मकवानपुर । मनहरी गाउँपालिका अध्यक्ष रन्जन कालाखेती गाउँपालिका पालिकाभित्र कुनै पनि पदका कर्मचारी वा अन्यबाट आर्थिक वा कुनै पनि प्रकारको भ्रष्ट्राचार नसहने बताएका छन् ।
“अघिल्लो कार्यसमितिको बेरुजु फस्यौट गर्दा गर्दा हैसान छौ, मेरो कार्यकालमा कहि कसैबाट गैरकानूनी काम भएको थाहा पाएमा उजुरी दिनुस, म छोड्दीन” उनले भने । पत्रकार महासंघ मकवानपुरले मनहरी गाउँपालिकासँगको सहकार्यमा आयोजना गरेको निर्वाचित जनप्रतिनिधि र सञ्चारकर्मीबीच अन्तरक्रिया कार्यक्रममा यस्तो बताएका हुन् ।
अध्यक्ष कालाखेतीले आफूहरु सञ्चारकर्मीहरुसँग सहकार्य र समन्वयमा अघि बढ्ने बताए । उनले राज्यको अभिन्न अंगको रुपमा रहेको सञ्चारजगतलाई स्थानीय सरकारले साथमा लिएर पालिकाका कमीकमजोरी देखाउने र सुधार्दै लैजान पालिका अग्रसर रहने बताए ।
अन्तरक्रियाका क्रममा उठेका सञ्चारकर्मीहरुको सवालहरुको जवाफ दिदैं उनले भने भनेः म यहाँ पालिकामा कमाउन आएको होइन, जनताको काम गर्न आएको हुँ । आफ्नो पालिकालाई सुशासनतर्फ लैजान्छु र भष्ट्राचारविहिन बनाउने प्रतिवद्धता समेत व्यक्त गर्दछु ।”
कार्यक्रममा गाउँपालिकाका प्रमुख प्रशासकीय अधिकृत मोहन कुमार श्रेष्ठले चालु आवमा असार १० गते सम्म गाउँपालिकाबाट सम्पादन भएका विषयगत शाखाहरुको प्रगति विवरण प्रस्तुत गरेका थिए ।
उनले शिक्षा तर्फ विनियोजित बजेट खर्च ८० प्रतिशत भएको भन्दै योजना तर्फ २७४ वटा योजना मध्ये २५५ वटा सम्झौता भइसकेको बताए । पूर्वाधार शाखा तर्फ ठेक्कामा सञ्चालित योजनाहरु कतिपय सम्पन्न भइसकेको बताउँदै श्रेष्ठले भने खानेपानीका कामहरु तीव्रगतिमा भइरहेको बताए ।
वडातहमा हुने स्वास्थ्य ईकाइका भवनहरु निर्माणको अन्तिम चरणमा रहेको उनले बताए । १५ शैयाको मनहरी अस्पताल संघीय सर्शत बजेट छ तर जग्गा प्राप्त नभएकाले कार्य रोकिएको बताए । स्वास्थ्य क्षेत्रमा ओपिडी सेवा विस्तार मनहरी अस्पतालमा गरिएको भन्दै श्रेष्ठले भने गर्भवती, विद्यालय छात्रा, जेष्ठ नागरिक लक्षित स्वास्थ्य कार्यक्रम, आँखा सम्बन्धी कार्यक्रम, सुत्केरी भेटघाट कार्यक्रमहरु गर्दै आइरहेको बताए ।
कार्यक्रममा प्रमुख प्रशासकीय अधिकृत श्रेष्ठले आर्थिक प्रशासनतर्फ गाउँपालिकालाई हालसम्म ८३ प्रतिशत कुल आम्दानी भएको बताए । उनले ८३ करोड ३९ लाख ८६ हजार ३५२ रुपैयाँ आम्दानी भएको बताए । संघीय तर्फ ४३ करोड ६६ लाख २३ हजार ९५६ र प्रदेश तर्फ ९ करोड २८ लाख २१ हजार ९९१ रहनुका साथै आन्तरिक तर्फ ३० करोड ४५ लाख ४० हजार ४०४ रुपैयाँ रहेको बताए । उनले हालसम्म खर्च ५५।९२ प्रतिशत भएको बताएका छन् ।
चालुतर्फ ३१ करोड ९३ लाख ४६ हजार ३६ रुपैयाँ र पुजीँगत तर्फ २४ करोड ३४ लाख ६ट हजार ५१३ रुपैयाँ रहेको श्रेष्ठले बताए । उनले सामाजिक विकास शाखा अन्तरगत भएका विभिन्न बालबालिका तथा महिला लक्षित कार्यक्रमहरुको विवरण समेत प्रस्तुत गरेका थिए ।
कार्यक्रममा वडा नम्बर ३ का वडा अध्यक्ष अनन्त प्रकाश अर्याल, वडा नम्बर ९ का वडा अध्यक्ष राजकुमार श्रेष्ठले आफ्नो वडामा भएका विकास, सुशासन र विभिन्न विषयगत प्रगतिबारे जानकारी गराएका थिए । कार्यक्रममा नेपाल पत्रकार महासंघ बागमती प्रदेश समितिका उपाध्यक्ष रुपेश दुलाल, जिल्ला उपाध्यक्ष ध्रुव अधिकारीले आफ्नो भनाई राखेका थिए ।
कार्यक्रममा महासंघका अध्यक्ष मणिराज गौतमले पत्रकारहरुको हितको लागि सहकार्य गरेकोमा गाउँपालिका प्रति आभार प्रकट गरे ।
मकवानपुर । अपाङ्गता भएकाहरूलाई बागमती प्रदेश सरकारले निजामति सेवा प्रवेशमा तोकिएको कोटा कटाउन खोजेको विरुद्ध महासंघ सर्वोच्चमा जाने तयारी गरेको छ ।
राष्ट्रिय अपांग महासंघ बागमतीले प्रदेश सरकार अपाङ्गमैत्री नीति नलिएको प्रती महासंघले ध्यानाकर्षण भएको हो । यसैबीच आगामी आर्थिक वर्ष २०८०/०८१ को बजेटको विरोध गरेको छ ।
अपाङ्ग महासंघ बागमतीले बुधबार हेटौंडामा पत्रकार सम्मेलन गर्दै बजेटको विरोध गरेको हो । महासंघ प्रदेश अध्यक्ष अश्विन लम्सालले बजेटमा समाबेश कार्यक्रमले अपांगता भएकाहरुको उत्थान नहुन बताए । ‘हाम्रो क्षेत्रका लागि सामाजिक विकास मन्त्रालयले विनियोजन गरेको बजेट अधिकांश कार्यक्रम झारा टार्ने खालको मात्र छ’ लम्सालले भने ‘प्रदेश सरकारले आगामी वर्षका लागि विनियोजन गरेको बजेटले अपांगताको क्षेत्रलाई समेट्न नसक्ने भएकोले बजेट संशोधनको माग गर्दछौं ।’
अघिल्लो आवको तुलनामा यसवर्ष बजेटको आकार बढे पनि मागहरु सम्बोधन नभएको लम्सालले बताए । “हाम्रो माग भन्दा असाध्यै न्यून बजेट मात्र विनियोजन गरिएको छ, जसका कारण यस क्षेत्रको सम्बोधन हुनै सक्दैन’ लम्सालले भने ।
राष्ट्रिय अपांग महासंघ बागमती प्रदेश व्यवस्थापक सीता मल्लले पहुँचयुक्त संरचना नहुँदा अपांगता भएकाहरुले समस्या झेल्दै आएको बताइन् ।
कार्यक्रमा बागमती प्रदेशसभामा एकजना अपांग भएका सदस्य रहेकोमा उनले अपांगमैत्री संरचना नहुँदा अनेक समस्या झेल्नुपरेको समेत बताइएको छ ।
२०७८ को जनगणना अनुसार नेपालमा २ दशमलव २५ प्रतिशत अपांगता भएका व्यक्ति बसोबास गर्छन ।
‘चिउरी, चेपाङ र चमेरोः एक नयाँ आयामको खोजी’ सार्वजनिक
Tags: No Comments
मकवानपुर । ‘चिउरी, चेपाङ र चमेरोः एक नयाँ आयामको खोजी’ पुस्तक सार्वजनिक गरिएकाे छ । बुधबार बागमती प्रदेश सरकार वन तथा वातावरण मन्त्री मसिना खड्काले डिभिजन वन कार्यालय राप्तीका प्रमुख बिष्णुप्रसाद आचार्यद्वारा लिखित पुस्तक सार्वजनिक गरेकी हुन् ।
पुस्तक सार्वजनिक गर्दै चेपाङको संस्कृतिसँग जोडिएको चिउरीको रुख जोगाउन सके पश्चिम मकवानपुरमा बसोबास गर्ने चेपाङ समुदायको आर्थिक समुन्नति हुने बागमती प्रदेशको वन तथा वातावरण मन्त्री मसिना खड्काले बताइन् । मनहरीस्थित डिभिजन वन कार्यालय राप्ती परिसरमा बुधबार पुस्तक सार्वजनिक कार्यक्रममा मन्त्री खड्काले चिउरी बहुउपयोगी बृक्ष भएकाेले यसको संरक्षणसँगै उपयोगितामा बारे जनचेतना आवश्यक भएकाे बताइन् । खड्काले चिउरीको संरक्षण गर्दै यसका लागि आवश्यक पर्ने बजेट व्यवस्थापन र नीतिगत व्यवस्थाका लागि प्रदेश सरकारको तर्फबाट पहल गर्ने प्रतिबद्धता जनाइन् ।
त्यसैगरी बागमती प्रदेश सरकारका पूर्व राज्यमन्त्री एबम् चेपाङ अगुवा सन्तबहादुर चेपाङले चिउरी प्रवर्धनका लागि आफूले पटक पटक पहल गरेको बताउँदै अहिले वन तथा वातावरण मन्त्रालयमार्फत बजेट बिनियोजन हुनुपर्ने चिउरी संरक्षणको लागि अन्य मन्त्रालयले कार्य गर्न लागेकामा असन्तुष्टि समेत जनाए ।
वन तथा वातावरण मन्त्रालयका सचिव यज्ञनाथ दाहालले २८ बर्ष अघि आफू कबुलियती वनको प्राविधिकको रुपमा आउँदा पनि चिउरी संरक्षणकै बहस भइरहेको र अहिले पनि त्यही बिषयमा बहस भइरहेको पाइएकाले सरकारले गर्नुपर्ने काम र समुदायले निर्वाह गर्नुपर्ने भूमिका स्पष्ट नभएसम्म प्रश्न उठिरहने बताए । दाहाले चिउरी संरक्षणलाई आर्थिक पाटोसँग जोडेर अध्ययन गरिनुपर्ने भन्दै हरेक दृष्टिकोणले चिउरीको संरक्षण हुनुपर्नेमा जोड दिए ।

जिल्ला समन्वय समिति मकवानपुरका प्रमुख ललित घलानले चिउरी संरक्षण, सालक संरक्षणमा डिभिजन वन कार्यालय राप्तीले अग्रसरता देखाइ काम गरिरहेकाे बताए । कार्यक्रममा डिभिजन वन कार्यालय चितवनका प्रमुख लोकराज नेपाल, चिउरीको बिषयमा पिएचडी अध्ययन गरिरहनु भएका श्रीहरि भट्टराई, राक्सिराङ गाउँपालिका ८ नम्बर वडाध्यक्ष हविल प्रजा, ५ नम्बर वडाध्यक्ष हरि प्रजा, कार्यपालिका सदस्य सिंगलाल प्रजासहितका जनप्रतिनिधिहरु, विभिन्न सामुदायिक वन उपभोक्ता समूहका अध्यक्षहरु, चिउरी व्यवस्थापनमा ध्यान दिइरहेका विभिन्न सामुदायिक वनका प्रतिनिधिहरु र उपभोक्ताहरुले चिउरीको जगेर्ना, विकास र बजार व्यवस्थापनमा चासाे व्यक्त गरेका थिए ।
डिभिजन वन कार्यालय राप्ती र राक्सिराङ गाउँपालिकाको संयुक्त पहलमा प्रकाशित पुस्तक मन्त्री खड्काले चेपाङ समुदायलाई हस्तान्तरण गरी सार्बजनिक गरेका थिए । पुस्तकका सन्दर्भमा लेखक एबम् डिभिजन वन कार्यालय राप्तीका प्रमुख बिष्णुप्रसाद आचार्यले स्पष्ट पारेका थिए । कार्यक्रम सुरु हुनुअघि डिभिजन वन कार्यालय राप्तीको परिसरमा मन्त्री खड्काले चिउरीको बिरुवा रोपेका थिए ।
राक्सिराङ गाउँपालिका अध्यक्ष राजकुमार मल्लको सभाध्यक्षतामा भएको कार्यक्रममा चितवनको राप्ती नगरपालिका, मकवानपुरको राक्सिराङ गाउँपालिका क्षेत्रबाट चिउरी संरक्षणकर्मी सहभागिता रहेकाे थियाे ।
मकवानपुर । बादर आतङकले स्थानिय बासिन्दा र बाँदर बिच एक अर्कामा द्वन्द चलिरहेको र आफूहरु समस्यामा रहेकाे भन्दै पीडित किसानहरुले प्रदेश सरकारकाे ध्यानाकर्षण गराएका छन् ।
बाँदरले बालीनालीलाई तहसनहस पार्दै मान्छेहरुलाई समेत टोक्ने, झम्टने गरेकाे स्थानीयहरुकाे गुनासाे छ । आफूहरुले लगाएको बाली बाँदरका कारण असुरक्षित भएपछि बाँदर पीडित किसानहरु बस रिजर्भ गरेर बागमती प्रदेश सभा सचिवालय घेर्न आइपुगेका हुन् ।

बागमती प्रदेशका मुख्यमन्त्री शालिकराम जमकट्टेलको गृहजिल्ला धादिङका किसानहरु बागमती प्रदेशसभा भवनअगाडि नारबाजी गरेका छन् । बागमती प्रदेशसभा भवन अगाडि बुधबार मुख्यमन्त्री जमकट्टेलको गृहजिल्ला धादिङका किसानहरुले बाँदर आतंक नियन्त्रण गर्न सरकारविरुद्ध नाराबाजी गरेका छन् ।
धादिङको नीलकण्ठ नगरपालिका सिद्धलेक गाउँपालिकालगायत १५० भन्दा बढी किसानले बाँदर नियन्त्रण गर्न माग गर्दै नाराबाजी गरेका हुन् । यसअघि पटक पटक आफूहरुले बाँदरको समस्याबारे जानकारी गराएको भए पनि प्रदेश सरकारले समस्या निराकरणको लागि पहल नगरेको भन्दै उनीहरुले नाराबाजी गरेका हुन् ।
पीडित किसानले “किसान मार्न पाइँदैन, बाँदर पाल्न पाइँदैन, बादर आतंक बन्द गर, प्रदेश सरकार कहाँ छ, बाँदरपीडित यहीँ छ” लगायत नारा लगाएका थिए । प्रदेशसभा भवनअगाडि नाराबाजी गरेपछि मुख्यमन्त्री जमकट्टेलले किसानहरुलाई छलफलका लागि बोलाए ।
दुईवटा बस रिर्जभ गरेर हेटौँडा आईपुगेका करिब १५० जना किसानहरुले बाँदरले जनजीवनमा समस्या पार्दासमेत प्रदेश सरकार गम्भीर नबनेको बताए ।
धादिङको निलकण्ठ नगरपालिका, सिद्धलेक गाउँपालिका, ज्वालामुखी गाउँपालिकाका किसानहरुले अन्तराष्ट्रिय कानून देखाएर बाँदर आतंक बन्द नगरेको भन्दै प्रदेशसभा भवन परिषरमा प्रर्दशन गरेका हुन् ।
बाँदर आतंकको कारण ठुलो समस्या हुँदा पनि प्रदेश सरकार कानमा तेल हालेर बसेको पीडितहरुको आरोप छ । मकवानपुरमा राक्सिराङ, मकवानपुरगढीलगायतको गाउँपालिकामा बाँदरको कारण समस्या भएपछि गाउँपालिकाहरुले बाँदर तर्साउन बन्दुक वितरण गरेको थियो । तर यो प्रभावकारी नभएको उनीहरुको गुनासो छ ।
मकवानपुर । बागमती प्रदेशको हेटौंडामा २ दिनसम्म चलेको प्रथम प्रदेश स्तरीय युवा सम्मेलन ११ बुदे घोषणा पत्र जारी गर्दै सकिएको छ । सम्मेलनले एक शिक्षण संस्था एक उद्यम र उत्पादन कार्यक्रम सञ्चालन गर्न माग गरेको छ ।
घोषणापत्र प्रदेश युवा परिषद्का कार्यकारी उपाध्यक्ष सन्तोष चौलागाईले प्रदेशका मुख्यमन्त्री शालिकराम जम्मकट्टेललाई हेटौंडा घोषणा पत्र हस्तान्तरण गरे ।
युवाहरुका सुझाबलाई समेटेर तयार पारिएको घोषणापत्र लागू गर्न पनि उनले प्रदेश सरकार समक्ष आग्रह गरे ।
बागमती प्रदेशका मुख्यमन्त्री शालिकराम जम्मकट्टेलले युवाहरुको सिप र क्षमतालाई प्रदेश सरकारले उच्च मुल्याङकन गर्ने बताए ।
युवाहरु निरास नहुन आग्रह गर्दै उनले भने “सिप सिकाएर रोजगारी दिनेगरी प्रदेश सरकारले काम गर्न लागेको छ, अब क्षमता अनुसारको रोजगारी दिनेगरी काम गर्ने योजना बनाउँदै छौं ।”
कार्यक्रममा बागमती प्रदेशका सामाजिक विकास मन्त्री कुमारी मुक्तानले यो दुइ दिने कार्यक्रमको उदेश्य पुरा भएको बताइन् ।
युवाहरुको क्षेत्रमा प्रदेश सरकारले राम्रो काम गरेर देखाउने बताइन् । कार्यक्रममा विभिन्न बिधाका उत्कृष्ट पाँच जनालाई २५ हजार रुपैयाँ नगद सहित पुरस्कृत गरिएको छ ।
बागमती प्रदेशका युवालाई सक्षम र सशक्त बनाउँदै युवासँग सम्बन्धित पाँच विविध विषयमा आधारित भएर छलफल गरी ती विषयलाई घोषणापत्रको रुपमा तयार गरीएको कार्यकारी उपाध्यक्ष चौलागाईले बताए ।
प्रदेश तथा संघीय सरकार समक्ष प्रस्तुत गरी ती विषयहरुलाई सरकारको नीति तथा कार्यक्रमहरु मार्फत सुनुवाई गर्न पैरवी गर्ने उद्देश्यले प्रदेशका १३ जिल्लाबाट समावेशीरुपमा छनौट भई आएका १५० भन्दा बढी युवाको सक्रिय सहभागितामा ११ बुँदे घोषणापत्र जारी जारी गरिएको उनले बताए ।
११ बुँदे हेटौंडा घोषणापत्रमा समावेश गरिएका बुँदाहरु यस्ता छन्ः
१। युवालाई आयआर्जनसँग जोड्न बागमती प्रदेशका १३ जिल्लाका ११९ वटा पालिकाहरुमा सीप विकास तालिम केन्द्रहरुको स्थापना गरी रोजगारीका लागि युवालाई सक्षम बनाउन प्रदेश तथा संघीय सरकार समक्ष पैरवी गर्ने ।
२। युवाद्वारा उत्पादन गरिएका सामग्रीको बजार, उत्पादन, रोजगार, अन्य अवसर तथा युवासँग प्रत्यक्ष सरोकार राख्ने विषयहरुको जानकारी गराउने युवा बजारको अवधारणा विकास गरी कार्यान्वयन गर्ने ।
३। शैक्षिक कार्यक्रमहरु युवाको वृत्तिविकासमा प्रत्यक्ष परिवर्तन देखिने शैक्षिक पाठ्यक्रम निर्माण गर्न र इच्छा अनुसारको जीवनउपयोगी सीप सिकाउने र प्रत्यक्ष रुपमा आम्दानी हुने उमेर लक्षित सीप र काम भन्ने कार्यक्रमहरु निर्माण गर्ने ।
४। देशका शैक्षिक संस्थाहरुलाई उत्पादनसँग जोड्न र नागरिकमा उद्यम भावनाको बिजारोपण गर्ने उद्देश्यले बागमती प्रदेशका १३ जिल्लाका ११९ पालिकाहरुमा रहेका ७०३१ वटै सामुदायिक विद्यालयहरुमा एक शिक्षण संस्था एक उद्यम र उत्पादन को नाराका साथ कार्यक्रम सञ्चालन गर्न पहल गर्ने ।
५। प्रदेश युवा परिषद्ले सम्बन्धित मन्त्रालय मार्फत् जीवनउपयोगी सीप सिकाउने र प्रत्यक्ष रुपमा आम्दानी हुने उमेर लक्षित सीप र काम भन्ने नाराका साथ नीति तथा कार्यक्रम तर्जुमा गर्न पहल गर्ने ।
६। सहज र सहुलियत कर्जा, बजारको सुनिश्चितता र दिगो उद्यमशीलता तथा उत्पादनको निश्चितता हुने गरी सरकारले अवलम्बन गरेका नीति तथा कार्यक्रमहरुमा परिमार्जन गर्दै युवा लक्षित व्यापारमैत्री उत्पादन लाई जोड दिन जोखिम हुने उद्यममा व्यावसायिक सुरक्षाको जोखिम लिन सक्ने वातावरण तयार गर्न पहलकदमी लिने ।
७। देशप्रतिको सम्मानभाव प्रकट गर्दै असल जिम्मेवार नागरिकको भावना विकास गर्ने अभिप्रायले कक्षा ११ र १२ को औपचारिक अध्ययन पश्चात् हरेक युवालाई अनिवार्यरुपमा युवाको रुची तथा विषयगत क्षेत्रमा न्युनतम ३ महिना स्वयम्सेवकका रुपमा कार्य गर्ने अवधारणालाई अवलम्बन गर्न नीतिगत निर्णय गरी अगाडि बढ्न पहल गर्ने ।
८। सरकारको नीति, कार्यक्रम र योजना निर्माणको प्रक्रियामा युवाको सहभागिता र विकास परियोजनाहरुमा प्रत्यक्ष संलग्नता सुनिश्चित गर्न योजना प्रक्रियालाई युवामैत्री बनाउन जोड दिने ।
९। सूचना प्रविधिको प्रभावकारी प्रयोग र उपायोगिताको र सुरक्षित इन्टरनेट र सामाजिक सञ्जाल प्रयोगका लागि युवा परिषद्को अगुवाइमा प्रदेशका सबै जिल्लामा सूचना प्रविधिको समुचित र उपयोगी प्रयोग केन्द्रित अभियान सञ्चालन गर्ने ।
१०। युवाको नवीनतम सोच र प्रयोगका साथै आविष्कार गरिएका प्रविधि, उत्पादन र विशेष खालको खोज, अनुसन्धानहरुमा राज्यको सहयोग र प्रवद्र्धनमा साझेदारी भई कार्य गर्न जोड दिने । उद्यमशीलता तथा व्यवसायमा युवालाई प्रेरित गर्ने गरी कानुनी प्रक्रियालाई सरलीकृत गर्ने ।
११। जलवायु परिवर्तन र वातावरण प्रदूषण लगायतका समस्याहरुको विषयमा छलफल पैरवी गरी वातावरण संरक्षणमा युवा सहभागिता बढाई अन्तर्राष्ट्रिय अभ्यास अवलम्बन गर्ने ।
