मकवानपुर । महेन्द्रराजमार्ग अन्तर्गत पूर्वी नवलपरासीको सबैभन्दा लामो दुम्किबासको विनयी खोलामा पक्की पुल ढलान ढीलो भएको प्रति यातायात व्यवासायीहरुको ध्यानाकर्षण भएको जनाएको छ ।
पुल भाँचिएपछि हिउँदमा खोलाबाट सवारी चलाइएको भए पनि वर्षा लागेसँगै समस्या बढेको छ । यही राजमार्ग अवरुद्ध भएको कारण अहिले भैरहवा नाकाबाट भित्रने सामग्रीहरु ढुवानीमा समस्या भएको छ । यता यातायात व्यवसायीहरुको मालवाहक गाडीहरु, यात्रु वाहक बसहरु समेत ग्यारेजमा थन्किएपछि रोजगारीमै समस्या भएको छ ।
सर्वसाधारणको समस्या प्रति गम्भिर हुन सम्बद्ध निकायलाई नारायणी यातायात व्यवसायी कम्पनी प्रालिका अध्यक्ष गोकर्ण पराजुलीले अनुरोध गरे । “ऋणमा लिइएका यातायातहरु राजमार्गको कारण ग्यारेजमा थन्किएपछि व्यवसायीहरु झनै ऋणमा डुब्दै जान्छन्” अध्यक्ष पराजुलीले भने “पहुँच हुनेहरु माथि माथि उड्छन्, सर्वसाधारणहरुको जीवनको कष्ट कसले बुझ्ने ?”
राजमार्ग बन्दको कारण यातायात मजदुरहरु आफ्नो दैनिकी गुजार्नै समस्या हुने अवस्थामा पुगेको गुनासाहरु आउन थालेको अध्यक्ष पराजुलीले बताए । पूर्व–पश्चिम राजमार्गअन्तर्गत पूर्वी नवलपरासीमा पर्ने दुम्कीबासको पुल भाँचिएको ६ महिना पुग्न लाग्दा पनि सरकारले विकल्प नदिँदा गाडी चालक र यात्रुहरूले सास्ती खेप्नुपरेको छ । गएको पुस २६ गते विनयी खोलाको पुल भाँचिएको थियो । पुल भाँएिपछि बनाएको डाइभर्सन दर्जन पटक बगिसकेको छ । डाइभर्सन बगेपछि आवातजावात ठप्प हुने र गाडीको लामो लाइन लाग्ने गरेको थियो ।
यसैमा सास्ति भोग्दै आएका सर्वसाधारणले पछिल्लो साताबाट राजमार्ग नै बन्द भएपछि मार खेप्नु परेको छ । यो राजमार्गमा दैनिक झन्डै १८ हजार गाडी चल्ने गरेको थियो ।
भैरहवा–चितवन–हेटौंडा रुटमा ट्रक चलाउँदै आउनुभएका केशव श्रेष्ठले पछिल्लो साता घरैमा बस्नु पर्दा आर्थिक समस्या भएको बताउनु भयो । “बाटो नै बन्द छ, काम गर्नै पाएको छैन, आर्थिक समस्याको कुरा कसलाई सुनाउनु” उनले भने “एक पटक त गाडी साहुलाई गुनासो गरेर केही पैसा अग्रीम लिएँ, कति पटक यसरी चलाउनु ।”
भैरहवाबाट काठमाण्डौ पुग्न एक साता लागेपछि अहिले आफू काठमाण्डौमा थन्किनु परेको अर्का ट्रक चालक विबेक कठायतले बताए । “एकै ठाउँमा ४ दिन त बर्दघाटमै रोकिएँ, ट्रकमा आलु र प्याज बोकेको थिएँ, आधा त कुहियो होला” कठायतले भने “ट्रकमा भएको आलु र प्याज कुहिएर गन्हाउँदा गाडीमै सुत्नसमेत समस्या भएको थियो ।” अहिले काठमाण्डौमा अल्झिनु पर्दा आर्थिक समस्या भएको उनले बताए ।
“प्रकृतिसँग त कसले सक्छ र, तर मौसमी पूर्वानुमान त थियो नि, सोही अनुसारको रफ्तारमा काम नहुँदा यो सास्तीको शिकार जनता हुनु परेको हो” नेपाल यातायात राष्ट्रिय महासंघका केन्द्रीय सदस्य समेत रहेका पराजुलीले बताए ।
विनय खोलामा ५२ वर्षअघि निर्माण भएको फलामे पुल ६ महिनाअघि भाँच्चिएका कारण त्यहाँ डाइभर्सन सडकबाट आउजाउ भइरहेको थियो । गतसाता यात्रु बोकेको बस डाइभर्सनबाट बगाएपछि अहिले यो राजमार्गबाट साना सवारीहरुमात्रै सुचारु छन् । मालवाहक ट्रक र यात्रुबाहक बसहरु पूर्ण रुपमा बन्द रहेको पूर्वी नवलपरासी जिल्लाका प्रहरी प्रमुख प्रहरी उपरीक्षक यादव ढकालले बताए ।
आगामी शनिबारबाट पुल सञ्चालनमा ल्याइनेछ : प्रवक्त खनाल
विनयी खोलामा निर्माण भएको नयाँ पक्की पुल आउँदो शनिबारबाट सञ्चालनमा ल्याउने उद्देश्यका साथ आफूहरुले काम गरिरहेको सडक विभाग अन्तरगत बुटवल नारायणगढ सडक आयोजना, पूर्वी खण्डका सूचना अधिकारी तथा प्रवक्ता इन्जिनियर शिव खनालले बताए ।
“बाटोको ढलान सकिएको छ, अब पुलको मात्रै भाग बाँकी छ” खनालले भने “आगामी ५ तारिख (२१ असार) बाट पुल सञ्चालनमा ल्याउने जमर्को हाम्रो तर्फबाट छ।” यद्यपी मौसमले साथ दिएन भने केही ढीलाइ हुनसक्ने उनले बताए । चिनियाँ निर्माण कम्पनी चाइना स्टेट इन्जिनियरिङ कर्पोरेसन, परामर्शदाता तथा आयोजनाबीचको छलफलअनुसार शनिबारबाट पुलको प्रयोगमा खुला गरिने तयारी भएको उनले बताए ।
गत २६ पुसमा मालबहाक ट्रक ठोक्कीदा पुल भाँचिएको थियो। त्यसपछि अस्थायी डाइभर्सनमार्फत यातायात सञ्चालन हुँदै आएकोमा पछिल्लो साता पूर्ण रुपमा राजमार्ग ठप्प छ ।
चिनियाँ निर्माण कम्पनी चाइना स्टेट इन्जिनियरिङ कर्पोरेसन र परामर्शदाता कम्पनीलाई अबको दुई महिना दाउन्ने सडकमा केन्द्रित भएर काम गर्न निर्देशन दिइएको बताइएको छ । चिनियाँ पक्ष पनि चाँडै काम गर्न र परिणाम देखाउनेतर्फ सकारात्मक देखिएको दावि गरिएको छ।
मकवानपुर । बागमती प्रदेश सरकारको आर्थिक सर्वेक्षण सार्वजनिक भएको छ । शुक्रबारको प्रदेशसभामा प्रदेश सरकारको आर्थिक सर्वेक्षण पेश गरिएको हो ।
उक्त सर्वेक्षण अनुसार चालु आर्थिक वर्षमा प्रदेशको आर्थिक वृद्धिदर ५.१८ प्रतिशत रहने अनुमान गरिएको छ । प्रदेशका आर्थिक मामिला तथा योजना मन्त्री कुन्दनराज काफ्लेले प्रदेशको समग्र आर्थिक स्थितको प्रतिवेदन सभामा प्रस्तुत गरेका हुन् । उनले प्रस्तुत गरेको आर्थिक सर्वेक्षण अनुसार चालू आर्थिक वर्षमा बागमती प्रदेशको कुल ग्राहस्थ उत्पादन २२ खर्ब ३० अर्ब रुपैयाँ रहने प्रारम्भिक अनुमान गरिएको छ ।
प्रदेशले राष्ट्रिय तहको कुल ग्राहस्थ उत्पादनमा ३६.५२ प्रतिशत योगदान पुर्याउने संशोधित अनुमान रहेको छ । चालू आर्थिक वर्षमा पनि प्रतिव्यक्ति कुल ग्राहस्थ उत्पादनमा प्रदेश अगाडी रहने प्रारम्भिक अनुमान गरिएको छ । बागमती प्रदेशका नागरिकको प्रतिव्यक्ति आय २ हजार ६०२ अमेरिकी डलर रहेको छ । प्रदेशको कुल ग्राहस्थ उत्पादन उपभोक्ताको मूल्यमा २२ खर्ब ३० अर्ब रहने अनुमान गरेको छ ।
प्रदेश सरकारको चालु आर्थिक वर्षको फागुनसम्मको खर्च २५.६२ प्रतिशत पुगेको छ । चालु तर्फ ३५.२२ प्रतिशत खर्च भएको छ भने पुँजीगत तर्फ १९.९४ प्रतिशत मात्र खर्च गरिएको छ । सोही अवधिमा सरकारको कुल आय ४४ अर्ब ५६ करोड ५३ लाख रुपैयाँ रहेको छ । आर्थिक सर्वेक्षण अनुसार सवारी साधन करबाट प्रदेश सरकारले १२ अर्ब ५० करोड रुपैयाँ सङ्कलन गर्ने लक्ष्य राखेकोमा फागुनसम्म ७ अर्ब २२ करोड रुपैयाँ सङ्कलन भइसकेको छ ।
नेपाल राष्ट्र बैङ्कले सुरु गरेको प्रदेशगत मुद्रास्फीति प्रकाशन अनुसार, फागुन महिनामा बागमती प्रदेशको मुद्रास्फीति दर २.९८ प्रतिशत रहेको छ । नेपाल जीवनस्तर सर्वेक्षण अनुसार, बागमती प्रदेशमा गरिबीको रेखामुनिको जनसङ्ख्या १२.५९ प्रतिशत, बहुआयामिक गरिबी ७ प्रतिशत, गरिबिको गहनता ०.८९ प्रतिशत र फैलावट १२.६८ प्रतिशत रहेको छ ।
६ वटा समितिको प्रतिवेदन पेश
बागमती प्रदेशसभामा ६ वटा विषयगत समितिको प्रतिवेदन पेश गरिएको छ । प्रदेशसभाको शुक्रबारको बैठकमा ६ वटा संसदीय समितिको विषयगत वार्षिक प्रगति प्रतिवेदन पेश भएको हो ।
प्रदेश मामिला समितिका सभापति छिरिङ दोर्जे लामा, सार्वजनिक लेखा समितिका सभापति श्रीराम लामिछाने, शिक्षा, स्वास्थ्य तथा कृषि समितिका सभापति ठाकुरप्रसाद ढकाल, उद्योग, पर्यटन तथा वातावरण समितिका सभापति आनन्दकुमार श्रेष्ठ, अर्थ तथा विकास समितिका सभापति नुरज श्रेष्ठ र विशेषाधिकार समितिका सभापति मायादेवी शर्माले वार्षिक प्रतिवेदन पेश गरेका हुन् ।
यसैगरी प्रदेश चलचित्र विकास सम्बन्धी विधेयकलाई विषयगत समितिमा पठाउन बैठकले स्वीकृति प्रदान गरेको छ । बैठकमा आन्तरिक मामिला तथा कानून मन्त्री सुरजचन्द्र लामिछानेले प्रदेश चलचित्र विकास सम्बन्धी विधेयकलाई दफावार छलफलका लागि समितिमा पठाइयोस् भन्ने प्रस्ताव पेश गरेका थिए । उक्त प्रस्तावलाई सभामुख भुवनकुमार पाठकले निर्णयार्थ सभामा पेश गर्दा विषयगत समितिमा पठाउन सर्वसम्मत स्वीकृति भएको थियो ।
हेर्नुहोस प्रदेशको आर्थिक सर्वेक्षण
Economic Survey 2081-82_bgl63kdमकवानपुर । बागमती प्रदेश राजधानी हेटौंडा तथा मकवानपुर जिल्लाको दीर्घकालीन विकासलाई लक्षित गर्दै मुख्यमन्त्री बहादुर सिंह लामालाई प्रदेश गौरवको योजना बुझाइएकाे छ।
बागमती प्रदेशसभा सदस्य एकालाल श्रेष्ठले प्रदेश गौरवको योजना समेटिएको विस्तृत पत्र मुख्यमन्त्रीलाई बुझाएका हुन् । सांसद श्रेष्ठले योजनाहरू बुझाउँदै आर्थिक वर्ष २०८२/८३ को बजेटमा समावेश गर्न समेत आग्रह गरेका छन् । प्रस्तावित गौरवका योजना हेटौंडा राजधानीको रूपमा सुशोभन गर्न, भौतिक पूर्वाधार विकास, सामाजिक सेवा प्रवर्द्धन तथा दिगो शहरी विकासका लागि अपरिहार्य रहेको उनले बताए ।
प्रदेशको प्रशासनिक भवन निर्माण, हेटौंडा–काठमाडौं सुरक्षित मार्ग (भीमफेदी–कुलेखानी), हेटौंडा बाइपास सडक (चुरियामाई–चोकिटोल), कर्रा नदी कोरिडोर, एकीकृत शहरी विकास योजना (टाउन प्लानिङ), प्रदेश सभा गृह निर्माण, हेटौंडा चक्रपथ निर्माण (PTMP अन्तर्गत), मदन भण्डारी स्वास्थ्य विज्ञान प्रतिष्ठान, प्रदेश विश्वविद्यालय लगाएतका योजनालाई आगामी आर्थिक वर्ष २०८२-८३ को बजेटमा आवश्यक रकम सहितको व्यवस्था गर्न उनले आग्रह गरे ।
श्रेष्ठले योजना पत्र पेश गर्दै प्रदेश राजधानी हेटौंडाको भौतिक संरचना अत्यन्तै कमजोर रहेको, प्रशासनिक सेवा सुविधाको अभाव रहेको, शहरीकरण अव्यवस्थित भएको, तथा शिक्षा र स्वास्थ्य जस्ता क्षेत्रमा गम्भीर लगानीको खाँचो रहेको उल्लेख गरेका छन्। सांसद श्रेष्ठको प्रस्तुति र योजनाको औचित्यप्रति मुख्यमन्त्री लामाले गम्भीर चासो व्यक्त गर्दै प्रदेश सरकार विकासका आधारहरूमा स्पष्ट र कार्यान्वयनमुखी ढंगले अघि बढ्ने बताए। उनले भने, “हामी जनअपेक्षाअनुकूल बजेट ल्याउने तयारीमा छौं। यस्ता गम्भीर, यथार्थपरक र भविष्यदृष्टिकोणयुक्त योजनाहरूलाई प्राथमिकतामा राखिनेछ। केही योजना तुरुन्त कार्यान्वयनमा लैजान सकिन्छ भने केहीलाई चरणबद्ध रूपमा अघि बढाइनेछ।”
मुख्यमन्त्रीले योजना कार्यान्वयनका लागि प्रदेश योजना आयोग, सम्बन्धित मन्त्रालय र प्राविधिक निकायहरूसँग समन्वय गरेर योजना थप परिमार्जन, विस्तृत परियोजना प्रतिवेदन (DPR) तयारी र बजेट व्यवस्थापन गर्न निर्देशन दिने बताए।
मकवानपुर । मकवानपुर सुनचाँदी व्यवसायी संघ मकवानपुरले सुनमा लगाइएकाे २ प्रतिशत विलासिताकाे कर खारेज हुनु पर्ने माग गरेकाे छ । संघले बुधबार हेटौंडामा पत्रकार भेटघाट गरी आफ्ना माग सहित विरोधका कार्यक्रम घोषणा गरेकाे छ ।
पत्रकार भेटघाटमा संघ अध्यक्ष पवन शाक्यले सुनमा लगाइएकाे २ प्रतिशत विलासिता कर र बहुमुल्य हिरा पत्थरमा लगाइएकाे १३ प्रतिशत भ्याट खारेज गर्नुपर्ने, सुनकाे भन्सार दर ६ प्रतिशत कायम गर्नुपर्ने, सुनचाँदीकाे काराेबारकाे लागि प्रष्ट नीति नियमावली निर्माण गर्नुपर्ने माग राखेको बारे जानकारी दिए । ‘सुनचाँदी व्यवसायीले कमाउनु मात्रै भन्ने साेच राखेकाे छैन’ उनले भने ‘हामीले उपभाेक्ताकाे अधिकारलाई पनि ध्यानमा राखेका छाैं ।’
सरकारले आर्थिक वर्ष २०८२।०८३ काे बजेट भाषणमा उल्लेखित कर लगाउने उद्देश्य सही नभएकाे उनले बताए । ‘सरकारले लगाउने करले हालको मुल्यमा एक ताेला सुन बनाउँदा उपभाेक्ताले करिव ३५ हजार बढी खर्च गर्नुपर्ने हुन्छ’ उनले भने । नीति बनाएर राज्यलाई दिएकाे १०/१५ बर्ष हुँदा समेत कुनै चासाे नदिएकाे उनले जानकारी दिए । ‘सुनचाँदी व्यवसायीले सरकारसँग स्पष्ट नीति तथा आवश्यक नियमावलीकाे माग गरेका छाैं तर त्याे हाल सम्म प्राप्त हुन नसकेकाे उनले बताए ।
बढाइएकाे करकाे विषयमा संघले बुधबारबाटै हातमा कालाे पट्टी बाधेर विरोध जनाएकाे छ । यसैगरी २९ र ३० जेठ विहान हेटाैडा -१० स्थित संघकाे कार्यालयबाट विराेध र्याली गर्ने तथा सिमाचाेकमा काेणसभा गर्ने भएकाे छ । यस्तै २९ र ३० जेठमा देशव्यापी सुनचाँदी पसल बन्द गर्ने कार्यक्रम रहेकाे छ। हेटौंडा बजारमा मात्रै करिव २ सय वटा र मकवानपुर जिल्लाभर करिव २३५ वटा सुनचाँदी पसल छन् ।
चितवन। बागमती प्रदेश सरकारका कृषि तथा पशुपन्छी विकास मन्त्री प्रकाश श्रेष्ठले ‘कृषि ज्ञानरत्न’ कार्यक्रमले युवामा उत्साह थपेको बताएका छन् । चितवनको कृषि तथा वन विज्ञान विश्वविद्यालयमा बागमती प्रदेशको आर्थिक सहयोगमा निर्मित ‘बीएसएल टु प्लस प्रयोगशाला भवन’को सोमबार उद्घाटन गर्दै मन्त्री श्रेष्ठले उक्त कुरा बताएका हुन् ।
‘प्रदेश सरकारले सुरु गरेकाे कृषि ज्ञानरत्न कार्यक्रम अन्तर्गत विभिन्न शैक्षिक तह पार गरेका युवालाई लक्षित गरी कृषि अनुदान कार्यक्रम सञ्चालनमा ल्याएको छ’ उनले भने । उक्त कार्यक्रमबाट स्नातक तह पार गरेका युवाहरूलाई ८ लाख रुपैयाँ, स्नातकोत्तर तहका लागि १० लाख रुपैयाँ, र एमफिल गर्दै पीएचडी अध्ययन तयारी गरिरहेकाे युवाका लागि २२ लाख रुपैयाँसम्मको कृषि अनुदान प्रदान गरिदै आएकाे मन्त्री श्रेष्ठले जानकारी दिए ।
‘प्रदेशभित्र जुनसुकै विषय अध्ययन गरेका युवाले कृषि क्षेत्रमा लाग्ने इच्छा राखेमा उक्त कार्यक्रम मार्फत अनुदान लिन सक्ने व्यवस्था गरिएको छ’ उनले भने ‘हामीले ०८१/०८२ सालमा सुरु गरेको कृषि ज्ञानरत्न कार्यक्रमलाई आर्थिक वर्ष ०८२/०८३ मा वृद्धि गर्दै थप विस्तार गर्न गइरहेका छौं।’ उनले विदेश पलायन रोक्दै स्वदेशमै उद्यमशिलता र कृषि कर्ममा लाग्न युवाहरूलाई आग्रह समेत गरेका छन् ।
यसैगरी बागमती प्रदेशका वन तथा वातावरण मन्त्री कृष्णप्रसाद सिलवालले विश्वविद्यालयलाई गुणस्तरीय र परिणाममुखी अध्ययन–अध्यापनमा जोड दिन सुझाव दिएका छन् । ‘नयाँ भवन मात्र पर्याप्त होइन’ मन्त्री सिलवालले भने ‘अब यो भवनमार्फत अध्ययन अनुसन्धानलाई बलियो बनाउँदै चितवनलाई कृषि क्षेत्रमै अग्रणी बनाउनु पर्छ।’
अन्तर्राष्ट्रिय विश्वविद्यालयहरूको उदाहरण दिँदै उनले भने ‘चितवनको कृषि तथा वन विज्ञान विश्वविद्यालयले पनि अनुसन्धानलाई प्राथमिकता दिनुपर्छ ।’ प्रदेश सरकार पनि अनुसन्धानमुखी कार्यका लागि अनुदान दिन तयार रहेको उनले बताए ।
मन्त्री श्रेष्ठद्वारा चैनपुरकाे फोहोर प्रशोधन उद्योगको अवलोकन
कृषि तथा पशुपन्छी विकास मन्त्री श्रेष्ठले सोमबार नै चितवनको खैरहनी नगरपालिका वडा नं ४ स्थित चैनपुरमा रहेको सफा ऊर्जा उत्पादन प्रालि द्वारा सञ्चालित फोहोर प्रशोधन उद्योगको अवलोकन गरेका छन् ।
सफा उर्जाका प्रतिनिधि योगेन्द्र सिंह केसीले फोहोर संकलन, प्रशोधन, प्राङ्गारिक मल उत्पादन तथा वातावरण संरक्षणमा कम्पनीले गरिरहेका कामहरूको विस्तृत जानकारी दिएका थिए । केसीका अनुसार सफा उर्जाले स्थानीय क्षेत्रबाट फोहोर संकलन गरी त्यसलाई आधुनिक प्रविधिबाट प्रशोधन गर्ने काम गरिरहेको छ।
उद्योगको निरीक्षणपछि मन्त्री श्रेष्ठले वातावरणमैत्री प्रविधिको प्रयोग गर्दै उद्योगले स्थानीय समस्या समाधानतर्फ देखाएको पहल सराहनीय भएको बताए । ‘यस्ता परियोजनाहरूले प्रदेशको वातावरण संरक्षण र कृषि उत्पादनमा सकारात्मक प्रभाव पार्छ’ उनले भने ।उद्योग परिसरमा मन्त्री तथा प्रतिनिधिलाई सफा उर्जाका निर्देशक निर्णय पौडेलले स्वागत गरेका थिए।
उद्योग बाणिज्य संघ मकवानपुरका अध्यक्ष प्रमोद सिंह रानाभाट, उपाध्यक्ष उज्वल चौलागाईं तथा प्रतिनिधिहरुकाे साथमा मन्त्री श्रेष्ठले उद्योगको निरीक्षण गरेका हुन् ।