मकवानपुर । नेपाल विद्युत् प्राधिकरणका कार्यकारी निर्देशक कुलमान घिसिङले हेटौंडामा निर्माणाधीन सब स्टेशनको अनुगमन गरेका छन् । कार्यकारी निर्देशक घिसिङले शनिबार हेटौंडा उपमहानगरपालिका वडा नम्वर ११, स्थित थानाभर्याङमा निर्माण भइरहेको ४०० केभी, २२० केभी र १३२ केभी सब स्टेशनको अनुगमन गरेका हुन् ।
अनुगमनका क्रममा उनले निर्माणाधीन सब स्टेशनको निर्माण प्रगतिका विषयमा जानकारी लिएका थिए । आगामी असारभित्र सब स्टेशनको निर्माण सम्पन्न गर्ने प्रतिबद्धता जनाएका ठेकेदार कम्पनीहरूले प्रतिबद्धता विपरीत निर्माण स्थलमा कुनै काम नगरेको भन्दै उनले काममा सुधार नगरे ठेक्का तोड्ने चेतावनी दिए । उनले सब स्टेसन निर्माण स्थलबाटै निर्माणको ठेक्का लिएका भारतीय कम्पनीहरू सिमेन्स लिमिटेड र टेलमोस इलेक्ट्रोनिक्सको संयुक्त उपक्रमका पदाधिकारीहरूलाई फोन गरी तोकिएको समयमा सम्पन्न नगरे जरिवाना तिराउने चेतावनी दिएका छन् ।
साथै उनले भारतको दिल्लीमा रहेका सिमेन्सका प्रतिनिधि र टेलमोसका प्रतिनिधिलाई छुट्टाछुट्टै फोन गरी आइतबार काठमाडौं आएर संयुक्त बैठक गर्न निर्देशन समेत दिएका थिए । चिनियाँ कम्पनी सेन्ट्रल चाइना पावर ग्रिड इन्टरनेशनल इकोनमिक एण्ड ट्रेडको काम सन्तोषजनक नभएपछि प्राधिकरणले ठेक्का तोडेर बाँकी रहेको काम गर्न टेण्डरमार्फत् सिमेन्स लिमिटेड र टेल्मोस इलेक्ट्रोनिक्सको संयुक्त उपक्रमसँग ५ पुस २०७५मा ठेक्का सम्झौता भएको थियो ।
यही प्याकेजमा सुनसरीको इनरुवामा पनि २२० केभीको सबस्टेस निर्माण पनि राखिएको छ । कोभिड–१९को महामारीलगायतका कारणले प्रभावित भएपछि सबस्टेसनको निर्माण आउँदाे असारभित्रमा सम्पन्न गर्ने लक्ष्य राखिएको छ ।
मकवानपुर । दोस्रो बागमती प्रदेश खेलकुद प्रतियोगिता शनिबार सम्पन्न भएको छ । बागमती प्रदेश खेलकुद विकास परिषदको आयोजना भएको प्रतियोगिताको हेटौंडा–५ स्थित पिप्ले क्याम्पा रंगशाला शनिबार विशेष समारोहकाबीच समापन गरिएको हो ।
प्रदेशका मुख्यमन्त्री शालिकराम जम्कट्टेलको उपस्थितमा प्रतियोगिताको समापन कार्यक्रम आयोजना गरिएको थियो । जेष्ठ ७ गते मुख्यमन्त्री जम्कटे्टलले पिप्ले क्याम्पा रंगशालामै प्रतियोगिताको उद्घाटन गरेका थिए ।
स्वास्थ्यका लागि खेलकुद, राष्ट्रका लागि खेलकुद भन्ने नारा साथ आयोजना भएको दोस्रो बागमती प्रदेश खेलकुद प्रतियोगितामा काठमाडौं ३१ स्वर्ण, २२ रजत र २५ कांस्य गरी कुल ७८ पदक सहित च्याम्पियन बनेको हो । प्रतियोगिताको पहिलो संस्करणमा दोस्रो स्थानमा रहेको काठमाडौं दोश्रो संस्करणमा पहिलो स्थान बनाउन सफल भयो ।
प्रतियोगिताको पहिलो सस्करणमा पहिलो भएको चितवन दोस्रो सस्करणमा २३ स्वर्ण, २४ रजत र २५ कांस्य गरी कुल ७२ पदक सहित दोस्रो स्थानमा रह्यो । यस्तै काभ्रेले २२ स्वर्ण, १३ रजत र १८ कांस्य सहित ५३ पदक जित्दै तेस्रो स्थान बनाउन सफल भयो ।
पदक तालिकाको चौथो स्थानमा ललितपुर रहेको छ । उसले १९ स्वर्ण २७ रजत र २७ कास्य पदकाे जितेकाे छ । सिन्धुपाल्चोक पाँचौ र मकवानपुर छैटौं स्थानमा छ । सिन्धुपाल्चाेकले १७ स्वर्ण ८ रजत र १६ कास्य पदक र मकवानपुरले १६ स्वर्ण ११ रजत र १७ कास्य पदक हात पारेकाे हाे । त्यस्तै भक्तपुर, नुवाकोट, रामेछाप, दोलखा, सिन्धुली क्रमशः सातौं, आठैं, नवौं, दशौं र एघारौं स्थानमा रहको छ ।
यसैगरी भक्तपुरले १४ स्वर्ण १४ रजत र ९ कास्य, नुवाकाेटले १० स्वर्ण १० रजत र २२ कास्य, रामेछापले १० स्वर्ण ९ रजत र १८ कास्य, दाेलखाले ३ स्वर्ण ११ रजत र ९ कास्य, सिन्धुलीले ३ स्वर्ण ७ रजत र १० कास्य पदक प्राप्त गरेका छन् । पदक तालिकाको अन्तिममा धादिङ र रसुवा रहेका छन् । धादिङले ६ रजत र १४ कास्य पदक प्राप्त गर्दा रसुवाले २ रजत र ५ कास्य पदका प्राप्त गरे ।
मकवानपुर, काठमाडौं, चितवन र ललितपुरमा संचालन गरिएकाे प्रतियाेगिता अन्तर्गतका १३ खेलमध्ये १२ खेलका कुल १ सय ६८ स्वर्ण पदक गणना भएको थियो । पौडी खुला प्रतियोगिता भएकाले पदक तालिकामा पौडीको पदक गणना गरिएन ।बागमती प्रदेशका १३ जिल्लाका करिब २५ सय खेलाडीले प्रतिस्पर्धा गरेका थिए । प्रतियोगिताका स्वर्ण, रजत र कांस्य विजेताले क्रमशः ५ हजार, ४ हजार र ३ हजार नगद पुरस्कार प्राप्त गरेका छन् ।
मुख्यमन्त्री जमकट्टेल, प्रदेशको आर्थिक मामिता तथा योजना मन्त्री बहादुर सिंह लामा, बागमती प्रदेशका सामाजिक विकास मन्त्री कुमारी मोक्तान, प्रदेश खेलकुद विकास परिषद्, बागमती प्रदेशका सदस्य–सचिव सूर्यलाल भण्डारी लगायतले समापनमा टिम च्याम्पियन बनेको काठमाडौं, दोस्रो चितवन र तेस्रो काभ्रेलाई ट्रफी प्रदान गरिएको थियो । पहिलो पटक प्रदेश खेलकुदको टिम च्याम्पियनका लागि ट्रफी प्रदान गरिएकाे हाे।
प्रदेश खेलकुद विकास परिषद्को आयोजनामा जेठ ७ गतेबाट सुरु भएकाे प्रतियोगितामा १३ खेल समावेश गरिएकाे थियाे । २ सय १९ स्वर्ण, २ सय १९ रजत र ३ सय ५६ कास्य गरी ७ सय ९४ पदका लागि प्रतिस्पर्धा हुने बताइएकाे भए पनि १ सय ६८ स्वर्ण, १ सय ६४ रजत र २ सय १४ कास्य गरी ५ सय ५० पदकका लागि प्रतिस्पर्धा भएकाे थियाे ।
प्रतियोगितामा फुटबल, भलिबल, एथलेटिक्स, तेक्वान्दो, कराते, बक्सिङ, रग्बी, ब्याडमिन्टन र आइटिएफ तेक्वान्दो हेटौँडाका विभिन्न खेल मैदानमा प्रतिस्पर्धा गराइएकाे थियाे भने प्रतियोगिताको पुरुष फुटबल र एथ्लेटिक्स् हेटौंडा–५ स्थित पिप्ले क्याम्पा रंगशालामा र महिला फुटबल हेटौडाकाे गौरीटार रंगशालामा खेलाइएका थिए । हेटौंडा–४ स्थित हुप्रचौरमा भलिबल, रग्वी, कराँते, तेक्वान्दो, आईटीटीफ र तेक्वान्दो खेलका प्रतिस्पर्धा भएकाे थियाे ।
त्यस्तै बक्सिङ्ग महिला र पुरुष खेल हेटौंडा–४ स्थित कर्भड हलमा तथा व्याटमिन्टन महिला र पुरुष हेटौंडा–११ थानाभ¥याङ्गस्थित कर्भड हलमा खेलाइएकाे थियाे । जुडो काठमाडौं, उसु त्रिपुरेश्वर, क्रिकेट चितवन, पौडी सादोबाटो ललितपुरमा प्रतिस्पर्धा गराइएकाे प्रदेश खेलकुद विकास परिषद्का सदस्य सचिव सूर्यलाल भण्डारीले जानकारी दिए ।
स्वास्थ्यका लागि खेलकुद राष्ट्रका लागि खेलकुद भन्ने नारा सहित बामगती प्रदेश खेलकुद बिकास परिषदले देशमै पहिलो पटक प्रदेश स्तरको खेलकुद प्रतियोगिता गत बर्ष आयोजना गरेको थियो । प्रतियोगिताको पहिलो संस्करणमा गत वर्ष ८ वटा विधामा खेल खेलाइएको मा दोस्रो संस्करणमा ५ खेल थप गर्दै १३ बिधामा प्रतियोगिता संचालन भएकाे हाे ।
प्रदेशका खेल प्रतिभाको खोजी, प्रदेश समुह तयार र खेलाडीलाई नियमित अभ्यास एवम् प्रशिक्षणको उद्देश्यका साथ दोस्रो वर्ष पनि प्रतियोगिता सुरु गरिएको प्रदेश खेलकुद परिषद्ले जनाएको छ । यस्तै दोस्रो बागमती प्रदेश खेलकुद प्रतियोगिताको मस्कटको रुपमा लोपन्मुख सालकलाई प्रयोग गरिएको थियाे । ‘किसानको साथी’ को रुपमा हेर्ने गरिएको सालक संरक्षणको पहल स्वरुप मस्कटको रुपमा प्रयोग गरिएको बागमती प्रदेश खेलकुद परिषद कार्यालयले जनाएको छ ।
मकवानपुर । दोस्रो बागमती प्रदेश खेलकुदअन्तर्गत पुरुष फुटबलमा मकवानपुरले स्वर्ण जितेको छ । शनिबार हेटौँडा ५ स्थित पिप्ले–क्याम्पा रंगशालामा भएको फुटबल फाइनलमा काठमाडौंलाई ४-३ ले हराउदै मकवानपुर दोस्रो पटक प्रतियोगिताको च्याम्पियन बनेको छ ।
खेलकुद प्रतियोगिताको अन्तिम दिन शनिबार भएको पुरुष फुटबलमा निर्धारित ९० मिनेटमा एक/एक गोलको बराबरी भएपछि खेलको निर्णय पेनाल्टी सुटआउटबाट लिइएको थियो । पेनाल्टी सुटआउटमा मकवानपुरले काठमाडौंमाथि ४–३ को जित हासिल गर्यो ।
निकै प्रतिस्पर्धात्मक फाइनल खेलको तालमेल नमिल्दा खेल सुरु भएको १२ औँ सेकेण्डमा मकवानपुरले आत्मखाती गोल गरे संगै काठमाडौंले १–० को अग्रता बनायो ।
खेलको पहिलो हाफमा गोलको लागि संर्घषरत मकवानपुरले राम्रो अवसर पाएपनि काठमाडौंको पोष्टमा गोल गर्न सकेन । मकवानपुरका लागि खेलको ७० औँ मिनेट सुजन गुरुङले गोल गर्दै खेल १–१ को बराबरीमा ल्याए । मकवानपुरका कप्तान प्रितम स्याङ्बोको पासलाई सुजनले काठमाडौको पोष्टमा जाली चुमाए । त्यसपछिको समयमा दुबै तर्फबाट गोल हुन नसके पछि खेल पेनाल्टीमा धकेलियो ।
पेनाल्टीमा मकवानपुरका निर्मल बल र काठमाडौंका खेमराज तामाङको प्रहार गोलमा परिणत हुन सकेन । मकवानपुरका विकास लामा, सुवास पाख्रिन, सुजन गुरुङ र प्रीतम स्याङ्बोले गोल गरे । काठमाडौंका लागि वाङ गुरुङ, कब्बु कन्दङ्वा र सनम शेर्पाको प्रहार गोलमा परिणत भयो । विवेक राईको प्रहार बाहिरिएसँगै मकवानपुरले स्वर्ण जित्यो ।
मकवानपुरका सुजन गुरुङ फाइनल खेलका म्यानअफ द क्याच घोषित भए । प्रतियोगिताको सर्बोउत्कृष्ट खेलाडी मकवापुरका कप्तान प्रितम स्याङ्बो घोषित भए । विधागततर्फ उत्कृष्ट मकवानपुरका गोलरक्षक गोपी बर्तौला, रक्षक काठमाडौंका सौगात लामा, मिडफिल्डर मकवानपुरका स्याम्युल सुनार, फर्वाड खेमराज तामाङ, सर्वाधिक गोलकर्ता प्रितम स्याङ्बो घोषित हुँदा उत्कृष्ट प्रशिक्षकमा मकवानपुरकै बिजयलाल श्रेष्ठ चुनिए ।
बागमती खेलकुद प्रतियोगिताको पहिलो संस्करणमा मकवानपुरले ललितपुरलाई पराजित गर्दै फुटबलमा स्वर्ण जितेको थियो ।
मकवानपुर । मकवानपुर सहित बागमती प्रदेशका १३ जिल्लामा पशु चौपायामा लम्पी स्किन राेग फेलिएकाे छ । १ महिना अघीबाट फैलिन थालेकाे राेगबाट बागमती प्रदेशकाे १३ जिल्लामा हालसम्म १८ हजार पशु चौपायामा ‘लम्पी स्किन’ रोगकाे संक्रमण फैलिएकाे भए पनि प्रदेश र स्थानीय सरकारले चासाे देखाएकाे छैन ।
बागमती प्रदेशका १३ जिल्लामा संक्रामक विषाणुजन्य रोग लम्पी स्किनबाट १८ हजार ३ सय २४ गाई सक्रमण भएको पाइएको छ । देशभर फैलिएको लम्पी स्किन रोग गाई र भैसीहरुमा देखा परेसँगै मृत्युहुनेको संख्या पनि बढ्दो क्रममा रहेको बताइएकाे छ ।
संक्रमण फैलिएका १३ जिल्ला मध्य मकवानपुरमा लम्पी स्किन राेग सबैभन्दा बढी देखिएको तथ्याङ्कले देखाएकाे छ । मकवानपुरमा १ हजार ८ सय ३५ वटा गाईमा उक्त रोग देखा परेकोमा १ एक ९७ गाईको मृत्यु भएको बागमती प्रदेश कृषि तथा पशुपन्छी विकास मन्त्रालयले जनाएकाे छ । मन्त्रालयका अनुसार हालसम्म गाईमा मात्र संक्रमण भएको र भैसीमा उक्त रोग संक्रमण भएकाे छैन ।
प्रदेशको रसुवा र दोलखा जिल्लामा रोग पुष्टि नभएकोले संक्रमित संख्या शुन्य रहेको छ भने धादिङको विवरण मन्त्रालयलाई प्राप्त नभएकाे मन्त्रालयले जनाएकाे छ । यसैगरी प्रदेशको सिन्धुली जिल्लामा ९ हजार ६ सय ३४ सक्रमण र ४७ को मृत्यु, रामेछापमा एक हजार ९ सय ६५, चितवनमा १ हजार ६० वटा गाईमा उक्त रोगको सक्रमण भएको तथ्याङ्क रहेकाे छ ।
यसैगरी काठमाडौंमा ८३, ललितपुरमा ४०, काभ्रेमा ४ सय, नुवाकोटमा ३ सय, सिन्धुपाल्चोकमा ६ र भक्तपुरमा १ वटा गाईमा लम्पी स्किन रोग देखा परेको मन्त्रालयको तथ्याङ्कमा उल्लेख छ । रोगबाट पशुमा हुने मृत्युदर करिब ५ प्रतिशत भए पनि दुहुना पशुहरुको दूध उत्पादनमा ह्रासकाे दर भने उच्च रहेकाे छ । राेगका कारण दूध उत्पादनमा ह्रासकाे दर ८० प्रतिशत सम्म हुने भएकाले कृषकलाई प्रत्यक्ष आर्थिक क्षति पुगेको ।
मकवानपुरको सबैभन्दा बढी मकवानपुरगढी गाउँपालिका, मनहरी गाउँपालिकामा लम्पी स्किन राेगकाे संक्रमण रहेकाे पाइएकाे छ । हेटौंडा उपमहानगरपालिका, थाहा नगरपालिका लगायतका जिल्लाका १० वटै पालिकाका पशु चौपायमा यो रोग देखा परेको छ । तर, यी पालिकाबाट ठोस रुपमा रोगलाई न्यूनीकरण गर्ने कार्यक्रमहरु नल्याउँदा किसान थप थप समस्या परेका छन् । किसानले पालेका गाई, भैसीमा ‘लम्पी स्किन’ रोग देखा परेपनि स्थानीय सरकार र बागमती प्रदेश सरकारको खासै चासोमा परेको छैन । किसानले आफ्ना गोठमा पालेका गाई, भैसीमा यो रोग देखा परेपछी थप समस्या बेहोर्दै आएका छन् ।
यो रोगकै कारण गाई मर्न समेत थालेपछी किसानहरुले आर्थिक समस्या भाेग्नु परेकाे छ भने राेगलागेका पशुबाट कमै मात्र दुध उत्पादन थप समस्या परेको मनहरीका किसान पुरुषोत्तम विष्ट बताउँछन् । गाई लगायत पशु चौपायामा लम्पी स्किनको प्रकोप फैलिन थालेकाे तर राेगथामकाे लागि खासै पहल नहुँदा किसानहरु थप चिन्तामा परेका छन् ।
प्रदेश कृषि मन्त्रालयले रोग नियन्त्रण गर्न रोगको कारण, लक्षण, यसबाट कृषकहरुमा पुग्ने क्षति एवं नियन्त्रण र रोकथामका बारेमा कृषक र सबै सरोकारवालाहरुमाझ जनचेतना फैलाउनुका साथै रोगको जोखिमयुक्त क्षेत्रको पहिचान गरी खोप कार्यक्रम यथाशिघ्र सुरु गर्न जिल्ला स्थित भेटेरिनरी अस्पताल तथा पशु सेवा विज्ञ केन्द्रहरुलाई निर्देशन दिई सकिएको बताउँदै आएकाे छ ।
लम्पी स्किन रोग पहिलो पटक अफ्रिकी मुलुक जाम्बियामा सन् १९२९ मा देखिएको थियो। केही समयसम्म त्यो सब-सहारन अफ्रिकामा सीमित रह्यो भने बिस्तारै उत्तर अफ्रिका, मध्यपूर्व, युरोप र एशियासम्म फैलियो। राष्ट्रसङ्घको खाद्य तथा कृषि सङ्गठन (एफएओ) का अनुसार सन् २०१९ को जुलाईमा पहिलो पटक बाङ्ग्लादेश, चीन र भारतमा लम्पी स्किन देखिएको थियो।
पशु सेवा विभागका अनुसार नेपालमा भने मोरङ जिल्लामा विसं २०७७ सालको साउन २२ गते पहिलो पटक लम्पी स्किन रोग पुष्टि भएको थियो। आर्थिक वर्ष २०७७/०७८ मा आठ जिल्लाका ११ वटा पालिकामा देखिएको थियो भने भने २०७८/०७९ मा नौ जिल्लाका १९ पालिकामा विस्तार भएको पाइएकाे थियाे । त्यसपछि आर्थिक वर्ष २०७९/०८० काे सुरुवातमा खासै नदेखिए पनि अहिले आएर ७ वटै प्रदेशमा लम्पी स्किन रोगको सङ्क्रमण फैलिएको विभागकाे तथ्याङ्कले बताउँछ ।
याे राेग गाईभैँसीलाई हुने एकदमै सङ्क्रामक रोग हो। लामखुट्टे, टोक्ने झिँगा र किर्नाजस्ता कीराको टोकाइबाट यो रोग सर्ने गर्छ। सङ्क्रमित गाईभैँसीको ओसारपसार, सामुदायिक चरणक्षेत्र दाना एवं पानी खाने साझा ठाउँ, प्राकृतिक वा कृत्रिम गर्भाधानबाट र पशु उपचार गर्ने क्रममा फरक गाईभैँसीमा एउटै सुईको प्रयोगबाट पनि यो रोग सर्छ। गर्मीयाममा लामखुट्टे र किर्ना आदिको सङ्ख्या बढ्ने र ती कीरा बढी सक्रिय हुने भएकाले यसको प्रकोप अझ बढी देखिन्छ।
यो रोग लागेमा पशुका शरीरमा खटिरा आउने, खटिराबाट तरल पदार्थ बगिरहने, ज्वरो आउने, झोक्राउने, खानेकुरा नखाने खुट्टा सुन्निने तथा लुलो हुने, दूध कम दिने वा दिनै छोड्ने नाक र मुखबाट तरल पदार्थ बग्ने समस्या हुन्छ । ‘लम्पी स्किन’ बाट सङ्क्रमित पशुहरु अन्त्यमा मर्ने समेत गरेका पाइन्छ । छालामा गोलो गिर्खा र घाउ देखा पर्नु यसलाई चिन्ने सजिलो लक्ष्यण देखा पर्ने गरेको पशुस्वाथ्यकर्मीहरु बताउँछन् । क्याप्री पक्स नामक भाइरसको सङ्क्रमणबाट लाग्ने यो रोगबाट बचाउन विश्वभर खोप लगाउने गरिएको भए पनि नेपालमा भने निजी क्षेत्रले मात्र यो खोपलाई प्रयाेगमा ल्याएका छन् ।
सरकार कृषकले पालेका गाई भैसीमा लागेकाे राेग लम्की स्कीन राेग प्रति गम्भीर नभएकाे भन्दै संघीय संसदकाे प्रतिनिधि सभामा समेत सांसदहरुले सरकारकाे आलाेचना सँगै ध्याकर्षण गराउँदै आएका छन् । संसदकाे शून्य समयमा विभिन्न जिल्लाबाट प्रतिनिधित्व गर्ने सांसदहरुले पछिल्लो समय देशैभरका गाईं भैंसीमा तिब्र रुपमा फैलर्दै गएको लम्पी स्किन नामक रोगको नियन्त्रणमा सरकार गम्भिर बन्नुपर्ने बताउँदै आएका छन् ।
उनीहरुले रोगबाट पीडित पशुको निःशुल्क उपचारको व्यवस्था गर्न माग गर्दै संघीय प्रदेश र स्थानीय सरकारसँग समन्वय गरेर क्षतिको मूल्याङकन गरेर क्षतिपूर्तीको व्यवस्था गर्न समेत संसदमा आवाज उठ्ने गरेकाे छ । तीब्र रुपमा फैलिएकाे याे रोगबाट पछिल्लो समय देशैभरी हजारौं पशुहरु बिरामी भइरहेका छन् । जसको नियन्त्रण अझै हुन् सकेको छैन । यसै विषयमा संसदमा बेला बेला सांसदहरुले आवाज उठाउँदै आएका छन् । तर सरकारले खासै चासाे नदिदाँ किसानहरु समस्यामा परेका छन् ।
मकवानपुर । हेटौँडामा जारी बागमती प्रदेश खेलकुदअन्तर्गत रग्बीमा महिलातर्फ मकवानपुर र पुरुषतर्फ भक्तपुरले स्वर्ण जितेको छ । शनिबार हेटौंडा–५ स्थित पिप्ले क्याम्पा रंगशालामा भएको फाइनल खेलमा महिलातर्फ मकवानपुरले ललितपुरलाई र पुरुषतर्फ भक्तपुरले मकवानपुरलाई पराजित गर्दै उपाधी जितेको हो ।
महिलातर्फ मकवानपुरले ललितपुरलाई १७–१० स्कोरले हराउँदा पुरुषतर्फ भक्तपुरले मकवानपुरलाई ३१–५ स्कोरले पराजित गर्यो । मकवानपुरको महिला टिम चितवनलाई हराउँदै तथा पुरुष टिम रामेछापलाई हराउँदै फाइनलमा प्रवेश गरेको थियो ।
भक्तपुरका सुरज रानाले २ तथा प्रवेश पनेरु, रमेश बानियाँ र नरेन्द्रप्रसाद जोशीले १ ट्राइ गरे । भक्तपुरका निरोज कार्कीले ३ कन्भर्सनबाट ६ स्कोर बटुले । मकवानपुरका अनिश तामाङले १ ट्राइ गरे । रग्बीको अन्तर्राष्ट्रिय नियम अनुसार १ ट्राइबाट ५ स्कोर प्राप्त हुन्छ भने १ कन्भर्सन वापत २ स्कोर प्राप्त हुन्छ।
महिलाको उपाधि भिडन्तमा मकवानपुरले ललिपतुरलाई १७–१० स्कोरले हरायो । विजयी टिमका लागि पुष्पा खड्काले २ तथा मनीषा घिसिङले १ ट्राइ गरे । मकवानपुरकी ज्योतिका बम्जनले १ कन्भर्सन गरिन् । ललितपुरका कमला राई र प्रेक्षा वाग्लेले समान १–१ ट्राइ गरे ।
दुईदिने भएको रग्बी प्रतियोगिताको पुरुषतर्फ ८ तथा महिला तर्फ ५ टिमले लिग कम नकआउट आधारमा प्रतिस्पर्धा गरेका थिए । विभिन्न १३ खेल समावेश दोस्रो बागमती प्रदेश खेलकुदअन्तर्गत रग्बी पहिलोपटक समावेश गरिएको बागमती खेलकुद बिकास परिषदले जनाएको छ ।
