मकवानपुर । माझी समुदायकाे पर्व लदी २० फागुनमा बकैयामा मनाइने भएकाे छ । आइतबार हेटौंडामा पत्रकार भेटघाट गर्दै नेपाल माझी उत्थान संघ केन्द्रिय समितिले पर्व मनाउने सम्बन्धमा जानकारी गराएकाे हाे ।
पत्रकार भेटघाटमा संघ केन्द्रिय समिति अध्यक्ष चिनिमाया माझीले नेपालमा बासोबास गर्ने माझी समुदायहरुको महान पर्व लदि (कोसी) पुजाको जानकारी गराउँदै उक्त पर्व २० फागुन मंगलबार मनाइने जानकारी दिइन् । बकैया गाउँपालिका वडा नम्बर ६ जुइनामा मनाइने पर्वकाे उद्घाटन बागमती प्रदेशका मुख्यमन्त्री बहादुर सिंह लामाले गर्ने बताइएकाे छ ।
सरकारले आदिवासी जनजातिको बर्गिकरणमा अतिसिमान्तकृत जातिमा वर्गीकरण गरेको माझी जातिको जनसंख्या १ लाख ११ हजार ३५२ रहेको छ । माझी जातिले भारोपेली भाषा परिवार अन्तर्गतकाे माझी भाषा बाेल्ने गर्छन् । सुनकोशी, तामाकोशी, दुधकोशी क्षेत्रहरुमा माझी भाषा बढी बाेलिने गरेकाे छ । २०७८ सालकाे राष्ट्रिय जनगणनामा उक्त भाषा बोल्नेको संख्या ३२ हजार ९१७ रहेको छ ।
बकैया गाउँपालिकाले दियो पर्वकाे अवसरमा सार्वजनिक विदा
माझी समुदायको प्रमुख पर्व कोशी पूजा (लदी पर्व) को अवसरमा २० फागुन मंगलबार बकैया गाउँपालिकाले सार्वजनिक विदा दिने निर्णय गरेको छ । गाउँपालिकाले आइतबार सूचना जारी गर्दै लदी पर्वको अवसरमा विदा दिने जानकारी गराएको हो ।
बकैया गाउँपालिका कार्यालयकाे १३ फागुनकाे बैठकबाट लदी पर्वको अवसरमा विदा दिने निर्णय गरेको थियाे । मंगलबार गाउँ कार्यपालिकाको कार्यालय, गाउँ कार्यपालिका अन्तर्गतका वडा कार्यालय, स्वास्थ्य संस्था तथा शैक्षिक संस्थाहरुमा स्थानीय विदा दिने निर्णय गरिएको प्रमुख प्रशासकीय अधिकृत महेश श्रेष्ठले जारी गरेकाे सूचनामा उल्लेख छ ।

लदी पर्व सम्बन्धी जानकारीसहितकाे प्रेस विज्ञप्ती यहाँबाट पढ्न सक्नु हुनेछ
मकवानपुर । मकवानपुरकाे हेटौंडामा राष्ट्रिय हेटौंडा भेट्रान्स कप फुटबल प्रतियोगीता हुने भएकाे छ । २२ फागुनबाट दशौं राष्ट्रिय हेटौंडा भेट्रान्स कप ८ ए साइट रनिङ शिल्ड प्रतियाेगिता हुने भएकाे हाे ।
आयोजक संस्था हेटौंडा भेट्रान्स क्लबले आइतबार पत्रकार भेटघाट गरी प्रतियोगिताकाे जानकारी गराएकाे हाे । २६ फागुनसम्म हेटौंडाकाे हुप्रचौरमा आयोजना हुने प्रतियोगिताकाे उपाधी विजेता टोलीले १ लाख ५० हजार ५ सय ५५ रुपैंया नगद प्राप्त गर्ने छन् । यसैगरी प्रतियाेगिताकाे उपविजेता टोलीले ७५ हजार ५ सय ४४ रुपैंया हात पार्ने संयोजक मणिराज गौतमले जानकारी दिए ।
प्रतियोगितामा विभिन्न विधागत पुरस्कारकाे समेत व्यवस्था गरिएकाे गौतमले बताए । उनका अनुसार प्रतियोगिताका सर्वश्रेष्ठ कोच, उत्कृष्ट फरवार्ड, उत्कृष्ट गोलकिपर, उत्कृष्ट डिफेन्स, उत्कृष्ट मिडफिल्डर विधामा पुरस्कार प्रदान गरिने छ । उक्त विधागत उत्कृष्ठ हुनेलाई जनही ५ हजार रुपैंया नगद प्रदान गरिने उनले जानकारी दिए । यस्तै प्रतियाेगिताकाे म्यान अफ द सिरिजले १० हजार रुपैंया प्राप्त गर्ने छन् ।
प्रतियोगितामा हेटौंडाकाे २ वटासहित १४ वटा भेट्रान्स क्लबले सहभागिता जनाउने आयोजक क्लबका अध्यक्ष रमेशकुमार उप्रेती जानकारी दिए । दशौं संस्करणकाे हेटौंडा भेट्रान्स कप प्रतियाेगितामा वीरगञ्ज युथ भेट्रान्स क्लब (पर्सा), सिमरा भेट्रान्स क्लब (बारा), चितवन भेट्रान्स क्लब (चितवन), वगरभाई खलक भेट्रान्स क्लब (पोखरा कास्की), एबीसी भेट्रान्स क्लब (पोखरा), बुटवल भेट्रान्स क्लब (रुपन्देही), थापागाउँ भेट्रान्स क्लब (काठमाडौं), किंङकम भेट्रान्स क्लब (काठमाडौं), बौद्ध भेट्रान्स क्लब (काठमाडौं), फ्रिडम फाइटर भेट्रान्स क्लब (काठमाडौं), हेटौडा भेट्रान्स क्लब (आयोजक),नागस्वती भेट्रान्स क्लब (हेटौंडा), बानेश्वर फ्रेण्डसीप भेट्रान्स क्लब (काठमाडौं) र एन जे. जे.भी.सी. (सिमरा बारा) काे सहभागिता रहने उनले बताए ।
नवौं संस्करणकाे उपाधी काठमाडौंकाे बानेश्वर फ्रेण्डसीप भेट्रान्स क्लबले हात पारेकाे थियाे । भेट्रान्स प्रतियोगिताकाे पहिलाे र दोस्राे संस्करणकाे उपाधी चितवन भेट्रान्स क्लब चितवनले हात पारेकाे थियाे । सानो गौचरणनाईट किंग क्लव काठमाडौंले तेस्रो संस्करण, बगरभाई खलक भेट्रान्स क्लब पोखराले चौथो र छैटौं संस्करण, एवीसी भेट्रान्स क्लब पोखराले पाँचौ साताैं र आठौं संस्करणकाे उपाधी जितेकाे थियाे ।
प्रतियोगिताकाे लागि १२ लाख रुपैयाँ खर्च हुने अनुमान आयोजकले गरेकाे छ । प्रतियोगितामा मुख्य सहयोगीका रुपमा हेटौंडा उपमहानगरपालिका रहने छ भने हेटौंडा स्कूल अफ म्यानेजमेन्टका साथै जिल्लाका अन्य पालिकाहरु संघ संस्था तथा समाजसेवी, फुटबल खेलप्रेमीहरुको साथ सहयोग रहेकाे गौतमले जानकारी दिए ।
२०७२ सालबाट रोटरी क्लव अफ मकवानपुरसँगको सहकार्यबाट सुरु गरिएको प्रतियोगिता २०७४ साल देखि हेटौंडा भेट्रान्स क्लब आयोजक भई हेटौंडा भेट्रान्स कप ८ ए साईड राष्ट्रिय फुटबल प्रतियोगीता संचालन हुँदै आएकाे संयोजक गौतमले जानकारी दिए । स्वास्थ्यका लागि खेलकुद भन्ने नाराका साथ क्लबले गतवर्ष देखी ४५ वर्ष माथि उमेर समुहमा प्रतियोगिता आयोजना गर्दै आएको उनले बताए । यस वर्षपनि ४५ वर्ष माथि उमेर समुहमा खेल खेलाईने बताइएकाे छ ।
पछिल्लो समय फुटबल खेल क्षेत्रमा भेट्रान्स खेलाडीहरुको सक्रियता उत्साहजनक भईरहेको, देशैभर ४० वर्ष माथि उमेर समूहका पूर्व राष्ट्रिय खेलाडीहरु भेट्रान्स खेलमा आकर्षण बढ्दो रुपमा रहेकाे, ४० वर्ष माथि उमेर समूहको भेट्रान्स फुटबल प्रतियोगिताले देशैभर रौनकता थप्दै आएको अवस्थामा भेट्रान्स प्रतियोगिताले पूर्व खेलाडीहरुको सम्बन्ध विस्तार र भाइचाराको सम्बन्ध प्रगाढ बनाउने उदेश्यले यो प्रतियाेगिता आयोजना गर्न लागिएकाे अध्यक्ष उप्रतीले जानकारी दिए ।
मकवानपुर । मकवानपुरकाे हेटौंडा उपमहानगरपालिका वडा नम्बर १२ पदमपोखरीमा राष्ट्रिय विभूति शङ्खधर शाख्व पार्ककाे शिलान्यास गरिएकाे छ । बागमती प्रदेश सभा सदस्य एकालाल श्रेष्ठले शिलान्यास गरेकाे उक्त पार्कमा शाख्वकाे प्रतिमा स्थापना तथा पूर्वाधार निर्माण समेत हुनेछ ।
पार्क शिलान्यास गर्दै श्रेष्ठले शङ्खधर शाख्वाको योगदानलाई राष्ट्रिय तथा अन्तर्राष्ट्रिय स्तरमा प्रचार गर्न आवश्यक रहेको बताए। ‘पार्कलाई नेपालकै ठूलो तथा नमूना पार्कका रूपमा विकास गर्नुपर्ने आवश्यकता छ’ उनले भने । यसका लागि पर्खाल, गेट, शङ्खधर शाख्वाको प्रतिमा, पोखरी, ढुङ्गेधारा लगायतका पूर्वाधार निर्माण गर्नुपर्ने उनले बताए ।
करिब चार बिगाहा क्षेत्रफलमा फैलिएको उक्त क्षेत्रलाई पदमपोखरीकै सांस्कृतिक तथा पर्यटकीय गन्तव्यका रूपमा विकास गर्न सकिने उनकाे भनाई थियाे । ‘पदमपोखरी आसपासका विभिन्न समुदायको संस्कृति जोडेर पार्कलाई विकास गर्न सकिन्छ’ उनले भने ‘सरकारले मात्र नभई स्थानीयस्तरबाट पनि सचेतना आवश्यक छ ।’ जनस्तरबाट चासो र योगदान दिए मात्रै पदमपोखरीको वास्तविक विकास सम्भव रहेकाे उनले बताए ।
स्थानीय राजेश नगरकोटीले पार्कलाई नेपालकै नमूना बनाउने प्रतिबद्धता जनाउँदै मास्टर प्लान तयार पार्न अझै केही काम बाँकी रहेको जानकारी दिए । ‘यो सुरुवात हो, थप योजना बनाएर शङ्खधर शाख्वा पार्कलाई नेपालकै उत्कृष्ट बनाउने छौँ’ उनले भने ।
नेवा गुठी खलः पदमपोखरीका अध्यक्ष कृष्ण नगरकोटीले पदमपोखरी क्षेत्रलाई ऐतिहासिक, सांस्कृतिक तथा पर्यटकीय दृष्टिले महत्वपूर्ण क्षेत्रका रूपमा विकास गर्न सकिने बताए । ‘पदमपोखरीका विभिन्न स्थानमा थातथलो पूजा गर्दै यसको सांस्कृतिक महत्व उजागर गरिनुपर्छ’ उनले भने ।
नेवा गुठी खल मकवानपुरका अध्यक्ष अनिल खड्गेले स्थानीय बासिन्दा तथा सरोकारवालाहरूले शङ्खधर शाख्वा पार्कको विकासका लागि निरन्तर प्रयास गर्नुपर्ने बताए । सरकारले आवश्यक बजेट तथा नीति ल्याएमा पार्क छिट्टै निर्माण सम्पन्न हुने उनले बताए । समाजसेवी सिताराम प्रधानले पदमपोखरीको विकासका लागि सबै पक्षको सहकार्य आवश्यक रहेको बताए।
बागमती प्रदेशको सस्कृती तथा पर्यटन मन्त्रालयको ७५ लाख बजेट एवम् स्थानीय श्रमदान गरी ८३ लाख ३६ हजारमा सो योजना निर्माण गर्न लागिएको हो । नेपाल सरकारले ३ मंसिर २०५६ मा नेपाल संवतका प्रवर्तक शाख्वालाई राष्ट्रिय बिभुती घोषणा गरेको हो । उनले वि. सं. ९३६ मा कान्तिपुर र भादगाउँ का जनताको सम्पूर्ण ऋण तिरी नेपाल सम्बतको थालनी गरेका थिए।
नेवा गुठी खलः पदमपोखरीका अध्यक्ष कृष्ण नगरकोटीको सभाध्यक्षता तथा बागमती प्रदेशसभा सदस्य तथा पूर्वमन्त्री एकालाल श्रेष्ठकाे प्रमुख आतिथ्यतामा शिलान्यास कार्यक्रम भएकाे हाे ।
मकवानपुर । बागमती प्रदेशका मुख्यमन्त्री बहादुरसिंह लामा तामाङले राज्यले गर्नुपर्ने धेरै काम यातायात व्यावसायी आफैँले गरिरहेको बताएका छन् । नारायणी यातायात व्यावसायी सङ्घको ३६औँ वार्षिक साधारणसभा तथा १६ औँ अधिवेशन उद्घाटन समारोहलाई शनिबार हेटौँडामा सम्बोधन गर्दै उनले यस्तो बताएका हुन् । ‘यातायातमा भएका समस्या समाधान गर्न प्रदेश सकार तयार छ रहेकाे बताउँदै उनले भने यसकाे लागि नियम कानुन संशोधन गरिनु पर्छ । रोड परमिट, सवारी जाँचपास र नवीकरणलाई प्रविधिमैत्री बनाउन छलफल अगाडि बढाउन प्रदेश सरकार तयार रहेको उनले बताए । ‘विदेशमा भएको प्रणाली (सिस्टम) प्रदेशमा पनि कार्यान्वयनमा ल्याउनुपर्छ’ उनले भने ‘दुर्घटना तथा बिमासम्बन्धी ऐनमा आवश्यक संशोधन गर्न प्रदेश सरकारले आवश्यक सहजीकरण गर्नेछ ।’
साधारणसभामा बागमती प्रदेश सरकार श्रम रोजगार तथा यातायात मन्त्री प्रेमभक्त महर्जनले बागमती प्रदेशको ३० प्रतिशत राजश्वमा यातायात क्षेत्रले योगदान गरिरहेको बताए । २२ लाख सवारी चालक अनुमति पत्र नागरिक एपमा राखिएको जानकारी दिदैं उनले भने ‘अनलाइनबाटै राजस्व तिर्ने, नवीकरण गर्ने र नामसारी गर्ने व्यवस्था मिलाउने तयारीमा प्रदेश सरकार लागिपरेकाे छ ।’
कार्यक्रममा संघ अध्यक्ष हीरालाल श्रेष्ठले सेवामूलक संस्था भएर पनि संघले नेपाल सरकारलाई कर तिर्दै आइरहेको बताए । हेटौँडामा मुख्य कार्यालय रहेको नारायणी यातायात व्यावसायी संघले चितवनको रामनगरमा रहेको जग्गा बिक्री गरी कर तिर्ने तयारी गरिरहेको छ । ‘नेपाल सरकारलाई कर तिर्नु पर्दा आर्थिक अभाव भएका कारण भरतपुरको रामनगरमा रहेको जग्गा बिक्री गरेर कर चुक्ता गर्ने विषयमा छलफल भइरहेको छ’ उनले भने ।
करिब २ करोड रुपियाँ कर तिर्नुपर्ने भएपछि संघ भौतिक सम्पत्ति बिक्री गरेर मात्रै कर चुक्ता गर्न सकिने अवस्था रहेको उनले जानकारी दिए । २०७५ फागुन १९ गतेको राजपत्रमा प्रकाशित केही नेपाल ऐनलाई संशोधन गर्न बनेको ऐन अनुसार नारायणी यातायात व्यावसायी संघको रूपान्तरित कम्पनीको रूपमा स्थापना भएको पुरानो नारायणी यातायात कम्पनी प्रालि दर्ता गरेर संघका नेतृत्वले व्यावसयीका दुर्घटना, बिमा दायित्वलगायत विषयमा काम गर्न थालेको उनले जानकारी दिए । ढुवानी तथा तौलपुल बन्द गर्न सरकारी संयन्त्र नै अग्रसर भएको उनले बताए ।
संविधान सभा सदस्य अनन्त पौडेल, प्रदेश सभा सदस्य इन्द्रबहादुर बानियाँ, प्रेमबहादुर पुलामी, प्रमुख जिल्ला अधिकारी स्किम श्रेष्ठ, मकवानपुर उद्योग वाणिज्य सङ्घका अध्यक्ष प्रमोद सिंह रानाभाट लगायतले यातायात सम्बन्धी समस्या समाधान गर्न आवश्यक सहयोग र सहकार्य गर्न आआफ्नो क्षेत्रबाट तयार रहेको बताएका छन् ।
हेटौंडामा मुख्यालय रहेको मानवसेवा आश्रमलाई हरेक साधारणसभामा सहयोग गर्दै आएको संघले यो वर्ष ५१ हजार नगर रुपियाँ सहयोग गरेको छ । त्यसैगरी लामो समयदेखि यातायात दुर्घटना नगराउने ५ जना चालकलाई जनही १० हजार रुपियाँ नगरसहित सम्मान गरिएको छ । सम्मान हुने चालकहरुमा हेटौंडाका अर्जुन भुर्तेल, ध्रुवलाल श्रेष्ठ, काठमाडौंका सुरेश श्रेष्ठ, चितवनका भोला थापा र रौतहटका रामपुकार राय छन् ।
साधारणसभाकाे अवसरमा नेपाल मेडिसिटी अस्पताल काठमाडौंका विशेषज्ञ डाक्टरसहितकाे टोलीले व्यावसायी तथा स्थानीयकाे स्वास्थ्य परीक्षण समेत गरेको थियो । कार्यक्रमलाई संघका महासचिव सरोज खनालले सहजिकरण गरेका थिए ।
मकवानपुर । साहित्यकार माया ठकुरीसहित ११ जना हेटौंडामा सम्मानित भएका छन् । भीम विराग सङ्गीत साहित्य कला प्रतिष्ठान नेपालले शनिबार ठकुरीसहित ११ जना व्यक्तित्वलाई विभिन्न पुरस्कारबाट सम्मानित गरेको हाे ।
भीम विराग राष्ट्रिय साहित्य पुरस्कार, २०८१ बाट काठमाडौंका साहित्यकार ठकुरी सम्मानित भएकी छिन् । २५ हजार रुपैंया राशीकाे पुरस्कारबाट ठकुरी सम्मानित भएकी हुन् । यसैगरी भीम विराग राष्ट्रिय सङ्गीत पुरस्कार, २०८१ बाट गायक हेमन्त शर्मा (रुपन्देही) सम्मानित भएका छन् । भीम विराग राष्ट्रिय कला पुरस्कार, २०८१ कलाकार भोलाराज सापकोटा (मकवानपुर) लाई प्रदान गरिएकाे छ भने भीम विराग राष्ट्रिय पत्रकारिता पुरस्कार, २०८१ पत्रकार ठाकुर बेल्वासे (काठमाडौं) लाई प्रदान गरिएकाे छ । उक्त पुरस्कारहरुकाे राशी जनही २५/२५ हजार रुपैंया रहेकाे छ ।
वरिष्ठ कलासाधक भीम विराग सक्रिय रहेकाे साहित्य, सङ्गीत, कला र पत्रकारिता चारवटै क्षेत्रलाई समेटेर हेटौंडा उपमहानगरपालिकाको आर्थिक सहयोगमा प्रतिष्ठानले उल्लेखित पुरस्कार गत वर्ष स्थापना गरेको हाे । यस वर्षबाट प्रतिष्ठान उक्त पुरस्कार प्रदान गरेको हाे । यस्तै प्रतिष्ठानले विगत वर्षहरूदेखि नै भाषा, कला, सङ्गीत तथा विभिन्न सामाजिक क्षेत्रमा क्रियाशील व्यक्तित्वहरूलाई प्रदान गर्दै आइरहेका विभिन्न ७ वटा पुरस्कार तथा सम्मान समेत शनिबार प्रदान गरेकाे छ ।
तुलसीमाया शिवकुमारी सृजनशील नारी पुरस्कार, २०८१ बाट महिला उद्यमी शोभा श्रेष्ठ (मकवानपुर) सम्मानित भएकी छिन् । समाजसेवी तथा साहित्यसेवी मुक्तिगोविन्द वैद्यले स्थापना गरेकाे उक्त पुरस्कारकाे राशी १५ हजार रुपैंया रहेकाे छ । यसैगरी भीम–मथुरा बाल प्रतिभा पुरस्कार, २०८१ विद्यार्थी रितिका छत्कुली (मकवानपुर) लाई प्रदान गरिएकाे छ । विन्दुगोपाल गोर्खालीले स्थापना गरेकाे उक्त पुरस्कारकाे राशी १० हजार रुपैंया रहेकाे छ ।
यसैगरी शिला नारी पुरस्कार, २०८१ बाट महिला उद्यमी मेनका श्रेष्ठ (मकवानपुर) सम्मानित भएकी छिन् । आशीष श्रेष्ठले स्थापना गरेकाे उक्त पुरस्कारकाे राशी १५ हजार रुपैंया रहेकाे छ । यस्तै रामकृष्ण बानियाँ स्मृति लोक सङ्गीत पुरस्कार, २०८१ बाट लाेक दोहाेरी गायक कुलेन्द्र विश्वकर्मा (पर्वत) सम्मानित भएका छन् । चुनु बानियाँले स्थापना गरेकाे उक्त पुरस्कारकाे राशी २० हजार रुपैंया रहेकाे छ । चिनुकुमारी लामा स्मृति साहित्य पुरस्कार, २०८१ बाट साहित्यकार दीपक गौतम (मकवानपुर) सम्मानित भएका छन् । रामबहादुर पाख्रिनले स्थापना परेकाे उक्त पुरस्कारकाे राशी १५ हजार रुपैंया रहेकाे छ ।
मंगलादेवी स्मृति स्वास्थ्य सेवा पुरस्कार, २०८१ बाट स्वास्थ्यकर्मी निर्मला ब्लोन (मकवानपुर) सम्मानित भएकी छिन् । देवप्रसाद श्रेष्ठ र दीपकप्रसाद श्रेष्ठले स्थापना गरेकाे उक्त पुरस्कारकाे राशी १० हजार रुपैंया रहेकाे छ । अजित सेन- कमलेश्वरी गुप्ता भिन्न क्षमता पुरस्कार, २०८१ बाट दृष्टीविहीन मेकानिक सुदर्शन ढकाल (मकवानपुर) सम्मानित भएका छन् । रोशन सेन गुप्ता स्थापना गरेकाे उक्त पुरस्कारकाे राशी १० हजार रुपैंया रहेकाे छ ।
सम्मानित व्यक्तित्वहरुलाई हेटौंडा उपमहानगरपालिकाकी नगर प्रमुख मिना कुमारी लामा, हेटौंडा ४ का वडाध्यक्ष नविन सिग्देल प्रतिष्ठानका अध्यक्ष केशवलाल श्रेष्ठ तौजले तथा पुरस्कार संस्थापकहरुले नगर पुरस्कारसहित प्रमाणपत्र प्रदान गरेका थिए ।
पुरस्कार तथा सम्मान कार्यक्रमकै दिन शनिबार प्रतिष्ठानको कोष वृद्धिको उद्देश्यले गायक हेमन्त शर्मा तथा लोक दोहोरी गायक कुलेन्द्र विश्वकर्माको विशेष प्रस्तुति सहितको साङ्गीतिक कार्यक्रम समेत आयोजना गरिएकाे थियाे । गायक द्वयले आफ्ना लाेक प्रीय गीतहरु प्रस्तुत गरेका थिए ।
वरिष्ठ कलासाधक भीम विरागको बहुआयामिक व्यक्तित्वप्रति सम्मान स्वरुप ७ भाद्र २०५९ भीम विराग सङ्गीत साहित्य कला प्रतिष्ठान नेपाल स्थापना भएकाे हाे । नेपाली सङ्गीत, साहित्य र कला क्षेत्रमा देश तथा विदेशमा रही उल्लेखनीय योगदान पुर्याउँदै आइरहेका सर्जक, स्रष्टाहरूलाई सम्मानित एवम् पुरस्कृत गर्दै आएको यो संस्थाले मकवानपुरको माटोबाट वार्षिक रुपमा विभिन्न राष्ट्रिय तथा अन्तर्राष्ट्रिय पुरस्कार तथा सम्मान गर्दै आइरहेको प्रतिष्ठान अध्यक्ष केशवलाल श्रेष्ठले बताए ।