मकवानपुर । मकवानपुरको भीमफेदी गाउँपालिकामा भीरबाट लडेर १ जनाको मृत्यु भएको छ ।
मृत्यु हुनेमा भीमफेदी ३ ईचुङ बस्ने ५३ वर्षीय चमेली माया पाख्रिन रहेको जिल्ला प्रहरी कार्यालय मकवानपुरले जनाएको छ । चमेली माया शनिबार बेलुका घरबाट ५ सय मिटर दक्षिणमा रहेको घट्टेखोलाको भीरमा घाँस काट्न गएकोमा २ सय मिटर तल खसी मुत्यु भएको प्रहरीले जनाएको छ ।
प्रहरी चौकी भैंसेबाट प्रहरी वरिष्ठ हबल्दार सुयन कुमार यादव र इलाका प्रहरी कार्यालय भिमफेदीबाट प्रहरी निरीक्षक ललिता ढकाल सहितको टोलीले घटनाको प्रारम्भिक अनुसन्धान गरेको छ । मृतकको शव पाेष्टमार्टमको लागि हेटौंडा अस्पतालमा राखिएको प्रहरीले जनाएको छ ।
मकवानपुर । यातायात व्यवासायी उपभोक्ता सहकारी संस्थाले व्यवसाय बृद्धि गर्न बैकल्पिक व्यवस्था गर्ने भएकाे छ । सहकारीकाे शनिबार हेटौंडामा भएको १६ औं वार्षिक साधारणसभाले व्यवसाय बृद्धि गर्न बैकल्पिक व्यवस्था गर्ने निर्णय गरेको हाे ।
साधारणसभा उद्घाटन गर्दै नारायणी यातायात व्यवसायी संघ तथा नेपाल ट्रक ब्यवसायी महासंघका अध्यक्ष हीरालाल श्रेष्ठले २०७५ पछिका दिनमा नेपालमा सबैखाले व्यवसायमा समस्या आएको बताउँदै सहकारीले मोटर पार्टस्, लुब्रिकेन्ट्स, टायर आदिको बजारमूल्य नियन्त्रण गर्न महत्वपूर्ण योगदान गरिरहेको दाबी गरे । सहकारीले सरल मूल्यमा पार्टस् तथा टायर सवारीधनी उपभोक्तालाई उपलब्ध गराएकै कारण बजारमूल्य नियन्त्रणमा रहेको भन्दै सहकारीका सल्लाहकार समेत रहेका श्रेष्ठले यातायात ब्यवसायी बचाउन पनि सहकारी सक्षम हुनुपर्ने बताए ।
सहकारीका अध्यक्ष किरण पौडेलले २०६ जना सेयर सदस्य मिलेर १६ वर्षअघि स्थापना गरेको सहकारीमा पछिल्ला वर्ष सदस्य छोड्ने प्रबृत्ति बढ्दै गएर हाल एक सय १५९ मात्रै कायम भएकाे बताए । यातायात व्यवसायीले आफ्नो सवारी साधनमा गुणस्तरीय पेट्रोलियम, टायर, लुब्रिकेन्टस् र स्पेयर पार्टस् प्रयोग गर्ने वातावरण सहकारीले उपलब्ध गराएको स्पष्ट पार्दै अध्यक्ष पौडेलले सहकारीका ५० भन्दा बढी सेयर सदस्यले ९५ लाख रुपैयाँ भन्दा बढी रकम लामो समयदेखि उधारो नतिरेका कारण चालुपूँजी नै अभाव भएको बताए ।
सहकारीका पूर्वअध्यक्ष तथा मकवानपुर उद्योग वाणिज्य संघका अध्यक्ष प्रमोदसिंह रानाभाटले यातायात व्यवसाय नै संकटमा परिरहेको अवस्थामा सहकारी संस्थामा समस्या आउनु सामान्य मान्दै संघसँग सहकार्य गरी आगामी दिनमा प्रभावकारी रुपमा अगाडि बढ्नुपर्ने बताए । कार्यक्रममा सेयरसदस्य बद्रीप्रसाद चौलागाई, सहकारीका कोषाध्यक्ष कुमार बर्तौलाले सहकारीले सोचेअनुरुप लगानीको प्रतिफल प्रदान गर्न नसकेको गुनासो गरेका थिए ।
गत आर्थिक वर्षमा सहकारीले गोसाईकुण्ड आयल सेन्टरतर्फ २३ करोड ४४ लाख ८५ हजारको कारोबार गरी एक लाख ३८ हजार रुपैयाँ मुनाफा आर्जन गरेको प्रतिबेदनमा उल्लेख गरिएको छ । त्यस्तै सहकारीले संचालन गरेको मोटरपार्टसबाट ३ करोड १८ लाख ९४ हजार रुपैयाँको कारोबार गरी ६ लाख ३५ हजार रुपैयाँ मुनाफा गरेको प्रतिबेदनमा छ । सहकारीमा हाल १० जना कर्मचारी रहेका छन् ।
सहकारीले मकवानपुर उद्योग वाणिज्य संघका नवनिर्वाचित अध्यक्ष प्रमोदसिंह रानाभाट र सचिव कुलप्रसाद चौलागाईंलाई दोसल्ला ओढाएर स्वागत तथा सम्मान गरेको थियो । साधारण सभामा सहकारीका सल्लाहकार सरोजकुमार खनाल, अर्जुन शर्मा कडेंल, नारायणी पेट्रोलियम बिक्रेता संघका अध्यक्ष उत्सव ईटेनी, पत्रकार महासंघ मकवानपुरका पूर्वअध्यक्ष भानुभक्त आचार्यलगायतको उपस्थिति रहेको थियो ।
मकवानपुर । मकवानपुरकाे हेटौंडा उपमहानगरपालिका ५ नम्बर वडा बालमैत्री स्थानीय शासनयुक्त वडा घोषणा भएकाे छ ।
शनिबार ‘बालबालिकामा लगानी, सुनिश्चित भविष्यको थालनी’ भन्ने नाराका साथ हेटौंडा उपमहानगरपालिकाकी नगर प्रमुख मीनाकुमारी लामाले वडालाई निकृष्ट बालश्रम मुक्त, बालविवाह मुक्त तथा बालमैत्री स्थानीय शासनयुक्त वडा घोषणा गरेकी हुन् ।
बाल बचाउ, बाल संरक्षण, बाल विकास र बाल सहभागिता गरेर ५१ वटा सूचक पूरा भएसँगै वडालाई बालमैत्री स्थानीय शासनयुक्त वडा घोषणा गरिएको वडाध्यक्ष सुशील घिमिरेले जानकारी दिए । ४७ वटा सूचकमा शतप्रतिशत र ४ वटा सूचकमा घोषणाका लागि आवश्यक न्यूनतम प्रतिशत नतिजा हासिल गर्दै वडालाई बालमैत्री स्थानीय शासनयुक्त वडा घोषणा गरिएको हाे ।
वडामा सामुदायिक र संस्थागत गरि बाल विकास केन्द्र सहितका जम्मा ९ वटा विद्यालयहरु सञ्चालनमा छन् । यसैगरी २४ वटा बालसमूहहरु र १ वडास्तरीय बाल समूह सञ्जाल रहेको छ जसमा ६०० जना बालवालिकाहरु आवद्ध छन् भने विभिन्न संरचनागत समितिहरुमा समेत गरी जम्मा ६४६ जना बालबालिकाहरुको प्रत्यक्ष सहभागिता रहेको वडा सदस्य ज्ञानबहादुर थापाले बताए ।
वडामा बालमैत्री स्थानीय शासन वडा समिति, वडा बालअधिकार समिति, बालसमूहहरु, बालसमूह सञ्जाल, टोल विकास संस्थाहरु, युवा क्लब, आमा समूह, वन समूहलगायतका विभिन्न सामुदायिक संस्थाहरु क्रियाशील रहेको र यहाँ बालबालिकाहरुको उपस्थिती तथा बालसवाल महत्वपूर्ण रुपमा हेर्ने गरिएको वडा सदस्य तथा बालमैत्री स्रोत व्यक्ति रञ्जिता सिलवालले बताइन् ।
पूर्ण खोप वडा घोषणा, पूर्व साक्षर वडा घोषणा, खुल्ला दिसामुक्त वडा घोषणा भई सकेको यस वडालाई नेपाल सरकारको मापदण्डको आधारमा तयार भएको बाल वचाउ, बाल संरक्षण, बाल विकास, बाल सहभागिता गरि बालअधिकारका चार क्षेत्रको ३६ र संस्थागत विकासको १५ समेत गरि बालमैत्री स्थानीय शासन घोषणा गर्न आवश्यक ५१ वटा सूचकहरुमा अभ्यास गरीएको वडाध्यक्ष घिमिरेले बताए ।
जसमा ४७ वटा सूचकहरु १०० प्रतिशत र बाकीं ४ वटा सूचकमा घोषणाका लागि आवश्यक न्युनतम प्रतिशत नतिजा हासिल गर्दै बालमैत्री स्थानीय शासनयुक्त वडा घोषणा गरिएकाे हाे । बालमैत्री स्थानीय शासन कार्यान्वयन निर्देशिका, २०७८ र कार्यान्वयन कार्यविधी, २०७९ को मार्गदर्शन घोषणा गर्न लागिएको हो । यस वडाले बालमैत्री स्थानीय शासनयुक्त पालिका घोषणाको लागि तोकिएको सूचकहरु पुरा गरेको वडाध्यक्ष घिमिरेले जानकारी दिए ।
घर धुरी सर्वेक्षण २०७९ अनुसार यस वडामा २ हजार ८७५ घरधुरी रहेका छन् । यस वडाको कुल जनसंख्या १४ हजार १२७ जसमध्ये ७ हजार ९८ महिला, ७ हजार २९ पुरुष रहेका छन् । यस वडामा कुल बालबालिका ३ हजार ७९८ छन् जसमा बालक २ हजार १६ र बालिका १ हजार ७८२ रहेका छन्।
वडाध्यक्ष घिमिरेले २०७९ साल मंसिर १५ गते सरोकारवालाको उपस्थितिमा अभिमुखीकरण तथा प्रतिवद्धता जाहेर गर्दै बालमैत्री स्थानीय शासनयुक्त वडा घोषणा अभियान अघि बढेको जानकारी दिए । बालमैत्री स्थानीय शासन दिगोपनाका लागि वडाको अन्तिम प्रतिवेदन, स्थितिपत्र २०८१ र पञ्चवर्षीय रणनीतिक योजना तयार भइसकेको छ ।
बालमैत्री स्थानीय शासन कार्यान्वयन निर्देशिका, २०७८ र कार्यान्वयन कार्यविधि, २०७९ को मार्गदर्शनअनुसार २०७९ साल भदौ २४ गते बसेको हेटौंडा उपमहानगरपालिकाको कार्यपालिका बैठकले वडा र पालिकालाई बालमैत्री स्थानीय शासनयुक्त घोषणा गर्ने निर्णय गरेको थियो ।
कार्यक्रममा हेटौंडा उपमहानगरपालिकाका उपमेयर राजेश बानियाँ, हेटौंडा उपमहानगरपालिकाका प्रवक्त सविन न्यौपाने, वडाअध्यक्ष, कार्यपालिका सदस्य तथा अन्य जनप्रतिनिधि, प्याब्सन बागमती प्रदेशका अध्यक्ष केशवलाल श्रेष्ठ, विभिन्न विद्यालयका शिक्षक तथा विद्यार्थी बाल संजालमा आवद्ध बालबालिका लगायत विभिन्न संघसंस्थाको सहभागिता रहेको थियो ।
बुटवल । प्रीति आत्रेय ज्ञवालीकाे “मणिराम” मुक्तकसङ्ग्रह बुटवलमा लोकार्पण गरिएकाे छ । लुम्बिनी वाङ्मय प्रतिष्ठान नेपाल, रुपन्देहीको आयोजनामा नेपालकै पहिलो महिला राशिफल लेखिका तथा स्तम्भकार प्रीतिद्वारा लिखित “मणिराम” मुक्तकसङ्ग्रह लोकार्पण गरिएकाे हाे ।
वटुकहरुको स्वस्तिवाचनबाट शुरु गरिएकाे कार्यक्रमको प्रतिष्ठान अध्यक्ष पुरुषोत्तम पाण्डेले अतिथिहरुलाई स्वागत गर्दै प्रतिष्ठान सदैव भाषा, कला, संस्कृतिको संरक्षणका क्षेत्रमा अघिबढिरहेको छ बताए । साहित्यकार बुँद रानालगायतले मुक्तक संग्रहकाे विमाेचन गरेका हुन् ।
कार्यक्रमका प्रमुख अतिथि समेत रहेका रानाले मणिराम कृतिकालाई प्रीतिलाई बधाई तथा कृतिकारका ससुराबुबा मणिरामलाई जन्मोत्सवका अवसरमा बिसासय आयुको शुभकामना दिए । उनले प्रीतिले कृतिमार्फत पितृभक्ति र सामाजिक सद्भावको अभियन्ता बनेको बताए । मुक्तककार प्रीतिले ससुराबुबा मणिराम ज्ञवालीको जन्मदिनको अवसरमा मणिराम मुक्तकसङ्ग्रह विमोचन गराएर ससुराप्रति सम्मानोपहार प्रदान गरेकाे बताइन् ।
कृतिका समीक्षक समेत रहेका डा. मुरारी पराजुलीले ऋग्वेदको मुक्तकीय आयाम, भर्तृहरि, अग्निपुराण आदिमा चर्चा गरिएको मुक्तकको प्रसंग र यसको गुणवत्ताको बारेमा प्रष्ट उल्लेख भएको जानकारी दिए । मुक्तकले हृदयलाई चमत्कृत गर्न सक्नुपर्ने, मुक्तक सुनेर, पढेर मनमा स्वतस्फूर्त अहा ! को भाव प्रस्फुटित हुनुपर्ने र छोटो भएर पनि मुटुभेदन गर्न सक्ने हुनुपर्छ भन्ने विचार राख्दै अहिले त्यस्ता मुक्तक सुन्न, पढ्न कमै पाइने गरेको उनले बताए ।
‘कृतिकार प्रीतिकाे अंग्रेजी र संस्कृत भाषामा राम्रो दख्खल भएको, पारिवारिक विरासतको रुपमा बौद्धिकता प्रवल हतियार भएको र त्यो बौद्धिक क्षमता र पूर्वीय चिन्तन मुक्तकमा प्रशस्त रहेको छ’ उनले भने । मुक्तकमार्फत कृतिकार नीति प्रवचकका रुपमा देखिएको भन्दै मुक्तकले समाजमा व्याप्त बेथिति, भ्रष्टाचार, कुशासन, राजनैतिक स्खलनलगायतका विरुद्ध आवाज उठाएको उनले बताए ।
मणिराम मुक्तकसङ्ग्रहमा भूमिका लेखेका मुक्तककार रुद्र ज्ञवालीले मुक्तकमा काव्यिक चेत, आध्यात्मिक चेत, रुवाइशैली, पाश्चात्य सभ्यताको अन्धानुकरणको विरोध, चरित्रवान मानिस र आदर्श पारिवारिक परिवेश निर्माणमा मुक्तकले जोड दिएको बताए । विष्णुराज आत्रेय प्रतिष्ठानका अध्यक्ष विष्णुप्रसाद भण्डारीले प्रतिष्ठानको गतिविधि उल्लेख गर्दै प्रा. डा. विष्णुराज आत्रेय (लाटोसाथी) को शालिक स्थापना गर्ने योजना रहेको बताए ।
प्रा. डा. हिरण्यलाल ज्ञवालीले कृतिले पुत्रबधूले आफ्ना ससुराबुबाको सम्मानमा उदाहरणीय काम गरेको बताए । कृतिकार प्रीतिले कृतिको रचनागर्भको बारेमा बताउँदै आफ्ना ससुराबुबाको जन्मोत्सवमा आशिर्वाद लिन र पितृऋण चुक्ता गर्न उहाँकै नामको कृति जन्मदिनमा लोकार्पण गराएको बताए । कृतिमा प्रयोग भएका केही शब्दका सम्बन्धमा उठेका जिज्ञासाको उत्तर समेत उनले दिएका थिए ।
लुम्बिनी वाङ्मय प्रतिष्ठानका केन्द्रीय अध्यक्ष ऋषि आजादले लुम्बिनी प्रदेशका बाह्रओटै जिल्लामा क्रियाशील संस्थाको परिचय दिँदै यसको गतिविधि र भावी कार्ययोजनाबारे पनि जानकारी गराएका थिए ।
प्रीतिको यस अघी पुष २०८० मा नवौं कृति चुटुक्क मुक्तक संग्रह काठमाडौंमा लोकार्पण गरिएकाे थियाे । भाद्र २०७९ मा कविता संग्रह “अनुभूतिको इन्द्रेनी” सार्वजनिक गरेकी उनका गीतहरू “आफ्नो त मन छ माइतीघरतिरै (तीज गीत २०७५) ” र “तिमी मेरो पूजा (प्रणय गीत २०७७)” युट्युबमार्फत प्रसारित छन् । उनका बिबिसि, साहित्यपोस्ट, हिमालय टाइम्स, कान्तिपुर, नेपाल समाचारपत्र, नेपालनाम्चा, सहीखबर, संसारन्यूज, वैजयन्ती साहित्यिक पत्रिका, हाम्रो पुरुषार्थ, नारी, कल्पतरु, दायित्व आदि विभिन्न पत्रपत्रिका तथा अनलाइनहरूमा विभिन्न समसामयिक विषयसित सम्बन्धित लेख रचनाहरू प्रकाशित भएका र हुँदै गरेका छन् ।
कम्बोडियालाई कर्मभूमि बनाएकी आत्रेय प्रवासमा रहेर साहित्यसँगै ज्योतिष फलादेशको माध्यमबाट पनि समाजसेवा क्रियाशील छिन् । उनी नेपालकै पहिलो नारी राशिफल लेखिका पनि हुन् । हामी र हाम्रो कृति समूहकी आजीवन सदस्य रहेकी उनको पछिल्लो कृति ‘मणिराम’ दशौं कृतिका रूपमा सार्वजनिक भएको हो ।
कार्यक्रममा उद्योग वाणिज्यसंघका हरिप्रसाद अर्याल, ऋषिराम भुषाल, साहित्यकार वनमाली निराकार, दौंघा रुपन्देही सम्पर्क समाजका अध्यक्ष भीमलाल ज्ञवाली, साइनो वाङ्मय चौतारीका सल्लाहकार धातानन्द शर्मा गैरेले कृतिले पारिवारिक समन्वय र प्रेम, सभ्य, सुसंस्कृत आदर्श समाजको विषयलाई उजागर गरेको बताउँदै कृति सफलताको शुभकामना दिएका थिए ।
राजेन्द्रकुमार आचार्य, कृष्णप्रसाद कोइराला, दीपक भण्डारी, शिव प्यासी, कृतिकारका ससुरा मणिराम ज्ञवाली, सासु लक्ष्मी ज्ञवाली, आमा आर्या आत्रेयलगायतले शुभकामना दिएकाे कार्यक्रममा संस्थाका नयाँ आजीवन सदस्यहरुलाई सदस्यताको प्रमाणपत्र प्रदान गरिएको थियो । लुम्बिनी वाङ्मय प्रतिष्ठान नेपाल, रुपन्देहीका अध्यक्ष पुरुषोत्तम पाण्डेको अध्यक्षता तथा साहित्यकार बुँद रानाको प्रमुख आतिथ्यमा भएको कार्यक्रमकाे उपाध्यक्ष कृष्ण गाउँलेले सहजिकरण गरेका थिए ।
मकवानपुर । वर्षौदेखि जग्गाको पुर्जा माग गर्दै आएका मकवानपुर मनहरी ४ का वनकरिया समुदायले सरकारसँग आफूहरु थाकेको गुनसो गरेका छन् । वनकरिया समुदायकी अगुवा सन्तोषी वनकरियाले वनकरिया जाति भूमी पुजक भएर पनि जग्गा नपाएपछि सरकारसँग संघर्ष गर्दागर्दै थाकेको बताइन् ।
२०६२ सालमा २० बर्षको लागि दिइएको कागजको समय २०८२ बैशाखमा सकिदै छ । त्यसपछि आफूहरुको वासस्थान कहाँ भन्ने टुङ्गो नभएपछि उनीहरुमा निराशा सँगै आक्रोशित छन् । “वनले हामीलाई पक्कै हटाउँछ, अनि हामी कहाँ जाने ?” सन्तोषिले भनिन् ।
“मैले साबुन उत्पादन गर्ने सीप सिकेको थिएँ । जानेको सीपको प्रयोग गरेर व्यवसायी बनौं न त भन्दा लालपुर्जा नभएर प्यान दर्ता गर्न पाइनँ” उनले भनिन् । व्यवसाय दर्ता गर्न नपाएपछि काम नै तीन महिना रोकिएको उनले बताइन् । स्थानीय वडाध्यक्ष प्रकाश थापाले आफ्नो जग्गा राखेर उद्योग दर्ता गर्ने वातावरण मिलाइदिएपछि उनले उद्योग दर्ता गरेर काम गर्दै आएकी छिन्। “सधैं हामी यसरी नै कतिञ्जेल चल्ने ?” उनले प्रश्न गरिन् ।
स्थानीय संगिता वनकरियाले आफ्नो समुदायको लागि भत्ता होइन,जग्गा र रोजगारी चाहिएको बताइन्। जग्गाको पुर्जा र रोजगारी भए सरकारले आफूहरुलाई भत्ता नदिएपनि त्यो भन्दा बढी हुने उनले बताइन् । “सरकारले बालबालिकालाई १० कक्षासम्म निःशुल्क पढाइदिएको छ भन्छन्, तर हाम्रो बालबालिकाको महिनैपिच्छे शुल्क बुझाइरहेका छौं” उनले भनिन् “यसको लागि हामीले कस्लाई भन्नुपर्ने हो ?” महिनाको ४ हजार रुपैंया भत्ता ३÷३ महिनाको अन्तरमा प्राप्त हुदाँ त्यसले उपचार गर्न, खान र बालबच्चा पढाउन निकै समस्या भएको उनले बताइन् ।
यसैगरी स्थानीय राम वनकरियाले आफूहरु बसोबास गर्ने स्थानमा बाटोको पनि असुविधा रहेको बताए । बाटो पनि छैन । बर्षामा खोलाको बाटो हिड्नै सकिदैनँ, बालबालिकाहरुलाई विद्यालय पुग्न मुस्किल छ, भएको कच्चीबाटोमा बर्षभरी गाडि चल्ने व्यवस्था मिलाइदिन पर्यो” उनले भने “स्थानीय सरकार र प्रदेश सरकारले हाम्रो समस्यामा पनि ध्यान दिनुपर्यो।”
यस्तै अर्का स्थानीय बिष्णुबहादु प्रजाले विद्यालय टाढा रहेको कारण वनकरिया बालबालिकाहरुको पढाइ छुट्ने गरेको बताए । “निकुञ्जका कारण बस्न पनि निकै समस्या भइरहेको उनले बताए । आर्मीहरु घर घेर्न आउँछन्, यो समस्याबाट हामीले कहिले मुक्ति पाउने ?” उनले भने ।
मकवानपुर जिल्लाको मनहरी गाउँपालिका वडा नम्बर ४ मुसेधापमा रहेको वनकरिया वस्तिमा संवादको लागि पुगेका प्रदेश सभा सदस्यसँग उनीहरुले आफूहरुको पीडा सरकारले वर्षौदेखि सम्बोधन नगरेको गुनासो गरे ।
बागमती प्रदेशका उद्योग, पर्यटन तथा वातावरण समितिका सभापती आनन्द कुमार श्रेष्ठ, पूर्व मन्त्री तथा बागमती प्रदेशसभाका सदस्य कुमारी मुक्तान, प्रदेशसभाका सदस्यहरु समिता खड्गी, सुना परियार, गिरबहादुर तामाङले उनीहरुको समस्या सुनेका थिए । समस्या सुनेर मात्रै फर्कने नभइ समाधानको पहल आफूहरुले गर्ने आश्वासन दिएका छन् ।
कार्यक्रममा युएनडिपिका नीति तथा कार्यक्रम समर्थन व्युरो उपसहायक प्रशाशक र उपनिर्देशक डाक्टर फ्रान्सिन पिकअपले
वनकरिया समुदायका समस्याहरु सांसदहरु र आफुले बुझेको बताए । अब नीति निर्माण तहमा काम गर्नेमा आफूले विश्वास लिएको बताए ।
लोपोन्मुख जाती वनकारिया समुदायको समस्याका बिषयमा बागमती प्रदेश सभा र प्रदेश सभाको समिति मार्फत समाधान गर्ने प्रतिवद्धता जनाइएको छ । वनकरिया समुदायका विविध सवालहरुमा जनप्रतिनिधि र जनताबीच अन्तरसंवाद कार्यक्रममा सहभागी प्रदेश सांसदहरुले
वनकरिया समुदायको न्यायका लागि पहलकदमी चाल्ने प्रतिवद्धता गरेका छन् ।
निकुञ्ज क्षेत्रको जमिनमा बसोबास गर्दै आएका वनकरिया समुदायलाई जग्गा धनी पुर्जा उपलब्ध गराइदिन गरेका उनीहरुको मागको सम्बोधन गर्दै प्रदेश सभा सांसद तथा प्रदेश समितिका सभापति र सदस्यहरुले उनीहरुको न्यायका लागि सदन र समितिमा आवाज उठाउने प्रतिबद्धता व्यक्त गरे ।
सभापति आनन्द श्रेष्ठले वनकरियाबीचमा आफू पहिलो पटक उपस्थित भएको बताउँदै उनीहरुको न्यानको लागि आफूले आफ्नो तर्फबाट भूमिका निर्वाह गर्ने बताए।वनकरिया समुदायको हक अधिकारको लागि सम्वन्धित क्षेत्रको जनप्रतिनिधि नै सक्रिय हुनुपर्ने बताए ।
“प्रदेश सभाको समितिको तर्फबाट गर्नुपर्ने कामलाई हामीले हेरिहरेका छौ” उनले भनें । यस्तै, शिक्षा, स्वास्थ्य तथा कृषि समितिका सदस्य तथा प्रदेशको पूर्व मन्त्री कुमारी मोक्तानले यस बस्तीमा यो भन्दा धेरै समस्या रहेको स्मरण गरिन् ।
यस समुदायमा यो भन्दा पहिला धेरै समस्या थियो, उनले भनिन् “पछिल्लो समय वनकरियालाई विभिन्न सेवा सुविधाहरु उपलब्ध गराएको छ, जग्गा प्राप्तीको लागि पनि निकै प्रयत्न गरिरहेको छ,प्रदेश सरकारले जमिनको बिषयमा बोल्न सक्छ ।” तर संघको अधिनमा भएकोले अपनत्व लिन नसकिने उनले बताइन् ।
यता, सार्वजनिक लेखा समिति सदस्य गिर बहादुर तामाङले वनरिया बस्तीको संरक्षण र अधिकारको लागि आफ्नो समितिमा आवाज उठाउँने र सदनबाट कानुन बनाउने बताइन् । अर्थ समितिकी सदस्य सुना परियारले वनरिया समुदायको पीडा सुनेको भन्दा आफनै आँखाले देख्दा निकै दुखदायी रहेको बताइन्।
यसअघि वनकरिया जातीको बिषयमा सदन र समितिमा कहिल्यै अवाज नउठाएको स्वीकार गर्दै उनले भनिन् “यसअघि यसरी बुझ्ने मौका पाइएको थिएन,अब वनकरियाको दुख बुझ्ने मौका पायौ, पक्कै पनि सदनमा कुरा उठाउनेछु ।” यस्तै, शिक्षा स्वास्थ्य तथा कृषि समिति सदस्य समिता खड्कीले वनकरिया समुदायका हितका लागि यसअघि केही नगरे पनि आगामी दिनमा यस समुदायको अधिकारको लागि सधैं आवाज उठाउने बताइन् ।
मकवानपुरगढी सञ्चार प्रा.लि. हेटौंडा २ को आयोजना, नर्बेजियन दुतावास काठमाडौं तथा संसद सहयोग परियोजना संयुक्त राष्ट्रसंघीय विकास कार्यक्रम (युएनडीपी)को सहकार्यमा वनकरिया समुदायका विविध सवालहरुमा जनप्रतिनिधि र जनताका बीच अन्तरसम्वाद कार्यक्रम गरिएको हो ।