर्छ ।’
बिद्यालयले कितावी ज्ञानलाई मात्र जोड नदिएर कला, संस्कृति, कौशल, प्रविधि श्रमको सम्मान तथा विद्यार्थीकाे सर्बाङ्गीण विकासमा जोड दिएकोमा प्रशंसनीय रहेकाे उहाँले बताउनु भयो । ‘हामीले नानीबाबुलाई किताबमात्र होइन जीवन पढाउनुपर्छ । शैक्षिक प्रमाणपत्रहरू कागजी दस्ताबेजमात्र हुन्’ उहाँले भन्नुभयो ‘वास्तविक जीवन भिन्न हुन्छ । नानीबाबुहरू कर्मशील, अनुशासित, इमान्दार, ज्ञानी, बिबेकी, सकारात्मक सोच र चरित्रशीलता जस्ता गुणहरू अबलम्बन गर्ने सिकाइ हुनुपर्दछ ।’ बिद्यार्थी स्वयम्,अभिभावक, विद्यालय र समाज लगायत सबै मिलेर अघि बढे विद्यार्थीकाे भविश्य सुन्दर हुने उहाँले बताउनु भयो ।
‘संसारका हरेक पत्थरहरू मूर्ति बन्न लायक हुन्छन् तर ती पत्थरहरू असल कालिगढको हातमा पर्नुपर्छ’ उहाँले भन्नुभयो शिक्षकहरु, विद्यालय प्रशासन, व्यवस्थापन समिति,अभिभावक तथा समुदाय आफ्नो कालिगढी सिपमा अझै पोख्त हुनु पर्छ ।’ हाम्रो सरोकार हाम्रा नानीबाबुको उज्ज्वल भविश्य भएकाे उहाँले बताउनु भयो । ‘मनकारी दाताहरूको सहयोगले विद्यालयको समग्र परिवेशमा सकारात्मक उर्जा थप्न मद्दत पुर्याउँछ’ उहाँले भन्नुभयो ‘मन फुकाएर गर्नुभएको सहयोगले भविष्यका कर्णधारहरूको जग थप मजबुत हुन्छ ।’ शिक्षाको लगानी उत्कृष्ट लगानी भएकाे बताउँदै उहाँले भन्नुभयो ‘शिक्षाले व्यक्ति, समाज, राष्ट्र र समग्र मानव समाजलाई असल मार्गमा डोर्याउँछ । शिक्षा उज्यालोतिरको यात्रा हो ।’
वार्षिकाेत्सव कार्यक्रममा प्रदेश प्रमुख देवकाेटाले शिक्षाप्रेमीहरूको सालिक समेत अनावरण गर्नु भएकाे थियाे । विद्यालयले विभिन्न क्षेत्रका व्यक्तित्वलाई पुरस्कृत र सम्मानित गरेकाे छ ।
नमस्ते झरना सिम्सुवा, धनकुटा । धनकुटा जिल्लामा रहेकाे नमस्ते झरना पर्यटकको गन्तव्य बन्न थालेको छ । जिल्लाकाे साँगुरीगढी गाउँपालिका सिम्सुवा खोलाको अनकन्टार ठाउँमा रहेकाे झरना भएकाे स्थानमा जान डराउनेमा अहिले हुलका हुल पर्यटक जान थालेका छन्।
धरान धनकुटा मार्गकाे सिम्सुवाबाट झरना सम्म जान २ किमि पैदल जानु पर्छ । अनकान्टार ठाउँमा रहेकाे झरना हेर्न विदाकाे दिन अहिले दैनिक १ हजारसम्म पर्यटक आउने गरेकाे झरना व्यवस्थापन समितिले जनाएकाे छ । धरान धनकुटा मार्ग भएर यात्रा गर्नेलाई झरनाले तान्ने गरेकाे छ । धनकुटाकाे भेडेटारबाट ८ किमि उत्तरमा नमस्ते झरना रहेकाे छ ।
करिब ८० मिटर उचाइबाट झरेको पानीको फोहरा तथा चल्ने बतासले झरनाकाे फोहाेरालाई यत्रतत्र घुमाइदिदा उकालाे चढेर गएका पर्यटकले सितलता महसुस गर्छन् । आन्तरिक पर्यटकहरुको भिड लाग्ने गरेको झरना अवलोकल गर्न छिमेकी भारतबाट समेत पर्टक आउने गरेका छन् । साथै नेपालको विभिन्न स्थानबाट समेत गरी दैनिक करिब ४०० जना पर्यटक आउने गरेको झरना व्यवस्थापन तथा सरसफाई समितिले जनाएकाे छ ।
भेंडेटार हुँदै पुर्वका हिले तेह्रथुम फिदिम घुम्न आएका हेटौंडाका सन्ध्या आचार्यले यतिका बाटो पुर्व आएपछी झरनामा नआएको भए यात्रा अधुरै रहने बताइन् । नमस्ते झरनामा किशोर–किशोरीदेखि उमेर ढल्किँदै गरेकाहरु पनि पुग्ने गरेको छन्। राजमार्ग नजिकै रहेकाले प्रेमिल जोडीहरुको पनि यहाँ घुइँचो लाग्ने गरेको छ। तराईमा गर्मी छल्न झरनामा पर्यटकको बाक्लो आगमन हुन गर्दछ। शैक्षिक भ्रमण, वनभोजजस्ता कार्यक्रम झरना छेउछाउमा हुने गरेका छन्।

तत्कालिन भेडेटार गाविस, जिल्ला विकास कार्यालय धनकुटा, पर्यटन कार्यालय, पूर्वी सहरी विकास डिभिजन कार्यालय धनकुटा र सिम नेपाल धरानको सहकार्यमा पर्यटक भित्र्याउने उद्देश्यले ०६७ बाट झरनालाई पर्यटकीय गन्तव्यका रुपमा सञ्चालनमा ल्याइएको हो। झरना सञ्चालनमा आएपछि स्थानीय स्तरमा उत्पादित सागसब्जी, फलफूललगायत कृषिजन्य वस्तु गाउँमै बिक्री हुन थालेको स्थानीयको भनाइ छ।
झरनाको प्रवेशद्वार वरपर साना ठूला गरी दर्जन बढी होटल सञ्चालनमा छन्। झरनासम्म जाने बाटो बार सहित बनाइएकाे छ । पर्यटन विकास कार्यालय र होटल एसोसियसन भेंडेटारले झरनाको प्रचारप्रसार र प्रवर्द्धन गरिरहेका छन्। पर्यटन विकास कार्यालयको सहयोगमा झरना नजिकै कपडा फेर्नका लागि ‘चेञ्जिङ रुम’ निर्माण गरिएको छ। नमस्ते झरना आम्दानीको स्रोत बनेको छ। झरना प्रवेश शुल्कबाट वार्षिक अढाई लाख रुपैयाँभन्दा बढस् राजस्व संकलन हुने गरेको झरना व्यवस्थापन समितिले जानकारी दिएकाे छ।
राजमार्गबाट २ किमि मात्र टाढा रहेकाे झरनासम्म जान पहिले पहिरोको डर, खोल्सीमा भालु सिस्नुको डर र एकान्त छाँगो भएकोले जो कोही एक्लै दुक्लै कोही नजाने गरेकाे स्थानीय दिपा लिम्बु बताउँछन् । यो झरनाको शीरलाई लिम्बूनी लोहोसे भनिन्छ । उक्त झरना नमस्ते बाजे समेत भनेर चिनिने स्थानीय गोबिन्द राज लिम्बूको घर छेउबाट हेर्ने हो भने प्रकृति प्रेमी मन्त्रमुग्न हुन्छन । झरना सम्बन्धी अनुसन्धान गर्ने अनुसन्धानकर्ताको लागि सुगम स्थान तर चुनौतीपूर्ण खोच पनि हो ।
यो झरना हेर्न जति नजिक गयो त्यति हराउदै जान्छ । अग्लो ठाउँबाट झर्ने भएकाेले तलबाट माथि सम्मदेख्न सकिदैन् । उक्त स्थान हेर्नलाई सिम्सुवा मोडबाट खोला भएर उकालो लागेर झरना नजिक पुग्न सकिन्छ । अत्यन्तै रमणीय भेडेटार हुँदै हरियाली जङ्गलकाे उकालाे हुँदै त्यहाँ पुग्दा झरनाको सप्तरङ्गी इन्द्रणीको दृष्य हेर्न पाइन्छ ।

झरनाकै कारण सो क्षेत्रमा आर्थिक चहलपहल समेत निकै बढेको छ । १३ बर्षको अबधिमा झरनाको प्रवेशद्वार नजिकै साना ठूला गरी एक दर्जनभन्दा बढी होटल सञ्चालनमा छन् । प्रत्येक होटलले दैनिक १० देखि ५० हजार सम्म कारोवार गदै आएका छन् । पहिलेका तुलनामा होटलमा कारोवार फस्टाएपछि ब्यवसायी समेत निक्कै उत्साहित देखिएका छन् । हाेटल व्यवसायी लक्ष्मी राईले भनिन् ‘झरनाकाे कारण खुलेका हाेटलका कारण दैनिक गुजारा चलेकाे छ अर्काे काम गर्नु पर्ने आवश्यकता परेकाे छैन ।’
झरनाको थप महत्व बढाउन क्याननिङ, पिकनिक स्पोटर्, पोखरी निर्माण गर्ने तथा झरनाको स्रोत संरक्षण हुने संकेत देखिएको छ । धनकुटाको भेडेटार तथा नाम्जेपछि पर्यटकहरुले प्राकृतिक नमस्ते झरनालाई आफ्नो गन्तव्य बनाउन थालेका हुन् ।
पूर्वको प्रमुख पर्यटकीयस्थल बन्दै गएको नमस्ते झरना पुग्न भेडेटारदेखि धनकुटा बजारतर्फ करिव ८ किलोमिटरको यात्रा गरिसकेपछी सिम्सुवा मोड पुगिन्छ । त्यहाँबाट करिव २ किमिको बाटो पैदल हिडेपछि झरना भएको स्थानना पुग्न सकिन्छ । मध्यपहाडी मार्ग हुँदै यात्रा गर्नेहरु हिलेबाट धनकुटा बजार हुँदै २६ किमिको यात्रा गरेपछि सिम्सुवा हुँदै झरना पुग्न सक्छन् ।
झरनाकै कारण सो क्षेत्रका सयैले प्रत्यक्ष र अप्रत्यक्ष रुपमा रोजगारी समेत पाएका छन् । पर्यटकीय स्थलमा पुर्वाधारहरु निर्माण गरि प्रचार–प्रसार समेत गर्न सके पर्यटकीय सम्भावना बलियो हुने देखिन्छ ।
मकवानपुर । मकवानपुरको कैलाश गाउँपालिकामा अध्यक्ष कप फुटबल प्रतियोगिता हुने भएको छ । कैलाश गाउँपालिकाको आयोजना तथा पालिका खेलकुद विकास समितिको व्यवस्थापनमा १४–१७ फागुनसम्म तेस्रो संस्करणको अध्यक्ष कप फुटबल प्रतियोगिता हुने भएको हो ।
पालिका खेलकुद विकास समिति संयोजक मोहन वाइबाले जारी गरेकाे सूचनामा प्रतियोगिताको बारे जानकारी गराइएकाे छ ।‘९’ए साइड नकआउट प्रतियोगितमा सहभागी हुन गाउँपालिकाको वडाका स्थायी, स्थानीय बासिन्दा हुनुपर्ने सूचनामा उल्लेख छ । प्रतियोगिताको उपाधि विजेता टिमले १ लाख रुपैयाँ हात पार्ने छन् ।
यसैगरी उपविजेता टिमले ६० हजार रुपैयाँ प्राप्त गर्नेछन् भने सेमिफाइनल प्रवेश गरी पराजित हुने टिमलाई १० हजार रुपैयाँ नगद प्रदान गरिनेछ । यस संस्करणबाट सहभागी टिम मध्ये अनुशासित टिमलाई समेत १० हजार प्रोत्साहन पुरस्कार प्रदान गरिने भएकाे छ । विधागत उत्कृष्ट खेलाडीहरुका लागि पनि पुरस्कारको व्यवस्था गरिएको आयोजकले जनाएको छ ।
अध्यक्ष वाइबाद्वारा हस्ताक्षरित सूचनामा तेस्रो उपाध्यक्षकप भलिबल प्रतियोगिता २६–२८ फागुन २०८१ सम्म संचालन गर्ने भनिएकाेमा उक्त प्रतियोगितामा मिति ८–१० चैत २०८१ सम्म संचालन गरिने जानकारी गराइएकाे छ ।
मकवानपुर । मकवानपुरकाे हेटौंडामा अण्डर १६ फुटबल प्रतियोगिता हुने भएकाे छ । हेटौंडा उपमहानगरपालिका नगर खेलकुद विकास समितिकाे आयोजनामा अनुपम घलान स्मृति अन्डर १६ फुटबल प्रतियोगिता २०८१ हुने भएकाे हाे ।
नगर खेलकुद विकास समितिले शुक्रबार पत्रकार सम्मेलन गरी प्रतियाेगिता सम्बन्धी जानकारी गराएकाे हाे । हेटौंडा १२ निवासी अनुपम घलानकाे १३ वर्षको उमेरमा १२ असोज २०८१ मा इन्द्रसरोवर गाउँपालिका-३, सिस्नेरीमा पहिरोमा परी निधन भएको थियो। घलानको निधनपछि उनकाे स्मृतिमा १६ बर्ष मुनीको फुटबल टीम वीच प्रतियोगिता आयोजना गर्न लागिएको नगर खेलकुद विकास समिति हेटौंडाका अध्यक्ष रविन्द्र प्रसाद घिमिरेले जानकारी दिए ।
हेटौंडा उपमहानगरपालिकाकाे आर्थिक सहयोग तथा नगर खेलकुद विकास समितिकाे व्यवस्थापनमा हुने प्रतियोगिता ७ फागुनबाट हेटौंडा ५ स्थित पिप्ले क्याम्पा रंगशालामा प्रतियोगित हुनेछ । प्रतियोगितामा प्रथम हुने टिमले १ लाख रुपैया प्राप्त गर्ने छन् भने द्वितीय हुने टिमले ७० हजार रुपैया हात पार्ने छन् । यसैगरी विधागत रुपमा उत्कृष्ट तर्फ समेत पुरस्कारकाे व्यवस्था गरिएकाे छ । सर्वोत्कृष्ठ खेलाडी, उत्कृष्ठ फरवार्ड, उत्कृष्ठ किपर, उत्कृष्ठ प्रशिक्षक, उत्कृष्ट डिफेन्सले जनही ५/५ हजार रुपैंया प्राप्त गर्नेछन् । फिफाकाे नियमानुसार प्रतियाेगिता नक आउटका आधारमा खेलाइने घिमिरे बताए ।
प्रतियोगितामा हेटौंडा उपमहानगरपालिका भित्रका वडाहरुबाट १२ टिमकाे सहभागिता रहने बताइएकाे छ । उक्त प्रतियोगिताले आगामी वर्षबाट निरन्तरता पाउने समेत उनले जानकारी दिए । प्रतियोगितामा सहभागी हुने टिमकाे सम्बन्धित वडाबाट सिफारिस हुनु पर्ने, प्रत्येक खेलाडी १६ बर्ष उमेर ननाघेको हुनुपर्ने, खेलाडी सम्बन्धित वडाको स्थायी वासिन्दा हुनुपर्ने, खेलाडीकाे जन्मदर्ता अनिवार्य पेश गर्नु पर्ने, अन्य स्थानकाे भए बसाइसराईकाे प्रमाणपत्र अनिवार्य हुनु पर्ने लगायत छन् । सहभागी टिम दर्ता ४ फागुन सम्म नगर खेलकुद विकास समितिमा गर्नुपर्ने बताइएकाे छ ।
हेटौंडा उपमहानगरपालिका वडा नम्बर १२ निवासी घलान अखिल नेपाल फुटबल संघ (एन्फा) द्वारा सञ्चालित सिस्नेरीस्थित वात्सला देवी माविको प्रशिक्षण केन्द्रमा फुटवल प्रशिक्षण लिइरहेका थिए । उनको १३ वर्षको उमेरमा १२ असोज २०८१ मा जिल्लाकाे इन्द्रसरोवर गाउँपालिका-३, सिस्नेरीमा पहिरोमा परी निधन भएको थियो । अविरल वर्षका कारण कुलेखानी जलाशय भरिदा ढोका खाेलिए पछि बाढीको जोखिमका कारण एकेडेमी भएकाे स्थानबाट सुरक्षित स्थानतर्फ जाँदै गर्दा घलानसहित ६ जनाकाे पहिरोमा परी मृत्यु भएकाे थियाे ।
नगर खेलकुद विकास समिति अध्यक्ष रविन्द्र घिमिरेकाे सभाध्यक्षतामा भएकाे पत्रकार सम्मेलनमा नगर खेलकुद विकास समितिका सदस्यहरु लगायतकाकाे उपस्थिति रहेकाे थियाे ।
मकवानपुर । सिन्धुलीमा गाडी दुर्घटना हुँदा एक जनाको मृत्यु भएको छ भने अन्य पाँचजना घाइते भएका छन् । जिल्ला प्रहरी कार्यालय सिन्धुलीका अनुसार दुर्घटनामा दोलखाको गौरीशंकरका २८ वर्षीय सुशान्त नेपालीको मृत्यु भएको छ।
झापाबाट काठमाडौँ जान आउँदै गरेकाे बागमती प्रदेश ०१-०३० च ९६४२ नम्बरकाे गाडी सिन्धुलीको गोलञ्जोर गाउँपालिका- ५ स्थित बीपी राजमार्गमा शुक्रबा बिहान पौने पाँचबजे सडकबाट झण्डै चारसय मिटर तल खसेर दुर्घटना भएको थियाे।
उक्त दुर्घटनामा घाइते हुनेहरुमा इलामको देउमाई- ८ का ५३ वर्षीय सनबाहादुर तामाङ, मोरङको लेटाङ- २ की ३४ वर्षीया देवी लिम्बू, काठमाडौँको कागेश्वरी मनोहरा- ५ की २८ वर्षीया श्वेता गिरी, सोही ठाउँमा २८ वर्षीय सञ्जय रोका र झापाकाे बारादशी- १ का २७ वर्षीय तिस्कु मण्डल रहेका छन्।
घाइतेमध्ये मोरङ लेटाङकी देवी लिम्बूको अवस्था गम्भीर रहेको प्रहरीले जनाएकाे छ । घाइतेहरुकाे जिल्ला अस्पताल सिन्धुलीमा उपचार भइरहेको प्रहरीले जनाएकाे छ। ‘गम्भीर घाइतेलाई थप उपचारको लागि काठमाडौँ पठाउने तयारी भइरहेकाे बताइएकाे छ ।
गाडी आफैँ अनियन्त्रित भई दुर्घटना भएको प्रहरीले प्रारम्भिक अनुमान गरेको छ भने दुर्घटना भएकाे गाडी चालककाे पहिचान खुलेकाे छैन ।