मकवानपुर । मनहरी गाउँपालिका अध्यक्ष कप फुटबल प्रतियोगिताको फाइनलमा २ र ७ नम्बर वडाले स्थान बनाएका छन् । मंगलबार भएको सेमिफाइनल खेलबाट २ र ७ नम्बरले फाइनल भिडन्त पक्का गरेका हुन् ।
मंगलबार भएको पहिलो सेमिफाइनलमा २ नम्बर वडाले ६ नम्बर वडालाई ट्राइबेकरमा ५-३ ले पछि पार्दै फाइनल यात्रा तय गरेको हो । खेलको निर्धारित समय बराबरीमा सकिएपछि खेल ट्राइबेकरमा धकेलिएको थियो । निर्धारित समयकाे खेलमा दुवै वडाले १-१ काे बराबरी खेलेपछी खेल पेनाल्टी शुट आउटमा धकेलिएकाे थियो । २ नम्बरका गोलकिपर अशोक मोक्तान म्यान अफ दि म्याच भए ।
यसैगरी मंगलबार नै भएको ७ नम्बर वडा र ८ नम्बर वडा बिच भएकाे सेमिफाइनल खेलबाट ७ नम्बर वडा फाइनल प्रवेश गरेका छ । ८ नम्बर वडालाई १-० गोल अन्तरले पछि पार्दै ७ नम्बरले फाइनलमा २ नम्बरसंगको भेट पक्का गरेको छ । खेलको पहिलो हाफमै ७ नम्बर वडाको तर्फबाट रवि लोले गरे । उक्त गोल गोलनै ७ को लागि जीतका लागि निर्णायक गोल रह्यो ।
मंसिर ३० गते देखि मनहरी-७ रमौली स्थित क्षेत्रीय मदन भण्डारी रंगशालामा सुरु भएको चौथो अध्यक्ष कप फुटबल प्रतियोगिताको फाइनल तथा समापन पुस ५ गते हुनेछ । मनहरी गाउँपालिकाको सहयोग र मनहरी खेलकुद विकास समितिले आयोजना प्रतियोगिता भएको हो ।
प्रतियोगितामा प्रथम हुने टिमलाई नगद १ लाख रुपैयाँ र दोस्रो हुनेलाई नगद ५० हजार रुपैयाँसहित शिल्ड , मेडल र प्रमाणपत्र प्रदान गरिने छ । साथै विभिन्न विधामा उत्कृष्ट खेलाडी र राष्ट्रिय स्तरका खेलाडीलाई नगद सहित सम्मान गरिने आयोजकले जनाएको छ ।
मकवानपुर । मकवानपुर उद्योग वाणिज्य संघले अर्थमन्त्री डा. प्रकाशशरण महतलाई ज्ञापनपत्र बुझाएको छ । मंगलबार अर्थमन्त्री डा. महतलाई माउवासंघका अध्यक्ष कृष्ण कुमार गुप्तासहितकाे टाेलीले १६ बुँदे ज्ञापनपत्र बुझाएका छन् ।
नेपाली कांग्रेस मकवानपुरको जिल्ला सम्मेलनकाे लागि हेटौंडा आएका महतलाई मउवासंघले विभिन्न मागसहित ज्ञापनपत्र बुझाएको हाे । ज्ञापनपत्रमा सरकारले एक अंकको व्याजदर कायम राख्ने राष्ट्रिय नीतिको तर्जुमा गर्नुपर्ने, औद्योगिक नगरी हेटौंडाको दोश्रो तथा वहुप्रतिक्षित औद्योगिक क्षेत्रको पूर्वाधार निर्माणको कार्य चाँडो सम्पन्न गर्नु पर्ने, थप उद्योगहरुको स्थापनाको कार्य चालु आर्थिक वर्ष २०८०/८१ भित्र सम्पन्न गर्नु पर्ने, उद्योगमा नेपाल सरकारले न्यूनतम पारिश्रमिक निर्धारण गर्ने र उद्योगको आन्तरिक सिबिएमार्फत मजदुरले गर्ने दोहोरो मागदाबीलाई एकद्वार प्रणालीमा जानुपर्ने उल्लेख छ ।
यसैगरी कोभिड महामारी, रुस–युक्रेन युद्ध, सार्वजनिक ऋणको आकार बढ्दै जानु, औद्योगिकीकरण र लगानीको वातावरणको अभाव कायम रहनु, वैदेशिक आयात व्यापारको बृद्धि हुँदै जानु, सरकार परिवर्तनसँगै सार्वजनिक नीतिहरुको परिवर्तन भइरहनुले आम नागरिक/उद्योगी/व्यवसायीहरुको मनोवल उच्च नहुने बताउँदै देशको आर्थिक संकट समाधानका लागि सरकारले तत्काल कदम चल्नुपर्ने ज्ञापनपत्रमा भनिएकाे छ ।यस्तै क्रसर व्यवसायहरु नवीकरण नभएकोले यथाशिघ्र नवीकरण गरी संचालन कार्यमा सहजीकरण गर्नुपर्ने, तेश्रो मुलुकबाट आयात हुने कच्चा पदार्थका ढुवानीलाई नेपालस्थित सुख्खा बन्दरगाहमा नै फिर्ता हुनुपर्ने मउवासंघकाे माग छ ।
ज्ञापनपत्रमा उद्योगले लिजमा लिएको सरकारी जग्गामा बनाउने संरचनाहरुमा वित्तीय सुविधा दिन सम्बन्धित बैंकहरुलाई निर्देशन गर्न केन्द्रीय बैंक तथा उद्योग मन्त्रालयसँग पहल गर्नु पर्ने, हेटौंडाको राप्ती खोला पश्चिमतर्फ अवस्थित उद्योगहरु सहज बाताबरणमा संचालनकाे लागि अलग्गै औद्योगिक फिडर कायम गर्नुपर्ने, उद्योगले प्रयोग गर्ने विद्युत लाइनमा जडित क्षमताको आधारमा लिइने डिमाण्ड शुल्क हटाउने र युनिट शुल्कमात्र लिने व्यवस्था गर्नुपर्ने, बदलिँदो आर्थिक परिवेश अनुसार नव–प्रवर्तन एवम् नव–उद्यमलाई प्रोत्साहन, प्रवर्द्धनात्मक एवम् व्यवस्थापन गर्न नेपाल सरकारले मकवानपुर उद्योग वाणिज्य संघको पनि सहभागितामा बाग्मती प्रदेश स्तरिय व्यापार इन्क्युबेशन केन्द्रको स्थापनाको लागि पहलको गर्नुपर्ने संघको माग छ ।
वित्तीय संस्थाबाट ऋण लिँदा लगभग शून्य जोखिम भएका अनावश्यक शिर्षकहरु अन्तर्गत पनि बीमा गर्नुपर्ने अनिवार्यताले ऋणको लागत वृद्धि भएको, राष्ट्रिय राजमार्ग बिस्तार गर्दा बिस्थापित हुने घरधनीलाई उचित क्षतिपूर्ति र मुआब्जा तथा व्यवसायीहरुलाई वैकल्पिक योजना मार्फत सम्बोधन गर्नुपर्ने, हेटौँडामै नापतौल कार्यालय स्थापना गर्नुपर्ने र प्रदेशस्तरीय स्वास्थ्य विज्ञान कलेज तथा विश्वविद्यालय स्थापना गर्नुपर्ने माग पनि संघले राखेको छ ।
ज्ञापनपत्र बुझ्दै संघीय सरकारका अर्थमन्त्री महतले उद्योग व्यवसायीकाे साथमा सरकार रहेकाेले परेकाे समस्या समाधान गर्न पहल गर्ने प्रतिवद्धता जनाए । ‘व्यवसायीहरु चर्को व्याजदर, निर्माण सकिएकाे अवस्थामा भुक्तानी नपाउने समस्यालाई निराकरण गर्न सरकार तयार रहेको छ’ महतले भने। वित्त क्षेत्रमा अनुशासन र मौद्रित नीति लागू भइसकेकोले उद्योग व्यवसाय फस्टाउने विश्वास उनले दिलाए ।
हेटौंडामा रहेको औद्योगिक क्षेत्र उद्योग वाणिज्य र नीजि क्षेत्रसँगको सहकार्यमा अघि बढाइने बताउँदै उनले भने ‘हेटौंटा सिमेण्ट उद्योगको हकमा सरकारले छिट्टै ठाेस निचोड निकाल्ने छ ।’ अहिले बहुवर्षिय योजनाले गर्दा समस्या निस्केकोले अनियमित ढङ्गले ठेक्का लगाउने प्रथाको अन्त्य गरिनुपर्ने अर्थमन्त्री महतले बताए । क्रसर उद्योग तर्फ नवीकरण र कार्यक्षेत्रको विषयमा तत्काल छलफल गरिने उनकाे भनाइ थियाे ।
मकवानपुर । नेकपा (माओवादी केन्द्र)का उपमहासचिव वर्षमान पुनले सुशासन, समृद्दी र सामाजिक न्यायकाे एजेन्डा सहित सरकार अघि बढिरहेकाे बताएका छन् ।
प्रेस सेन्टर नेपाल मकवानपुरले सोमबार हेटौंडामा गरेको पत्रकार भेटघाटमा बोल्दै उपमहासचिव पुनले उक्त कुरा बताएका हुन् । ‘प्रतिष्पर्धामा चलेको समय छ’ उनले भने ‘हरेक कुरामा प्रतिष्पर्धा नगरी कल्याणकारी राज्यकाे परिकल्पनाका साथ अघि बढ्नुपर्छ ।’
उनले सरकार गठन भएकाे पाैष १० गते एकबर्ष पुग्ने भएकोले समिक्षात्मक छलफल गर्न जरुरी रहेको बताए । पहिलो चौमासिकमा सरकारको काम सुस्त देखिनु स्वभाविक रहेको बताउदै उनले भने आगामी चौमासिकमा सरकारले गति लिनेछ ।
विश्वव्यापी आर्थिक मन्दिको बेला नेपाल अछुतो रहन नसक्ने भन्दै पुनले नेपाललाई श्रीलंका बन्न नदिन मुलुकलाई लयवद्ध अर्थतन्त्रमा पुन फर्कनेमा सरकार ढुक्क भएको बताए । ‘जग्गाकाे कित्ताकाट खुलेपछि पछिल्लाे समय आर्थिक क्रियाकलाप चलायमान हुन थालेको छ, अबकाे बजेट तथा नीतिमा मध्काललिन समस्यामा फाेकस गर्नु पर्छ’ उनले भने ।
<span;>एक अर्को प्रसङ्गमा उपमहासचिव पुनले<span;> २०६४ सालमा संविधान बनाउन नसकेर संसद विगठन गर्नुनै माओवादी पार्टी ओरालो लाग्नुको प्रमुख कारण भएको बताए । त्यसयता पार्टीमा आएको टुटफुटले समस्या निम्त्याएको बताउदै उनले माओवादी कमब्याकको चरणमा रहेको बताए । ‘हामीले संविधान बनाउन सकेनौ, सेटब्याक भो , त्यसपछि टुटफुट भो’ उनले भने, एक पटक झरेपछी कमब्याक गर्न समय लाग्छ, तर हामी उठछौ । नेकपा एमाले पार्टी २०५१ मा फुटेपछी पहिलो पार्टी बन्न १९ वर्ष लागेको बताउँदै पुनले माओवादी पनि त्यही लाइनमा रहेको बताए ।
जनतासँग माओवादी विशेष रूपान्तरण अभियान“ अन्तरगत नगरस्तरीय स्कुलिङ कार्यक्रममा प्रशिक्षण दिन पुन हेटौंडा आएका हुन् ।
प्रशिक्षण कार्यक्रममा उपमहासचिव अनन्तले कम्युनिष्ट आन्दोलनको इतिहास र कार्यदिशा, माओवादी केन्द्रका केन्दीय सदस्य एवं बागमती प्रदेश सरकारका मुख्यमन्त्रीको राजनीतिक सल्लाहकार डिपी ढकालले राजनीतिक अर्थशास्त्र, केन्द्रीय सदस्य एवं विद्यार्थी नेता लेखनाथ न्यौपानेले वैज्ञानीक समाजवाद, बागमती प्रदेशका मुख्यमन्त्री शालिकराम जम्कट्टेलले सरकारको काम र पार्टीको अन्तरसम्बन्ध बारे प्रशिक्षण दिएका छन् ।
नगरस्तरीय स्कुलिङ कार्यक्रममा नगर भित्रको जिल्ला समितिको सदस्य, नगर पार्टीको सम्पूर्ण पदाधिकारी तथा सदस्य, नगरको सम्पूर्ण सल्लाहकार, वडा समितिको पदाधिकारी सहित वडा सदस्य, जवस÷ मोर्चाको पदाधिकारीहरुको सहभागिता रहेको नेकपा (माओवादी केन्द्र) बागमती प्रदेश कमिटी सदस्य एवं हेटौंडा उपमहानगरपालिका समिति इन्चार्ज विवेक राईले जानकारी दिए ।
काठमाडौं । नेपाली कांग्रेस बागमतीकाे पहिलो प्रदेश सम्मेलनको लागि पूर्ण बैठक बसेकाे छ । काँग्रेस बागमती प्रदेशको आगामी पुस ७ गते हुने सम्मेलनकाे तयारीको लागि आईतबार काठमाडौंमा कार्यसमितिको पूर्ण बैठक बसेकाे हाे ।
कांग्रेस बागमती प्रदेश सभापति ईन्द्रबहादुर बानियाँको अध्यक्षतामा बसेको कार्यसमितिको आठौं पूर्ण बैठकले पुस ७ गते हुने पहिलो प्रदेश सम्मेलनको लागि हालसम्म भएकोे कार्य तथा आवश्यक तयारीकाे समिक्षा गरेको छ । बैठकले सम्मेलनमा प्रस्तुत गरिने राजनीतिक, सांगठानिक र आर्थिक प्रतिवेदन पास गरेकाे छ ।
यसैगरी कार्यसम्पादन समितिले हालसम्म गरेका निर्णयहरु अनुमोदन गरिएको कांग्रेस बागमती प्रदेशका प्रवक्ता तिलक रुवालीले जानकारी दिए । प्रवक्ता रुवालीका अनुसार यसअघि कार्यसम्पादन समिति बैठकले सम्मेलन सम्पन्न गर्नका लागि बनाईएको विभिन्न समितिका संयोजकहरुले अहिलेसम्म भएको कार्यप्रगति र गर्न बाँकी कार्यको बारेमा आ–आफ्नो धारणा राखेकोका थिए ।
काठमाडौ एक पार्टी प्यालेसमा पुस ७ गते हुने पहिलो प्रदेश सम्मेलनमा नेपाली कांग्रेसका केन्द्रीय सभापति शेरबहादुर देउवाको प्रमुख आतिथ्यता तथा केन्द्रीय पदाधिकारीहरु र सातै प्रदेशका प्रदेश सभापतिहरुको उपस्थितिमा रहने उनले जानकारी दिए ।
मकवानपुर । मकै खेती राम्राेसँग नफस्टाएपछि आजित भएका राघब हुमागाई अब काेदाे खेती तर्फ आकर्षित भएका छन् । स्थानीय सरकारले रैथाने बालीलाई प्राेत्साहन गरेपछी उनी त्यसतर्फ आशावादी भएका हुन् ।
स्थानीय सरकारले स्थानीय हावा पानी र माटाे सुहाउँदाे अन्न तथा नगदे बालीलाई प्राेत्साहन गर्ने नीति लिएपछि किसानमा केही आशा बढेकाे भिमफेदी गाउँपालिका ५ की कान्छीमाया बजुले बताइन् । अघिल्लाे कार्यकालका जनप्रतिनिधिहरुले तरकारी र फलफूलमा अनुदान दिएपछि मकवानपुरगढी गाउँपालिकाका कृषकहरु तरकारी खेतीतर्फ आकर्षित भएका थिए । अहिले स्थानीय रैथाने प्रजातिकाे बालिमा न्युनतम समर्थन मुल्य ताेक्दै अनुदानकाे समेत व्यवस्था गाउँपालिकाहरुले गरेका छन् ।
मकवानपुरकाे २ वटा गाउँपालिकाले काेदाे,धानकाेदाे, फापर तथा जुनेलाेकाे न्युनतम समर्थन मुल्य ताेक्दै अनुदानकाे समेत व्यवस्था गरेकाे हाे । गाउँपालिकाले किसानलाई अनुदान समेत दिने भएकाे छ । मकवानपुरको मकवानपुरगढी र भीमफेदी गाँउपालिका काेदाे,धानकाेदाे, फापर तथा जुनेलाे खेती गर्ने किसानलाई अनुदान प्रदान गर्ने घोषणा गरेपछि स्थानीय किसानहरु उत्साहित भएका हुन् ।

मकवानपुरकाे हेटाैंडा उपमहानगरपालिका मकवानपुरगढी गाउँपालिका बैकैया गाउँपालिका बागमती गाउँपालिकाहरुमा ताेरी लगाउने किसान बढेका छन् ।
तोरीखेतीतर्फ मकवानपुरका कृषकहरुको आकर्षण बढ्न थालेपछी आलु काउलीलगायतकाे तरकारी खेती घटेकाे छ । तोरीको तेलको माग तथा मूल्यमा पछिल्लो समय वृद्धि हुँदै गएपछि तोरी खेतीतर्फ मकवानपुरकाे कृषककाे आकर्षण बढ्न थालेकाे हाे ।

मकवानपुरकाे हेटौंडा उपमहानगरपालिकाको हटिया र हर्नामाडीलगायतमा पनि ताेरीकाे खेती बढेकाे छ । गहँ लगाउने र बाली उठाउने झण्झट बढी भएकाे र आम्दानी समेत काम भएपछी ताेरी लगाउन थालेकाे मकवानपुरगढी गाउपालिका ५ कि लक्ष्मि संजेलले बताइन् । ‘गहुँ लगायाे उठाउन झण्झट आलु काउलीमा मेहनत धेरै ताेरी लगाउँदा अलि सहज हुन्छ तेलकाे मुल्याे बढेकाे बढेइ छ किनेर खानु पर्ने समस्या पनि ताेरीले टार्छ’ उनले भनिन् ।
यस वर्ष तोरी खेतीकाे क्षेत्रफल बढेकाे मकवानपुरगढी गाउँपालिकाका कृषि अधिकृत चौधरी बताउँछन् ।अहिले हेटौंडा उपमहानगरपालिकाको पूर्वी क्षेत्र हटिया, हर्नामाडी, मकवानपुरगढी गाउँपालिका क्षेत्रका धेरै किसानका खेतमा तोरी फुल्न थालेको छ ।
मकवानपुरका किसानले विकास, प्रगती, प्रिती, उन्नती, चितवन जस्ता स्थानीय जातका तोरी लगाउँदै आएकाे चौधरीले बताए । कृषकहरु अन्य हिउँदे बाली छाडेर तोरीखेती लगाउन थालेको किसानहरु बताउँछन् । हिउँदे बालीको रुपमा लगाइने तोरीखेतीलाई धेरै मेहनत नपर्ने हुँदा कृषकहरुको आकर्षण तोरी खेतीतर्फ बढ्दै गएको हो ।
तोरी समशीतोष्ण जलवायु बाली भएकाले यसले धेरै चिसो र कुहिरो सहन सक्दैन । बढी चिसो र कुहिरो हुँदा उत्पादन कम हुन्छ । तोरीमा ४० देखि ४५ प्रतिशत तेल हुने गर्दछ भने पनि पशु आहाराको रुपमा र प्राङ्गारिक मलको रुपमा प्रयोग हुँदै आएको छ । तोरी कात्तिक, मङ्सिरमा छरेर माघ, फागुनमा बाली भित्र्याउने गरिन्छ । अहिले किसानले मकैकाे भित्रिबालीकाे रुपमा समेत ताेरी छरेका छन् याे तरकारीकाे लागि साग र गुन्द्रुककाे रुपमा विक्री हुन्छ ।