व्यवसायीहरुलाई आफ्नो कर्तव्य पुरा गर्दै मापदण्ड विपरीत कार्य नगर्न / नगराउन कम्पनीको आग्रह
मकवानपुर । अत्यधिक भारबहनको सवारीको कारण राजमार्गहरु भासिने र पुलहरु भाँचिने क्रम बढेसँगै नारायणी यातायात व्यवसायी कम्पनी प्रालिहेटौडाले ध्यानाकर्षण भएको जनाएको छ ।
कम्पनीले विहीबार पत्रकार सम्मेलन गरि सराेकारवालाहरुलाई ध्यानाकर्षण गराएको हाे । यातायात व्यवसायीहरूको अग्रणी छाता संस्थाको रूपमा यस क्षेत्रमा क्रियाशील कम्पनीले देशभर, विशेष गरी पूर्व पश्चिम राजमार्गमा, क्षमताभन्दा बढी भार बोकेका सवारी साधनका कारण पुल भाँचिने र राजमार्ग नै भासिने घटनाहरू प्रति सचेत रहन ध्यानाकर्षण गराएको हो । यस्ता घटनाले सार्वजनिक यातायातमा ठूलो समस्या उत्पन्न भई यात्रु तथा मालवाहक सवारी साधनहरूले अनावश्यक झन्झट भोग्नुका साथै आर्थिक क्षति समेत भइरहेको कम्पनीका अध्यक्ष गोकर्ण पराजुलीले बताए ।
२०८२ बैशाख २९ गते पूर्व–पश्चिम राजमार्गअन्तर्गत नवलपुरको चोरमारास्थित गिरुवारी खोलाको पुल भाँचिँदा र सोही दिन, इलामको फिक्कल–नयाँ बजार सडक खण्डमा पर्ने मयुँ खोलाको पुल भाँचिएपछि यातायात सञ्चालनमा समस्या भएकोमा कम्पनीले स्मरण गरेको छ ।
हाल देशभरका पुलहरू करिब ५० वर्ष पुराना भएका र तत्कालीन समयको सवारी चाप तथा भार क्षमता अनुसार निर्माण गरिएकाले हालकाे दैनिक हजारौँ सवारीसाधन र क्षमताभन्दा बढी भार बोकेका मालवाहक गाडीहरू गुड्दा पुलहरूले भार थेग्न नसकेको कम्पनीका कार्यकारी सञ्चालक माधव अधिकारीले बताए ।
हाल नेपालमा रहेका नयाँ निर्माण भएका पुलबाहेक पूर्व पश्चिम राजमार्ग निर्माणको समयमा बनेका पुलहरूको भार क्षमता अहिलेको आवश्यकताभन्दा कम रहेको अधिकारीले बताए । पत्रकार सम्मेलनमा कम्पनीले विभिन्न मागहरु पनि सार्वजिनक गरेको छ ।
यस्ता छन् कम्पनीका माग र आग्रहहरु
यस विकराल समस्याप्रति हामी सम्बन्धित निकाय, विशेषगरी भौतिक पूर्वाधार तथा यातायात मन्त्रालय र सडक विभागको गम्भीर ध्यानाकर्षण गराउन चाहन्छौँ। तत्काल निम्न कदमहरू चालिनुपर्ने हाम्रो जोडदार माग छ:
१. पुलहरूको क्षमता वृद्धि र मर्मतसम्भार : देशभरका पुराना तथा जीर्ण पुलहरूको तत्काल प्राविधिक परीक्षण गरी आवश्यकता अनुसार मर्मत, स्तरोन्नति वा पुनर्निर्माण गरियोस्।
२. भारवहन क्षमताको कडाईका साथ पालना : सवारी साधनको भारवहन क्षमताको नियमलाई कडाईका साथ लागू गरियोस् र क्षमताभन्दा बढी भार बोक्ने सवारी साधनहरूलाई दण्डित गर्ने व्यवस्था मिलाइयोस्।
३. तौल पुलको प्रभावकारीता : हाल देशभर निजि क्षेत्रबाट ११ र सरकारद्वारा २ वटा गरि १३ वटा तौलपुल रहेपनी ती पुलहरूबाट भार बहन क्षमता नियन्त्रणमा प्रभावकारीता देखिएको छैन ।
४. ढुवानीमा मूल्य अभिवृद्धि कर : नेपाल सरकारले पुर्णरुपमा ढुवानीमा मूल्य अभिवृद्धि कर लागू गरेपनी सो निर्णय कार्यान्वयनमा खासै प्रभावकारी देखिएको छैन,बिना VAT मा सामन ढुवानी हुने क्रम बढ्दै गएको छ, सो कानुन कडाइका साथ लागू गरियोस् नत्र खारेजी गरियोस् ।
५. राजमार्ग सुरक्षा : राजमार्गको नियमित अनुगमन गरी भासिने वा क्षति पुगेका स्थानहरूको तत्काल मर्मत गरी यातायातलाई सुरक्षित बनाइयोस्।
६.जनचेतना अभिवृद्धि : सवारी चालक र व्यवसायीहरूमा भारवहन क्षमताको पालना सम्बन्धी जनचेतना अभिवृद्धि कार्यक्रम सञ्चालन गरियोस्।
हामी यस समस्याको तत्काल समाधानको लागि सरकारसँग सहकार्य गर्न पूर्ण रूपमा प्रतिबद्ध छौँ। भविष्यमा यस्ता दुर्घटनाहरूबाट हुने जनधनको क्षति र यातायात अवरोधलाई कम गर्न सबै पक्षको सहयोग र समन्वय अपरिहार्य छ। साथै व्यवसायीहरुलाई पनि आफ्नो कर्तव्य पुरा गर्दै मापदण्ड विपरीत कार्य नगर्न / नगराउन समेत कम्पनी सम्पूर्ण व्यवसायीहरुलाई आग्रह गर्दछ ।
यसबारे कम्पनीका अध्यक्ष पराजुलीसँग गरिएको कुराकानी
मकवानपुर । हेटौंडा खानेपानी व्यवस्थापन बोर्डले १२ औं वार्षिकोत्सवको अवसरमा विगत १२ वर्षको सेवा, विकास र चुनौतीहरूको समीक्षा गर्दै भावी योजनाहरू सार्वजनिक गरेको छ।
संस्थाले हेटौंडा उपमहानगरपालिका क्षेत्रभित्रको शुद्ध खानेपानी आपूर्ति तथा व्यवस्थापनको जिम्मेवारी बहन गर्दै आएको छ। हाल बोर्डले ६२८ किलोमिटर पाइपलाइन विस्तार गरी दैनिक करिब ३ करोड ७० लाख लिटर पानी वितरण गरिरहेको छ। तथ्यांक अनुसार, हाल ५ वटा स्राेतबाट पानी संकलन हुँदै आएको छ भने पानी प्रशोधनका लागि २ वटा प्रशोधन केन्द्र सञ्चालनमा छन्।
संस्थाका अनुसार, आगामी दिनहरूमा नयाँ प्रशोधन केन्द्र निर्माण, पाइप विस्तार तथा वितरण सुधार, चुहावट नियन्त्रणलगायतका योजना अघि बढाइनेछ। साथै ग्राहकको गुनासो व्यवस्थापन तथा सेवा गुणस्तर सुधारमा समेत जोड दिने योजना सार्वजनिक गरिएको छ।
हेटौंडा खानेपानी व्यवस्थापन बोर्डले संघीय, प्रदेश र स्थानीय सरकारसँगको सहकार्यमा चालु आर्थिक वर्षमा पूर्वाधार विकासका थुप्रै योजना सफलतापूर्वक सम्पन्न भएका छन्।
बोर्डका अनुसार संघीय सरकारको खानेपानी तथा ढल व्यवस्थापन आयोजनाको सहलगानीमा १५ करोड रुपैयाँको लागतमा ओभरहेड टंकी १ वटा, भूमिगत टंकी ३ वटा, डिप बोरिङ्ग ४ वटा, पाइपलाइन विस्तार तथा विद्युतिकरण कार्य सम्पन्न गरिएको छ।
यस्तै, हेटौंडा उपमहानगरपालिका वडा नं १९ बस्तीपुरमा संघीय सरकारबाट करिब ८ करोडको लगानीमा सुरु भएको योजना अपुरो रहँदा बोर्डले थप ३ करोड रुपैयाँको लगानी गरी योजना सम्पन्न गरी सो क्षेत्रमा सेवा सुचारु गरिसकेको छ।
प्रदेश सरकारसँगको सहकार्यमा पनि ठूला योजना सम्पन्न
बागमती प्रदेश सरकारसँगको सहलगानीमा हेटौंडा वडा नं १९ मा समवेल, वडा नं १६ मा डिप ट्युबेल, त्रिशूले क्षेत्रमा ५ लाख लिटर क्षमताको भूमिगत पानी टंकी, र करिब २० किमी पाइपलाइन विस्तार कार्य सम्पन्न भइसकेको बोर्डले जनाएको छ।
त्यस्तै, बोर्डले हेटौंडा वडा नं ३, ६, ७, १४, १५, १६, १७, १८ र १९ मा सञ्चालित १६ वटा खानेपानी उपभोक्ता समितिबाट पूर्वाधार हस्तान्तरण गरी ९,५०० घरधुरीमा सेवा विस्तार गरिसकेको जनाएको छ।
सुदृढ पूर्वाधार निर्माण र मर्मतमा करोडौंको लगानी
२०८२ सालको वैशाख मसान्तसम्ममा खानेपानी मर्मत तथा संभारमा अत्यावश्यक फिटिङ्ग सामग्री, मोटर पम्पसेट खरिदका लागि करिब ७० लाख ३० हजार रुपैयाँ खर्च गरिएको छ। हेटौंडा–१६ मा डिप ट्युबेल र भूमिगत टंकी सञ्चालनमा ल्याइएको छ। यसैगरी, हेटौंडा–१६ शक्तिमा संघीय आयोजना र बोर्डको सहकार्यमा ६ वटा ९०० घनमिटर क्षमताका पानी संकलन टंकी, समवेल र ३ दशमलबब ५ किमी पाइपलाइन विस्तार कार्य सम्पन्न भई हस्तान्तरणको प्रक्रियामा रहेको छ।
थानाभऱ्याङ्ग सिमलटारमा सेवा विस्तार योजनामा तीव्रता
खानेपानी तथा सरसफाइ डिभिजन नं १ र बोर्डको सहकार्यमा थानाभऱ्याङ्ग सिमलटार क्षेत्रमा २ वटा समवेल, पाले घर निर्माण कार्य सम्पन्न, ४ दशमलब ५ लाख लिटर क्षमताको ओभरहेड टंकी निर्माण कार्य प्रगतिको चरणमा रहेको छ। चालु आर्थिक वर्षमा २१ किमी शाखा पाइपलाइन विस्तारको प्रक्रिया बोलपत्रमार्फत अगाडि बढाइएको छ।
गढी गाउँपालिका–४, सामरीमा १५ लाख रुपैयाँको लागतमा २ वटा समवेल संरक्षण तटबन्ध निर्माण, हरिकुञ्ज पानी पोखरी जाने सडकको स्तरोन्नती, हेटौंडा–१५ सानो सुकौलीमा १ लाख लिटर क्षमताको टंकी निर्माण।अन्य स्थानहरूमा भवन तथा पर्खाल मर्मत कार्य गरेको छ । पानी परीक्षण संघीय आयोजना मार्फत चालु आ।व।मा १५ लाख विनियोजन गरिएको र बोर्डले थप लागत साझेदारी गरेर पानी परीक्षणशालालाई स्तरीय बनाउने कार्य प्रकृया अगाडि बढाइएको बोर्डका अध्यक्ष प्रताप विष्टले जानकारी दिए ।
मकवानपुर । मकवानपुरकाे हेटौंडामा जिल्लास्तरीय फुलकन्ट्याक्ट कराँते प्रतियोगिता हुने भएको छ । आगामी २४ जेठमा पहिलो संस्करणको जिल्लास्तरीय प्रतियोगिता हुन लागेकाे हाे ।
मकवानपुर जिल्ला क्योकुशिन कराँते संघ (बालकुमारी आइकेओ) युनियनको आयोजनामा हेटौंडा–४,पारिजातपथस्थित बहुउद्देश्यीय कभर्ड हलमा जिल्लास्तरीय फुलकन्ट्याक्स कराँते प्रतियोगिता हुने संघका केन्द्रीय उपाध्यक्ष तथा जिल्लाका मुख्य प्रशिक्षक विष्णु श्रेष्ठले जानकारी दिए । ‘प्रतियोगिताको माध्यमबाट राष्ट्रिय तथा अन्तर्राष्ट्रियस्तरका खेलाडी उत्पादन गर्ने लक्ष्य छ’ उनले भने । युवा जनशक्तिको उत्पादन गर्न, मानसिक रुपमा स्वस्थ बनाउन र जिल्लामा खेलको विकास गर्नका लागि संघले पहिलो पटक प्रतियोगिताको आयोजना गर्न लागेको प्रशिक्षक श्रेष्ठले बताए ।
प्रतियोगितामा प्रथम,द्वितीय र तृतीय हुने खेलाडीले क्रमशः स्वर्ण, रजत र काँस्यपदक सहित प्रमाणपत्र प्राप्त गर्नेछन् । यस्तै, महिला र पुरुषतर्फको एक/एक जना उत्कृष्ट खेलाडीलाई मेडल तथा प्रमाणपत्र प्रदान गरिने छ । प्रतियोगितामा ११ वर्षदेखि २५ उमेर समूहका खेलाडीहरुले सहभागी हुन पाउने उनले जानकारी दिए । संघका प्रशिक्षक सुमन कर्मचार्यको संयोजनमा हुने प्रतियोगितमा महिलातर्फ ४ वटा विधामा र पुरुषतर्फ ५ वटा विधामा प्रतिस्पर्धा हुनेछ । पुरुषतर्फ ३० केजी, ३५ केजी, ४० केजी, ४५ केजी र ५० केजी तौल समूहका खेलाडीहरुको सहभागिता रहने छ भने महिलातर्फ ३५ केजी, ४० केजी, ४५ केजी र ५० केजी तौल समूहका खेलाडीहरुको सहभागिता रहने छ ।
मकवानपुरको हेटौंडा उपमहानगरसहित मनहरी गाउँपालिका, बागमती गाउँपालिका र थाहा नगरपालिकाबाट महिला तथा पुरुषगरी करिब १ सय ५० जना खेलाडीहरुको प्रतियोगितामा सहभागिता रहने आयोजकले अनुमान गरेकाे छ । प्रतियोगितामा सहभागी हुने खेलाडीहरुका लागि खाजा र खानाको व्यवस्था आयोजकले गर्ने उनले जानकारी दिए । प्रतियोगिताकाे लागि करिब २ लाख रुपैयाँ लाग्ने अनुमान आयोजकले गरेकाे छ । प्रतियोगिता आयोजनाका लागि हेटौंडा उपमहानगरपालिकासँग सहयोगको लागि प्रस्ताव पेश गरिएकाे बताइएकाे छ ।
मकवानपुर । मकवानपुरकाे हेटौंडामा नेशनल गोल्ड कप सिजन १ फ्री फायर खेलकाे प्रतियोगिता हुने भएको छ। हेटौडाबाट प्रशारण हुने नेशनल गोल्ड टेलिभिजनको आयोजनामा उक्त प्रतियाेगिता हुदैंछ ।
“खेल अब शारीरिक मात्र नभई मानसिक र प्रविधिको संयोजनमा आधारित हुनुपर्छ” भन्ने मूल नाराका साथ हुने प्रतियोगिताकाे मुख्य प्रायोजन हेटौडा स्कुल अफ म्यानेजमेन्टकाे रहने छ । बागमती प्रदेश खेलकुद विकास परिषदको सहकार्यमा आयोजना हुन लागेको प्रतियोगिता बुधबारबाट औपचारिक रूपमा सुरु भएकाे छ । प्रतियोगिताकाे फाइनल १७ जेठमा आयोजना गरिने आयोजक संस्था नेशनल गोल्ड टेलिभिजनका अध्यक्ष उज्वल चौलागाँईले जानकारी दिए ।
१ लाख रुपैयाँ पुरस्कार रहेको प्रतियोगिता नेपालकै ठूला ई स्पोर्ट्स प्रतियोगितामध्ये एक हुने उनकाे दाबी छ। मकवानपुर जिल्लामा यति ठूलो पुरस्कार राशिसहितको ईस्पोर्ट्स प्रतियोगिता पहिलोपटक आयोजना हुन लागेको हो। प्रतियोगितामा देशभरिबाट १६ वर्ष उमेर पुरा गरेका युवाहरूले अनलाइन गुगल फर्ममार्फत निशुल्क दर्ता गरेका छन्। ६ जेठसम्म खुल्ला गरिएको आवेदनमा १ हजार वटा टोलीको सहभागिता रहेको छ। प्रत्येक टोलीमा एकजना ब्याकअप खेलाडीसहित ५ जना खेलाडीको सहभागिता रहने उनले जानकारी दिए ।
सुरुका चरणका खेलहरू अनलाइन माध्यमबाट हुने भए तापनि क्वार्टर फाइनल, सेमिफाइनल र फाइनल खेलहरू भने हेटौडाको हिमालयन दरबार पार्टी प्यालेसमा आयोजना गरिने छन् । प्रतियोगितामा एक पटकमा १२ टोलीका ४८ जना खेलाडीहरूले प्रतिस्पर्धा गर्ने छन्। विशेषतः युवा पुस्तामा अत्याधिक लोकप्रिय रहेको फ्री फायरलाई आधार बनाएर यो प्रतियोगिता आयोजना गरिएको हो ।
आगामी संस्करण, सिजन २ बाट फुटबल लगायतका खेलहरूको प्रतियोगिता पनि समावेश गरिने आयोजकले जनाएकाे छ । यस्ता प्रतियोगिताले नेपाली ईस्पोर्ट्स क्षेत्रमा नयाँ आयाम थप्ने अपेक्षा गरिएको छ। हेटौडा सिटी कलेज, जे एन्ड बी वारिष्ठा एकेडेमी, होटल वासुकला, होटल सुर्यान्स, ई स्पोर्ट कन्सल्टेन्सीले सह-प्रायोजन गरेका प्रतियोगिताकाे प्रत्यक्ष प्रशारण नेशनल गोल्ड टेलिभिजन, टेलिभिजनकाे आधिकारिक युट्युब च्यानल, फेसबुक पेजमार्फत गरिने आयोजकले जनाएकाे छ ।
थाहाले जित्यो पालिकास्तरीय महिला भलिबलकाे उपाधी
Tags: No Comments
मकवानपुर । मकवानपुर हेटौंडामा भएकाे तेस्रो संस्करणको पालिकास्तरीय महिला भलिबल प्रतियोगिताको उपाधि थाहा नगरपालिकाले हात पारेकाे छ । मंगलबार भएकाे फाइनलमा थाहाले हेटौंडा उपमहानगरकाे टिमलाई २५–२०, ३०–२८ र २५–१९ को सोझो सेटमा हराउँदै प्रतियोगिताकाे विजेता बन्यो ।
प्रतियोगिताको विजेतासँगै थाहाले १ लाख रुपैयाँ हात पार्यो । उपविजेता हेटौंडाले ८० हजारमा चित्त बुझायो । यसैगरी सेमिफाइनल प्रवेश गरेका भीमफेदी र बकैया गाउँपालिकाकाे टिमले ३०/३० हजार रुपैयाँ प्राप्त गरे । प्रतियोगिताको सर्वोत्कृष्ट खेलाडी थाहाकी गंगा गुरुङ घोषित भइन् । यस्तै उत्कृष्ट स्पाइकर हेटौंडाकी नेहा चौधरी, डिफेण्डर हेटौंडाकै आइसा सिं दनुवार, ब्लकर भीमफेदीकी तुलसा चौधरी, सेटर थाहाकी लक्ष्मी बलामी र उत्कृष्ट प्रशिक्षक थाहाकै किरण गिरी घोषित भए । उदयीमान खेलाडी हेटौंडाकी अप्सना उप्रेती भइन् । सर्वोत्कृष्ट खेलाडी गुरुङले ७ हजार र अन्य विधागत उत्कृष्टले जनही ४/४ हजार रुपैयाँसहित ट्रफी र प्रमाणपत्र प्राप्त गरे ।
मंगलबार भएकाे पहिलो सेमीफाइनल खेलमा भीमफेदी गाउँपालिकालाई ३–१ सेटले पराजित गर्दै हेटौंडा फाइनल प्रवेश गरेको हो । हेटौंडाले भीमफेदीलाई २६–२४, २२–२५, २५–१८ र २५–२१ ले पराजित गरेको थियाे । यस्तै दोस्रो सेमीफाइनल खेलमा थाहा नगरपालिकाले बकैया गाउँपालिकालाई सोझो सेटमा पराजित गरेको छ । थाहाले बकैयालाई २५–१२, २५–१७ र २५–१८ को सेटमा हराएकाे थियो ।
हेटौंडा उपमहानगरपालिकाको आर्थिक सहयोग, मकवानपुर जिल्ला भलिबल संघ र केशवलाल श्रेष्ठ स्मृति केन्द्रीय प्रतिष्ठानको संयुक्त आयोजनामा भएको प्रतियोगितामा मकवानपुरका ७ वटा पालिकाको सहभागिता रहेको थियो । केशवलाल प्रतिष्ठानका अध्यक्ष प्रताव विष्ट, हेटौंडा उपमहानगरपालिकाकी मेयर मीना कुमारी लामा लगायतले विजेता उपविजेतालाई पुरस्कार वितरण गरे ।