मकवानपुर । मकवानपुरको हेटौडा उपमहानगरपालिका–४ मा रहेको राष्ट्रिय सूचना प्रविधि केन्द्रमा (डिजास्टर रिकभरी सेन्टर) लागेकाे आगाे नियन्त्रणमा आएकाे छ । नेपाल सरकार सञ्चार तथा सूचना प्रविधि मन्त्रालय अन्तर्गतकाे राष्ट्रिय सुचना प्रविधि केन्द्र (डिजास्टर रिकभरी सेन्टर) मा भएको आगलागी करिब डेढ घण्टाको प्रयास पछि नियन्त्रणमा लिइएको हाे ।
सेन्टरको व्याकअप व्याट्रीमा करेन्ट सर्ट हुदाँ आगोलागी भएको अनुमान गरिएको छ । हेटौंडा उपमहानगरपालिकाको दमकल, र सुरक्षाकर्मीको उपस्थितिमा आगो नियन्त्रणमा लिइएको थियो । उक्त कोठाभित्र ४ सय ८० वटा व्यकअप ब्याट्री रहेको बताइएको छ । घटनापछिको विस्तृत क्षति विवरण आउन बाँकी रहेको छ ।
यो केन्द्र सिंहदरबारको तथ्याङ्कीय ब्यकअप हो । काठमाडौंको सिंहदरबारमा रहेको तथ्याङ्कीय ब्याकअप डाटासेन्टर मकवानपुरको हेटौंडामा ३ वर्ष अघि स्थापना गरिएको हो । कोरियाली सरकारको सहयोगमा ३७ करोडको लगानीमा तय भएको डाटा सेन्टर ३१ जेठ २०७७ मा नेपाल सरकारका सूचना तथा सञ्चारमन्त्री गोकुल बाँस्कोटाले उद्घाटन गरेका थिए ।
सरकारी तथा निजी क्षेत्रका महत्वपूर्ण सूचनाको सुरक्षा र तिनीहरूको व्यावसायिक विवरणमा सेन्टरले सहयोग गर्ने गरी यसको स्थापना गरिएको हो । सिंहदरबारको डाटा सेन्टरको डाटा कुनै प्रकोपको कारण नष्ट भएमा त्यसको ब्याकअपको रुपमा सुरक्षित गर्न यो डाटा सन्टेर निर्माण गरिएको हो । हेटौंडाको हुप्रचौरस्थित नगर विकास समितिको १० कठ्ठा जग्गामा डाटा सेन्टर निर्माण भएको छ ।
डाटा सेन्टरमा राष्ट्रिय परिचयपत्र, मेसिन रिडेबल पासपोर्ट, ईप्रोक्युरमेन्ट, विद्युतीय हस्ताक्षर, ईकस्टमलगायतका सरकारी डाटाहरु सुरक्षित रहने बताइएकाे छ । सिंहदरबारको डाटा सेन्टर पनि कोरियाकै सहयोगमा निर्माण गरिएको हो ।
मकवानपुर / मकवानपुरको हेटाैडा-४ स्थित नेपाल सरकार सञ्चार तथा सूचना प्रविधि मन्त्रालय अन्तर्गतकाे राष्ट्रिय सुचना प्रविधि केन्द्र डिजास्टर रिकभरी केन्द्रकाे व्याकअप व्याट्रीमा करेन्ट सर्ट हुँदा आगाेलागी भएको छ । हाल दमकल, सुरक्षाकर्मीकाे उपस्थितिमा आगाे नियन्त्रणमा लिने कार्य भईरहेकाे छ । बिस्तृत विवरण आउन बाँकी छ ।
मकवानपुर । मकवानपुरको भिमफेदी गाउँपालिका वडा नंबर २ भैसेंबाट बरामद गरिएकाे मांगुर माछा नष्ट गरिएकाे छ । अस्थाई प्रहरी पोष्ट भैंसे चेकपोष्टमा चेकजाँच गर्ने क्रममा बरामद भएको नेपालमा प्रतिबन्धित मांगुर माछा ५० केजी र खानका लागि अयोग्य अन्य माछा १ सय २० केजी नष्ट गरिएको हो ।
वीरगंजबाट भन्सार छलेर ल्याईएको माछा मकवानपुर प्रहरी र चितवन माछा व्यवसायी संघको संयुक्त टोलीले असोज ७ गते शुक्रवार राती ११ बजे बरामद गरेकाे थियाे । नेपाल र भारतको माछा मिसावट गरि खानको लागि अयोग्य र प्रतिबन्धित माछा काठमाडौं लैजाने क्रममा भैंसेबाट बरामद गरिएको थियो । बरामद गरेको १ सय ७० किलो माछा भैंसेमा खाल्डो खनी नष्ट गरिएको हाे ।
भेटेनरी अस्पताल तथा पशु सेवा विज्ञ केन्द्र हेटौंडाका प्रमुख बज्र किशोर ठाकुर, नेपाल मत्स्य व्यवसायी संघका महासचिव जोगेन्द्र महत्तो, बरिष्ठ उपाध्यक्ष अर्जुन लामिछाने, स्थानीय सरोज चौलागाई, प्रहरीसमेतकाे उपस्थितिमा बरामद गरिएकाे उक्त परिणामकाे माछा नष्ट गरिएको थियो ।
मकवानपुर । मकवानपुर जिल्ला हेटौंडा–५ न्युरेनीस्थित कर्रा खोलाले बगाएर बेपत्ता भएका ३ जना बालक मृत भेटिएको छ ।
शुक्रबार साँझ ५ बजेको समयमा पौडी खेल्ने क्रममा कर्रा खोलाले बगाएर बेपत्ता भएका ३ जना बालक मृत भेटिएको जिल्ला प्रहरी कार्यालय मकवानपुरका निमिक्त प्रहरी प्रवक्ता प्रहरी निरीक्षक रामचन्द्र घिमिरले जानकारी दिए ।
पौडी खेल्ने क्रममा बेपत्ता भएका हेटौंडा–१५ फारलाइनका १७ वर्षीय साहिल लामा, सोही ठाउँका १२ वर्षीय कर्साङ जिम्बा र १३ वर्षीय सञ्जीव मोक्तान मृत भेटिएको हो । पौडी खेल्ने क्रममा खोलाले ४ जनालाई बगाएकोमा एक जना भने पौडी खेलेर बाहिर निस्कन सफल भएको जनाइएको छ ।
३ वटै शव हेटौंडा अस्पताल ल्याईइएको छ । १२ बर्षिय रियान्स माझी भने पौडिएर बाहिर निस्केन सफल भएका छन् ।
मुलुकको पर्यटकीय सुन्दर नगरी पोखरामा यही असोज २८ देखि कात्तिक ३ गतेसम्म सञ्चालन हुने नवौँ राष्ट्रिय खेलकुद प्रतियोगिताको तयारी तीव्ररूपमा अघि बढेको छ । प्रतियोगितालाई भव्यरूपमा सम्पन्न गर्न मूल आयोजक राष्ट्रिय खेलकुद परिषद्, सातै प्रदेशका खेलकुद मन्त्रालय र मातहतका निकायको सक्रियाता बढाइएको युवा तथा खेलकुद मन्त्रालयका सचिव डा दामोदर शर्माले जानकारी दिए ।
उनले भने, “हामी नवौँ राष्ट्रिय खेलकुदको नजिक आइपुगिसकेका छौँ । प्रतियोगिता सुरु हुन अब २० दिन मात्र बाँकी छ । अब बाँकी तयारीलाई घनिभूतरूपमा पूर्णता दिने, कहीँकतै कमी–कमजोरी देखिए सुधार गर्दै समन्वय र सहकार्यलाई बलियो तुल्याइनेछ ।” प्रतियोगिताका सन्दर्भमा गठन भएका समिति र उपसमितिले आ–आफ्नो कार्य जिम्मेवारीलाई तीव्र तुल्याएको जानकारी दिइएको छ । मन्त्रालयले पनि सरोकारवाला र निजी क्षेत्रसँग छलफल गरी प्रतियोगिताका लागि प्रायोजन गर्ने वातावरण बनाएको छ । राष्ट्रपतिलाई प्रतियोगिता उद्घाटन तथा प्रधानमन्त्रीलाई समारोहमा सरिक हुन मन्त्रालयले केही दिनभित्रै औपचारिकरूपमा अनुरोध गर्नेछ ।
यसबीचमा प्रतियोगिताका लागि तयार गरिएको ‘राष्ट्रिय रनिङ ट्रफी’लाई देशका सातै प्रदेश र विभागीय टिमको मुकाम पु¥याएर देखाउने काम भइरहेको छ । उक्त ट्रफी केही दिनअघि प्रधानमन्त्री शेरबहादुर देउवाले सार्वजनिकीकरण गर्नुभएको थियो । सचिव डा रेग्मी भन्छन, “खेलाडीको नाम दर्ता गराउने प्रक्रिया भइसकेको छ, वास्तविक सङ्ख्या परिषद्बाट केही दिनमै सार्वजनिक हुनेछ । प्रतियोगिताका लागि आवश्यक सामग्री सार्वजनिक खरिद प्रक्रियाअनुसार नै अघि बढिसकेको छ ।” खेलाडी, प्रशिक्षक, अफिसियल र अतिथिसहित करिब १० हजारको सङ्ख्यामा सहभागी हुने व्यक्तिलाई आवास व्यवस्थापनको चुनौतीलाई सहज तुल्याउँदै मन्त्रालयले प्रतियोगितालाई खेलउत्सवका रूपमा व्यवस्थित र ऐतिहासिक तुल्याउने ढङ्गबाट तयारी गरिरहेको छ ।
पहिलोपटक प्रदेशिक आधारमा हुन लागेको प्रतियोगितामा सहभागी ११ वटै टोलीका खेलाडीको सहभागिता बढाएर पदकमाथि प्रभुत्व जमाउने हिसाबले अन्तिम तयारीमा जुटिरहेका छन् । प्रतियोगितामा सात प्रदेशका सात, नेपाली सेना, नेपाल प्रहरी र सशस्त्र प्रहरी बल नेपाल तथा गैरआवासीय नेपाली सङ्घ (एनआरएन)को टिमबीच प्रतिस्पर्धा हुनेछ । यसअघिका प्रतियोगितामा पदकमाथि विभागीय टोलीले कब्जा जमाउँदै आएको थियो ।
यसपटक भने विभागीय टोलीलाई प्रदेश टोलीले चुनौती खडा गर्ने अनुमान गरिएको छ । प्रतियोगिता सञ्चालनका क्रममा प्रस्तुत हुने झाँकीले प्रदेशको पहिचान उजागर गर्दै आन्तरिक तथा बाह्य पर्यटक भित्र्याउन योगदान पुर्याउने छ । प्रतियोगितामा तीन हजार छ सय ८५ महिलासहित सात हजार सात सय ९० खेलाडीले विभिन्न ३६ खेल विधामा प्रतिस्पर्धा गर्ने प्रतियोगिता आयोजक कार्यकारिणी समितिका सदस्यसचिव फणिन्द्र पौडेलले जानकारी दिए ।
नेपालको खेलकुदको इतिहासमा पोखरामा ३९ वर्षपछि दोस्रोपटक राष्ट्रिय खेलकुद प्रतियोगिता हुन लागेको हो । प्रत्येक टोलीबाट कम्तीमा तीन सय ३५ महिला र तीन सय ७४ पुरुष खेलाडीको सहभागिता रहने छ । प्रतियोगिताका खेल नवौँ राष्ट्रिय खेलकुदमा फुटबल, क्रिकेट, टेनिस, एथलेक्टिस, भारत्तोलन, सुटिङ, ब्याडमिन्टन, टेबल टेनिस, बक्सिङ, भलिबल, बुद्धिचाल, खोःखो, कराँते, जिम्न्याष्टिक, पौडी र कबड्डी खेल समावेश गरिएका छन् ।
त्यस्तै हयाण्डबल, जुडो, कुस्ती, कराते, सफ्टटेनिस, स्क्वास, तेक्वान्दो, उसु, बास्केटबल, शारीरिक सुगठन, आइटिएफ तेक्वान्दो, सेपाताक्रोे, गल्फ, आर्चरी, साइक्लिङ, फेन्सिङ, ट्रायथलन र प्याराग्लाइडिङ पनि प्रतियोगितामा समेटिएका खेल हुन् । प्रतियोगिता धेरैभन्दा धेरै खेलाडीबीच प्रतिस्पर्धा होस् भन्ने हेतुले खेलाडी तयार गर्न प्रत्येक प्रदेशलाई रु ४९ लाखका दरले रकम उपलब्ध गराएको थियो ।
प्रतियोगिताअन्तर्गत व्यक्तिगत प्रतिस्पर्धामा स्वर्ण पदक विजेतालाई रु २५ हजार तथा सामूहिकतर्फका स्वर्णधारीलाई रु १५ हजार पुरस्कार प्रदान गरिने मन्त्रालयले जनाएको छ । चार सय आठ प्रतिस्पर्धा हुने प्रतियोगिताका लागि तीन सय ९३ स्वर्ण, तीन सय ९३ रजत र छ सय कास्य पदकको यसअघि नै तय भइसकेको छ । पोखरा घुम्नका लागि अन्यन्तै अनुकूल मौसम र वातावरणमा हुन लागेको प्रतियोगिताले पोखराको सौन्दर्य प्रवद्र्धन गर्न थप योगदान पुर्याउने छ । राजधानीडेली डटकमबाट
