- दुर्गा वनवासी
उसले कविताहरु लेख्यो- राष्ट्रभक्तिका, धर्ती प्रेमका र विश्व शान्तिका, गान्धी र गौतमका, सेता परेवा र ढुकुरका, सामाजिक मेलमिलापका, परोपकार र अहिंसाका ।
त्यसपछि एउटा ख्यातिप्राप्त पत्रिकाका सम्पादकलाई भेट्न गयो । कविताका शिर्षकहरु सर्सर्ती हेरेपछि सम्पादकज्यू पड्किए- “यस्तो पनि कविता हुन्छ ? यी कोरा भावनामा डुबेर खेस्राहरु केर्दैमा कविता हुन्छ र ? कविताले त क्रान्ति ल्याउनु पर्छ, समाज परिवर्तन हुनुपर्छ, मान्छेका सोचहरु बद्लिनुपर्छ । जानोस्, क्रान्तिकारी कविताहरु लेख्नोस् ।”
ऊ फर्कियो अनि कविताहरु लेख्यो- जनजागृतिका, लैंगिक समानताका, जातीय स्वतन्त्रताका, वर्गीय आन्दोलनका, मार्क्सका, लेनिनका आदि, आदि । कविताहरु लिएर पुन जाँदा त्यहाँ त अर्का सम्पादक आइसकेका रहेछन् ।
कविताका टाउकाहरुमा एक नजर दौडाइसकेपछि कविताहरु फिर्ता गरेर नाक खुम्च्याउँदै सम्पादक महोदयले भने- “मुलुक यस्तो धर्मर अवस्थामा छ । हत्या र हिंसाको बाढी आएको छ, देशका युवाहरु बिदेश पलायन हुने क्रम बढ्दो छ । यस्तो स्थितिमा राष्ट्रिय एकताको भावना जगाउने, शान्ति र कल्याणको आव्हान गर्ने कविताहरु नलेखेर यस्ता क्रन्तिकारी कविताहरु लेख्न हुन्छ ? यसले त झन प्रलय ल्याउँछ, अशान्ति निम्त्याउँछ ।
जानोस्, शान्ति र मानवताका कविता लेख्नोस् । मान्छेका मनभित्र देशभक्ति, लोककल्याण र परोपकारको भाव जगाउनोस् ।”
हाम्रो लघुकथा केन्द्र, नेपालकाे फेसबुक ग्रुपबाट
असम (भारत) । भारत असमका साहित्यकार कविता शर्मा पौडेलको गजल सङ्ग्रह अचानोको लोकार्पण गरिएको छ । असम नेपाली साहित्य सभाको १६ औँ महाधिवेशन तथा स्वर्णजयन्ती समारोहमा कविताको गजल सङ्ग्रह अचानोको लोकार्पण गरिएको हो ।
असमको गोलाघाट जिल्ला सरूपथारमा भएको असम नेपाली साहित्य सभाको १६ औँ महाधिवेशन तथा स्वर्णजयन्ती चारदिवसीय कार्यक्रममा अन्तर्राष्ट्रिय संगोष्ठी, कार्यपत्र प्रस्तुत, पुरस्कार तथा सम्मान कार्यक्रम, असमबाट प्रकाशित विभिन्न स्रष्टाका १०० वटा पुस्तक लोकार्पण गरिएको थियो ।
सोही अवसरमा कार्यक्रमका प्रमुख अतिथि, विशिष्ट अतिथिहरुले पूर्वायन प्रकाशन गुवाहाटी, असमले प्रकाशन गरेको गजलकार कविताको दोस्रो कृति अचानोको विमोचन गरेका थिए । उनको यो पहिलो गजल सङ्ग्रह हो भने कृतिगत रूपमा दोस्रो कृति हो । यसअघि उनको कविता सङ्ग्रह समयको बारुद प्रकाशित भएको छ ।
भारत, असम राज्यको बडगाउँ सोणितपुरमा २१ फेब्रुवरी १९८६ मा जन्म भई जील्ला चिराङ वीटीएडी असम स्थाई बसोवास गर्ने कविता साहित्यका कविता तथा गजल विधामा कलम चलाउँछिन । चिराङ नेपाली साहित्य सभा, विटीआररिजन, असम नेपाली साहित्य सभा जस्ता साहित्यिक संस्थाहरूमा सकृय सर्जक उनि हाल नेपालको मोरङ जिल्ला उर्लाबारी नगरपालिकामा अस्थाई बसोबास गर्छिन ।
नेपाली भाषाबाहेक असमिया, हिन्दी, बंगाली र अंग्रेजी भाषामा समेत दख्खल र लेखनमा सकृय कविताले नेपाल र भारत असम बीचको साहित्यक सहकार्यको समेत भूमिका निर्वाह गरिरहेकी बताइएको छ ।
यसैगरी भारतको असममा रहेको असम नेपाली साहित्य सभाले कीर्तिशेष स्रष्टा निरू शर्मा पराजुलीको नाममा स्थापित एक लाख राशीको ‘निरू शर्मा पराजुली अन्तर्राष्ट्रिय साहित्य पुरस्कार’ पहिलोपटक नेपाली साहित्यकार प्राध्यापक डा.देवी नेपाललाई प्रदान गरिएको छ ।
कार्यक्रममा नेपालबाट डा.गोविन्दराज भट्टराई, डा.देवी नेपाल, शरद चन्द्र वस्ती, विवश बलिभद्र कोइराला, डा.गोपीकृष्ण खतिवडा, चन्द्र भण्डारी, विमल वैद्य, विष्णु न्यौपाने, अभागी थेगुवा, दीपक सुवेदी लगायतका साहित्यकारहरुको उपस्थिति रहेको थियो ।
यसैगरी भारत असमबाट साहित्यकार डा.चिन्तामणि शर्मा, डा.इन्दु प्रभादेवी, डा.खगेन्द्र शर्मा, रण काफ्ले, नव सापकोटा, ज्ञानबहादुर क्षेत्री, रुद्र बराल, अर्जुन निरौला, पूजा आचार्य, नैना अधिकारी, अमित अधिकारी, ज्योति हुमागाईँ लगायतका साहित्यकारहरुको उपस्थिति रहेको थियो ।
असम नेपाली साहित्य सभाका सभापति दुर्गा खतिवडाको सभापतित्वमा भएको कार्यक्रमको सहजीकरण महासचिव मदन थापाले गरेका थिए ।कार्यक्रममा भारतको सिक्किम, दार्जिलिङ,सिलिगुडी, मणिपुर तथा नेपालका स्रष्टाहरूको उपस्थिति रहेको थियो।
मकवानपुर । मकवानपुरकाे हेटौंडामा रहेको किताबघरले ‘कफी एट किताबघर’ नामक कार्यक्रम सुरुवात गरेको छ । कला साहित्य क्षेत्रका विभिन्न व्यक्तित्वहरूसँग साक्षात्कार गर्ने उद्देश्यले बिहीबारदेखि कार्यक्रम सुरु गरिएको हो ।
थर्ड आइ एजुकेसनल सेन्टर प्रालि सहयोगमा सुरु भएको ‘कफी एट किताबघर’को पहिलो कार्यक्रममा बिहीबार कथाकार मि रमा (रमा सुवेदी) सँग साक्षात्कार गरिएकाे छ । किताबघरमा भएको सो कार्यक्रममा कथाकार मि रमाले आफ्नो कथा लेखन यात्राको बारेमा जानकारी दिइन् । हेटौंडा स्थायी बसोबास भए पनि लामो समयदेखि काठमाडौंमा सञ्चारकर्ममा रहेकी उनले ढिला गरी साहित्य लेखनमा लागेको बताइन् ।
पछिल्लो समय बाह्रखरी कथा प्रतियोगिता २०८० र २०८१ मा लगातार उत्कृष्ट २५ भित्र परेपछि उनको कथाको चर्चा चुलिएको छ । लेखन ढिलो सुरु गरे पनि आफू पहिलेदेखि नै नियमित पाठक रहेको उल्लेख गर्दै उनले आफू कथाकारकै रुपमा निरन्तर लागिरहने बताइन् । लेखनका हिसाबले कहिले काही भावना समेत लेख्ने गरेकाेमा कविता भनेर प्रकाशकले छापिदिने गरेकाे भए पनि आफूले कविता लेख्न नजानेकाे समेत उनले बताइन् ।
कार्यक्रमले मकवानपुर तथा अन्य जिल्लाबाट हेटौंडा आउने साहित्यकारहरूसँग साक्षात्कार गराउँदै जाने किताबघरका सन्चालक छवि अनित्यले जानकारी दिए । मकवानपुरके हेटौंडामा पठन संस्कृतिको विकासका लागि अघिल्लो साताबाट किताबघरले ‘बालबालिकासँग किताबका कुरा’ कार्यक्रम समेत सुरु गरिसकेको उनले बताए ।
- मकवानपुर । “युद्ध प्रसाद मिश्र स्मृति साहित्य सम्मान”बाट निभा शाह सम्मानित हुने भएकी छिन् । प्रगतिशील लेखक संघ मकवानपुरले हरेक वर्ष प्रदान गर्दै आएकाे उक्त सम्मानबाट यस बर्ष प्रगतिवादी कवि तथा अग्रज साहित्यकार शाहलाई सम्मानित गरिने भएकाे हाे ।
प्रगतिशील लेखक संघ, मकवानपुरद्वारा २२ हजार राशीकाे उक्त सम्मान शाहलाई प्रदान गर्ने निर्णय भएकाे संघ अध्यक्ष श्रीराम अधिकारीले जानकारी दिए । २० पुष २०८१ गते शनिवार हुने प्रलेसकाे नवौं जिल्ला सम्मेलनकाे उक्त पुरस्कार प्रदान गरिने उनले बताए ।
उक्त सम्मान मकवानपुरे साहित्यकार तथा हास्य-व्यङ्ग्यकार आरसी रिजालले स्थापना गरेका हुन् । यस अघि उक्त सम्मानबाट साहित्यकार डा.पशुपतिनाथ तिमल्सीना,जनवादी गायक तथा संगीतकार रामेश श्रेष्ठ र प्रगतिवादी युवा कवि पुरुषोत्तम आचार्य सम्मानित भएका छन् ।
मकवानपुर । मकवानपुरकाे हेटौंडामा अन्तरविद्यालय गायन प्रतियोगिता हुने भएको छ । हेटौंडा–५ स्थित ज्ञानोदय बालबाटिका आवासीय माध्यमिक विद्यालयको आयोजनामा तेस्रो संस्करणको गायन प्रतियोगिता हुने भएको हो ।
गायक तथा संगीतकार भीम विरागको स्मृतिमा विगत २ वर्षदेखि गायन प्रतियोगिताको आयोजना गर्दै आएको प्रतियोगिता संयोजक आल्देन लिङ्देनले जानकारी दिए । प्रतियोगितामा प्रथम, द्वितीय र तृतीय हुने विद्यार्थीलाई क्रमशः १० हजार रुपैयाँ, ७ हजार रुपैयाँ र ५ हजार रुपैयाँ प्रदान गरिने छ । यसैगरी १ जनालाई प्रोत्साहन स्वरुप २ हजार ५ सय रुपैयाँ नगद प्रदान गरिने लिङ्देनले बताए ।
बालबालिकामा रहेको प्रतिभा प्रस्तुत गराउन विद्यालयले १५ फागुन २०८१ मा सामुदायिक तथा संस्थागत विद्यालयका कक्षा १ देखि कक्षा १० सम्मका विद्यार्थीहरु सहभागी हुन पाउने गरी प्रतियोगिताको आयोजना गर्न लागिएकाे विद्यालयका संस्थापक प्रिन्सिपल श्यामकुमार बानियाँले जानकारी दिए ।
सामुदायिक तथा संस्थागत विद्यालहरुबाट एक/एक जना छात्र र छात्रालाई छनोट गरेर प्रतियोगितामा सहभागी गराउन अनुरोध गरिएको छ । प्रतियोगितामा सहभागी भएका विद्यार्थीले नेपालीपन झल्काउने स्वदेशी गीत गाउनुपर्ने विद्यालयद्वारा सूचनामा उल्लेख छ ।