मकवानपुर । जिल्ला प्रहरी कार्यालय मकवानपुरले ५६१ ग्राम सुन जस्तो देखिने पहेलो धातु बरामद गरेको छ । सुनको मुल्य अन्दाजी ५४ लाख रहेको छ ।
प्रहरी उक्त धातुसंगै एक जनालाई नियन्त्रणमा लिएको छ । हेटौंडा उपमहानगरपालिका १५ रातोमाटे चेक पोष्ट अगाडी सडक खण्डमा प्रहरी चौकी रातोमाटेबाट खटिएको प्रहरी टोलीले सवारी साधनहरु जाच गर्ने क्रममा धातु सहित अबैध कपडा समेत बरामद गरेको छ ।
बिरगंजबाट पोखरा तर्फ जादै गरेको ग २ ख ६९२ नं. को यात्रु बाहक बसको डिक्की भित्र लुकाई ल्याएको अवस्थामा साडी १०० पिस, सल ६०० पिस गरी अन्दाजी १० लाख ५ हजार मुल्य बराबरको अबैध कपडा बरामद गरेको हो ।
कपडा र धातु थप अनुसन्धानको लागि राजस्व कार्यालय पथलैया पठाइने प्रहरीले जनाएको छ ।
प्रहरीले काठमाण्डौबाट आउदै गरेको प्रदेश २-०३-००१ ख ०१५९ नं. को यात्रु बाहक बसमा सवार बिरगंज महानगरपालिका वडा नं. १६ बस्ने बर्ष २२ को किशन साहलाई नियन्त्रणमा लिएको हो ।
निजले लगाएको जुत्ताको नोक भित्र ३ थान सुन जस्तो देखिने पहेलो धातु ५६१ दशमलव ३० ग्राम बरामद गरेको हो ।
मकवानपुर । हेटौंडामा आगामी असार ३० गते ‘कोरा’ साइकलयात्रा हुने भएकाे छ । हिमालयन राइडर्स सोसाइटी मकवानपुरको आयोजनामा ‘कोरा’ साइकलयात्रा हुने भएकाे हो ।
साइकलयात्रामा २ सय जना साइकलयात्रीले सहभागिता जनाउने हिमालयन राइडर्स सोसाइटी मकवानपुरले जनाएकाे छ । सोसाइटीका अध्यक्ष रामकुमार श्रेष्ठले हेटौंडा कोरा च्यालेन्ज २०२३ मा सहयात्रा गर्न इच्छुक साइकलयात्रीलाई सहभागी हुन आग्रह गरेका छन् ।
यो वर्षको कोरा साइकलयात्रा हुप्राचौरको पशुपतिनाथ मन्दिरबाट सुरु भई कुष्माण्ड सरोबर (त्रिवेणीधाम), जलेश्वर, मुक्तिनाथ, बिन्द्यवासिनी, बनस्खण्डी, दक्षिणकाली, रुद्रेश्वर, भुटनदेवी मन्दिर परिक्रमा गरी करिब २१ किमिको हुने सोसाइटीका उपाध्यक्ष राजु थापा मगरले बताए ।
‘कोरा’ साइकलयात्रा विश्वभरीका साइकलयात्रीहरुले स्थानीय मठ मन्दिरहरुको परिक्रमा गरी धार्मिक महोत्सवको रुपमा मनाउँदै आएका छन् । साेही अनुसार हेटौंडामा ‘कोरा’ साइकलयात्रा मनाइने भएको हाे।
मकवानपुर । मकवानपुरको बकैया गाउँपालिकामा ट्रक दुर्घटना हुँदा आगलागी भएको छ ।
बकैया ५ तिनतल्लेमा हेटौंडाबाट सिन्धुली तर्फ जादै गरेको ना. ७ ख ५०४५ नम्बरको सिमेन्ट लोड ट्रकको इन्जिनमा समस्या भइ नालीमा खस्दा आगलागी भएको अस्थायी प्रहरी प्रहरी पोष्ट गरगरे बकैयाका प्रहरी सहायक निरीक्षक राम शंकर यादवले जानकारी दिए ।
मदन भण्डारी राजमार्गको हेटौंडा सिन्धुली सडकखण्डको तिनतल्लेमा जेठ २९ गते राती ११ बजेको समयमा भएको ट्रक दुर्घटना हुदा लागेको आगो हेटौंडा उपमहानगरपालिकाको दमकल तथा प्रहरीको सहयोगमा नियन्त्रणमा लिइएको मकवानपुर प्रहरीले जनाएको छ ।
आगलागीबाट ट्रकको अगाडिको भाग र केही सिमेन्ट नष्ट भएको बताइएकाे छ ।
मकवानपुर । मकवानपुर सहित केहि स्थानमा मंगलबार राती मौसम बदली भइ हल्का वर्षा भएको छ । करिब २ हप्ता देखिको उखरमाउलो गर्मीलाई मंगलबारको वर्षाले केही राहत पुगेको छ ।
यस्तै कोशी तथा बागमती प्रदेशको केही स्थानहरू साथै मधेश र गण्डकी प्रदेशको एक दुई स्थानमा हल्कादेखि मध्यम वर्षा भइरहेको जल तथा मौसम विज्ञान विभाग, मौसम पूर्वानुमान महाशाखाले जनाएको छ ।
मौसम पूर्वानुमान महाशाखाका अनुसार देशमा पश्चिमी वायुका साथै भारतको बिहारमा रहेको न्यून चापीय प्रणालीको आंशिक प्रभावका कारण हल्का वर्षा भएको हो । तर यस वर्ष मनसुनी वर्षाको आगमनको औसत मिति (जुन १३ तारिख) भन्दा एक-दुई दिन ढिला हुने सम्भावना रहेको छ।
महाशाखाका अनुसार मंगलबार आज दिउँसो कोशी, मधेश र बागमती प्रदेश लगायत देशका पहाडी भू-भागमा आंशिक देखि सामान्य बदली रही बाँकी भू-भागमा आंशिक बदली देखी मौसम सामान्यतया सफा रहेको छ।कोशी, बागमती र गण्डकी प्रदेशका थोरै स्थानहरूमा र मधेश प्रदेश लगायत बाँकी प्रदेशका पहाडी भू-भागका एक दुई स्थानमा मेघगर्जन र चट्याङ्गसहित हल्का देखि मध्यम वर्षाको सम्भावना रहेको छ ।
मंगलबार राती भने कोशी प्रदेश लगायत देशका पहाडी भू-भागमा आंशिक देखि सामान्य बदली रही बाँकी भू-भागमा आंशिक बदली देखि मौसम सामान्यतया सफा रहनेछ। कोशी, बागमती र गण्डकी प्रदेशको पहाडी भू-भागका केही स्थानहरूमा मेघगर्जन र चट्याङ्गसहित हल्का देखि मध्यम वर्षाको सम्भावना रहेको छ । साथै मधेश प्रदेश लगायत देशका बाँकी पहाडी भू-भागका एकदुई स्थानमा मेघगर्जन र चट्याङ्गसहित क्षणिक वा हल्का वर्षाको सम्भावना रहेको महाशाखाले जनाएको छ ।
विगत केही दिन देखि बढेको गर्मी र वर्षा नहुदा देशका अधिकांश भू-भागहरू: विशेष गरि मध्य तथा पश्चिमी भू-भागमा अधिकतम तथा न्यूनतम तापक्रम वृद्धि भइरहेको छ। काठमाण्डौ उपत्यका लगायत देशका अन्य क्षेत्रमा पनि तापक्रममा अस्वाभाविक वृद्धि भएको छ । देशका मध्य तथा पश्चिम तराईका भू-भागमा लगातार अधिकतम तापक्रम चालीस डिग्री सेल्सियस वा सो भन्दा बढी मापन भएको महाशाखाले जानकारी दिएको छ।
महाशाखाले आगामी केही दिनसम्मको लागि देशभरको तापक्रमको अवस्थाको विश्लेषण गरे अनुसार सुदूरपश्चिम, लुम्बिनी र गण्डकी प्रदेशको तराईका धेरैजसो भू-भागहरूमा अत्याधिक गर्मीको सम्भावना अझै रहने देखाएको छ । कोशी प्रदेशमा भने बदली र वर्षाको सम्भावना रहेकोले तापक्रम घट्नुका साथै अत्याधिक गर्मीको नहुने देखिएको छ।
यस्तै बागमती प्रदेशको तराईका भू-भाग र मधेश प्रदेशको पश्चिमी भू-भागमा थोरै तापक्रम घटे तापनि अत्याधिक गर्मीको सम्भावना यथावत् रहने देखिएको छ । तसर्थ, ती भू-भागहरूमा आगामी चार दिन जेठ ३० गते देखि असार १ गतेसम्म तातो हावा तथा लू (Heat wave) को सम्भावना यथावत् रहने महाशाखाको अनुमान छ ।
मधेश प्रदेशको पूर्वी भू-भागमा तापक्रम केही धट्ने सम्भावना देखिए तापनि गर्मीको सम्भावना रहनुका साथै देशको पश्चिमी पहाडी भू-भागका उपत्यका तथा खोँचहरूमा पनि तापक्रम यथावत् रहन सक्ने सम्भावना रहेको हुनाले ती भू-भागहरूमा पनि गर्मीको सम्भावना रहेकाले तातो हावा तथा लूबाट बच्न आवश्यक सतर्कता अपनाउन हुन महाशाखाले आग्रह गरेको छ ।
तातो हावा तथा लू बाट थकाई लाग्ने, कमजोरी हुने, बढी तिर्खा लाग्ने, टाउको दुख्ने, खुट्टा बाउँडिने, चक्कर आउने, बेहोस हुने, मांसपेशीहरू दुख्ने, बान्ता आदि असर देखिन सक्छ । तातो हावा तथा लू बाट बच्न महाशाखाले बढी गर्मीको समयमा घर भित्र अर्थात् चिसो स्थानमा रहने, बाहिरी वातावरणमा बढी नजाने, हल्का लुगा लगाउने, सुती कपडा लगाउने, बाहिर निस्किँदा टाउको छोप्ने, टोपी लगाउने, नियमित (पटक-पटक) पानी तथा झोल पदार्थ जूस, सर्बत, आदि प्रशस्त मात्रामा पिउने र स्वास्थ्यमा समस्या भएमा स्वास्थ्यकर्मी सँग नियमित सम्पर्कमा रही थप सल्लाह सुझाव लिन समेत अनुरोध गरेको छ ।
देशका मध्य तथा पश्चिम तराईका भू-भागहरूमा अत्याधिक गर्मी हुने सम्भावना यथावत् देखिन्छ । कोशी, बागमती र गण्डकी प्रदेशका थोरै स्थानहरूमा साथै मधेश प्रदेश लगायत देशका बाँकी पहाडी भू-भागका एकदुई स्थानमा मेघगर्जन र चट्याङ्गसहित क्षणिक वा हल्का वर्षाको सम्भावना रहेको छ। तसर्थ, अत्याधिक गर्मी, मेघगर्जन र चट्याङ्ग तथा वर्षा बाट हुन सक्ने जोखिम वा क्षति बाट बच्न आवश्यक सतर्कता अपनाउन महाशाखाले अनुरोध गरेको छ ।
मकवानपुर । चुनावकाे अगाडि अर्काे पार्टीकाे पक्षमा मत माग्ने कुरा राजनीतिक रूपमा घातक हुनसक्ने विश्लेषण पार्टीले गरेको नेपाली कांग्रेसका महामन्त्री गगन थापाले बताएका छन् ।
“प्रकारान्तरमा त्यसले पार्टीप्रतिकाे विश्वास डगमगाउने र घात हुनसक्ने अवस्था बन्दाे रहेछ” उनले भने “अब यसो नगर्ने निधोमा नेपाली काँग्रेस पुगेको छ ।”
आगामी भदाैमा कांग्रेसले नीति अधिवेशन गर्न लागेको र नीति अधिवेशनबाट यस्तो सवालमा संकल्प गर्नुपर्ने उनले बताए । “अब कांग्रेसकाे जीनमा बरु ५ पटक चुनाव हारे हारिन्छ, वडादेखि केन्द्रसम्म, राष्ट्रपतिदेखि प्रधानमन्त्रीकाे चुनावमा जस्ताेसुकै अफ्ठ्यारो परे पनि, नेपालकाे तमाम् पार्टी मिलेर एउटै पार्टी बनाए पनि कांग्रेसले तालमेल गर्दैन” उनले भने ।
नेपाली कांग्रेस क्षेत्र नम्बर २ र २ ‘ख’ काे साेमबार हेटाैंडा-१९ बस्तीपुरमा भएकाे भेलालाई सम्बाेधन गर्दै महामन्त्री थापाले यस्तो बताएका हुन् ।
आगामी निर्वाचनमा कांग्रसले कुनै पनि पार्टी वा शक्तिसँग तालमेल नगर्ने नीति लिने स्पष्ट पारेका हुन् । नेपाली कांग्रेस विचार प्रधान पार्टी भएकाले सत्ताका लागि कसैसँग सम्झाैता नगर्ने उनले बताए ।
तालमेल मात्र नभई कांग्रेसले सत्ताका लागि विचारसँग सम्झाैता नगर्ने उनले स्पष्ट पारे । बरु सरकार छाेड्नुपरे छाेड्ने तर, कांग्रेसकाे लागि विचार र सिद्धान्त सबैभन्दा महत्वपूर्ण कुरा भएकाे भन्दै त्यसलाई स्थापित गरिनुपर्नेमा थापाकाे जाेड थियाे ।
चुनावअघि नै गठबन्धन गर्दा पार्टीप्रति गलत धारणा बनेकाे भन्दै उनले बरु कांग्रेस चुनाव हार्न र सत्ता बाहिरै बस्न तयार रहने स्पष्ट पारे ।
‘हाम्राे इमेज कस्ताे बन्याे कि सरकारमा पुग्नका लागि चुनावअघि एउटासँग घाँटी जाेड्न पनि पुग्छ, त्याे सरकारमा पुगेन भन्ने रिसमा चुनावपछि अर्काेसँग घाँटी जाेड्न पनि पुग्छ । सत्ताका लागि जस्ताेसुकै सम्झाैता गर्छ भन्ने छवि बन्न पुग्याे, गल्ती जहाँबाट भएकाे छ, त्यहिँबाट सच्याउनुपर्छ ।’ थापाले भने ।
आम नागरिकमा राजनीतिप्रति वितृष्णा जागेकाे र आत्मविश्वास र आशा गुमाइरहेकाे भन्दै कांग्रेसले जनताकाे निराशालाई चिर्ने थापाले प्रतिवद्धता जनाए । ‘हामी निराश हुनुहुँदैन, कांग्रेस आफू जित्न आएकाे पार्टी हाेइन, कांग्रेस देशलाई जिताउन आएकाे पार्टी हाे ।’ थापाले भने । नेपाली कांग्रेस प्रगतिशील समाजकाे कल्पना गरी कार्यान्वयन गराउने पार्टी भएकाे भन्दै थापाले जनभावनालाई निरन्तर सुन्ने प्रतिवद्धता जनाए । ‘कांग्रेस उत्तेजित शक्ति पनि हाेइन, कांग्रेस यथास्थितिवादि पनि हाेइन । कांग्रेस त प्रगतिशिल शक्ति हाे, कांग्रेस प्रश्न हाेइन, उत्तर हाे ।’ थापाले थपे ।
चुनावकाे बेला उम्मेद्वार छान्ने कुरा सबैभन्दा जटिल बनेकाे भन्दै थापाले वडाकाे टिकट चुनावकाे ६ महिनाअघि त्यसै वडा तथा पालिका वा क्षेत्रका कार्यकर्ताले सर्वसम्मत वा निर्वाचनमार्फत छान्ने गरी नीति बनाउनुपर्ने धारणा राखे ।
कांग्रेस सक्किएर हाेइन सच्चिएर र परिवर्तन भएर अघि बढ्नुपर्ने भन्दै उनले भने -‘कमजाेर कांग्रेसकाे महामन्त्री हुनुभन्दा बलियाे कांग्रेसकाे साधारण सदस्य मञ्जुर छ तर, कांग्रेस सच्चिएर जान जरुरी छ ।
कार्यक्रममा बाेल्दै नेपाली कांग्रेस बागमती प्रदेश सभापति ईन्द्रबहादुर बानियाँले कांग्रेस एकजुट भएर जनताकाे हितमा लाग्नुकाे विकल्प नभएकाे बताए । नागरिकमा छाएकाे निराशा चिर्न काम गरेर देखाउनुपर्ने उनकाे भनाइ थियाे ।
कार्यक्रममा नेपाली कांग्रेस मकवानपुरका सभापति बुद्ध लामा, पूर्व सभापतिहरु माइकल रामचन्द्र अर्याल, रघुरमण न्याैपाने, पार्टी जिल्ला उपसभापति आनन्द कठायत, सचिव ईश्वर पाठक, सहसचिव इन्दिरा न्याैपाने प्रतिनिधि सभा क्षेत्र नम्बर १ का सभापति दामाेदर खनाल, चितवन क्षेत्र नम्बर १ का सभापति किरण वली, महासमिति सदस्य राजकुमार मल्ल, राजेश भेटवमल, मकवानपुर १ (क) का सभापति सुशान्त श्रेष्ठ, मकवानपुर २(ख) का सभापति रन्जन कालाखेती, थाहा नगर सभापति प्रमाेद जाेशी, मनहरी ८ का सभापति भिमसेन लामालगायतले मन्तव्य व्यक्त गरेका थिए ।
मकवानपुर क्षेत्र नम्बर २ का सभापति लाेक मुक्तानकाे सभाध्यक्षतामा कार्यक्रम भएकाे हाे ।
