मकवानपुर । मकवानपुरगढी पत्रकार समाजकाे अध्यक्षमा रेवतिप्रसाद तिमल्सिना (नवीन) चयन भएका छन् । पत्रकारहरूकाे साझा संस्था समाजकाे बिहीवार गाउँपालिका केन्द्र मक्राञ्चुलीमा भएकाे प्रथम अधिवेशनले तिमल्सिनाकाे नेतृत्वमा ९ सदस्यीय नयाँ कार्यसमिति चयन गरेकाे हाे ।
तिमल्सिना मकवानपुरमा रहेर एक दशक भन्दा लामाे समयदेखि पत्रकारितामा सक्रिय छन् । मकवानपुरगढीमा छापा सञ्चार माध्यमसमेत सञ्चालन गरिरहेका उनी अनलाइनखबर डटकमकाे मकवानपुर संवाददाता र हेटाैंडाकाे साझाकुरा दैनिकमा कार्यरत छन् । यसैगरी, समाजकाे उपाध्यक्षमा मनाेज देवकाेटा, सचिवमा श्रीराम दहाल अर्जुन, काेषाध्यक्षमा अशाेक बजगाईं, सअसचिवमा भुवन घलान (साेमलाल) चयन भएकाे छन् ।
यस्तै सदस्यहरूमा सञ्जिव सुनार, अञ्जना तामाङ न्यासुर, आँचल घिमिरे र सुमिना चाैलागाईं चयन भएकाे निर्वाचन समिति संयाेजक तथा नेपाल पत्रकार महासंघ बागमती प्रदेशका उपाध्यक्ष हरि हुमागाईंले जानकारी दिए । पुस २०७७ मा स्थापित मकवानपुरगढी पत्रकार समाजमा करिब ४० जना पत्रकारहरू आबद्द रहेका छन् । मकवानपुरमा पत्रकार महासंघ जिल्ला समितिपछि पत्रकारहरूकाे साझा संस्थाकाे रूपमा गठित याे समाज दाेस्राे हाे ।
मकवानपुरगढी पत्रकार समाज सदस्यहरु हालै सम्पन्न पत्रकार महासंघकाे निर्वाचनबाट विभिन्न पदमा निर्वाचित भएका छन् । बागमती प्रदेश उपाध्यक्ष, जिल्लाका उपाध्यक्ष, दुई जना सहसचिव, दुई जना कार्यसमिति सदस्य, केन्द्रीय परिषद् सदस्य र प्रदेश परिषद् सदस्यमा गरि कुल ८ जना समाजका सदस्य पत्रकार निर्वाचित भएका थिए ।
गाउँपालिका अध्यक्ष दाेर्जे लामा स्याङ्तानले समाजसँग सहकार्य गरेर अगाडि बढ्ने बताउँदै गाउँपालिकाकाे समग्र विकासमा पत्रकारहरूकाे महत्वपूर्ण साथ चाहेकाे बताए । उनले मकवानपुरगढीका पत्रकारहरूले सहयाेगकाे खुलेर प्रशंसा गरे । निवर्तमान अध्यक्ष हुमागाईंले पत्रकारहरूकाे साझा संस्थाकाे रूपमा रहेकाे याे समाजबाट स्थानीय सरकारले धेरै अपेक्षा राख्ने बताउँदै राम्राे पक्षमा साथ दिने र कमिकमजाेरी देखिए सचेत गराउनेसम्मकाे भूमिका निर्वाह गर्न पत्रकारहरूलाई आग्रह गरे ।
मकवानपुरगढी गाउँपालिका अध्यक्ष दाेर्जे लामा स्याङ्तानकाे प्रमुख आतिथ्यता तथा समाजका अध्यक्ष सरिता दाहालकाे सभाध्यक्षतामा भएकाे अधिवेशनमा गाउँपालिकाकाे निवर्तमान अध्यक्ष बिदुर हुमागाईं, उपाध्यक्ष मानकुमारी नेपाली पाख्रिन, ३ नम्बर वडाका वडाध्यक्ष भागवत घिमिरे, २ नम्बर वडाका वडाध्यक्ष बखान सिं पाख्रिन, ४ नम्बर वडाका वडाध्यक्ष अर्जुन तिमल्सिनालगायतकाे आतिथ्यता रहेकाे थियाे ।
महासंघमा निर्वाचित ८ जनालाई स्वागत सम्मान
यसैबीच २८ मंसिर २०८१ मा भएकाे पत्रकार महासंघकाे केन्द्र, प्रदेश र जिल्ला समितिकाे निर्वाचनबाट निर्वाचित ८ जना समाजका सदस्यहरूलाई सम्मान गर्दै बधाइ ज्ञापन गरिएकाे छ ।
पत्रकार महासंघ बागमती प्रदेश उपाध्यक्षमा निर्वाचित हरि हुमागाईं, जिल्ला उपाध्यक्षमा निर्वाचित ध्रुव अधिकारी, सहसचिव शिव वियाेगी चाैलागाईं र सन्नु रिजाल, कार्यसमिति सदस्य श्रीराम दहाल अर्जुन र सञ्जिव सुनार, केन्द्रीय परिषद् सदस्य सुजन विडारी र प्रदेश परिषद् सदस्यमा निर्वाचित बलराम पुडासैनीलाई अध्यक्ष स्याङ्तान, निवर्तमान अध्यक्ष हुमागाईं, उपाध्यक्ष पाख्रिनलगायतले प्रमाण पत्रसहित खादा, टीका लगाएर सम्मान तथा बधाई ज्ञापन गरेका थिए ।
मकवानपुर । मकवानपुर हेटौंडामा महिला क्रिकेट उत्सव सुरु भएको छ । जिल्ला क्रिकेट संघ मकवानपुरकाे आयोजना तथा हेटौंडा उपमहानगरपालिकाकाे सहकार्यमा मंगलबारबाट क्रिकेट उत्सव सुरु भएकाे हाे ।
६ ओभरमा खेलाइने प्रतियोगिता हेटौंडा–४, हुप्रचौरमा सुरु भएको हाे । हेटौंडा ४ का वडाध्यक्ष नवीन सिग्देलले व्याटिङ् गरेर उत्सवको सुरुवात गरे । महिला खेलाडीलाई प्रोत्साहन गर्न आयोजना गरिएकाे प्रतियोगिता बुधबारसम्म सञ्चालन हुनेछ । प्रतियोगितामा हेटौंडा उपमहानगरपालिकाको ६ र मकवानपुरगढी गाउँपालिकाको १ गरी ७ वटा विद्यालयको टिम सहभागी रहेको छ ।
महिला क्रिकेट उत्सवमा हेटौंडा ४ मा रहेकाे नवोदय शिशु सदन, हेटौंडा ५ मा रहेकाे जीएस निकेतन र सिद्धार्थ शिशु सदन, हेटौंडा ८ मा रहेकाे कमाने एकेडेमी र माउण्ट एभरेष्ट इंग्लिस स्कूल, हेटौंडा ११ मा रहेकाे हेटौंडा एकेडेमीबाट १/१ टिमकाे सहभागिता रहेकाे छ । यसैगरी मकवानपुरगढी गाउँपालिकाको भानु माध्यमिक विद्यालयबाट २ वटा टिमको सहभागिता रहेको आयोजकले जनाएकाे छ ।
उद्घाटन खेलमा हेटौंडा ८ काे कमाने एकेडेमी र मकवानपुरगढी गाउँपालिकाको भानु माध्यमिक विद्यालयबीच प्रतिस्पर्धा हुदैछ ।
दक्षिण एसियाको मानव निर्मित पहिलो सुरुङ मार्गमा प्रवेश खुला
Tags: No Comments
मकवानपुर । मकवानपुर र बारा जिल्लाको सिमानामा पर्ने दक्षिण एसियाकै पहिलो मानव निर्मित सुरुङमार्ग पुनर्निर्माण सकिएको १७ महिनापछि स्थानीय सरकारलाई हस्तान्तरण गर्दै सर्वसाधारणको लागि खुला गरिएको छ ।
बागमती प्रदेशको राजधानी हेटौंडा उपमहानगरपालिका वडा न १५ मा पर्ने चुरियामाई सुरुङमार्ग पुनर्निर्माण कार्य २०८० साउन २२ गते सकिएको थियो । सुरुङमार्ग पुनर्निर्माणको लागि २०७८ साउन १४ गते शिलान्यास गरिएको थियो । आइतबार प्रदेशको भौतिक पूर्वाधार मन्त्रालयले हेटौंडा उपमहानगरपालिकालाई हस्तान्तरण गरेको हो ।
राजधानी काठमाडौंलाई मकवानपुरको हेटौंडा हुँदै तराई जोड्न चन्द्र शम्मशेरको पालामा निर्माण गरिएको चुरियामाई सुरुङ मार्ग पुनर्निर्माणपछि अब सर्वसाधारणले तोकिएको शुल्क तिरेर वारपार गर्न पाउने छन् ।
प्रदेशको पहिलो मुख्यमन्त्री डोरमणी पौडेल, हालका मुख्यमन्त्री बहादुर सिंह लामाको उपस्थितीमा भौतिक पूर्वाधार मन्त्री अमन मास्केले हेटौंडा उपमहानगरपालिका प्रमुख मिना कुमारी लामालाई चावि हस्तान्तरण गरे । सुरुङ मार्गको भने प्रदेशको पहिलो मुख्यमन्त्री पौडेलले रिवन काटेर उद्घाटन गरेका थिए । यो ऐतिहासिक सुरुङ मार्गको एउटा खण्ड करिब ४० मिटर भत्किएको थियो । त्यसलाई मर्मत गरेर वारपार गर्न सक्ने बनाइएको हो ।
ऐतिहासिक यो यो सुरुङ मार्गमा २०२० सालसम्म सवारी नै आवतजात हुने गर्दथे । अहिले यसलाई पर्यटकीय स्थलको रुपमा विकास गर्न लागिएको पौडेलले बताए । “यो सुरुङमार्ग पर्यटकीय र अध्ययन थलो हो” पौडेलले भने “अवलोकन र पर्यटकीय केन्द्रको रुपमा विकास गर्ने योजना प्रदेश सरकारको थियो ।”
चुरियामाई सुरुङ विक्रम संवत १९७४ मै बनेको थियो । नेपालका प्रथम स्नातक इन्जिनियर भनिने ब्रिगेडियर जनरल डिल्लीजंग थापाले ५ सय मिटर लम्बाइको यो सुरुङ मार्ग डिजाइन गरेका थिए । चुरे पर्वतमा बनेको यो सुरुङ मार्ग साढे २ मिटर चौडाइ, ३ मिटर उचाइ र ५०० मिटर लम्बाइको छ । जसको एकापट्टिको भाग पुरिएपछि मार्गको करिब २ सय ८० मिटर मात्र बाँकी रहेको थियो ।
माटो, इँटा, चुना र सुर्की प्रयोग गरी निर्माण गरिएको यो सुरुङ मार्गबारे स्वीस भूगर्भविद टोनी हेगनले आफ्नो पुस्तक “दी हिमालयन किंडम अफ नेपाल”मा पनि चर्चा गरेका छन् ।
राणाकालमा रक्सौलबाट बाराको अमलेखगञ्जसम्म रेल चल्थ्यो, त्यहाँबाट मकवानपुरको भीमफेदीसम्म बनाइएको सडकमार्गमा चुरे पहाड छिचोल्दै हेटौंडा छिर्न समस्या थियो । चुरे पर्वत फोरेर घुमाउरो बाटो बनाउनुको विकल्पमा यो सुरुङमार्गबाट सीधा मार्ग खनेर गाडी चलाइएको थियो । यही सुरुङ मार्ग हुँदै चल्ने गाडीहरुले मकवानपुरको तत्कालिन सदरमुकाम भीमफेदीसम्म समान ल्याउँथे । काठमाडौंसम्म जोडिने सडक नभएकाले भीमफेँदीबाट भरिया लगाएर काठमाडौंसम्म सामान भित्राइन्थ्यो ।
प्रजातन्त्र पुनस्र्थापनापछि त्रिभुवन राजपथ बन्यो । त्यस बीचमै यो सुरुङ मार्गको बीच खण्डमा विष्फोट गराएर भत्काएर त्यसैमाथि सडक बनाइएको थियो । २०७२ सालको भुकम्पले यसका अझै बढी क्षति गराएपछि सुरुङमार्ग गुमानाम बन्दै आएको थियो । प्रदेश सरकारले त्रिभुवन राजपथको बक्स कटिङ रोडदेखि दक्षिणतिरको भागमा धसिएको स्थान मर्मत गरेर सुरुङ मार्ग खुलाइएको हो ।
पुरानो सुरुङ मार्गको २० मिटर जति भाग धसिएको अनुमान गरी मर्मतका लागि डीपीआर निर्माण गरिएको थियो । तर मर्मत सुरु गरेपछि ४० मिटर भाग धसिएको पाइएको थियो । यसैगरी सुरुमा १९८ मिटर लम्बाइमा पुनर्निर्माण गर्नुपर्ने पूर्वानुमान भए पनि मर्मत गर्दै जाँदा २२२ मिटर लम्बाइमा निर्माण गरिएको हो ।
३ करोड ३६ लाख १३ हजार रुपैयाँको लागतमा माउन्टेन इन्फ्रा कन्स्ट्रक्सनले २०७७ साल वैशाखमा सुरुङ मार्ग पुनर्निर्माणको ठेक्का पाएको थियो । सुरुमा एक वर्षभित्र निर्माण सम्पन्न गर्ने गरी सम्झौता भए पनि कोरोना महामारी, प्राविधिक कठिनाइ देखाउँदै दुई पटक म्याद थपेर काम गरिएको हो ।
हेटौंडा उपमहानगरपालिका र बारा जिल्लासम्म सीमा जोडिने चुरियामाई मन्दिरमा बनाइएको सुरुङ भग्नावशेष थियो । बागमतीका पूर्वमुख्यमन्त्री डोरमणि पौडेलको पालामा ऐतिहासिक चुरियामाई सुरुङको पुनर्निर्माण थालिएको थियो । २०७८ साउनमा थालिएको पुनर्निर्माण २०८० जेठमै वारपार गर्न मिल्ने बनाइएको थियो । १०६ वर्ष पुरानो सुरुङ पुनर्निर्माणसँगै एक अर्को इतिहास सुरु भएको प्रदेशका मुख्यमन्त्री बहादुरसी लामाले बताए ।
कार्यक्रममा जितपुर सिमरा उपमहानगरपालिकाका प्रमुख राजन पौडेलले भारतीय सिमानाको नजिकै रहेको सुरुङ मार्ग पर्यटकीय संभावना रहेको बताए । हस्तान्तरणपछि सुरुङलाई पर्यटकीय स्थलको रुपमा सञ्चालन गर्न उपमहानगरपालिकाले सहकार्य र समन्वय गर्ने पौडेलले बताए ।
अवलोकन शुल्क कति ?
उपमहानगरपालिकाले चुरियामाई सुरुङलाई पर्यटकीय स्थलका रुपमा सञ्चालन गर्न कार्यविधि निर्माण गरिसकेको छ । उक्त कार्यविधिमा सुरुङ अवलोकन गर्न आउने नेपालीलाई ५० रुपैयाँ र विदेशीलाई १२० रुपैयाँ शुल्क लाग्ने उल्लेख छ । विद्यार्थीहरुलाई २० रुपैयाँ प्रवेश शुल्क लाग्ने छ । पाँच वर्ष मुनिका बालबालिका, अपा· र जेष्ठ नागरिकले निःशुल्क अवलोकन गर्न पाउने छन् ।
चुरियामाई सुरुङ सञ्चालन कार्यविधि बनाएर उपमहानगरले पर्यटकीय स्थलको रुपमा विकसित गर्नेगरी अगाडि बढेको उपमहानगरपालिकाका प्रवक्ता तथा १ नम्बर वडा अध्यक्ष सविन न्यौपानेले जानकारी दिए । उपमहानगरपालिकालाई हस्तान्तरण भएपछि सम्बन्धित समितिलाई नै सञ्चालनका लागि हस्तान्तरण गर्न सक्ने कार्यविधि नगरपालिकाले बनाएको छ ।
राणा प्रधानमन्त्री श्री ३ चन्द्र शम्शेरको पालामा वि.सं. १९७४ सालमा नेपाली सेनाका इञ्जिनियर डिल्लीजंग थापाले सुरुङमार्ग निर्माण गरेका थिए । नेपाली प्रविधि प्रयोग गरेर थापाले सुरुङमार्ग निर्माण गराएका थिए । करिब ५ सय मिटर लामो सुरुङ हुँदै मकवानपुरतर्फबाट प्रवेश गरेर बारा पुगिन्थ्यो । त्यतिबेला भारतबाट भीमफेदी हुँदै काठमाडौं पु-याउने साना सवारीसाधन ल्याउन सुरुङ बनाइएको थियो ।
हेटौंडामा सहकारी उत्पादन सामग्री प्रदर्शनी हुने
Tags: No Comments
मकवानपुर । मकवानपुरको हेटौंडामा सहकारी र सहकारी संस्थाका सदस्यबाट उत्पादित सामग्रीको प्रदर्शनी तथा बिक्री मेला हुने भएको छ ।
‘उत्पादन, बजारीकरण तथा लगानीको आधार, उद्यम प्रवर्द्धन हाम्रो पूर्वाधार’ भन्ने नाराका साथ हेटौंडामा आगामी १६ पुसदेखि १८ पुससम्म हेटौंडामा प्रदर्शनी तथा बिक्री मेला हुने भएको हो । जिल्ला बचत तथा ऋण सहकारी संघ मकवानपुरको आयोजनामा हेटौंडा २ स्थित संघको आफ्नै भवन परिसरमा सामाग्री प्रदर्शनी तथा बिक्री मेला हुनेछ ।
सहकारी मार्फत उद्यम गर्ने सदस्यलाई प्रोत्साहन गर्ने तथा सहकारीका व्यवसायी सदस्यको व्यवसाय प्रवर्द्धन गर्ने उद्देश्यका साथ प्रदर्शनी मेला आयोजना गरिएको संघले आइतबार पत्रकार भेटघाट आयोजना गरी जानकारी दिएको छ । मेलाले उत्पादक र उपभोक्ता बीच पुलको रुपमा काम गर्ने र सहकारीका सदस्यको उत्पादनको बजार प्रवर्द्धन गर्ने विश्वास लिइएको संघकी अध्यक्ष कल्पना श्रेष्ठले बताइन् ।
मेलामा कृषि सहकारीका साथै बहुउद्देश्यीय कृषि सहकारीहरुले समेत उत्पादन गरेका हस्तकला सामग्री, खाद्य सामाग्री, मसला सामग्री, डेरी परिकारसहित करिब ४० वटा स्टल रहने बताइएको छ । तीन दिनसम्म सञ्चालन हुने प्रदर्शनीमा करिब १० हजार जनाले अवलोकन गर्ने अनुमान गरिएको छ ।
सहकारीले बचत र ऋणकाे काराेवार मात्र गरिरहेकाे नभै सहकारी मार्फत उद्यममा पनि कार्य गरिरहेकाे छ भन्ने सन्देश दिनका लागि मेला आयाेजना गर्न लागेको उनले बताईन । मेलामा सरिखेतको खाेरियामा छरेकाे मासकाे दाल, काेगटेको सिस्नोकाे पिठाे, मार्खुको मकैकाे खाेस्टाबाट बनेकाे चकटी लगायतका स्थानीय उत्पादनको प्रदर्शनी रहने छन् ।
संघकाे २० ओै स्थापना दिवसकाे अवसरमा हुने प्रदर्शनी तथा मेलामा विविध कार्यक्रम समेत हुनेछ । १६ गते हाजिर जवाफ प्रतियाेगिता, १७ गते सहकारी शिर्षकमा वक्तृत्वकला तथा +२ स्तरीय सहकारी निबन्ध प्रतियाेगिता र १८ गते नवनिर्मित भवनकाे उद्घाटन तथा मेलाकाे समापन गरिने श्रेष्ठले जानकारी दिइन ।
संघको आफ्नै भवन
जिल्ला बचत तथा ऋण सहकारी संघको २ तले भवन निर्माण गरिएको छ ।
१८ पुसमा संघकाे स्थापना दिवसकाे दिन नवनिर्मित भवनकाे बागमती प्रदेशका पहिलो मुख्यमन्त्री डाेरमणि पाैडेलले उद्घाटन गर्ने भएका छन् । संघले १ कठ्ठा १४ धुर जग्गामा दुई तले भवन निर्माणकाे लागि २ करोड ५ लाख खर्च भएको जनाएको छ ।
उक्त भवन निर्माणको लागि बागमती प्रदेश सरकारले ३३ लाख, बकैया गाउँपालिकाले ७ लाख, मनहरी गाउँपालिकाले ५ लाख, इन्द्रसराेवर गाउँपालिकाले २ लाख र थाहा नगरपालिकाले २ लाख रुपैया सहयाेग गरेको अध्यक्ष श्रेष्ठले बताइन् ।
खुला कविता प्रतियोगितामा कास्कीका संजोग प्रथम
Tags: No Comments
मकवानपुर। राष्ट्रिय युवा कविता उत्सव–२०८१ अन्तरगत भएकाे खुला कविता प्रतियोगितामा संजोग बस्याल कास्की प्रथम भएकाे छ । मकवानपुरकाे हेटौंडामा शनिबार भएकाे खुला कविता प्रतियोगितामा बस्यालकाे ‘सावधान’ शिर्षककाे कविताले प्रथम स्थान हासिल गरेकाे हाे ।
प्रदेश युवा परिषद् बागमती प्रदेशको आयोजना तथा साहित्य सङ्गम मकवानपुरको सहकार्यमा आयोजित प्रतियोगितामा प्रथम भएका बस्यालले ४० हजार रुपैंयाकाे पुरस्कार प्राप्त गरे । यसैगरी प्रतियोगितामा कास्कीका कवि सुदर्शन पौडेलकाे कविता घर नफर्किएको छोराको सम्झनामाले द्वितीय भएकाे छ । पौडेलले ३० हजार रुपैंया हात पारे । उदयपुरकी सुमी पोखरेलकाे समयदर्शक यन्त्रको पर्दा नियाल्दा तृतीय भयो । कवि पोखरेल तृतीय हुँदै २० हजार रुपैंया हात पारिन् । प्रतियोगितामा कवि महेश कठायतले सान्त्वना पुरस्कार प्राप्त गरे । बझाङका कवि कठायतकाे देश शिर्षककाे कविता सान्त्वना हुदै १० हजार रुपैंया प्राप्त गरे ।
खुला कविता प्रतियोगिताकाे लागि देशभरबाट २ सय २३ कविता प्राप्त भएका थिए । प्राप्त कविता मध्ये मूल्याङ्कन समितिले उत्कृष्ट २० कविता छनोट गरि नामावली सार्वजनिक गरेकाे थियाे । प्रदेश युवा परिषद् बागमती प्रदेशको आयोजना तथा साहित्य सङ्गम मकवानपुरको सहकार्यमा आयोजित राष्ट्रिय युवा कविता उत्सव २०८१ मा उत्कृष्ट २० वटा कविता स्वयं कवि उपस्थित भई वाचन गरिएकाे थियाे ।
उत्कृष्ट २० मा पर्न सफल कविता र कविहरूको नामावली वर्णानुक्रमानुसार प्रकाशन गरिएको थियाे । प्रतियोगितामा विजेता कवि तथा कविताका अलावाका उत्कृष्ट २० मा अग्रिमा शिवाकोटी मकवानपुरकाे रित्तिदैछ ‘देश’, अभिषेक ओझा बाराकाे ‘विसंवाद’, कुष्मा लौडारी मकवानपुरकाे ‘डिजिटल संसारको मायाजाल’, तारानाथ पराजुली पर्वतकाे ‘पागल प्रकृतिप्रेमीको बयान’, दीपिन सिंजापति दैलेखकाे ‘आकाङ्क्षा’, प्रदीप कोइराला तनहुँकाे ‘म’, बाबुराम श्रेष्ठ यात्री सिन्धुलीकाे ‘आमा, देश र माटो’, भरत थापा धनकुटाकाे ‘हर्कमाया दर्जी र झन्डाको व्यापार’, भीमप्रसाद खतिवडा अनुराग दोलखाकाे ‘जीवन एक पाठशाला’ शिर्षककाे कविता छानिएकाे थियाे ।
यसैगरी रञ्जिता अधिकारी धादिङकाे ‘परिवर्तन लेख्ने हातहरु’, राजु झल्लु प्रसाद धादिङकाे ‘खिया’, रुपा ढुङ्गेल मकवानपुरकाे ‘म शिक्षा मन्त्री भए’, सिजन श्रेष्ठ संखुवासभाकाे ‘उर्वशी’, सुन्दर शिरिष सिन्धुपाल्चोककाे ‘जहाज चढ्न मन छैन आमा’, सुबास सजल मकवानपुरकाे ‘डरलाग्दो अन्त्य मानव सभ्यताको’,सुमित्रा सुमी नुवाकाेटकाे ‘बुद्ध आऊ’ शिर्षकका कविता छनोटमा परेकाे थियाे ।
युवालाई उद्यम व्यवसाय गर्न प्रोत्साहित गर्नुपर्छः मन्त्री महर्जन
बागमती प्रदेशका युवा तथा खेलकुद मन्त्री मीनकृष्ण महर्जनले युवालाई उद्यम व्यवसाय सञ्चालन गर्न प्रोत्साहित गर्नुपर्ने बताएका छन् । प्रदेश युवा परिषद्ले हेटौंडामा आयोजना गरेको ‘राष्ट्रिय युवा कविता उत्सव २०८१’ को उद्घाटन गर्दै मन्त्री महर्जनले यस्तो बताएका हुन् ।
युवा जनशक्तिलाई विदेश पलायन हुनबाट रोक्न प्राविधिक तथा व्यावसायिक शिक्षा र सीप उपलब्ध गराउनेतर्फ सरकारको ध्यान केन्द्रित हुनुपर्ने उनले बताए । ‘आफू खेलकुद क्षेत्रबाट आएकोले युवाहरुको भावना र मर्म बुझ्छु, विषयगत ज्ञान पनि छ तर, म मन्त्री नियुक्त हुँदा बजेट बनिसकेको थियो जुन युवाका लागि पर्याप्त छैन’ उनले भने । हामीले युवाहरुको क्षेत्रमा उल्लेख्य काम गर्न सकिरहेका छैनौँ । फलस्वरुप युवाहरुलाई स्वदेशमा टिकाउनै मुस्किल भएकाे उनले जानकारी दिए ।
त्यसैगरी परिषद्का कार्यकारी उपाध्यक्ष सन्तोष चौलागाईंले युवाहरुलाई नेतृत्व, व्यक्तित्व विकाससँगै रचनात्मक, सिपमुलक तालिमसँग जोड्न सहयोग समन्वय गरिने बताए । उनले भने ‘सकारात्मक सोचसँगै कार्यसँग जनसंख्याकाे ४३ प्रतिशत युवा जनशक्तिलाई जोड्न सके विद्यमानमा रहेका धेरै समस्या समाधान हुनेछ ।’
कवि मोमिलाका एकल कविता वाचन
‘राष्ट्रिय युवा कविता उत्सव २०८१’ मा साहित्यकार मोमिला जोशीका कविता सुनिए । कवि मोमिलाले आफ्ना १० वटा कविता प्रस्तुत गरेकी थिइन् । कविले भाव समर्पण, प्रेम, पीडा, प्यास र पानी, सूर्य समय, एउटा लालीगुराँस हराएको बेला, मात्र एउटा हाँगा काटिने, दोभन प्रहारबाट, नगरबधुको वक्तव्य, हिउँदको प्रथम वर्षात्, उकालोमा मेरो तस्बिर, तिमी र म, भीमसेन थापाको सुसाइड नोट शिर्षकको कविता सुनाएकी थिइन् ।
राष्ट्रिय युवा कविता उत्सवका अवसरमा पुस्तक प्रदर्शनी समेत गरिएको थियाे । किताबघर हेटौंडाले पुस्तक प्रदर्शनीकाे व्यवस्थापन गरेकाे थियाे ।