मकवानपुर । बागमती प्रदेश स्वास्थ्य मन्त्रालयले वर्षाका कारण विपद् प्रभावितलाई स्वास्थ्य सेवा दिन मातहतका कार्यलयहरुलाई निर्देशन दिएको छ । बिहीबारदेखि परेकाे अविरल वर्षाकाे कारण विपद् प्रभावितहरूलाई स्वास्थ्य सेवा दिन बागमती प्रदेश अन्तर्गतका सम्पूर्ण अस्पतालहरूलाई सतर्क रहन स्वास्थ्य मन्त्री किरण थापाले निर्देशन दिएका हुन् ।
प्रदेशका चिकित्सक, नर्सहरू, र स्वास्थ्यकर्मीहरूलाई आपतकालीन सेवाका लागि तयारी अवस्थामा राख्ने, औषधि र आवश्यक सामग्रीको भण्डार सुनिश्चित गर्ने, आपतकालीन अवस्थाका लागि अत्यावश्यक औषधि, उपकरण, र रक्तको आपूर्ति सुनिश्चित गर्ने, अतिरिक्त बेडको व्यवस्थासहित सम्भावित प्रभावितहरूको उपचारका लागि थप बेडहरू उपलब्ध गराउ उनले निर्देशन दिएका छन् ।
यसैगरी आपतकालीन सेवाहरूलाई प्राथमिकता दिने, राहत र उद्धारका लागि स्थानीय निकाय र अन्य सरोकारवाला निकायहरूसँग समन्वय गरी विपद् प्रभावितहरूको स्वास्थ्य उपचारमा सहयोग गर्ने, संक्रमण रोकथामका उपायहरू अपनाउने, बाढी तथा जलमग्न भएका क्षेत्रहरूमा फैलिन सक्ने संक्रमणको रोकथामका लागि आवश्यक स्वास्थ्य परीक्षण र उपचारको तयारी गर्ने, आपतकालीन सेवाका लागि सम्पर्क नम्बरहरू र जिम्मेवार व्यक्तिहरूको विवरण प्रत्येक अस्पतालमा उपलब्ध गराउने मन्त्रीस्तरीय निर्णय भएको स्वास्थ्य मन्त्रालयले जानकारी दिएको छ ।
मन्त्रालयले स्वास्थ्य निर्देशनालय, स्वास्थ्य आपूर्ति व्यवस्थापन केन्द्र, प्रदेश जनस्वास्थ्य प्रयोगशाला, प्रदेशका १३ वटै अस्पताल, १३ वटा जनस्वास्थ्य कार्यालयहरु, १३ वटै आयुर्वेद तथा वैकल्पिक चिकित्सालयलाई आवश्यक कार्यको लागि खटीन निर्देशन गरिएको स्वास्थ्य मन्त्री थापाले जानकारी दिए । प्राकृतिक प्रकोपका कारण भएको विपत्तिमा उपचार अभावमा मानवीय क्षति रोक्न मन्त्रालयले आवश्यक तयारी गरिसकेको समेत मन्त्री थापाले बताए ।
चितवन । राष्ट्रपति रामचन्द्र पौडेलले गरिब, असहाय तथा निमुखा नागरिकलाई ध्यानमा राखेर स्वास्थ्य सेवा उपलब्ध गराउनेतर्फ बताउनु भएको छ । उपचारलाई सेवाको रुपमा अस्पताल तथा स्वास्थ्यकर्मीले ध्यान दिनुपर्ने राष्ट्रपति पौडेलले बताउनुभयो ।
बिपी कोइराला मेमोरियल क्यान्सर अस्पताल भरतपुरको २५ औँ वार्षिकोत्सव तथा २० औँ राष्ट्रिय क्यान्सर सतर्कता दिवसका अवसरमा आज आयोजित कार्यक्रममा राष्ट्रपति पौडेलले गरिब तथा असहाय वर्गलाई प्राथकितामा राखेर सेवा उपलब्ध गराउन अस्पताल तथा स्वास्थर्कीसँग अनुरोध गर्नुभयो ।
स्वास्थ्य सेवालाई संविधानले मौलिक हकका रुपमा प्रत्याभूत गरेको र यसलाई कार्यन्वयनमा उतार्नको लागि गरिब तथा निमुखा जनतालाई केन्द्रमा राखेर स्वास्थ्य सेवा प्रदान गर्नु स्वास्थ्य सेवा प्रदायक संस्थाहरूको जिम्मेवारी र दायित्व भएको पौडेलले बताउनु भयो ।
दक्ष जनशक्ति, अत्याधुनिक उपकरण, सहज एवं प्रभावकारी नवीनतम् प्रविधिका माध्यमबाट बिरामीलाई गुणस्तरीय सेवा प्रदान गर्नेतर्फ सरकार र निजी क्षेत्रले ध्यान दिन उहाँले निर्देेशन दिनु भयो ।
“क्यान्सर रोगको उपचार, रोकथाम तथा नियन्त्रण र अध्ययन अनुसन्धानमा आवश्यक जनशक्ति उत्पादन गर्न तथा अस्पतालको सेवालाई चुस्तदुरुस्त र अन्तर्राष्ट्रियस्तरमा स्तरोन्नति गर्न नेपाल सरकारलाई विशेष ध्यान पु-याउनु आग्रह गर्दछु”, राष्ट्रपति पौडेलले भन्नुभयो ।
क्यान्सर रोगबाट ग्रसित प्रथम जननिर्वाचित प्रधानमन्त्री बिपी कोइरालाले विदेशमा गएर उपचार गर्नुपरेकाले स्वदेशमै यससम्बन्धी रोगको उपचार गर्ने सुविधा सम्पन्न क्यान्सर अस्पतालको परिकल्पना गर्नुभएको स्मरण गर्दै उहाँले २०४९ सालमा तत्कालीन सरकारले लिएको विकेन्द्रीकरणको नीतिलाई कार्यान्वयन गर्ने एक उत्कृष्ट उदाहरणका रुपमा यो अस्पताल निर्माण भएको बताउनुभयो । भरतपुरस्तिथ राष्ट्रियस्तरको अस्पताल क्यान्सर रोगका बिरामीको सेवामा मात्र सीमित नभई अध्ययन, अनुसन्धान र प्रशिक्षणका क्षेत्रमा पनि अगाडि बढेकामा उहाँले खुसी व्यक्त गर्ने भयो ।
क्यान्सरको उपचार, पहिचान, निदान र सचेतनामा सशक्त भएर लागौं : कार्यवाहक प्रम सिंह
नेपाल सरकारका कार्यवाहक प्रधानमन्त्री प्रकाशमान सिंहले क्यान्सरको उपचार, पहिचान, निदान र सचेतनामा सशक्त भएर लाग्न क्यान्सर अस्पतालका चिकित्सक एवं कर्मचारीहरुलाई निर्देशन दिनुभएको छ । अस्पतालले गर्ने कार्यहरु नेपाल सरकारको नीतिअनुसार बिरामी मैत्री बन्नुपर्ने उहाँको भनाइ थियो ।
नेपालमा सबै क्यान्सर रोगको उपचार सम्भावना हुनेगरी कार्य गर्ने सङ्कल्प र प्रतिबद्धता आएकोमा उहाँले धन्यवाद दिनुभयो । अस्पतालबाट प्रदान गरिने सेवाहरुको विस्तृत विवरण प्रतिवेदनका रुपमा सार्वजनिक भएबाट अस्पतालका कार्यहरु नेपाल सरकारका नीतिअनुसार बिरामी मैत्री भएकोमा उहाँले विश्वास प्रकट गर्नुभयो ।
अस्पतालमा सबै प्रकारका रोगको उपचारका लागि आवश्यक पर्ने लिन्याक र सिटी सिमुलेटरको उपकरण खरिद गर्न सरकारको तर्फबाट सक्दो पहल गर्ने उपप्रधानएवं सहरी विकासमन्त्री सिंहले जानकारी दिनुभयो । अस्पताल क्यान्सर रोगको उपचराका लागि विदेशीनु नपरोस् भन्ने उद्देश्यका साथ स्थापना गरिएकोले यसलाई अझै सशक्त बनाउन आवश्यक रहेको आफूले समेत महसुस गरेको उहाँले बताउनु भयो ।
सबल उपचार र बलियो मानसिकताले क्यान्सरमाथी बिजय संभव छ : प्रदेश प्रमुख देवकोटा
सोही कार्यक्रममा बागमती प्रदेश प्रमुख दीपक प्रसाद देवकोटाले अस्पताल देशको लाइफलाइन अस्पतालका रुपमा रहेको बताउनुभयो । क्यान्सरको उपचारका लागि प्रथम विन्दुका रुपमा रहेका बताउनु हुँदै उहाँले सवल र उत्कृष्ट उपचारले क्यान्सर रोग निको हुने बताउनुभयो । “अस्पतालले उत्कृष्ट सेवा बिस्तार र जनताले सहज उपचार पाउनुपर्छ” उहाँले भन्नुभयो ।
“नेपाली समाजमा क्यान्सरप्रति धेरै भय र सुरुवाती लक्षणहरुलाई बेवास्ता गरि अस्पताल जान नचाहने प्रवृत्ति छ, क्यान्सर र मृत्युलाई पर्यायवाची लिएर सजिलै निको हुने अबस्थालाई पनि मतलब नगरेको पाइन्छ” उहाँले भन्नुभयो “क्यान्सर भएको पत्ता लागेमा मानसिक तनाब र चिन्ताले स्वास्थ्य झनझन बिग्रेको अवस्था छ, निको हुन सक्ने स्टेजका बिरामी पनि मृत्युबरणको अबस्थामा पुग्छन् ।” यस्तो अवस्थाबाट बच्नको लागि सबल उपचार र बलियो मानसिकताले मात्र क्यान्सरमाथी बिजय प्राप्त गर्न सकिने उहाँले बताउनु भयो ।
“बी पी कोइराला मेमोरियल क्यान्सर अस्पतालको गहन अत्याधुनिक सेवा सुबिधा, द्रुत परीक्षण, रोकथाम र जनचेतनामूलक कार्यक्रमको अपेक्षा राख्दछौ” उहाँले भन्नुभयो ।
“क्यान्सरसम्बन्धी जनचेतनामा जोड दिन सकियो भने यो खर्चिलो रोग बन्ने छैन” उहाँले भन्नुभयो “क्यान्सरको उपचारमा कसैको घरवारी र चेलीको गरगहना बेचिने अबस्था नआउने गरि सरोकारवाला सम्पुर्ण पक्षको ध्यान जानुपर्ने देखिन्छ ।”
अस्पतालका कार्यकारी निर्देशक डा शिवजी पौडेलले नेपालमा रहेका क्यान्सर रोगका बिरामीमध्ये ५० देखि ६० प्रतिशतको उपचार यस अस्पतालमा हुने गरेको बताउनुभयो । बीस प्रतिशत नेपालका अन्य अस्पतलाहरुमा र २० प्रतिशत छिमेकी राष्ट्रसहित अन्य मुलुकमा उपचारका लागि जाने गरेको उहाँले जानकारी दिनुभयो । भविष्यमा यस अस्पताललाई ७०० शैयाको बनाउने योजना रहेको डा पौडेलको भनाइ छ ।
अस्पतालमा उपचारका लागि आउने बिरामीको सङ्ख्या वार्षिक रुपमा बढ्दै गएको उहाँले बताउनुभयो । उहाँका अनुसार आर्थिक वर्ष २०७९/०८० मा १ लाख ६६ हजार २०० बिरामीले उपचार गराएको यस अस्पतालमा गत आर्थिक वर्ष २०८०/८१ मा १ लाख ८८ हजार ५१४ जनाले सेवा लिएका छन् । जसमध्ये ६ हजार ७९५ नयाँ क्यान्सरका बिरामी रहेको उहाँले बताउनुभयो । कार्यक्रममा २५ वर्षदेखि क्यान्सर रोग लागेर अहिले निको हुनुभएका बिष्णुप्रसाद पोडेल, अञ्जनी स्मृति अक्ष्यकोषका दाता तीर्थराज पराजुलीसहित चिनियाँ टोलीका लिडरलाई सम्मान गरिएको अस्पताल सञ्चालक समितिका अध्यक्ष डा विजय न्यौपानेले जनाकारी दिनुभयो ।
चीन सरकारको सहयोगमा निर्माण भएको अस्पताल २०५७ सालमा तत्कालीन प्रधानमन्त्री गिरिजाप्रसाद कोइरालाले उद्घाटन गर्नुभएको हो । महामानव बिपी कोइरालाको स्मृतिमा २०४८ सालमा तत्कालीन प्रधानमन्त्री जिरिजाप्रसाद कोइराला र चिनियाँ प्रधानमन्त्री ली फङबीच सम्झौता भई यो अस्पताल स्थापना भएको हो । स्थापनाकालमा १०० शैया क्षमतासहितको क्यान्सर अस्पताल अहिले ५०० शैयामा विस्तार भएको छ ।
मकवानपुर । मकवानपुर जिल्लामा डेंगु र स्क्रब टाइफसका बिरामी बढ्दै गएकाे छ । जिल्लामा मंगलबारसम्म डेंगु संक्रमितको संख्या ६३६ जना पुगेको छ । यसैगरी स्क्रब टाइफसका बिरामी २३९ जना पुगेको छ ।
डेंगु संक्रमितको कुल संख्या मध्ये ३३५ पुरुष र ३०१ महिला रहेका छन् । स्क्रब टाइफसका बिरामी ८० पुरुष र १५९ महिला रहेका छन् । उक्त तथ्याङ्क साउन २०८१ देखि मंगलबारसम्मको हो ।
यसैगरी मकवानपुरमा पछिल्लो २४ घण्टामा २४ जना डेंगु संक्रमित र ३ जना स्क्रब टाइफसका बिरामी भेटिएका छन् । जनस्वास्थ्य कार्यालय मकवानपुरका अनुसार, सो अवधिमा जिल्लाको हेटौंडा उपमहानगरपालिकाका २० जना, मकवानपुरगढी गाउँपालिकाका एक जना, मनहरी गाउँपालिकाका एक जना र अन्य जिल्लाका दुई जना गरी २४ जना डेंगु संक्रमण पुष्टि भएको हो ।
यसैगरी, सोही अवधिमा हेटौंडा उपमहानगरपालिकाका एक जना र मकवानपुरगढी गाउँपालिकाका दुई जना गरी ३ जनाम स्क्रब टाइफसका बिरामी भेटिएको स्वास्थ्य कार्यालय जनाएको छ ।
मंगलबार थपिएसँगै हेटौंडा उपमहानगरपालिकामा २५७ पुरुष र २४४ महिला गरी ५०१ जना, थाहा नगरपालिकामा एक पुरुष र एक महिला गरी २ जना, मकवानपुरगढी गाउँपालिकामा १५ पुरुष र ९ महिला गरी २४ जना, बागमती गाउँपालिकामा एक जना पुरुष, कैलाश गाउँपालिकामा ४ पुरुष, मनहरी गाउँपालिकामा २० पुरुष र १४ महिला गरी ३४ जना, बकैया गाउँपालिकामा ६ पुरुष र ५ महिला गरी ११ जना,भीमफेदी गाउँपालिकामा ४ पुरुष र ८ जना महिला गरी १२ जना, राक्सिराङ गाउँपालिकामा एक पुरुष
हाल ठेगाना नखुलेका १२ पुरुष र १४ महिला गरी २६ जना,अन्य जिल्लाका १३ पुरुष र ५ महिला १८ जनामा डेंगु संक्रमण पुष्टि भएको छ ।
यसैगरी मंगलबार थपिएसँगै हेटौंडा उपमहानगरपालिकामा ९१ महिला र ५० पुरुष गरी १४१ जना, मकवानपुरगढी गाउँपालिकामा २६ महिला र १० पुरुष गरी ३६ जना, बागमती गाउँपालिकामा दुई पुरुष, कैलाश गाउँपालिकामा एक महिला र एक पुरुष गरी २ जना, मनहरी गाउँपालिकामा ६ पुरुष र १२ जना महिला गरी १८ जना, इन्द्रसरोवर गाउँपालिकामा एक महिला, भीमफेदी गाउँपालिकामा दुई पुरुष र १४ जना महिला गरी १६ जना, बकैया गाउँपालिकामा ८ पुरुष र ९ महिला गरी १७ जना, राक्सिराङ गाउँपालिकामा एक जना महिला र अन्य जिल्लाका एक पुरुष र तीन महिला गरी ४ जना स्क्रब टाइफसका विरामी रहेका छन् ।
थाहा नगरपालिकामा भने हालसम्म स्क्रब टाइफसको बिरामी फेला नपरेको स्वास्थ्य कार्यालय मकवानपुरले जनाएको छ ।
मकवानपुर । संबिधान दिवसकाे अबसरमा अपाङता भएका व्यक्तिहरुलाई कृतिम खुट्टा र ह्विल चेयर वितरण गरिएको छ । संविधान तथा राष्ट्रिय दिवसको अवसरमा बागमती प्रदेश स्वास्थ मन्त्री किरण थापाले नि:शुल्क कृतिम खुट्टा र ह्विल चेयर वितरण गरेका हुन् ।
प्रदेश स्वास्थ्य मन्त्रालय,सामाजिक बिकास मन्त्रालय,मारवाडी सेवा समिति नेपाल र पशुपती गौशाला धर्मशालाद्वारा संयुक्त रुपमा काठमाडौ आयोजना गरिएकाे कार्यक्रममा ७ जनालाई ९ वटा कृतिम खुट्टा र ६ जनालाई व्हिल चेयर वितरण गरिएको थियाे ।
मन्त्री थापाले मानवीय सेवामा बागमती प्रदेश सरकार सदैव तत्पर रहेको बताए । खुट्टा नभएकै कारण धेरै नै कष्ट खेप्नुपरेको महसुस गर्दै सहकार्य गरी यस्ता सामग्री बितरण गरिएको उनले जानकारी दिए । ‘सहयोग सानै भएपनि कहिलेकाही ठुलो हुन्छ’ मन्त्री थापा भने ‘कृतिम खुट्टा वितरण पछि उहाँहरुको जीवन सहज हुने विश्वासका साथ यो कार्यक्रम अगाडि बढाइएको हो ।’
मारवाडी सेवा समिति र पशुपति गौशाला धर्मशालासँग निशुल्क शवबाहन संचालन, विभिन्न अस्पतालमा प्रति छाक ४० रुपैयाँँमा खाना खुवाउने कार्यको पनि सम्झौता हुने क्रममा रहेको उनले जानकारी दिए । यस्तै शुद्ध पिउने पानीको लागि अस्पतालमा ४ लाख बराबरको वाटर प्युरिफायर समेत राख्ने तयारी भएको मन्त्री थापाले बताए । मारवाडी समिति र धर्मशालाले मानवीय सेवामा पुर्याएकाे विभिन्न कार्यको मन्त्री थापाले प्रशंसा गरे । मानवले दान भन्दा मानव उत्थानको सेवा गर्नु नै मुख्य धर्म रहेको उनले बताए । उनले मानवसेवाबाट पाएको आशीर्वादले मन आनन्द हुने भन्दै सबैमा सेवाभाव जागृत हुनुपर्ने बताए ।
कार्यक्रम पशुपति गौशाला धर्मशालाका अध्यक्ष रमेश तपडियाको अध्यक्षतामा भएको हो ।
मकवानपुर । उपभाेक्ताकाे व्यापक गुनासाे आउँदा समेत प्रायः चासाे नदेखाउने प्रशासनले चाडपर्व नजिकिदै गर्दा हेटाैडा बजार अनुगमन गरेकाे छ । करकाे दर बढाएकाे निहुँमा हेटौंडा उपमहानगरपालिकासँग आक्राेशित व्यवसायीहरुलाई ‘तह’ लगाउने भन्दै गरिएकाे बजार अनुगमनपछि केही व्यापारीलाई जरीवान गरिएकाे छ ।
हेटौंडा उपमहानगरपालिकाकाे नेतृत्वमा चाडपर्व लक्षित बजार अनुगमन सुरु गरिएको हाे । हेटौंडा उपमहानगरपालिका कार्यालय, जिल्ला प्रशासन कार्यालय, खाद्य प्रविधि तथा गुण नियन्त्रण कार्यालय, घरेलु उद्योग वाणिज्य कार्यालय र उपभोक्ता हितसंरक्षण मञ्चको संयुक्त बजार अनुगमन गर्दा गैर कानूनि भेटिएपछि केहीलाई कारवाहीकाे दायरामा ल्याउन लागिएकाे उपमहानगरपालिकाले जनाएकाे छ ।
यसपालीकाे बजार अनुगमन विगतमाभन्दा प्रभावकारी बनाइएको पाइएकाे छ । सरोकारवाला निकायले बजार अनुगमनलाई ‘आक्रामक’ बनाउँदै कमजोरी देखिए ठाउँकोठाउँ कारबाही गरेर जरिवाना तिराइने भएको छ ।
विगतमा बजार अनुगमनबाट फर्किएर कार्यालयमा कमजोरीका दृष्टिले कस्तो कारबाही गर्ने भन्ने निर्णय हुने गरेको थियो । यसो हुँदा कमजोर कारबाही र बजार अनुगमनको प्रभावकारितामाथि प्रश्न उठ्ने गरेको थियो । जहाँ चिनजानकाे आधारमा कम कारवाही ताेक्नेदेखि आर्थिक लेनदेन समेत हुने गरेकाे गुनासाहरु आउने गरेका थिए ।
यसअघि विभिन्न निकायसँग समन्वय गरेर गर्ने बजार अनुगमन नाम मात्रैको अनुगमन हुने गरेको पाइएको उपभोक्ताहरुले नै गुनासो गर्ने गरेका थिए । अनुगमनका क्रममा व्यापारी तथा व्यवसायीलाई दिएको निर्देशन कार्यान्वयन नभएपछि नाम मात्रैको बजार अनुगमनमा सीमित हुने गरेको उपभोक्ताहरुको भनाई थियो ।
यसपटककाे बजार अनुगमनले कमजोरी देखिएमा साेही ठाउँमै कारबाही गर्दै जरिवाना तिराएको हो । हेटौंडामा वर्षौदेखि सञ्चालनमा आएको हेटौंडा–४, पारिजातपथ स्थित दाजुभाइ फाष्टफुडलाई संयुक्त बजार अनुगमनको क्रममा उपमहानगरपालिकाले २५ हजार जरिवाना गराएको छ । चितवनको शाखाको रुपमा रहेको पारिजातपथकै वैष्णव होटललाई पनि २५ हजार नै जरिवाना गराइएको छ । यी दुई होटललाई सात दिनभित्र उपमहानगरपालिका कार्यालयमा जरिवाना तिर्न पत्र काटिएको छ ।
दाजुभाइ फाष्टफुडमा भान्सा फोहोर भएको, मःम बनाउन ल्याइएको बन्दा कुहिएको अवस्थामा अव्यवस्थितसँग राखिएकोलगायतको कमजोरी फेला परेको थियो । दाजुभाइ फाष्टफुडका सञ्चालक राजकुमार गौतमलाई उमनपाकाे कार्यालयमा अनिवार्य उपस्थित हुन अनुगमन समितिले निर्देशन दिएको छ । दाजुभाइको खोपेगल्लीमा रहेको मिठाईको भान्सामा फोहोरको ढल निकास नगरी नजिकै मिठाई बनाइरहेको अनुगमन टोलीले फेला पारेको थियो । भान्सा सुधार गर्न निर्देशन दिइएको उपमहानगरको उद्योग, पर्यटन, सहकारी शाखाप्रमुख हिमप्रसाद पौडेलले जानकारी दिए ।
यसैगरी, वैष्णव होटलले कालो ढुसी परेको पाउरोटी बिक्रीका लागि राखेको अनुगमन टोलीले फेला पारेको थियो । वैष्णवमा भान्सा सरसफाई नगरिएको, उद्योग वाणिज्य कार्यालयमा दर्ता नगरी व्यवसाय सञ्चालन गरेको, बिक्रीका लागि राखिएका खाद्यवस्तुको लेबलिङ उपयुक्त तरिकाले नराखेको भेटिएको थियो ।
वैष्णव होटलले चितवनबाटै मःमलगायतका तयारी खाद्यवस्तु हेटौंडा ल्याएर बिक्री गर्ने खुलेको छ । पारिजातपथमै अनमोल होटलको भर्खरै सञ्चालनमा आएको भनिएको नयाँ होटललाई सचेत गराइएको छ ।
बजार अनुगमनको नेतृत्व उपमहानगरको आर्थिक विकास महाशाखाअन्तर्गतको उद्योग, पर्यटन, सहकारी शाखा प्रमुख पौडेलले गरेका थिए । अनुगमनमा जिल्ला प्रशासन कार्यालय मकवानपुरका दीपक पौडेल, खाद्यप्रविधि तथा गुण नियन्त्रण कार्यालयका खाद्यनिरीक्षक दीपक घिमिरे, घरेलु उद्योग वाणिज्य कार्यालयप्रमुख रामप्रसाद भुषाल, उद्योग वाणिज्य संघ, उपभोक्ता हितसंरक्षण मञ्चका केन्द्रीय उपाध्यक्ष बासु खतिवडा, मकवानपुर उद्योग वाणिज्य संघका पवन कार्की लगायतको उपस्थिति रहेको थियो ।
‘अब हामीले अनुगमनकै क्रममा जरिवाना तिराउँछौं यसले हुँदा अनुगमनको प्रभावकारिता बढाउँछ’ पाैडेलले भने । यसअघि धेरै पटक सचेत गराउँदा पनि होटल सञ्चालकहरु अटेरी बनिरहेका उनले बताए । उपमहानगरपालिकाले कारबाहीलाई पनि झन बलियो बनाएर जाने याेजना रहेकाे पौडेलले बताए । उपभोक्तालाई ढुक्कसँग खाद्यवस्तु उपभोग गर्न सक्ने वातावरण निर्माणको लागि उपमहानगरपालिका लागिपरेको पौडेलले बताए । उनले बजार अनुगमनलाई तीव्रता दिइने बताए । चाडपर्व नजिकिएसँगै बजारमा बढ्न सक्ने कालाेबजारीलाई नियन्त्रण गर्न उपभाेक्ताहरु प्रशासनकाे सहकायर्य जरुरी रहेकाे उपभोक्ता हितसंरक्षण मञ्चका केन्द्रीय उपाध्यक्ष बासु खतिवडाले बताए ।