मकवानपुर । हरेक वर्ष जस्तै याे वर्ष पनि लैंगिक हिंसा विरुद्धकाे १६ दिने अभियान चलिरहेकाे छ । २५ नाेभेम्बर महिला हिंसा अन्त्य दिवसदेखि १० डिसेम्बर अन्तर्राष्ट्रिय मानवअधिकार दिवससम्म १६ दिनसम्म विश्वभर लैंगिक हिंसा विरूद्धको १६ दिने अभियान सञ्चालन हुँदै आएको छ ।
संयुक्त राष्ट्रसंघको महासभाले प्रत्येक वर्ष २५ नोभेम्बरलाई महिला हिंसा निर्मूल सम्बन्धी अन्तर्राष्ट्रिय दिवसको रूपमा विश्वभर मनाउने निर्णय गरे बमोजिम सन् १९९१ देखि बिश्वब्यापी रुपमा नोभेम्बर २५ देखि डिसेम्बर १० सम्म विश्वभर लैंगिक हिंसा विरूद्धको १६ दिने अभियान सञ्चालन हुँदै आएको छ । नेपालमा बि.सं. २०५४ साल देखी यो अभियान सञ्चालन हुँदै आईरहेकोमा नेपाल सरकारको २०७६ साल जेठ ६ गते वर्ष २०७६ लाई लैंगिक हिंसा बिरुद्धको अभियान बर्ष घोषणा गरेको थियाे ।
याे वर्ष “लैंगिक हिंसा अन्त्यको सुनिश्चितता, महिला र बालबालिकामा लगानीको ऐक्यबद्धता ” भन्ने राष्ट्रिय नाराका साथ लैंगिक हिंसा विरुद्धकाे १६ दिने अभियान मनाइँदैछ । अभियानकाे क्रममा सरकारी कार्यालय, सुरक्षा निकाय, सामुदायिक सेवा केन्द्र, महिला सम्बद्ध संघ संस्थाहरुले अभियानमा विभिन्न कार्यक्रम गरी मनाउँदै आएका छन् ।
हरेक वर्ष लैंगिक हिंसा विरुद्धकाे १६ दिने अभियान मनाइने गरेकाे भए पनि तथ्याङ्कले लैंगिक तथा घरेलु हिंसाकाे घटना बढेकाे देखाउँछ । यस्तै लैंगिक तथा घरेलु हिंसाकाे घटना बढेकाे तथ्याङ्क बागमती प्रदेश प्रहरी कार्यालय हेटौंडाले अभियानकाे अवसरमा गरेकाे अन्तरक्रियमा समेत देखाइएकाे थियाे । तथ्याङ्क अनुसार प्रदेशका १० जिल्लामा आर्थिक वर्ष २०७७/०७८ को तुलनामा गत आर्थिक वर्ष २०७९/०८० मा लैङ्गिक तथा घरेलु हिंसाका घटना १४ प्रतिशतले बढेको छ ।
कार्यालयका अनुसार आर्थिक वर्ष २०७७/०७८ मा बागमती प्रदेशका १० जिल्लामा २ हजार २१९ वटा लैङ्गिक तथा घरेलु हिंसाका घटना भएको थियो भने आर्थिक वर्ष २०७८/०७९ मा २ हजार ५२८ र गत आर्थिक वर्ष २०७९/०८० मा २ हजार ५२० वटा घटना भएको छ । १० जिल्लामा चालु आर्थिक वर्षमा ७८६ वटा लैङ्गिक तथा घरेलु हिंसाका घटना भएको बागमती प्रदेश प्रहरी कार्यालय हेटौंडाका प्रहरी नायव महानिरीक्षक किरण राणाले जानकारी दिइन् ।
गत आवमा चितवनमा सबैभन्दा बढी लैङ्गिक तथा घरेलु हिंसाका घटना भएको तथ्याङ्क छ । चितवनमा गत आवमा ७३९ हिंसाका घटना भएकोमा चाुल आवकाे हालसम्म समेत चितवनमा २ सय ४८ दर्ता भएकाे राणाले बताइन् । यसैगरी , गत आवमा मकवानपुरमा ६ सय ३ तथा चालु आवकाे हालसम्म १ सय ५७ जना, सिन्धुलीमा गत आवमा २ सय ६ तथा चाुल आवकाे हालसम्म ५३, धादिङमा गत आवमा १ सय ७१, चालु आवमा ६०, काभ्रेमा गत आवमा २ सय ९८, चालु आवमा १ सय २२, रामेछापमा गत आवमा ८१, चालु आवमा १७, सिन्धुपाल्चोकमा गत आवमा १ सय ७७, चालु आवमा ५१, दोलखामा गत आवमा ९८, चालु आवकाे हालसम्म २६, नुवाकोटमा गत आवमा १४७ चालु आवमा ४९ र रसुवामा गत आवमा शुन्य चालु आवकाे हालसम्म ३ वटा हिंसाकाे घटना दर्ता भएकाे बागमती प्रदेश प्रहरी कार्यालयकाे तथ्याङ्कले देखाउँछ ।
जिल्लागत रुपमा तथ्याङ्क अनुसार उपत्यकाका ३ जिल्ला बाहेक चालु आवकाे हालसम्म चितवनमा ८१ वटा, काभ्रेमा ६२ वटा, मकवानपुरमा ५५, धादिङमा ३७ वटा, सिन्धुलीमा ३४ वटा नुवाकोटमा ३१ वटा, दोलखामा २० वटा, सिन्धुपाल्चोकमा ३० वटा, रामेछापमा १२ वटा र रसुवामा २ वटा लैङ्गिक हिंसाका घटना भएका छन् । यस्तै चालु आर्थिक वर्षमा प्रदेशका १० जिल्लामा मध्ये चितवनमा १ सय ६७ वटा, काभ्रेमा ६० वटा, मकवानपुरमा १ सय २ वटा, धादिङमा २३ वटा, सिन्धुलीमा १९ वटा, नुवाकोटमा १८ वटा, दोलखामा ६ वटा, सिन्धुपाल्चोकमा २१ वटा, रामेछापमा ५ वटा र रसुवामा १ वटा घरेलु हिंसाका घटना भएका छन् ।
गत आर्थिक वर्ष चितवनमा ८ सय र रसुवामा २७ वटा लैङ्गिक हिंसाका घटना भएका थिए । घरेलु हिंसातर्फ भने मकवानपुरमा १ हजार १ सय ४६ वटा र सबैभन्दा कम रसुवामा ५ वटा घटना भएको तथ्याङ्कमा उल्लेख छ । तथ्याङ्क अनुसार गत आर्थिक वर्षमा प्रदेशका १० जिल्लामा ७ हजार ३ सय २१ वटा लैङ्गिक हिंसाका घटना भएको थियो भने ४ हजार ४६ वटा घरेलु हिंसा भएको थियो ।
गत तीन आर्थिक वर्षमा राजधानी उपत्यकासहित ७ वटै प्रदेशमा ५५ हजार २ सय १४ लैंगिक हिंसा भएकाेमा मधेस प्रदेशमा सबै भन्दा बढी १३ हजार ६ सय ७६ वटा लैंगिक हिंसा भएको तथ्याङ्कमा उल्लेख छ । उक्त अवधीमा सबै भन्दा कम कर्णाली प्रदेशमा ३ हजार ४४ वटा घटना भएकोमा बागमती प्रदेश बढी उपत्यका र लुम्विनी प्रदेश पछि ४ औ स्थानमा रहेको तथ्याङ्क प्रदेश प्रहरी कार्यालयले प्रस्तुत गरेकाे छ ।
लैङ्गिक तथा घरेलु हिंसा न्यूनीकरणका लागि प्रदेश प्रहरी कार्यालय हेटौंडा मार्फत् विभिन्न क्रियाकलाप भएको प्रहरी नायव महानिरीक्षक राणाले बताइन् । उनका अनुसार लैङ्गिक तथा घरेलु हिंसा न्यूनीकरणका लागि प्रदेशका १० जिल्लामा १० वटा जिल्लास्तरीय समिति गठन गरिएको छ भने महानगरस्तरीय एक वटा, नगरपालिकास्तरीय २५ वटा, गाउँपालिकास्तरीय ६१ वटा र वडास्तरीय ७७५ वटा सहित ८७२ वटा लैङ्गिक हिंसा नियन्त्रण सञ्जाल समिति गठन गरिएको उनले बताइन् ।
‘लैङ्गिक हिंसा विरुद्ध एकिकृत सेवा दिन जिल्ला अस्पतालमा एकद्वार संकट व्यवस्थापन केन्द्र स्थापना गरिएको छ’ उनले भनिन् जसले लैगिंक हिंसाका पिडितलाई आश्रय दिने, घाइते भए उपचार गर्ने, सामाजिक मनोविमर्श दिने, कानूनी सल्लाह उपलब्ध गराउने र पूर्नस्थापनाको लागि पहल गर्ने कार्य गरिरहेको छ ।’ उनका अनुसार हालसम्म १ हजार ६ सय १६ जनाले एकद्वार संकट व्यवस्थापन केन्द्र मार्फत सेवा लिएका छन् ।
प्रहरी कार्यालय तथा सामुदायिक सेवा केन्द्र र प्रहरी सेवा केन्द्रद्वार स्थानिय स्तरमा सचेतना अभिबृद्धी गर्ने कार्य गरिदै आएको छ भने लैंगिक हिंसा र घरेलु हिंसामा संलग्न पिडकलाई नियन्त्रण तथा पक्राउ गरी कानुनी दायरामा ल्याउने गरिएको बताइएकाे छ। हिंसा न्युनीकरणमा बागमती प्रदेश प्रहरी कार्यालयले समुदायसँग प्रहरीद्वारा सञ्चालित कार्यक्रमहरुमा सक्रिय सहभागिता, समन्वय र सहकार्य, पिडितलाई परामर्श र सहयोग, पिडतको उद्दार तथा पुनस्थापनामा सहयोग प्रदान गर्न सहयाेगकाे अपेक्षा समेत गरेका राणाले बताइन् ।
‘समाज परिवर्तन गर्न नागरिक सहभागीता अपरिहार्य’
Tags: No Comments
मकवानपुर । जिल्ला प्रहरी कार्यालय मकवानपुरका प्रमुख एसपी सिताराम रिजालले समाज परिवर्तनमा प्रहरी मात्रको एकल प्रयासले सम्भव नहुने तथा यसकाे लागि नागरिकको सहभागीता अपरिहार्य रहेकाे बताएका छन् । सामुदायिक सेवा केन्द्र मकवानपुर तथा सामुदायिक प्रहरी सेवा केन्द्र हेटौंडा पशुपतिनगरको आयोजनामा समुदाय प्रहरी साझेदारी कार्यक्रमको प्रभावकारीता सम्बन्धी अन्तरक्रिया कार्यक्रममा उनले यस्ताे बताएका हुन् ।
अन्तरक्रियामा एसपी रिजालले समाज परिवर्तनमा सामुदायिक सेवा केन्द्रको भूमिकाकाे प्रशंसा समेत गरे । अन्तरक्रियामा उठेका जिज्ञासाहरूको प्रहरी प्रमुखले सम्बोधन गरेका थिए । कार्यक्रममा काठमाडौ –२८ पुरानो बसपार्कका अध्यक्ष एवम् कार्यक्रमका विशिष्ट अतिथि कमरूदिन मियाले हाल केन्द्रले गरेको गतिविधि बारेमा जानकारी गराउनुका साथै सामुदायिक सेवा केन्द्र मकवानपुरलाई काठमाडौ भ्रमणको लागि आमन्त्रण समेत गरे ।
केन्द्रका अध्यक्ष तथा सामुदाय प्रहरी साझेदारीका जिल्ला सदस्य राम बिष्टले केन्द्रको स्थापनादेखि हाल सम्मको महत्वपूर्ण कार्यहरुको चर्चा गरेका थिए । सामुदायिक सेवा केन्द्रको वर्तमान अवस्थामा आइपरेका चुनौती समेत उनले प्रस्तुत गरेका थिए । काठमाडौ महानगरपालिकाको आर्थिक सहयोगमा धार्मिक भ्रमण तथा सामुदायिक अवलोकन गर्नको लागि आउनुभएका १३० जनालाई स्वागत गर्नुका साथै पुरानो बस पार्क सामुदायिक पदाधिकारी,कार्यसमिति सदस्य,पुर्व अध्यक्ष,जेष्ठ नागरिकहरूलाई स्वागत तथा सम्मान गरिएकाे थियो ।
केन्द्रका अध्यक्ष तथा सामुदाय प्रहरी साझेदारीका जिल्ला सदस्य राम बिष्टको सभाअध्यक्षतामा भएको कार्यक्रममा जिल्ला प्रहरी कार्यालय मकवानपुरका प्रमुख तथा समुदाय प्रहरी साझेदारीका जिल्ला सह– संयोजक प्रहरी उपरीक्षक सिताराम रिजालको प्रमुख आतिथ्यता भएकाे कार्यक्रममा जिल्ला प्रहरी कार्यालयका प्रहरी नायब उपरीक्षक लक्ष्मी भण्डारी ,ईलाका प्रहरी कार्यालय पशुपतिनगरका निमित्त प्रमुख सुन्दर कार्की, केन्द्रका पदाधिकारी, कार्यसमिति सदस्य, पुर्व अध्यक्ष, स्वयसेविका, जेष्ठ नागरिकलगायतको उपस्थिति थियो ।
मकवानपुर । हेटौंडा भएकाे छैठौं संस्करणको उपमेयर नगरकप भलिबल प्रतियोगिताको पुरुषतर्फ सेमिफाइनल समिकरण पूरा भएको छ । केशवलाल श्रेष्ठ स्मृति केन्द्रिय प्रतिष्ठान र मकवानपुर जिल्ला भलिबल संघको आयोजना, मकवानपुर जिल्ला खेलकुद विकास समितिको सहकार्य तथा हेटौंडा उपमहानगरपालिकाको सहयोगमा हेटौंडा–१९ नेवारपानीमा प्रतियोगिता जारी छ ।
प्रतियाेगितामा शुक्रबार पुरुषतर्फ क्वाटर फाइनलका खेल भए । यस्तै महिला तर्फ पहिलाे सेमिफानलकाे खेल भएकाे छ । शुक्रबार भएको पुरुष भलिवलकाे क्वार्टरफाइनल खेलबाट वडा नम्बर १७, ५, १९ र ११ सेमिफाइनल प्रवेश गरेका हुन् । शुक्रबारकाे खेलमा वडा नम्बर १७ ले वडा नम्बर १० लाई २५–१६ र २५–२० को सोझो सेटमा हराउँदै सेमिफाइनलमा स्थान पक्का गरेकाे हो ।
यस्तै ६ नम्बर वडा र ५ नम्बर वडावीच भएकाे खेलबाट ५ नम्बर सेमिफाइनल प्रवेश गरेकाे हाे ।५ नम्बर वडा २०–२५, २५–२३ र १५–१० को सेटमा विजयी भएको हो । शुक्रबारै भएको खेलमा १९ नम्बरले १२ लाई हराउँदै सेमिफाइनल प्रवेश गर्यो । १९ ले १२ लाई २५–१८, १८–२५ र १५–१० को सेटमा पराजित गरेको हो । अन्तिम क्वार्टरफाइनल खेलमा ११ ले १६ लाई सोझो सेटमा हरायो । ११ नम्बर वडा २५–१२ र २५–११ को सेटमा विजयी भएको हो ।
जारी प्रतियोगितामा महिलातर्फ भने ९ नम्बर वडा फाइनल प्रवेश गरेको छ । शुक्रबार भएकाे महिलातर्फको पहिलो सेमिफाइनलमा वडा नम्बर ९ ले १४ लाई हराउँदै फाइनलमा स्थान बनाएकाे हाे । ९ ले १४ लाई २२–२५, २५–२३, २५–११, २५–१९ को सेटमा पराजित गर्दै उपाधी भिडन्त पक्का गरेकाे हाे । महिला तर्फ वडा नम्बर १७ र १२ बीच भएकाे दाेस्राे सेमिफाइनल रात परेको कारण स्थगित गरिएकाे आयाेजकले जनाएकाे छ । खेल जारी रहँदा रातपरेपछि शनिबार बिहान पुन खेल हुने भएकाे हाे ।
प्रतियोगितामा पुरुषतर्फ १२ वटा वडाले सहभागिता जनाएका छन् भने महिलातर्फ ७ वटा वडाले सहभागिता जनाएकाे संयोजक पुष्प मैनालीले जानकारी दिए । उनका अनुसार पुरुष भलिवल तर्फ वडा नं ३, ४, ५, ६, ९, १०, ११, १२, १३, १६, १७ र १९ ले सहभागिता जनाएका छन् भने महिला भलिवल तर्फ ६, ९, १०, १२, १४, १७ र १९ वडाले मात्र सहभागिता जनाएका छन् ।
प्रतियोगितामा प्रथम हुने वडाले ५० हजार, द्वितीय हुनेले ३० हजार र सान्त्वना हुनेले १० हजार रुपैयाँसहित शिल्ड, मेडल तथा प्रमाणपत्र प्राप्त गर्नेछन् । विधागत उत्कृष्ट खेलाडीहरुका लागि पनि पुरस्कारको व्यवस्था गरिएको आयोजकले जनाएको छ । मंसिर १४ गतेदेखि सुरु प्रतियाेगिताकाे फाइनल खेलहरु १७ गते खेलाइने छ ।
गत वर्ष भएको पाँचौ सस्करणको उपमेयर कपको उपाधि महिलातर्फ १९ नम्बर वडा र पुरुषतर्फ ११ नम्बर वडाले हात पारेकाे थियो ।

मकवानपुर । अपाङ्गता भएकाहरूको सवाल सहज सुनुवाइ नहुने गरेको गुनासो गरिएको छ । विश्वभरका राष्ट्रिय सरकारहरू तथा लाखौँ नागरिकहरूलाई एउटै थलोमा ल्याई महत्वकांक्षी कार्यसूचीमा व्यापक छलफल र परामर्श गरी दिगो विकास लक्ष्यहरू तय गरिएका हुन् । तर कार्यान्वयनको पाटो कमजोर रहेको सहभागीले बताएका हुन् ।
दिगो विकास लक्ष्य प्राप्तिको प्रतिबद्धता अपाङ्गता भएका व्यक्तिको अपनत्व र नेतृत्वसहितको ऐक्यबद्धता भन्ने नाराका साथ अपाङगता भएका व्यक्तिको अधिकार सम्बन्धि महसन्धी र दीगो बिकास लक्ष्यहरूको अन्तरसम्बन्ध बिषयक अभिमुखिकरण कार्यक्रम सहभागीहरूले हेटौंडा यस्तो बताएका हुन्।
दिगो विकासको लक्ष्य अन्तरगत विकासको लक्ष्य एउटा साहसिक र विश्वव्यापी सम्झौता भएको र यसले सन् २०३० सम्ममा सबै प्रकारका गरिबीको उन्मूलन गरी मानव, पृथ्वी र समृद्धिको लागि एक समान, न्यायपूर्ण र सुरक्षित विश्व निर्माण गर्ने परिकल्पना गरेको छ । दिगो विकासका १७ लक्ष्य तथा १६९ सहायक लक्ष्यहरू दिगो विकासका लागि एजेण्डा २०३० को एउटा भाग हो, जुन संयुक्त राष्ट्रसंघका १९३ सदस्य राष्ट्रहरू सम्मिलित सेप्टेम्बर २०१५ को ऐतिहासिक राष्ट्रसंघीय साधारण सभाको शिखर सम्मेलनले पारित गरेर जनवरी १, २०१६ देखि लागू गरेको छ ।
प्रदेश सभा सदस्यहरू गिता गुरुङ हरि प्रसाद श्रेष्ठ लक्ष्मी श्रेष्ठ मन्त्रालय सचिब: अमृत अधिकारी, अपाङ्गता भएका व्यक्तिको ३२ औ अन्तराष्ट्रिय दिवसमा राष्ट्रिय अपाङ्ग महासंघ नेपाल बागमती प्रदेशको समन्वयमा प्रदेशको सामाजिक विकास मन्त्रालयले कार्यक्रम आयोजना गरेको हो ।
कार्यक्रममा राष्ट्रिय अपाङ्ग महासंघ नेपाल बागमती प्रदेश अध्यक्ष अश्विन लम्सालले दिवसको सन्दर्भमा मात्रै आवाज उठाउने नभइ सधै सकारात्मक सोच र व्यवहार हुनुपर्ने बताए । अपाङ्गता सम्बन्धी कानुन, नियममा भएका र महासन्धीमा भएका व्यवस्थाहरूको राम्रो नभएको राष्ट्रिय अपाङ्ग महासंघ नेपाल बागमती प्रदेश समिति सल्लाह गणेश चन्द्र दवाडीले बताए । उनले विपद् सम्बन्धी हालसम्मका कार्यक्रमहरूमा अपाङ्गताका सवालहरूको समावेशीकरण भएको नपाइएको बताए । अपाङ्गता भएका व्यक्तिलाई अदालतले दिने सहायता, अदालतका काम कारवाही, प्रकृया र सेवाहरूलाई पहुँचयुक्त बनाउने विषयमा अधिकारीहरूमा त्यति राम्रो ज्ञान पनि नभएको उनले बताए ।
अपाङ्गता भएका महिला लक्षित यौन तथा प्रजनन् स्वास्थ्यका कुनै कार्यक्रम नभएको पुनर्स्थापना सेवा सहर केन्द्रित रहेको छ । सरकारी गैर सरकारी निकायहरु अपाङ्गता मैत्री संरचनाहरु नभएको सुचना तथा सञ्चारमा पहुच नभएको सहभागीले बताए । अपाङ्गता भएका व्यक्तिहरु तथ्याङ्क (२०७८) अनुसार नेपालमा अपाङ्गता भएका व्यक्तिहरुको जनङसख्या पछिल्लो जनगणना २०७८ ले २ दशमलव २ प्रतिशत रहेको देखिन्छ तर,यो तथ्यांकमा धेरै व्यक्ति छुटेको महासंघको भनाई छ। विशेष गरी प्राकृतिक रुपमा दुर्घटना हिंसा द्वन्द्व तथा अन्य कुनै महामारी तथा दीर्घकालिन रोग जस्ता विभिन्न कारणहरुले जुनसुकै समयमा जुनसुकै वर्गका व्यक्तिहरु अपाङ्गता देखिन्छ ।
बागमती प्रदेशमा मात्र १ लाख २४ हजार १ सय अपाङ्गता भएका व्यक्तिहरुको तथ्याङ्क सबै भन्दा बढी शारीरिक अपाङ्गता भएका व्यक्ति ४३ हजार ५०४ जना रहेको तथ्याङकले देखाएको छ । कार्यक्रममा मन्त्रालयका निमित्त सचिब गोपाल कंडेल, महासंघका सल्लाहकार दवाडीलगायतले सहजिकरण गरेका थिए ।

मकवानपुर । हेटौंडा–१४ उत्तरपानीमा रहेको टसीलिङ खानेपानी तथा सरसफाई उपभोक्ता समिति हेटौंडा खानेपानी व्यवस्थापन बोर्डमा हस्तान्तरण गरिएकाे छ । समितिबाट सञ्चालित २ सय ८८ वटा धारा, डिप बोरिङ्ग तथा पानीटंकी सहितको खानेपानी योजना शुक्रबार बोर्डमा हस्तान्तरण गरिएको हो । टसीलिङ खानेपानी उपभोक्ता समिति बोर्डमा हस्तान्तरण भए संगै १४ नम्बर वडाको सम्पुर्ण क्षेत्रकाे खानेपानीको व्यवस्थापन बोर्डमा आएको छ ।
उक्त समिति बोर्डमा हस्तान्तरणपछि मंसिर महिना देखिनै २ सय ८८ धाराहरुका उपभोक्ताहरुले हेटौंडा उपमहानगरपालिकाले उपलब्ध गराएको मासिक १० हजार लिटर बराबरको खानेपानी निःशुल्क उपभोग गर्न पाउने भएका छन् । यस अघि नै मयूधाप खानेपानी तथा सरसफाई उपभोक्ता समिति, चुरियामाई संयुक्त खानेपानी तथा सरसफाई उपभोक्ता समिति र बनेलधाप कालोपानी खानेपानी तथा सरसफाई उपभोक्ता समिति बोर्डमा हस्तान्तरण भइसकेका छन् ।
बोर्डले पानी महशुल संकलनको लागि वडा न. १४ स्थित बनेलधापमा प्रत्येक महिनाको २२ गते देखि मसान्त सम्म महशुल संकलन काउन्टर संचालन गर्दै आइरहेको जनाएको छ । समितिमा कार्यरत अवकाश पाएका कर्मचारी राम सिं थिङ्ग र जय बहादुर थिङ्गलाई हेटौंडा उपमहानगरपालिकाकी मेयर मीनकुमारी लामा, उपमेयर राजेश वानियाँ, वडाध्यक्ष दिपक खड्कालगायतले दोसल्ला ओढाई, प्रमाण पत्र र नगद सहित सम्मान तथा बिदाईसमेत गरिएको छ ।
टसीलिङ खानेपानी तथा सरसफाई उपभोक्ता समितिका अध्यक्ष जगतबहादुर सिन्तानको सभाअध्यक्षता भएको कार्यक्रममा लामाको प्रमुख आतिथ्यता रहेको थियो । कार्यक्रममा लामाले खानेपानीलाई व्यवस्थित गर्न र नगरवासीलाई सुविधा उपलब्ध गराउन उपमहानगरपालिकाले १० हजार लिटर पानीको महशुल निशुल्क गरेको बताइन् ।
उपमेयर राजेश बानियाँले निर्वाचनका बेलामा नगरवासी समक्ष गरेका प्रतिवद्धताहरु एकपछि अर्को गर्दै पूरा गरिरहेको बताए । वडाका अध्यक्ष दीपक खड्काले खानेपानीको जिम्मा हेटौंडा खानेपानी व्यवस्थापन बोर्डलाई दिएपछि वडामा पानीको समस्या नहुने बताए । कार्यक्रममा बोर्डका अध्यक्ष प्रताप बिष्ट, बोर्ड सदस्य इन्द्रप्रसाद नेपाल, बोर्डका कार्यकारी निर्देशक बिष्णु प्रसाद सापकोटालगायतको आतिथ्यता रहेको थियो ।
हाल बोर्ड अन्तर्गत वडा नं. १४ मा १ हजार ६ सय ९८ वटा धाराहरु सञ्चालनमा रहेको छ । बोर्डको सेवा क्षेत्र भित्र हाल २६ हजार ५ सय धारा रहेको छ । बोडले प्रति दिन २ करोड ५५ लाख लिटर खानेपानी उत्पादन गरी वितरण गर्दै आइरहेको अध्यक्ष प्रताप विष्टले बताए ।
