मकवानपुर । मकवानपुर प्रहरीले लागुऔषध, एउटा कार तथा चालक समेत गरी ३ युवालाई पक्राउ गरेको छ। जिल्ला प्रहरी कार्यालय परिसरमा पत्रकार सम्मेलनको आयोजना गर्दै लागुऔषध बरामद र मानिस पक्राउ गरेको जनाएको हो। विहीबार छुट्टा छुट्टै स्थानमा मकवानपुर प्रहरीले कार भित्र १ सय ६० किलो लागुऔषध गाँजा र लागुऔषध डाईजेपाम ट्याब्लेट १ हजार ८ सय ३१ पिस र ७७ बोलत वनरेक्स सहित ३ युवालाई पक्राउ गरेको हो।
विहीबार बिहान मकवानपुरको पालुङ तर्फबाट हेटौंडा आउदै गरेको बा २० च ६८ नम्बरको होण्डाई कारलाई प्रहरी चौकी भैसैको टोलीले रोक्न खोज्दा भागेको र त्रिभुवन राजपथ अन्तर्गत भिमफेदी-१ बागझोरामा नियन्त्रण लिइ चेकजाँच गर्दा कार भित्र पोका पारेको अवस्थामा १ सय ६० किलो लागुऔषध गाँजा बरामद गरेको जिल्ला प्रहरीका कार्यालय मकवानपुरका एसपी बामदेव गौतमले पत्रकार सम्मेलनमा बताए । प्रहरीले गाँजा सहित कार चालक चितवन भरतपुर महानगरपालिका – २४ बस्ने ४३ बर्षीय टेक बहादुर गुरुङलाई पक्राउ गरेको जनाइएको छ। प्रहरीले निजको साथबाट बिभिन्न दरको स्रोत नखुलेको १ लाख ३८ अठतीस हजार रुपैया समेत बरामद गरेको जनाएको छ।
त्यसैगरी मकवानपुर प्रहरीले हेटौंडा-५ सिचाईटोलबाट लागुऔषध नाईट्राभेट,वनरेक्स सहित ३ युवालाई पक्राउ गरेको छ। प्रहरीले हेटौंडा सिचाई टोल बस्ने ३१ बर्षीय धर्मेन्द्र खेम्काले आफ्नै घरमा लागू औषध लुकाई छिपाई राखी बिक्री बितरण भइरहेको भन्ने विशेष सुचनाको आधारमा घरमा खानतलासी गर्दा लुकाई राखेको अवस्थामा लागू औषध नाईट्रोभेट – ३ सय १६ ट्याब्लेट र वनरेक्स १०० एमएल को १४ बोत्तल फेला परेको हो।
एसपी गौतमका अनुसार खेम्कालाई नियन्त्रणमा लिई तत्काल सोधपुछ गर्दा सोही स्थान बस्ने २६ बर्षीय रविन श्रेष्ठ र मकवानपुर भिमफेदी गाउँपालिका – ५ घर भई हाल हेटौडा ५ सिचाईटोल डेरा गरी बस्ने ३० बर्षीय प्रमोद कार्कीको संलग्ना रहेको जानकारीपछि खोजी गर्दा रविन श्रेष्ठ र प्रमोद कार्कीको कोठा खानतलासी गर्दा प्रमोद कार्कीको कोठामा लुकाई राखेको अवस्थामा लागू औषध नाईट्राभेट- १ हजार ५ सय ४५ ट्याब्लेट र वनरेक्स १०० एमएल ६३ बोत्तल फेला पारिएको बताए।
पक्राउ परेका गुरुङ खेम्का श्रेष्ठ र कार्की माथि आवश्यक अनुसन्धान भइरहेको मकवानपुरका प्रहरी प्रवक्ता डिएसपी टेक बहादुर कार्कीले बताए । मकवानपुर प्रहरीले पक्राउ परेका सबैलाई विहीबार अपरान्ह पत्रकार सम्मेलन मार्फत सार्वजनिक गरेको हो।
मकवानपुर । रोटर्याक्ट डिष्ट्रिक्ट ३२९२ को आयोजना तथा रोटर्याक्ट क्लव अफ हेटौंडा र रोटर्याक्ट क्लव अफ मकवानपुरको संयोजनमा हेटौंडामा हुन लागेको अध्यक्ष–सचिव भेला(पिएस मिट)को तयारी पुरा भएको छ ।
रोटर्याक्ट क्लव अफ हेटौंडा र मकवानपुरले पत्रकार सम्मेलन गरि अध्यक्ष–सचिव भेलाको तयारी पुरा भएको जानकारी दिएको हो । भाद्र २५ गते हेटौंडाको एभोकाडो एण्ड अर्किड रिसोर्टमा हुन लागेको देशैभरिको रोटर्याक्ट क्लबको अध्यक्ष–सचिवको भेलाको तयारी पुरा भएको हो ।
पत्रकार सम्मेलनमा रोटर्याक्ट डिष्ट्रीक्ट ३२९२ का डि आर आर लक्ष्मण खरेल, रोटरी क्लव अफ हेटौंडाका अध्यक्ष सुएस राज पराजुली लगायतको समेत उपस्थिति रहेको थियो । उक्त कार्यक्रमले हेटौंडा र हेटौंडामा रहेका पर्यटकीय गन्तव्यहरुलाई देशैभरी थप पहिचान मिल्ने विश्वास लिएको रोटर्याक्ट क्लव अफ मकवानपुरका अध्यक्ष प्रदिप कुमार राईले बताए । हरेक रोटा वर्षको पहिलो त्रैमासिकमाआयोजना गरिने अध्यक्ष सचिवको भेलाले रोटर्याक्टसँग सम्बन्धीत विभिन्न मुद्धाहरु तथा प्रस्तावहरुमा छलफल गरिने अध्यक्ष राईले जानकारी दिए ।
कार्यक्रमले विभिन्न रोटर्याक्ट क्लवहरुसँग सञ्जाल बनाउन तथा आत्मियता बढाउन पनि मद्धत पुग्ने उनको भनाई रहेको छ । कार्यक्रममा रोटर्याक्ट क्ल्व अफ बुटवल साउथ, रोटर्याक्ट क्लव अफ युनाइटेड बिरगञ्ज र रोटर्याक्ट क्लव अफ बर्दिबासले सह संयोजन गरेको छ । कार्यक्रमको लागि महेन्द्र प्युरिफायरले मुख्य प्रायोजन गरेको रोटर्याक्ट क्लव अफ हेटौंडाका अध्यक्ष मिलन ढकालले जानकारी दिए ।
त्यसैगरी सागर डिष्टिलरी, युनिलिभर नेपाल प्रा.लि., स्मार्ट स्टडी, कान्तिपुर म्यानेजमेन्ट, एभरेष्ट कलर, एमएम पोलिमर्स, सिद्धार्थ बैंक, महालक्ष्मी विकास बैंक, जोभियल, कफिबार लगायतले सह प्रायोजन गरेको अध्यक्ष ढकालले बताए ।
हेटौंडा उपमहानगरपालिका, रोटरी क्लव अफ हेटौँडा र रोटरी क्लव अफ मकवानपुरले पनि आवश्यक साथ र सहयोग गरिरहेको उनको भनाई छ । करिब १ हजार जना रोटर्याक्टरहरुको सहभागिता रहने कार्यक्रमा २० लाख रुपैयाँ लागत अनुमान रहेको आयोजकले बताएको छ ।
मकवानपुर । मकवानपुरको मनहरी गाउँपालिकाका जनप्रतिनिधिहरुले आफू निर्वाचित भएर आएपछि सय दिनमा गरिएको कार्य प्रगतिको समिक्षा सार्वजनिक गरेको छ ।
गाउँपालिका अध्यक्ष रन्जन कालाखेती,उपाध्यक्ष सीता पुलामी मगर, प्रमुख प्रशासकीय अधिकृत मोहन बहादुर श्रेष्ठले सय दिनको समिक्षा पत्रकार सम्मेलन गरेर सार्वजनिक सुनाएका हुन् । गाउँपालिकाले यो बिचमा वडा कार्यालयमा अघिल्लो जनप्रतिनिधिले निर्माण गरेको स्वास्थ्य इकाइ भवन भत्काउनेदेखि बेरुजुलाई नियमित गरी सम्परीक्षणसम्मको कार्य गरेको छ ।
अघिल्लो जनप्रतिनिधिको पालमा ठेकेदारको लापारबाहीले कमसल बनेको मनहरी गाउँपालिका १ मकरीको स्वास्थ्य इकाई भवनको ढलान भत्काएर पुननिर्माण सुरु गरेको छ । गाउँपालिका अध्यक्ष कालाखेती र उपाध्यक्ष पुलामीको अनुगमनपछि पुननिर्माणका लागि निर्देशन दिइएको बताइएको छ । यस्तै मनहरी अस्पतालको अस्थायी भवन निर्माण सम्पन्न भइ सोही भवनबाट सेवा प्रवाहको व्यवस्था हुँदै रहेको १ भदौबाट ओपिडि सेवा समेत विस्तार गरिएको छ ।

यसैगरी हाँडीखोला स्वास्थ्य चौकीमा गर्भवती महिलाहरुको लागि निशुल्क भिडयो एक्सरे सेवा सञ्चालनमा ल्याइएको कालाखेतीले बताए । स्वास्थ्य क्षेत्रमा धेरै उपलब्धीपूर्ण काम भएको उनले बताए । कालाखेतीका अनुसार गाउँपालिका र सामुदायिक आँखा अस्पताल हेटौडाबीच सम्झौता भइ गाउँपालिकाको वडा ७ मा दैनिक आँखा सम्बन्धी सेवाको निरन्तरताका साथै मोतियाबिन्दू भएका गाउँपालिका भित्रका बिरामीहरुका लागि निशुल्क उपचारको व्यवस्था मिलाइएको छ ।
गाउँ कार्यपालिकामा यस बिचमा विभिन्न बैठकबाट ७० वटा निर्णयहरु भएको अध्यक्ष कालाखेतीले बताए । गाउँपालिकाको यो टिमले शिक्षा, स्वास्थ्य, कृषि र पूर्वाधार विकासलाई जोड दिँदै साविकमा रहेको गाउँपालिकाको नारालाई परिवर्तन गरि शिक्षा स्वास्थ्य कृषि र पूर्वाधार समृद्ध मनहरीको आधार नारा तय गरि सोही अनुसार २०७९।०८० को नीति तथा कार्यक्रम गाउँसभाको अधिवेशनमा प्रस्तुत गरी सर्वसम्मतिले पारित गरिएको उपाध्यक्ष पुलामीले बताइन् ।
कार्यालयको कामलाई व्यवस्थित, वैधानिक एवं पारदर्शी बनाउन गाउँपालिकाका ८ वटा कार्यविधि र निर्देशिका बनाई लागू गरिएको, ३ वटा संशोधन गरि कार्यान्वयनमा ल्याइएको छ ।
गाउँपालिका २०७७९०७८ सम्मको बेरुजू रकम ३५ करोड ७९ लाख १६ हजार मध्ये ५ करोड ३६ लाख २४ हजार सम्परीक्षण गराई हालसम्मको बेरुजू ३० करोड ४२ लाख ९२ हजार बाँकी रहेकोमा पालिकाले जनाएको छ । यसमध्ये पनि २०७९ असार १० गते बसेको गाउँ सभाको एघारौं अधवेशनद्वारा गठित लेखा समितिबाट ६ करोड १७ लाख ८५ हजार ५सय ३४ रुपैयाँको बेरुजू नियमित गराई सम्परीक्षणको लागि महालेखा परीक्षक कार्यालयमा पेश गर्ने चरणमा रहेको कालाखेतीले बताए छ । साथै यस अवधिमा ३ लाख ५७ हजार असूल समेत भएको उनले बताए ।
गाउँपालिका गरेको कार्यप्रगति तथा निर्णयहरुबारे आगामी दिनमा चौमासीक रुपमा पत्रकार सम्मेलन गरेर सार्वजनिक गर्ने अध्यक्ष कालाखेतीले बताए ।
मकवानपुर । हेटौंडामा कोसेली घर सञ्चालनमा आएको छ । हेटौंडा उपमहानगरपालिकाको सहयोगमा कोसेली घर सञ्चालनमा ल्याइएको हो ।
जाल्पादेवी महिला उद्यामी केन्द्रले व्यवस्थापन गर्ने गरी उपमहानगर क्षेत्रका उद्यमी महिलाहरुले उत्पादन गरेको सामग्री बजारीकरणका लागि कोसेली घर सञ्चालन गरिएको हो । महिलाहरुले घरमै बसेर उत्पादन गरेको विभिन्न सामग्री बिक्री गर्न गरि सञ्चालनमा ल्याइएको कोसेली घरको हेटौंडा उपमहानगरपालिकाका प्रमुख मिनाकुमारी लामाले बुधबार उद्घाटन गरिन् ।
कोसेली घर उद्घाटन गर्दै प्रमुख लामाले महिलाहरुले घरायसी काम पछिको श्रमबाट उत्पादन भएको सामग्रीको बिक्रिबाट आर्थिक उपार्जन गर्दै महिलाको श्रम मर्न नदिन उपमहानगरले कोसेली घर सञ्चालनमा सहयोग गरेको बताइन् ।
उपमहानगरपालिकाले महिलाहरुको आर्यआर्जनका लागि दिएको विभिन्न तालिमबाट दीक्षित भएका प्रशिक्षार्थीहरुले उत्पादन गरेको सामग्री बिक्री तथा बजारीकरणका लागि कोसेली घर सञ्चालनमा ल्याइएको हो ।
उपमहानगरपालिकाको विभिन्न वडाहरुमा सञ्चालन लक्षितवर्गका सिपमूलक तालिम लिई उत्पादनमा लागे पनि बजारीकरणका कारण समस्या बेहोर्दै आएका महिलाहरुको उत्पादनलाई बजारसम्म लैजान कोसेली घरले पुलको काम गर्ने व्यवस्थापक जाल्पादेवी महिला उद्यमी केन्द्रका अध्यक्ष गिता मैनालीले बताइन् ।
कोसेली घरमा विभिन्न प्रकारका सामान उत्पादन गर्ने २० जना उद्यमीहरु संलग्न रहेको मैनालीले जानकारी दिइन् । कोसेली घरमा ढाकाका उत्पादनहरु सारी, कुर्था सुरुवाल, व्याग, जुत्ता, विवाहमा प्रयोग हुने साइपाटाका सामान, पूजा लागि प्रयोग हुने दुनाटपरी, धुपबत्ती, उनबाट बनेका कपडा, विभिन्न प्रकारका अचार, खादासहितका सामग्री राखिएको छ ।
जिल्लाभित्र रहेका महिला उद्यामीहरुलाई कोसेली घरमा जोड्दै लैजाने तयारी रहेको मैनालीले जानकारी दिइन् । उपमहानगरले हरेक वर्ष ३ सय ८० जना महिलालाई दिगो आर्यआर्जनको तालिम दिने गरेको कार्यलयले जनाएको छ ।
मकवानपुर । मकवानपुर जिल्लाकाे राक्सिराङ गाउँपालिकामा चट्याङ लागेर १ जनाकाे मृत्यु भएकाे छ । राक्सिराङ २ बरेटारमा १ महिलाको चट्याङ लागेर मृत्यु भएको मकवानपुर प्रहरीले जनाएकाे छ ।
मंगलबार साँझ घर नजिकै बारीमा गएकी राक्सिराङ २ बरेटार की ६२ बर्षीय कालिमाया स्याङतानकाे चट्याङकाे कारण ज्यान गएकाे हाे । स्याङ्तान सँगै अर्का एक ब्यक्तिलाई समेत चट्याङ लागेको प्रहरीले बताएकाे छ । उक्त ठाउँ विकट तथा मनहरीबाट जान टाढा भएकाेले प्रहरीलाई घटनास्थल पुग्न समस्या भएको बताइएकाे छ ।
घटनाको मुचुल्काको लागि बुधबार बिहान इलाका प्रहरी कार्यालय मनहरीबाट प्रहरी टोली घटनास्थल तर्फ गएको मकवानपुर प्रहरी प्रवक्ता डिएसपी टेक बहादुर कार्कीले बताए। मंगलबार साँझनै मृत्यु भएकाे स्याङ्तानकाे शव पोष्टमार्टमका लागि हेटौंडा अस्पताल ल्याउन पनि समस्या भएको प्रहरीले जानकारी दिएकाे छ ।
