मकवानपुर । मकवानपुरको मकवानपुरगढी गाउँपालिकामा करेन्ट लागेर एक जनाको मृत्यु भएको छ ।
मृत्यु हुनेमा मकवानपुरगढी वडा नम्बर ८ ईपाखहरे बस्ने ३७ वर्षीय दिक्पाल स्याङ्तान रहेका प्रहरीले जनाएको छ ।
जिल्ला प्रहरी कार्यालय मकवानपुरका अनुसार स्थानीय राम बहादुर घिसिङको बारीमा रहेको बिजुलीको पोलमा करेन्ट लागेर स्याङ्तानको मृत्यु भएको हो ।
शव पोष्टमार्टमका लागि हेटौंडा अस्पताल ल्याएको प्रहरीले जनाएको छ ।
मकवानपुर । मकवानपुरकाे मनहरी गाउँपालिकामा बाली क्षती भएका २१ जना कृषकले राहत प्राप्त गरेका छन् । मनहरी गाउँपालिका वडा नम्बर ३ का बाली क्षती भएका कृषकहरुले राहत प्राप्त गरेका हुन् ।
मंगलबार वडा कार्यालयले उनीहरुलाई राहत वितरण गरेको हो । चालु आर्थिक २०८०/०८१ काे बजेटमा वडा कार्यालय अन्तर्गत विनियाेजित वजेटमा नै बाली क्षती भएका कृषकहरुका लागि राहतको व्यवस्था गरी राहत वितरण गरिएकाे वडा अध्यक्ष अनन्तप्रकाश अर्यालले जानकारी दिए ।
२१ जना कृषकलाई जनही १०/१० हजार रुपैयाँ राहत वितरण गरिएको उनले बताए । मनहरी ३ हाँडीखोलाका कृषकहरुले चैत वैशाखमा लगाएको तरकारी विपद्का कारण क्षति हुने गरेकाे छ । ‘कृषकले मेहनत गरेर लगाएको बालीनाली विपद्का कारण क्षती हुने भएकाले राहत स्वरुप रकम वितरण गरिएको हाे’ वडाअध्यक्ष अर्यालले भने ।
मनहरीकाे हाँडीखाेला तरकारी पकेट क्षेत्रका लागि नेपालमै प्रसिद्ध क्षेत्र हाे । हाँडीखाेलाकाे तरकारी हेटाैडा काठमाडाै पाेखरालगायतकाे देशका ठुला शहरहरुमा खपत हुने गरेकाे छ ।
मकवानपुर । वासुदेव–भानु स्मृति साहित्य पुरस्कारबाट दीपक गौतम सम्मानित हुने भएका छन् । वासुदेव रिजाल स्मृति प्रतिष्ठान मकवानपुरले उक्त पुरस्कारबाट यो वर्ष साहित्यकार दिपक गौतमलांई सम्मानित गर्ने भएका हाे ।
नवसर्जक साहित्य चौतारी नेपालका परिकल्पनाकार तथा संरक्षक समेत रहेका मकवानपुरे साहित्यकार गौतमले साहित्य क्षेत्रमा पुर्याभएको योगदानको कदर गर्दै पुरस्कार प्रदान गर्न लागिएको प्रतिष्ठान आरसी रिजालले बताए । रिजालका अनुसार उक्त पुरस्कारको राशी १५ हजार रुपैयाँ रहेको छ ।
प्रतिष्ठानले २०७१ सालदेखि हरेक बर्ष भानु जयन्तीको अवसरमा उक्त पुरस्कार प्रदान गर्दै आइरहेको छ । प्रतिष्ठानले २०७१ सालमा साहित्यकार रामचन्द्र आचार्य फुर्सती, २०७२ मा पुरुषोत्तम आचार्य, २०७३ मा प्रभा भट्टराई, २०७४ मा श्यामकुमार बानियाँ, २०७५ मा नरेन्द्र परासर, २०७६ मा मुना अर्याल, २०७७ मा निमेष निखिल, २०७८ जनार्दन शर्मा, २०७९ मा ठाकुर शर्मा भण्डारी र २०८० मा सुनिल गौतमलाई सम्मान गरेको प्रतिष्ठानका अध्यक्ष रिजालले जानकारी दिए ।
असार २८ गते शुक्रबार एक कार्यक्रमको आयोजना गरी पुरस्कार प्रदान गर्ने भएकाे हाे । आगामी शुक्रबार संस्थाले विद्यार्थीहरुबीच विभिन्न प्रतियोगिताहरु आयोजना गरी भानु जयन्ती समेत मनाउने तयारी गरेको बताइएकाे छ ।
मकवानपुर । औद्योगिक क्षेत्रमा स्थापना गरिएका उद्योगको जग्गा भाडादर बढाएपछि मारमा पर्दै आएका उद्योगिहरुले बढाइएको भाडादर कार्यान्वयन नगर्न माग गरेका छन् ।
उद्योग संघ मकवानपुरको नेतृत्वमा हेटौंडा औद्योगिक क्षेत्र व्यवस्थापन कार्यालय हेटौंडा, मकवानपुर मार्फत औद्योगिक क्षेत्र व्यवस्थापन लिमिटेड बालाजु, काठमाडौलाई सोमबार ज्ञापन पत्र बुझाएको छ ।
औद्योगिक क्षेत्र व्यवस्थापन लिमिटेड संचालक समितिको ५ मंसिर २०७५ को बैठकले जग्गाको भाडा वृद्धिको निर्णय गरेको थियो । सोही समयमा औद्योगिक क्षेत्र उद्योग महासंघको असहमती हुँदाहुदै पनि एकतर्फी रुपले भाडा बढाएको उद्योगिहरुको दाबि छ ।
उद्योगिहरुको विरोधपछि ९ मंसिर २०७५ मा तत्कालीन मन्त्रीस्तरीय निर्णयले तत्कालको लागि सो निर्णयलाई कार्यान्वयनमा रोक लगाएको थियो ।
औद्योगिक क्षेत्र व्यवस्थापन लिमिटेडले २२ असार २०७९ मा २०७५ सालदेखिकै वृद्धि भाडा असूल गर्नेगरी अर्को निर्णय गरेपछि यसको विरुद्ध उद्योगिहरु अझै विरोधमा छन् ।
जसबारे हाल अदालतहरुमा मुद्दाहरु विचारधीन छन् । सर्वोच्च अदालतमा २७ असार मिति २०८१ को लागि पेशी रहेको छ । उच्च अदालत हेटौंडामा २४ जेठ ०८१मा दर्ता भई विचारधीन रहेको अवस्थामा सो मुद्दाहरुलाई प्रभावित पार्ने गरी औद्योगिक क्षेत्र व्यवस्थापन लिमिटेडले १५ असार २०८१ मा पुनः २०७५ सालदेखिकै उक्त वृद्धि गरिएको भाडा असूल गर्ने निर्णय गरेको छ।
यसको लागि औद्योगिक क्षेत्र व्यवस्थापन कार्यालय हेटौंडाबाट सो निर्णय कार्यान्वयन गर्न मिति १८ असार २०८१ मा उद्योगीहरुलाई पत्राचार गरिएको थियो । यसपछि उद्योगिहरु पुन विरोधमा उत्रेका हुन् ।
“औद्योगिक क्षेत्र व्यवस्थापन कार्यालय हेटौंडाले पत्रकाटेपछि उद्योगीहरु फेरी हतोत्साहित बनेका छन्” उद्योग संघ मकवानपुरका कार्यकारी निर्देशक शम्भुप्रसाद नेपालले भने ।
२०७२ कारण उत्पन्न आर्थिक मन्दीको कारण उद्योगहरुमा अत्यन्तै नकारात्मक प्रभाव परेकोले यस्तो निर्णय कार्यान्वयन नगर्नको लागि आफूहरुले विरोज जनाएको उद्योग संघ मकवानपुरका वरिष्ठ उपाध्यक्ष श्रीहरि मास्केले बताए ।
मास्केले हेटौंडा औद्यागिक क्षेत्र व्यवस्थापनका निमित्त प्रमुख ई संगिता कुवरलाई ज्ञापन पत्र बुझाएका हुन् । ज्ञापन पत्र बुझ्दै कुवरले आफ्नाेतर्फबाट सहयाेग गर्ने प्रतिबद्धता व्यक्त गरिन् ।
हेटौंडा औद्योगिक क्षेत्रभि रहेका उद्योगिहरुबाट हाल २३ करोड १८ लाख ६८ हजार ५५१ रुपैयाँ भाडा वापतको पैस उठ्न बाँकी रहेको हेटौंडा औद्योगिक क्षेत्र व्यवस्थापक कुवरले बताइन् ।
यस्तो छ ज्ञापन पत्रः

मकवानपुर । बागमती प्रदेशका आन्तरिक मामिला तथा कानून मन्त्री गंगा नारायण श्रेष्ठले अबैध मदिरा तथा लागु औषध नियन्त्रणकाे सवालमा हरेक नागरिकले आफ्नो स्थानबाट भूमिका निर्वाह गर्नुपर्ने बताएका छन् । हेटौडामा भएकाे प्रदेशस्तरीय अवैध मदिरा तथा लागू औषध नियन्त्रण सम्बन्धी कार्यक्रममा उनले यस्तो बताएका हुन् ।
‘हिजाेकाे समाजकाे चेतना, आवश्यकता र आजकाे समाजकाे चेतना र आवश्यकता फरक छ’ मन्त्री श्रेष्ठले भने ‘साेही अनुरुप कानून परिमार्जन र निर्माण गरिनुपर्ने तर हामी अझैसम्म लागु औषध नियन्त्रण ऐन २०३१ मै टेकेर हिडिरहेका छाै ।’ नेपालमा १२४ भाषाभाषीकाे र १४२ जातजातिकाे बसाेबास रहेकाेले घरेलु मदिरा कतिपयकाे संस्कारकाे विषय हुने भएकाेले परम्परागत रैथाने घरेलु मदिरालाई कसरी औषधीकाे रुपमा प्रयाेग गर्न सकिन्छ त्यस तर्फ समेत ध्यान दिनुपर्ने उनले बताए ।
‘लागु औषध नियन्त्रण ऐन २०३१ लाई संघीय संसदलले परिमार्जन र संशाेधन नगरेसम्म प्रदेश सरकारले केही गर्न सक्दैन’ उनले भने ‘लागू औषध गाजा र घरेलु मदिरालाई राष्ट्रिय अर्थतन्त्रसंग जाेडेर हेरिनुपर्छ ।’ लागुऔषध सम्बन्धमा उपदेश दिने र लजाउने बिषय मात्र हैन यस्काे न्युनिकरणका लागि घरपरिवारबाट सुरुवात गर्नुपर्छ उनले भने । किशाेर किशाेरीलाई लागु औषधकाे कुलतमा नपरुन भनेर घरपरिवार र विद्यालयले निगरानी गर्ने बताउँदै उनले भने ‘विद्यालय तहकाे पाठ्यक्रममा समेत लागु औषध सम्बन्धी विषय समावेश गरिनुपर्छ ।’
प्रदेश सरकारले लागु औषध नियन्त्रणकाे काम गर्दै आइरहेकाेमा स्थानीय तहले समेत यसकाे नियन्त्रणमा पहल गर्नु पर्ने उनले बताए । ‘लागु औषध प्रयाेगकर्ता, काराेवार हुने स्थानमा थप आधुनिक प्रविधि सहित नियन्त्रणकाे प्रयास गरिनु पर्छ’ उनले भने । लागुपदार्थ दुर्व्यसनीकाे संख्या बढ्दैं जादाँ समाजमा विकाराल अवस्था आउन सक्ने भएकाेले उसबाट व्यक्ति, परिवार, समाज र मुलुकलाई नै मुक्त गराउनु पर्ने उनले बताए ।
लागु औषध कारोबारमा २१६ जना पक्राउ
मकवानपुरमा लागु औषध कारोबारमा संलग्न रहेका २१६ जना पक्राउ परेका छन् । प्रदेश प्रहरी कार्यालय हेटौडाका अनुसार मकवानपुर जिल्लामा २०८० साउनदेखि २०८१ जेठ मसान्तसम्ममा लागु औषध कारोबारमा १९१ जना पुरुष र २५ जना महिला पक्राउ परेका हुन् ।
पक्राउ पर्नेमा विदेशी नागरिक २१ जना पुरुष र २ जना महिला समेत रहेका प्रदेश प्रहरीकाे तथ्याङ्कले देखाउँछ । यसैगरी उक्त अवधीमा लागु औषध सम्बन्धी १४८ वटा मुद्दा दर्ता भएकाे छ ।
नेपाल सरकार गृहमन्त्रालयले वेब साइडमा सार्वजनिक गरेको रिपोर्ट अनुसार नेपालमा लागुऔषध प्रयोगकर्ता सर्वेक्षण २०७६ गरिएको थियो । त्यो बेला ८ हजार ७३२ महिला सहित १ लाख ३० हजार ४३४ जना लागुऔषध प्रयोगकर्ता रहेको देखिन्छ । यस अघि २०६९ मा गरिएको सर्वेक्षणमा ९१ हजार ५३४ जना प्रयोगकर्ता थिए । वार्षिक वृद्धिदर ५ दशमलब ०६ प्रतिशत रहेको मन्त्रालयले जनाएको छ ।
गृहमन्त्रालयको तथ्याङ्क अनुसार हाल बागमती प्रदेशमा मात्रै कुल ४० हजार ८५५ पुरुष, ५ हजार ६२५ महिला गरी जम्मा ४६ हजार ८८० जना छन् । जसमा धुवाँबाट सेवन गर्नेहरु सबैभन्दा बढी ३५ प्रतिशत छन् । यस बाहेक मुखबाट खाएर नाकले सुँघेर र सुइबाट समेत लिने गर्दछन् ।
मन्त्रालयका अनुसार हाल नेपालमा लागुऔषध दुर्व्यसनमा फसेका व्यक्तिहरूलाई दुर्व्यसनबाट छुटाई समाजमा पुनर्स्थापना गर्न नेपालभर २४० भन्दा बढी उपचार तथा पुनर्स्थापना केन्द्रहरू संचालनमा रहेका छन । लागुऔषधको प्रयोगबाट प्रयोगकर्ताहरूमा हेपाटाइटिस बी/सी, क्षयरोग, एच.आई.भि./एड्स, एस.टि.डी., कुपोषणलगायत विभिन्न स्वास्थ्य समस्या देखापर्दछन् । त्यसैगरी लागुऔषधको सेवनबाटै व्यक्तिको अकालमा ज्यानै पनि जाने गर्दछ ।
लागू औषध गाँजाजन्य पदार्थ (Cannabis) सेवनकर्ता ८०.४%, डाईजेपाम (Diazepam) प्रयाेगकर्ता ९.४%, अफिमजन्य पदार्थ (Oplates) प्रयाेगकर्ता ४.७%, ट्रामाडोल (Tramadol) प्रयाेगकर्ता १.९%, प्रिग्यावलिन (Pregabalin) प्रयाेगकर्ता १.९%, सुध्ने पदार्थ (Inhalants) प्रयाेगकर्ता १.८% रहेकाे तथ्यांकले देखाएकाे ।
लागु औषध र लागु औषधकाे काराेबार नियन्त्रणमा लागू औषध र लागू औषधको कारोबार दुवैको मात्रामा आएको विस्तार र विविधिकरण, लागू औषध र मनोद्विपक पद्धार्थहरूको दुरूपयोग, अवैध खेती, उत्पादन, लागू औषधसम्बन्धी गैरकानूनी गतिविधिमा सूचना तथा सञ्चार प्रविधिको आपराधिक दुरूपयोगमा वृद्धि, सिन्थेटिक ओपियड्स र प्रेस्किप्सन बमोजिमका औषधीको गैर चिकित्सकीय प्रयोग, लागू औषधको अवैध कारोबारबाट उत्पन्न अवैध मुद्रा निर्मलीकरण, अवैध रुपमा नयाँ नयाँ प्रकारका मनोद्दीपक पदार्थहरुको उपलब्धता हुनु, लागू औषध अपराधमा संलग्न कारोबारीहरुको अपराधिक कार्यविधि एंव शैलीमा परिवर्तन हुनु, खर्चिलो सूचना व्यवस्थापन विधि र बजेटको सिमितता हुनु लगायतका चुनाैति रहेकाे पाइएकाे ।
जिल्ला प्रशासन कार्यलय मकवानपुरको आयोजनामा भएकाे प्रदेशस्तरीय अवैध मदिरा तथा लागू औषध नियन्त्रण सम्बन्धी कार्यक्रममा यस्ताे तथ्याङ्क सार्वजनिक गरिएकाे हाे ।