मकवानपुर । बागमती प्रदेश संस्कृत पर्यटन तथा सहकारी मन्त्री बिमल ठकुरीले सहकारीको कारण सर्वसाधारणलाई सानोतिनो गर्जो टार्न सहज भएको बताएका छन् । युवा बचत तथा ऋण सहकारी संघको १८ औं बार्षिक साधारण सभामा मन्त्री ठकुरीले यस्तो बताए हुन् ।
सर्वसाधारणको सुख दुखको साथी सहकारीहरू नियम संगत चल्नुपर्नेमा सधै सचेत हुनुपर्ने उनले बताए । “सहकारीले मानिसको भविष्य्य सुनिश्चित गरी सुनौलो बनाउँछ” उनले भने ।
“सहकार्य गरौ सुनौलो भविष्य बनाऔं” भन्ने मुल नाराका साथ स्थापित युवा साकोस स्थापनाको १८ बर्षमा मकवानपुर जिल्लामा रहेका सहकारीहरुमध्ये बचत तथा ऋणको कारोबार गर्ने संस्थाहरुमा मकवानपुर जिल्ला भरी कार्यक्षेत्र भएको एकमात्र पहिलो अब्बल दर्जाको सहकारीको रुपमा स्थापित भएको छ ।
सहकारीले आर्थिक वर्ष २०७९/०८० मा शेयर सदस्य संख्या २ हजार ५९२ बाट वृद्धिगरी २ हजार ६८७ पुऱ्याईएको छ । संस्थाको बचत हाल २१ करोड ३१ लाख ३९ हजार ६९७ रहेको छ । यसैगरी शेयर पूँजी रकम २ करोड ५० लाख ९४ हजार ३०० रहेको अध्यक्ष राजु गौतमले बताए । संस्थाले हाल कर्जामा २० करोड ३१ लाख ४१३ लगानी गरेको छ ।
साधारण सभाले अध्यक्ष राजु गौतम सचिव सुरेश रेग्मी, कोषाध्यक्ष प्रकाश लम्साल, ऋण उपसमिति संयोजक सुर्यप्रसाद घिमिरे, लेखा संयोजक सन्तोष घिमिरेको प्रतिवेदन पास गरेको छ ।
साधारणसभामा जिल्ला सहकारी संघ/ जिल्ला दुग्ध संघको अध्यक्ष हरी प्रसाद कंडेल, हेटौंडा उपमहानगरपालिका सहकारी शाखा प्रमुख हिमप्रसाद पौडेल, जिल्ला बचत संघ अध्यक्ष कल्पना श्रेष्ठ, राष्ट्रिय सहकारी बैंकका रामेश्वर अर्याल, कृषि विकास बैंक प्रबन्धक नुर प्रसाद गौतमलगायतको उपस्थिति रहेको थियोे ।
मकवानपुर । बागमती प्रदेश सभाले प्रदेश हस्तकलाग्राम स्थापना तथा संचालन सम्बन्धमा व्यवस्था गर्न बनेको विधेयक सर्व सम्मत पारित गरेको छ । सोमवारकाे प्रदेश सभाको बैठकले उक्त विधेयक सर्वसम्मत पारित गरेकाे हाे ।
विधेयक सभामा दर्ता भएकाे करिब एक वर्षपछि पारित भएकाे हाे । तत्कालिन उद्योग , वाणिज्य , भुमि तथा प्रशासन मन्त्री रामकृष्ण चित्रकारले २५ असोज २०८० मा उक्त विद्येयक दर्ता गरेका थिए । प्रदेशकी उद्योग, वाणिज्य, भूमि तथा प्रशासनमन्त्री सुकमाया तामाङले उक्त विधेयक पारित गरियोस् भन्ने प्रस्ताव पेश गरेकी थिइन् । सभामुख भुवनकुमार पाठकले निर्णयार्थ सभामा पेस गरेकाे उक्त विधेयक प्रदेश सभाबाट सर्वसम्मत स्वीकृत भएकाे थियाे ।
आईतवार उद्योग, पर्यटन तथा वातावरण समितिका सभापति आनन्दकुमार श्रेष्ठले प्रदेश हस्तकलाग्राम स्थापना तथा संचालन सम्बन्धमा व्यवस्था गर्न बनेको विधेयकमाथि समितिले गरेको निर्णयको प्रतिवेदन पेश गरेका थिए । विद्येयक पारित भएसँगै हस्तकलालाई बागमती प्रदेशको अर्थतन्त्रको प्रमुख क्षेत्रको रुपमा विकसित गरिने मन्त्री तामाङले बताइन् । विधेयक पारित भएसँगै स्वदेशी पुँजी, स्थानीय सीप तथा कला र स्रोतको अधिकतम परिचालन गराई स्वदेशमा निर्मित हस्तकलाका वस्तुहरुको पहिचानलाई विश्व बजारमा स्थापित गर्न मद्दत पुग्ने मन्त्री तामाङले जानकारी दिइन् ।
स्वदेशमा समेत हस्तकला सामग्रीहरुको प्रयोगमा वृद्धि गर्न र छरिएर रहेका लघु तथा घरेलु हस्तकला उद्योगहरुलाई एकीकृत गरी उत्पादन र हस्तकला उद्योगहरुको उत्पादकत्व अभिवृद्धि गर्न बागमती प्रदेशभित्र हस्तकलाग्राम स्थापना र सञ्चालनकाे कानुनी व्यवस्था गर्न विधेयक प्रभावकारी हुने उनले बताइन् ।
प्रदेश हस्तकलाग्राम स्थापना तथा संचालन सम्बन्धमा व्यवस्था गर्न बनेको विधेयक पारित भएसँगै तीन गुणाले उत्पादन र निर्यात बढाउन सकिने बाटो खुलेको हस्तकलाग्राम महासंघका केन्द्रिय अध्यक्ष प्रचण्ड शाक्यले बताए । शाक्यका अनुसार ८० प्रतिशत हस्तकला बागमती प्रदेशबाट निर्यात भईरहेको छ । देशभर १९ वटा जिल्लाका हस्कलाग्राम संघहरु आवद्ध छन् ।
हस्तकलाग्रामभित्र १३ वटा बस्तुगत संघ आवद्ध छन् । जसमध्ये पश्मीना, फेल्ट, धातुका सामान, काठका सामान, प्राकृतिक रेशाजन्य सामग्री र मिथिला पेन्टिङ हस्तकलाग्राम भित्र पर्दछन् । कपडाबाट बनेका सामानहरूमा खास गरेर पश्मीना, सुती, फलाटिन, रेशम, अल्लो र ढाकाबाट उत्पादित सामानहरू पर्दछन् । यसैगरी ऊनबाट बनेका सामग्रीहरू, सिल्भर, काठ, विभिन्न किसिमका पत्थर, छाला, बेतबाँस, थाङ्कालगायत भाँडाहरूमध्ये खास गरेर गमला, घ्याम्पो, घैँटो, हाँडी, खुत्रुके आदि हस्तकलाग्राम भित्र पर्दछन् ।
मकवानपुर । पञ्चरत्न बचत तथा ऋण सहकारी संस्थाको ८ औ वार्षिक साधारणमा शनिबार भएका छ । हेटौंडा उपमहानगरपालिका वडा २ का वडाध्यक्ष बिष्णु गोपाल महर्जनको प्रमुख आतिथ्यतामा साधारण सभा गरिएको हो ।
सहकारीको अध्यक्ष भोजमान श्रेष्ठको अध्यक्षतामा भएको साधारण सभाले विभिन्न प्रतिवेदनहरु पारित गरेको छ । कुल १ हजार २०३ जना शेयर सदस्य रहेको सहकारीमा आर्थिक वर्ष ०८०।०८१ सम्मको ५ करोड ३२ लाख १८ हजार ५८२ रुपैयाँ लगानी रहेको प्रतिवेदन सार्वजनिक गरिएको थियो । सहकारीले विभिन्न क्षेत्रमा लगानी गरेको मध्ये खराब कर्जा क्रमिक रूपमा सुधार भइ न्युनीकरण हुँदै गएको जनाएको छ ।
मकवानपुरको हेटौंडा उपमहानगरपालिका, थाहा नगरपालिका, भीमफेदी, बकैया, मनहरी गाउँपालिका कार्यक्षत्र रहेको यस सहकारीमा हाल सम्पूर्ण कारोवार बैकिङ प्रणालीबाट गर्ने गरिएको छ । यसैगरी सम्पूर्ण कारोवार कम्प्युटर मार्फत गर्न थालिएको, दैनिक कारोवारलाई पारदर्शी रूपमा राखिएको, कार्यालय ब्यवस्थित गरिएको, आर्थिक पारदर्शीतालाई उच्च महत्व दिइएकोे अध्यक्ष श्रेष्ठले बताए ।
सहकारीले आफ्ना महिला शेयर सदस्यलाई सुत्केरी खर्च वापत २ हजार र शेयर सदस्य मृत्यु भएमा राहत खर्च वापत ५ हजार उपलब्ध गराउँदै आएको श्रेष्ठले बताए । साधारण सभाले अध्यक्ष श्रेष्ठलगायत कोषाध्यक्ष पुर्णभद्र चौलागाईं, लेखा समिति संयोजक चन्द्रावती पनेरु, ऋण उपसमिति संयोजक दिक्पाल तिमल्सिनाले पेश गरेका प्रतिवेदनहरु पारित गरेको छ ।
सहकारीमा गत बर्षको लगानी ४ करोड ८९ लाख ८२ हजार २३८, यसबर्षको लगानी ५ करोड ३२ लाख १८ हजार ५८२ रहेको पनेरुले बताइन् । समा धितो जमानतमा ३ करोड ५२ लाख ३२ हजार ४४५ र शेयर बचत जमानत लगानीमा १ करोड ७२ लाख ५७ हजार ६९२ रहेको प्रतिवेदनमा सार्वजनिक गरिएको छ ।
कार्यक्रममा जनकल्याण सहकारी अध्यक्ष हिमाल पौडेल, राष्ट्रिय सहकारी बैकका समीर श्रेष्ठ , प्रतिफल साकोसका उपाध्यक्ष निलम श्रेष्ठलगायत विभिन्न सहकारी प्रमुख तथा प्रतिनिधिहरूको उपस्थिति रहेको सहकारीको सचिब डा गोपिराम बन्जराले बताए ।
मकवानपुर । बागमती प्रदेशको पहिले मुख्यमन्त्री डोरमणी पौडेलले सहकारीले अनुत्पादक क्षेत्रमा लगानी गर्न ऋण दिन नहुने सुझाएका छन् ।
सहकारी मार्फत सहकारीकर्मीले भविष्य निर्माण गर्ने, रोजगार सिर्जनागर्ने, उत्पादन वृद्धिमा लगाउने तर्फ ध्यान दिनुपर्ने पौडेलले बताए ।
सहकारीको नेतृत्वले कुसलता पुर्वक काम गर्दा सहकारीको भावना र मर्म अनुसारको गन्तव्य तय हुने उनले बताए । नमुना प्रगति बचत तथा ऋण सहकारीको २४ औं वार्षिक साधारण सभामा उनले यस्तो बताएका हुन् ।
सदस्य बढाउने, बृहत सहकारी बनाउनेमा ध्यान दिनुपर्ने औल्याउँदै पौडेलले भने “टुक्राटुक्रा साना सहकारी हैन, ठुलाठुला सहकारी बनाउने र धेरैभन्दा धेरै सेवा दिनतर्फ ध्यान हुनुपर्छ।”
सहकारी अध्यक्ष मिठाराम दाहालको अध्यक्षतामा भएको कार्यक्रममा २ करोड ८५ लाख ६३ हजार शेयर पुंजी भएको सहकारीमा हाल २ हजार ५२९ जना शेयर सदस्यहरू रहेको जानकारी सार्वजनिक गराईएको थियो ।
संस्थाको वार्षिक साधारण सभामा जेष्ठ सदस्य सम्मान (महिला पुरुष), उत्कृष्ट ऋणी, उत्कृष्ट बचत कर्ता, उत्कृष्ट व्यवसायी, उत्कृष्ट बालवचत कंर्ता, उत्कृष्ट कर्मचारी, संस्थाका शेयर सदस्यका छोरा/छोरी लाई नगद छात्र वृत्ति सहित सम्मान गरिएको थियो ।
साधारणसभामा अध्यक्ष दाहालले आर्थिक वर्ष २०८१/०८२ का लागि विभिन्न कार्यक्रमहरू प्रस्ताव गरेका थिए । जसलाई बन्दसत्रले पास गरेको छ ।
संस्थाको समुदायमा र सदस्यको सेवामा पहुँच विस्तार गर्न यस वर्ष ४०० सदस्य वृद्धि गरि २९९२ शेयर सदस्यता पुन्ऱ्याउने, संस्थामा बाल बचत कर्ताको पहुँच वृद्धि गर्न यस वर्ष २५ जना थप गरि २२५ पुऱ्याउने, यस वर्ष सदस्यहरु संग समग्र संस्थाको वारेमा जरानकारी गराउन र सल्लाह सुझाव लिन ४ वटा विस्तारित मञ्चका कार्यक्रम संचालन गरिने, सदस्यहरुको ज्ञान सिप वृद्धि गर्नका लागि ६०० जना सदस्य सहकारी शिक्षा र १०० जना सदस्यलाई व्यवसायिक सिप, व्यवसाय सिप प्राप्त सदस्य मध्ये १५ जना सदस्यलाई उद्यमी बनाउने जस्ता कार्यक्रम प्रस्ताव गरिएको अध्यक्ष दाहालले बताए ।
यसैगरी यस वर्ष ४०० सदस्यलाई मोबाईल वैकिङ तथा QR कोड प्रविधि साक्षरता शिक्षा प्रदान गरिने, २०० जना शेयर सदस्यलाई मोबाईल बैंकिङ सेवा र २०० जना सदस्यलाई QR कोडको माध्यमबाट सेवा प्रदान गरिने, विभिन्न संघ सस्था संग सहकार्य गरि सामाजिक सेवा तथा वातावरण सम्बन्धी कार्य गरिने दाहालले बताए ।
यस वर्ष शेयर पुंजी ४० लाख १६ हजार ८ सय थप गरि ३ करोड २८ लाख ८० हजार पुऱ्याउने लक्ष्य राखिएको उनले बताए । साधारणसभामा कोषाध्यक्ष केशव प्रसाद देवकोटाले लेखा प्रतिवेदन प्रस्तुत गरेका थिए ।
चितवन । चितवनकाे भरतपुरस्थित औद्योगिक प्रदर्शनीमा बडादशैँ स्वदेशी जुत्ता चप्पल व्यापार मेला मंगलवारदेखि सुरु भएको छ । असोज २४ गतेसम्म सञ्चालन हुने मेलाको बागमती प्रदेशको उद्योग वाणिज्य, भूमि व्यवस्था तथा प्रशासनमन्त्री सुकमाया तामाङले उद्घाटन गरिन् ।
मेलाको उद्घाटन गर्दै मन्त्री तामाङले नेपाल धेरै वस्तुको उत्पादनमा आत्मनिर्भर बन्न सक्ने सम्भावना रहेको बताइन् । ‘स्थानीय स्रोत साधन उपयोग हामी सबै लाग्नु पर्छ’ मन्त्री तामाङले भनिन् ‘मुलुकको आर्थिक समृद्धिका लागि स्वदेशी उत्पादनमा जोड दिन जरुरी छ ।’
चितवन उद्योग संघले स्वदेशी उत्पादनलाई प्रवर्दन गर्ने उदेश्यले मेला २०८१ अन्तर्गत स्वदेशी जुत्ताचप्पल व्यापार मेला आयोजना गरेको हो । फुटवेयर म्यानुफ्याक्चर्स एशोसियसनका अध्यक्ष रुद्र न्यौपानेले जुत्ता चप्पलको चोरी पैठारी रोकिने हो भने नेपाल १८ महिनामा आत्मनिर्भर बन्न सक्ने बताए । ‘सिंहदरबारभित्र पनि नेपाली जुत्ता चप्पलको प्रयोग गर्नु पर्छ’ उनले भने । उत्पादकले पनि इमानदारपूर्वक गुणस्तरमा ध्यान दिएर काम गर्नु पर्ने उनले बताए ।
चितवन उद्योग संघका अध्यक्ष सूर्यप्रसाद न्यौपानेले संघले बिगत २०४७ सालदेखि उद्यमशिलता विकास र राज्यलाई मजबुत बनाउने उद्धेश्यले विभिन्न कामहरु गर्दै आएको बताए। राज्यले लिएको औद्योगिक अभियानलाई संघले सँधै साथ दिइरहेको उनले जनाकारी दिए ।
मेला दैनिक बिहान ९ बजेदेखि बेलुका ७ बजेसम्म सञ्चालन हुने मेलाको सहआयोजक संस्था वेश ग्लोबल प्रालिका अध्यक्ष होमनाथ उपाध्यायले जानकारी दिए । मेलामा आठ कम्पनीका तीन हजार भन्दा बढी मोडलका जुत्ता, चप्पल एकै ठाँउमा पाउन सकिन्छ । मेलामा ४० वटा स्टल छन् । नेपालमा उत्पादित जुत्ताचप्पल तथा छालाजन्य वस्तुहरु महिला, पुरुष, बच्चा सबैलाई समेटिनेगरी आकर्षक छुटमा खरिद गर्न सकिने उपाध्यायले बताए ।
मेलामा ३५ हजार जोर जुत्ताचप्पलको बिक्री हुने र दुई करोड रुपैयाँको आर्थिक कारोबार हुने अपेक्षा आयोजकले गरेकाे छ । त्यस्तै मेलाको करिब एक लाख ५० हजार जनाले अवलोकन गर्ने अनुमान गरिएको गरिएकाे छ । प्रत्येक दिन जुत्ताचप्पल खरिद गर्ने ग्राहकहरुलाई कुपनको व्यवस्था गरिनेछ । जुत्ताचप्पल खरिदमा १५ देखि ५० प्रतिशत छुटको समेत व्यवस्था गरिएको छ । साथै असोज २१ गते लक्की ड्र मार्फत खोलिने कुपन मध्येबाट एक जनालाई २५ हजार रुपैयाँ बराबरको उपहार प्रदान गरिनेछ ।