मकवानपुर । मकवानपुरको राक्सिराङ गाउँपालिकाकाे एउटा घरमा आगलागी भएको छ । आइतबार विहान राक्सिराङ ५ बोटकारीस्थित भीम बहादुर मोक्तानको घरमा आगलागी भएकाे हाे ।
उनकाे एकतले ढुंगा र माटोले बनेको घरमा आगलागी हुँदा करिब ७ लाख रुपैँया बराबरको क्षति भएको जिल्ला प्रहरी कार्यालय मकवानपुरले जनाएको छ । मोक्तानको घरमा रहेको ४० हजार रुपैँया नगद जलेर नष्ट भएको छ । त्यस्तै अन्नपात,काठ,भाँडावर्तन र लत्ताकपडा जलेर नष्ट हुँदा करिब ७ लाख रुपैँया बराबरको क्षति भएको प्रहरीले जनाएकाे छ ।
विद्युत लाइन सर्ट भई आगो लागेकाे बताइएकाे छ । प्रहरीचौकी चैनपुरबाट प्रहरी सहायक निरीक्षक नबीन कुमार सिंहको कमाण्डमा खटिएको प्रहरी टोली र स्थानीयको सहयोगमा करिब ३ घण्टापछि आगो नियन्त्रणमा लिइएको हो । घटनामा कुनैपनि मानवीय क्षति नभएको प्रहरीले जनाएको छ ।
मकवानपुर । मकवानपुरकाे हेटौंडा उपमहानगरपालिका वडा नम्बर ९, लामसुरेमा रहेकाे मानसेवा आश्रमकाे मुख्य कार्यालयमा आइतबारदेखि श्रीमद् भागवत सप्ताह ज्ञान विज्ञान महायज्ञ सुरु भएकाे छ ।
मानवसेवा आश्रमको मुख्य कार्यालय आश्रमले अक्षयकोष निर्माण गर्ने उद्देश्यले आयोजना गरेकाे महायज्ञ बागमती प्रदेश सरकारका मुख्यमन्त्री बहादुर सिंह लामाले आइतबार उद्घाटन गरे । मुख्यमन्त्री लामाले व्यक्तिगत २५ हजार रुपैयाँ महायज्ञमा हस्तान्तरण गरे । यस्तै प्रदेश सरकारले छलफल गरेर सकेसम्म अक्षयकोषका लागि अनुदान रकम सहयोग गरिने प्रतिबद्धता मुख्यमन्त्री लामाले जानकारी दिए ।
हेटौंडा उपमहानगरपालिकाकी प्रमुख मीना कुमारी लामाले १ करोड ५० लाख रुपैयाँ अनुदान स्वरुप अक्षयकोषका लागि सहयोग गर्ने प्रतिबद्धता जनाइन् । हेटौंडा स्कुल अफ म्यानेजमेन्टका संचालक पुरन बहादुर जोशीले ५ लाख रुपैयाँ हस्तान्तरण गर्ने प्रतिबद्धता जनाए । यसैगरी डा.कृष्ण धितालले ५ लाख ११ हजार १११ रुपैयाँको चेक हस्तान्तरण गरे ।
महायज्ञकाे पहिलो दिन कुष्माण्ड सरोवर त्रिवेणी धामबाट बाजागाजा, साँस्कृतिक झाँकी, शंखनाद, भजनकीर्तनसहित शोभा कलशयात्रा गरिएको छ । दोस्रो दिन सोमबारबाट २४ चैतसम्म बिहान ५ बजेदेखि ७ बजेसम्म स्वास्थ्य शिविर, युवासँग सकारात्मक सोच, मानवता प्रवर्द्धन एवम् युवासँग अन्तरिक्रया कार्यक्रम हुनेछ ।
बिहान ११ बजेदेखि ४ बजेसम्म प्रत्येक दिन भावगत भाष्कर कमल नयन गौतमबाट कथा प्रवचन हुने बताइएको छ । यसअघि चितवन, लमजुङ, पोखरा, बुटवल, दाङ, सुर्खेत र धनगढीमा सप्ताह महायज्ञ लगाइसकेकोमा १० औं महायज्ञ हेटौंडामा सुरु गरिएकाे हाे ।
मकवानपुर । मकवानपुरको मनहरीमा बस र म्याजिक गाडी ठोक्किएर भएको दुर्घटनामा १ जनाको मृत्यु भएको छ ।
दुर्घटनामा म्याजिक चालक राक्सिराङ गाउँपालिका ४ बस्ने ३२ वर्षीय सन्देश कोईरालाको मृत्यु भएको मकवानपुर प्रहरी जनाएको छ ।
शुक्रबार बिहान मनहरी गाउँपालिका ६ लोथर बजारस्थित पुर्व पश्चिम सडक खण्डमा चितवनबाट हेटौडा तर्फ आउदै गरेको बा.प्र.०३-००६ ख ५६८१ नम्बरको बस र मनहरीबाट चितवन तर्फ जादै गरेको बा.प्र.०३-००१ च ३०१२ नम्बरको म्याजिक गाडी एक आपसमा ठोक्किएर दुर्घटना भएको थियो ।
दुर्घटना घाईते भएका चालक कोइरालाको उपचारको क्रममा चितवन स्थित नयाँ मेडिकल कलेज भरतपुरमा शुक्रबार बिहान मृत्यु भएको जिल्ला प्रहरी कार्यालय मकवानपुरले जनाएको छ ।
बस चालक नियन्त्रणमा लिएको बताइएको छ । मृतकका आफन्तले अहिले पुर्व पश्चिम राजमार्ग बन्द गराएका छन् ।
मकवानपुर । मकवानपुरमा नयाँ पुस्ताको पत्रकारिताका अवसर, चुनौती र तयारीका विषयमा छलफल भएको छ । स्वतन्त्र पत्रकार संघ, मकवानपुरको बिहीबार हेटौंडामा उक्त विषयमा प्यानल छलफल गरेर हाे ।
कार्यक्रममा वरिष्ठ पत्रकार प्रताप विष्ट, बागमती प्रदेश सञ्चार रजिष्ट्रार रेवती सापकोटा, नेपाल पत्रकार महासंघ मकवानपुरका अध्यक्ष बालकृष्ण अधिकारी, युवा पत्रकार जमुना थिङ वक्ताका रूपमा रहेका थिए । पत्रकार विष्टले पत्रकारिताको विगत र वर्तमान अवस्था तुलना गर्दै नयाँ पुस्ताका पत्रकारहरूका लागि चुनौतीभन्दा अवसर बढी रहेको बता्ए । ‘विगतमा पत्रकारिता संघर्षपूर्ण भए पनि अनुशासनयुक्त रहेको तर अहिले प्रविधिको विकास भए पनि सामग्रीको गुणस्तर र अनुशासनमा कमी देखिएको छ’ उनले भने । प्रविधिको प्रयोगसँगै पत्रकारिताको गति तिव्र भए पनि समाचारको गहिराइ र विश्वसनीयता खस्किरहे उनले बताए ।
यसै गरी सञ्चार रजिष्ट्रार सापकोटाले इन्टरनेटको विकाससँगै अनलाइन सञ्चारमाध्यमहरू बढ्दै गए पनि समाचारको गुणस्तरमा वृद्धि नभएको बताए । ‘अहिले पत्रकारितामा खोज पत्रकारिता र गुणस्तरीय सामग्री निर्माण गर्ने संस्कारको विकास हुन छैन’ उनले भने । ‘छापा माध्यममा काम गरिरहेकाे तथा गरेर पत्रकारले समाचारमा सन्तुलन राख्न र समाचारकाे आयातन बढाउन समेत राख्न सक्षम हुन्छन्’ उनले भने पत्रिका बाहेकका अन्य संचार माध्यममा काम गरिरहेकाले समाचारलाई शब्द संख्या वृद्धी गर्न समस्या रहेकाे छ ।’ रजिष्ट्रार सापकोटाले सञ्चार माध्यमको आम्दानी खुम्चिंदै गएको र लगानी बढ्दै गएको बताउँदै सञ्चार व्यवसायलाई टिकाउन आर्थिक सन्तुलन आवश्यक रहेको बताए ।
यस्तै महासंघका जिल्ला अध्यक्ष अधिकारीले प्रेस स्वतन्त्रतामाथि हस्तक्षेप हुन नहुने बताए । ‘अहिलेकाे कानुनी व्यवस्था र सरकार समेतले प्रेस स्वतन्त्रतालाई नियन्त्रण गर्ने प्रयास गरिरहेको छ’ उनले भने ‘तर स्वतन्त्र पत्रकारिता कायम राख्न कानुनी सुरक्षा आवश्यक रहेको छ ।’ उनले नयाँ पुस्ताका पत्रकारहरूले अनुसन्धानमूलक पत्रकारितालाई प्राथमिकता दिनुपर्ने र सामाजिक परिवर्तनका संवाहक बन्नुपर्ने बताए ।
अधिकारीले पाठककाे अपेक्षालाई पूरा गर्न नसकिएकाे अवस्था रहेकाेले समाचारमा सावधानी नअपनाउँदा विभिन्न त्रुटिहरु हुने गरेकाे बताए । ‘पत्रकारिता क्षेत्रमा जाेखिम पनि वढिरहेकाेले प्रविधि, कन्टेन, नयाँ र पुराना पुस्ता सबैलाईसंगै अगाडि लानुपर्छ उनले भने । पत्रकार महासंघले पुराना पुस्ताका पत्रकारका लागि पेन्सनकाे व्यवस्था गरेकाे, दुर्घटना स्वास्थ्य उपचारका व्यवस्था गरेकाे उनले बताए । ‘पत्रकाारितकाे क्षेत्रबाट हामीले जति धेरै दिन सक्छाै पेशालाई जाेगाउन सकिन्छ’ उनले भने ‘सीप, क्षमता र दक्षतालाई बढाउनु पर्छ ।’
यसैगरी युवा पत्रकार थिङले नयाँ पुस्ताले डिजिटल मिडियामा अवसर खोज्न सक्ने, तर सामग्रीको गहिराइ र पत्रकारिता आचारसंहिता पालना नगर्ने प्रवृत्तिले समस्या निम्त्याउने गरेको बताइन् । ‘आजको पुस्ताले प्रविधि सजिलै आत्मसात गरेको तर सामग्रीको खोजीमा मेहनत गरेको छैन’ थिङले भनिन् ‘नयाँ पुस्ताले सिर्जनात्मक पत्रकारिता, अनुसन्धानमूलक रिपोर्टिङ र सत्यतथ्यमा आधारित समाचार उत्पादनमा ध्यान दिनुपर्छ ।’ पत्रकारले स्वतन्त्र र निष्पक्ष भएर लेख्न सक्नुपर्छ, भातृसंगठनहरुकाे प्रभावमा पर्नु नहुने उनले बताइन् । ‘पत्रकारितामा जति अवसर छ त्यही नै चुनाेैतिहरु छन्, वास्तवमा अवसर नै चुनाैति हाे, चुनाैतिकाे सामना गर्न सक्नुपर्छ’ उनले भनिन् । ‘श्रमजिवी पत्रकारहरुका लागि श्रम ऐन कार्यान्वयन हुन नसकेकाे अवस्था छ, सरकारकाे भूमिका महत्त्वपूर्ण हुनुपर्छ’ उनले भनिन् ।
कार्यक्रममा सहभागी वक्ताहरूले मकवानपुरे पत्रकारितालाई थप प्रभावकारी बनाउन प्रशिक्षण, अनुसन्धानात्मक पत्रकारिता, डिजिटल प्लेटफर्महरूको सही उपयोग, नीति निर्माण र वित्तीय व्यवस्थापनमा ध्यान दिनुपर्ने आवश्यकता रहेको औल्याएका थिए । स्वतन्त्र पत्रकार संघ, मकवानपुरका सचिव बसन्त भण्डारीले सहजीकरण गरेको कार्यक्रमको समग्र टिप्पणी पत्रकार राममणी दाहालले गरेका थिए ।
मकवानपुर । मकवानपुरको हेटौंडा उपमहानगरपालिका वडा नम्बर १ चौकीटोलमा देवरले भाउजुको हत्या गरेका छन् ।
जिल्ला प्रहरी कार्यालय मकवानपुरका अनुसार २२ वर्षीय राहुल भन्ने रमेश दासले जेठी भाउजु ३५ वर्षीय गुडिया दासको खुकुरी प्रहार गरी हत्या गरेका हुन् । ३ सन्तानकी आमा गुडियालाई रमेशले खुकुरी प्रहार गरी घरमै हत्या गरेको प्रहरी जानकारी दिएको छ ।।
रमेशले माइलो दाइ २८ वर्षीय रुपेश दासलाई पनि खुकुरी प्रहार गरी घाइते बनाएका छन् । घाइते रुपेशको हेटौंडास्थित मकवानपुर सहकारी अस्पतालमा उपचार भइरहेको प्रहरीले जनाएको छ । तीन दाजुभाइ मध्ये जेठो रोशन दास रोजगारीको सिलसिलामा ५ महिनाअघि कतार गएको बताइएको छ ।
प्रहरीका अनुसार रमेशले खुकुरी प्रहार गरी भाउजुको हत्या गरेको, दाइमाथि पनि आक्रमण गरेको स्वीकारेका छन् । प्रहरीका अनुसार रुपेशमाथि भाइले गरेको सांघातिक आक्रमण र जेठी भाउजुको हत्या गर्नुको कारण खुलेको छैन ।प्रहरीले घटनाबारे अनुसन्धान गरिरहेको छ ।