मकवानपुर । प्रधानमन्त्री शेर बहादुर देउवाले प्रधानमन्त्री भएकाे करिब ३ महीनापछि मन्त्रिपरिषद् विस्तार गरेका छन् । सत्ता साझेदार दलहरुसँगकाे सहमति पछी शुक्रबार राष्ट्रपति विद्यादेवी भण्डारीले प्रधानमन्त्री शेरबहादुर देउवाको सिफारिशमा मन्त्रिपरिषद् विस्तार गरेकी हुन्।
नवनियुक्त मन्त्री तथा राज्यमन्त्रीले शुक्रबार साँझ पद तथा गोपनीयताको शपथ लिएका छन्। राष्ट्रपति कार्यालय शीतल निवासमा शुक्रबार साझँ आयोजित शपथ ग्रहण समारोहमा राष्ट्रपति विद्यादेवी भण्डारीले नवनियुक्त मन्त्रीलाई पद तथा गोपनीयताको शपथ गराएकी हुन्। त्यस्तै, राज्यमन्त्रीहरूलाई प्रधानमन्त्री शेरबहादुर देउवाले शपथ गराएका छन्।
नवगठित मन्त्रिपरिषद्मा ११ जना नयाँ अनुहार आएका छन्। २९ असारमा गठन भएको देउवा नेतृत्वको सरकार आज चौथो पटक विस्तार भएको हो। सरकार गठन भएकै दिन कांग्रेस र माओवादी केन्द्रका तर्फबाट दुई/दुई जना मन्त्री भएका थिए। स्वास्थ्य राज्यमन्त्रीमा उमेश श्रेष्ठ र पछिल्लो पटक परराष्ट्र मन्त्रीमा नारायण खड्कालाई नियुक्त गरिएको थियो।
मन्त्रिपरिषद्मा कांग्रेसका तर्फबाट एक राज्यमन्त्री सहित नौ, माओवादीका तर्फबाट एक राज्यमन्त्री सहित ६, एकीकृत समाजवादीका तर्फबाट एक राज्यमन्त्री सहित पाँच र जनता समाजवादीका तर्फबाट चार मन्त्री छन्। नवगठित मन्त्रिपरिषद्मा ६ जना महिला छन्।
समारोहमा उपराष्ट्रपति नन्दबहादुर पुन, सभामुख अग्निप्रसाद सापकोटा, राष्ट्रिय सभाका अध्यक्ष गणेशप्रसाद तिमिल्सिना, नेकपा (माओवादी केन्द्र)का अध्यक्ष पुष्पकमल दाहाल, नेकपा (एकीकृत समाजवादी)का अध्यक्ष माधवकुमार नेपाल, जनता समाजवादी पार्टीका अध्यक्ष उपेन्द्र यादव, संवैधानिक अङ्गका प्रमुख, मुख्यसचिव, प्रधान सेनापति लगायत शीर्ष नेता उपस्थित थिए।
पाँच दलीय गठबन्धनमा रहेको राष्ट्रिय जनमोर्चाले भने सरकारमा सहभागी नभई समर्थन गर्ने भएको छ।
मकवानपुर/बागमती प्रदेशको मुख्यमन्त्रीमा राजेन्द्र पाण्डे चयन हुने संभावना बलियो बनेको छ । यस अघि मुख्यमन्त्रीको दाबेदार रहेका नेपाली काँग्रेस मकवानपुरका सभापति तथा कांग्रेस बागमती प्रदेश संसदीय दलका नेता इन्द्रबहादुर बाँनीया मुख्यमन्त्रीको होडबाट बाहिरिएपछि पाण्डेको संभावना बलियो बनेका हो ।
संघीय सरकारमा मन्त्रालयको भागबण्डाको क्रममा भएको सहमति अनुसार बानियाँ मुख्यमन्त्रीको होडबाट बाहिरीएसँगै नवगठित एकीकृत समाजवादीको केन्द्रीय उपाध्यक्ष तथा बागमती प्रदेश संसदीय दलको नेता राजेन्द्र पाण्डे बागमती प्रदेशको मुख्य मन्त्री बन्ने लगभग पक्का भएको हो ।
नेकपा एमालेको विभाजनसँगै एमालेको तर्फबाट मुख्यमन्त्री बनेकी अष्टलक्ष्मी शाक्य अल्पमतमा परेपछि मुख्यमन्त्रीको रुपमा पाण्डे आउने भएका हुन् । उनी असोज ३० गतेसम्म मुख्यमन्त्री भैसक्ने दाबी गठबन्धनले गरेको छ ।
नेकपा एमाले विभाजनपूर्व मुख्यमन्त्री बनेकी शाक्य एमाले विभाजनपछि अल्पमतमा परेकी हुन् । यो संगै गठबन्धनको सहमतिमा पाण्डेलाई बागमती प्रदेशको मुख्यमन्त्री बनाउने तयारी अगाडि बढाइएको थियो । बागमती प्रदेशमा हाल अष्टलक्ष्मी शाक्य नेतृत्वको सरकार रहेको छ । गत २ भदौमा शाक्य मुख्यमन्त्री पदमा नियुक्त भएकी थिइन् ।
सत्तारुढ दल नेकपा एमाले विभाजन भएसँगै मुख्यमन्त्री शाक्य अल्पमतमा परेकी छन् । सत्तारुढ दल विभाजन भएको ३० दिनभित्र मुख्यमन्त्रीले विश्वासको मत लिनुपर्ने संवैधानिक प्रावधान अनुसार नेकपा एमालेको स्पष्ट बहुमतबाट मुख्यमन्त्री नियुक्त भएकी शाक्य एमाले परित्याग गरी १३ जना सांसदले एकीकृत समाजवादीमा सनाखत गरेसंगै अल्पमतमा परेकी हुन् ।
बागमती प्रदेशसभामा हाल १०९ जना प्रदेशसभा सदस्य रहेका छन् । प्रदेश सरकार गठनको लागि ५५ सांसदको साथ आवश्यकता पर्दछ । तर, एमालेका १३ जना सांसदले एकीकृत समाजवादीमा सनाखत गरेसँगै एमालेमा ४३ सांसद मात्र रहेका छन् । यस अघि नेपाली कांग्रेसले नयाँ सरकार गठनका लागि दाबी गर्दै आएपनि अब गठबन्धनमा सहभागी भएपछि पाण्डे मुख्यमन्त्री बन्ने भएका हुन् ।
मुख्यमन्त्री शाक्यद्धारा विश्वासको मत लिन प्रस्ताव पेश
बागमती प्रदेशकी मुख्यमन्त्री अष्टलक्ष्मी शाक्यले विश्वासको मत लिन प्रदेश सभामा प्रस्ताव पेश गरेकी छन् । विश्वासको मत लिन शुक्रबार मुख्यमन्त्री शाक्यका प्रमुख राजनीतिक सल्लाहकार माधव अर्यालले प्रदेश सभा सचिवालयका सचिव कृष्णहरि खड्कालाई प्रस्ताव बुझाएका हुन् ।
शाक्यले आफ्नो दल नेकपा एमाले विभाजन भएकाले संविधानको धारा १८८ को उपधारा २ तथा प्रदेशसभा नियमावली २०७४ को नियम १४३ को उपनियम १ बमोजिम विश्वासको मत प्राप्त गर्न सूचना गरेको उल्लेख गरेकी छिन् । शाक्यले विश्वासको मत लिन प्रदेश सरकारले २४ असोजमा प्रदेश सभा अधिवेशन आह्वान गर्न सिफारिस गरेको थियो ।

मकवानपुर । नेकपा (एकीकृत समाजवादी) को बागमती प्रदेश कमिटि गठन भएकाे छ । पार्टीकाे बागमती प्रदेश कमिटि भेलाले २ सय ३१ सदस्यीय नयाँ बागमती प्रदेश कमिटी गठन गरेको छ । भेलामा प्रादेशिक इन्चार्ज/सहइन्चार्ज, पदाधिकारीसहितको १७ सदस्यीय सचिवालय गठन गरिएको छ ।
कार्यक्रममा पार्टीका उपाध्यक्ष राजेन्द्र पाण्डेले कमिटीका सदस्यलाई शपथ ग्रहण गराएका थिए । प्रदेश इन्चार्ज केदार न्यौपानेले पार्टीकाे कार्ययोजनासम्बन्धी विषय प्रस्तुत गरेकाे भेलामा स्थायी समिति सदस्य जीवनराम श्रेष्ठले कार्यविभाजनसम्बन्धी विषय प्रस्तुत गरेका थिए ।
प्रदेशभित्र सञ्चालन गरिने राजनीतिक गतिविधि, तिनका कार्य विभाजन, नेतालाई आवश्यकतानुसारको जिम्मेवारी प्रदान गर्न छलफल गरिएको छ । सङ्गठनलाई शुद्धीकरण, सुदृढीकरण र विस्तार गर्नेलगायत विषयमा छलफल भएको छ ।
परिवर्तित अवस्थामा पार्टीको केन्द्रीय तहसँग समन्वय र समझदारी गरी प्रभावकारीरूपमा राजनीतिक गतिविधिका साथै सामाजिक कार्यक्रम सञ्चालन गर्ने, जनताका समस्यालाई केन्द्रमा राखेर अगाडि बढ्न सहभागीले भेलामा सुझाव दिएका छन् ।
मकवानपुर/ बामगती प्रदेशमा आगामी २४ असोजमा मुख्यमन्त्री अष्टलक्ष्मी शाक्यले विश्वासको मत लिने भएकी छन् । २४ असोजको दिउँसो ३ बजे नवौं हिउँदे अधिवेशन बोलाउन प्रदेश प्रमुखलाई आग्रह गर्ने निर्णय प्रदेश सरकारले बुधबार गरेको छ ।
अल्पमतमा परेको बागमती प्रदेश सरकारले आगामी २४ असोजमा विश्वासको मत लिने भएको हो। बुधबार बसेको प्रदेश सरकारको बैठकले अधिवेशन आव्हानका लागि प्रदेश प्रमुखलाई आग्रह गर्ने निर्णय गरेको छ । प्रदेश सरकारका मन्त्री केशवराज पाण्डेले २४ असोजमा अधिवेशन आव्हानका लागि प्रदेश प्रमुख समक्ष आग्रह गर्ने निर्णय गरिएको जानकारी दिए ।
एमालेको एकल बहुमत रहेको बागमती प्रदेशमा १३ जनाले एकीकृत समाजवादी रोजेपछि मुख्यमन्त्री शाक्य अल्पमतमा परेर सरकार सञ्चालन गरिरहेकी छिन् । मुख्यमन्त्री शाक्यको दल एमालेसका ४३ सांसदको साथका साथ बागमती सरकार सञ्चालन भइरहेको हो।पार्टी विभाजनसँगै बागमती प्रदेशमा एमालेका १३ सांसदले नेकपा (एकीकृत समाजवादी) रोजेपछि शाक्य अल्पमतमा परेकी थिइन् । पार्टी विभाजनको ३० दिनभित्र विश्वासको मत लिनुपर्ने संवैधानिक व्यवस्था बमोजिम मुख्यमन्त्री शाक्यले नवौं अधिवेशनमार्फत विश्वासको मत लिने तयारी थालेको भएपनि उनले विश्वासको मत पाउँने अवस्था अहिले छैन ।
एमालेका १३ प्रदेश सभा सदस्य नेकपा (एकीकृत समाजवादी)मा लागेपछि मुख्यमन्त्री अष्टलक्ष्मी शाक्यले विश्वासको मत लिनुपर्ने बाध्यात्मक अवस्था आइलागेको हो । आफूले विश्वासको मत नपाउने अवस्था भए पनि नतिजा स्वीकार गर्न आफू तयार रहेको मुख्यमन्त्री शाक्यले बताउँदै आएकी छन् ।
५६ सांसद सहित एकल बहुमत रहेको एमाले प्रदेश सभा संसदीय दलको नेताका रूपमा २ भदौमा उनी मुख्यमन्त्री नियुक्त भएकी थिइन् । ११० सदस्यीय प्रदेश सभामा बहुमतका लागि आवश्यक सांसद सङ्ख्या नपुगेपछि मुख्यमन्त्री शाक्यले विश्वासको मत लिनुपरेको हो।संविधानको धारा १८८ (२) मा मुख्यमन्त्रीले प्रतिनिधित्व गर्ने दल विभाजन भए ३० दिनभित्र विश्वासको मत लिनका लागि प्रदेश सभामा प्रस्ताव राख्नुपर्ने व्यवस्था गरिएको छ ।
बागमती प्रदेश सभामा एमालेका ४३, नेकपा (माओवादी केन्द्र)का २३, नेपाली कांग्रेसका २२, नेकपा (एकीकृत समाजवादी)का १३, विवेकशील साझा पार्टीका तीन, नेपाल मजदूर किसान पार्टीका दुई, राष्ट्रिय प्रजातन्त्र पार्टीका दुई र एक जना स्वतन्त्र सांसद छन्।संघमा गठबन्धन गरेको कांग्रेस, माओवादी र एकीकृत समाजवादी यो प्रदेशमा मिल्ने हो भने मुख्यमन्त्री शाक्यको बहुमत नपुग्ने निश्चितप्रायः छ ।
विश्वासको मत लिनका लागि मुख्यमन्त्री शाक्यले अहिलेसम्म आफ्नै पार्टी एमाले बाहेक अरुसंग भरपर्ने आधार नभएको बताइएको छ । यस्तो अवस्थामा मुख्यमन्त्री शाक्य विश्वासको मत लिन असफल हुने र आफूहरुको सरकार बनाउँने विपक्षी गठबन्धनको तयारी छ।विपक्षी गठबन्धनमा रहेका माओवादी केन्द्र, कांग्रेस, एकीकृत समाजवादीले आफूहरु मध्येबाट नयाँ मुख्यमन्त्री बनाउँने तयारी गरेका छन् । उनीहरुका अनुसार गठबन्धनमा ५९ मत रहेको छ ।
मकवानपुर । नेत्रविक्रम चन्द ‘विप्लव’ नेतृत्वको नेपाल कम्युनिस्ट पार्टी मकवानपुरद्वारा जिल्ला प्रशासन कार्यालय अगाडी धर्ना दिएकाे छ । सरकारसँग गरिएकाे ३ बुँदे सहमति कार्यान्वयनमा ढिलाइ गरेको भन्दै विप्लवले नेतृत्व गरेको कम्युनिस्ट पार्टी मकवानपुरले सोमबार प्रशासन कार्यालय अगाडी धर्ना दिएको हाे ।
३ बुँदे सहमति कार्यान्वयन गर्ने सन्दर्भमा सरकारलाई पटक पटक ध्यानाकर्षण गराउँदा समेत कार्यान्वयन नभएकाेले धर्नामा बस्नुपरेको पार्टी केन्द्रिय सदस्य तथा जिल्ला ईन्चार्ज इन्द्र बहादुर परियार (नयन) ले बताए ।
केपी ओली नेतृत्वको सरकारसँग २०७७ साल फागुन २१ गते ३ बुँदे सहमति गरेर विप्लव शान्तिपूर्ण राजनीतिमा प्रवेश गरेका थिए । तर सहमतिको ७ महिना बित्न लाग्दा पनि सहमति कार्यान्वयनमा कुनै प्रगति हुन नसकेपछि उनिहरु असन्तुष्टि व्यक्त गर्दै आएका छन् ।
केपी ओली नेतृत्वको सरकार रहुन्जेलसम्म पनि विविध बहाना बनाएर माग पूरा नभएको र देउवा सरकार बनेको ३ महिना हुन लाग्दा पनि केही प्रगति नभएपछि साेमबार त्यसको विरोध स्वस्प देशभरका जिल्ला प्रशासन कार्यालय आगाडी धर्ना गर्ने कार्यक्रम अन्तरर्गत मकवानपुरमा पनि धर्ना दिइएकाे बताइएकाे छ ।