मकवानपुर । बागमती प्रदेशसभा बैठक आज सोमबार दिउँसो १ बजे बस्दैछ । गत १२ असारका लागि तोकिएको बैठक बस्दै नबसी स्थगित भएकाे थियाे ।
आर्थिक वर्ष २०८२/८३ काे बजेटमाथिकाे छलफलकाे लागि बाेलाइएकाे बैठक दलहरुकाे विवादका कारण स्थगन भएको थियो । प्रदेशसभा सचिवालयले सूचना जारी गर्दै बैठक असार १६ गते सारिएको जानकारी गराएको थियो ।
आजको बैठकमा आर्थिक वर्ष २०८२/८३ को बजेटमाथि छलफल हुने कार्यसूची रहेको प्रदेशसभा सचिवालयले जनाएको छ । बजेटमाथिको छलफलमा प्रस्तुत प्रस्तावलाई समेटेर प्रदेश सभा निरन्तर सञ्चालन गरिने बताइएकाे छ ।
मुख्यमन्त्री बहादुर सिंह लामा नेतृत्वको सरकारले ल्याएको बजेटप्रति सत्तारुढ दलकै प्रदेशसभा सदस्यहरूबीच असन्तुष्टि देखिएको छ । विशेषगरी नेपाली कांग्रेस र नेकपा एमालेका प्रदेशसभा सदस्यहरूले बजेटमा विकास योजनाको वितरण असमान भएको भन्दै आलोचना गर्दै आएका छन् ।
कांग्रेस प्रदेशसभा सदस्यले बजेट माथिको असन्तुष्टिका कारण संसदीय दलको बैठक नै प्रभावित भएको थियो । बजेट निर्माण प्रक्रियामा उत्पन्न विवादले नेकपा एमालेको संसदीय दलको बैठकसमेत प्रभावित भएको छ । बजेट माथिको विवादले एमालेको संसदीय दलको बैठक नै बस्न सकेको छैन ।
नेपाली कांग्रेसका प्रदेशसभा सदस्यहरूले सरकारको प्राथमिकता प्राप्त योजना बजेटमा नपरेको गुनासो गर्दै आएका छन् भने एमालेभित्र पनि योजना छनोट प्रक्रिया पारदर्शी नभएको भन्दै आन्तरिक असन्तोष देखिएको छ । केही प्रदेशसभा सदस्यहरूले बजेट संशोधनको माग गर्दै सार्वजनिक रूपमा असहमति जनाइसकेका छन् ।
बैठकमा निष्कर्ष निस्कन नसकेपछि कांग्रेस सत्ता साझेदार दल एमालेको साथ खोज्न पुगेको छ । सत्ता साझेदार दल एमालेको धारणा अनुसार अघि बढ्ने गरी कांग्रेसले संसदीय दलको बैठक स्थगन भएकाेबताइएकाे छ ।
एमालेको निर्णय अनुसार बजेट माथिको छलफल गर्ने गरी कांग्रेस संसदीय दलको निर्णय गर्न मुख्यमन्त्री बहादुर सिंह लामासहितका नेता आन्तरिक छलफलमा जुटे पनि उपलब्धी देखिएकाे छैन् ।
‘प्रदेशमा प्रतिनिधित्व गर्ने दलहरू कांग्रेसलाई १ अर्ब २० करोड रुपैयाँ, एमालेलाई १ अर्ब रुपैयाँ, माओवादी केन्द्रलाई ७० करोड रुपैयाँ, नेमकीपालाई २ करोड रुपैयाँको बजेटको सिलिङ दिइएको थियो । त्यसमा पनि अर्थ मन्त्रालयले जानकारी नदिई आफ्ना योजना समावेश गरेको भेटिएको थियो ।
बजेट विनियोजन गर्दा आफ्नो कार्यक्षेत्रको स्पष्ट भएन । कार्यक्षेत्र निर्धारण नगरी बजेट विनियोजन भएको कारणले गर्दा समस्या निम्तिएको एक सांसदले बताए । टुक्रे र मापदण्ड विहीनका योजनाहरू धेरै भएकाले कार्यान्वयनमा पनि समस्या हुने उनले बताए ।
मकवानपुर । नेकपा एमाले मकवानपुरले विपद् प्रतिकार्य द्रुत टोली निर्माण गर्ने भएको छ । एमाले मकवानपुरले विपद्को समयमा नागरिकको सुरक्षाका लागि खटिन ६५ जनाकाे विपद् प्रतिकार्य द्रुत टोली निर्माण गर्ने भएकाे हाे ।
एमाले मकवानपुरको जिल्ला विपद् व्यवस्थापन तथा स्वयंमसेवक विभाग, वन तथा वातावरण विभाग, स्वास्थ्य विभाग तथा जनसंगठन समन्वय संयन्त्रको बिहीबारकाे संयुक्त बैठकले जिल्लास्तरीय विपद् प्रतिकार्य द्रुत टोली (स्वंमसेवक दस्ता) बनाउने निर्णय गरेको हो । बैठकले ६५ जनाको जिल्लास्तरको द्रुत टोली बनाउने निर्णय गरेको छ ।
बैठकमा जिल्लाका १० वटै स्थानीय तहमा पालिकास्तरको विपद् प्रतिकार्य टोली बनाउने योजना समेत पारित भएकाे छ । जिल्ला विपद् विभाग प्रमुख शिवहरिका अनुसार जिल्लास्तरको र गाउँगाउँमा निर्माण गरिने प्रतिकार्य टोलीले विपद्को पूर्वानुमान, पूर्वतयारी वा विपद्ले समस्या बनाएको स्थानमा पुगेर नागरिकको जीवन रक्षा र भौतिक संरचनाको सुरक्षाको दृष्टिकोणले सरकारी निकायसँग समन्वय गरि काम गर्नेछ । विपद् प्रतिकार्य टोली निर्माणका लागि विभागले विपद् प्रतिकार्य सम्बन्धी तालिम दिने भएकाे छ ।
‘जिल्लाको टोली भन्दा गाउँको टोली प्रभावित क्षेत्रमा तत्काल पुग्ने भएकाले हरेक पालिकामा विपद् प्रतिकार्यको लागि समूह तयार बनाउन लागिएको हो’ विभाग प्रमुख दाहालले भने ‘एमाले मकवानपुर नागरिकको सुरक्षामा संवेदनशील भएर अघि बढेको छ ।’ बैठकमा एमाले केन्द्रिय सदस्य तथा मकवानपुर जिल्ला इन्चार्ज रामेश्वर रानाले विपद् व्यवस्थापन, जोखिम न्यूनीकरण, उद्धार तथा राहत वितरण कार्यमा पार्टी पङ्क्तिलाई परिचालित गर्न आवश्यक योजना निर्माण गरिएको बताए । सरदर भन्दा यस वर्ष बढी वर्षा हुने अनुमान गरिएको सन्दर्भलाई दृष्टिगत गरी आवश्यक कार्ययोजनासहित सम्भावित विपद् व्यवस्थापनमा पार्टीले टोली परिचालन गर्न लागेको जानकारी दिए ।
बैठकमा जिल्ला बिपद् ब्यबस्थापन विभागका सचिव सुरेश बेरोजगार, बन तथा वातावरण विभाग सचिव कृष्ण बिडारी, स्वास्थ्य विभाग सचिव उमेश अधिकारी, जनसंगठन समन्वय संयन्त्र उपप्रमुख मिलन पाठक तथा नेकपा एमाले मकवानपुरका जिल्ला सदस्य आकाश अधिकारीले आफ्नो धारणा राखेका थिए ।
जिल्ला विपद् विभागका प्रमुख शिवहरि दाहालको अध्यक्षता तथा नेकपा एमालेका केन्द्रीय सदस्य तथा मकवानपुर पार्टी इञ्चार्ज रामेश्वर रानाको प्रमुख आतिथ्यतामा भएकाे बैठकमा एमाले बागमती प्रदेश कमिटी सदस्य सुमित्रा काफ्ले, पार्टी जिल्ला सचिव सिता विष्ट, उपसचिव आरती पाठक, जनसंगठन समन्वय संयन्त्र प्रमुख सन्तोष पौडेल, उपप्रमुख मिलन पाठक, पार्टी जिल्ला सदस्यहरु पन्चमाया स्याङ्गतान लगायतको आतिथ्यता रहेकाे थियाे ।
मकवानपुर । बागमती प्रदेश राजधानी हेटौंडा तथा मकवानपुर जिल्लाको दीर्घकालीन विकासलाई लक्षित गर्दै मुख्यमन्त्री बहादुर सिंह लामालाई प्रदेश गौरवको योजना बुझाइएकाे छ।
बागमती प्रदेशसभा सदस्य एकालाल श्रेष्ठले प्रदेश गौरवको योजना समेटिएको विस्तृत पत्र मुख्यमन्त्रीलाई बुझाएका हुन् । सांसद श्रेष्ठले योजनाहरू बुझाउँदै आर्थिक वर्ष २०८२/८३ को बजेटमा समावेश गर्न समेत आग्रह गरेका छन् । प्रस्तावित गौरवका योजना हेटौंडा राजधानीको रूपमा सुशोभन गर्न, भौतिक पूर्वाधार विकास, सामाजिक सेवा प्रवर्द्धन तथा दिगो शहरी विकासका लागि अपरिहार्य रहेको उनले बताए ।
प्रदेशको प्रशासनिक भवन निर्माण, हेटौंडा–काठमाडौं सुरक्षित मार्ग (भीमफेदी–कुलेखानी), हेटौंडा बाइपास सडक (चुरियामाई–चोकिटोल), कर्रा नदी कोरिडोर, एकीकृत शहरी विकास योजना (टाउन प्लानिङ), प्रदेश सभा गृह निर्माण, हेटौंडा चक्रपथ निर्माण (PTMP अन्तर्गत), मदन भण्डारी स्वास्थ्य विज्ञान प्रतिष्ठान, प्रदेश विश्वविद्यालय लगाएतका योजनालाई आगामी आर्थिक वर्ष २०८२-८३ को बजेटमा आवश्यक रकम सहितको व्यवस्था गर्न उनले आग्रह गरे ।
श्रेष्ठले योजना पत्र पेश गर्दै प्रदेश राजधानी हेटौंडाको भौतिक संरचना अत्यन्तै कमजोर रहेको, प्रशासनिक सेवा सुविधाको अभाव रहेको, शहरीकरण अव्यवस्थित भएको, तथा शिक्षा र स्वास्थ्य जस्ता क्षेत्रमा गम्भीर लगानीको खाँचो रहेको उल्लेख गरेका छन्। सांसद श्रेष्ठको प्रस्तुति र योजनाको औचित्यप्रति मुख्यमन्त्री लामाले गम्भीर चासो व्यक्त गर्दै प्रदेश सरकार विकासका आधारहरूमा स्पष्ट र कार्यान्वयनमुखी ढंगले अघि बढ्ने बताए। उनले भने, “हामी जनअपेक्षाअनुकूल बजेट ल्याउने तयारीमा छौं। यस्ता गम्भीर, यथार्थपरक र भविष्यदृष्टिकोणयुक्त योजनाहरूलाई प्राथमिकतामा राखिनेछ। केही योजना तुरुन्त कार्यान्वयनमा लैजान सकिन्छ भने केहीलाई चरणबद्ध रूपमा अघि बढाइनेछ।”
मुख्यमन्त्रीले योजना कार्यान्वयनका लागि प्रदेश योजना आयोग, सम्बन्धित मन्त्रालय र प्राविधिक निकायहरूसँग समन्वय गरेर योजना थप परिमार्जन, विस्तृत परियोजना प्रतिवेदन (DPR) तयारी र बजेट व्यवस्थापन गर्न निर्देशन दिने बताए।
मकवानपुर । नेकपा एमाले मकवानपुर सल्लाहकार कमिटीका अध्यक्ष बलराम हुमागाईंको निधन भएको छ । मकवानपुरमा कम्युनिष्टको जग बसाल्ने नेतृत्वमध्येका एक मकवानपुरगढीका हुमागाईंको सोमबार साँझ निधन भएको हो ।
रोगले थलिएका उनलाई भारतमा उपचार पश्चात केही समय अघि मात्रै मकवानपुर ल्याइएको एमाले मकवानपुरका सचिवालय सदस्य तथा मकवानपुरगढी इञ्चार्ज बिदुर हुमागाईंले जानकारी दिए । पञ्चायतकालीन समयमा कम्युनिष्ट आन्दोलनको अग्रमोर्चामा रहेका हुमागाईंलाई जिल्लामा सम्मानित कम्युनिष्ट नेताका रुपमा लिइने गरिन्थ्यो ।
उनी एमाले मकवानपुरको दोस्रो कार्यकालका लागि पनि सल्लाहकार कमिटी अध्यक्ष भएका थिए । हुमागाईंले मकवानपुरगढी गाउँपालिका (तत्कालीन मकवानपुरगढी गाविस)मा नेकपा एमालेको जग बसालेका थिए । पार्टीले मकवानपुरगढीमा पहिलो पटक सम्पर्क गरेको नेता पनि हुमागाईं थिए । उनकै नेतृत्वमा गढीमा एमाले विस्तार भएको थियो ।
हुमागाईंको परिचय कम्युनिष्ट आदर्श नेताको रुपमा मात्र सीमित छैन । उनले जीवनको उर्जाशील समय दुग्ध उत्पादक कृषकहरुको हकहितमा बिताए । हुमागाईंले लामो समय जिल्लाकै उत्कृष्ट र ठूलो मनकामना दुग्ध उत्पादक सहकारी संस्थाको व्यवस्थापकीय जिम्मेवारी सम्हालेर बिदा लिएका थिए । मनकामनालाई जिल्लामै नमूना दुग्ध उत्पादक सहकारी बनाउन हुमागाईंको नेतृत्वदायी भूमिका थियो ।
शैक्षिक व्यक्तित्व वंशगोपाल माविका पूर्व प्रअ रमेश प्रसाद लामिछानेले हुमागाईंकाे निधनमा समवेदनाका साथ सामाजिक संजालमा लेखेका छन् ‘मकवानपुर गढीको मात्र हैन, मकवानपुर जिल्ला र मुलुककै उदाहरणीय ब्यक्तित्व तत्कालीन मालेदेखि बर्तमान एमालेसम्म चार दशक भन्दा बढी पार्टीको दरिलो खम्बा बनेर पद र सुबिधा कहिल्यै नमाग्ने, कामबाट कहिल्यै नथाक्ने, अरुलाई सहयोग गर्दा खुशी देखिने र आफ्नो पीडा कहिल्यै व्यक्त नगर्ने बलराम हुमागाईलाई प्राणघातक क्यान्सरले तीन महिनाको संघर्ष पश्चात् भौतिक शरीरलाई समाप्त गरेपनि वहाँको राजनीतिक र सामाजिक योगदान मकवानपुरले स्मरण गरिरहने छ ।’
मकवानपुर । बागमती प्रदेश सभाकाे बैठक आज बस्दैछ । आज बिहान ११ बजेकाे लागि बाेलाइकाे बैठकमा आर्थिक वर्ष २०८२/८३ को नीति तथा कार्यक्रम माथि छलफल हुने भएकाे छ ।
बागमती प्रदेश प्रमुख दीपकप्रसाद देवकोटाले प्रदेश सरकारकाे आगामी आर्थिक वर्ष २०८२/८३ को नीति तथा कार्यक्रम १४ जेठ बुधबार सार्वजनिक गरेका थिए । प्रदेश सभा सचिवालयका अनुसार आज (१९ जेठ) बस्ने बैठकमा सरकारको नीति तथा कार्यक्रमका लागि पूर्ण छलफल प्रारम्भ हुने जनाइएको छ ।
उक्त नीति तथा कार्यक्रममाथि छलफलका लागि ३ दिनकाे समय ताेकिएकाे सचिवालयले जानकारी दिएकाे छ । छलफल १९, २० र २१ गते हुनेछ ।